TBP Balochi

بلوچستان ءِ دمگ کیچ ءَ دگہ مردمے ءَ وتی زندمان چہ وتی دستاں ھلاس کتگ، کیچ ءَ گوستگیں بیست ءُ چار کلاکانی تہ ءَ وتکشی ءِ اے دومی وئیل اِنت-

سربوتگیں ھالانی رِد ءَ کیچ ءِ تھسیل تمپ ءِ دمگ شاھی تمپ ءَ سعید ء علی نامیں مردمے ءَ وتی لوگ ءَ ساد وتی گُٹ ءَ مان کتگ ءُ زندمان ھلاس کتگ-

کیچ ءِ تھسیل تمپ ءَ بیست ءُ چار کلاکانی تہ ءَ وتکشی ءِ اے دومی وئیل اِنت بزانکہ آدینگ روچ ءَ تمپ ءِ دمگ دازن ءَ یک مردمے ءَ وتکشی کتگ-

بلوچستان ءَ وتکشی ءِ گیش بوانیں وئیل ترسناکیں دروشمے ءَ دیم ءَ آیگ ءَ اِنت – ھمے ھپتگ ءَ سرجمیں بلوچستان ءَ ھمینچو کیس دی بلوچستان پوسٹ ءَ رس اِتگ اَنت اشانی کچ ھشت ءَ سر بوتگ اَنت، یک اندازوھے ءِ رِد ءَ ھمینچو کیسز رسانکدر ءَ سر بوگ ءَ اَنت راستیں کچ اشاں دو ھمینچو بنت کہ آ رسانکدر ءَ سر بوگ ءَ نہ اَنت-

ھمے ھپتگ ءَ بلوچستان ءِ دمگ کیچ، نوشکی ، پنجگور ءُ گوادر ءَ کیسز رپورٹ بؤکیں دو کیس پنجگور، یکے نوشکی، چار کیچ ءُ یک پسنی ءَ چہ وھدے کہ وڈھ بؤکیں یک رپورٹے ءِ رِد ءَ یک مردمے ءَ وتکشی ءِ جُھد کتگ-

روکپتی بلوچستان ءَ ھواریں دمگ زابل ءَ ایرانی آمیدگس ءَ دو بندیگیں مردم پاھو داتگ اَنت-

گیشیں ھالانی رد ءَ نشہ باپاری ءِ بھتام ءَ ایرانی آمیدگس ءَ دو کس پاھو داتگ اَنت کہ آ گوستگیں سالاں گرگ بیتگ اَنت-

پاھو دیگ بیتگیں مردمانی پجار غلام مرضا کاضمی کہ آئی ءِ اُمر چِل ءُ چار سال ءُ دومی رضا زحمتی کہ آئی ءِ اُمر سِی ءُ پنچ سال گوشگ بیتگ ھردوک زابل ءِ نندوک گوشگ بوگ ءَ اَنت-

ھردوکیں مردم ایرانی سال نود ءُ ھپت ءَ نشہ ءِ باپاری ءِ بھتام ءَ زابل ءَ گرگ بیتگ اَنت کہ چریشی ءَ پد ایرانی انکلاب ءِ آمیدگس ءَ آیانی سر ءَ کیس بیتگ ءُ پد ءَ ھردوکانی سر ءَ پاھو اتکگ-

ھالانی تہ ءَ گوشگ بیتگ کہ اے مردم چیریں پاھو جاہ ءَ پشمبے ءِ روچ ءَ برگ بیتگ اَنت ءُ ھمود ءَ ھردوک پاھو ءِ دار ءَ درنجگ بیتگ اَنت-

گوستگیں سال ءَ بگر داں انیگ ءَ پنجاہ کس پاھو دیگ بیتگ اَنت اشانی کچ ءُ کساس راستی ءَ پدر بیتگ اَنت ءُ اشاں ھوار ھوار دگہ کچ ءُ کساسے ءَ ھپتاد ءُ نُھ کس پاھو دیگ بیتگ اَنت اشانی تہ ءَ سِی ءُ چار نشہ ءِ باپاری، ھپت کس کوشانی سر ءَ، چار دگہ گلانی بندوکی، سَے کس کمکاری ءِ ڈیھ ءِ بگیری ءُ دگہ دو کس وت ما وتی جنگ ءُ چوپانی پژدر ءَ پاھو دیگ بیتگ اَنت-

شال ءَ میاں غنڈی ءِ دمگ ءَ توپان آماچاں زھرشانی کنان ءَ بنجاھی شھدگ بند کتگ، مشیر داکلہ میر ضیاء اللہ لانگو زھرشانی کنوکانی گور ءَ سر بیتگ-

آسرمنداں بلوچستان ءِ سرکار ءِ نیمگ ءَ پہ وھد کمکانی نہ رسگ ءِ سر ءَ شھدگ بند کتگ-

ھمے وھد ءَ مشیر داکلہ میر ضیاء اللہ لانگو ءَ میاں غنڈی ءَ زھرشانی کنوکیں دمگی مردمانی گون ءَ گند ءُ نند کتگ-

مشیر داکلہ ءَ گشتگ کہ اے وھد ءَ سرجمیں پاکستان چہ توپان ءَ اسرمند اِنت اے یک دمگے ءِ گپ نہ اِنت-

آئی ءَ گشتگ انتزامیہ ءَ را توپان آماچیں مردمانی کمک ءَ زوت ءَ چہ زوت گامگیج زورگ ءِ کڈن کتگ-

مشیر داکلہ ءِ سدکی دیگ ءُ گامگیج ءِ زورگ ءَ دمگی مردماِ شال ءِ مزن شھدگ پچ کتگ-

شال ءِ شھر ءَ دگہ جاھاں گیس ءِ رسانی تنی وھدی مھتل اِنت چریشی ءِ آسر ءَ ایل پی جی ءِ نھاد سک گیش کنگ بیتگ اَنت-

سوئی گیس ءِ مھتل بیگ ءِ سبب ءَ ایل پی جی سلینڈر ءِ دکانانی سر ءَ بِیڑ بیتگ ءُ دکانداراں گیس ءِ نھاد گیش کتگ-

شال ءَ ایل پی جی ءِ یک سِیرے سَے سد ءَ بھا بیگ ءَ اِنت ءُ کُچگی دمگاں ایل پی جی ءِ نھاد چار سد ءَ سر بیتگ –

اشی ءَ ابید بلوچستان ءِ جتا جتائیں شھراں بجلی ءِ ٹاورانی کپگ ءَ بجلی بند اِنت ھمے وڑ سروزیر ءِ گوشگ ءَ ابید ھم بازیں جاھاں موبائل پون نیٹورک سروس انگت ءَ اسرمند اِنت-

دومی نیمگ ءَ کمکاریں دمگی گلانی ءُ مردمانی گوشگ اِنت ٹینٹ ءُ دگہ ساز ءُ سامانی نھاد سَے سری برز بیتگ-

کراچی: زانت ءُ ادب پبلشرز ءِ منیجر لالہ فھیم بلوچ پاکستانی پوج ءَ آوار جتگ

دی بلوچستان پوسٹ

آدینگ روچ ءَ چہ کراچی ءَ نامداریں ادبی بازار اردو بازار ءَ پاکستانی پوج ءِ کارندھاں زانت ءُ ادب پبلشرز ءِ منیجر دزگیر کتگ ءُ وتی ھمراھی ءَ برتگ اِت گوں-

سربوتگیں ھالانی رِد ءَ چہ کراچی ءِ دمگ اردو بازار ءَ آدینگ بیگاہ ءَ زانت ءُ ادب پبلشرز ءِ منیجر لالہ فہیم بلوچ کانود ناپز کنوکیں ادارہ ءِ کارندھاں پجّار کنگ ءَ پد دزگیر کتگ ءُ وتی ھمراھی ءَ گوں وت برتگ اِت-

چمّ دیستانی رد ءَ سندھ پولیس ءُ لس پوشاکانی تہ ءِ کارندھاں چُست ءُ پُرس ءُ پجّار کنگ ءَ پد آئی ءِ دکان بند کنائینتگ ءُ آ دزگیر کنگ ءَ پد وتی ھمراھی ءَ برتگ گوں-

زانگ بہ بیت زانت ءُ ادب پبلشرز پاکستان ءِ ستہ ءِ سر ءَ یک نامداریں پبلشنگ ہاؤسے اود ءَ بلوچی ادب ءُ دگہ زبانانی پٹ ءُ پولی کتاب شنگ کنگ بیت-

شال ءَ گوستگیں دو روچاں ھئور یکشل ءَ رچگ ءَ بوتگ مروچی ھلاس بوتگ –

شال ءَ گوستگیں دو روچاں برجاھیں ھئور آکرکار مروچی آدینگ ءِ روچ ءَ ھئور رچگ بند بوتگ ءُ چریشی ءَ پد دگانی سر ءِ آپ ھم کم بوتگ انت –

موسم ءِ بنشون ءِ رِد ءَ شال ءَ بیست ءُ چار ادارانی میان ءَ ھشتاد ءُ شش میٹر ھئور رِتکگ وھدیکہ دو روچانی میان ءَ یکسد ءُ شش میٹر نبشتہ کنگ بوتگ –

شال ءَ دو روچاں برجاھیں ھئورانی سوب ءَ بازیں دمگ ءِ آپ ءَ پُربوتگ چریشی ءَ ھشتی گِس کپتگ انت دو روچاں برجاھیں ھئوراں چہ ہنہ اوڑک، مغربی بائی پاس، ہزار ہ ٹاؤ، جوائنٹ دگ، پشتو باغ، اسپنی دگ، رئیسانی دگ، بروری دگ، سبز ل دگ، سریاب دگ، نواں کلی، سرہ خلہ، سرہ غڑگئی،چشمہ اچوزئی، سمال آباد، کلی اصرا ھوار دگہ بازیں دمگاں ھئورانی آپ اتکگ ءُ شپ ءِ شپ مردماں وت ءَ ھپازتی جاھاں سرکتگ –

گوستگیں روچ ءَ شال ءَ ھئور ءِ سوب ءَ ھشت مردم زدگ بوتگ انت – شال سول ھسپتال ترما سنٹر ءِ واکدارانی رِد ءَ گوستگیں شپ ءَ چہ شال ءَ ھشت مردم نادراھجاہ ءَ ارگ بوتگ انت کہ آھانی تہ ءَ بازینی ءِ جاور نگیگ انت – آزاد اھولکاراں سَے مردمانی مرگ ءِ ھال ءِ ھبر راست کتگ کہ آھانی تہ دو زھگ بلیلی نزیک ءَ آپ ءَ برتگ انت –

زانگ بہ بیت گوستگیں روچاں برجاھیں ھئورانی سوب ءَ شال ءِ گوں دگہ دمگاں جھلی ءُ برزی رؤگ آھگے راہ ءُ در بند بوتگ انت- شال ءُ کش ءُ گور ءِ دمگاں گوستگیں روچ ءَ بندات بوتگیں ھئور ءَ سرجمیں شپ ءَ گورتگ –

یکشلیں ھئورانی سوب ءَ شال ءَ موبائیل فون، لینڈ لائن، لین، گیس، بینگنگ سسٹم ھم نہ بوتگ درسیں زمیں رؤگ ءُ آھگے ءِ راھانی بند بوگ ءِ سوب ءَ واکداراں شال ءِ تہ ءَ ایمرجنسی جنگ ءِ جار جتگ –

دومی نیمگ ءَ موسم ءِ بنشون ءِ باند ءَ پد ءَ سرجمیں بلوچستان ءَ ھئور بوگ ءِ جار جتگ وھدیکہ ھئور ءُ ھارانی سوب ءَ بلوچستان ءِ گوں دگہ دمگاں زمینی رؤگ آھگے راہ ءُ در دگ ءُ پھلانی پُرشت پروشی ءِ سوب ءَ بند انت –

ترندیں ھئورانی سوب ءَ بلوچستان دمگ چمن، ھزدار دگہ دمگاں موبائیل فون انٹر نیٹ ھم اثرمند بوتگ انت آھانی ھڈ کنگے کار برجاہ انت –

بلوچستان ءَ بشّی ھئورانی درچ یکشل ءَ برجاہ انت گوستگیں شپ ءَ بازیں ھئورانی سوب ءَ بازیں گِس ءِ پُرشتگ ءُ کپتگ انت –

گیشیں ھالانی رِد ءَ بلوچستان ءِ دمگ کلات، بولان، مانجھی پور ءَ ھئورانی سوب ءَ بازیں گِس ءِ کپتگ انت ءُ وھدیکہ بازیں لین ءِ کمبہ ءِ کپتگ انت –

مانجھی پور ءَ توپان ءَ تباھی کُتگ، سدانی کچ ءَ میتگ ھار ءَ بُرتگ انت ءُ تنی وھدی اے درگت ءَ سرجمیں ھال نہ اتکگ –

چہ کلات ءَ سربوتگیں ھالانی رِد ءَ ھئوراں تباھی آرتگ بپھرے کور ءِ آپ میتگ ءَ اتکگ ءُ چریشی ءَ بازیں گِس ءِ آپ ءَ بُرتگ بازیں کمبہ ءِ کپتگ انت کہ چریشی ءَ دمگ ءِ تہ ءَ لین نیست – کلات ءَ گوستگیں بیست ءُ چار ادارانی میان ءَ برجاھیں ھئوراں تباھی کتگ کور ءِ توپانی ھار ءَ غریب آباد، مغلزئی، یالو، مقصود آباد آپ ءَ برتگ انت دمگی مردماں وتی کمک ءِ وت زھگ ءُ زالبول در کتگ انت –

گوستگیں شپ ءَ غمگزار یانزدہ ھزار کے وی تار مردمانی سر ءَ کپتگ انت کہ چریشی ءَ پنچ مردم زدگ بوتگ انت ءُ نادراھجاہ ءَ برگ بوتگ انت –

دومی نیمگ ءَ بولان، کچھی، ڈھاڈر ءَ ھوار سبی ءُ مچ ءَ گوستگیں دو روچاں برجاھیں ھئوراں مزنیں تباھی ءِ کتگ سدانی کچ ءَ گِس کپتگ انت لس مھلوک پچیں آزمان چیر ءَ زند گوازینگ ءَ لاچار انت ڈھاڈر ءِ نزیک ءِ دوپاسی لنک دگ دومی بھر ھم ھار ءَ بُرتگ چریشی ءَ مہر گڑھ کوٹ رئیسانی، کوٹ مینگل، نوشہرو، گھی کوٹ کھائی رؤگ ءُ آھگے راہ بند بوتگ –

ھمے وڈ بی بی نانی پُھل ھم ھار ءَ بُرتگ چریشی ءَ بلوچستان تاں پنجاپ ءَ رؤگ ءُ آھگ بند بوتگ – سراج آباد ءَ بولان شھدگ سرجمی ءَ تباہ بوتگ – ڈھاڈر نزیک ءَ مشکاپ ڈیم کہ پیسر ءَ پُرشتگ بوتگ سَے ھارانی آیگ ءَ مشکاف لنک دگ ھم بُرتگ – کچھی ءَ سدانی کچ ءَ میتگ ھار ءَ برتگ وھدیکہ جانی ءُ مالی تاوان ءِ ھال سرجمی ءَ نہ اتکگ انت – ڈھاڈر ءَ بازیں نزیکیں میتگ توپان ءِ آماچ بوتگ انت مھلوک ءَ وتی لوگ جاہ یل داتگ انت ءُ وت ءَ پھازتگ –

مانجھی پور، حیردین، فرید آباد، پہنور سنہڑی، دولت گھاڑی، حامد پور، کنرانی بیلٹ گوراناڑی ءَ ھوار صحبت پور ءَ ھئور ءُ ھاراں ھم تباھی کتگ – ھزارانی جاہ ھار ءَ برتگ انت – صحب پور ءَ ھشت یا نُھ فٹ آپ یکجاہ بوتگ انت بازیں کورانی آپ ھم صحبت پور ءَ اتکگ ءُ یکجاہ بوتگ چریشی ءَ سرجمیں صحبت پور زر ءِ دروشم ءَ بوتگ، ھزارانی کچ ءَ گِس پُرشتگ ءُ کپت انت، کشت ءُ کشار تباہ بوتگ انت ھزاراں کچ مردم بے گس بوتگ انت لھتے میتگاں ھنگت مردم توپان ءَ پنس اِتگ انت – ریسکیو ٹولی ھم نیست انت وھدیکہ مردمانی وردنی ورگ ھم رسگ ءَ نہ انت شد ءُ تُن ءَ مردم مرگ ءِ آماچ انت – زھگ ءُ کماش ءُ زالبول بازیں نادراھیانی آماچ انت کور ءُ شیپانی بند ھم پُرشتگ انت کہ تنی وھدی جوڈ کنگ نہ بوتگ انت –