TBP Balochi

بلوچ یکجہتی کمیٹی اسلام آباد ءَ زورانسری بیگواھی ءِ سانمندیں مردمانی جھانی روچ ءِ درگت ءَ نیشنل پریس کلب اسلام آباد ءِ دیما زھرشانی کُتگ۔ زھرشانی ءَ سیاسی و چاگردی مردماں بھرزرتگ کہ آودہ درانگاز کنوکاں بیگواھیں بلوچ مردمانی پھازیتگیں یل کنائینگ ءُ اے گیر انسانی جرم ءِ ھلاسی ءِ لوٹ کُتگ۔

سیاسی ءُ انسانی ھقانی باسک افراسياب خٹک ءَ تران کنان ءَ گُشتگ کہ ما ھم پاکستان ءَ یک رھبند ءِ ردءَ نشتگ اِنت رھبند کہ آئی تہءَ مردمانی ھق، چاگردی ھق ھوار اَنت بلے اپسوزیگ گپ اِنت کہ پاکستان ءَ رھبند ءِ سرءَ گامگیج زیرگ نہ بیت اِنت اے نوکیں ھبرءِ نہ اِنت، من ءَ یات اِنت کہ 1976 ءَ، من نیشنل عوامی پارٹی ءَ بیتگ اَنت 1975 ءَ نیپ ءِ سرءَ بندش جنگ بیت آ وھدءَ بلوچستان ءَ درستاں اولی بیگواھیں مردم اسد مینگل اَت، 1977 ءَ، من نواب خیر بخش مری، سردار عطااللہ مینگل زندان ءَ بیتگ اِنت گُڑءَ مارا ھمودءَ گُشگ بیت کہ اسد مینگل زندگ نہ اِنت ءُ ھما وھدءَ چہ بگر داں مروچی مردمانی بیگواہ بیگ ءِ یکشلی برجاہ اِنت۔

آئی ءَ گُشتگ من ڈیھہ پُرشگ ءَ دستگ اَنت، من پاکستان ءَ پُرشگ ءَ دستگ، بنگالیانی سرءَ زلم ءُ زوراکیانی کوہ پروشگ بیتگ اَنت گُڑءَ آ جتا بیگ ءَ لاچار بیت اَنت۔ اگں پاکستان ءِ آمیدگس، پارلیمنٹ ءُ واکدار بزگیں راجاں انساپ دات نہ کن اَنت گُڑءَ اِشی بزانت ھمیش اِنت کہ ادا رھبندی ریاست کا نظام ھلاس بیتگ ءُ اے آئی مرگ ءِ جار اِنت۔

افراسیاب دیمترءَ گُشتگ کہ گوستگیں سرکاراں گُشتگ “بیگواھیں مردماں بیگواہ کنوک جرمکار اَنت” ءِ بل بنجاھی اسمبلی ءِ گورءَ روگ ءَ پیسر چہ سینٹ ءَ گار بیتگ، من ءَ گمان اِنت کہ اے ملک ھم گار مہ بیت۔

آئی ءَ گُشتگ کہ مروچی ما بیگواھیں مردمانی جھانی روچ ءِ درگت ءَ اے لوٹءَ کنیں کہ پاکستان ءِ چیریں گلانی سرءَ ءُ ھاس آئی ایس آئی ءِ بگیر ءَ رھبند اڈ کنگ بہ بیت، آ مردماں ابید قانود چِست کن اَنت۔ گورنر ہاؤس شال ءِ دیما کہ ھمے بیگواھیں مردمانی کھول نشتگ اَنت ما آھانی گوما ھم یکجاھی درشان کنیں ءُ آھانی پجیگ ءَ اوشتوک اِنت، من ءَ اپسوز اِنت کہ بلوچ وانندگیں ورناھاں نشانگ کنگ بئیگ ءَ اِنت، لالا فہیم ءِ پئیمیں کتاب چاپ کنوکیں ورناہ زورانسری بیگواہ کنگ بیتگ۔

آئی ءَ گُڈسرءَ گُشتگ کہ بلوچ، پشتون ءُ سندھی کجام ھم دروشمءِ غلامی کنگ ءَ ساڑی نہ اَنت ۔ بلوچ، سندھی ءُ پشتون نسل کشی بند کنگ بہ بیت۔ دومی راجانی شرپ کنگ مہ بیت گُڑءَ شما 1971 والی ءِ کسہ ءَ پدءَ نوک کن اِت۔

نبشتانک: کتابانی مھروان پوسٹر بوان اَنت

نبشتہ کار: سیپ بلوچ

دی بلوچستان پوسٹ

دگنیا ءِ تہ ءَ یک انسانے ءِ درور یک هالی ئیں تاکے ءِ دْروشم ءَ اِنت ، وهدے انسان پیداک بیت ،چہ وتی مات ءَ زبان ءِ دربرگ ءَ رند آ وانگ جاه ءَ دیم دیگ بیت کہ زندگی ءِ دود ءُ رهبند ءُ دگنیا ءَ چہ کتاب وانان کن اَنت بنی آدمان جلگهیں دنیا ءَ آشناه بہ بیت بلے دنیا ءِ چشیں ملک ساڑی ئیں وهد ءَ تئی نزر ءَ نہ ایت کہ آ ملک ءَ ترا کتاب ءُ کتابجاهانی روگ ءَ بہ ترس ایت ، بلے یک راجے ما اِنت کہ ما کتابجاهانی نزیک ءَ روگ ترس ایں ، اگاں مئے دستا کتابے بہ بیت ما چست کنگ بہ ایں جنگ ءَ کوشگ بہ ایں، نوالیس جاهے گوش ایت کہ کتاباں چہ سریچیں لائبری هما جاه اِنت کہ ما کرناں چہ گوستگیں دانش وریں ءُ کواسیں مردماں آجوئی ءَ گون گوست ئِے شری ءُ هرابیانی سر ءَ گپ کت ایں ، کہ آیانی زند ءُ کرد چے بوتگ آیاں وتی زندگی کجام دروشم ءَ گوازینتگ-

بیست ءُ یکمی کرن ءِ تہ ءَ ھستیں بنی آدمانی لڑ ءَ اوشتاتگیں ما اوں یک راجے ئِے کہ مئے ، راج ءِ تہ ءَ زانتکار کواس ، رهشون ، وتی کدمانی ایر کنگ ءَ ساری بیگواه کنگ بیتگ انت، جرم بس یکین اِنت لبزانک ساچست ءُ کتاباں چہ الم ءُ گلامی ءِ سکین اش در برتگ چہ کتاباں وتی راج گلامی ءِ سانکلانی سدگ ءِ گپ اش جتگ-

الولس گیلیوس جاگهے گوش ایت کہ کتاب بے تواریں اُستاد اَنت هنچش (گورچ فوک )ءِ گوشتن ئیگ ءَ کہ شریں کتاب آ نہ انت کہ مئے گژن ءَ هلاس بہ کنت شریں کتاب هما انت کہ مارا گژنگ بہ کنت زندگی ءِ دربرگ ءِ گژن ءَ بہ دنت ، ما کتابانی گژنگ اِنت ما چہ ریاست ءَ نان آپ نہ لوٹ ایں مارا زندگ بوگ ءِ واستا زندگی ءِ ازگاریں اهد پولگ لوٹ ایت ءُ وانگی انت ، مئے دیار ءَ دمک ءُ بازاراں کتاب ءُ وانگ جاهانی جاگہ ءَ بنجل جوڑ کتگ اَنت، کتاب چاپ کنوک اُستاد دانشور رهدربر گار ءُ بیگواه کتگ اَنت-

اگاں ما وتی چمانی نگاهاں کار بہ بندیں مرچی لالا پهیم بیگواه نہ اِنت ، مرچی بلوچ ءِ هما امیت بیگواه اِنت کہ دو هزار ءُ نوه ءَ بلوچستان ءَ بیگواه کنگ بوتگ اَت ، بلوچستان نمیران بوان اِنت مردمانی بچکند پوسٹرانی تہ ءَ گار بوان اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ پرگینگ شال ءِ ریڈ زون ءَ بیگواھیں بلوچ مردمانی کھولانی نیمگ ءَ سیمینار ءِ اڈ دیگ بیتگ۔ سیمینار جھانی زورانسری بیگواھی ءِ سانمندیں مردمانی روچ ءِ درگت ءَ برجاہ دارگ بیتگ۔

سیمینار ءَ سنیئر سیاستدان پیسرگیں سینیٹر نوابزادہ حاجی میر لشکری خان رئیسانی، سمی دین بلوچ، عوامی نیشنل پارٹی ءِ پرگینگی صدر ءُ بلوچستان اسمبلی ءَ پارٹی ءِ پارلیمانی رھشون اصغر خان اچکزئی، سپریم کورٹ بار ایسوسی ایشن ءِ پیسرگیں صدر علی احمد کرد ایڈوکیٹ، سپریم کورٹ بار ایسوسی ایشن ءِ پیسرگیں صدر ءُ پیسرگیں سینیٹر کامران مرتضیٰ ایڈووکیٹ ءُ پروفیسر منظور بلوچ ءَ بھر زرتگ وھدیکہ سیمینار ءَ گوں نیشنل ڈیمو کرٹیک موومنٹ ءِ سروک محسن داوڑ، پی ٹی ایم ءِ سروک منظور پشتین ءُ نامداریں اھوالکار محمد حنیف بلوچ ءَ آن لائن تران کُتگ۔

سنیئر سیاستدان ءُ پیسرگیں سینیٹر نوابزادہ حاجی میر لشکری خان رئیسانی ءَ بیگواھیں مردمانی کھولءَ ستاشانی درشان کنان ءَ گُشتگ کہ بیگواھیں مردمانی کھول ءَ سلام پیش کناں کہ آھاں وتی جھد ریڈ زون ءَ آورتگ، آ بازیں سالاں چہ وتی دوستیگانی یل کنائنگ ءِ ھاترءَ جدوجھد کنگ ءَ اَنت آ یک روچے الم سوبمند بیت، ھما مات ءُ گھار چہ سالاں زھرشانی کنگ ءَ اَنت آھانی کمک کنگ انسانیت ءُ اخلاقیت ءِ لوٹ اِنت۔

آئی ءَ گُشتگ کہ چِل روچاں چہ بیگواھیں مردمانی کھول ریڈ زون ءِ دیما نشتگ اَنت سر وزیر ءُ گورنر ھاؤس چہ اِدا چِل گامانی سرءَ اِنت اِشی بزانت اِش اِنت کہ اے لس مھلوکانی جھگیر نہ اَنت آھانی سرءَ زور آرگ بیتگ اَنت پمیشکہ داں اِدا اتک نہ کن اَنت۔

آئی ءَ گُشتگ کہ 1973 ءَ رھبند اڈ کنگ بیتگ کہ اِشی سرءَ 2010ء پدءَ چمشانک دیگ بیتگ اے رھبند ءِ تہءَ ھم بُنکی ءُ مردمی ھقانی ٹِک ھوار اَنت بلے بلوچستان ءَ مردمی ھقانی چارٹر ءُ نانکہ رھبند ءِ سرءَ گامگیج زیرگ بئیگ ءَ اِنت۔ آئی ءَ گُشتگ پرگینگ ءِ آسراتیانی لُٹ ءُ پُل ءِ بلوچستان اسمبلی ءِ پیسلہ ءَ ھچ بر نہ من ایں، بیگواھیں مردم دیما آرگ ءُ آمید گسانی تہءَ پیش کنگ بہ بنت۔

آئی ءَ گُشتگ کہ من سیاست ءِ نام ءَ تاگت ءَ اتکگیں، سیاست ءِ نام ءَ ٹھیکیداری کنوک ءُ وتی سیاست ءَ بھا کنوکیں انیگیں سرکار ءَ مھلوک ءِ سر ءَ آروکاں چہ نہ بلکینہ راستیں سیاسی جھدکاراں چہ دزبندی کناں کہ آ اے نندانک ءَ بیا اَنت ءُ مات ءُ گھارانی گومءَ ھمراھداری بہ کن اَنت۔

عوامی نیشنل پارٹی ءِ پرگینگی صدر و بلوچستان اسمبلی ءَ پارٹی کے پارلیمانی رھشون اصغر خان اچکزئی ءَ گُشتگ اے وھدءَ کہ ھما تاریخ نبشتہ کنگ بئیگ ءَ اِنت اِشی یک یک دمان ءِ تاریخ ءِ تہءَ نبشتہ کنگ بیت اِنت یک یک گھار، زھگ، مات، برات، پِت سیاسی باسکانی کرد تاریخ ءَ یات کنگ بیت اِنت۔

آئی ءَ گُشتگ کہ من سوگند کناں کہ کجا ھم کدی ھم پد منتگیں ءُ بزگیں راجانی ھاترءَ توار چِست کنگ کپت گُڑءَ ما چِست کنیں۔

سپریم کورٹ بار ایسوسی ایشن ءِ پیسرگیں صدر علی احمد کرد ایڈوکیٹ ءَ گُشتگ کہ ملک ءِ درستاں مستریں جیڑہ بیگواھیں مردمانی یل کنائنگ اِنت۔

سپریم کورٹ بار ایسوسی ایشن ءِ پیسرگیں صدر ءُ پیسرگیں سینیٹر کامران مرتضیٰ ایڈووکیٹ ءَ گُشتگ کہ بیگواھیں مردمانی کھول چہ ھما درد ءُ اندوھاں چہ گوزگ ءَ اَنت اِشی ترندی ءَ دگہ کس مار اِت کُت نہ کنت۔ آئی ءَ کھولاں باوری داتگ کہ آ کھولاں ھمک پئیمیں قانودی کمک دنت اِنت۔ آئی ءَ گُشتگ کہ مردمانی بیگواھی رھبند ءُ قانود ءِ لگتمالی اِنت ۔ درستیں بیگواھیں مردم دیما آرگ ءُ آمید گسانی تہءَ پیش کنگ بہ بنت۔

پروفیسر منظور بلوچ ءَ گُشتگ کہ مروچی مئے مات، گھار ءُ زھگ چلتن ءِ پئیمءَ مھکمی ءَ گوں اوشتاتگ اَنت بلے مئے پاٹی، لیڈرشپ، سردار، نواب، پروفیسر، زبانزانت آ درست صفر جوڑبیتگ اَنت۔ اے آھانی نزوری ءِ چیدگ اِنت کہ مروچی ما چار راھانی سرءَ نشتگ اِنت ءُ کس مارءَ جُست کنوک ھم نیست۔

منظور بلوچ ءَ گُشتگ کہ بیگواھیں مردمانی کھولانی تھنا یک لوٹ اِنت کہ آھانی دوستیں مردم یل کنگ بہ بنت۔ بلوچ راج ءَ بزگ ءُ پدمنتگیں راجانی ھاترءَ بیوکیں جھدانی تہءَ مدام اولی صف ءِ کردار پیلو کُتگ بلے مروچی آھانی ھاترءَ کس توار چِست کنگ ءَ نہ اِنت۔

آئی ءَ گُشتگ کہ راجدوستیں گل کہ ھما جمہوریت ءِ نام ءَ گرگ ءَ اَنت ھمے جمہوریت ءِ تہءَ مئے مات، گھار ءُ زھگ گوستگیں چِل روچاں چہ ریڈ زون ءِ دیما نشتگ اَنت بلے کس آھانی ھال پرسی ءَ ھم نہ اَتکگ۔

سمی دین بلوچ ءَ گُشتگ کہ ریڈ زون ءَ برجاھیں ننداک ءِ نیام ءَ جتاھیں وفداں اتکگ ءُ گپ رَپ کُتگ بلے آھانی آسر بے سوب بیتگ اَنت، مئے پر جزبگ اِنت وتی لوٹانی منارینگ ءَ داں ننداک ءَ برجاہ دار اِنت۔

آئی ءَ گُشتگ کہ مئے مردم بازیں سالاں چہ بیگواہ اَنت مئے درد مارگ بہ بیت۔، گیشتر وتارءَ درد آماچ کُت نہ کنیں ما سرکار ءَ چہ تھنا وتی دوستیگانی یل کنگ ءِ لوٹ کنگ ءَ اِنت۔

آئی ءَ لوٹ کُتگ کہ بنجاھی تکءَ بیگواھیں مردمانی درگت ءَ سینیٹر اعظم نذیر تارڑ ءِ مستری ءَ اڈ بیتگیں کمیٹی ءِ وفد بلوچستان ءَ بیا اِت ءُ بیگواھیں مردمانی کھولاں گوں گند ءُ نند بہ کنت ءُ آھانی جیڑھانی درگت ءَ سرپدی بہ زیر اَنت۔

ایشیا کپ ٹی ٹوئنٹی ٹورنامنٹ ءَ اوگانستان ءَ نجیب اللہ زادران ءِ گرمیں بیٹینٹگ ءَ بنگلا دیش ھپت وکٹاں پروش داتگ ءُ سپر فور ءِ واستا کولیفائی کتگ-

اوگانستان ءَ بنگلادیش ءِ یک سد ءُ بیست ءُ ھشت رن ءَ نوزدہ آورانی تہ ءَ سَے وکٹانی تاوان ءَ سرجم کتگ اَنت – نجیب اللہ زادران ءَ شش چکاھانی کمک ءَ ھبدہ بالاں چل ءُ سَے رن جوڑ کرت ءُ پروشی ءِ دیمپان کت-

شارجہ کرکٹ اسٹیڈیم ءَ برجاھیں گوازی ءَ بنگلادیش ءِ کپتان شکیب الحسن ٹانس اول سر ءَ کٹ اتگ ءُ بینٹگ ءِ پیسلہ کتگ-

بنگلادیش ءَ ھستیں بیست آوراں ھپت وکٹانی تاوان ءَ یک سد ءُ بیست ءُ ھپت رن جوڑ کتگ مصدق حسین ءَ جوانیں رنگے ءَ گوازی کتگ ءُ چل ءُ ھشت رن جوڑ کرتگ-

بلوچ نودربر گل آزاد ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچستان ءِ سر ءَ کبزہ کنگ ءَ بگر تاں روچ مروچی پاکستان یکشل ءَ انسانی ھکانی لگتمالی ءَ کنان ءُ پیداک انت ءُ اے کارانی تہ ءَ روچ پہ روچ ھمینچو گیشی آرگ بوتگ کہ بلوچستان ءَ انسان نیستی ءِ ترس ءِ ودی بوگ ءَ انت –

بی ایس او آزاد ءِ جارکش ءَ گوشتگ کہ پاکستان ءَ مرچی ءَ چہ کساس ھپت دھک ءَ پیش بلوچستان ءِ سر ءَ کبزہ کتگ ءُ چکچینی ءِ ھنچیں درچ ءِ بندات کتگ کہ وڈ وڈا کنان ءُ تاں اے جاہ ءَ اتکگ ءُ سربوتگ کہ ھر تک ءُ پھناتاں سیادی داروکیں مردم اے زوراکیانی آماچ انت – بلوچستان ءِ تہ ءَ پاکستان ءِ زلم زوراکی بید زد ءُ کُنت ءَ برجاہ انت کہ چریشی ءِ سوب ءَ مروچی ھزارانی کچ زھگ، زالبول، کماش ءُ ورنا ریاستی زنداناں بندیگ انت ریاستی ادارہ ھمک روچ لس مھلوک ءُ سیاسی باسکاں آوار جنگ ءَ انت ءُ سالاں سال بندیگیں بیگواھیں بلوچانی جونانی چگل دیگ ھمک روچی کارے جوڈ بوتگ – ریاست ءَ وتی زوراکیاں برجاہ داران ءَ یک وھدے ءَ گونیانی تہ ءَ جون بند کتگ ءُ چگل داتگ انت برے برے چار راھانی سر ءَ ورنا کُشتگ انت ءُ مرچاں نوکیں داب ءَ بازیں بیگواھیں مردمے دروگیں میڑ نام ءَ کُشگ ءُ چگل دیگ انت –

آئی ءَ گوشتگ کہ پاکستان بلوچستان سر ءَ وتی زورگیری ءِ گیش کنگے ھاتر ءُ بلوچ ءِ مال ءُ مڈیانی لٹ پُل کنگے ھاتر ءَ وڈ وڈا تاکت کارمرز کنگ ءَ انت ءُ ھمے تاکت ءِ کارمرز کنان ءَ انسانی ھکانی لگتمالی بوان انت – میان استمانی انسانی ھکانی ادارھاں وتی چم بستگ انت – مھزبیں دنیا ءَ میان استمانی ادارھانی ھچ نگوشگ ءَ پاکستان چدوگیش موہ رسگ انت ءُ چریشی ءَانسانی ھکانی لگتمالی تہ ءَ گیشی آیگ ءَ انت –

بی ایس او ازاد ءِ جارکش ءَ وتی درشان ءِ گڈسر ءَ گوشتگ کہ میان استمانی ادارہ بلوچستان ءِ جیڑھ ءَ سنگینی ءَ گون بہ چار انت ءُ بلوچستان ءَ جنگ زدہ ءِ دمگ ءِ بگوش انت ءُ زورانسری آوارجنی ءُ چکچینی ءِ سر ءَ پاکستان لوٹارینگ بہ بیت – میان استمانی ادارھانی ھچ نگوشگ ءَ بلوچستان ءِ تہ ءَ انسان نیستی ءِ سوب جوڈ بوت کنت کہ پدردیے –

ھیومن رائٹس کمیشن آف پاکستان (ایچ آر سی پی) ءَ زورانسری بیگواھی ءِ آماچیءِ سانمندیں مردمانی جھانی روچ ءِ ردءَ شنگ کُتگیں درشانے ءِ تہءَ ھمے زیتاں زورانسری بیگواھی ءِ آماچ بیتگیں بلوچ نبشتہ کار ءُ چاپ کار فھیم بلوچ ءِ یل کنگ ءِ لوٹ کُتگ۔

ایچ آر سی پی ءِ چیئرپرسن حنا جیلانی وتی شنگ کُتگیں درشانے تہءَ گُشتگ کہ زورانسری بیگواھی ءِ آماچیءِ سانمندیں مردمانی جھانی روچ ءِ درگتءَ، ھیومن رائٹس کمیشن آف پاکستان (ایچ آر سی پی) بنجاھی سرکار ءَ چہ لوٹ کنت کہ آ اے گپ ءَ باوری بہ کن اَنت کہ سینیٹ پوجداری قانود (بدلی) بِل 2022 ءِ سرءَ چار ءُ بیچار ءِ وھدءَ سول سوسائٹی ءَ سیادی داروکیں درستیں تک ھاسیں پئیم ءَ بلوچستان، سندھ، جنوبی پنجاب ءُ خیبرپختونخواہ ءَ سیادی داروکاں گوں اھوال کن اَنت ءُ آیانی گوما شوربندی کنگ بہ بیت۔ چُشیں درستیں گمان دیر کنگ بہ بنت کہ سانمندیں کھولاں زورانسری بیگواھی ءِ وئیل ءَ رپورٹ کنگ ءَ چہ تُرس آماچ کن اَنت، کہ اِشی تہءَ اے ٹِک ھم است کہ “وتگڑیں” ارزی نبشتہ کنوکاں پنچ سالاں دان بندی کنگ ءِ سزا بیت اِنت۔

آئی ءَ دیمتر ءَ گُشتگ کہ چُشیں استانی ایجنسیزانی لس چارگ ءُ ٹپاسگ ءِ گامگیج آرگ بہ بیت ھما کہ زورانسری بیگواھیانی تہءَ پدری ءَ ھوار اَنت۔ اسلام آباد مزن آمید گِس ءَ 2022 ءَ چہ پیسر گُشتگ وھدیکہ ترندیں منانکاں گوں گندگ بہ بیت کہ زورانسری بیگواھی ءَ وئیل دیما اتکگ گُڑءَ ڈیھہ بیگواھیں مردمانی درگیجگ ءِ پابند اِنت۔ آمید گِس ءَ اے ھم گُشتگ کہ بیگواھیں مردمانی پھازگ ءُ آیانی درگیجگ ءِ زمہ واریں ریاستی اگدہ دار اگں وتی زمہ واری ءِ پیلو کنگ بے سوب بہ بنت گُڑءَ آیانی بگیر ءَ گامگیج زیرگ بہ بیت۔

آئی ءَ دیمتر ءَ گُشتگ کہ چریشی ءَ اے ھم پدر بیگ لوٹیت کہ جاور ھال کجام ھداں داں سنگین اَنت ءُ پاکستان یک چشیں سنگینیں جیڑہ یے ءَ چہ درکپگ ءِ ھاترءَ دردناکیں پئیمے ءَ سستی ءِ درشانی کنگ ءَ اِنت کہ اِشی ءَ میان اُستمانی تکءَ انسانیت ءِ بگیر ءَ جرم لیکگ بیت اِنت۔ پمیشکہ، پاکستان ءَ زورانسری بیگواھیاں چہ درستیں مردمانی پھازگ ءِ کنونشن منگ ءُ اے پیش دارگ لوٹیت کہ آ زورانسری بیگواھیانی ھلاس کنگ ءِ ھاترءَ گامگیج زیرگ ءَ اِنت۔

حنا جیلانی ءَ گُڈ سرءَ گُشتگ کہ ھمے زیتاں کراچی ءَ سیادی داروکیں یک چاپ کار ءُ نبشتہ کار فھیم بلوچ کو پولیس ءِ ھمراہ ‘ناشناسیں’ مردماں گمانی پئیم ءَ دزگیر کُتگ۔ آئی کھول ءَ ردءَ آئی ڈس ءِ درگت داں انگت آھاں ھچ سرپدی نیست۔ آئی ءَ لوٹ کنان ءَ گُشتگ کہ بیگواھیں فھیم دیما آرگ بہ بیت ءُ آئی ءَ دلجمی ءَ قانودی کاروائی ءِ ھق باوری کنگ بہ بیت۔

ھاش ءَ سلاہ بندیں مردماں تیرگواری کرتگ ءُ یک مردمے کشتگ-

گیشیں ھالانی رد ءَ روکپتی بلوچستان ءِ دمگ ھاش ءَ ناشناسیں سلاہ بندیں مردماں تیرگواری کرتگ ءُ یک مردمے کُشتگ-

کشگ بیتگیں مردم ءِ پجار عبدالمتین یاراھمدزھی جھمنند ھاش ءِ نام ءَ زانگ بیتگ-

ھالانی تہ ءَ گوشگ بیتگ ھاش ءَ چہ چل کیلو متر دور سلاہ بندیں مردماں تیرگواری کرتگ ءُ عبدالمتین کشتگ، کوش ءِ سبب زانگ نہ بیتگ ءُ تیرگواری کنوک تچگ ءُ روگ ءَ سوبمند بوتگ اَنت-

روکپتی بلوچستان چوشیں وئیل ھمک روچ پیش آیگ ءَ اَنت چریشی ءِ سبب ءَ بازیں کچے ءَ مردم بیران ءُ زدگ بیگ ءَ اَنت بلے آیانی کوشکار ءُ دینکار تنی وھدی گرگ نہ بیتگ اَنت-