TBP Balochi

بلوچستان ءِ ضلع کلات ءَ تُرندیں ھوراں چہ آؤکیں توپان ءَ اسرکپتگیں مردماں کمکی مڈی نہ سرگ، شھر لین، گیس آپ نہ بوگ ءَ سبب ءَ شال کراچی شھدگ سر ءَ زھرشانی ئیں نندانک جتگ-

توپان ءَ اسرکپتگیں مڈیانی بھر ءُ بانگ ءِ وڑ لین، آپ ءُ گیس دراجیں لوڈشیڈنگ ءِ بگیری ءَ منگچر ھند ءَ زھرشانی کتگ شال کراچی ءَ راجی شھدگ بند کتگ اِت، اسرکپتگیں سُھب یازدہ ءَ نندانک داتگ اِت شال کراچی راجی شھدگ جوھان کراس بازار ھند ءَ بند کنگ بوتگ-

زھرشانی کنوکانی گْوشگ اِنت کہ دو ھپتگ ءَ گیش اِنت لین ءِ یکشلہ بند بوگ ءَ شھر ھمکروچی زندگی سک تکانسر اِنت لین بند کنگ ءَ چہ آپ ءِ تنگی ھم گوں تُرندی بوگ ءَ اِنت- شال شھر ءَ آپ ءِ یک ترمپ ترمپے ءَ تلوسگ ءَ اَنت کہ یک انسانی دردناکی ءَ کم نہ اِنت-

اسرکپتگین ءَ اے بھتام جتگ کہ انتزامیہ نیمگ ءَ چہ توپان ءَ اسر کپتگیں کمکی مڈیانی بھر ءُ بانگ ھم وتی مردم ءُ وتمستری کنگ ءَ اَنت راستیں اسرکپتگیں ڈال چار کنگ ءَ اَنت ءُ کمکی بنیاد ءَ بھر کنگ ءَ اَنت-

زھرشانی کنوکاں شھر ءَ لین، آپ، گیس ءِ پچ کنگ ءُ پُجارینگ ءِ باور کنائینگ ءِ ھمراھی ءَ توپان ءَ اسرکپتگین ءَ شریں وڑے ءَ کمک کنگ ءِ لوٹ کتگ-

راجی شھدگ ءِ سر ءَ نندانک سبب ءَ دوئیں نیمگاں مزنیں کچے ءَ گاڑی ءُ مساپر پس اِتگ اَنت چریشی ءَ پد دمگی انتزامیہ ءُ زھرشانی کنوکانی گپ ءُ تران ءَ پد نندانک ھلاس کتگ ءُ روگ ءُ آھگی پچ کنگ بوتگ-

بلوچستان ءِ بنجاھی شھر شال ءَ ریڈ زون ءَ برجاھیں بیگواھیں مردمانی کھولانی نندانک ءَ چِل ءُ دو روچ سرجم بوتگ انت، آدینگ ءِ روچ ءَ دگ ءِ بند کنگ ءِ جار پرینگ بوتگ –

زیارت ءِ وئیل ءَ پد گورنر کارگس ءِ دیم ءَ ریڈ زون ءَ برجاھیں بیگواھیں مردمانی کھولانی نندانک ءَ چِل ءُ دو روچ سرجم بوتگ انت، نندانک ءَ نشتگیں درنگاز کنوکاں جار پرین اتگ کہ سرکار مئے جائزیں لوٹانی منگ ءَ سنجیدگ نہ انت پمشکا ما لاچار ایں کہ پونشی بزاں آدینگ ءِ روچ ءَ ادار دہ ءَ جی پی او چار راہ ءُ سرینا چار راہ ءِ دگ بند بہ کن ایں ھچ وڑیں ایمرجنسی ءِ واستا ھم دگ پچ کنگ نہ بیت اِنت –

آھانی گوشگ ات کہ ما چہ مھلوک ءَ لوٹ کن ایں کہ اے روچ ءَ جھد بہ کن انت کہ دگہ راھے ءَ بہ رو انت اگاں چریشی ءَ لس مردم دلسیاہ بنت گڑا اشی ءِ زمہ دار سرکار انت کہ وتی شھرے مردمانی جائزیں لوٹانی گوشدارگ ءُ منگ ءَ بے سوب بوتگ –

بیگواھیں مردمانی کھولاں درسیں سیاسی پاٹیانی رھشون ءُ باسکاں چہ لوٹ کتگ کہ گوں ما ھمراہ داری بہ کن انت –

مروچی زھرشانی نندانک ءَ نیشنل پاٹی ءِ جنرل سیکٹری جان محمد بلیدی، سوبائی سرکماش رحمت بلوچ گوں دگہ ھمراھاں زھرشانی نندانک ءَ اتکگ انت ءُ دلپدردی ءِ درشان اتگ – آھاں باور کنائینتگ کہ آ زورانسری آوارجنی جیڑہ ءُ بیگواھیں مردمانی کھولانی گوم ءَ ھر وڑیں کمک ءُ توار چست کنگ ءَ آھانی ھمراہ انت –

چہ کراچی ءَ پاکستان ءِ پھازگی لشکر ءَ بلوچ ورنایے زورانسری آوار جتگ بیگواہ کتگ –

سربوتگیں ھالانی رِد ءَ دو روچ ساری پوج ءَ کراچی ءِ دمگ لیاری سرگوات کلری ءَ گِس ءِ سر ءَ بیڑ برتگ ءُ خدابخش ء ڈاکٹر عبدالغفور نامی ورنایے زورانسری آوار جتگ ءُ گوں وت برتگ –

اے وئیل دوشمبے ءِ شپ ءَ بوتگ کہ تنی وھدی ورنا دیم ءَ آرگ نہ بوتگ –

دمگی اھوالکار ءِ رِد ءَ پوج ءِ دست ءَ آوار جنگ بوتگیں ورنا خدابخش بلوچستان ءِ تیاب دپی دمگ گوادر ءِ نندوک انت ءُ آ یک آرٹسٹ یے – خدابخش ءِ کھول ءِ رِد ءَ آ پہ ارزی نبشتہ کنائینگ ءَ پولیس تانہ ءَ شُتگ انت بلے پولیس ءَ ارزی نبشتہ کنگ ءَ مکن کتگ –

زانگ بہ بیت کراچی، بلوچستان ءَ ھوار پاکستان ءِ دگہ دمگاں زورانسری آوار جنی ءِ ھال ھمک روچ آھگ ءَ انت ھمے ھپتگ آدینگ ءِ روچ ءَ کراچی ادبی اردو بازار ءَ پولیس ءُ لس پوشاک گوریں مردماں الم ءُ ادب شنگکار منیجر فہیم بلوچ آوار جتگ ءُ گوں وت برتگ کہ ھنگت گار انت ھمے سال ءَ اپریل ءِ ماہ بگر تاں اگست ءَ سَے سد بلوچ زورانسری آوار جنگ ءُ بیگواہ کنگ بوتگ انت –

زورانسری آوار جنگ بوتگیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ سرکماش نصراللہ بلوچ ءِ رِد ءَ زورانسری آوار جنیانی درچ یکشل ءَ برجاہ انت ھمے سال ءَ اپریل ءِ ماہ کراچی شھدربرجاہ ءَ تراک پد زورانسری آوار جنیانی تہ ءَ گیشی اتکگ –

نصراللہ بلوچ ءِ رد ءَ اپریل ءَ بگر تاں مروچی کساس سَے سد مردم زورانسری آوار جنگ بوتگ انت کہ آھانی تہ ءَ گیشتریں کچ کراچی ءِ نندوکیں بلوچانی انت –

سربوتگیں ھالانی رِد ءَ بلوچستان ءِ دمگ کلات ءَ ناشناسیں مردماں ٹیل ءُ گیش شوھاز کنوکیں کمپنی ءِ سر ءَ بمب تراک ءِ کُتگ چریشی ءَ یک مردمے بیران ءُ یکے زدگ بوتگ –

بیران بوتگیں مردمے پچار تاج محمد ءُ زدگ بوتگیں مردمے پجار محمد رمضان ءِ ناماں چہ بوتگ انت –

تراک ءَ پد پھازگی لشکر وئیل جاہ ءَ سر بوتگ انت ءُ بیران ءُ زدگ بوتگیں مردم نادراھجاہ ءَ برتگ انت کہ اودا اژدری ٹپاس ءَ پد جون کھول ءِ دست ءَ دیگ بوتگ –

تنی وھدی تراک ءِ زمہ واری ھچ گل ءَ نہ منّ اِتگ بلے اے دابیں اُرشانی زمہ واری چدوپیش بلوچ آجوئی لوٹوکیں سلاہ بندیں گلاں منّ اِتگ انت –

کراچی پریس کلب ءَ بیگواھیں شنگ کار ءُ اھوالکار فہیم بلوچ ءِ کھول ، ہیومن رائٹس کمیشن آف پاکستان ءِ سرکماش اسد اقبال بٹ، قاضی حضر ءُ بلوچ یکجھتی کمیٹی کراچی ءِ آرگنائزر آمنہ بلوچ ءَ اھوالکاراں گوں تران کنان ءَ فہیم بلوچ ءِ آوارجنی ءِ بارو ءَ سرجمیں ھال داتگ انت –

اھوالکاراں گوں تران کنان ءَ آھانی گوشگ ات کہ بیست ءُ پنچ سالی ئیں فہیم بلوچ بنکی ءَ بلوچستان ءِ دمگ پنجگور وشبود ءَ نشتگ – آ الم ءُ ادب شنگار کارگس ءِ منیجر انت وھدیکہ صدائے بلوچستان ڈاٹ کام ءُ سَے ماھی گدان پنجگور ءِ ایڈیٹر انت – آئی ءَ بازین وھدے بوتگ کہ کراچی ءِ دمگ نیول کالونی ءَ جاھمنند بوتگ – سنگت، سیاد ءُ وارس آئی ءَ لالا فہیم ءِ نام ءَ توار پر جن انت –

آھانی گوشگ ات کہ بیست ءُ شش اگست ءَ بیگاھے ادار ھشت ءُ نیم ءَ کراچی ءِ دمگ اردو بازار ءَ لس پوشاک گور ایں سَے مردم ءُ سَے کمانڈو بُک مال ءَ سیمی فلور ءَ بزاں لالا فہیم ءِ کتاب ءِ دکان ءَ الم ءُ ادب پبلشر اینڈ بک سیلرز ءَ اتکگ انت ، چم دیستیں شاھدانی گوشگ انت آھاں چہ لالا فہیم ءَ کتاب ءِ جست کُتگ ءُ پدا واتر شُتگ انت بلے پدا سھتے ءَ پد واتر اتکگ انت آئی ءَ گوشتگے کہ گوں ما بیا گڈا گوں وت برتگے ءُ جھل ءَ پولیس ءِ گاڑی اوشتوک بوتگ آ پولیس گاڑی ءَ سوارت کتگ کہ ھما انت گار انت کس نہ زانت کہ کجا ایں –

آھانی گوشگ ات کہ اے وئیل ءِ سی سی ٹی وی تامر ھم دیم ءَ اتکگ کہ آئی ءِ تہ ءَ گندگ بیت کہ پولیس ءُ لس پوشاک گوریں مردم آئی ءَ گون وت برگ انت – اے تامر ءَ اے گپ پدر انت کہ لالا فہیم ءِ آوار جنی ءَ سندھ پولیس ءِ دست تچکی ءَ مان انت –

پریس کانفرنس ءَ اھوالکاراں گوں تران کنان ءَ آھانی گوشگ ات کہ اے وئیل ءَ چار روچ ءَ پد بزاں بیست ءُ نھ اگست ءَ لالا فہیم ءِ آوار جنی ءِ ارزی پریڈی پولیس تانہ ءَ نبشتہ کنگ بوتگ کہ فہیم بلوچ ءِ سیاد ام حبیبہ ایڈوکیٹ ءَ نبشتہ کنائینتگ –

آھانی گوشگ ات کہ لالا فہیم ءَ وتی لھتے سنگتانی ھمراھی ءَ سال دوھزار شانزدہ ءَ الم ءُ ادب سیلرز ءِ نام ءَ کتاب بھا کنگ بندات کتگ ءُ لھتے سال ساری آئی ءَ شنگکاری ءِ کار ھم بندات کتگ بوتگ – اے میان ءَ آئی ءَ وتی ادارہ ءِ نیمگ ءَ سد ءَ گیش المی ءُ ادبی کتاب شنگ کتگ انت –
الم ءُ ادب گیشتر ادبی کتاب شنگ کنت کہ آھانی تہ ءَ نود ءَ گیش کتاب اردو ءَ انت ءُ لھتے بلوچی ءِ ھم ھوار انت – اے کتاب بازار ءَ ھم دست کپ انت اشانی تہ ءَ ھچ چشیں مواد ءِ نیست کہ آ درکانودی ءُ ریاست ءِ بگیری ءَ بہ بنت –

آھانی گوشگ ات کہ فہیم ءِ یل کنائینگے ھاتر ءَ ما سندھ ہائی کورٹ ءَ ھم شُتگ ایں کہ آئی ءِ پیشی ھم بوگ ءَ انت مارا امیت انت کہ چہ آمیدگس ءَ مارا انساپ رسیت –

عنایت اللہ چنگیز بلوچ ء عبدالخالق ریکی جاھمنند ھزدار ھشت مارچ سال دوھزار چاردہ ءَ چیریں ادارھانی کارمنداں سندھ ءِ دمگ قمبر ءَ آوار جتگ ءُ بیگواہ کتگ، ھشت سالانی پرگوزگ ءَ پد ھم آ یل کنگ نہ بوتگ –

بیگواھیں عنایت اللہ چنگیز بلوچ ءِ کھول ءَ اقوام متحدہ، انسانی ھکانی گل ءُ سپریم کورٹ ءَ چہ لوٹ کتگ کہ عنایت اللہ ءِ وش ءُ سلامتی یل کنائینگ ءَ وتی کرد ءَ پیلو بہ کن انت – آھاں گوشتگ کہ عنایت اللہ ھشت سال ساری بزاں ھشت مارچ سال دوھزار چاردہ ءَ سلاہ بندیں مردماں سندھ ءِ دمگ قمبر ءَ آوار جتگ ءُ گوں وت برتگ کہ ھنگت بیگواہ انت آئی ءِ درگت ءَ مارا ھچ وڈیں سرپدی دیگ بوگ ءَ نہ انت –

آھانی گوشگ ات کہ عنایت اللہ چنگیز وتی بیگواہ بوگ ءَ چار سال پیش سندھ شتگ بوتگ کہ ھمودا کار ءُ روزگار ءِ بہ کنت ءُ وتی کماش ءُ چکاں لاپ بہ دنت، آئی کماش عبدالحق ریکی ءَ وتی زھگ ءِ بیگواھی ءِ درد اوپار کت نہ کتگ انت ءُ بیران بوتگ کہ چریشی ءَ مئے اڈوجنجالانی تہ ءَ گیشی اتکگ – آئی زھگ وانگجاہ ءِ روگ ءِ بدل ءَ وتی پت ءِ راہ ءَ چارگ ءُ ودار کنگ ءَ انت ءُ آئی مات نادراہ انت تھت ءِ سر ءَ کپتگ –

آھاں وتی درشان ءِ تہ ءَ گوشتگ کہ اگاں عنایت اللہ سیکورٹی ایجنسیانی گور ءَ بند انت گڈا آ آئی ءِ زھگ ءُ پیریں مات ءِ سر ءَ بزگ بہ کن انت ءُ آئی ءَ دیم ءَ بیار انت اگاں آئی ءَ کتکاری ءِ کتگ گڈا آمیدگس ءَ پیش کنگ بہ بیت –

عنایت اللہ چنگیز ءِ کھول آئی ءِ یل کنائینگے ھاتر ءَ مدامی زھرشانی کنگ ءَ انت آئی ءِ کھول ءِ مردم شال ءَ ریڈ زون ءَ گورنر کارگس ءِ دیم ءِ نندانک ءَ ھم گون انت وھدیکہ آھانی گوشگ انت کہ اے درگت ءَ ما آمیدگساں ھم شُتگ ایں بلے مارا انساپ نہ رستگ –

بلوچستان ءَ برجاھیں وتکشی وئیل گوں تُرندی ءَ دیم ءَ آھگ ءَ اَنت، ھالانی رِد ءَ دگہ یک مردمے ءَ وتکشی کتگ-

چیزے روچانی تہ ءَ وتکشی کنوکانی کچ دہ ءَ سر بوتگ اَنت- وتکشی وئیل کیچ، پسنی، پنجگور ءُ نوشکی ءَ رپورٹ بوتگ اَنت-

سربوتگیں ھالانی رِد ءَ گوستگیں روچ ءَ کیچ نندوک مھیم ء آسمی نامیں مردمے ءَ وتکشی کتگ-

وئیل سوب زانگ نہ بوتگ، وھدے کہ اِھوالکارانی رِد ءَ اے مرد لشکر چیزے سال ءَ ساری آوار جتگ ءُ بیگواہ کتگ ، وھدے کہ یل بوگ ءَ پد آ نپسیاتی نادُراھی ءِ آماچ بوتگ-

زانگ بہ بیت بلوچستان ءَ بیگواھیں مردمانی جیڑہ یک بلاھیں جیڑھے وھدے کہ پوج دست ءَ ھمینچو مردم یل کنگ بیت آیانی درگت ءَ ھمے گْوشگ بیت کہ آ نپسیاتی نادُراہ جوڑ بنت-