TBP Balochi

زھر ءِ پیلہ

شائر : شیردل بلوچ

دی بلوچستان پوسٹ

اے زھر ءِ پیالہ ءَ ھرکس ءَ بزاں گُٹے ورگ لوٹ اِیت
همک بنی آدم ءَ اے زند دو گام دیم ءَ بَرگ لوٹ اِیت

همے راہ ءِ مساپر بس وت ءَ گوں اِنسِراں زاناں
ھمے راہ ءَ گوں مارا اوں تمامان سرگرگ لوٹ اِیت

بلوچ پہ چُنڈکے نان ءَ ازاب ءُ درپہ پرچا۔۔؟
ھُدا مارا اوں سیر لاپ ءَ بزاں چیزے ورگ لوٹ اِیت

دراھیں ایسا ءُ موسا هم جهان ءَ زندگیں پیر اَنت
همک ساهداراں امروز ءِ کہ رَاز اِش پچگرگ لوٹ اِیت

پہ زندگ بوگ ءِ واستا بلوچاں کوهاں پند بُر اِت
بہ سگ اِت تُن ءُ گژن گیشتر تمامان نوں سُرگ لوٹ اِیت

ھما کہ سُوتّ ءِ سوداگر وتی چاگرد ءَ نام دار اَنت
نیزوریں نیزگاران ءَ کرآن ھرّوچ ورگ لوٹ اِیت

نہ مرتاں دِرگت ءَ شیردل وتی بیلانی همراهی
همایاں پہ وتن رپتاں ترا اوں سرگرگ لوٹ اِیت

نبشتانک: کدی کدی شِکاری ھم شِکار بنت

نبشتہ کار: ساجد بلوچ

دی بلوچستان پوسٹ

اے چیز ءَ شُما دْرست سرپد اِت کہ مئے چاگرد ءِ تہ ءَ کُجام کُجام جیڑہ اَنت کہ مرچی مئے بلوچ زالبولاں پہ باز وانگ ءِ واست ءَ مہ کن کنگ ءَ اَنت۔ چہ گواچن ءِ سرپدی ءَ پد، ما انگت ھچ کُت نہ کن ایں چمیشکا مئے دیم ءَ بازیں گوانڈوھانی زندگی برباد بوھگ ءَ اَنت۔ بلے اے جیڑھاں ناں تھنا آیانی واست ءَ یک تاوانے بیت بلکیں کُلیں راج ءِ واست ءَ ھم یک مزنیں بیرانی یے مارگ بیت۔ وھدے کہ ما گِند ایں کہ اے پیمیں رسم ءُ رواج مئے راج ءِ باندات ءِ واست ءَ شر نہ اَنت گڑا باید اِنت کہ اے چیزاں ما ھلاس بہ کن ایں، بلے ھلاس کنوک ئِے کے بیت؟ اے لس مھلوک ءِ کارے وَ نہ اِنت۔ اگاں یک لس مردمے اے رنگیں گپ ءُ تران بہ کنت گڑا بزاں آئی ءِ واست یک مزنیں جیڑھے بیت۔ دومی نیمگ ءَ مئے ٹوھیں مردم، میر ءُ متبر ءُ یاکہ مئے مُلا اے ڈولیں دوداں برجم دارگ لوٹ اَنت پمیشکا مرچی مئے راج ءِ وانگ ءُ زانت باز پُشت ءَ کپتگ۔

اے سرھال چوناھا کسانیں گوانڈوھانی سُور ءِ سر ءَ اِنت۔ اے زوالی گیشتر کوچّگاں سک باز مارا گِندگ ءَ کیت، اے دْرست ھمے مئے مزنیں مردمانی سبب اِنت کہ مرچی 12،13،14 سالی گوانڈو ھم سُور دیگ بوگ ءَ اَنت انچوشکہ بیکن گْوش ایت “سیر انسان ءِ دومی زمہ داری اِنت۔”

آ وَ گْوانڈو اَنت آ وت تنّیگا نہ زان اَنت کہ زندگی چے یے ءُ چے چیز ءِ نام اِنت گڑا آ چے تو اے ڈولیں مزنیں زمہ داری زُر اَنت۔ اے ڈولیں دود ھمیشاں اڈ کُتگ اَنت بلے لھتیں وھد ءَ شِکاری ھم شِکار بنت۔ آ بھ نہ لوٹ اَنت کہ مئے جینوکو کسانی ءَ سیر بہ کن اَنت۔ آ چوناھا بے وس بنت پرچاکہ آیانی سکیں نزیکیں مردم ھبربندی رشتہ) ءِ واست ءَ کا اَنت انچوشکہ آیانی بْرات، ناکو، گْوھار ءُ تُرو سانگ ءِ واست ءَ کا اَنت چمیشکا آ مجبور بنت وتی کسانوکیں جینوکوھاں سیر دے اَنت۔

مئے چاگرد ءِ تہ ءَ شکاری باز اِنت بلے کدی کدی شکاری ھم شکار بنت۔ مئے چاگرد ءِ تہ ءَ ناوانِندگ باز اِنت گڑا اے گپ پدّر بیت کہ مئے چاگرد ءِ تہ ءَ جاھلت ھم باز اِنت چمیشکا ایشانی مستریں مکسد سیر اِنت۔ سیکس بنی آدم ءِ واست ءَ الم اِنت بلے ایشی ءِ بزانت اے نہ اِنت کہ برو کسانوکیں جینوکوھانی زندگی ءَ تباہ ءُ برباد بہ کن۔

چائیلڈ میرج ءِ سے مزنیں تاوان اَنت: یکیں آئی ءِ اِلم زُوال بیت کہ آئی ءِ بنیادی ھک اِنت کہ بِوان ایت، دومی آ نادْراھی ءِ آماچ بیت ءُ سیمی آ دائمی مئے چاگرد ءِ تہ ءَ گلام بیت کہ آئی ءَ گلام بوگی نہ اِنت۔ گُلیں وانوکاں تھنا ما از مردین آدم بلّے وان ایں بلے بے جنین آدم ءَ ما ھچ نہ ایں۔ ما ھر وھد گْوش ایں کہ باید اِنت مئے زالبول بِوان اَنت بلے ما اے ڈولیں جیڑھاں ڈالچار کنگ ءَ ایں۔ اگاں جنین آدم گلام اِنت گڑا ما ھم چہ گلامی ءَ پش نہ کپتگ ایں پرچاکہ یک ماتے ءِ مزنیں کردارے ھست کہ آ وتی چُکاں چے رنگ ءَ بِوانین ایت۔

گڈی ءَ من شُمارا اے گْوشگ لوٹ آں کہ ماں مئے چاگرد ءِ شکاری گیشتر شکار نہ بیگ ءَ اَنت بلے مئے لس مھلوک شکار بیگ ءَ اَنت چمیشکا اے جیڑہ ءَ الم سرپد بہ بئیت۔

مئے مات ءُ پتانی اے زمہ واری بہ بیت کہ آیانی چُکّانی اولی چیز آیانی اِلم اِنت آ دْرست رندی چیز اَنت۔ من وتی اے نبشتانک ءَ گوں جھل ءِ شَیر ءَ ھلاس کنگ لوٹ آں۔

“ناں اِلم ءِ شوک ناں کوم ءِ دوستی ناں سُدے دنیا ءِ
چوشیں بے جوھریں جان دُزیں نوجْوان ءَ سوچ”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ مچھ ءَ گوستگیں شپ ءَ تُرندیں ھوراں یکرندے پد ءَ تباھی کتگ- بی بی نانی ھند سر ءَ سد سال ءَ کوھنیں راجدپتری پُھل آپ ءَ پروشتگ ءُ برتگ ریل روگ ءُ آھگ مھتل بوتگ-

دمگی ھالانی رِد ءَ ھوراں پد توپانی آپ ءَ چہ پُھل پروشتگ وھدے کہ پٹری ءَ ھم اسرمند بوتگ-

وھدے کہ بولان ءِ دمگ یکرندے پد ءَ گیس پائپ لائن ءَ تاوان رس اِتگ چریشی سبب ءَ شال ءَ گیس پُجارینگ یکرندے پد ءَ اسرمند بوتگ ءُ شھر ءِ بازیں دمگاں مروچی گیس گار اِنت-

دومی نیمگ ءَ دمگی انتزامیہ ءُ لیویز کارندھاں بی بی نانی ءِ ھند ءَ سر بوتگ جاورھالاں چارگ ءَ اَنت- آیانی رِد ءَ انگریز وھد ءَ جوڑ بوتگیں پُھل پشی ھورانی دیمپانی کُت نہ کتگ ءُ پُھل ءِ یک مزنیں بھرے آپ سبب ءَ کپتگ چریشی سبب ءَ مچھ ءُ کولپور ءِ میانی ریل لائن ھم اسرمند بوتگ اَنت-

زانگ بہ بیت اشی ءَ ساری سبی ءُ بختیار آباد ھند سر ءَ ریل لائن آپ تہ ءَ بُکگ ءَ یک ھپتگے ءَ تاں ریل شال سندھ پنجاب ءُ خیبر پشتونخوا ءَ چہ مھتل بوتگ-

سمی دم درینگانے

نبشتہ کار: زبیر بلوچ

پنچمی بھر

دی بلوچستان پوسٹ

بی ایس او راج دوست ءُ قوم دوستاں وتی ٹولی یے لوٹانی ھاتر ءَ بھر ءُ بانگ کت بی ایس او کہ نوں سَے اِت اَنت اِشانی پْروشگ ءَ بلوچ قوم پرست لیڈر شپ ءَ پارٹیانی دست پمیشکا مان اَت کہ وھدے پارٹی وتی ٹکی ءُ زاتی نپ ءُ سیتانی واستا پْروشت اَنت گڑا ابید چہ اِشاں وتی زد ءُ کینگاں ورنا چہ دور دارگے بلکیں ایشان زانشتی بنیاد ءَ بی ایس او ءِ توک ءَ لائبینگ ءُ ٹولی پہ ٹولی کتگ۔ ایشان بائید انت بی ایس او ءِ آزادیں دروشمے ءَ برجم دارگ ءِ پلہ مرزی کتیں تاکہ باندا ھمے ورنا ھمے پارٹیانی سر ءَ یک چیک اینڈ بیلنسے بوتین اَنت-

بلوچ بزگیں ءُ باز دلچسپیں راجے ھر وھد ءَ وتی اَنا ءُ زِدّ ءِ واستا وتی جند ءَ تاوان بار کنت۔ کدی پہ انا ءُ زِدّ ءَ پہ ودی ءُ شریں مکسد ءَ کارمرد نہ کنت، پمیشکا ھر وھدا وت مہ وت ءَ گر ءُ چیل بوتگ گڑا دست ئِے بی ایس او ءِ گُٹ ءَ داتگ بلے 1987ءَ بی ایس او سرپیس ءِ پارٹیانی گر ءُ چیل ءَ چے گیش چیریں گل بی ایل ایم ءِ توکی اڑ ءُ جنجالانی سبب ءَ پروش ایت۔ چیریں گلاں ھوں وتی دست بی ایس او ءَ مان کت۔ اِد ءَ ھوں بلوچ لیڈر شپ وتی زھراں ورنایانی سر ءَ کش اَنت بی ایل ایم ءِ سروک رازق افغانستان ءَ دراں ڈیھ بیت۔ آ زمانگ ءَ دنیا بائی پولر ورلڈے بیت یک بلاکے مارکسی ءُ لیننی زانشت ءُ پکر ءِ دنیا بیت یکے بے ھدائیں سرمایہ دار ءُ سامراج بیت ۔ ھئیر اِد ءَ پولٹ بیورو وتی نیاد ءَ کنت۔ چیریں گل ءِ بنجاھی پتر چوں سویت یونین ءِ گلی دروشم ءَ پولٹ بیورو ات ۔ رازق بگٹی ءَ نجیب اللہ ءِ ھکم ءِ سر ءَ ھمے پیگام راہ دات۔ رازق اے وھداں افغانستان ءَ دران ڈیھی ءُ وتی ڈیتھ ورنٹانی سبب ءَ دیوان ءَ ساڑی بوت نہ کنت بلے اے وھد ءَ دگہ بازیں سنگتانی ڈیتھ وارنٹ زیا الحق ءَ کش اتگ ات اَنت ۔ رازاق بگٹی ءُ نجیب ءِ پیسلہ بیت کہ بی ایل ایم افغان ڈالر وار ءِ بیر ءَ چہ پاکستان ءَ بہ گیپت۔ رازق گل ءِ پولٹ بیورو ءَ ھمے ھبر ءِ کلوہ ءَ دیم دنت کہ پاکستان ءِ توک ءَ سلاہ بندیں جھد بنا کنگ بہ بیت افغانستان اے وھد ءَ امریکی سامراج ءُ آئی ءِ مدامیں دلال ءُ کاسگ چٹ سعودی عرب ءُ پاکستان ءِ وت گڑیں ڈالر جھاد ءِ اماچ بیت۔ امریکی ڈالرانی ھیش ءَ افغانستان ءَ یک وت گڑیں جھادے بنا کنگ بیت ۔ اسامہ بن لادن پیدا کنگ بیت ءُ دگہ بازیں جھادی کردار ھمے ڈالر جھاد ءِ پیداور بنت ۔ افغانستان ءِ مھتریں سروک کامریڈ نجیب چو کہ بلوچ پشتون لیڈرشپ ءِ زانشتی درگت ءَ دردوار بیت پمیشکا رازاق ءَ ءُ اجمل خٹک ءَ زمہ داری دے اَنت کہ پاکستان سی آئی اے ءُ سعودی عرب ءِ کمک ءَ چہ افغانستان ءَ دزمانجن کنگ ءَ انت۔ نوں بلوچ ءُ پشتون پاکستان ءِ توک ءَ نپرت ءِ ودی کنگ ءِ واستا سلاہ بندیں جنگ بندات بہ کن اَنت پشتون لیڈر شپ ءُ رازق ھمے گپ ءَ تپاک دار اَنت بلے بی ایل ایم ءِ لیڈر شپ اے گپاں چے کنونس نہ بیت۔ گڑا پولٹ بیورو ءِ سربراھی ءَ رازق بگٹی کشگ بیت۔ گڑا ھمدا چے رازق لابئینگ کنت اے جیڑہ ءَ زور ایت بی ایس او ءِ توک ءَ بارت ءُ وتی لابئینگ ءَ کنگ ءَ سوب مند بیت۔ گڑا بی ایس او 1987ءَ پروش ایت۔ بی ایل ایم ءِ ھما وھدے لیڈر شپ اسلم جان گچکی، اسلم کرد، ایوب جتک، ڈاکٹر مالک، فدا شہید، مولا بخش دشتی، حبیب جالب، رازق بگٹی ءُ ھما وھدے دگہ لھتیں کلانیں سنگتاں ھوار بیت۔

روان انت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ مستونگ ءَ گوستگیں شپ ءَ پاکستانی پوج فرنٹیئر کور ءُ سی ٹی ڈی ءَ یک لوگے ءِ سر ءَ بیڑ برگ ءِ وھد ءَ پروفیسر ءُ ایڈوکیٹ ءَ ھوار ھشت مردم آوار جتگ ءُ برتگ اَنت کہ اشانی تہ ءَ زو زدگیں مردم ھوار اَنت-

وئیل ءِ ھلاپ ءَ دمگی مردماِ مستونگ ءِ مزن شھدگ بند کتگ ءُ زھرشانی کنگ ءَ اَنت ءُ چاگردی رسانکجاھاں وئیل ءِ ایرجنی بیگ ءَ اِنت-

زورانسری آوار جنی ءِ ادیب ءُ پروفیسر صالح مھمد شاد ءِ جنک بی بی سلمیٰ ءَ پریس کانفرنس کنان ءَ وئیل ءِ بارو ءَ گوشتگ کہ ءُ اے وھد ءَ ڈسٹرک- بار ایسوسی ایشن ءِ کلانیں کسان سروج چیف عطاء اللہ بلوچ ایڈوکیٹ ءِ مات ءُ دگہ مردم جاڑیگ بیتگ اَنت-

آئی ءَ گیش گوشان ءَ گوشتگ کہ چار شمبے ءُ پشمبے ءِ میانی شپ ءَ مئے لوگ کلی شادی خان پڑنگ آباد ءَ سیکورٹی پورسز بازیں کچے ءَ اتکگ ءُ لوگ اش انگیر کرتگ ءُ بازیں اداراں دمگ انگیر ءَ بیتگ ءُ مئے لوگ ءِ سر ءَ ترندی ءَ تیرگواری ءُ گولہ باری کنگ ءَ پد مئے کھول ءِ ھشت مردم کہ اشانی تہ ءَ پروفیسر صالح مھمد شاد، چیف عطاء اللہ بلوچ ایڈوکیٹ ءُ آئی ءِ پیریں پت مھمد گک شاھوانی، برات نجیب اللہ ایڈوکیٹ،سیف اللہ، مجیب الرحمان، براھمدگ، صلاح الدین ءُ سلمان ھوار اَنت اشانی تہ ءَ صلاح الدین ءُ سلمان ٹپیگیں جاوراں برگ بیتگ اَنت-

آئی ءَ گوشتگ کہ بیڑی ءِ وھد ءَ پوج ءَ مئے لوگ ءِ سر ءَ ترندی ءَ تیرگواری ءُ گولہ باری کتگ چریشی ءَ مئے لوگ ڈرو اتگ مئے کھول ءِ ھما مردم کہ ٹپیگ بیتگ اَنت مارا ھال سر بیتگ کہ صلاح الدین ءُ سلمان شھید کنگ بیتگ اَنت دزگیری ءَ پد پروفیسر صالح مھمد شاد ٹپیگیں جاوراں گوں برگ بیتگ –

آئی ءَ گوشتگ کہ اے اُرش رستری یے ریاستی ناشرکاری ءِ رستری یے دزگیر کتگیں مئے مردمانی سر ءَ جرمے ھست گڑا آیاں پر ایمنیں رنگے ءَ دزگیر کنگ ءُ آمیدگس ءَ پیش اش بہ کنت-

کھولاِ چیف جسٹس آف پاکستان، چیف جسٹس بلوچستان ءَ گوں دزبندی کتگ کہ پوج ءِ اے گیر کانونی کاروائی ءِ پژدر ءَ وت گامگیج بہ زور ایت مئے کھول ءِ دراھیں مردماں سلامتی ءَ یلو بہ کنت-

ھمے وڑ ءَ ڈسٹرکٹ بار ایسوسی ایشن مستونگ ءِ سروک عبدالحمید بنگلزئی ایڈوکیٹ، جنرل سیکرٹری ممتاز علیزئی ایڈوکیٹ، مھمد بلال ایڈوکیٹ، مھمد فاضل ایڈوکیٹ، سردار فتح مھمد شاھوانی ایڈوکیٹ، فھد روف ایڈوکیٹ، شاہ فھد ایڈوکیٹ، ایاز مھمد ایڈوکیٹ ءأ دگہ وکیلاں سراوان پریس کلب ءَ اژدری پریس کانفرنس ءَ گوشتگ کہ گوستگیں شپ ءَ پڑنگ آباد ءِ دمگ کلی شادی خان رودینی ءَ سیکورٹی پورسز ءِ کارندھاں مئے ڈسٹرکٹ بار ایسوسی ایشن مستونگ کسان کمک سروک عطاء اللہ ایڈوکیٹ ءِ لوگ ءِ سر ءَ ناگتی بیڑ برتگ ءُ تیرگواری بندات کتگ ءُ چریشی ءِ آسر ءَ آئی ءِ کھول ءِ بازیں مردم زدگ اش کتگ اَنت چریشی ءَ پد مئے کسان کمک سروک عطاء اللہ بلوچ ایڈوکیٹ ڈسٹرکٹ بار ءِ باسک نجیب اللہ ایڈوکیٹ آئی ءِ پیریں پس گل مھمد، ناکو پروفیسر صالح مھمد شاف ءَ ھوار کھول ءِ دگہ مردم زورانسری ٹپی یے جاوراں برتگ انت کہ اشی ءَ ما ایر جن ایں-

آئی ءَ گوشتگ کہ ما ڈسٹرکٹ بار ایسوسی ایشن مروچی سرجمیں ًآمیدگسی کاراں دزکش اِنت ءُ دیم ءِ گامگیجی ءَ بلوچستان بار کونسل ءُ ھائی کورٹ ایسوسی ایشن ءِ رھشوناں گوں گپ کنگ ءَ پد گوشگ بیت اِنت-

وئیل ءِ درگت ءَ دمگداراں تنی وھدی ھچ گپ پیش نہ کتگ اَنت گوستگیں شپ ءَ ھمے وڑیں یک وئیلے ءَ شال ءَ ھم سی ٹی ڈی ءَ یک مردمے کُشتگ ءُ دو کس بیگواہ کتگ اَنت اشی ءِ پژدر ءَ زھرشانی کنگ بیتگ-

اشی ءَ پیش مستونگ ءُ ھاران ءَ ھم ھمے وڑی ءُ دو وئیل رپورٹ بیتگ اَنت چریشی ءَ شش مردم بیگواہ کنگ بیتگ اَنت اشانی تہ ءَ دو کس زدگ بیتگ اَنت پد ءَ بیران بیتگ اَنت-

مروچی چارشمبے ءَ کولواہ ءِ دمگ جت ءَ ناشناسیں سلاہ بندیں مردماں سرکاری پلامرزی کنوکیں ٹولی ءِ باسکانی سر ءَ اُرش کتگ، وھدے کہ اُرش پد زوت وئیل جاہ ءَ پیادگ پوجی کارندھاں اَبید بالگرد ھم گندگ بوتگ اَنت –

اِھوالکارانی رِد ءَ کولواہ ءِ جتائیں دمگاں گوستگیں چیزے روچاں چہ سرکاری پلامرزی کنوکیں ٹولی ھشت گاڑیاں ھوار ھمکروچ گشت کنگ ءَ گندگ بوتگ اَنت کہ آ مروچی سلاہ بنداں نشانگ کتگ اَنت-

اُرش کولواہ ءِ دمگ جت ءَ ھما وھد اے ٹولی ءِ سر ءَ کنگ بوتگ وھدے آ پیادگ ءَ گشت کنگ ءَ بوتگ اَنت وھدے اشانی کمک ءَ آؤکیں پوجی کاروان ءُ آیانی دگہ ھمراہ سلاہ بنداں نشانگ کتگ اَنت-

ھالانی رِد ءَ اے ٹولی ءِ مردم مرتگ ءُ ٹپی بوتگ اَنت بلے انگت رسانکدری نیمگ ءَ چہ اے گپ پدر کنگ نہ بوتگ-

زانگ بہ بیت بلوچستان ءَ پاکستانی پوج ءُ چیریں ادارھانی سر ءَ راجدوستیں پارٹی اے بھتام جنگ ءُ آھگ ءَ اَنت آیاں سلاہ بندیں ٹولی جوڑ کتگ ءُ آ کُشندہ ٹولی ءِ نام سر ءَ زانگ بیت-

راجدوست پارٹیانی رِد ءَ سلاہ بندیں ٹولی پوج ءَ سرجمی ءَ بے لگام کتگ اَنت، آ مردماں چست کنگ ءُ کُشگ ءِ ھمراھی ءَ دگہ چاگردی سلکیاں تچکی ءَ ھوار اَنت-

گوستانکاں کُشندہ ٹولیانی سر ءَ بلوچ آجوئی لوٹوکیں سلاہ بندیں گلانی نیمگ ءَ باز بر ءَ نشانگ کنگ بوتگ اَنت بلے اے اُرش زمہ واری انگت ھچ گل ءَ نہ زرتگ-

وتی لوٹانی ھک ءَ تاں مرگ شُدکشیں زھرشانی ءَ نشتگیں سرکاری ماسٹرانی زھرشانی ءَ مروچی بیست ءُ دو روچ سرجم بوتگ انت –

گورنمنٹ ٹیچر ایسوسی ایشن (آئینی) بلوچستان ءِ تاں مرگ شُدکشیں زھرشانی ءَ نشتگیں ماسٹرانی جاور نگیگ بوان انت وھدیکہ زھرشانی ءَ نشتگیں بازیں درنگاز کنوکے نادراھجاہ ءَ برگ بوتگ انت –

ماسٹراں مروچی بیست ءُ دو روچ سرجم انت کہ شال پریس کلب ءِ دیم ءَ وتی لوٹانی ھک ءَ زھرشانی بنجل جتگ ءُ نشتگ انت، مروچی درنگاز کنوکاں اقبال شھدگ ءَ بگر تاں شال پریس کلب ءَ روانک ءِ کش اِتگ ءُ زھرشانی کُتگ –

شُدکشیں زھرشانی ءَ نشتگیں ماسٹرانی گوشگ انت کہ وتی لوٹانی ھک ءَ ماسٹراں وتی سر ءَ کپن بستگ ءُ اتکگ انت نوں ھالیگیں دستاں وتی گِساں واتر نہ بنت، سرکاری ٹولی گند ءُ نند ءِ نام ءَ رد دیگ ءَ کائینت اگاں مئے لوٹ سنجیدگی ءَ گوں منّگ نہ بوتاں گڈا ماسٹر وتی تاں مرگ شدکشیں زھرشانی ءَ برجاہ دار انت –

شال پریس کلب ءِ دیم ءِ زھرشانی ءَ تران کنان ءَ ماسٹرانی گوشگ ات کہ سرکاری ماسٹر اے جیڑھے سر ءَ یکجاہ انت اگاں مئے لوٹ منّگ نہ بوتاں وتی زھرشانی تہ ءَ گیشی کار ایں –

درنگاز کنوکانی گوشگ ات کہ زھرشانی ءَ نشتگیں بازیں سنگتانی جاور نگیگ بوان انت مئے بازیں سنگت ءِ نادراھجاہ انت زھرشانی مئے بنکی ھک انت اگاں مئے لوٹ منّگ نہ بوتاں ءُ اے زھرشانی ءِ میان ءَ ھر وڈیں وئیلے بہ بیت گڈا اشی ءِ زمہ دار بلوچستان ءِ سرکار ءُ واکدار انت-

ماسٹراں بلوچستان ءِ سرکار ءُ سیکٹری تالیم ءَ گوں لوٹ کتگ کہ ماسٹرانی لوٹ زوت منگ بہ بنت ءُ آھاں انساپ دیگ بہ بیت –

بلوچستان ءِ بنجاھی شھر شال ءَ گورنر کارگس دیم ءَ زورانسری آوار جنگ بوتگیں بلوچ راجکاریں باسکانی کھولانی زھرشانی ءَ مروچی سِی ءُ پنچ روچ سرجم بوتگ انت –

مروچی چار شمبے ءِ روچ ءَ نیشنل پاٹی ءِ سوبائی سنیٹر کمک سرکماش ءُ سینیٹر نوابزادہ ارباب عمر فاروق کاسی گوں وتی ٹولی ءَ بیگواھیں بلوچانی کھولانی نندانک اتکگ آھانی ھمراھی ءَ آغا زبیر شاہ ءُ دگہ مردم ھم ھوار بوتگ انت –

کھولانی گوم ءَ تران کنان ءَ آئی ءَ گوشتگ کہ ھستیں وھدے سرکار ھئور ءُ توپان ءَ دلسیاہ کتگ بلے آھاں ھار آماچیں مردمانی ھاتر ءَ ھم ھچ نکوتگ ھمے وڈ ادا ھئور ءِ سر ءَ نشتگیں بیگواھیں بلوچانی کھول نندانک ءَ نشتگ انت ءُ اے سرکار ءَ اشانی ھم ھچ پگر پرنیست اِنت کہ آ وڈ کنگ لوٹیت –

نوابزادہ کاسی ءَ دیمتر ءَ گوشتگ کہ من درسانی گپ گوشداشتگ انت کہ اشانی تہ ءَ ھچ ردی مانیست کہ کانود ءُ رھبندانی بگیر ءَ بہ بنت – اے درسانی لوٹ کانود ءُ رھبندانی رِد ءَ انت ءُ سرکار ءِ واک انت بلے اشی ءَ ابید من نزاناں کجام لاچاری انت کہ واکداراں گپ جنگ ءَ دارگ ءَ اِنت-

آئی ءِ گوشگ ات کہ بلوچستان ءِ سر وزیر، پوجی ادارہ ءُ آئی ایس آئی والھاں ھم لوٹیت کہ بیا انت گپ بہ جن انت ءُ جیڑہ گیش گیوار بہ کن انت –

آئی ءَ گوشتگ کہ من سنیٹر اے رندی رواں مزن وزیر شھباز شریف، وزیر خارجہ بلاول بھٹو زرداری، وزیر داخلہ رانا سناء اللہ ءَ گوں گپ جناں ءُ بیگواھیں مردمانی کھولانی ھاتر ءَ راہ ءِ در گیج ایں –

آئی دلگوش کھولاں کتگ ءُ گوشتگ کہ مئے پاٹی، عوامی نیشنل پاٹی بیگواھیں مردمانی کھولانی ھم کوپگ انت ءُ اے جیڑھے گیشگیواری ءِ ھاتر ءَ ھر وڈیِ جھد کن ایں –