TBP Balochi

شال: بلوچ نیشنل موومنٹ (بی این ایم) ءِ جارکش ءَ وتی درشان ءَ گْوشتگ مستونگ ءَ پاکستانی لشکر ءَ ارش کرتگ ءُ یکیں کھول ءِ 8 کس پہ زور بیگواہ کرتگ چہ ایشاں دو جاہ پہ جاہ شھید کنگ ءُ آیانی کنٹ بیگواہ کنگ بیتگ اَنت۔ مستونگ ءَ شھرمنندانی لوگ ءِ سر ءَ پاکستانی لشکر ءِ اُرش ریاستی زوراکی ءِ دْرچ اِنت۔ ھمے ماہ ءَ اے سیمی رند اِنت کہ پاکستانی لشکر ءَ دست ءُ گوشیں شھرمنندانی سر ءَ ارش کرتگ ، مردم کشتگ ءُ پہ زور بیگواہ کرتگ اَنت۔

آئی ءَ گْوشتگ چہ اے کاراں بلوچستان ءَ مردمی اگبالانی ناگیگیں جاورانی درانگازی بیت۔ بی این ایم ایشی ءَ گوں تْرندیں دانکاں ایرجنت ءُ گوں مردمی اگبالانی پانکجناں دزبندی کنت کہ آ ایشی ءَ پاکستان ءِ تھی جیڑہ ءِ رنگ ءَ مہ چار اَنت یا ڈالچار مہ کن اَنت بلکیں ایشی ءَ مردمی جیڑھے ءِ وڑ ءَ بہ چار اَنت ءُ زیت دزمانجنی بہ کن اَنت۔

آئی ءَ گْوشتگ کلی شادی ھان پڑنگ آباد مستونگ ءَ واندہ ءُ چاگرد ءِ پرمنگھیں کھولے ءِ سر ءَ چار شمبے ءُ پنچ شمبے ءِ میانی شپ ءَ پاکستانی لشکر ءَ گوں مزنیں سلاھاں ارش کرتگ۔ آیانی لوگ ءِ سر ءَ گوں وتکاریں سلاھاں ارش کنگ بیتگ ءُ مارٹر جنگ بیتگ۔

’اے ارش ءَ مستونگ کالج ءِ پیسرگیں پرنسپل ءُ نامی ئیں نبشتہ کار پروپیسر سالھ مھمد شاد، نامی ئیں سیاسی مردم چیپ اتاء اللہ بلوچ ایڈوکیٹ ، آئی ءِ پت مھمد گل شاھوانی، آئی ءِ برات نجیب اللہ شاھوانی، سیپ اللہ شاھوانی، مجیب الرھمان شاھوانی ، براھمدگ شاھوانی ، سلاہ ادین شاھوانی ءُ سلمان شاھوانی آزار دیگ ءُ پہ زور بیگواہ کنگ بیتگ اَنت۔‘

آئی ءَ گْوشتگ ھمے ماہ ءَ 2 اگست ءَ ھاران ءِ جنگل دگ ءَ ھاجی سناء اللہ شاھوانی ءِ لوگ ءِ سر ءَ ھم پاکستانی لشکر ءُ گوں آئی ءَ ھمگرنچیں ادارھاں ارش کرتگ ءُ دست ءُ گوشیں مردمانی سرءَ وتکار ءُ مزنیں سلاہ کارمرد کرتگ۔ آئی ءِ دو چک آمرشاھوانی ءُ امران شاھوانی آزار داتگ ءُ شھید کرتگ اَنت وھدے کہ آئی ءِ دگہ چکے ارپان شاھوانی پہ زور بیگواہ کرتگ۔

جارکش ءَ گْوشتگ پاکستانی لشکر ماں بلوچستان ءَ وت ءَ چہ ھمک جست ءُ پرس ءَ آجو سرپد بیان مردمانی بگیری ءَ ناراھیں رنگے ءَ زور کارمرد کنگ ءُ مردمانی کشگ ءَ ھچ چک ءُ پد نہ بیگ ءَ اِنت۔ 14 اگست ھوست ھرنائی ءَ ایپ سی ءِ کارپدانی بگیری ءَ مردماں زھرشانی کرتگ چہ ایشی ءَ ایپ سی ءَ مردمانی سر ءَ تچکے ءَ تیرگواری کرتگ۔ چہ ایپ سی ءِ تیرگواری ءَ ھالکداد بابڑ جاہ پہ جاہ شھید بیتگ وھدے کہ دو چکانی پجیگ ءَ دگہ مردم ٹپی بیتگ اَنت۔

جارکش ءِ رد ءَ سلاہ ادین شاھوانی ءُ سلمان شاھوانی پاکستانی لشکر ءِ ارش ءَ ٹپی بیگ ءَ پد شھید بیتگ اَنت آیانی کنٹ باز دیر ءَ پد چہ شھرمنندانی زھرشانی ءَ ھندی سروکیں مردمانی دست ءَ بیتگ اَنت۔ھمے میان ءَ پروپیسر سالھ مھمد شاد ءُ پیرمردیں مھمد گل شاھوانی سکا ٹپ ءُ ٹوریں جاوراں شال ءِ ٹراما سینٹر ءَ برگ بیتگ اَنت۔ ھر دو سک ٹپی اَنت بلے انگت سی ٹی ڈی ءِ دست ءَ اَنت ءُ آیانی دستاں دزبند جتگ۔سانمندیں کھول ءِ دگہ چار کس دنیگت پہ زور بیگواہ اِنت۔

آئی ءَ گْوشتگ شال ءَ پہ زور بیگواھیں مردمانی کوش ءُ ھرنائی ءَ تچکے ءَ نشانگ کنگ ءُ دست ءُ گوشیں مردمانی سر ءَ تیرگْواری کنگ ءُ کشگ ءِ بگیری ءَ مردم زھرشانی کنگ ءَ اَنت۔نام ءِ واکدار اے زھرشانی کنوکیں مردمانی دروگیں دلبڈی دیگ ءَ اَنت بلے لشکر ءَ راہ ءُ راھبندانی پابند کنگ ءَ بے سوب اَنت۔پاکستانی لشکر انگار چہ ایشی ءَ پہ زوریں بیگواھیاں کم بہ کنت نی شھرمنندانی لوگانی سر ءَ ارش ءَ بنا بیتگ۔

’24 اگست ءَ چہ پشتون آباد شال ءَ انایت اللہ گبیرزھی سی ٹی ڈی ءِ کارمنداں دگہ دو مردمانی پجیگ ءَ دزگیر کرتگ ءُ ھمے روچ ءِ بیگاہ ءَ انایت اللہ کشتگ ءُ آئی ءِ کنٹ آئیءِ کھول ءِ مردمانی دست ءَ داتگ۔‘

جارکش ءَ گْوشتگ ڈنڈار ءِ ھند نگور ءَ پاکستانی لشکر ءِ بنجل ءِ نزیک ءَ پاکستانی لشکر ءِ چیردستیں مردم کشیں رمب ءِ چریکاں گاڑی یے نشانگ کرتگ ایشی ءِ تہ ءِ لاپ پریں جنینے ھم سوار بیتگ کہ آئی ءَ ڈنڈار ءَ پہ الاج ءَ برگ ءَ بیتگ اَنت۔ پاکستانی لشکر ءِ مردم کشیں رمب ءَ کوروکائی تیرگواری کرتگ چہ ایشی ءَ لاپ پریں جنین گوں وتی لاپ ءِ چک ءَ ھما دمان ءَ شھید بیتگ وھدے کہ دگہ چکے ءُ دگہ دو مردم سک ٹپی بیتگ اَنت۔

آئی ءَ گْوشتگ تیوک ءَ ھمے ماہ ءَ ھپت کس پاکستانی لشکر ءُ آئی ءِ چیردستیں تواناں تچکے ءَ تیرگواری کرتگ ءُ کشتگ وھدے کہ دھاں مردم پہ زوربیگواہ کرتگ ءُ چہ ایشاں باز ءِ سر ءَ دورگیں کیس ھم جنگ بیتگ۔

جارکش ءَ گْوشتگ یک نیمگے بلوچستان ھار ءِ آماچ اِنت۔نیم ءَ گیش بلوچستان سرجم ءَ تباہ بیتگ ءُ دومی نیمگ ءَ پاکستانی لشکر زوراکی کنگ ءُ مردماں کشگ ءَ اِنت۔ پاکستانی لشکر ءَ چہ وتی زوراکیاں بلوچستان کوش جاھے جوڑ کرتگ ءُ اد ءَ پاکستانی لشکر ھم روچ مردماں کشگ ءُ چگل دیگ ءَ اِنت۔

نبشتانک: نور هانل زاناں کے اِنت ؟

نبشتہ کار : سُپانک بلوچ

دی بلوچستان پوسٹ

“سِنگانی سرا منی ءُ تئی نام اَنت نِبشتہ”
“تو ھانل ءُ من نور ھمے بس,دگہ چِے؟”

من دائمی جیڑ اِتگ کہ نور ءُ هانل ءِ چے سیادی ءُ مهر اِنت هانل کے اِنت، بوت کنت کہ هانل شررنگ ءُ زیبائیں جنکے کہ نور هانل ءِ اشک ءَ دائمی شیدا اِنت، ؟ یکروچے ما اوتاک ءَ نشتگ اِت اَنت ءُ گوں سنگتاں مسکراه توازه ءَ دلگْوش اِت آں کہ شهیک ءَ را نور ءَ رهوت کتگ اَت کہ ما پیداک ایں شهیک چہ هسار ءَ ایر اتکگ ات ءُ دیم پہ اوتاک ءَ اهت یاگی یے چاهی کتلی پِر اَت ، شیھک تچان اتک کہ تیاری بکن اِت لهتیں سنگت پیداک اِنت میجر پیرک وپتگ اَت سِهر اِت کے اِنت ، نپس؟ ما دروه هیران بوت اَنت شیھک ءَ پسہ دات کہ سنگت استال اِنت میجرا سنگت شیوار کت انت کہ زوت کن اِت جاگہ ءَ شر کن اِت پِیش ءُ کنڈهاں بر اِت دور دَے اَت تگرد ءَ پچ کن اِت ، لهتے ریک سِک ءَ چہ بیار اِت کہ اِستالے وڑیں هستی ءِ پیداک اِنت-

من استال ءِ نام نہ اش کتگ ات شیهک ءَ چادر زُرت کہ کمو سِک کاراں من همراهے بوت آں ، من شیهک جست کت اڑے شیهو اے استال زاناں کے اِنت ؟ میجرا چو سهر اِتگ ؟ شیهو ءَ پسہ دات کہ تو پجا و کارے ئِے نور سلام نور اِنت من چٹ بے توار بوت آں همے شائر کہ مدام هانل ءِ اشک ءَ گْورجتہ ؟ شیهو ءَ کند ءُ پسہ دات هو تئی دلدوستیں هانل ءِ مرید نور ، گڑا تلانگ جان مرچی واهگے سرجم بیت نور ءَ الم جست گراں کہ هانل کے اِنت ، شیهو ءَ پسہ دات هو سکیں شریں کمانڈرے ءُ مردم دوستیں سنگتے ، من کند کہ منی رهوت هست ئِے پیسبک ءَ چہ من رهوت کتہ بلے من نزاتگ راجی بامردے دومی ، نام ءِ استال اِنت من ءَ زانت منی اکسے ءِ اوں بیت گورا ئِے کہ پیسبک ءُ وٹسپ ءَ ما یکوی یکے دومی ءَ رهوت کتہ سکیں شریں شائرے من مدام وانگ ءَ انت ئِے-

دانکہ ما جاگہ ترتیب کت اَنت ءُ وتا گیگ کت روچ جهل تر اتگ اَت نور گوں سنگتاں اتک دروت ءُ دراهی بوت اَنت میجرا گوں نور ءَ نشتگ اَت نور ءَ اے روچاں ریش هتے جتگ اِت آں سک ڈولدار اَت ، ما سنگتاں ورگ جوڑ کت نان پتک شپ اوں نوں جنزان اَت سنگتاں سک ءَ تگرد پچ کت گوات کپت ات نان ءُ ورگ ما آورت اَنت ، سنگتاں ورگ وارت ءُ دیوان پدا بندات بوت ، من اتک آں نورے گور ءَ نور ءَ را گوشت تو من ءَ پجا آورت نور ءَ کند اِت کہ هو شُپانک جان ترا من پجا آؤرتگ مگرب ءَ ساری میجرا تئی نام گپتگ پدا من تئی ترانگ کتپ آں شما گوں ورگ ءَ دلگوش اِت ات پمیشکا من گپ ءُ رپ نہ بوت ، نوں ما یکے دومی ءِ ساه ءُ نپس جوڑ اِتیں ءُ شیهک ءَ کندگے جت کہ نور شپانک ءَ مدتے بیت گوں تو جستے هست ئِے نور ءَ بچکند ات کہ چونیں جستے دراهیں سنگت دلگوش اِت آں گپ چو اشک ءُ آشکی ءُ شیر ءُ شائری ئیگ اَت ،من کند اِت کہ جستے و هست بلے من اجب هیراں گوں اے جست ءَ عنور تئی من همک شیر ونتگ تئی شیرانی تہ ءَ مهنل ءَ گیش من هانل ءِ مهر دیستگ اَنت ، نزاناں اے هانل ءِ چونیں اشکے تو هانل ءِ اشک ءَ مرید ئِے؟ نور ءَ کندگ ئِے جت ءُ دراهینت کہ شُپانک تئی سکیں وشیں جست ئِے-

هانل ، هانل هانل ، منی مهر اِنت من پہ هانل ءَ سک شیدا آں ، من پہ هانل ءِ بانوری ءَ اے جلگهیں بار وتی کوپگاں زرتگ ، بلے هانل ، زان ئے کے انت؟ من گشت زاناں هانل کے اِنت؟ نور ءَ پسہ دات کہ هانل اِنت مسکیں زمین-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ بولان ءِ ھند چہ مچھ ءَ ورنائیں کاریزکار زورانسری بیگواہ کنگ بیتگ۔

ٹی بی پی ءِ اھوال ءِ رد ءَ مچھ ءِ جھمنندیں ورناہ وھاب کرد ء مولا بخش سَے شمبے ءِ روچ ءَ پاکستانی لشکری فرنٹیئر کور ءِ کارمنداں مچھ ریلوے اسٹیشن ءِ ھند ءَ دزگیر کُتگ ءُ ناشناسیں ھنداں بُرتگ کہ آئی ءِ درگت ءَ ھچ پئیمیں اھوال سر نہ بیتگ۔

ھندی مردماں ٹی بی پی ءَ گُشتگ کہ بیگواھیں ورناہ اِشکر ءِ کاریز ءَ مزوریے بیتگ وھدیکہ ھما وھد ءَ آ دزگیر کنگ بیتگ ھندی مردماں فرنٹیئر کور ءِ گاڑیاں سواریں کارمند ھنکین ءِ انگیر کنگ ءَ دیستگ اَنت۔

دمگی واکداراں داں انگت اے وئیل ءِ درگت ءَ ھچ پئیمیں درشان ءِ شنگ نہ کُتگ۔

اے وئیل ھما وھد ءَ دیما اتکگ کہ گوستگیں روچاں مستونگ ءَ سی ٹی ڈی ءُ دگہ لشکریاں یک لوگے ءِ سر ءَ بیڑ بُرتگ ءُ اود ءَ شپ ءَ تیر گواری ءُ تراکانی توار ھم اِش کنگ بیتگ۔ لشکریاں پروفیسر ءُ ایڈوکیٹ ءَ ھوار ھپت مردم گوں وت بُرتگ اَنت کہ اِشانی تہ ءَ ٹپی ایں جاوراں برگ بیتگیں مردم ھم ھوار اَنت وھدیکہ دو مردم وئیل جاہ ءَ ھم بیران بیتگ اَنت۔

وئیل ءَ پد چاگردی ءُ سیاسی تکانی نیمگ ءَ اے وئیل ایر جنگ بیتگ۔ ھندی مردمانی نیمگ ءَ مروچی دومی روچ ءَ ھم وئیل ءِ بگیر ءَ زھرشانی کنان ءَ بنجاھی شھدگ بند کنگ بیتگ۔

بلوچستان ءِ کیچ دمگ ءِ زامران ھنکین ءَ سلاہ بندیں مردم گرد ءُ رنداں چہ ھندی مھلوک ءَ را تُرس ءُ بے باوری ودی بیتگ۔

اھوالانی رد ءَ گوستگیں بازیں روچاں چہ درژنانی کساس ءَ سلاہ بندیں مردماں دریچکی ءِ ڈیکان ءِ ھنداں بنجل جتگ ءُ نشتگ اَنت۔ ھندی اھوالانی رد ءَ سلاہ بندیں مردمانی گرد ءُ رند ءُ ھند ءَ جُنزگ ءِ سوب ءَ مھلوک باز جنجالی اِنت۔

ھندی اھوالاں دی بلوچستان پوسٹ نیوز ڈیسک ءَ گُشتگ کہ سلاہ بندیں مردم ھشت ءُ نھ گاڑیانی سر ءَ اَنت ءُ ایف سی بنجل ءِ گور ءَ وتی بنجل اش جتگ ءُ نشتگ اَنت۔

مھلوک ءِ رد ءَ سلاہ بندانی سیادی گوں سرکاری چیردستی ءَ کارکنوکیں بجار شمبے زئی ءُ ملا سیفو ءِ ٹولی ءَ گون اِنت۔ آھانی رد ءَ بجار شمبے زئی ءُ ملا سیفو وتی سلاہ بندیں مردمانی ھمراھی ءَ گرد اَنت ءُ جھمننداں جنجال کنگ ءَ اَنت۔

مھلوک ءِ رد ءَ ناگ، ڈکنا، دراچکی، سوراپی ڈن ءُ کلدر ءَ آیوک ءُ رؤکیں ھندی مردم ءُ جنین آدماں سلاہ بندیں مردمانی سوب ءَ بازیں نگیگی ءُ جنجالانی دیمپانی اِنت۔

ھندی مردمانی رد ءَ گوستگیں روچاں دمگی واکدار ھم اے درگت ءَ سرپد کُتگ اَنت بلے آھاں گُشتگ کہ ما لاچار اِنت کہ اے مردم ادا ایف سی ءَ نندارینتگ اَنت۔

ھندی مردماں چہ بلوچستان سرکار ءَ دزبندی کُتگ کہ اے سلاہ بندیں ٹولیانی درگت ءَ گامگیج زیرگ بہ بیت ءُ اے چہ اد ءَ چِست کنگ بہ بنت۔

بلوچستان لبریشن فرنٹ ءَ کیچ ءِ ھند کولواہ جت ءِ مزن کَور ءَ ریاستی کُشندہ ٹولی ءِ کارِندھانی سر ءَ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ بیست ءُ چار ساچان ( 24 اگست ) ءِ روچ چارشمبے ءَ مئے سرمچاراں کیچ ءِ ھند کولواہ جت ءِ مزن کَور ءَ  ریاست ءِ کُمکّ ءَ پُرکاریں کُشندہ ٹولی ءِ سر ءَ اُرش کُرتگ۔ دُژمِن ءِ اے کُمکّاریں ٹولی یک ھپتگے ءَ پیش ایم آئی ءِ اپسر سلمان ءِ سروکی ءَ اے ھند ءَ اتکگ۔ اے اُرش ءِ آسر ءَ کُشندہ ٹولی ءِ ھپت کارِندہ مُرتگ ءُ دِگہ بازینے ٹپّی بوتگ اَنت ۔

جارکشّ میجر گْوھرام بلوچ ءَ درشان ءِ دیمتِر ءَ گْوشتگ کہ یک ھپتگے ءَ ساری مارا ھال رس اِتگ پنجگور ءِ جتا جتائیں ھنداں چِہ چاڑکّھیں ریاستی ڈیتھ اسکواڈ مُلّا نِثار پنّام ء سیف اللہ ٹولی، مُلّا نوید ٹولی ءُ کیچ ءِ ھنداں چاڑِکّھیں سعید لاٹُو ٹولی ماں کولواہ ءِ ھند ءُ دمگاں ساڑی اَنت۔ آ پاکستانی پوج ءِ چیریں ادارہ ایم آئی ءِ اَپسر سلمان ءِ گْوشگ ءِ رِد ءَ  سادگیں گاڑیانی سر ءَ ترّ ءُ گرد کُرتگ، راہ ءُ در بستگ اَنت ءُ رو ءُ آ کنوکیں مردُماناں تنگ کُرتگ۔ آیاں چہ ھندی مردُماں پہ زُورانسری گاڑی پچ گِپتگ اَنت ءُ لس مھلوک ءِ دْروشم ءَ وت ءَ سھرا کنگ ءِ جُھد ءُ کُوشست ءِ تہ ءَ بوتگ اَنت دانکہ آ چہ تُربت ءَ اتکگیں ایم آئی ءِ اَپسر سلمان ءِ داتگیں ٹاسک ءَ پیلو بِہ کن اَنت۔

اِیشانی تیوگیں مالومداری ءُ ھالانی رسگ ءَ پد سرمچاراں آیانی سر ءَ پیسر ءَ اُرش کُرتگ ءُ آیانی اِرادگ بے سوب کُتگ۔ گْوستگیں روچاں چہ ھمے ٹولیانی نیمگ ءَ لوکل گاڑی ءِ سر ءَ تیرگْواری ءَ لاپ پُریں جنین آدم ماہ جان گوں وتی لاپ ءِ زھگ ءَ ھوار شھید بوتگ۔ آئرا پہ دْرواہ کنگ ءِ ھاتِر ءَ ھسپتال ءَ برّگ ءَ بوتگ اَنت۔ چہ ھمے اُرش ءَ ماہ جان ءِ کسانیں جِنکّ دُردانگ باز زدگ ءُ ٹپّی بوتگ۔
بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ دیمتِر ءَ گْوشتگ کہ جت مزن کَور ءَ کُشندہ ٹولی ءِ ساڑی بُوَگ ءِ ھال ءِ رسگ ءَ پد سرمچاراں گوں جْوانیں پیشبندی ءُ شیواری ءَ وتی کارروائی پیلو کُرتگ۔ اُرش ءِ دوران ءَ پاکستانی پوج ءِ یک رُمبے کُشندہ ٹولی ءِ کُمکّ ءَ اتکگ ءُ سر بوتگ اَنت، بلے سرمچارانی جْوانیں پیشبندیانی سَوَب ءَ آ پہ پدکِنِزگ ءَ مجبُور بوتگ۔ زمینی پوج ءِ پدکِنِزگ ءَ پد پہ آئی کُمکّ ءَ بالیگ ( ہیلی کاپٹر ) اُرش جاہ ءَ اتکگ ءُ سر بوتگ اَنت۔

جارکشّ میجر گْوھرام بلوچ ءَ دیمتِر ءَ گْوشتگ کہ اے اُرش ءَ کُشندہ ٹولی ءَ را مزنیں تاوانے رس اِتگ۔ چہ دُژمِنیں پوج ءِ نیمگ ءَ شش کُشندہ ٹولی ءِ کارِندھانی جون پنجگور ءُ یک جونے ماں کیچ تُربت ھسپتال ءَ دیم دَیَگ بوتگ۔

میجر گْوھرام بلوچ ءَ وتی درشان ءِ تہ ءَ گْوشتگ کہ ما کڈّن کن اِیں اے توامیں ٹولیاں کہ آ بلوچ راجی جُھد ء آجوئی ءِ دیم ءَ پہ وتی زاتی نپّ ءُ سیتانی ھاتِر ءَ اڑاند ءُ ڈنگر بُوَگ ءِ کُوشست کنگ ءَ اَنت۔ اے توامیں ٹولیانی اھوال مئے گْور ءَ ھست اَنت کہ آ راجی میاربار بُوَگ ءَ اَنت، ءُ آ مئے نِشانگ ءَ اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ مئے اے اُرش دُژمِن ءُ آئی کُمکّارانی سر ءَ داں بلوچستان ءِ آجوئی ءَ گوں تْرندی ءَ برجاہ بَہ اَنت۔

مستونگ وئیل ءِ بگیری ءَ بلوچ یکجھتی کمیٹی ءُ بی ایس او پجار ءِ جارکش ءُ بی ایس او ءِ سرکماش جھانگیر منظور بلوچ ءَ رسانکدراں وتی شنگ کرتگیں درشانانی تہ ءَ وئیل ترندی ءَ گوں ایرجتگ ءُ گوشتگ ریاستی زوراکیانی مستریں درور مستونگ ءِ وئیل انت –

بی وائی سی ءِ جارکش ءَ وتی درشان ءِ تہ ءَ گوشتگ کہ سی ٹی ڈی ءِ کتکاریانی تہ ءَ روچ پہ روچ گیشی آیان انت ءُ اے سی ٹی ڈی ھمے واستا جوڑ کنگ بوتگ کہ بلوچانی کُشت ءُ کوش ءَ بہ کنت – گوستگیں شپ ءَ مستونگ ءِ دمگ کلی شادی خان ءَ سی ٹی ڈی ءَ مستونگ ڈگری کالج ءِ پرنسپل ءِ گس ءَ بیڑ برتگ ءُ زوراکی ءِ سیمسر سرگوز کرتگ انت – چادر ءُ چاردیوالی لگتمالی ءَ ھوار ھوار گِس ءِ تہ ءَ کور کاؤ تیرگواری کُتگ کہ چریشی ءَ سلمان ءُ سلاح الدین بیران بوتگ انت وھدیکہ وھدیکہ پروفیسر صالح شاد ءُ کماش گل محمد زدگ بوتگ انت ءُ پد ءَ ایڈوکٹ عطاءاللہ ءَ ھوار گِس ءِ شش زدگیں مردم زورانسری آوار جتگ ءُ بیگواہ کتگ انت – وھدیکہ مروچی روچ ءَ آ گوں نگیگیں جاوراں سانکل دست ءَ دیگ ءُ شال ءِ سول نادراھجاہ ءَ آرگ بوتگ انت – اے ھچ وڑ ءَ کانودی کارے نہ بوتگ بلکیں درکانودی ءُ رستری کنگ ءِ مستریں درور انت –

جارکش ءَ گوشتگ کہ ھما روچ ءَ سی ٹی ڈی جوڑ کنگ بوتگ ھما روچ ءَ چی بلوچستان ءَ درکانودی کشت ءُ کوشانی تہ ءَ گیشی اتکگ ءُ اے درچ انگت برجاہ انت – سی ٹی ڈی ءَ تنی وھدی بازیں مردمے دزگیر کتگ ءُ کُشتگ اَنت – اگاں سی ٹی ڈی ءِ اے کتکاری گر ءُ دار کنگ نہ بوت اَنت گڑا بلوچستان ءَ انسانی ھکانی لگتمالی ءُ ریاستی کُشت ءُ کوش ءِ تہ ءَ چد ءُ گیشتر گیشی کیت اِنت کہ چریشی ءَ بلوچستان ءِ جاور ھرابتر بنت – مستونگ ءِ وئیل سی ٹی ڈی ءِ کتکاریانی پدریں درورے –

جارکش ءَ گوشتگ کہ دو روچ ساری دگہ ھنچیں وئیلے بوتگ ات کہ عنایت اللہ غبزئی ءِ جون نادارہ جاہ ءَ آرگ بوتگ ات – لھتے روچ ساری یک دگہ ھنچیں وئیلے ءَ ھاران ءَ دو برات کُشگ بوتگ انت ءُ مروچیگیں مستونگ ءِ اے وئیل ءَ سی ٹی ڈی ءَ کُشت کوش ءِ جار جتگ –

جارکش ءَ آمیدگس، سیاسی پاٹی ءُ دگہ سرکاری ادارھاں ھمے کلوہ داتگ گوشتگ کہ اگاں بلوچستان ءِ تہ ءَ پھازگی لشکر ءِ کتکاریانی دارگ ءِ جھد کنگ نہ بوت گڑا بلوچستان ءَ ھر وڑیں جاورانی زمہ دار ھمے اداراھانی سر ءَ انت – آئی ءَ گوشتگ کہ بلوچ راج وتی مردمانی کشت ءُ کوش ءِ سر ءَ ھاموش نہ بیت – ما چہ مھلوک ءَ لوٹ کن ایں کہ پھازگی لشکرے بگیری ءَ سیاسی مزاھمت راہ ءَ گچین بہ کن انت اگاں نان مروچی پروفیسر صالح بوتگ باند ءَ شمئے گِس ھمے زلم زوراکیانی آماچ بوت کنت –

بی ایس او ءِ سرکماش جہانگیر منظور بلوچ وتی درشان ءِ تہ مستونگ ءَ پھازگی ادارھانی نیمگ ءَ پروفیسر صالح محمد شاد ءِ گس ءَ بوتگیں اُرش ترندی ءَ گوں ایرجتگ ءُ گوشتگ کہ اے پدردیں وئیل بلوچ راج سر ءَ برجاھیں زلم زوراکیانی درچ یے –

آئی ءَ گوشتگ کہ یک نیمگے ماھے ءَ گیش انت کہ بلوچستان ءَ زورانسری آوار جنی ءُ دروگیں میڑاں مردمانی کوش ءِ بگیری ءَ شال ریڈ زون دومی نیمگ ءَ ھرنائی ءَ پوج ءِ دست ءَ سیاسی باسکانی کوش ءِ بگیری ءَ نندانک برجاہ انت بلے پدا ھم پھازگی ادارہ ءُ سرکار ءِ رویش ءِ تہ ءَ بدلی نہ اتکگ – ھمے زوتاں بلوچستان ءِ بازیں دمگاں چشیں وئیل بوتگ انت کہ لس مھلوک شھید کنگ بوتگ انت کہ آھانی تہ ءَ ھاران ءِ وئیل ھم ھوار انت –

آئی ءَ گوشتگ کہ پروفیسر ءِ گِس ءِ سر ءَ اُرش ناشرکاری ءُ زانتکارے ءَ تیرباران کنگ زانت ءُ زانشت ءِ سر ءَ اُرش کنگ انت – آئی ءَ گوشتگ کہ بلوچستان ءَ سیاسی جیڑھ ءَ توپک ءِ زور ءَ گرءُ دار کنگے تکنیک بے سوب بوتگ بلکنہ چریشی ءَ مردم گیشتر زھر بوان انت ءُ بلوچستان ءَ برجاھیں انسانی ھکانی لگتمالی ءَ کس ھچ گوشگ ءَ نہ انت –

جہانگیر منظور بلوچ ءَ گوشتگ کہ بلوچستان ءَ چادر ءُ چاردیوالی ءِ لگتمالی، ورنا ءُ زانتکارانی زورانسری آوار جنی ءَ ھوار انسانی ھکانی لگتمالی ءَ سپریم کورٹ، ایوان، پاکستان ءِ رسانکدر انسانی ھکانی ادارہ گامگیج بہ زور انت ءُ اے زلم زوراکیانی ھلاس کنگ ءَ وتی کرد ءَ پیلو بہ کن انت –

ھمے وڈ بلوچ اسٹوڈنٹس آرگنائزیشن ءِ جارکش ءَ وتی شنگ کرتگیں درشان ءِ تہ ءَ گوشتگ کہ مستونگ ءَ شپ ءِ نیم ءَ گِس ءِ تہ ءَ پُترگ ءُ تیرگواری کنگ ناکہ دود ءُ ربیدگانی بگیری انت بلکنہ کانود ءَ اے ٹولی ڈیل داتگ انت ءُ کانودانی منگ ءَ تیار نہ انت ءُ ناکہ اے ملک عمرانی معائدہ ءِ رِد ءَ چلگ ءَ انت ھمک روچ اے دابیں وئیلانی تہ ءَ گیشی آیگ انت ءُ سرکار ھچ وڈا دلگوش دیگ ءَ نہ انت بلکنہ آھانی بازیں نمائندگے کشندہ ٹولی ءَ ھوار انت کہ آئی ءِ پدریں درور سمیر سبزل ءُ ظہور بلیدی انت کہ لس مردمانی گِس ءَ پُتر انت کُشت کوش ءَ ھوار انت –

جارکش ءَ گوشتگ کہ ہروفیسر یک ادیب، زانتکار ءُ جوانیں انسان ءِ ھوار یک اُستاد ءِ ھم آئی مزنیں کدے بلے بژن کہ گوستگیں شپ ءَ آ تیر باران کنگ ءُ شھید کنگے کوشست کنگ بوتگ ءُ آئی دو برات زھگ کُشگ بوتگ ءُ پدا آ نادارھجاہ ءَ ارگ بوتگ – اے ھونی ایں بیڑ ءَ ایندگہ ششیں مردمانی ھچ ھال بود نیست ءُ ناکہ کماشیں گل محمد ءِ ھال اھوال ءِ ھست – ما چہ آمیدگس ءَ گوں لوٹ کن ایں کہ اے ھونریچی ءِ دارگے ھاتر ءَ وتی کرد ءَ پیلو بہ کنت ءُ ھر کسے کہ اشی ءِ تہ ءَ ھوار بوتگ آھاں سزا بہ دنت –

جارکش ءَ گڈسر ءَ وتی درشان ءِ تہ ءَ گوشتگ کہ ایڈوکیٹ عطا اللہ، گل محمد ءُ سیف اللہ ءَ ھوار ھر مردمے کہ آوار جنگ ءُ بیگواھ کنگ بوتگ انت آ مردم دیما آرگ بہ بنت –

سرجمیں بلوچستان ءَ وتکشیءِ نہ اوشتوکیں دْرچ برجاہ اِنت دگہ یک مردمے ءَ وتکشی کتگ-

ھمے ھپتگ ءَ وتکشی کنوکانی کچ شش ءَ سر بوتگ اَنت، بلے بلوچستان ءَ اے وڑیں وئیل رسانکدر ءَ کم سر بنت- یک کساس یے ءِ رِد ءَ وتکشی کنوکانی کچ چہ اِشی ءَ باز گیش بنت-

ھمے ماہ ءَ تربت، پنجگور ءُ پسنی ءَ چہ وتکشی وئیل رپورٹ بوتگ اَنت بلے نوکیں ھالانی رِد ءَ پنجگور ءِ دمگ کیلکور ءَ سراج ء شاہ دوست نامیں ورنایے ءَ وتی گُٹ ءَ ساد مان کتگ ءُ وتی زندمان ھلاس کُتگ-

سرجمیں بلوچستان ءَ ھمکروچی ھساب ءَ وتکشی ءِ وئیل روچ پہ روچ رپورٹ بوگ ءَ اَنت گوستگیں روچاں چہ بلوچستان ءِ سے جتائیں دمگاں نوشکی، تربت ءُ پنجگور ءَ چہ شش کیس رپورٹ بوتگ اَنت-