TBP Balochi

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ پنجگور گچک ءَ پاکستانی پوج ءِ کاروان ءِ سر ءَ بوتگیں اُرش ءِ زمّہ واری منّ اِتگ –

جارکش ءَ وتی درشان ءِ تہ ءَ گوشتگ کہ مئے سرمچاراں پنجگور ءِ دمگ گچک ءَ چِب ءِ ھند ءَ پاکستانی پوج ءِ کاروان ءِ تراکناکیں شوروانی نشانگ جوڈ کتگ، چریشی ءَ دژمن پوج ءُ چیریں ادارھانی جوڈ کتگیں کُشندہ ٹولی ءِ دو کارمند فضل ء جمعہ ءُ وشدل ء امیر بخش ھم زدگ بوتگ انت –

جارکش ءَ گوشتگ کہ مئے سرمچاراں دژمن پوج ءِ سر ءَ ھما وھد ءَ اُرش کُتگ کہ آ کاروان ءِ دروشم ءَ دمگے نیمگ ءَ روگ ءَ بوتگ ءُ تراک ءِ زد ءَ اتکگیں دمگی دلار پرپٹ ءِ سر ءَ کمک کنگ ءَ بوتگ انت- ھمے سال ءِ بیست ءُ شش اپریل ءَ گچگ ءَ پاکستانی پوج ءِ دست ءَ زورانسری آوار جنگ بوتگیں زالبول ءُ شیرمچیں زھگانی آوار جنی ءَ ھردوکانی دست مان بوتگ انت – وھدیکہ دمگ ءِ تہ ءَ مردمانی وردنی سامانی پُلگ، دزی ءُ ڈنگی ءُ دگہ چاگردی سلکاریانی تہ ءَ ھم اشانی دست مان بوتگ –

جارکش ءَ وتی درشان ءِ گڈسر ءَ گوشتگ کہ مئے گل بلوچ لبریشن آرمی اے اُرش ءِ زمّہ واری ءَ منّ ایت ءُ مئے جھد زورگیریں پوج ءِ سرجمی ءَ در آھگ ءُ آھانی کمک کارانی ھلاسی ءَ تاں برجاہ مان ایت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ گوستگیں ماہ اگست ءَ بلوچستان ءَ بوتگیں سرجمیں اُرشانی رپورٹ شنگ کُتگ-

رپورٹ ءِ رِد ءَ اگست ءِ ماہ ءَ بیست ءُ ھپت اُرش کنگ بوتگ انت اُرشانی آسر ءَ بیست ءَ چہ گیش پوجی کارمند مرتگ انت ءُ سیزدہ ءَ چہ گیش زدگ بوتگ انت وھدیکہ ریاستی کُشندہ ٹولی ءِ ھم ھپت کارمند کُشگ بیتگ انت –

رپورٹ ءِ تہ ءَ گوشگ بوتگ کہ اے اُرشانی تہ ءَ ریموٹ کنٹرول بمب اُرش، دزبمب ءُ گرینڈ لانچر گولھاں ھوار نوکتریں سلاہ ھم کارمرز کنگ بوتگ انت –

رپورٹ ءِ رِد ءَ بیست ءُ ھپتیں اُرشانی تہ ءَ پاکستانی آرمی ءُ ایف سی ءِ بیست ءَ چہ گیش کارمند مُرتگ انت ءُ سیزدہ ءَ چہ گیش زدگ بوتگ انت، اشی ءَ ابید پاکستانی پوج ءِ جوڑ کرتگیں کشندہ ٹولی ءِ ھپت کارمند ھم کُشتگ انت –

آئی ءَ وتی رپورٹ ءِ تہ ءَ گوشتگ کہ دژمنیں پوج ءِ سر ءَ بوتگیں اُرشاں چی ریاستی پوج ءِ دو گاڑی ءُ یک پرپٹے ءَ ھم تاوان رس اتگ – اشی ءَ ابید گوادر پورٹ ھاتر ءَ کنٹینر بروکیں ٹریلرانی سر ءَ ھم دو رند ءَ اُرش کُتگ ءُ تاوان داتگ انت اے ھردو اُرشاں ڈرائیور زدگ بوتگ انت – اشی ءَ ابید مستونگ ءَ موبائیل ٹاور ءُآئی ءِ مشینری ھم مانداشتگ انت –

روکپتی بلوچستان ءِ نامی ئیں عالم دین ءُ راجدوست مولانا فضل الرھمان کوھی گوستگیں روچاں چہ مشھد ءَ وکیل آباد زندان ءَ بندگی ءَ لھتے روچانی واستا موکلانی واستا دیم بیتگ –

ھالانی رد ءَ گوستگیں روچاں مولانا کوھی ءِ مشھد ءَ چہ بالی پٹ ءَ دیم پہ تیابدپی شھر چھبار ءَ اتکگ بیتگ ءُ اود ءَ آئی ءِ وش اتکی ءَ بازیں مھلوکے اتکگ بیتگ –

اشی ءَ پیسر ھم مولانا کوھی ھمے وڑ ءَ زندانیاں موکل دیگ بیتگ ءُ پد ءَ اے دومی رند اِنت آ پد ءَ اتکگ بیتگ ءُ اے رندی ھم آئی ءِ موکل سرجم نہ بیتگ –

مولانا کوھی گوستگیں وھداں ایرانی آمیدگس ءَ زندانی کتگ ءُ آئی ءِ سر ءَ شش سال ءِ زندانی جتگ-

مولانا کوھی فضل الرھمان گیشتر روکپتی بلوچستان ءَ ایرانی سرکار ءِ سر ءَ ایراد گرگانی سر ءَ زندانی کنگ بیتگ –

روکپتی بلوچستان ءَ بندوکیں مردمے ءِ گوشگ اِنت کہ آئی ءَ گیشتر ایران ءِ سر ءَ ایراد گپتگ کہ آ سیستان و بلوچستان ءِ مھلوک ءَ برتی کنت ءُ آیاں دگہ ڈیھ بزانکہ عراق ءُ سوریا ءَ جنگ ءَ دیم دنت –

چہ 9 سالاں بیگواھیں داد محمد مری ءِ گوھار ءَ وتی برات ءِ دیما آرگ ءِ لوٹ کُتگ۔

اھوالانی رد ءَ 2013 ءَ زورانسری بیگواھی ءِ آماچ بیتگیں داد محمد مری ءِ گوھار خیر بی بی ءَ شال ریڈ زون ءَ برجاھیں بیگواھیں مردمانی کھولانی نندانک ءَ بھر زرتگ ءُ چہ سالاں بیگواھیں برات ءِ یل کنائنگ ءِ لوٹ کُتگ۔

شال نندانک ءِ ھند ءَ چہ تامری درشان ءِ تہ ءَ بیگواھیں داد محمد مری ءِ گوھار ءَ گُشتگ کہ 9 سال پیسر آئی ءِ برات لشکریاں زورانسری بیگواہ کُتگ، ھمک شھر ءَ وتی برات ءِ یل کنگ ءِ ھاتر ءَ زھرشانی کُتگ ءُ دزبندی نبشتہ کُتگ بلے مزنیں وھدے گوزگ ءَ پد ھم مارا گُشگ بئیگ ءَ نہ اِنت کہ داد محمد مری کجا اِنت ءُ آ کجام جرمکاریانی سوب ءَ بندیگ کنگ بیتگ۔

خیر بی بی ءِ رد ءَ ائی ءِ برات داد محمد مری شھریانی دیم ءَ ریاستی ادارگاں بیگواہ کُتگ ءُ گوں وت بُرتگ کہ چہ آئی ءَ پد داں روچ مروچی آ دیما آرگ نہ بیتگ۔ داد محمد مری ریاستی ادارگانی دزگیری ءَ اِنت اگر آئی سرءَ کجام جرم ھست اِنت گُڑءَ آ آمید گِس ءَ آرگ بہ بیت ءُ جرم ثابت کنگ بہ بیت۔

خیر بی بی ءَ گیشتر گُشتگ کہ داد محمد مری بے میار اِنت آئی سرءَ ھچ جرمکاری پِر نہ بیت، برات دیمءَ آرگ ءُ مارءَ انساپ دیگ بہ بیت اگاں برات زندگ نہ اِنت ھم مارا ھال دیگ بہ بیت۔

دومی نیمگ ءَ بیگواھیں مردمانی کھولانی نیمگ ءَ شال ءِ ریڈ زون ءَ برجاھیں نندانک مروچی 47 می روچ ءَ ھم برجاہ اِنت کہ اِشی تہءَ جتاھیں تک ءَ سیادی داروکیں مردم بنجل ءَ آیگ ءُ نندانک ءَ نشتگیں کھولاں گوں یکجاھی درشانگ ءَ اَنت۔

یات بہ بیت کہ شال نندانک ءِ بھرزیروکیں کھول وتی بیگواھیں دوستیگانی یل کنگ ءِ لوٹ کنگ ءَ اَنت کہ اے نیام ءَ کھول ءُ بلوچستان سرکار ءِ نیام ءَ گند ءُ نند ءُ گپ رَپ ھم بیتگ اَنت، بلے نندانک ءِ بھرزیروکاں وتی لوٹانی سرءَ سنجیدگیں دیمروی ءِ لوٹ کُتگ۔

بلوچستان ءِ ضلع پنجگور ءِ تھسیل گچک ءَ پاکستانی پوج کاروان سر ءَ ناشناسیں مردماں گوں بمب ءَ نشانگ کتگ-

دمگی اِھوالکارانی رِد ءَ بمب اُرش ھما وھد ءَ بوتگ وھدے پوج ءِ کاروان گچک ءِ دمگ چب ءَ چہ گْوزگ ءَ بوتگ کہ اود ءَ ناشناسیں مردماں راہ سر ءَ بمب چیر کتگ-

تراک آسر ءَ پرپٹ ءَ سواریں دو مردم سک ٹپی بیتگ اَنت کہ آیانی پجّار فضل جمعہ ءُ وشدل ء امیر بخش ناماں چہ بوتگ اَنت-

تراک ءَ پد پوج ءَ دمگ انگر ءَ کتگ ءُ پٹ ءُ پول برجاہ کتگ بلے تنی وھدے آوار جنی ءِ ھال سر نہ بوتگ-

اوگانستان ءِ بنجاھی شھر ءَ مروچی سھب ءَ یک وتکُش اُرشکارے ءَ روسی سفارت جاہ نشانگ کنگ ءِ جھد کُتگ۔

کابل پولیس ءِ رد ءَ اُرش کار سفارت جاہ ءِ گیٹ ءِ نزیک ءَ رس اتگ بلے تالبانیں پھازکاراں آ تیر جتگ ءُ کُشتگ۔

پولیس ءِ رد ءَ وتکُش اُرشکار نشانگ ءِ ھند ءَ رسگ ءَ پیسر روسی سفارت جاہ ءِ پھازوکاں پجا آورتگ ءُ تیر جتگ۔

دومی نیمگ ءَ بازیں اھوال اے ٹاہ ھم جنگ ءَ اَنت کہ وتکُش اُرشکار ءَ وت ءَ تراکینتگ، بلے داں انگت پدر نہ بیتگ کہ اے اُرش ءِ آسر ءَ چنچو جانی تاوان بیتگ۔

زانگ بہ بیت کہ روس ھما لھتیں میان اُستمانی ڈیھاں چہ یکے کہ آھاں یک سالے ءَ چہ گیشتریں وھد ءِ تہ ءَ تالبانی ڈیھہ ءِ سرءَ زورگری ءَ پد کابل ءَ وتی سفارت جاہ برجاہ داشتگ۔ اگاں چہ ماسکو طالبان ءِ واکداری ءَ سرکاری رد ءَ نہ من اِیت، بلے آ پٹرول ءُ دگہ آسراتی دیگ ءِ ھاتر ءَ اپسراں گوں گپ ءُ رَپ کنگ ءَ اِنت۔

سربیتگیں ھالانی ردءَ ناشناسیں سلاہ بندیں مردماں شال ءَ چہ بلوچستان مزن شھدربرجاہ ءِ نودربر زورانسری آوار جتگ، ھمے پئیم ءَ چہ کراچی ءَ یک مردمے لشکریاں آوار جنی ءَ پد بیگواہ کُتگ۔

شال وئیل ءِ اھوال دیان ءَ پشتون تحفظ موؤمنٹ شال ءِ رھشون زبیر شاہ آغا ءَ گُشتگ کہ بلوچستان شھدربرجاہ ءَ فارمیسی ءِ تکءَ سیادی داروکیں نودربر سید اللہ ء حبیب اللہ گوستگیں روچ ءَ سھب ءِ ادار 7 ءِ نزیک ءَ آئی لوگ میکانگی دگ شال ءَ چہ وائرلس سیٹسانی پجیگ ءَ اتکگیں سادگیں پوشاک گوریں 4 ناشناسیں مردماں بیگواہ کُتگ ءُ گوں وت بُرتگ۔

ورناہ دزگیری ءَ پد ناشناسیں جاھاں برگ بیتگ کہ آئی ءَ پد آ بیگواہ اِنت۔

زبیر شاہ آغا ءِ ردءَ وھدے ورناہ ءِ کھول ارزی نبشتہ کنگ ءَ تھانہ ءَ شُتگ اِنت گُڑءَ پولیس ءَ ارزی نبشتہ کنگ ءَ چہ تچکی ءَ مہ کن کُتگ-

زانگ بہ بیت کہ بلوچستان ءَ زورانسری بیگواھی ءُ بیگواھی دروشمیں دزگیریانی وئیل یکشلی ءَ دیما پیداک اَنت، بلوچستان ءَ سیاسی ءُ انسانی ھقانی گل اے وئیلانی تہءَ ایف سی، سی ٹی ڈی، ءُ چیریں ادارگانی ھواری ءِ گپ ءَ جن اَنت۔

زورانسری بیگواھیانی بگیرءَ زھرشانی ءُ درانگازی یکشلی ءَ گوں گوستگیں بازیں سالاں چہ برجاہ اِنت۔ بلوچستان ءِ سیاسی گل بلوچستان ءَ زورانسری بیگواھیانی یکشلی ءَ دارگ ءُ بیگواھیں مردمانی دیما آرگ ءِ لوٹ کنگ ءَ اَنت۔

یات بہ بیت زیارت وئیل ءَ پد بیگواھیں مردمانی کھولانی نیمگءَ برجاھیں زھرشانی نندانک شال ءِ ریڈ زون ءَ مروچی 47 ءَ پد ھم برجاہ اِنت کہ اِشی تہءَ بلوچ ءُ پشتون سیاسی باسک مزنیں کساس ءَ بھر زیرگ ءَ اَنت۔

دومی سربیتگیں ھالانی ردءَ سند ءِ بنجاھی شھر کراچی ءَ بلوچانی بیگواہ کنگ ءِ درچ یکشلی ءَ گوں برجاہ اِنت دگہ یک مردمے لشکریاں آوار جنگ ءَ پر ناشناسیں ھنداں بُرتگ۔

بیگواہ بیتگیں مردمے پجار علی بخش ء امید علی ءِ نام ءَ چہ بیتگ۔

کھول ءِ ردءَ کراچی ءِ زرباری ھنکین عبدالرحمان گوٹھ ھاکس بے ءَ چہ ھمے مردم بیگواہ کنگ بیتگ۔ کہ آئی بُنکی سیادی بلوچستان ءِ دمگ آواران ءَ چہ گُشگ بئیگ ءَ اِنت۔

دوشمبے ءِ روچ ءَ بیگواہ بیتگیں علی بخش ءِ کھول ءَ رسانکدر ءَ گُشتگ سادگیں پوشاک گوریں کارمنداں آ چہ عبدالرحمان گوٹھ ھاکس بے ءَ چِست کُتگ، کہ داں انگت بیگواہ اِنت۔

بیگواہ بیتگیں مردمے کھول ءِ ردءَ آ لھتیں سال پیسر چہ آواران ءَ کراچی ءَ لڈ اِتگ اَنت۔ آ عبدالرحمن گوٹھ ءَ یک راشن ءِ دوکان ءِ جنزینگ ءَ بیتگ اَنت۔ کہ چہ اِشی ءَ وتی لوگے ھرچ درچ کش اِتگ اِش۔

بلوچ یکجہتی کمیٹی کراچی ءِ آرگنائزر آمنہ بلوچ ءَ چہ کراچی ءَ یکشلی ءَ گوں بے میاریں بلوچانی زورانسری بیگواھی ءِ سرءَ تُرس ءِ درشان کنان ءَ گُشتگ کہ سند سرکار یک نیمگ ءِ گوم ءَ کرار کنت ءُ دومی نیمگ ءَ زورانسری بیگواھیانی تہءَ گیشی آیگ ءَ اِنت۔ سند سرکار ءَ دروگیں پالیسی کارمرز کُتگ۔ سرکار ءَ ایمانداری ءَ گوں گپ رَپ کنگ لوٹیت۔

آمنہ بلوچ ءَ گُشتگ کہ یک بیگواھیں مردمے یل کنگ بیت گُڑءَ دومی نیمگ ءَ سئے بے میاریں مردم بیگواہ کنگ بنت۔ آئی ءَ چہ سند سرکار ءَ لوٹ کُتگ کہ کراچی ءَ چہ بیگواہ بیتگیں درستیں مردماں یل کنگ بہ بیت۔

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ تمپ ءِ دمگ تگران ءَ پوج ءِ سر ءَ بوتگیں اُرش ءِ زمّہ واری منّ اِتگ –

جارکش جئیند بلوچ ءَ گوشتگ کہ مئے سرمچاراں تمپ ءِ دمگ تگران کسان کوہ ءَ برجاھیں پاکستانی پوج ءِ پانگسے سر ءَ گرینڈ لانچر ءِ بازیں گولہ ءِ آس داتگ چریشی ءَ دژمن ءَ جانی ءُ مالی تاوان ءِ دیمپانی بوتگ انت –

جارکش ءَ دیمتر ءَ گوشتگ کہ اُرش ءَ پد دژمن پوج ءَ سرمچارانی انگیر کنگ ءِ جھد کُتگ بلے مئے سرمچارانی دومی ٹولی کہ پیسر ءَ آھاں سنگر بستگ ءُ نشتگ بوتگ انت آھاں دوبر رندگیری کنوکیں پوجیانی سر ءَ اُرش کُتگ ءُ اے اُرش ءَ دژمن ءِ سَے کارمند زدگ بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ مئے گل بی ایل اے اُرش ءِ زمہ واری من ایت ءُ کول کنت کہ سرڈگار ءِ آجوئی ءَ تاں مئے جھد برجاہ مان ایت –