بلوچستان ءُ ھیدرآباد ءَ پاکستانی پوج ءُ پولیس سر ءَ بیتگیں اُرشانی زمہ واری بی ایل اے ءُ بی آر جی ءَ منّ اِتگ اَنت

بلوچستان ءُ ھیدرآباد ءَ پاکستانی پوج ءُ پولیس سر ءَ بیتگیں اُرشانی زمہ واری بی ایل اے ءُ بی آر جی ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں گوستگیں روچ ءَ شال ءَ چہ ھمگرنچیں دمگ ڈگاری ءَ زورگریں پاکستانی پوج ءِ پیادگ کارندہ ھما وھد ءَ ریموٹ کنٹرول آئی ای ڈی اُرش ءَ نشانگ کتگ اَنت، وھدے آ ریل ٹریک ءِ پلگاری ءَ پد مچی ءِ دروشم ءَ نندوک بیتگ اَنت-

جارکش ءَ گوشتگ کہ تراک ءِ آسر ءَ زورگریں پوج ءِ چار کارندہ جاہ پہ جاھی مرتگ اَنت وھدے کہ دگہ دو ٹپی بیتگ اَنت-

جارکش ءَ گوشتگ کہ دگہ یک کاروائی ءَ بلوچ لبریشن آرمی ءِ سرمچاراں کچھی ءِ دمگ ڈھاڈر ءَ بیگاہ ءِ وھد ءَ کلم الدین ءِ ھند سر ءَ زورگریں پاکستانی پوج ءِ پیادگ کارندہ ھما وھد ءَ اُرش ءِ نشانگ کتگ وھدے آ وتی پوسٹ ءَ چہ درتکگ بیتگ-

جارکش ءَ گوشتگ سرمچاراں وتکاریں سلاھاں ھوار راکٹ کارمرز کتگ، چریشی ءِ آسر ءَ زورگریں پوج ءَ جانی تاوان چست کنگ کپتگ-

جارکش ءَ گوشتگ کہ گوستگیں شپ ءَ بلوچ لبریشن آرمی ءِ سرمچاراں کیچ ءِ دمگ سامی، کلگ ءَ زورگریں پوج ءِ پوسٹ اُرش ءِ نشانگ کتگ-

جیئند بلوچ ءَ گوشتگ کہ سرمچاراں زورگریں پوج ءِ سنگر سر ءَ بازیں راکٹ گولہ آس داتگ ءُ وتکاریں سلاہ کارمرز کتگ، اُرش ءِ آسر ءَ زورگریں پوج ءِ دو کارندہ جاہ پہ جاھی مرتگ اَنت وھدے کہ دگہ جانی ءُ مالی تاوان چست کنگ کپتگ-

ھمے وڑ بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ بی آر جی ءِ سرمچاراں سندھ ءِ ھند ھیدرآباد ءِ دمگ بھٹ شاہ شھر ءَ پولیس تھانہ دستی بمب ءَ چہ نشانگ کتگ-

جارکش دوستیں بلوچ ءِ رِد ءَ اے تراک ءِ آسر ءَ زورگریں پولیس ءَ جانی ءُ مالی تاوان چست کنگ کپتگ-

درشانانی گُڈی ءَ دوئیں گلاں اُرشانی زمہ واری منّ اِتگ ءُ گوشتگ کہ مئے اُرش بلوچستان ءِ وتواجھی ءَ تاں برجاہ بنت-