TBP Balochi

سَے رند ءَ زورانسری آوار جنگ بوتگیں سندھی راجدوستیں باسک ءِ جون دست کپتگ –

ھالانی رِد ءَ مروچی پنچ شمبے ءِ روچ ءَ ایران ءِ سیمسرانی نزیک ءَ بلوچستان ءَ دمگی پھازداراں جون ءِ دست کپتگ کہ آھاں دمگی نادراھجاہ ءَ سرکتگ –

ھمے گوشگ بوگ ءَ انت کہ جون سندھی راجدوستیں باسک عاقب چانڈیو ءِ ئیگ ایں کہ ھمے سال ءِ جولائی ماہ ءَ بلوچستان ءِ دمگ چہ حب ءَ آوار جنگ ءُ بیگواہ کنگ بوتگ –

عاقب چانڈیو ءِ نزیکیں مردمانی رِد عاقب چانڈیو چدو پیسر دو رند ءَ ھمے واست ءَ زورانسری آوار جنگ بیگواہ کنگ بوتگ کہ آ آجوئی لوٹوکیں راج دوستیں پاٹیاں گوں سیادی داریت بلے پدا رند ءَ یل کنگ بوتگ – اولی رند ءَ آ سال دوھزار ھژدہ ءَ سندھ ءِ دمگ لاڑکانہ ءَ پوج ءَ آوار جتگ ءُ بیگواہ کہ سال ءِ چار ماہ ءَ پد سال دوھزار نوزدہ ستمبر ماہ ءَ یل کنگ بوتگ –

عاقب چانڈیو ءِ زورانسری آوار جنی ءِ بگیری ءَ آئی مات ءُ گھار فوزیہ چانڈیو ءَ سرجمیں سندھ ءَ وتی زھرشانی نبشتہ کنائینتگ انت وھدیکہ عاقب چانڈیو یل نہ کنگ ءِ بگیری ءَ آئی ءِ کھول ءِ مردماں کراچی پریس کلب ءِ دیم ءَ بازیں روچے ءَ تاں زھرشانی بنجل ءِ ھم برجم داشتگ بوتگ –

راجدوستیں باسک عاقب چانڈیو دومی رند ءَ سال دوھزار بیست ءِ جولائی ماہ ءَ سندھ ءِ دمگ حیدر آباد ءَ چیریں ادارہ ءُ رینجرز ءِ کارمنداں آئی ءِ گھار، لوگی ءُ مات ءِ چمانی دیم ءَ آ آوار جتگ ءُ گوں وت برتگ ، آئی ءِ آوار جنی ءِ تامر ھم دیم ءَ اتکگ بوتگ –

دومی رند ءَ آوار جنی ءَ پد سال دوھزار بیست ءِ فروری ماہ ءَ عاقب چانڈیو پدا یل کنگ بوتگ –

عاقب چانڈیو ءِ نزیکیں اھوالکار ءِ رِد ءَ گڈی رند ءَ عاقب چانڈیو ھمے سال ءِ چار جولائی ءَ پوج ءَ آوار جتگ ءُ گوں وت برتگ دو ماھانی بیگواھی ءَ پد مروچی آھاں ھال رستگ کہ عاقب چانڈیو ءِ جون ایران سیمسرانی نزیک ءَ دمگی پھاداراں دست کپتگ –

زانگ بہ بیت بلوچستان ءِ وڈا سندھ ءِ راجدوستیں باسکانی زورانسری آوار جنی ھال مدامی آھگ ءَ انت – سندھ ءِ راجداریں ءُ انسانی ھکانی گلانی گوشگ انت کہ اے زورانسری آوار جنیانی تہ ءَ پاکستان ءِ چیریں ادارہ، سندھ پولیس ءُ سی ٹی ڈی ءُ رینجرز ءِ دست مان انت –

سندھ ءِ تہ ءَ زورانسری آوار جنیانی بگیری توار چست جنوکیں گل وائس فار مسنگ پرسنز آف سندھ ءِ رِد ءَ تنی وھدی سندھ ءِ جتاجتائیں دمگاں بازیں سندھی راجدوستیں باسک پھازگی ادارھانی در کانودی آوار جتگ ءُ بیگواہ کتگ انت وھدیکہ آھانی تہ ءَ بازینے ءِ ژانگولیں جون دست کپتگ انت –

وائس فار مسنگ پرسنز آف سندھ ءِ رِد ءَ سی ٹی ڈی سندھی راجدوستیں باسکاں دروگیں میڑ ءَ جنگ ءُ آھاں ناشرکاری گوشگ انت –

روکپتی بلوچستان ءِ بنجاھی شھر دزاپ ءَ زمین چنڈ بیتگ، زمین چنڈ سَے ٹک پنچ ریکارڈ کنگ بیتگ-

زمین چنڈ دزاپ ءِ ھواریں شھراں سما کنگ بیتگ ءُ اود ءَ مھلوک ءَ ھم زمین چنڈ ءِ سما بیتگ –

دزاپ ءِ بنجاھی ریکٹر اسکیل ءِ رد ءَ زمین چنڈ سَے ٹک پنچ بیتگ-

ریکٹر اسکیل ءِ رد ءَ زمین چنڈ ءِ دراجی شست ءُ یک ٹک چار ءُ پراھی بیست ءُ نُھ ٹک شست ءُ پنچ بیتگ ءُ دَہ میل ءِ جھلانکی ءَ بیتگ-

ریکٹر اسکیل ءِ رد ءَ زمین چنڈ دزاپ ءَ چہ بیست ءُ پنچ کیلو میٹر ءِ دوری، ھشتاد یک کیلومیٹر میرجاوہ، سد کیلومیٹر سرجنگل ءَ دوری ءَ بیتگ-

زمین چنڈ ءَ دگہ جانی تاوانانی ھال نہ بیتگ اَنت-

سربوتگیں ھالانی رِد ءَ بلوچستان ءِ دمگ کیچ ءَ دگ ءِ وئیلے ءَ یک مردمے بیران بوتگ وھدیکہ ایف سی کارمندے زدگ بوتگ – اشی ءَ ابید ءَ پسنی ءَ دگ ءِ وئیلے ءَ دو مردم زدگ بوتگ انت –

گیشیں ھالانی رِد ءَ کیچ ءِ دمگ تجابان ءَ گاڑی ءَ گوں پرپٹ ءَ ڈیک وارتگ، ڈیک ورگ ءِ سوب ءَ پرپٹ سواریں عبدالکریم ء دلشاد ھما دمان ءَ بیران بوتگ ءَ غلام نبی نامیں ایف سی کارمندے زدگ بوتگ –

زدگ بوتگیں ایف سی کارمند ٹیچنگ نادراھجاہ تربت ءَ برگ بوتگ، نادراھجاہ ءِ بنشون ءِ رِد ءَ آئی بازیں ٹپ ءِ پر بلے ھنو آئی جاور وشتر انت –

دومی نیمگ ءَ پسنی ءِ کوسٹل ہائی وے ءَ کلمت کراس ءَ ماھیگ ءَ پُریں مازدا گاڑی ءَ گوں کورولا گاڑی ءَ ڈیک وارتگ ءُ چریشی ءَ دو مردم زدگ بوتگ انت –

وئیل ھما وھد ءَ بوتگ کہ مازدا ٹرک چہ پسنی ءَ دیم پہ کراچی ءَ رؤگ ءَ بوتگ-

بلوچستان ءَ دگانی وئیلاں ھمک روچ بازیں مردمے بیران ءُ زدگ بوگ ءَ انت گوستگیں روچاں ھزدار ءَ بوتگیں دگ ءِ وئیلے ءَ نھ مردم بیران وھدیکی ھپت زدگ بوتگ انت –

میڈیکل ایمرجنسی ریسپونس سنٹرل ءِ رِد ءَ ھمے ماہ ءَ بلوچستان ءِ پنچ شھدگانی یکیں ماہ ءَ نُھ یانزدہ ءَ دگ ءِ وئیل دیم ءَ اتکگ انت ءُ چریشی ءَ بیست ءُ سَے مردم بیران بوتگ انت وھدیکہ یک ھزار ءُ سَے سد ءُ ھبدہ مردم زدگ بوتگ انت –

نبشتانک: شپ ءِ گرانیں چیھال

نبشتہ کار : لیاکت وپؔا

دی بلوچستان پوسٹ

بیگواھی گران انت من لوگ ءَ ات آں ساھتے ءَ رند من واب کپتاں ءُ کمو دمانے ءَ رند منی بان ءِ دروازگ ءَ توار کت گڑا من پاد اتک آں ءُ چار اِت داں مات انت ءُ گریوگ ءُ زاری کنگ ءَ انت من دل تْرک بوتاں مات ءَ را چے بوتگ مات انچو گریوگ ءُ زاری کنگ ءَ انت بوت کنت کسے نادراہ بوتگ ءُ نگیگ انت من مات ءَ را چست گپت اما ترا چے بوت تو اے ساھت ءَ گریوگ ءَ ئے ؟ مات ءَ پسو دات! ابا تو واب بوتگ ئے مئے ھمساھِگے ءِ گس ءَ چہ کوکارے بوتگ گریوگ ءُ زاری ءِ توار اتکگ من گڑا شتاں ھمساھگ ءِ لوگ ءَ میتگ ءِ درستیں مردم اتکگ ات انت من گڑا جست کت چے بوتگ؟ بیگواھیں بچ ءِ مات ءَ گُشت منی دل ءِ بند ءَ را بدواہ ءَ برتگ ءُ منی یکیں چک بوتگ ءُ من اِشکُت منی پادانی چیر ءِ زمین گار بوت گُش ئے آزمان کپتگ ءُ من گمیگ بوتاں ءُ منی دل ھلاس بوت من گپ ءِ وڑ ءَ نہ ات آں گڑا من پہ وتی لوگ ءِ نیمگ جنزان کت ءُ تئی بان من ٹک ات تو پچ کت من انگت گیمگ بوتاں تئی ھمسرے زھگے ات زورگیراں پچ گپت ءُ وتی گوں برتگ آ مات ءِ دل ءِ ھالاں کے مار ایت آئی ءِ یکیں زھگ ات مات ءِ گپاں من ءَ گیمگ کت ءُ منی چمانی ارس رتک انت ، من پسو دات ھو تو راست گش ئے ایشاں ھچ پرواہ نہ بیت اے زورگیریں ریاست ھمے وڑ ءَ زلم انگت کنگ ءَ انت کنت انت تو گپے زان ئے باریں چنچو مات ھمے دردانی تہ ءَ زند گوازینگ ءَ انت ءُ چنچو گوھار انگت وداریگ انت –

سمی بلوچ انگت ودار کنگ ءَ انت وتی ابا جان ءِ واست ءَ سمی ءِ پت ءَ را چاردہ سال سرجم بوتگ انگت بیگوہ انت ءُ زنداں بندیگ انت سمی ءِ ھالاں کے مار ایت ءُ سمی ءَ زان ئے کجا وتی پریات نہ برتگ بلے اے ملک ءِ ھاکم ءُ رھشون ءَ ھچ پرواہ نہ بیت ءُ گوشاں مورے ھم نہ وارت انت سمی ءِ جھد ھمے وڑ ءَ انگت برجم انت ءُ شال ءَ ریڈ زون ءَ نشتگ ءُ پریات کنگ ءَ انت مرچی روچ ءَ گوں چل ءُ یک روچ سرجم بوتگ بلے انگت نشتگ ریڈ زون ءَ دگہ چنچو مات گوھار نشتگ انت پریات کنگ ءَ انت اے ھور ءُ موسماں شال ءِ دل ءِ بند ءَ کپتگ انت زھرشانی کنگ ءَ انت بلے بلوچ ءِ درداں اِد ءَ کس ءَ پرواہ نہ بیت ءُ ریاست لوٹ ایت بلوچ ھمے وڑ ءَ ترس ءِ آماچ بہ بیت ءُ وتی گلامی ءَ بہ من ایت ءُ منی گلام بہ بیت بلوچ نو سرپد انت کہ تو ھرچ وڑیں زلم بہ کن ءُ بہ کش جنگلاں دور بہ دے بلے تئی گلامی ءَ ھچ وڑ ءَ کبول نہ کنت اے جھد ھمے وڑ ءَ جنزان انت داکہ بلوچ ءِ زھگ ھم نہ من ایت وتی ھک ءِ واست ءَ توار چست کنت ءُ جھد کنت الم ءَ اے شپ کٹ ایت ءُ روچ ءِ بادشاھی کیت ڈیھ ءَ شادامانی یے کار ایت بلوچ وتی واجکار وت بیت اے جھد ھمے وڑ ءَ جنزان انت آجو باتاں کلیں بندیگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

عراق ءَ دو شیعہ لیکہ ءَ گوں سیادی داروکیں ٹولیانی نیام ءَ مزنیں وھدےءَ چہ برجاھیں سرکار ءِ سرءَ جنجال ءَ ھمے ھپتگ ءَ دگانی سرءَ ھونریچیں میڑ یے دروشمیں زرتگ کہ بازیں ماھاں چہ برجاھیں جنجال ءُ سیاسی اوشت ءِ مستریں درشانی اِنت۔

تاگتوریں عالم دین مقتدیٰ الصدر ءِ منوگراں ملک ءِ سرکاری گرین زون فرنٹ لائن ءِ تہءَ مٹ کُتگ ءُ سکیورٹی فورسز ءُ دومی ٹولی ءِ ملیشیا ءَ گوں تیر گواری ءِ سوب ءَ راجدانی 24 ساھتاں داں سرجمءَ اوشت آماچ کُتگ۔

سئے شمبے ءَ مقتدیٰ الصدر ءِ تران ءَ تھنا یک گال بزاں ’انخلا‘ ءِ گوم ءَ جنگ اوشتاتگ۔ آئی منوگراں وتی سلاہ دور داتگ اَنت ءُ شُتگ اَنت۔

اے ھمے عالم دین ءِ مقتدیٰ الصدر ءِ ایرانی کمک گونیں ٹولی ءُ سیاسی مھلوک ءِ ھاترہ کلہو ءُ اے ھما تاوان ءِ ھترناکیں درور یے اَت کہ آئی منوگر اے ملک ءَ دیگ ءِ سکت دار اَنت۔

آیانی درکپگ ءِ جار ءَ پد سر وزیر ءَ ھوار عراقی رھشوناں مقتدیٰ الصدر ءِ منت گپتگ اَنت ءُ آئی اوپار ءِ توسیپ کُتگ۔

مقتدیٰ الصدر دگانی سرءَ ناشرکاری ءِ ھاترءَ وتی منوگراں پرمان دات کنت ءُ ھمے پئیماں آیاں پدءَ روگ ءِ ھم گُشت کنت۔ آئی ءَ مزنیں مدتے ءَ چہ وتی سیاسی سانمندی گوں ھمے وڑءُ پئیم ءَ گپتگ۔

دو شمبے ءَ آئی ءَ جار جتگ کہ آ سیاست ءَ یل کنت۔ آئی اے جار ءَ عراقیاں اے پیش داشت کہ وھدے آئی توار پچ گرگ بہ بیت گُڑ ءَ چی بیت کنت: تاوانباری، مرگ ءُ پرشت پروش۔

زھرشانی ءُ ترندیں میڑ اوشتاتگ اَنت کہ اِشی تہءَ داں انگت 30 مردم بیران ءُ 400 ءَ گیش ٹپی بیتگ اَنت۔ بلے آ سیاسی اوشت انگت ھلاس نہ بیتگ کہ آئی سوب ءَ بے ایمنی داں اے کچ ءَ سر بیتگ۔

شمالی آئرلینڈ ءَ برتانیہ ءِ شاھی پوج ءِ سرءَ اُرش ءِ زمہ واری آجوہی دوستیں سلاہ بندیں گلءَ من اِتگ۔

رسانکدر ءَ دیم داتگیں نمدی ءِ تہءَ گل ءِ جارکش ٹی او نئیل ءَ ٹاہ داتگ ءُ گُشتگ آئی گل ءِ جنگولاں شاھی پوجءِ کارمند اُرش ءِ تہءَ نشانگ کُتگ اَنت۔

آئریش ریپلکن آرمی ءِ جارکش ءَ گُشتگ کہ گل ءِ ایکٹو سروس یونٹ (ASU) ءَ 15 اگست ءَ برتانیہ ءِ چیردستیں شمالی آئرلینڈ ءِ شھر بوگسائڈ ءِ ھند ءَ شاھی پوج ءِ گشتی ٹیم ءِ سرءَ تیر گواری کُتگ ءُ پہ سلامتی در کپگ ءَ سوبمند بیتگ اَنت۔

ترجمان ءَ گشتگ کہ اے اُرش ءِ زمہ داری ءَ مئے گل من اِیت۔

ٹی او نئیل ءَ وتی درشانے تہءَ شھریاں کڈن کنان ءَ گُشتگ کہ آ شاھی پوج ءِ کاروان ءُ کارمنداں چہ دیر بہ بنت، آئریش ریبلکن آرمی کجام ھم وھدءَ آھاں نشانگ کُت کنت۔

زانگ بہ بیت آئریش ریپبلکن آرمی برتانیہ ءِ چیردستیں شمالی آئرلینڈ ءِ آجوئی ءِ لوٹءَ کنت، اے گل گوستگیں سد سالاں چہ گیش مدت بیت کہ برتانیہ ءِ قوضہ ءِ بگیری ءَ سلاہ بندیں گھگیری کنگ ءَ اِنت۔

آئی آر اے ءَ چہ اِشی ءَ پیسر ھم شمالی آئرلینڈ ءُ برتانیہ ءِ جتاھیں شھرانی تہءَ لشکریانی سرءَ اُرش ءُ بمب تراکانی تہءَ برتانیہ ءِ پوجی کُشتگ اَنت، ھمے سال ءَ گل ءَ برتانیہ ءِ لشکریانی ھلاپ ءَ وتی اُرشانی تہءَ گیشی آرگ ءِ جار جتگ اَت۔

ھمے سال ءَ جنوری ءَ رسانکدراں دیم داتگیں درشانے تہءَ گل ءِ جارکش ءِ گُشگ اَت کہ برتانیہ ءِ پوج وتی چریک ءُ دگہ ریاستی مشینری ءَ کارمرز کنان ءَ مئے باسکانی بگیر ءَ بیرگری گامگیجانی تہءَ گیشی آورتگ ءُ مئے دوزواہ ءُ کھول نشانگ کنگ بئیگ ءَ اَنت دانکہ آئرش آجوئی ءِ ھاترءَ جھدءَ ھواریں باسکاں ترسینگ بہ بیت۔

ھمے درشان ءَ گل ءِ جارکش ٹی او نئیل ءَ گشتگ اَت کہ قوضہ گیرءِ بگیرءَ مئے جزبگ چہ پیسر ءَ مھکم اَنت ءُ مئے کاروان ءَ گیشتر نوکیں مردین ءُ جنین مزنیں کساس ءَ ھوار بئیگ ءَ اَنت کہ آ برتانیہ ءِ پوج ءَ کجءَ ھم نشانگ کنگ ءِ لائقی دار اَنت۔

آئریش ریپبلکن آرمی ءِ نیمگ ءَ شنگ کُتگیں درشانے تہءَ گیشتر گُشگ بیتگ کہ آئی آر اے ءَ مدام پہ آئرلینڈ ءَ جدوجھد برجاہ داشتگ ءُ آئرلینڈ ءِ سرجمی ءَ آجوئی ءَ داں اَے جھد برجاہ مان اِیت۔

بلوچستان ءَ انیگیں بشامی ھئورانی سوب ءَ یک نیمگے مزنیں کساس ءَ تاوانباری کُتگ ھمودہ دومی نیمگ ءَ بجلی ءِ نظام ھم سرجم ءَ ڈریتگ ءُ یک ھپتگے گوزگ ءَ پد ھم شال ءُ دگہ دمگانی تہ ءَ بجلی ءِ رسگ بندش آماچ اِنت۔

جتاھیں دمگاں نیشنل گریڈ ءَ چہ بجلی دیوکیں 220 کے وی ءِ یازدہ ٹاور ھار ءِ آپ ءِ تہءَ بڈ اِتگ اَنت یا اگں اگں کپتگ اَنت چریشی سوب ءَ گوستگیں شش روچاں چہ شال ءُ بلوچستان ءِ دگہ ھندانی تہءَ بجلی نہ بیگ ءِ مزنیں جنجالءِ برجاہ اِنت چریشی ءَ کارمرز کنوک نگیگیانی آماچ اَنت۔

کیسکو واکدارانی ردءَ سانمندیں ٹاورانی ءُ اڈ کنگ ءُ بجلی ءِ پدا آرگ ءِ کار بندات کنگ بیتگ ءُ گمان اِنت کہ چار ستمبر ءَ داں بولان ءِ راہ ءَ سانمندیں دمگاں بجلی ءِ رسگ بندات بیت اِنت۔

زانگ بہ بیت کہ بلوچستان ءَ اے وھدءَ 1350 میگا واٹس ءِ لوٹ اِنت وھدیکہ اِشی ءَ پیسر بلوچستان ءَ 750 میگا واٹس بجلی رسگ ءَ بیتگ بلے انیگیں ھئورانی سوب ءَ اَے کساس کم بیتگ ءُ تھنا 250 میگاواٹس ءِ کچ ءَ پشت کپتگ کہ اے چہ ڈیرہ غازی خان ءَ چہ لورالائی شال گریڈءَ داں سر کنگ بئیگ ءَ اِنت۔

لندن: بلوچ راجی زْرمبشت برتانیا تک ءِ نیمگ ءَ یک شمبے 30 اگست ءِ روچ ءَ پہ زوریں بیگواھی ءِ آماچ بیتگیں مردمانی میان استمانی روچ ءِ درگت ءَ آگاھی باوستے برجاہ دارگ بیتگ ءُ ھمے رد ءَ (سرپدی تاک) شنگ کنگ بیتگ۔

چہ بی این ایم ءِ نیمگ ءَ لوٹ کنگ بیتگ کہ پاکستان ءِ پوج ءَ برتانیا ءِ کمک اشتاپی ءَ بند کنگ بہ بیت ءُ پہ آئی ءَ منگ بیتگیں مردمی کمک گوں اے گپ ءَ بندوک بہ بیت کہ پاکستانی واک مردمانی پہ زور بیگواہ کنگ ءَ سرجمی ءَ بند کن اَنت۔

بی این ایم ءِ نیمگ ءَ شنگ کنگ بیتگیں پنتاک ءَ گْوشگ بیتگ چہ 2001 ءَ بہ گر داں انی بلوچستان ءَ ھمروچ 4 کس پہ زور بیگواھی ءِ آماچ کنگ بیگ ءَ اِنت۔ داں انیگ ءَ 30ھزار ءَ گیش مردمی اگبالانی پانکجن،استاد، اھوالکار، نودربر، وکیل ءُ سیاسی کارکن پہ زور بیگواہ کنگ بیتگ ، آ دگہ برے بھ گندگ نہ بیتگ اَنت۔ چہ ایشاں ابید 6 ھزار مردم زندانانی تہ ءَ کشگ ءُ پہ ترس ودی کنگ ءَ آیانی ژانگولیں کنٹ جتائیں جاھاں چگل دیگ بیتگ اَنت۔

مردمی اگبالانی میان استمانی ادارھاں ابید پاکستانی سرکار ءُ آمیدگس ھم اے من ایت کہ پاکستانی فوج ءُ آئی ءِ چیریں واک پہ زوریں بیگواھیانی تچکیں زمہ وار اَنت اے گپ ءِ پدر بیگ ءَ پد ھم ھندی آمیدگس ءُ میان استمانی تک ءَ بیگواھیانی زمہ وار آیانی اے ملامانی سر ءَ جست کنگ نہ بیتگ اَنت۔

بی این ایم ءَ چہ برتانیا ءِ شھرمننداں اے دزبندی کرتگ کہ آ بلوچستان ءَ پہ زوریں بیگواھی ءُ مردمی اگبالانی بارہ ءَ وتی ایم پیزاں نمدی نبشتہ بہ کن اَنت ءُ آیاں کڈن بہ کن اَنت کہ آ وتی سرکار ءَ زور بہ دئے اَنت کہ برتانیا ءِ سرکار پاکستان ءِ کمک ءَ گوں مردمی اگبالانی جاور ءِ گھتری ءَ ھمگرنچ بہ کنت۔

سربوتگیں ھالانی رِد ءَ بلوچستان ءِ تیاب دپی دمگ اوتھل لسبیلہ ءَ بازیں روچ ساریگیں ژانگولیں جونے دست کپتگ –

اھوالکار ءِ رِد ءَ ژانگولیں جون ایدھی ءِ کارمنداں وندر ءِ دمگ بریدہ ءَ بنجل ءِ نزیک ءَ زِر ءِ تہ ءَ دست کپتگ –

ایدھی بنشون ءِ رِد ءَ وندر ءِ دمگ بریدہ بنجل ءِ نزیک ءَ مردمے ءِ جون ءِ ھال مئے کمکاراں سر بوتگ گڑا مئے کارمنداں ھما دمان ءَ شُتگ چہ زِر ءَ ژانگولیں جون در کُتگ ءُ ایدھی ایمبولینس ءِ سر ءَ رورل ہیلتھ سنٹر وندر ءَ سرکتگ – اود ءَ جون ءِ پجار کنگ نہ بوتگ بلے ڈاکٹرانی گوشگ انت کہ اشی ءِ اُمر سِی ءُ پنچ یا چل سال بیت –

اژدری چار ءُ ٹپاس ءَ پد وندر پولیس ءَ جون ایدھی ءِ دست ءَ داتگ کہ آھاں جون آؤرتگ کراچی سرد ھانہ ءَ ایر کتگ –