TBP Balochi

چار شمبے ءِ روچ ءَ بلوچستان ءِ دمگ کیچ ءِ بنجاھی شھر تربت ءَ جمعیت اہل حدیث و اہل حدیث یوتھ فورس ءِ نیمگ ءَ مولانا ایاز نور تگرانی ءِ زورانسری بیگواھی ءِ بگیری ءَ زھرشانی کنگ بیتگ۔

اے وھدءَ پریس کلب ءَ بگر شہید فدا چوک ءَ تاں روانک ءِ کُشگ بیتگ ، روانک ءَ بھرزیروکاں چاہ سر تربت ءَ داں ائیرپورٹ چوک ءُ کالج روڈ ءَ بگر جامعہ مسیت تربت ءَ داں گاڑیانی سرءَ مولانا ایاز نور تگرانی کی یل کنائنگ ءِ ھاترءَ اوگام جتگ۔

زھرشانی کنوکاں گوں بنجاھی جمعیت اہل حدیث بلوچستان ءِ ڈپٹی جنرل سیکرٹری ڈاکٹر مولانا علی جان بلوچ، آل پارٹیز کیچ ءِ ڈپٹی کنوینر کامریڈ ظریف زدگ، پی این پی ءِ بنجاھی ہیومین رائٹس سیکرٹری خان محدجان گچکی، بی این پی مینگل رھشون حافظ عطا آسکانی، جماعت اسلامی کیچ ءِ انیگیں امیر غلام اعظم دشتی، جمعیت علما اسلام کیچ ءِ رھشون عبدالقدیر مینگل، بنجاھی جمعیت اہل حدیث کیچ ءِ ناظم تبلیغ حافظ اسماعیل زامرانی، اسلامیہ سلفیہ چاہ سر تربت ءِ استاد مولانا سعید احمد تگرانی، حق دو تحریک کیچ ءِ آرگنائزر یعقوب جوسکی و دگراں تران کُتگ ۔

آیاں گُشتگ کہ مولانا ایاز نورتگرانی ءِ زورانسری بیگواھی ءِ وئیل ایرجنگی اِنت، ریاست وتی شھریان بہ پھازیت اگں کسی کجام گمان است گُڑءَ قانود ءُ رھبند است اَنت۔ نودربر، کواس اور دگہ کارستاں بیگواہ کنگ ءَ پد نی علماء کرام ھم چِست کنگ بئیگ ءَ اَنت، سرجمیں ملک ءَ زورانسری بیگواھیاں چہ لس مھلوک ءُ ھم تکے تہءَ بے باوری گندگ ءَ کئیت علماء کرام چاگردءِ تہءَ پر ایمن تریں مردم اَنت پمیشکہ آھانی زورانسری بیگواہ کنگ ءَ سر کچ نہ وارت۔

اس درگت ءَ بنجاھی جمعیت اہل حدیث بلوچستان ءِ ڈپٹی جنرل سیکرٹری ڈاکٹر علی جان زامرانی ءَ گُشتگ کہ بنجاھی جمعیت اہل حدیث یک پرایمنیں سیاسی مذہبی جمہوری اور گھبودی پاٹی اِنت کہ ھمک پئیمیں کَٹ کُٹ ءُ ناشرکاریانی ھلاپ اِنت۔ بنجاھی جمعیت اہل حدیث ءَ ھوار کجام ھم پر ایمنیں شھری ءُ کجام ھم جھدکاراں گوں کجام ھم ادارگ ءَ ھم جیڑہ ءِ است گُڑءَ زمہ واریں مردم ءُ سیاسی گل ھال کنگ ءُ گُشگ بہ بنت چُش اناگتی چِست کنگ ءَ چہ چاگردءَ گیشتر دیری ودی بیت ءُ مھلوکانی تہءَ زھر ءُ بے باوری کئیت۔

آیاں گُشتگ کہ مولانا ایاز اگں زیت ءَ زیت یل کنگ مہ بیت گُڑءَ ما سی پیک دگ ءَ ھوار سرجمیں بلوچستان ءِ دگاں بند کنیں، بنجاھی جمعیت اہل حدیث اے وھدءَ ھار ءَ چہ سانمندیں مردمانی کمک کنگ ءِ نیمگ ءَ دلگوش کنگ ءَ بیتگ بلے مارءَ پہ زھرشانی کنگ پہ لاچار کنگ ءُ دگانی سرءَ آرگ بیتگ، بلوچستان ءِ سرءَ زوراکی ءُ ایردستی ءَ رویش دارگ بہ بیت ءُ زندگ بیگ ءِ ھق دیگ بہ بیت۔

بلوچستان ءِ دمگ ھرنائی ءَ چاردہ اگست پاکستانی پوج ءِ تیرگواری ءَ چہ ورنا خالق داد ءِ کوش ءُ کسانیں زھگاں ھوار بازین ئِے ٹپی بوتگ اِت اَنت چریشی ءَ پد دمگی مردم ءَ زھرشانی کتگ کہ دہ روچ پر گوزگ ءَ پد ھم برجاہ ءَ اِنت-

چاردہ اگست ءَ بوتگیں وئیل ءِ بگیری ءَ 23 اگست ءَ شال پریس کلب ءِ دیم ءَ زھرشانی کنگ بوتگ-

مروچی زھرشانی کنوکاں زھرشانی ئیں نندانک جُنزینتگ ءُ خانوزئی ءِ نزیک ءَ زیارت کراس بند کتگ اِت، چریشی سبب ءَ شال ءُ ژوب ءِ میانءَ روگ آھگ مھتل بوتگ اَنت ءُ دگ ءِ دوئیں نیمگاں گاڑیانی دراجیں کِشک ءِ لگ اِتگ- نندانک ءَ نشتگیں مردماں وئیل ءَ ھمگرنچیں آمیدگیسی کمیشن جوڑ کنگ ءُ پوج ءِ دراھگ ءِ لوٹ ءَ کنگ ءُ اَنت-

دومی نیمگ ءَ ھکومت بلوچستان ءِ گْوشگ اِنت نندانک ءِ لوٹانی درگت ءَ چہ وزارت داخلہ نیمگ ءَ یک کمیٹی یے دیم دیگ بیت – زانگ بہ بیت کہ ھرنائی ءِ دمگ خوست ءَ چاردہ اگست ءَ پوج ءِ بگیری ءَ زھرشانی ءِ وھد ءَ عوامی نیشنل پارٹی ءِ باسک خالق داد پوج ءِ تیرگواری ءَ بیران ءُ یک زھگے ءَ ھوار ھپت مردم ٹپی بوتگ اِت اَنت-

دمگی مردمانی رِد ءَ زھرشانی ءِ میان ءَ ایف سی ءِ تیرگواری ءَ چہ اے وئیل دیم ءَ اَتکگ بلے ایف سی ءَ اے بھتام گوں تُرندی ءَ ایر جتگ اَنت چریشی ءَ پد پانزدہ اگست ءَ ھرنائی ءَ مردماں خوست ءَ ایف سی ءِ بُنجل دیم ءَ نندانک بندات کتگ کہ مروچی دھمی روچ ءَ ھم برجاہ ءَ اِنت-

روکپتی بلوچستان ءَ دو نیمگی تیرگواری ءَ یک شھری یے بیران بیتگ ءُ یک ایرانی لشکری یے زدگ بیتگ-

گیشیں ھالانی رد ءَ روکپتی بلوچستان ءِ دمگ مھرستان پازگاہ ءَ یک مردمے ءَ ناگتی اُرش کرتگ ءُ چریشی ءَ اُرشکار پسھی تیرگواری ءَ بیران بیتگ ءُ یک کارندھے زدگ بیتگ-

وئیل مھرستان ءَ ایرانی لشکر ءِ چوکی ءِ سر ءَ بیتگ کہ اود ءَ دو نیمگی تیرگواری بندات بیتگ-

تیرگواری ءَ بیران بیتگیں مردم ءِ پجار عبدالسلام آزادی ءِ نام ءَ زانگ بیتگ کہ مھرستان ءِ جھمنند گوشگ بیگ ءَ اِنت-

ھالانی تہ ءَ گوشگ بیتگ کہ عبدالسلام ءَ ایرانی پاسگاہ ءِ سر ءَ اُرش کرتگ ءُ چریشی ءَ پسھی تیرگواری ءَ آ جنگ بیتگ-

اُرشکار ءِ اُرش ءَ یک کارندھے زدگ بیتگ ءُ اُرشکار پاسگاہ ءَ جاڑیگیں کارندھانی تیرگواری ءَ بیران بیتگ –

وئیل ءِ درگت ءَ دگہ گیشیں سرپدی دیم ءَ نیتکگ اَنت نانکہ پھزدارانی نیمگ ءَ دگہ گپ دیم ءَ اتکگ اَنت-

نبشتانک: واتر پہ وتی ھلک ءَ

نبشتہ کار: ایس ایچ بلوچ

دی بلوچستان پوسٹ

دومی بَھر

ما در کپت اِنت چہ دوار ءَ لھتے ساھتانی سپر ءَ پد مارا شپ ءَ گِپت گُڑا جاھے ما داشت کہ شپ ءَ ھمد ءَ گوازینت سلامتی گوربام کنین در کا اِنت گُڑا من نشت اِنت سنگتاں آس روک کُت سنگتے چاھے ءِ پِر کَنگ ءَ لگ اِت ما آس ءِ سر ءَ نِشت اِنت داں چاہ گرست ما وارت آس ءِ سر ءَ نِشت اِنت کمو باز وت ءَ جان جان کُت من سنگتاناں گُشت پل من ءَ یات اِنت ما یک رندے آ بُرزیں کوھے ءِ سر ءَ شُتگیں پہ نیٹورک ءَ بیا اِت رائین ءِ کوہ ءِ سر ءَ زونگ ءِ نیٹورک ھست اِنت اُستاد ءِ زی آں ھال کن ایں ما نزیک ءَ داشتگ گُڑا من سنگتاناں گْوَشت ما کوہ ءِ سر ءَ رائین شما چار سنگت کَشے شیپ ءَ بہ نند اِت ما رائین کوہ ءِ سر ءَ نیٹورک ءَ پد ءَ ما گُوربام ءَ جھل کائِے سنگت ءَ گُشت شر اِنت گُڑا ما چاریں در کپت اِنت پہ بُرزیں کوہ ءَ جَنان پُرشان داں کوہ ءِ سر ءَ سر بیت اِنت ما موباھل چہ جاٹاں کَش اِت اَنت بازیں میسج ءُ پون اتکگ ءَ سنگتانی گُڑا سنگت گوں وتی میسج ءُ ھالاں دلگوش بیت اَنت من ھچ نہ چار اِت اُستاد را پون کُرت اُستاد نمبر گُشی نیٹورک ءَ نہ اِنت من گُڑا ھمے سنگت کہ نیٹورک ءَ اِتاں من ھمیشانی نمبر جت سنگت ءَ پون چست کُرت ما سلام دُروت بیت اِنت من اُستاد ءِ جُست کُرت گُشی اُستاد ساھت ءِ بیت جھلّ ءَ شُت اِنت گُڑا من سنگت ءَ را گُشت اُستاد ءَ ھال دے ما اتکگیں نزیک ءَ سر اِنت جاھے ءَ داشتگ سلامتی گوربام ءَ در کپین کایے سنگت گُشت شریں جگر اللہ میار اِت ھواریں پُل-

من وتی سنگتاناں گُشت ھال کن اِت باریں چی ھال انت سنگتاں گُشت دگہ ھال نیست مرچی لشکر ءَ بازیں سنگتانی لوگ سوتکّگ اَنت ءُ بازیں بے میاریں مردم گوں وت بُرتگ اَنت من گُشت اے چیز مئے سر ءَ ھست بنت-

من وتی دومیگ موباہمھل چار اِت چاراں منی لوگ ءَ چے بازیں پون ءُ میسج اتکگ من میسج چار اِتاں چاراں گوھار گُشی تو کُجایے ترا دیر اِنت تو لوگ ءَ دراتکّگے اَماں ھر ٹیم ءَ یکے گندی گُشی منی چک اِنت اتک من گُوھار ءَ میسج کُت ءُ گُشت من انو اِد ءَ نھاں مات ءَ بُگش گُشتگے وتی کارے ءَ در کپتگ کار ءَ کنان گُڑا کایاں سلامتی-

من ساھت چار اِت چار ءُ پنچ اِنت من گُشت سنگتان اگاں شُمارا وش بیت من کمو چمان بند کناں سنگتاں گُشت شریں پُل وپس من چم بند کُت آں پنچ ءُ پَانزدہ ءَ من ءَ سنگتاں پہ بازیں ٹوھینگ ءَ پاد کُت من گوں گُڑا اُستاد ءِ زی آں فون کَناں ھال اِش دے آں کہ ما پیداک اِنت سنگتے ءَ گُشت من ھال کُتگ اَنت من وتی چیز زُرت آں وت ءَ برابر کُت کوہ ءَ چے ایر کپان بوت آں اتکیں سنگتانی گور ءَ یک سنگتے واب اَت سے سنگت نشتگ اَت اَنت سیاھیں چاھے یے ھم تیار اش کُرتگ اَت بسکوٹ ھم دیما یر اِتاں من چاراں وابیں مرد میرو اِنت من گْوَشت وتی بیرے گِر آں پد ءَ من چار اِت یار میرو منی پُل اِنت یلہ کن ئے بلاچ ءَ گُشت وڑے سر ءَ پادے کن سک جزباتی بیت وابے سر ءَ میرو بلاچ ءَ پاد کُرت ما چم دیم کُرت چا ءُ بسکوٹ وارت گُڑا من گُشت بلے کن ات پُل آں در کایاں دو سنگت شُت اَنت سینکل اش اسٹارٹ کُت اَنت ءُ ما وت ءَ گیگ ءُ وار کُرت گُڑا درکپت اِنت-

رَوان اِنت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یورپی یونین ءَ بلوچستان ءُ سندھ ءَ توپان آماچیں مردماں انسانی کمک کنگ ءِ واستا پاکستان ءَ ھپت کروڑ ءُ ششت لک کلدار دیگ بیت اِنت-

توپان ءَ بلوچستان ءَ ھوار پاکستان ءِ دگہ جاھاں ھم تپاھی کرتگ – اسلام آباد ءَ یورپی یونین ءِ مشن ءِ نیمگ ءَ یک شنگ کرتگیں درشانے ءَ گشتگ اے کمک زربار ءُ روکپت ءَ پاکستانی اُستان بلوچستان ءِ دمگ جھل مگسی ءُ لسبیلہ درستاں گیشتر اسرمندیں ھنداں بیوکیں مردمانی اژدریانی سرجم کنگ ءَ دلگوش کنت-

پاکستان ءَ یورپی یونین انسانی ھمدردی ءِ نیادانی چاروکیں طھینی تھمنا گوڈا ءَ گوشتگ کہ تباہ کنوکیں توپان ءَ پاکستان ءَ تباھی کنگ ءِ یک داستانے یلو کتگ چریشی ءِ سبب ءَ بازیں مردم وتی لوگ ءُ زرکاری ءُ ساز ءُ ساماناں زبھر بیتگ اَنت-

آئی ءَ گوشتگ کہ یورپی یونین ءِ مالی کمک اے ناوشین جاوراں درستاں گیش نیزگاریں مردمانی کمک ءَ کنت-

یورپی یونین ءَ دیم ءَ گُشتگ کہ اے کمک میان اُستمانی ریسکیو کمیٹی گچینی کمک ءَ سرکنت-

درشان ءَ گشگ بیتگ توپان آماچیں کھولاں اژدریانی سرجم کنگ ءَ زری کمک کنت، ءُ توپان ءَ سبب ءَ اتکگیں آپانی مچ بوگ ءُ ھوپ ءِ کپگ ءَ جاندراھی ءِ واستس ھم وتی پرز ءَ پیلو کنت-

آئی ءَ گُشتگ کہ اے نیاد ءَ زالبول، کسانوکیں جنک ءُ نیزوریں زھگانی مازگی نادراھیاں ھم کمک کنت-

درشان ءَ گُشگ بیتگ یورپی کمیشن ءِ یورپی سول پروٹیکشن اینڈ ھیومینٹرین اینڈ آپریشنز (ای سی ایچ او) ءِ زور ءَ پورپی یونین ءِ پوڑی ءَ کسانیں کچے ءَ رسپانس میکانزم ءِ سر ءَ دزکپ اَنت – ای سی ایچ او ءِ کسانیں کچے ءَ ریسپانس فنڈ یک میان اُستمانی رھبندی یے چشکہ ابرمہ ءُ انسانی بنپد کھر ءَ چہ اسرمندیں ڈیھاں انسانی کمک ءَ پنچ لک یورو ءَ داں کمک کنگ ءِ پرمان ءَ دنت-

بلوچستان ءَ ھئور ءُ ھارانی سوب ءَ تاوانباری برجاہ اَنت وھدیکہ بیرانیانی کساس 230 ءَ داں سربیتگ اَنت وھدیکہ بلوچستان ءِ زمینی رھوت داں انگت گوں دگہ دمگاں سستگ بلوچستان ءَ ھوار کنوکیں دگ ءُ ریل ٹریکانی پچ کنگ ءَ واکدار داں انگت بے سوب اَنت۔

دگہ 5 مردم بیران بیتگ اَنت، توپانی ھئور ءُ ھار ءِ جاورھالاں چہ بیرانیانی کساس 230 بیتگ، 26 ھزاراں گیشتر لوگ تاوانبار بیتگ اَنت۔

پی ڈی ایم اے ءِ ردءَ گیشتر بیرانی بولان، شال، ژوب، کیچ، دکی، خضدار، کوہلو، مستونگ، ہرنائی، قلعہ سیف اللہ ءُ سبی ءَ بیتگ اَنت۔ جتاھیں وئیلاں 98 مردم ٹپی ھم بیتگ اَنت، 18 پل ءُ 710 کلو میٹر ءَ داں مزن شھدگ تاوانبار بیتگ اَنت۔

پی ڈی ایم اے ءَ ٹاہ داتگ کہ 24 ساھتانی نیام ءَ شال، جعفر آباد، نصیر آباد، زیارت، دکی ءُ صحبت پور ءَ 555 ٹینٹ، 650 فوڈ پیکٹس، 50 کمبل، 100 اسیر اور 50 مچھر دانی بھر کنگ بیتگ اَنت۔

زیارت وئیل ءَ پد بیگواھیں مردمانی دروگیں میڑءَ کُشگ ءِ بگیر ءَ بلوچستان ءِ راجدانی شال ءَ گورنر ھاؤس ءِ دیما ریڈزون ءَ زھرشانی نندانک ءَ نشتگیں بیگواھیں مردمانی کھول ءَ رسانکدرءَ شنگ کُتگیں وتی ھواریں درشانے ءِ تہءَ گُشتگ کہ ما پر ایمنیں جھد ءُ زھرشانی کنگ ءِ سرءَ باور کنیں ءُ گوستگیں 35 روچاں چہ سرجمی ءَ پر ایمنیں پئیمءَ ادا زھرشانی نندانک ءَ نشتگ اِنت کہ ادا داں انگت یک شیشگ ءِ ھم نہ پُرشتگ، ما بازیں سالاں چہ وتی بیگواھیں دوستیگیں مردمانی زورانسری بیگواھی ءِ درد ءُ کریاب آنی آماچ اِنت ءُ یک سک دردناک ءُ پرجنجالیں زند ءِ گوازینگ ءَ اِنت، ما نہ تھنا درد ءَ مار اِت کنیں بلکینہ ما درد ءِ تہءَ زند گوازینگ ءَ اِنت، ما پہ دگہ کسی ءَ چون درد ءِ واھگ دار بیت کنیں ؟

آیاں گُشتگ زیک وھدے ما لاچار بیتگ ءُ دگ بند کُتگ گُڑءَ شھریاں مئے لاچاری سرپد نہ بیتگ اَنت ءُ مئے گوما کمک نہ کُتگ ءُ زور گونڈیں زھگ ءُ پیریں جنینانی سرءَ پرپٹ ءُ گاڑیاں گوازینگ ءِ جھد کنگ ءَ بیتگ اَنت ءُ پہ زور دگ ءَ پچ کنگ ءِ جھد ءَ بیتگ اَنت، وھدیکہ مئے چہ بندات ءَ جھد ھمے بیتگ کہ ما پر ایمن بہ باں ءُ دیما ھم ما پر ایمن بئیں۔

آیانی گیشتر گُشگ اَت کہ اے نیام ءَ مارءَ زاہ دیگ بیتگ، مئے پر ایمنیں زھرشانی ءَ میڑءِ دروشم ءَ مٹ کنگ ءِ جھد کنگ بیتگ بلے اِشی ءَ ابید کہ پولیس ءَ جاور ھال کنٹرول بہ کُتیں یا اگں مئے کمک بہ کُت اِنت تھنا ھاموش ندارگ چاروک بیتگ اَنت۔

کھولاں گُشتگ کہ شال ءِ درستیں شھریاں چہ پھلی لوٹان ءَ گُشتگ کہ مئے درد ءُ جنجالاں سرپد بیگ ءِ جھد بہ کن اِت، ءُ بہ جیڑیت کہ اگں شمئے ھاترءَ چار ساھت دگ بند بیگ جنجال اِنت گُڑءَ مئے زندگ ءُ سلامتیں مردم سالاں چہ زورانسری بیگواھیانی آماچ کنگ بیتگ اَنت ءُ ما گوستگیں یک ماہ ءَ چہ کیمپ جتگ ءُ زھرشانی نندانک ءَ نشتگ اِنت گُڑءَ ما چینچو جنجال ءُ کریاب ءَ چہ گوزگ ءَ بئیں ؟

نیشنل ویدر فارکاسٹنگ سینٹر اسلام آباد، ءِ نیمگ ءَ شنگ کُتگیں درشانے ءِ ردءَ سرجمیں ملک ءَ جنزوکیں ھپتگ ءَ گیشتریں ھئورانی گمان اِنت، بشامی ھئور ھپتگے گُڈسری روچاں کم بیت اِنت۔

درشانے ردءَ 23 اگست ءَ بگر داں 26 اگست ءَ جنوب ءُ شمال مشرقی بلوچستان ءِ بازیں دمگاں ھوار سند ءُ جنوبی پنجاب ءِ لھتیں دمگانی تہءَ ترندیں ھئورانی گمان اِنت۔

ھمے پئیم ءَ کے پی کے، پنجاب، گلگت بلتستان ءُ کشمیر ءَ ھم اے روچاں ھئورانی گمان اِنت۔

درشان ءِ ردءَ شال، زیارت، ھرنائی، کوھلو، قلعہ سیف اللہ، ڈیرہ بگٹی، جھل مگسی، پشین، لورالائی، بارکھان، موسی خیل، ژوب، شیرانی، سبّی، بولان، نصیر آباد، آواران، قلات، خضدار، لسبیلہ ءُ ڈیرہ غازی خان ءِ کوھی دمگانی تہءَ ترندیں ھئورانی سوب ءَ گیشتر ھار اتک کنت۔

ھمے پئیم ءَ سند، پنجاب ءُ کے پی کے ءَ ھم ھئورانی سوب ءَ بازیں دمگاں ھار ءِ گمان اِنت۔

زانگ بہ بیت بلوچستان ءَ کساس دوستگیں دو ماھاں چہ برجاھیں یکشلی بشامی ھئورانی سوب ءَ مزنیں تاوانباری ءِ دیمپانی کنگ کپتگ۔ سدانی کچءَ مردم بیران بیتگ اَنت، مزنیں کچے ساہ دار ھم مرتگ وھدیکہ ھزارانی کچ ءَ مھلوک بے لوگ ءُ بے آسراتی پچیں آزمان ءِ چیر ءَ کمک ءِ وداریگ اَنت۔

نمدی یے پہ ترا

نبشتہ کار : رضوان رحیم

دی بلوچستان پوسٹ

دروت پہ ترا ءُ دراھی بات من چہ ھاوند ءَ ھمے اُمیت ءَ داراں کہ اگاں منی ساہ منی جبین ءِ اندر ءَ اِنت گُڑا الّم تو اوں وش ءُ وشھال بہ بہ ئے- مرچی من گوں ترا یک گپّے کنگ لوٹاں کہ من بے ترا سک ملور ءُ ابیتک آں ۔ بے ترا گُش ئے اے زندمان چو جِنتِر ءَ من ءَ دُرشگ ءَ اِنت۔ بے ترا ھِچ چیز ءَ لِذّت نیست نہ رنگ نہ موسم نہ دل نہ مولُم دُرا ابیتکی ءَ پتاتگ اَنت کس تئی یاتاں اوں چادِر ءَ نہ بندیت ءُ نیاریت من نہ زاناں چیا بلئے مرچاں من ءَ مُلور بوگ سک وش بوگ ءَ اِنت۔

انچُش سما بیت کہ گُش ئے تھاری منی کوھنیں ہمراھے ءُ تھنائی منی سنگتے بوتگ من ءَ ھمے ھاتر ءَ تنھائی ءِ رنگ ءُ استالانی بے برمشیں ترپناکی دوست بنت گوش ئے آزمان ءَ وتی لُمب ءُ نِھردگ ھم بے ھیال کتگ اَنت ماہ ءَ جوھان ءُ روچ ءَ وتی برانز ایر بکینتگ اَنت۔

بلئے من زاناں کہ ترا اے چیز ھِچ وش نہ بنت تو مُدام گْوَشتگ کہ تو پہ بچکندگ جلواہ دئے بلئے ماھو منی لُنٹانی بِچکند اے تھاری ءَ میم نہ بیت ءُ چم ارساں لُرد کُتگ اَنت۔

ماھو من زاناں ترا پہ من زھیر کنت بلئے من ءَ نہ کنت چیاکہ منی زھیر نوں زِر جوڑ بوتگ اَنت ءُ زِر ھِچبر پہ آپ نہ تلوس ایت ۔

اگاں اناگت ءَ من گار ءُ بیگواہ کنگ بوتاں گُڑا پہ منی ھاتر ءَ تو سڑک ءِ سر ءَ مہ نند ءُ زھرشانی مکن چیاکہ اِد ءَ ھِچ بدل نہ بیت تئی وڑیں ھزار مات ءُ گْوھار روڈانی سر ءَ نِشتگ ءُ پہ وتی بْرات ، پِت ، چُک ، ءُ پہ دِشتاراں ودار کنگ ءَ آں بلئے ھِچ مٹ نہ بوتگ نہ کسّے یے پِت نہ بْرات ءُ نئیکہ دِشتار آجو کنگ بوتگ اَنت پمیشکا من گُشاں تو منی ھاتر ءَ سڑک ءِ کُنڈ ءَ مہ نند ءُ ارساں مہ گوار من پہ ترا الّم کایاں اگاں زِند نسیب ءَ بوت گُڑا الم آ ملوریں شپ وتی پتر ءَ پیچ ایت ءُ من یک نوکیں رژنے ءِ باھنداں گوں ترا دُچار کپ آں –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔