TBP Balochi

بلوچستان ءِ زرباری شھر گوادر ءَ مروچی یک شمبے ءِ روچ ءَ سلاہ بندیں مردماں گوادر ءَ چہ رؤکیں ٹرکانی کاروان ءِ سرءَ اُرش کنگ بیتگ، یک ھپتگے ءِ نیام ءَ گوادر ءَ ھمے پئیمیں دو اُرش کنگ بیتگ اَنت۔

اھوالانی ردءَ گوادر واجھانی نگور ءِ بنجاھی شھدگ ءِ سرءَ گوادر ءَ چہ شئے بروکیں کنٹینرزانی کاروانءِ سرءَ ناشناسیں سلاہ بندیں مردماں اُرش کُتگ۔

اھوالانی ردءَ اُرش ءِ سوب ءَ گاڑیاں تاوان رستگ ءُ یک مردمے ٹپی بیگ ءِ ھم ھال اِنت۔

بلوچستان ءِ زرباری شھر گوادر ءَ یکے ھپتگے نیام ءَ اے پئیمیں دو اُرش بیتگ اَنت، پانزدہ اگست ءَ گوادر ءَ شنکانی در ءِ ھند ءَ ھمے پئیمءَ یک کاروان ءِ سرءَ سلاہ بندیں مردماں اُرش کُتگ۔

گوستگیں اُرش ءِ زمہ واری بلوچ سلاہ بندیں گل بلوچستان لبریشن فرنٹ وھدیکہ مروچیگیں اُرش ءِ زمہ واری داں انگت ھچ گل ءَ نہ من اِتگ۔

روکپتی بلوچستان ءِ سیمسری دمگ سراوان ءَ ایرانی لشکر ءُ یک شھری ءِ میان ءَ میڑ ءَ دو گجراں ھوار سَے مردم بیران بیتگ اَنت-

وئیل سراوان ءِ دمگ مشکید ءِ کور ءَ سیمسر ءَ پیش اتکگ کہ اود ءَ یک ساھتے ءِ میڑ ءَ پد یک بلوچے بیران ءُ ایرانی لشکر ءِ دو کارندہ بیران بیتگ اَنت-

بیران بیتگیں مردم ءِ پجار سمیع جان ریگی ءِ نام ءَ زانگ بیتگ کہ اود ءَ پولیس ءَ بیڑ برتگ ءُ دو نیمگی تیرگواری بیتگ-

ھالانی رد ءَ گوشگ بیتگ کہ تیرگواری داں یک ساھتے ءَ برجاہ بیتگ ءُ اود ءَ گڈی ءَ داں سمیع جان ریگی جنگ بیتگ ءُ چریشی ءَ چہ دو ایرانی لشکر ھم جنگ بیتگ اَنت-

ایرانی لشکر ءُ پولیس ءِ نیمگ ءَ تنی وھدی وئیل ءِ درگت ءَ گیشیں ھال سر نہ بیتگ اَنت بلے چاگردی رسانکجاھاں اتکگیں اکس ءُ تیرانی ھالیگیں پوستاں زانگ بیت اِنت جنگ یک مزنیں کچے ءَ بیتگ-

ھمے وڑ ھمے گوستگیں ماہ ءَ روکپتی بلوچستان ءِ دمگ کھنوج ءَ ھم ھمے وڑ ءَ یک وئیلے بیتگ ات کہ چریشی ءَ ھردوکیں نیمگاں پنچ کس جنگ بیتگ اِت انت-

سربوتگیں ھالانی رِد ءَ شمبے ءُ یکشمبے ءِ میانی شپ ءَ کیچ ءَ یک ورنایے ءَ وتکشی کتگ ءُ وتی دستاں چہ وتی زندمان ھلاس کتگ، بلوچستان ءَ بیست ءُ چار کلاکانی میان ءَ رپورٹ بوتگیں وتکشی ءِ دومی وئیل اِنت اشی ءَ ساری نوشکی ءَ یک ورنایے ءَ وت ءَ تیرجتگ ءُ وتکشی کتگ-

ھالانی رِد ءَ تربت ءِ دمگ جوسک ءَ گوستگیں شپ ءَ رجب الھی بکش نامیں ورنایے ءَ وت ءَ را تیر جتگ ءُ وتی زندمان ھلاس کُتگ، بلے وتکشی ءِ سبب انگت زانگ نہ بوتگ وھدے کہ بلوچستان ءَ گیشتر وتکشی ءِ وئیل بے روزگاری ءَ چہ تنگ ءُ چاگرد سبب ءَ چہ بنت-

ھمے سال ءَ بلوچستان ءَ وتکشی ءِ وئیلانی تہ ءَ گیشی گندگ آھگ ءَ اِنت گوستگیں روچ ءَ نوشکی ءِ نندوک نجیب ء بلال رخشانی نامیں ورنایے ءَ ھم وتکشی کتگ-

دومی نیمگ ءَ ھمے ماہ ءَ کیچ ءَ رپورٹ بوتگیں وتکشی ءِ اے دومی وئیل اِنت اشی ءَ ساری پنچ اگست ءَ تربت آبسر ءَ یک زالبولے ءَ ھم وتکشی کتگ- اشی ءَ ابید جون ءِ ماہ ءَ کیچ ءَ تربت پولیس ءَ ھال سر بوتگ کہ یک ورنایے ءَ گُٹ ءَ ساد مان کتگ ءُ وتکشی کتگ-

اشی ءَ اَبید ھمے سال ءَ بلوچستان ءِ دمگ دالبندین ، ھُزدار ، پنجگور ، گوادر ، پسنی ، نوشکی ، شال، کلات، گڈانی ، مشکے، ڈیرہ بگٹی ءَ ھوار بلوچستان ءِ گیشتر دمگاں وتکشی ءِ وئیل رپورٹ بوتگ اَنت-

ھمے سال ءَ وتکشی ءَ وئیلاں چہ یک دردناکیں وئیلے ھُزدار ءَ بوتگ، اود ءَ سکینڈ ایئر ءِ نودربر عرفان ء غلام رسول برنزائی چکاس ءِ پیس ءِ کلدار نہ بوگ ءِ سبب ءَ چہ وتکشی کتگ، چار ماہ ءَ پد آئی ءِ پت غلام رسول بارنزائی ءَ ھم وتی چُک ءِ کبر ءِ سر ءَ فاتحہ وانتگ ءُ وتی گُٹ ءَ ساد مان کتگ ءُ وتی زندمان ھلاس کتگ-

واتر پہ وتی ھلک ءَ

نبشتہ کار: ایس ایچ بلوچ

دی بلوچستان پوسٹ

سر گوست

ما گوربام ءَ آ سنگت اجازت کُت آں دیم پہ وتی ھلک ءَ رھادگ بیتین چار سیکَل ءُ ما ھشت سنگت پیداک اِت ایں وتی ھلّک ءَ اُستاد ھم ھال کُت کہ میتگ ءَ مہ رو اِت بیا اِت پِلان جاہ ءَ
مے سیکّل ئِے پنچر بیت ما ساھگے ءَ داشت ءُ سنگتاں گون سنکل ءَ مُشکول بیت اَنت من سک ژند اِت اَنت ھردیں ھمے کھیرے بُنڈ ءَ تِکہ بیتاں چم نَز کُت آں واب کپت آں ساھت ءِ آ رند میرو نَکس اتک منی گوش ءَ را لٹُک ئِےمانے کُت من واب جَھسراِتاں دست من تُپَنگ ءِ ٹیگرا بُرت من ! میرو ترا رپل بجنت تو منی جِند کُشت شوم میرو اڈے پُل من تئی دست گِپتگ ترا پاد کُتگ تو پاد نیا ئے کھر کپتگیں جام ءَ گُشت لٹُک ئِے گُوش ءِ مان کن انو پاد کئیت-

گُڑا من چَاگل ءِ آپ زُرتاں وتی دیم ءَ را کمو پِریتک سنگتے ءَ پہ من چاھے یے آورت من چا وارت گُڑا من ءَ سنگتاں گُشت بلے کن اِت در کپ اِت اُستاد ءِ زئی مئے ودارِیگ اَنت ما در کپت ایں راہ ءَ پد ءَ ما آپے ءِ سر ءَ داشت پرچہ کہ مئے یک سیکَل ئِے کمو کمزور ات ما اے سوڑگ کُت کہ مارا مہ دور ایت نیم ساھت ھمدا جَل اِنت عَصُر کن اِت درکا اِنت ما داواری ءِ نزیک ءَ اتکیں سنگتاں گوشت بیا پَنیر ئِے پچگرین ءِ مردم کمو زیکول ءَ زیکول بیت کہ شپ وَ شما زانت مارا پہ لوبیا اڈ کنگ نیلیت من بس ٹھیک دے ایں ھرچی شما گُش ئے مارا ماتی دیست دیما در اتک مارا وت گوُنَک ئِے کُت بیا ءِ منی چُکاں مے دل سارت بُوت ما شُت اِنت مارا آپے دات ما چم ءُ دیم کُرت پتّر ءِ سر ءَ نشت اِنت ما آپ وارت ماتی ءَ وتی چُک ءَ را گْوَشت چُکانی واست ءَ چیزی بیار چُک گژنگ اَنت چُک ءَ شیر ءُ شلانچ ناہ ارت ما وارت سنگتے ءَ گوشت اما اناں پَنیر نیست منی دل پَنیر لوٹ ایت ماتی ءَ وتی چک ءَ گوشت پَنیراں بیار چکاں بدے ما پنیر وارت ءُ برا بر بیت ایں –

روچ ایر روان اَت من چم شانک داتاں روچ دراتکتی کوھانی نیمَگ ءَ چاراں رمگ پیداک اِنت
من! اڑے کامریڈ یار مارا دُژمن ءَ چاریں نیمگاں گیپت دُرست شومیں بلاچ اِنت گوں وتی پَنیراں کامریڈ ءَ داست بروتاں ما راکِٹ واہ اڑے کامریڈ ترا من مَناں ئے شیر من مزاک کو بلے ھچ نیست جَنگ ءَ تو کونڈوک دے کامریڈ! یار تو چونیں شَمّے ئے ءِ نو من ءَ تو راستیں گپے بُگشے من ءَ باور نکنت کہ تئی یکیں رند نہ اِنت تو ھر ٹیم ءَ مارا دل ترک کن ئے من مرچی ءَ پَد تی گون ءَ نیا آں گوں کسمیں من! اڑے نَکس من شمارا چاریں باریں اگاں چوشیں اللہ مہ کنت چیز بیت شما چوں کن ئے بلے نو من ءَ یکین اِنت شما جَنگ ءَ سونکلو دے-

دوار والا گوں وتی رمگ ءَ نزیک ءَ سر بوت من دیست یک کماشے گوں دو گونڈل ءَ من ماتی گوانک دات ءُ گُشت ماتی زاناں دگہ ورنا نیست رمگ کماش ءَ گوں دو گونڈلاں گون اَنت ماتی اتک مئے نزیک ءَ گُشت ئِے منی چُک منی ورنا یکے ءُ یکے منی جنکے لوگ واجہ اِنت بلے سری ما کپتگ ھر دو نیشہ ءَ اَنت دویں گونڈل منی جنک ءِ چُک اَنت ءُ منی ورنا منی دومی جنک ھردوکاں سانگ نہ کُرتگ من جُست کُت ماتی گُڑا انو کجا اَنت ورنا؟ ماتی ءَ گُشت شُتگ اَنت شھر ءَ پہ نیشہ ءِ زورَگ ءَ او ماتی انو نوجوان دُرست نیشہ ءِ آماچ اَنت۔ سھت کساس ھپت ءُ پانزدہ ءَ کماش ءَ وت ءَ را گیگ کُت اتک پہ مارا ما پاد اتکیں کماش گوں سلام ءُ دُروت بوتیں مارا کماش ءَ گُشت نند اِت ورنایاں ما نیشتیں کماش ءَ چُکاں گُشت چاھے وش کن ئے ما گوں کماش ءَ دیوان کُرت چُک ءَ چا آورت ما وارت نیشت اِنت گپ گپ ءَ سات اتک سر بُت ھشت ءُ بیست ءَ من گُڑا گُشت کماش ما نو در کپ ایں مئے منزل کمو ءُ دور اِنت ماتی ءَ گُشت شپ ءَ مئے گُورا بیجل سھب ءَ سلامتی درا اِت نہ ماتی ما در کپ ایں پہ وت شریں منی چُک اللہ پاک شمئے مدت بات کماش ءَ گُشت سبر کن اِت شمارا شیر دیاں بر ات ءِ گوں راہ دور اِنت باریں چُنت روچیں چہ کُجا پیداک اِت نہ کماش ما بَرابریں مئے باز ھدمت کُت شما کماش ءَ گُشت اے شِیر ءُ ناھاں بر اِت ئِے گوں انگت نہ کماش مئے جاہ نزیک ایں من چار ات کماش باز گُشگ ءَ اِنت من گُشت کماش اگاں زگریں شِیر در کیت گُڑا مارا بہ دے ما جَل ایں جاھے ءَ چاگے وش کن ایں کماش بلے شیر ھست چک ءَ گوشت ئِے دو بوتل پُر کن بیار من گُشت ناں کماش یکے کن ئِے بس اِنت من چک ءَ راہ گُشت یکے بیار مارا بس اِنت چُک ءَ شیر آورت اَنت ما گُڑا کماش گوں چُک اجازت کُرتاں دیم پہ وت۔

رَوان اِنت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: اے گونڈل ، کے اِنت

نبشتہ کار: شُپانک بلوچ

دی بلوچستان پوسٹ

تاکشان ءِ سرد ءُ گْوریچیں مولم اَت کہ ما اوتاک ءِ تہ ءَ نشتگ اِت ایں ، کہ سنگتانی شور ءُ مشوره اَت کہ ، شهید زدگ جان ءِ اوتاک ءَ مئے داوت اِنت ، لهتیں نوکیں لهتیں سنگت پیداک اِنت ، زدگ جان ءِ اوتاک ءَ مرچی جُنزگی اِنت ، ما وتی بار بڈّا بست ءُ سینکل تیل ءُ گْوات کت اَنت کہ نوں در کپ ایں-

ما در اتک ایں جنزان بوت ایں سپر دور اَت جاورانی نگیگی اَت ، دومی بالگرد ، هچ پسہ کنگی نہ اَت کہ یکوی تر ءُ بیره کوهسراں اتک ءُ وسریں تیرگواری کت ئِے، ما جنان ءُ پروشاں داں روچ ءِ ساهتے یازده ءَ نگیگیں دمگ یلدات ، ءُ کوچگ ءَ دور کت –

اے سپر ءَ شهید شهیک مئے همراه اَت گون، ءُ منی پرپٹ ءَ سوار اَت ، شهیک ءَ پسہ دات کہ شُپانک ، مرچی کمان ساری ءَ نہ بیت سگریٹے ءِ کشگ ءَ اوں موه نہ دنت هاها، مرچی باریں ، چونیں داوتے بیت ، ما اوتاک ءَ دان ءُ بے هیال کت انت-

یار شیهو دائمی ترا لاپ ءِ پگر اِنت نزاناں چے ءَ کهروار همے کہ سپر ءِ دَر رو ایں تئی لاپ هالیگ بیت هاهاها ، کندان کندان ءَ داں کہ ما زدگ جان ءِ دمگ ءَ شت ءُ سر بوت ایں ما سنگت نٹورک ءَ اتک اَنت ، ءُ زدگ جان ءَ هال کت-

داں ما زدگ ءِ اوتاک ءَ شت ءُ سر بوتیں زدگ جان گوں سنگتاں در اتک ءُ مارا وش اتک ئے کت ، ءُ ما تگرد ءَ پہ شتین ءُ نشت ایں، اُستاد نشتگ اَت ، ءُ کسانیں نوک بروت شنزیں ورناهے نشتگ اَت ، اُستاد ءِ گور ءَ هیال ءِ گوں گوانکو ءَ اَت ، ءُ بچکندگ ءَ اَت ، داں دیراں ما نشت ءُ گپ ءُ دیوان بوت ، زدگ جان ءَ اوتاک ءِ آدگہ سنگتے توار کت باریں هال کن ورگ چون اِنت جوڑ نہ بوتگ ؟ سنگت ءَ پسہ دات کہ کمو لوٹ ایت ، جنگی ءِ نان نوں سارت بنت مئے ورگ اڑ بوگ ءَ نہ انت هاها گونڈل پاد اَتک ، دیم مہ وردن جاه ءَ شت ءُ شیهک ءَ برداشت بوگ ءَ نہ اَت کہ استاد ءَ جست بہ کن آں کہ اے گونڈل کے اِنت؟ داں شیهک ءَ گپ دپ ءَ چہ در کت ، واجہ اے گونڈل کے انت؟ استاد ءَ پسہ دات کہ راجی سپاهی ءِ شمے وڑیں ، نام ءِ سربلند اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کلات ءُ کیچ ءَ دو جتا جتائیں وئیلاں زالبولے ءَ ھوار دو مردم کشگ بیتگ اَنت ءُ ھمے وڑ یک زھگے ءَ ھوار دو مردم زدگ بیتگ اَنت-

گیشیں ھالانی رد ءَ کلات ءِ دمگ ریج ءَ یک مردمے ءِ لاش دزکپتگ کہ آئی ءِ لاش ھسپتال ءَ برگ بیتگ ءُ اود ءَ آئی ءِ پجار عبدالقدوس ء الف خان ءِ نام ءَ زانگ بیتگ-

لیویز ءِ گوشگ اِنت اے مرد دو روچ ءَ پیش وتی گاڑی ءِ ھمراھی ءَ بیگواہ بیتگ-

لیویز ءِ گشگ اِنت اشی ءِ گاڑی ناشناسیں مردماں باڑو کتگ – گمان بیگ اِنت کہ آیاں گاڑی دز اتگ ءُ ڈرائیور کُشتگ ءُ لاش چگل داتگ-

لاش ڈی ایچ کیو ءَ برگ بیتگ ءُ ھسپتال ءِ گوشگ اِنت اشی ءِ گٹ ءَ ساد مان کنگ ءُ کُشگ بیتگ-

دومی نیمگ ءَ کیچ ءِ دمگ کولواہ ڈنڈار ءَ ھال سر بیتگ کہ گوستگیں شپ ءَ ڈنڈار ءِ ھند نگور ءَ ناشناسیں مردماں مزن شھدگ ءَ کورولا گاڑی ءِ ڈارگ ءِ جھد کتگ نہ دارگ ءِ سبب ءَ آیاں تیرگواری کتگ ءُ چریشی ءَ یک زالبولے بیران ءُ یک زھگے زدگ بیتگ ءُ چریشی ءَ پد آ زدگیں جاوراں تربت ءَ برگ بیتگ-

بیران ءُ زدگ بیتگیں مردمانی سیادی آشال نیک مھمد بازار ءَ اِنت آ ڈنڈار ءَ ڈاکٹر ءَ شتگ بیتگ اَنت کہ ناشناساں نشانگ کتگ اَنت-

نبشتانک: بلوچ زالبولیں جھدکار

نبشتہ کار: حکیم بلوچ

دی بلوچستان پوسٹ

چوناھا مئے چاگرد ءَ دلیری، بھادری، نترسی، سرمچنڈی، سرمچاری ءُ ھمک ھما گال لبز کہ آئی ءِ نزیکی گوں دلریں کرد ءِ پیلو کنگ ءَ اِنت آ گیشتر گوں مردیناں ھمگرنچ بیت۔ مئے کسھانی گیشتریں کارست دلیری، مل مڑوکیں ءُ چوٹ بروتیں مردین اَنت۔ بلے وھد بدل بیتگ، چاگرد مٹ بیتگ، مردین ءُ جنین ءِ تپاوت آیانی کرد ءُ کارستانی سر ءَ جھان ءَ باز گپ بیتگ ءُ بیگ ءَ اِنت۔

بلے بلوچ چاگرد مروچی جنینانی کوپگ ءَ اِنت، مروچی بلوچ چاگرد ءِ رژنائیں کارست زالبول اَنت، مروچی بلوچ راجے پجار ھما بانکیں مات، گوھار ءُ جِنکو اَنت کہ بہ گندے اگاں جاورھال چُش مہ بیت اِنت آ وتی لوگاں بیتگ اِت اَنت آ وانگ ءَ اِت اَنت آ وتی زھگ ءُ ھمکروچی زندمان ءَ گوں وش اِت اَنت۔

بلے جاورانی لوٹ ءَ بگش اگاں بلوچ جنینانی برداشت ءِ ھد ءِ آسری کہ مروچی بلوچ ءِ سیاست، بلوچ ءِ گھگیری، بلوچ ءِ چاگرد درستانی رکینگ ءُ دیما برگ ءِ زمہ واری گش ئے وڑے نا وڑے ءَ بلوچ جنین آدماں وتی کوپگ ءَ زرتگ ءُ دیم ءَ جُنزگ ءَ اَنت۔

مروچی بلوچ زالبول سمی ءِ دروشم ءَ بیگواھیں مردمانی جھد ءِ یک چیدگے جوڑ بیتگ اَنت، سینزدہ سالانی وداراں پد سمی مروچی تھنا وتی کماش ڈاکٹر دین جان ءِ ھاتر ءَ جھد کنگ ءَ نہ اِنت بلکیناں آ درستیں بیگواھیں مردمانی کھولانی یک مھکمیں باسکے کہ آیانی ریتکگیں ارسانی پھک کنگ ءَ بگر داں آیانی ھاٹیگ اِنت ءُ وتی جھد ءَ دیم ءَ برگ ءَ اِنت۔

ھمے پئیم ءَ ڈاکٹر ماھرنگ نودربر سیاست ءِ تہ ءَ یک انچیں چیدگے جوڑ بیتگ کہ ماھرنگ ءَ ابید گشے بلوچ ءِ گھگیری نا سرجم اِنت۔ ماھرنگ مروچی یک انچائیں توارے جوڑ بیتگ کہ آ شال ءَ بگر داں بلوچستان ءِ ھمک کُنڈ کُنڈ ءَ بزگ ءُ لاچاریں مھلوکاں پہ یک اوست ءُ امیتے ءِ ڈیوا اِنت۔

بلوچستان ءَ زالبولانی جھد تھنا پہ زھرشانی ءُ گھگیری ءِ ھد ءَ داں اوشتوک نہ اِنت بلکیں زالبول بلوچ چاگرد ءِ ھمک جیڑہ ءُ جنجالانی تہ ءَ اولی تک ءَ اوشتاتگ اَنت کمک کنگ ءَ اِنت آئی یک مستریں دروریں آمنہ بلوچ اِنت کہ گوں بلوچ یکجھتی کراچی ءِ سنگتانی ھمراھداری ءَ شپ ءُ روچ بلوچستان ءِ ھار آماچیں مھلوک ءِ کمک ءُ ھمراھداری کنگ ءَ اِنت ءُ ھمے کچ ءَ وتی کرد ءَ پیلو کنگ ءَ اِنت کہ بلوچ راجدپتر اَے کرداں ھچ پراموش کُت نہ کنت۔

بلوچ راج ءِ وش بھتی اِنت کہ مروچی وھدیکہ بلوچ راجی جھد ءَ بندوکیں ورناہ کہ زوراکی آماچ اَنت بیگواہ اَنت نمیران کنگ بیتگ اَنت ھمے وھد ءَ آیانی جاہ آیانی کمی ءَ آیانی گوھار، مات ءُ چُک پیلو کنگ ءَ اَنت۔ زیک ھمے دگانی سر ءَ شبیر زھرشانی کنگ ءَ بیتگ بلے مروچی سیما وتی برات ءِ شوھاز ءَ یک انچیں مھکمیں توارے جوڑ بیتگ کہ آئی ءَ جھان ءَ پدمنتگیں راجانی ھاتر ءَ جھد ءُ مستقل مزاجی ءِ درور جوڑ بیتگ۔

بلوچ راجی جھد ءَ ھواریں زالبول آیانی کرد ءُ آیانی دیمھونیاں اے راستی پدر کُتگ کہ یک راجے ءِ دیمروئی آئی ءِ جھد راجی آجوئی ءِ کاروان ءِ منزل ءَ روگ ابید چہ زالبولانی ھواری ءُ کرد پیلو کنگ ءَ ابید ھچ بر باوری نہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔