TBP Balochi

نبشتانک: سبی ءَ بگر برو داں بے مرادیں گوادر ءَ

نبشتہ کار: ناکو رگام بلوچ

دی بلوچستان پوسٹ

جولائی ءِ ماہ بگر دانکہ مرشی 19 اگست انت اگست ءِ ماہ ھما شومیں ماہ انت کہ اول اگست ءَ بگر دانکہ 26 اگست ءَ شھید اکبر خان ءِ شھیدی ءِ روش ءَ تک اگست ءِ ھر روش ءَ بلوچستان ءِ راجدپتر ءِ تاکانی رد ءَ لازم نہ لازم ھر تاکدیم ءَ ھونانی نشان گندگ ءَ کیت اے وھدی بلوچستان سک تباہ انت کہ ھور ءُ سیلاب ءُ طوفان کہ جولائی ءِ ماہ ءَ گوادر مکران ءَ شہ بندات بیثگ انت دانکہ کوہ سلیمان ءَ تک سر بیثگ اَنت گوادر ءِ سیمسرانی سر ءَ بیلہ سرجم ءَ تباہ اِنت بیلہ ءَ 90 درسد تباھی انت سہ ھپتگ ءَ شہ گیش ھور ءُ سیلاب ءَ وتا برجم داشتگ مھلوک آپ ءَ برتگ سدانی ھساب ءَ جان ءُ ساہ آپ ءِ اندر ءَ لیپگ بیثگ اَنت ریاستی اداراھاں بس ھاموشی ءُ بے برمشی ءِ ندارگ چارتگ ءُ چارگ ءَ اَنت بلوچستان ءِ گوستگیں سر وزیر جام کمال ءِ جند ءِ گس انت بیلہ بلے بژن کہ جام صاحب یک روشے واستا کیت ءُ فوٹو سیشن ءُ سلفی کش ایت ءُ روت بیلہ ءِ توکا لس مھلوک ءِ کمک ءَ بس بلوچ جھدکاراں بلوچ یکجھتی کمیٹّی ءُ احساس ویلفئیر ءُ اوست ویلفئیر ءُ شاھمیر ویلفئیر ءُ زدان ویلفئیر ءِ سنگتاں چندہ ءِ دروشم ءَ راشن میڈیسن تمبو ءُ آپ ءُ ورد ءُ تام پہ مھلوک ءَ آرتگ۔

اے مزنیں لسبیلہ کہ سرجم ءَ تباہ انت چار لاکھ ءَ شہ گیش مھلوک بے لوگ ءُ بے جاہ بے ورد اَنت کسان کسانیں زھگ پہ بے ورگی ءَ مُرتگ اَنت ءُ زوال بوتگ اَنت ھمے سما کپ ایت کہ 40 سال ءَ پیش صومالیہ انچوش گژن ءَ مھلوک کُشتگ اَنت اے مھلوک پہ چندہ ءَ چتور گُزران کنت بلے شاباش سد آفرین بلوچ ءِ بچاں بلوچ ءِ ماس اَماّ آمنہ بلوچ ءِ یکجھتی کمیٹّی ءِ کسان سالیں جھدکاراں کہ بے واب اَنت بے آرام اَنت بلے بے مھر نہ اَنت انچوش اے دگہ بلوچ جھدکار چُشکہ ملا لیاقت ولی ءُ قیوم وفا ءُ اصغر زھیر ءُ عبدالرحمن بلوچ ءُ عبدلخالق بلوچ اے دگہ سنگت ءُ جھدکارانی وس ءُ واک ءَ سد سلام انت ۔

ریاست ءِ اندر ءَ نندوکیں پارلیمانی وزیراں بس ریاستی کپتگیں ھیلی کہ شش ریاستی ادارھانی جرنلانی مرگ ءِ سر ءَ وتی تعزیتی بیان داتگ ءُ پاکستانی ادارھانی دل وش کرتگ بلے بژن کہ اے مھلوک کہ سیلاب ءَ کہ برتگ اَنت پاکستانی میڈیا گشگ ءِ رِد ءَ بلوچستان ءَ اے وھدی سہ سد مردم بیران بوتگ البتہ پاکستانی میڈیا بس سر سری رپورٹے چشکہ پاکستانی میڈیا بلوچستان ایکٹیب نہ انت کہ ریاستی چیریں اداراھاں رپورٹ ءِ دیگ ءِ مکن کرتگ بیلہ ءِ اے سیلاب دو روش انت کہ کوہ سلیمان ءِ ھند ءُ دمگاں سر بیثگ تونسہ بگر دانکہ راجن پور ءَ اے تک ءَ 25 ھزار گس اے سیلاب ءَ زیر آپ کرتگ اَنت مردمانی مال ءُ دلوت ءُ گس ءُ مڈی درست آپ ءَ برتگ اَنت بلے ریاستی اداراہ بس ھاموشی ءِ ندارگ ءَ چارگ ءَ انت ءُ بلوچ مھلوک ھمے اھساس دیگ ءِ جھد ءَ انت کہ اے ریاست بس بلوچ ءِ نسل کُشی ءِ سامان ءَ یکجاہ کتگ اَنت آ سیلاب ءِ شکل ءَ بہ بیث یا بمبارمنٹ ءِ دروشم ءَ یا پاکستانی لشکر ءِ آپریشن ءُ بلوچانی گار ءُ بیگواہ ءُ چست کنگ ءِ دروشم ءَ کجام ھم کجام شکل ءَ ریاستی مشینری سرگرم انت پہ بلوچ ءُ بلوچستان ءِ سر ءَڈی جی خان ءُ کوہ سلیمان ءِ مال ءُ مڈی کریکل سیمٹ اے دگہ مڈیانی لُٹ پُل سندک ءُ ریکوڈک یا گوادر مکران ءِ زر ءِ لیگار کنگ ءُ بلوچ ساھل ءُ وسائل ءِ لُٹ پُل بلوچستان ءِ پارلیمانی سیاست دانانی بلیک میل اختر مینگل ءُ ڈاکٹر مالک ءُ چنگیز مری ءُ شازین بگٹی ءُ ثنا بلوچ ءِ مراحت ءُ مفاد ءُ بلوچانی نام ءَ ھزاراں فنڈ ءُ گرگ ءُ ورگ ءُ عیش ءُ نوش کنگ وتی سیاست ءَ زندگ دارگ ءُ شش نکاتانی نام ءَ بلوچ گار ءُ بیگواھانی نام ءَ سیاست کنگ۔

اے بے شرمی ءُ بے ھیاھی ءُ چم جھلی ریڈ زون ءِ کش ءُ گورا ساھیں شیشگ گاڑیانی تہ ءَ پارلمنٹ روگ بلے ھما بزگیں پیریں زالیں ماس ءُ کسانیں تپلیں زھگ مرشی یک ماھی سرجم بوگ انت اے شش نکاتی مینگل ءُ اے دگہ ٹولھاں گندگ ءَ نہ اِت اِنت مرشی بلوچ ءِ بزگی ءُ واری ءُ در پہ دری بلے یاد کنگ بہ بیت کہ طاقتور مدام طاقتور نہ بیث یک نہ یک روشے کیت کہ کُلاں جواب دیگ لوٹ ایت آ روش ءَ جیگ شمئے بیث ءُ دست بزگیں بلوچانی بیث –

زبان ءُ زمین ءُ مزاحمت زندگ بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءَ ناشناسیں مردمانی تیرگواری ءَ پت ءُ زھگ زدگ بیتگ اَنت-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ ناشناسیں مردمانی تیرگواری ءَ پت ءُ زھگ زدگ بیتگ اَنت-

تیرگواری ءِ وئیل زاھدان ءِ دمگ خیابان آزادی ءَ عزیزی مسیت ءِ گور ءَ پیش اتکگ کہ اود ءَ سلاہ بندیں مردماں تیرگواری کرتگ ءُ پت ءُ زھگ زدگ کتگ اَنت-

زدگ بیتگیں مردمانی پجار محمود مھمدی ءُ زاھد مھمدی جھمنند قلجہ ای زاھدان ءُ مشھد ءِ نندوک اَنت-

ھالانی تہ ءَ گوشگ بیتگ کہ وئیل ٹکی جیڑھے ءِ سر ءَ پیش اتکگ ءُ تیرگواری کنوک تیرگواری ءَ پد تتکگ ءُ شتگ اَنت-

روکپتی بلوچستان ءَ چوشیں وئیل یکشل ءَ پیش آیگ ءَ اَنت سال دوھزار ءُ بیست ءُ یک ءَ داں انیگ ءَ یک سد ءُ پانزدہ مردم جنگ ءُ زدگ کنگ بیتگ اَنت کہ اشانی تہ ءَ پنچ زھگ ءُ دگہ چار زالبول ھوار اَنت کہ جتا جتائیں وئیلانی سر ءَ جنگ بیتگ اَنت-

بلوچستان لبریشن فرنٹ ءَ گْوادر ءِ ھند واجھانی نِگور ءَ گْوادر پورٹ ءَ چہ کنٹینر بروکیں گاڑیانی کاروان ءِ سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءَ گْوشتگ کہ بیست ءُ یک ساچان ( 21 اگست ) ءِ ادار چار ءُ نیم ءَ مئے سرمچاراں گْوادر ءِ دمگ مکران کوسٹل ھائی وے ءَ واجھانی نِگور ءِ ھند ءَ چہ گْوادر پورٹ ءَ کنٹینر بروکیں سئے ٹرالر گاڑیانی سر ءَ اُرش کُرتگ۔ اُرش ءِ آسر ءَ گاڑیاناں باز تاوان رس اِتگ ءُ یک ڈرائیورے ٹپّی بوتگ۔

میجر گْوھرام بلوچ ءَ وتی درشان ءِ تہ ءَ دیمتِر ءَ گْوشتگ کہ اے اُرش ءَ سئیں ٹرالر گاڑیانی ڈرائیور ءُ اے دِگہ اسسٹنٹ چہ گاڑیاں اِیرکپتگ اَنت ءُ مئے سرمچاراں آیاناں دِگہ گیشیں تاوان نہ داتگ، بلے ما ڈرائیور ءُ ٹرانسپوٹراں گوں ساری ءَ دزبندی ءُ مکن کُرتگ اَنت کہ آ اے ریاستی لُٹّ ءُ پُلیں شوربندیاں چِہ وت ءَ دُور ءُ گِستا بدار اَنت، اگاں نا آ وتی توامیں نُکس ءُ تاوان ءِ زِمہ وار وت بَہ اَنت۔ ھمے رنگ ءَ گْوادر پورٹ ءَ ھوار تیوگیں پروجیکٹ ءُ شوربندی مئے سرمچارانی نِشانگ ءَ اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ تہ ءَ دیمتِر ءَ گْوشتگ کہ مئے سرمچاراں ھمے ماہ ءِ رمس پانزدہ ءَ گْوادر پورٹ ءِ گاڑیانی کاروانے ءِ سر ءَ اُرش کُرتگ۔ چہ آ اُرش ءَ پد پاکستانی لشکر ءَ گْوادر پورٹ ءُ گوں آئی ءَ ھمگرنچیں مکران کوسٹل ہائی وے ءِ راھانی نگھپانی ءِ واستا پھازداریں لشکر ءِ کچّ ودّینتگ۔ بازیں پھازداری ءِ ھرچ ءُ درچاں ابید پاکستانی لشکر اے شوربندیانی پھازگ ءَ بے سوب اِنت۔

دیمتِر ءَ جارکشّ میجر گْوھرام بلوچ ءَ گْوشتگ کہ پاکستان ءِ کُمکّ ءَ اے دمگ ءَ چین ءِ ساڑی بُوَگ بلوچ ءُ پہ اے دِگہ ڈیھانی راجی سلامتی ءِ واستا ھترھے۔ چین وتی مالی شوربندیانی پلو ءَ لشکری شوربندیاں مُھکم کنگ ءُ دیمروئی دَیَگ لوٹ اِیت۔

چریشی ءَ اے دمگ ءِ اندر ءَ یک بے بیسّھی یے ودی بُوَگ ءَ اِنت۔ ھمے گامگیج اے دمگ ءِ ڈیھاں ھوار پہ بلوچ راج ءَ تاوان بار اِنت۔  ما چہ میاں اُستمانی تاکت ءُ ھمساھِگیں ڈیھاں دزبندی کن اِیں کہ آ بلوچ راجی جُنز ءِ کُمکّ ءَ بِہ کن اَنت دانکہ ما پاکستان ءُ چین ءِ وڑیں زُورگِرے ءِ مُکابِلہ ءَ شرّیں وڑے ءَ کُرت بِہ کن اِیں۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ مئے اے اُرش دُژمِن ءُ آئی کُمکّارانی بگیر ءَ دانکہ زیردستیں سرڈگار بلوچستان ءِ آجوئی ءَ گون تْرندی ءَ برجاہ بَہ اَنت۔

اوگانستان ءِ پرگینگ لوگر ءَ ترندیں ھوراں پد ھارءِ سوب ءَ شدید 20 مردم بیران ءُ 30 ٹپی بیتگ اَنت۔

اوگان رسانکدر ءِ ردءَ لوگر ءَ بشامی ھوراں پد ودی بیتگیں ھارانی سوبءَ مردم بیران ءُ 30 ٹپی بیتگ اَنت۔ بیران بیتگینانی تہءَ 9 زھگ، 9 جنین ءُ 2 مردین ھوار اَنت وھدیکہ ھاری آپ ءَ بُڈ اِتگ ءُ چار مردم بیگواہ بیتگ اَنت۔

ھار ءِ سوب ءَ 3 ہزار ءَ گیش لوگ تاوانبار بیتگ اَنت ءُ ہزارانی کچ ءَ مردم پچیں آزمان ءِ چیرءَ نشتگ ءُ شپ گوازینگ ءَ لاچار اَنت۔اوگان واکدارانی ردءَ بازیں پرگینگ ھم ھارءِ جاورھالانی دیمپانی اِنت ءُ ھورانی یکشلی برجاہ اِنت۔

بلوچستان ءِ بنجاھی شھر شال ءَ زیارت وئیل ءَ پد جنگ بیتگیں زھرشانی بنجل ءَ سِی ءُ سَے روچ سرجم بیتگ کہ زھرشانی کنوک ریڈزون ءَ نشتگ اَنت ءُ مروچی کھولاں ریڈ زون ءِ ھواری ءَ جی پی او چار راہ ھم بند کتگ-

کھولانی گوشگ اِنت کہ گوستگیں یک ماھے ءَ گوزگ ءَ پد ھم سرکار مئے لوٹانی سر ءَ دلجمی ءَ دلگوش نہ اِنت چریشی ءَ ما لاچار اِنت کہ وتی نندانکاں گیش دیمتر ءَ بہ بریں –

جی پی او چار راہ ءِ سر ءَ یک ویڈیو کلوھے ءَ بیگواھیں ڈاکٹر دین مھمد ءِ جنک ءُ وی بی ایم پی ءِ رھشون سمی دین بلوچ ءَ گشتگ کہ گوستگیں روچ ءَ سرکاری ٹولی ءِ کلوہ آروکیں کاسد اتکگ اَنت بلے آیاں مارا دلجمیں گپ ءِ گوشگ ءَ ابید نندانک ءِ ھلاس کنگ ءِ کڈن کتگ-

سمی دین بلوچ ءَ گشتگ کہ گوستگیں ماھے ءَ گیش اِنت کہ بیگواھیں مردمانی پنجاہ کھول ءَ گیش اے نندانک ءَ ھوار اَنت ءُ آ وتی مردمانی پھریزگ ءِ واستا پریات کنگ ءَ اَنت بلے بے وس ءُ ٹگیں سرکار انگت ءَ اشاں دیست کنگ ءَ نہ اِنت-

زانگ بہ بیت بلوچستان ءَ اے وھد ءَ ھار ءُ کھر آماچیں ھوراں سرجمیں بلوچستان وتی لپیٹ ءَ زرتگ ءُ چریشی ءِ سبب ءَ شال ءَ زھرشانی ءَ نیشتگیں کھول ھم ھمے کھر ءِ آماچ اَنت ءُ گوستگیں روچ ءَ آیانی تمبو ءُ اژدری سامان ھور ءَ مسینتگ اَنت-

زانگ بہ بیت گوستگیں روچ ءَ سرکاری ٹولی ءَ نودر مھمد دمڑ، بشرا رند ءُ شکیلہ نوید دھوار کھولانی نندانک ءِ ھلاس کنگ ءِ واستا سرکار ءِ کاسد بیتگ اِت اَنت کہ آیاں گشتگ اَت شما اے ھور ءُ ھراماں وتی نندانک ءَ ھلاس بہ کن ات ءُ وتی گساں بہ رو اِت پد ءَ دوبر بیا ات ءُ رند ءَ پرشما یک راھے گیشینگ بیت اِنت-

کھولاں وتی نندانک ءِ ھلاس کنگ ءَ ابید مروچی آیاں شال ءِ یک گچینی راھ جی پی او چوک بند کتگ ءُ آیاں گیش نندانک جنگ ءِ گپ ھم جتگ –

زیارت ءِ وئیل ءَ پد گورنر کارگس ءِ دیم ءَ ریڈ زون ءَ بیگواھیں مردمانی کھولانی زھرشانی نندانک برجاہ، نندانک ءَ مروچی سِی ءُ دو روچ سرجم بوتگ انت – مروچی نندانک ءَ سرکاری ٹولی ءِ اتکگ کہ آھانی تہ ءَ سوبائی وزیر نور محمد دمڑ، پارلیمانی سیکٹری ایس ءُ جی ڈی اے بشری رند، ایم پی اے اختر حسین لانگو ، ایم پی اے شکیلہ نوید دھوار ھوار بوتگ انت –

سوبائی وزیر ءُ اسمبلی ءِ باسکاں کھولانی گوم ءَ دلپدردی درشان اِتگ ءُ گوں آھان گند ءُ نند کُتگ –

سرکاری ٹولی ءِ گوشگ ات کہ بیگواھیں مردمانی کھول نندانک ءَ ھلاس بہ کن انت ءُ وتی وتی گِساں واتر بہ بہ انت پد ءَ رند ءَ آھانی لوٹ ءُ جیڑھانی گیش گیواری ءَ راہ در گیجیں – آھانی گوشگ ات کہ بلوچستان ھار آماچ انت اے نگیگیں جاوراں بیگواھیں مردمانی کھول وتی گِساں بہ رو انت –

ٹولی آیگ ءُ گند ءُ نند ءَ چشیں ھاسیں رزلٹے دیم ءَ نہ اتکگ کہ بیگواھیں مردمانی کھول رازی بہ بنت ءُ وتی نندانک ءَ ھلاس بہ کن انت –

بیگواھیں مردمانی کھولانی گوشگ ات کہ ماھے ءِ گوزگ ءَ رند سرکاری ٹولی مارا ھمے گوشگ ءَ اتکگ انت کہ شما نندانک ءَ ھلاس بہ کن ات وتی گِساں بہ رو ات پد ءَ رند ءَ چارگ بیت انت –

زانگ بہ بیت ماھے ءَ گیش انت کہ پنجاہ ءَ گیش بیگواھیں مردمانی کھول اے موسم ءَ ریڈ زون ءَ گورنر کارگس ءِ دیم ءَ نندانک ءَ نشتگ انت بلے تنی وھدی سرکار آھانی لوٹانی منّگ ءُ گوشدارگ ءَ سرکار سنجیدگ نہ انت –

مروچی چہ ھزدار ءَ بیست ءُ دو جولائی سال دوھزار ءُ ھبدہ ءَ زورانسری آوار جنگ بوتگیں محمد انور ء محمد ءِ مات نندانک ءِ بھر جوڑ بوتگ ءُ آئی ءَ وتی زھگ ءِ یل کنگ ءِ لوٹ کُتگ –

مروچی ترندیں ھئور ءِ سوب ءَ تمبو آپ ءَ پُر بوتگ انت چریشی ءَ کھول بازیں اڑ ءُ جنجالانی دیمپان بوتگ انت –