TBP Balochi

بلوچستان ءِ دمگ ڈیرہ بگٹی ءَ گوستگیں اُستانی وزیر داکلہ ءُ انیگیں سینیٹر سرفراز بگٹی ءِ کاروان ءَ ھواریں گاڑی ناشناساں بمب ءِ نشانگ جوڑ کتگ-

ڈپٹی کمشنر ڈیرہ بگٹی ممتاز کھیتران ءِ رد ءَ ھما دمگ ءَ وئیل پیش اتکگ آ روجھان پور ءِ دمگ اِنت، ڈی سی ءِ رد ءَ سینیٹر سرفراز بگٹی تراک ءَ بچ اتگ بلے آئی ءِ پھزدار زدگ بوتگ اَنت-

آئی ءَ گُشتگ کہ سینیٹر سرفراز بگٹی عید ءِ وشیاں ڈیرہ بگٹی ءَ روگ ءَ بوتگ کہ آ نشانگ کنگ بیتگ –

سرفراز بگٹی ءِ سر ءَ دمگ ءَ امن لشکر ءِ نام ءِ سر ءَ ڈیتھ اسکواڈز ءِ دارگ ءِ بھتام ھست اِنت- چریشی ءَ پیسر ھم سرفراز بگٹی ءِ نزیکیں مردم بمب تراک ءُ دگہ اُرشانی نشانگ کنگ بیتگ اَنت-

مروچی بیتگیں وئیل ءِ بارو ءَ ھچ سرپدی نہ بیتگ نانکہ دگہ گلے ءَ پہ وت ءَ اشی ءِ زمہ واری پہ وت ءَ زرتگ-

سربوتگیں ھالانی رِد ءَ بلوچستان ءِ بنجاھی شھر شال ءُ کلات ءِ دمگ منگچر ءَ ناشناسیں مردمانی تیرگواری ءَ سَے مردم بیران بوتگ انت-

شال ءَ تیرگواری ءِ وئیل مروچی شمبے ءِ روچ ءَ کلی گوہر آباد لانگو چار راہ ءِ نزیک ءَ بوتگ کہ تیرگواری ءَ بیست ءُ پنچ سالی وقاص احمد ء بشیر احمد تیرباران کنگ ءُ کُشگ بوتگ –

تیرگواری ءِ سوب تنی وھدی زانگ نہ بوتگ ءُ کتکار تچگ ءُ روگ ءَ سوبمند بوتگ، وئیلے ھال سربوگ ءَ پولیس ءَ راہ ءُ در بند کتگ ءُ کتکار ءِ شوھاز بندات کتگ –

دمگی واکداراں جون سول ھسپتال ءَ بُرتگ ءُ اودا اژدری چار ءُ ٹپاس ءَ پد جون کھول ءِ دست ءَ داتگ –

دومی نیمگ ءَ منگچر ءَ دو مردم تیرباران کنگ ءُ کُشگ بوتگ انت – اھوالکار ءِ رحم دین ء شھباز خان بنگلزئی ءُ قادر بخش ء عبدالفتاح لہڑی جھمنند جوہان منگچر پرپٹ ءِ سر ءَ رؤگ ءَ بوتگ انت کہ پینزئی ڈیم منگچر ءِ نزیک ءَ ناشناسیں سلاہ بندیں مردماں آھانی سر ءَ تیرگواری کتگ کہ بیران بوتگ انت – آھانی جون کلات نادراھجاہ ءَ برگ بوتگ انت اے درگت ءَ گیشیں پٹ ءُ پول برجاہ انت –

بلوچستان ءِ دمگ چہ نوشکی ءَ زورانسری آوار بوتگیں دگہ یک ورنایے ءِ پجّار بوتگ، یکجاھی ھساب ءَ بیگواھیں ورنایانی کچ شش بوتگ اَنت-

ٹی پی بی ءِ اھولکار ءِ رِد ءَ گْوستگیں شپ ءَ نوشکی ءِ شھر ءَ ھواریں دمگ چہ قادر آباد ءَ بیگواہ کنگ بوتگیں ورنا ءِ پجّار افتخار بلوچ ء بدل خان نام ءَ چہ بوتگ کہ آ میٹرک ءِ یک نودربرے-

اے ورنا ھم گوستگیں شپ ءَ پاکستانی پوج ءَ لوگاں بیڑبرتگ ءُ ھمے میان ءَ آوار جتگ ءُ ناشناسیں جاھے ءَ برتگ – گوستگیں شپ ءَ بیگواہ کنگ بوتگیں ورنایانی کچ شش بوتگ اَنت وھدے کہ اشانی تہ ءَ چاردہ سالی ئیں نودربر ھم ھوار اَنت-

دمگی مردماں گْوشتگ کہ گوستگیں شپ ءِ ساھت دو ءِ نزیک ءَ پاکستانی پوج فرنٹیئر کور ءُ لس پوشاکی گدانی کارندھانی مزنیں کچے ءَ دمگ ءَ اَتکگ ءُ بیڑبرتگ، ھمے میان ءَ زالبولاں ھوار دگہ مردم لَٹ ءُ کُٹانی نشانگ کتگ اَنت-

دمگی واکداراں تنی وھدے اے درگت ءَ ھچ وڑیں درشان دیم ءَ نیتکگ-

بلوچستان ءِ دمگ نوشکی ءَ پنچ ورناہ آوار جنگ ءَ پد بیگواہ-

ٹی بی پی ءِ اھوالکار ءِ رد ءَ نوشکی ءِ شھر ءَ ھواریں دمگ قادر آباد ءَ گوستگیں شپ ء پاکستانی پوج ءَ لوگانی سر ءَ بیڑ بُرتگ ءُ ھمے وھد ءَ پنچ ورناہ آوار جتگ ءُ دیم پہ ناشناسیں جاھاں برگ بیتگ اَنت کہ آیانی درگت ءَ تنی وھدی ھچ ھال نیست اِنت-

دمگی مردماں گُشتگ گوستگیں شپ ءِ ساھت دو ءَ پاکستانی پوج فرنٹیئر کور ءُ لس پوشاک گوریں کارندھاں بازیں کچے ءَ اتکگ ءُ لوگانی سر ءَ بیڑ برتگ – ھمے وھد ءَ زالبول ءُ لوگانی دگہ مردم لٹ ءُ کُٹانی نشانگ کنگ بیتگ اَنت-

زورانسری آوار جنی ءِ آماچ بیتگینانی تہءَ چاردہ سالی ئیں ادریس ء ھاجی اکبر، چاردہ سالی ئیں بلال ء ساھب ھان، پانزدہ سالی ئیں جلیل ء ساھب ھان، ھبدہ سالی ئیں زبیر ء میر اھمد، بیست سالی ئیں ھالد ء منیر ھوار اَنت-

دمگدارانی نیمگ ءَ اے درگت ءَ تنی وھدی ھچ پئیمیں لیکہ دیما نئیتکگ –

زانگ بہ بیت دو روچ ءَ پیسر دشت ءِ دمگ سورک ءَ پاکستانی پوج ءَ دو ورنا تنویر شوھاز ء ملا منیر ءُ قیوم ء جماعت دزگیر کُتگ ءُ ناشناسیں جاھاں برتگ اَنت کہ بازیں اداراں پد یلو کنگ بیتگ اَنت-

کراچی پریس کلب ءِ دیما بیگواھیں مردمانی ھاتر ءَ زھرشانی بنجل برجاہ، زھرشانی بنجل ءَ چاردہ روچ سرجم بوتگ انت –

زھرشانی بنجل ءَ بیگواھیں عبدالحمید زھری ءِ زھگ سعیدہ حمید ءَ گوشتگ کہ سرجمیں ملک ءَ ائید ءِ تیاری بوگ ءَ انت، مردم کربانی زورگ ءُ ائید شاپنگ ءَ کنگ ءَ انت بلے ما وتی دوستیگیں مردمانی بیگواھی ءِ سوب ءَ ائید ءِ تیاری ءَ ھم زبھر ایں پرچاکہ مئے کمائینوک بیگواہ انت چریشی ءِ سوب ءَ مئے مالی جاور نگیگ انت –

آئی ءَ گوشتگ کہ مئے دوستیگیں مردم ائید ءَ ساری یل کنگ بہ بنت تانکہ آ وتی ائید ءَ پہ وشی بگوازینان – سعیدہ حمید ءَ گوشتگ کہ اگاں آھانی دوستیگیں مردم یل کنگ نہ بوتاں گڑا ائید ءِ روچ ءَ ھم زھرشانی برجاہ بیت ایں –

مروچی زھرشانی بنجل ءَ عبدالحمید زھری، سعید عمر، شوکت بلوچ ءُ نوربخش حبیب ءِ کھول ساڑی بوتگ انت –

دین اسلام ءِ جوانتریں روچ سال دوھزار ءُ بیست ءُ دو ءِ ھج خطبہ میدان عرفات ءَ کنگ بیتگ، ھمے سال ءَ حجام کرام آدینگ ءِ روچ ءَ ھج اکبر ءِ منگھی رس اتگ-

گیشیں ھالانی رد ءَ 1443 ہجری ءِ ھج اکبر ءِ اراکین ءِ ادا کنگ ءَ پد خطبہ ھج ءِ میدان عرفات ءِ مسیت نمرہ ءَ دیگ بیتگ، ھمے سال ءِ خطبہ ھج ءِ واستا ڈاکٹر مھمد دین عبدالکریم العیسیٰ تران ءِ واستا نامینگ بیتگ-

ھمے سال ءَ خطبہ میدان ءِ عرفات ءَ تچک ءَ چاردہ زبان ءَ شنگ کنگ بیت اِنت کہ یک کروڑ ے نیم مردم گوشداشت کنت –

نوکتریں دور ءُ نوکتریں ازبابانی زور ءَ ھج ءِ خطبہ انگریزی، فرانسیسی، اردو، فارسی، روسی، چینی، بنگالی، ترکی، ملاوی، ھندی، اسپینی، تامل ءُ سواحلی زباناں پیش کنگ بیت اِنت-

خطبہ ھج ءِ بارو ءَ گپ کنان ءَ شیخ مھمد بند عبدالکریم العیسیٰ ءَ گوشتگ کہ اے ایمان داروکیں مردماں اللہ ءِ ابادت ءَ بہ کن اِت، اللہ ءَ ابید دگہ کس نیست اِنت ھماھی ءِ ابادت ءَ بہ کن اِت، مسلماناں چہ اللہ پاک ءَ بہ ترس اِت بے شک اللہ پاک ھرچیز ءَ سرپد اِنت-

حطبہ ءَ گوشگ بیتگ، ھما دراھیں ابادت ءَ بہ کن ات ھماھی ءِ ھکم اللہ ءَ وتی نبی صلا وسلم ءِ سبب ءَ بیتگ – اللہ درستاں زانت ھرچی کت کنت، اللہ ءَ زکوٰت ءِ ادار کنگ ءِ ھکم داتگ، اللہ ءَ نماز ءُ روچگ دارگ ءِ ھکم داتگ، اشانی دارگ ءَ اللہ ءِ نزیکترین مردم بیت اِنت-

حطبہ ءَ گوشگ بیتگ اسلام ءِ تالان کنگ ءَ ھمک نیمگ ءَ بہ رو اِت، اللہ پاک ءَ گوشتگ کہ مردماں پھل بہ کن اِت، رسول صلاوسلم ءَ گوشتگ کہ ھماھی ءِ سنچ شر اِنت ھما قیامت ءِ روچ ءَ درستاں منی نزیکتریں مردمے بیت اِنت، شریں کارانی واستا مسلمان یکے دومی ءِ کمک ءَ بہ کن اَنت-

خطبہ ءِ ھج ءَ گوشتگ بیتگ: مسلماناں ھکم دیگ بیتگ مردماں پائدگ بہ دے اَنت انسانیت ءِ نھاد ءُ شرپ کنگ ءَ المی سرپد بہ بنت – درستاں مستریں نھاداریں چیز پھکی اِنت-

خطبہ ءَ گوشتگ بیتگ: اسلامی رھبندانی دارگ اِنت ھما چیز نپرت بیت اِنت آئی ءَ چہ دور بہ بیت اللہ ءَ گوشتگ کہ مومنانی واستا جنت ءِ وش گپی اِنت درستیں انسان آدم علیہ السلام ءِ زھگ اَنت ءُ آدم علیہ السلام چہ ھاک ءَ جوڑ بیتگ-

خطبہ ھج ءَ گوشگ بیتگ: نیکی کنگ ءَ ھروھد ءَ زوت بہ کن اِت مسیبتاں اللہ ءَ ابید دگہ کس دور کُت نہ کنت-

جاپان ءِ گوستگیں مزن وزیر شنزو ءَ ایبے نادراھجاہ ءَ ٹپانی در نہ سگتگ ءُ بیران بوتگ –

دمگی اھوالکارانی رِد ءَ مروچی آدینگ ءِ روچ ءَ نارا ءَ چاپان ءِ گوستگیں مزن وزیر ءِ سر ءَ تیرگواری کنگ بوتگ – چریشی ءَ یک تیر ءِ آئی لاپ ءَ لگتگ ءُ آ زدگ بوتگ پد ءَ رند ءَ آئی ءَ ٹپانی درد نہ سگتگ ءُ بیران بوتگ –

جاپان ءِ چیف کیبنٹ سیکرٹری ہیروکازو ماٹسونو ءِ رِد ءَ مروچی آدینگ ءِ روچ ءَ نارا بازار ءَ ادار یانزدہ ءُ نیم ءَ جاپان ءِ گوستگیں مزن وزیر تیرباران کنگ بوتگ – آ دو تیر جنگ بوتگ، تیرلگگ ءَ پد شنزو آبے کپتگ –

زانگ بہ بیت شنزو آبے ءَ بازیں وھدے ءَ مزن وزیر بوتگ – سال دوھزار شش آ یک سال ءَ مزن وزیر بوتگ ءُ پدا سال دوھزار دوازدہ ءَ بگر تاں دوھزار بیست ءَ ھشت سالاں تاں مزن وزیر بوتگ – پدا رند ءَ ناجوڑی ءِ سوب ءَ آئی ءَ استعفی داتگ –

دمگی اھوالکارانی رِد ءَ اولی تیر ھتمن شنزو ءَ نہ لگتگ بلے دومی تیر آئی ءِ لاپ ءَ لگتگ کہ پدا آ کپتگ – پھازداراں ھما دمان ءَ کُشندہ دزگیر کتگ کہ آئی ءَ تچگ ءُ رؤگے ھچ کوشست نہ کُتگ –

ھمے گوشگ بوگ ءَ انت کہ ھما سلاہ ءِ سر ءَ کہ گوستگیں مزن وزیر سر ءَ تیرگواری کنگ بوتگ آئی ءَ آ چہ وتی گِس ءَ جوڈ کرتگ – پولیس ءِ رِد ءَ تیر شنزو آبے ءِ گردن ءَ لگتگ – جاپان ءِ گوستگیں مزن وزیر شنزو آبے ءِ استعفی دیگ ءَ پد آئی ءِ نزیکیں سنگت پوشیڈے سوگا مزن وزیر جوڈ بوتگ کہ آئی ءِ جاہ پد ءَ رند ءَ فومیو کشیڈا ءَ گپتگ –

سربوتگیں ھالانی رِد ءَ مروچی آدینگ ءِ روچ ءَ ھزدار ءَ تیرگواری ءِ وئیل ءَ دو مردم بیران بوتگ انت –

گیشیں ھالانی رِد ءَ ھزدار ءَ ناشناسیں سلاہ بندیں مردمانی تیرگواری ءَ عبدالکریم چنال ء چاکر خان ءُ رسول بخش ء عبدالکریم ھما دمان ءَ بیران بوتگ انت –

وئیل باغبانی لونڈو کراس ءِ نزیک ءَ بوتگ، تیرگواری ءَ بیران بوتگیں ھردو پت ءُ چک انت کہ پرپٹ ءَ سوار بوتگ انت ھمے گوشگ بوگ ءَ انت کہ آ سوراب ارچونو ءِ جھمنند انت ءُ آھانی تہ ءَ عبدالکریم لیویز ءِ سپاھی یے –

دمگی پھازداراں اژدری چارءُ ٹپاس ءَ پد جون کھول ءِ دست ءَ داتگ انت ءُ اے درگت ءَ گیشیں پٹ پول بوگ ءَ انت – تنی وھدی وئیل درگت ءَ ھچ وڈیں سرپدی نہ رستگ کہ کجام سوب ءَ اے مردم کُشگ بوتگ انت –