TBP Balochi

نبشتانک: من کسّی چمّاں شر بوگ نہ لوٹ آں

نبشتہ کار: ساجد بلوچ

دی بلوچستان پوسٹ

بنی آدم چے چیزے ءِ نام اِنت اگاں مرچی بنی آدم ءَ را بنی آدم گْوش اَنت گڑا ایشی ءِ بزانت ایش اِنت کہ آیانی تہ ءَ بودی یے ھست ما رستراں ھمے واست ءَ بنی آدم نہ گْوش ایں پرچاکہ آیاں بود مان نیست آ چیزاں آ ڈول ءَ پوہ نہ بنت انچوشکہ بنی آدم بیت۔ ھر کسی نزّ ءَ دگنیا دگہ رنگے ءَ گِندگ بیت۔

اگاں یک بنی آدمے اے گپ ءَ وتی دل ءَ جیڑگ ءَ اِنت کہ من دگرانی نزّ ءَ یک شرّیں انسانے بہ باں گڑا بس وھد ءِ زوالی اِنت پرچاکہ اے انسان ءِ ابرم ءَ مان اِنت کہ آ بھ دومی ءَ را نہ منّ ایت ایشی ءِ سبب ایش اِنت کہ تئی ءُ آئی ءِ ھیال ءُ پگر الگ اَنت ءُ اے ھم بوت کنت کہ یکیں دومئیگ ءَ زِدّ ءُ کینگ دار اَنت۔

اے ھم بوت کنت کہ اے جیڑہ مئے چاگرد ءِ تہ ءَ اڈ کُتگیں چیز اَنت۔ اگاں مرچی ما یکیں دومئیگ ءَ نہ منّ ایں، یکیں دومئیگ ءِ سر ءَ تپاک نہ کن ایں، ایشی ءِ مستریں سبب ماں مئے چاگرد ءِ زات ءُ پات، سْیاھی ءُ اسپیتی، امیری ءُ گریبی، وشرنگی ءُ بدرنگی، زگری ءُ مُلائی، ءُ دگہ بازیں جیڑہ ھست اَنت۔ اگاں ما بہ نِند ایں وت ءَ سابت کنگ ءِ جُھد ءَ بہ کن ایں گڑا منی ھیال ءَ وھد ءِ زوالی اِنت۔ من گْوش آں وتی وھد ءَ بیران مہ کن اِت بلے دیم ءِ روگ ءِ جُھد ءَ بہ کن اِت۔

زاناں من کے آں؟ زاناں من استادے آں؟ زاناں من لس مردمے آں؟ زاناں من بلوچے آں؟ اے رنگیں جُست مُدامی منی مجگ ءَ کیت۔ ھو من انسانے آں، من استادے آں، لس مردمے آں، بلوچے آں ءُ بارے دگہ چے چے یے آں۔ چہ گواچن ءِ سرپد بوگ ءَ پد، گڑا من چیا بہ جیڑ آں کہ من وت ءَ شرتر بہ کن آں من اے گپّ ءَ کن آں کہ من ءَ مردم دوست بہ دار اَنت، من دگراں دْروگیں توسیپ بہ کن آں تاکہ مردم منی توسیپ ءَ بہ کن اَنت ءُ باریں چے چے۔

باید اِنت چیز تچک بہ بنت باید اِنت بنی آدم راستی ءِ پُشت ءَ بہ کپ ایت باید اِنت بنی آدم وتی پجّار ءَ ھما پجّار کہ آئی ءِ راستی ءِ گوماں سْیادی دار ایت یل مہ کن مرچی بازیں مردم مجگ ءِ نادراھی ءَ گیپتگ اَنت ایشی ءِ سبب ایش اِنت کہ آیاں وت ءَ را وت بے ھال کُتگ۔

دگہ شّریں گپ نیست کہ من نبشتہ بہ کن آں بلے سرپدی اَلم اِنت ءُ سرپدی چہ وانگ ءُ زانگ ءَ کیت مارا بس گوں وانگ ءُ زانگ ءَ ھمگرنچ بوگی اِنت وانگ ءِ شرتریں چیز ایش اِنت کہ آ ترا چہ بازیں جیڑھاں بچّارائین ایت۔ بِوان اِت ءُ بہ زان اِت تاکہ وت ءَ وتی راج ءَ بہ زان اِت۔

ھر کُجا اِت مُدام بلوچ بات اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ نوشکی ءَ یک مردمے ءَ وت ءَ تیر جتگ ءُ وتی زند وتی دست ءَ ھلاس کتگ-

گیشیں ھالانی رِد ءَ گوستگیں روچ ءَ نوشکی کلی صاحبزادہ ءِ نندوک بیست سالی ئیں ورناہ نجیب ء بلال رخشانی نامیں ورنایے ءَ وت ءَ تیرجتگ ءُ وتی دستاں چہ وتی زندگی ھلاس کتگ-

بلے وتکشی ءِ سبب زانگ نہ بوتگ- بلوچستان ءَ گیشتر وتکشی ءِ وئیلانی نکش بوتگیں رپورٹانی ردءَ گیشتریں وئیل بے روزگاری ءَ چہ بیزاری ءِ سوب ءَ بوتگ اَنت-

بلوچستان ءَ وتکشی ءِ وئیل سک باز دیم ءَ کاینت اشانی تہ ءَ کم رسانکدر ءَ پدر بوگ ءَ سوبمند بنت-

دومی نیمگ ءَ بلوچستان ءَ سرکاری یا نیم سرکاری ادارگ اے چیز ءَ ھچ ھال گور نہ کن اَنت کہ آ وتکشیانی سر ءَ شریں وڑے چمے بیچار اَنت، دی بلوچستان پوسٹ ءِ یکجاہ کتگیں کچ رِد ءَ ھمے سال ءَ تنی وھدے بلوچستان ءَ وتکشی ءِ وئیلاں چہ بیرانیانی کچ سی ءَ سر بوتگ اَنت-

ھمے سال ءَ وتکشی ءِ گیشتریں وئیل بلوچستان تیاب دپی شھر گوادر ءُ کیچ دمگ ءَ بوتگ اَنت-

روکپتی بلوچستان ءَ ایرانی آمیدگس ءَ گوستگیں سَے روچانی تہ ءَ یازدہ بندیگیں بلوچ پاھو داتگ اَنت-

روکپتی بلوچستان ءِ بنجاھی شھر زاھدان “دزاپ ” ءَ ایرانی آمیدگس ءَ ھپت بندیگیں بلوچ پاھو داتگ اَنت –

گیشیں ھالانی رد ءَ روکپتی بلوچستان ءِ جتا جتائیں بندیگ جاھاں ھپت کس پاھو دیگ بیتگ اَنت –

پاھو دیگ بیتگیں مردمانی پجار امید عالیزھی اُمر بیست ءُ یک سال ء گل مھمد جھمنند زاھدان شش سال ءَ پیش گرگ بیتگ کہ آئی ءِ اُمر آ وھد ءَ شانزدہ سال بیتگ ءُ مرتضیٰ اُمر بیست ءُ چار سال ء اللہ داد جھمنند آسپیچ سراوان کہ اے کوش ءِ بھتام ءَ گرگ بیتگ اَنت-

ھمے کہ دگہ پنچ کس منشیات ءِ بھتام ءَ گرگ بیتگ اَنت آیانی پجار عبدالباسط براھویی اُمر بیست ءُ سَے ء نادر جھمنند زاھدان، عبدالرحیم اسماعیل زھی اُمر سِی سال ء مھمد جھمنند کلچات زاھدان، محسن سالارزھی اُمر بیست ءُ ھشت سال ء حنیف جھممنند زاھدان، نادر براھویی ء اُمید جھمنند زاھدان ءَ مھدی پیری ء علیجان ءِ ناماں زانگ بیتگ اَنت –

امید، مرتضیٰ، عبدالباسط، عبدالرحیم ءُ مھسن زاھدان ءِ مزنیں جیل ءَ پاھو دیگ بیتگ اَنت ءُ نادر ایرانشھر ءُ مھدی زابل ءِ جیل ءَ پاھو دیگ بیتگ-

اے مردمانی کھول اے مردماں گوں گڈی دیدار ءَ دچار کپتگ اَنت-

امید عالیزئی شانزدہ سال ءِ اُمر ءَ زاھدان ءِ کُچگی ءَ یک کوشے ءِ بھتام ءَ گرگ بیتگ ءُ دو سال ءَ چیریں بندیگ جاھاں بند بیتگ ءُ پد ءَ زاھدان ءِ مزنیں جیل ءَ برگ بیتگ ءُ اود ءَ پد ءَ پاھو دیگ بیتگ –

ھالانی تہ ءَ گوشگ بیتگ کہ مھدی پیری ءُ دو دگہ زندانی زابل ءِ زندان ءَ برگ ءُ اود ءَ پاھو دیگ بیتگ اَنت کہ اشانی درگت ءَ گیشیں سرپدی نہ بیتگ اَنت-

اود ءَ مھدی پیری ءِ ھمراھی ءَ پاھو دیگ بیتگیں دو کسانی نام انگت دیم ءَ نیتکگ اَنت-

روکپتی بلوچستان ءَ اھوالکارانی رد ءَ تنی وھدی سال دوھزار ءُ بیست ءُ یک پنجاہ کس پاھو دیگ بیتگ اَنت کہ اے تھنا روکپتی بلوچستان ءَ پاھو دیگ بیتگ اَنت کہ اشانی ھوار ھواری ءَ ھپتاد ءُ نُھ کس پاھو دیگ بیتگ اَنت کہ آیانی سیادی ھم روکپتی بلوچستان ءَ بیتگ اَنت –

اے مردم گیشتر نشہ ءُ کوش ءُ دگہ گلانی بھتام ءَ گرگ ءُ پاھو دیگ بیتگ اَنت –

گوستگیں دو روچ ءَ پیش ھم ایرانی آمیدگس ءَ چار بندیگیں بلوچ پاھو داتگ اِت اَنت کہ آیانی کتکاری ھم نشہ ءُ کوشانی بھتام ءَ پدر کنگ بیتگ اَنت-

روکپتی بلوچستان ءَ مردمانی یکشلیں پاھو روچ پہ روچ گیش بیان اِنت اود ءَ بندوکیں اھوالکارانی گوشگ اِنت کہ اے جاور گیش ترند بیت گڑا اے دمگ ءِ جاوراں گیش ناگیگ ءُ لس مردمانی دلاں ترس ودی بیت کنت-

گوست ءَ ایرانی ایمنسٹی انٹرنیشنل ءَ ھم روکپتی بلوچستان ءَ لس مردمانی پاھو دیگ ءَ پدردی درشان کتگ –

بلوچستان لبریشن فرنٹ ءَ آواران ءِ دمگ جاؤ ڈولیجی ءَ پوج ءِ پانگِس ءِ سر ءَ اسنائپر اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشانی ءَ گْوشتگ کہ سینزدہ ساچان ( 13 اگست ) ءَ بیگاہ ءِ ادار شش ءَ مئے سرمچاراں آواران ءِ دمگ جاؤ ڈولیجی ءَ برجاھیں پاکستانی پوج ءِ پانگِس ءِ سر ءَ گوں اسنائپر تُوپکّاں اُرش کُرتگ، اُرش ءِ آسر ءَ لشکر ءِ یک کارمَندے مُرتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ دُژمِن ءُ زُورگِریں پوج ءِ سر ءَ مئے اے اُرش دانکہ ایردستیں بلوچستان ءِ آجوئی ءَ گوں تْرندی ءَ برجاہ بَہ اَنت۔

کرائی فریڈم تامر ءِ سر ءَ چمشانک

چمشانک: حکیم بلوچ

ٹی بی پی تامر کارست

آ جاندراہ اَت، آئی ءِ سیاھیں پوست بازیں لٹ ءُ کُٹاں سُھر تراِتگ اَت، آ بے ھوش ءُ بے سما اَت، زندان ءِ ڈاکٹر آئی چارگ ءَ اَتک اَنت تاں گُشتے کہ اِشی ءِ جاور سک نگیگ اَنت اِے نادراھجاہ ءَ برگ بہ بیت دانکہ شرتر درمان دارو کنگ بہ بیت۔ پولیس آئی ءَ وتی گاڑی ءِ پشت ءَ دور دنت ءُ آئی ءَ پرشتگیں دگاں چہ دیم پہ نادراھجاہ ءَ بر اَنت ۔ آ نادراھجاہ ءَ رسگ ءَ پیسر ساہ دنت ءُ بیران بیت۔ آ ورنائیں سیاہ پوستیں جھدکار اسٹیو بیکو بیت کہ ساؤتھ افریقہ ءَ اپرتھائیڈ ءِ ھلاپ ءَ جھد کنگ ءَ بیت۔

اے تامر ءِ تہ ءَ مزن نامیں ازمکار ڈینزل واشنگٹن اسٹیو بیکو ءِ کارست ءَ گندگ ءَ کیت اے تامر 26 نومبر 1987 ءَ شنگ بیتگ۔ اے تامر اسٹیو بیکو ءِ زند ءِ کسہ ءَ پیش دار ایت کہ چون اپرتھائیڈ ءِ وھد ءَ سیاہ پوستیں جھدکار، ریاستی زوراکیانی آماچ بیتگ اَنت۔ اے تامر ءِ بندات ءَ کیون کلائن کہ ڈونلڈ ووڈز ءِ کارست ءَ گندگ ءَ کئیت کہ آ اسپیتیں لبرل ھیالانی واھند بیت ءُ ڈیلی ڈسپیچ روتاکے ءِ ایڈیٹر بیت، آ وتی روتاکے تہ ءَ لشکری زوراکیانی ھم بگیری کنت دومی نیمگ ءَ اسٹیو بیکو ءِ ھیالاں ھم ایر جنت۔ اسٹیو بیکو کہ آئی ءِ سر ءَ وتی ھند ءِ یل کنگ ءِ سر ءَ ساؤتھ افریقن سرکار ءَ بندش جتگ بیت آ ڈونلڈ ءَ وتی گور ءَ آیگ ءِ داوت دنت، اسٹیو بیکو ءَ گندگ ءَ پد افریقن مھلوک ءِ زند آیانی ھمکروچی بزگی ءُ لاچاریانی گندگ ءَ پد ڈونلڈ اسٹیو ءَ گوں آئی ءِ جھد ءَ گوں نزیک تر بیان بیت۔

اسٹیو بیکو کہ بلیک کونشیس موومنٹ ءِ سروک بیت آئی ءِ لیکھانی سوب ءَ آ پہ ساؤتھ افریقن اپارتھیڈ رجیم ءَ مزنیں تُرسے زانگ بیت۔ کرائی فریڈم تامر ءِ سین ءِ تہ ءَ اسٹیو بیکو آمید گِس ءَ اوشتوک بیت ءُ آ وکیل ءُ جج ءِ جُستانی پسہ ءَ دیگ بیت گُڑا آ جُست کنگ بیت کہ تو پرچا چُشیں گال کارمرز کن ئے چُش کہ “بلیک از بیوٹیفُل”۔ گُڑ ءَ اسٹیو گُش ایت پرچہ کہ سیاہ مدام گوں سلکاریاں گوں ھوار کنگ بیت، چُش کہ سیاھیں مارکیٹ (بلیک مارکیٹ) کھول ءِ سیاھیں بُز (دی بلیک شِیپ آف دی فیملی) کجام شئے ھراب یا سِل زانگ بیت۔ اِشی ءِ سر ءَ جج پد ءَ جُست کنت گُڑ ءَ پرچہ اے لبز ءَ کار مرد کن اِت پرچہ وت ءَ سیاہ گُش اِت شما چہ سیاہ ءَ گیشتر ناسی چک اِت۔ اِشی ءِ پسہ ءَ اسٹیو جج ءَ جُست کنت کہ شما پرچہ وت ءَ اسپیت گُش ات شما ھم چہ اسپیت ءَ گیش گلابی رنگ اِت۔

اے تامر نہ تھنا اسٹیو بیکو ءِ زند ءُ آئی ءِ جھد ءُ پد ءَ آئی ءِ زندان ءِ تہ ءَ مرگ درگت ءَ گپ نہ کنت بلکیں اے ھما راستی ءَ پیش دار ایت کہ چون ساؤتھ افریقہ ءِ تہ ءَ اود ءِ جھمنندیں مردم چہ ڈن ءَ اتکگیں مردمانی زوراکیانی آماچ کنگ بیتگ اَنت۔

اے تامر ءِ دومی بھر ءَ ڈونلڈ ووڈز کہ اسپیت پوست ءِ اھوالکار ءِ بیت بلے آئی ءِ گوں سیاہ پوستیں جھدکاراں نزیکی ءُ آئی لیکہ آنی سوب ءَ آئی سر ءَ ودی بیوکیں جیڑھانی ھم درانگازی ءَ کنت۔ کہ چون اپرتھائیڈ رجیم ءِ زوراکیانی ھلاپ ءَ اوشتوکیں مردم تُرس آماچ کنگ بنت آھانی سر ءَ زوراکی کنگ بیت۔

کرائی فریڈم ءِ بنداتی ءُ گُڈی سین اسپیت پوستانی سیاہ پوستیں جھمنندانی سرءَ اُرش آیانی سر ءَ تیر گواری آیانی لوگانی ماندارگ ءُ آیانی کُشگ ءِ کسہ ءَ پیش داریت۔

اے تامر باز ءِ اسکرین وھد 157 منٹ اِنت، بزاں 2 ساھت سی ءُ ھپت دمان، اَے تامر دومی بھر ءَ کمو مردم ءَ بوت کنت دراج کشی ءِ سمائی ءَ بہ دنت۔ بلے پہ سیاست ءِ نودربراں ءُ تامرانی تہءَ راستی ءِ شوھازوکاں کرائی فریڈم یک المی چارگی تامر اِنت۔

بلوچستان ءِ دمگ ڈیرہ مرادجمالی ءِ پٹ فیڈر کینال ءَ ترکگ ءِ سوب بابا کوٹ ءُ صحبت پور ءَ بازیں میتگ آپ ءَ بُرتگ اَنت۔

اِشی ءَ مچھ ءَ ترندیں ھوراں پد ھار ءِ اھوال اِنت ءُ ھاری آپ شال سکھر بنجاھی شھدگ ءَ گوزگ ءِ اِنت شھدگ پہ ٹریفک ءَ معطل کنگ بیتگ وھدیکہ فورٹ منرو ءِ نزیک ءَ بنجاھی شھدگ ءِ سرءَ داں بازیں کلومیٹر دراجیں اوشت ءِ گندگ ءَ کئیت وھدیکہ دگ ءِ یک نیمگ ءِ آپ ءَ بُرتگ۔

ھرنائی ءَ ھم کوھاں چہ آیوکیں ھاری آپ کش ءُ کری دمگاں پُترتگ چریشی ءَ ھرنائی ءِ گوں سرجمیں بلوچستان ءَ زمینی رھوت پُرشتگ۔

دومی نیمگ موسیٰ خیل ءَ 5 روچ ءَ ھاری آپ ءِ تہءَ 7 ہزار ءَ گیش جناور (مال) آپ ءَ بُرتگ، کوہ سلیمان ءِ کوھی دمگانی تہءَ توپانی ھوراں چہ کئور ءُ چمگانی تہءَ مزنیں کچے ءَ ھار اتکگ، سوراب ءَ ترندیں ھورانی سوب ءَ کئورانی تہءَ ھار اتکگ ءُ نزیکیں دمگ آپ ءَ بُرتگ اَنت، راجن پور ءَ ھارءِ آپ ءَ فاضل پور ریلوے ٹریک ھم پُروشتگ، نصیر آباد، جعفر آباد ءَ 2 روچاں چہ برجاھیں ھورانی سوب ءَ سانمندانی جیڑہ ءُ جنجال گیشتر بیتگ اِنت، سانمند پچیں آزمان ءِ چیر ءَ کمک ءِ راھچار اَنت۔

اِشی ءَ ابید ڈیرہ اسماعیل خان ھم ھئورءُ ھار ءِ آپ ءَ گپتگ ءُ چشمہ کنڈل دگ ٹریفک ءِ ھاترءَ بند کنگ بیتگ۔

بلوچ اسٹوڈنس ایکشن کمیٹی ءِ نیمگ ءَ شال ءِ جتا جتائیں دمگاں بلوچستان ءَ ھار آماچیں مردمانی ھاتر ءَ کمکی بنجل جنگ ءِ جار جتگ –

بساک شال ھنکین ءَ شال ءِ دہ دمگاں کمکی بنجل ءِ جنگ ءِ جار جتگ ءُ چہ راج ءَ کمک ءِ لوٹ کُتگ –

بساک ءِ نیمگ ءَ چہ شال ءِ دمگ موسی کالونی، سریاب دگ، کسٹم سریاب، بشیر چار راہ، کمبرانی دگ ، سول نادراھجاہ ءِ نزیک ءَ جناح دگ، بلوچ کالونی ءِ سیمی اسٹاف بروری، بی ایم سی ءِ نزیک ءَ بروری دگ ءَ، جناح ٹاؤن، منوجان چار راہ ہدہ، آلمو چار راہ ءُ دومی چورنگی سیٹلائٹ ٹاؤن ءَ بنجل جنگ بنت –

زانگ بہ بیت بلوچستان جتا جتائیں ھند ءُ دمگاں یک ءُ دو ماہ انت کہ ھئور ءُ ھارانی تباھی برجاہ انت ءُ بلوچستان ءَ ھئور ھاراں دوسد مردم بیران بوتگ انت –

پی ڈی ایم اے ءِ رِد ءَ شش سد ءُ ھپتاد کلومیٹر ءِ شش شھدگ ھارانی آماچ بوتگ انت وھدیکہ جتا جتائیں جاھاں ھژدہ پُھل پُرشتگ انت – پی ڈی ایم اے ءِ رِد ءَ یک لکّ ءُ نود ءُ ھشت ھزار ءُ چار سد ءُ شست ءُ یک ایکڑ زمینانی رستگیں کشار، سولر ، ٹیوب ویل ءُ بوراں تاوان رستگ انت –

پی ڈی ایم اے ءِ رِد ءَ بلوچستان ءَ سرجمی ءَ بیست ءُ دو ھزار شش سد ءُ نود ءُ دو گِساں تاوان رستگ انت – شش سد ءُ نود کلومیٹر دراجی ءِ شش شھدگ پُرشتگ انت ءُ ھژدہ پُھل پُرشتگ انت – یک لک ءُ ھپت ھزار ءُ سَے سد ءُ ھپتاد ءُ ھپت مال ءُ دلوت ھم مُرتگ انت –