TBP Balochi

بلوچستان ءِ ضلع ھُزدار ءَ دو جتا جتائیں جاھاں بمب تراک بوتگ-

سربوتگیں ھالانی رِد ءَ ھُزدار ءِ بُنجاھی شھدگ سر ءَ چمروک نزیک ءَ بوتگیں دزمب اُرش ءَ پوج کارندہ نشانگ کنگ بوتگ اَنت- تراک ءَ پد تیرگواری توار اش کنگ بوتگ اَنت-

اِھوالکارانی رِد ءَ ناشناسیں مردماں چمروک چوک سر ءَ اوشتوکیں پوج کارندہ دزبمب ءَ گوں نشانگ کتگ اَنت ءُ تتکگ اَنت-

ھمے وڑ ھُزدار کنڈ ھند ءَ یک تُرندیں تراکے ءِ توار اِش کنگ بوتگ وھدے کہ وئیل ءِ درگت ءَ پٹ ءُ پول پولیس کنگ ءَ اِنت-

تراک ھال رسگ ءَ پوج ءُ پولیس ءَ دمگ انگر ءَ کتگ وھدے کہ شھر ءَ گیش اُرشانی تُرس ءَ پھازوکی تُرند کنگ بوتگ-

ھُزدار بمب تراک زمہ واری دنیگت ءَ ھچ گل ءَ نہ زرتگ اَنت ءُ بلے اے وڑیں اُرشانی زمہ واری گیشتر آجوئی لوٹوکیں سلاہ بندیں گلاں منّ اِتگ اَنت-

بلوچ اسٹوڈنٹس ایکشن کمیٹی ءِ نال ھنکین ءِ نیمگ ءَ نال ءَ بلوچستان ءَ ھار آماچیں مردمانی واستا دو روچی کمکی بنجلے جتگ-

کمکی بنجل ءَ ھار آماچیں مردمانی اژدری ساز ءُ سامانی سرجم کنگ ءَ اے بنجل برجم کنگ بیتگ-

ھمے وھد ءَ بنجل ءَ جاڑیگیں بلوچ اسٹوڈنٹس ایکشن کمیٹی ءِ باسکاں گوشتگ کہ مروچی بلوچستان ءَ مھلوک ھار ءَ برتگ ءُ چریشی ءَ بازیں کھول بے لوگ ءُ بے وردن ءَ سر پچیں آسمان ءِ چیر ءَ کپتگ اَنت-

آیاِ گوشتگ کہ اے وھد ءَ وتی راج ءِ کمک ءَ کسے اگاں نہ کنت گڑا ھچ بر آ وتی راج ءِ دیمروئی ءَ کت نہ کنت-

آیاں گوشتگ کہ ھار جتیں مھلوک مروچی ھما مردمانی ودار ءَ نیشتگ اَنت ءُ آ بازیں جنجال ءُ جیڑھانی دیمپان اَنت –

آیاں گوشتگ کہ سرکار ءِ نیمگ ءَ ھاسیں کمک بوگ ءَ نہ اِنت چریشی ءِ سبب ءَ بازیں کھول تکانسر اَنت ءُ باید ھما مردم وتی دست ءَ اے وھد ءَ ھورک بہ کن اَنت ءُ ھار آماچیں مھلوک ءِ کمک ءَ بہ کن اَنت –

اے وھد ءَ بلوچ ایکشن کمیٹی ھم ھما گلانی پیم ءَ وتی کمکی کاراں گوں دلگوش اِنت ءُ آ ھارآماچیں مھلوک ءِ کمک ءَ کنگ ءَ اَنت-

دومی نیمگ ءَ بلوچ ایکشن کمیٹی ءِ نیمگ ءَ مروچی پہ شال ءَ ھار آماچیں مھلوک ءَ یک ھزار تمبو ءُ دگہ اژدری ساز ءُ سامان دیم دیگ بیتگ اَنت-

بلوچ ایکشن کمیٹی ءِ نیمگ ءَ ھار آماچیں مردماں پہ بنجاھی شھر شال ءَ ھوار ھوار بلوچستان ءِ دگہ دگہ جاھاں کمکی بنجل برجاہ اَنت-

بلوچستان ءَ گوستگیں روچاں بوتگیں ھئورانی سوب ءَ مردم انگت دلسیاہ انت –

بازیں ھئور ھارانی سوب ءَ دگانی پُرشگ ءُ پُھلانی کپگے سوب ءَ ھنگت تاں روگ ءُ آھگے راہ ءُ در بند انت – شال، ھزدار، ھاران، نوشکی، نصیرآباد ءَ ھوار دگہ دمگاں ھنگت لین، گیس انٹرنیٹ ءُ موبائیل سروس نیست اِنت –

شال ءُ دگہ دمگاں گیس بند انت وھدیکہ ایل پی جی گرانیں نھادان بھا بوگ ءَ اِنت –

گیس ءِ بند بوگ ءِ سوب ءَ ایل پی جی سلینڈرانی دکاناں مردمانی رش ءُ کش انت دکانداراں مردمانی رش ءُ کش ءَ گیس ءِ نھاد گیش کُتگ، ایل پی جی ءِ گیس یک کیلو ءِ سَے سد کلدار ءَ بھا بوگ ءَ اِنت وھدیکہ بازیں دمگاں یک کیلو ءِ چارسد ءَ ھم بھا بوگ ءَ انت –

بلوچستان ءَ سربؤکیں لین ءِ کمبھانی کپگ ءَ بازیں دمگاں لین ھنگت نیست اِنت – ھاران ءُ ھزدار ءَ سَے روچانی گوزگ ءَ پد ھم لین شر کنگ نہ بوتگ انت –

کیسکو بنشون ءِ رِد ءَ ھئور ءُ ھارانی سوب ءَ بازیں جاھاں لین ءِ کمبھاں تاوان رستگ کہ چریشی ءَ پد شال، مستونگ، نوشکی ، چاگی، دالبندین، ھاران، پشین، چمن گرڈ اسٹیشنز ءَ لین سر بوگ ءَ نہ انت وھدیکہ دادو ءُ ھزدار ءِ ٹرانسمیشن ءِ یک کمبہ ءِ سندھ ءِ دمگ رتو ڈیرو ءَ کپتگ کہ چریشی ءَ ھزدار، وڈھ کلات، منگچر ءُ سوراب گرڈ اسٹیشناں ھم لین سر بوگ ءَ نہ انت –

دومی نیمگ ءَ بازیں ھئور ءُ ھارانی سوب ءَ کور ءُ شیپانی آپاں دگ پُروشتگ انت چریشی ءَ بلوچستان ءِ تاں سندھ، پنجاپ ءُ حیبر پختونخواہ ءَ رؤگ ءُ آھگے زمینی راہ ءُ در بند انت –

کمکی کارکنوکیں ادارھانی گوشگ انت راہ ءُ درانی پُرشت ءُ پروشی ءِ سوب ءِ سوب ءَ کمکی کارانی تہ ءَ ھم باز دلسیاھی بوگ ءَ انت – مزن وزیر ءِ گوشگ ءِ پد ءَ ھم بازیں دمگان موبائیل نیٹورک شرکنگ نہ بوتگ انت کہ چریشی ءَ ھال اھوال گرگ ءَ دلسیاھی بوگ ءَ انت –

گلانی رِد ءَ ھئور ءُ ھاراں اے وھدی بلوچستان گیشتر اثرمند انت بلے پدا ھم ھار آماچ بوتگیں مردمانی ھاتر ءَ سرکار ءُ سرکاری ادارھانی کار سست روی ءِ آماچ انت لھتے بازیں ھنچیں جاہ ھست کہ سک باز اثرمند بوتگ انت ءُ اودا سربوگ نہ بوگ ءَ انت –

زانگ بہ بیت ھئور ءُ ھارانی سوب ءَ بلوچستان ءَ دو سد ءُ پنجاہ مردم مرگ ءِ دیمپان بوتگ انت وھدیکہ بلوچستان ءِ دگہ دمگاں رؤگ ءُ آھگے راہ ءُ در ھنگت بند انت – بلوچستان ءَ رؤگ ءُ آھگے دگ ءُ ریل ءِ پٹی ءِ جوڈ کنگ ءَ سرکار ھنگت بے سوب بوتگ –

بلوچستان لبریشن فرنٹ ءَ کیچ ءِ ھند تُمپ ءَ ایکسچینج ءِ نزّیک ءَ برجاھیں پاکستانی پوج ءِ پانگِس ءِ سر ءَ دز بمب اُرش ءِ زِمہ واری منّ اِتگ۔

بلوچستان لبریشن پرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ بیست ءُ ھپت اگست شمبے ءَ مگرب ءَ ادار ھپت ءُ چِل مِلٹ ءَ مئے سرمچاراں کیچ ءِ ھند تُمپ کلات ایکسچینج ءِ نزّیک ءَ برجاھیں پاکستانی پوج ءِ پانگِس ءِ سر ءَ گوں دزبمب ءَ اُرش کُرتگ، دزبمب پانگِس ءِ اندر ءَ کپتگ، اُرش ءِ آسر ءَ لشکر ءِ کارمَنداناں جانی ءُ مالی تاوان رس اِتگ۔

جارکشّ میجر گْوھرام بلوچ ءَ دیمتِر ءَ گْوشتگ کہ سربتگ ءُ پُروش وارتگیں پوج ءَ اُرش ءِ پُژدر ءَ لسّ مھلوک ءِ سر ءَ ماٹر گولا آس داتگ کہ چرائی ءَ ھِچّ وڑیں جانی تاوان نہ بوتگ۔ لسّ مھلوک ءِ سر ءَ اُرش کنگ پاکستانی پوج ءِ پُروش ورگ ءِ نِشانی اِنت۔

بلوچستان لبریشن پرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ کہ مئے اے اُرش دُژمِنیں پوج ءِ سر ءَ داں بلوچستان ءِ آجوئی ءَ گوں تْرندی ءَ برجاہ بَہ اَنت-

روکپتی بلوچستان ءَ گاڑیانی ٹکر ورگ ءَ شش مردم زدگ ءُ بیران بیتگ اَنت-

گیشیں ھالانی رد ءَ وئیل روکپتی بلوچستان ءِ دمگ بندر عباس میناب ءَ پیش اتکگ کہ اود ءَ چار گاڑیاں ٹکر وارتگ ءُ چریشی ءَ شش مردم زدگ ءُ بیران بیتگ اَنت-

بیران بیتگیں مردمانی تہ ءَ یکے ءِ پجار مجتبی ملاحی ءِ نام ءَ زانگ بیتگ ءُ آ دگہ مردمانی پجار نہ بیتگ اَنت-

ھالانی تہ ءُ گوشگ بیتگ کہ بیران مردمانی تہ ءُ دو کس پت ءُ چک اَنت کہ آیانی پجار نہ بیتگ اَنت –

دمگی مردمانی رد ءَ گاڑیاں سواریں دو مردم سلامتی ءَ بچ اتگ اَنت کہ آ دگہ ستکگ ءُ بیران بیتگ اَنت-

ھالانی تہ ءَ گوشگ بیتگ کہ اے گاڑیاں تیل مان بوتگ کہ چریشی ءِ سبب ءَ ٹکر ورگ ءَ پد گاڑیانی سر ءَ آس کپتگ-

روکپتی بلوچستان ءَ گوستگیں سال ءَ داں انیگ ءَ ھشتاد ءُ ھپت تیل کشیں مردم بیران بیتگ اَنت جتا جتائیں وئیلانی آماچ بیتگ اَنت-

طالبان ءِ وزارت راجی دفاع ھستیں ڈائریکٹر ملا یعقوب ءَ گوشتگ امریکی ڈرون چہ پاکستان ءَ اوگانستان ءِ برزی سیمسراں آیگ ءَ اِنت – ملا مھمد یعقوب ءَ گوشتگ پاکستان وتی برزی سیمسر ءَ اوگانستان ءِ ھلاپ ءَ کارمرد کنگ ءَ مہ دنت – گوستگیں ماہ ءَ اوگانستان ءِ آسمان ءَ بازیں ڈرون طیارے گندگ بیتگ اَنت-

شمبے ءِ روچ ءَ امریکہ ءِ سروک جو بائیڈن ءَ اوگانستان ءَ پوجیانی جاڑیگ بیگ ءَ ابید ناشرکارانی پشتگیری ءَ کنگ ءَ اِنت –

اگست ءَ ڈرون طیارھاں کابل ءِ دمگ شیر پور ءَ یک لوگے ءِ سر ءَ ارش اش کرتگ – امریکہ ءِ سعوک ءَ پد ءَ ٹاہ داتگ کہ القاعدہ ءِ نیٹ ورک ءِ سروک ایمن الظواھری اے لوگ ءَ جنگ بیتگ-

اوگانستان ءَ طالبان ءِ سر ءَ یکشلیں برزی اُرشاں طالبان ءَ دلرنجی درشان کرتگ – کابل قلب ءِ سر ءَ اُرش ءَ چریشی ءِ سر ءَ ایمن الظواھری ءِ بیرانی ءَ طالبان ابکھے ءِ آماچ کرتگ-

شیر پور کابل ءِ سر ءَ اُرش ءَ پد اوگانستان ءِ بازیں اُستاناں زھرشانی ءُ اوگانستان ءِ سر ءَ امریکی ڈرونانی اُرش ایر جنگ بیتگ اَنت-

ملا مھمد یعقوب ءَ گشتگ گوستگیں یک سالے ءِ تہ ءَ کچ ءُ کساس شست ھیلی کاپٹرانی مرمت بیتگ ءُ آ بال کنگ ءَ ساجو اَنت ھمے ھیلی کاپٹرانی درگت ءَ گپ کنان ءَ گوشگ بیتگ کہ ا برزی تکاں گوستگیں سالاں ھمساھگیں ڈیھاں رسینتگ اَنت ملا یعقوب ءِ گوشگ اِنت اشانی کابل ءِ واتری ءَ پٹ ءُ پول برجاہ اِنت-

طالبان ءِ وزیر دفاع ءَ گوشتگ کہ طالبان پوج ءِ کساس یک لَک ءُ پنجاہ ھزار ءَ سر بیتگ اَنت – ملا یعقوب ءَ گوشتگ کہ طالبان ءَ ھشت سیمسراں بریگیڈز جوڑ کرتگ ءُ ھر یک بریگیڈے ءَ وتی سَے ھزار لشکر گون اِنت-

مھمد یعقوب ءَ گوشتگ کہ اسلامی پوج ءِ سلامتی ڈیھ ءُ آجوئی ءِ دفاع اِنت آ گیش دیمروئی ءِ واستا وتی گاماں ترند کنت-

آئی ءَ گوشتگطکہ برزی کمک ءَ ڈیھ ءِ تہ ءَ بازیں کچے ءَ بالیگاں سَے ھزار شھری چہ توپان ءَ رکینتگ اَنت-

بلوچ آجوئی دوستیں رھشون ءَ بلوچستان لبریشن فرنٹ ءِ سروک ڈاکٹر اللہ نزر بلوچ ءَ وتی یک درشانے ءَ گشتگ جماعت اسلامی ءِ رھشون مولانا ھدایت رحمان ءِ نیمگ ءَ بلوچاں سلاہ بندیں جھد ءَ دور دارگ ءِ سر ءَ ترندین زبان ءِ کارمرد کنگ ءِ پژدر ءَ گشتگ جماعت اسلامی ءِ بارو ءَ بلوچ راجدوستانی گمان وھد ءِ سر ءَ راست بوت کہ اے ٹولی ھم پاکستانی پوج ءِ ٹیم اِنت ءُ بلوچستان ءَ بنگلہ دیش ءِ وڑیں راجدپترے بنا کنگ لوٹ ایت نی اے گپ ءِ سر ءَ ھچ گمان پش نہ کپت اے زور پاکستان ءِ پوج ءَ جوڑ کرتگ ءُ آئی ءِ گوشگ ءَ وتی درشاناں دنت-

آئی ءَ گوشتگ کہ بنگلہ دیش ءِ زرمبشت ءِ آجوئی ءِ ھلاس ءَ درستاں ناوشیں کرد جماعت اسلامی ءَ پیلو کرتگ – وھدیکہ بلوچستان ءَ وشھیالیں چاگرد ءَ جماعت اسلامی ءِ پنجگ نہ رس اتگ اَنت گڑا مولانا ھدایت رحمان بلوچی ءِ چارد گور ءَ سر ءَ دیگ بیتگ ھک دو تھریک راجدوستی پیش کتگ دانکہ سادگیں بلوچانی دل ءُ لاپاں جماعت اسلامی ءِ واستا جاہ بہ بیت اِنت ھنچش مولانا ھدایت الرحمان میدان ءَ اتکگ گڑا آ یک راجدوستے ءِ رنگ ءَ بلوچانی دردان درشان کنگ ءَ بیتگ بازیں پھناتاں آئی ءِ سر ءَ باوری بیتگ بلے وھد ءِ ھمراھی ءَ سیکولر بلوچانی اوگام پشت ءَ شت ءُ جماعت اسلامی ءِ نیکراھی دوست ءُ لشکری درشانی دیم ءَ اتک اَنت مروچی وھد اے ھد ءَ سر بوتگ کہ مولانا ھدایت الرحمان لس بلوچ ورنایاں اے گوشگ اِنت سلاہ بندیں جد ءُ جھد ءَ جیڑہ ھلاس نہ بنت ورنا اشی ءَ گستا بہ بنت ما آئی ءَ یاداشت کن ایں کہ اے جد ءَ جھد دگ ءُ گٹرانی سپاھی ءَ نہ اِنت بلکیں یک جوانیں منگھے ءِ رنگ ءَ بیگ ءَ اِنت اشی ءِ واستا بلوچانی ھزاراں پسگاں وتی کربانی داتگ اَنت اے جماعت اسلامی یا دومی پارلیمانی ٹولیانی رنگ ءَ دپار ءُ بلدیاتی نزام ءَ دگانی سپائی ءِ واستا جانانی کربانی ءَ دیگ ءَ نہ اَنت-

ڈاکٹر اللہ نزر بلوچ ءَ گوشتگ “ھک دو بلوچستان ” ءِ نام ءَ مولانا ءِ ھمراہ اِنت بلے آئی ءَ اے واک نیست اِنت ھک ءَ بہ منت کہ بلوچاں توپک ءِ چست کنگ ءُ سلاہ بندیں جھد ءَ دور کنگ ءَ درس ءَ بہ دنت – اے بلوچانی بنکی ءُ انسانی ھک اِنت آ وتی آجوئی ءِ واستا ھرچ وڑیں جد ءُ جھد ءِ رنگ ءَ گچین بہ کن اَنت-

بلوچ رھشون ءَ گوشتگ کہ جماعت اسلامی ءِ درگت ءَ بلوچ ھچ رنگ ءَ رد پھمی ءِ آماچ نہ اَنت اے رنگ ءَ زوت جماعت اسلامی بلوچانی دیم دارگ ءِ واستا کیت اِنت مارا اے گمان نہ بوتگ بلے شر بوت کہ جماعت اسلامی بے سبری ءِ آماچ بوت نی بلوچ گیش آئی ءِ پنجگ ءَ رک اَنت اے مردم “الشمس ” ءُ “البدر ” ءِ پیداگ کتگیناں – مولانا مودودی ءَ بگر داں سراج الحق ءَ، اے درست ریاست ءِ پیداگ کتگیں شاہ اَنت ریاست آیاں زلورت ءِ وھد ءَ کامرد کنت ھنچش ضیاء الحق ءَ کارمرد کتگ اَنت، ھمے رنگ ءَ بازیں سرکاراں وتی وھدانی ڈول ءَ کارمرد کتگ اَنت بلوچ راج ءَ اے وڑیں دو تل ءُ پوستیں مردماں چہ شیوار بیگ لوٹ ایت اشانی راستیں چھرگ ءِ پدر کنگ سجوئیں مردمانی پرز اِنت-

زورانسری آوار جنگ بوتگیں بیگواھیں بلوچانی کھولاں رسانکدراں وتی شنگ کرتگیں درشان ءِ تہ ءَ گوشتگ کہ سِی اگست ءَ سرجمیں دنیا ءَ زورانسری آوار جنگ بوتگیں مردمانی روچ دارگ بیت اِنت – اے روچ ءِ دارگے مول مراد ھمیش اِنت کہ زورانسری آوار جنگ بوتگیں مردمانی درد ءُ اندوہ، دلسیاھی ءُ زوراکی دنیائے دیم ءَ پیشدارگ بہ بنت تانکہ سرجمیں دنیا سرپد بہ بیت کہ زورانسری آوار جنی ءِ آماچ بوتگیں مردم کجام جاورھال ءُ دلسیاھیانی دیمپان انت –

آھاں دیمتر ءَ گوشتگ کہ ھمے وڈا اے دمگ ءِ تہ ءَ دومی راجاں ھوار ھوار بلوچ ھم بازیں سالاں زورانسری آوارجنیانی آماچ بوان انت – زورانسری آوار جنگ بوتگیں مردماں ھوار آھانی کھول ھم بازیں ماژگی، جانی دلسیاھی ءُ ازیتانی تہ ءَ گوزگ انت – ما ھم یکشل ءَ وتی دوستیگیں مردمانی یل کنائینگے ھاتر ءَ درسیں کانودی ءُ رھبندی راھاں گچین کنگ ءَ اِنت بلے تنی وھدی ھزارانی کچ ءَ مئے مردم زورانسری آوارجنی ءِ آماچ انت –

آھاں وتی درشان ءِ گڈسر ءَ گوشتگ کہ مارا سِی ءُ ھشت روچ انت کہ وتی دوستیگیں مردمانی یل کنائینگ ءِ ھاتر ءَ شال ءَ سروزیر، گورنر، چیف جسٹس کارگس ءِ دیم ءَ نندانک جتگ ءُ نشتگ بلے ھرام انت واکداران ھوار سرکاری نمائندگانی پرک ءِ بہ بیت ءُ ناکہ آھاں مئے درد ءُ اندوہ ءُ دلسیاھیانی پرواہ بہ بیت – ما وتی زھرشانی ءَ ھمے وڈ برجاہ داران ءَ سِی اگست ءَ بزاں زورانسری آوار جنگ بوتگیں مردمانی میاں استمانی روچ ءِ درگت ءَ زھرشانی نندانک ءِ سر ءَ مراگش ءِ برجم دارگ انت کہ اودا سیاستدان، کانودان، اھوالکار ءُ زانتکاران ھوار ھر تک ءُ پھناتاں سیادی داروکین مردم وتی ھیالانی درشانی ءَ کن انت –