TBP Balochi

روکپتی بلوچستان ءِ دمگ ایرانشھر ءَ ” طلاق ءِ کار گس ءَ ” پت گوں ھمراہ ءِ جنکیں زھگ ءَ کشگ بیتگ –

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ لوگی جیڑہ ءِ سر ءَ زامات ءَ تیرگواری کرتگ ءُ وتی زال گوں ھمراھے ناکو “جنک ءِ پت “تیر جتگ ءُ کشتگ اَنت-

وئیل ایرانشھر ءَ پیش اتکگ کہ اود ءَ بیران بیتگیں مردم ءِ پجار یوسف شھسواری جھمنند پیشک آباد بمپور ءِ نام ءَ زانگ بیتگ ءُ آئی ءِ جنک ءِ نام دیم ءَ نیتکگ –

ھالانی تہ ءَ گوشگ بیتگ وئیل لوگی جیڑھے ئے ءِ سر ءَ بیتگ ءُ طلاق ءِ کارگس ءَ آئی ءَ تیرگواری کرتگ ءُ ھردوک کشتگ ءُ وت تتکگ –

روکپتی بلوچستان ءَ کوشانی وئیل یکشل ءَ برجاہ اَنت وھد وھد ءِ سر ءَ کوشی وئیل رپورٹ بوگ ءَ اَنت-

بلوچستان شھدر برجاہ ءِ نودربرانی نیمگ ءَ برجم داشتگیں شطرنج ٹورنامنٹ گوستگیں روچ ءَ سوبمندی ءَ گوں آسر بیتگ – ٹورنامنٹ ءِ انتزامیہ چیئرمین عتیق مزار بلوچ ءِ رد ءَ یکم ستمبر ءَ چہ برجاھیں لئیب دو شمبے ءَ فائنل ءَ سر بیتگ ءُ آسر بیتگ – اے ٹورنامنٹ وتی کمک ءَ وت کنگ بیتگ ءُ نودربراں وتی جھداں آسر کرتگ-

فائنل گوازی شاہ سمال بلوچ ءُ شفیق خان ءِ میان ءَ لئیب کنگ بیتگ چریشی ءَ شاہ سمال ءَ کٹ اتگ ءُ کنگ داد وتی نام ءَ کرتگ – میچ ءِ گچینی ئیں مھمان ھیڈ آف براھوئی ڈیپارٹمنٹ ءِ ڈاکٹر منظور بلوچ بیتگ ءُ آ دگہ گچینی ڈاکٹر حامد بلوچ ءُ لالا منیر بلوچ ھوار بیتگ اَنت-

ستاشانی داد ءُ بھر بانگی ءَ پد ڈاکٹر منظور بلوچ ءَ ساڑی ئیں ٹورنامنٹ ءِ مردمان گوں تران کنان ءَ گوشتگ کہ اے وڑیں پرکاری ادارہ ءِ نیمگ ءَ برجم دارگ بہ بنت ءُ ورنایانی اے جزبگ ءُ ستاشانی ھروھد ءَ بیگ لوٹ ایت دانکہ ورنا وتی مازگی دروشماں پھتو بہ بنت – پروفیسر ڈاکٹر منظور بلوچ ءَ نودربر سدکی داتگ ءُ دلبڈی داتگ اَنت-

حامد بلوچ ءُ لالا منیر بلوچ ءَ نودربرانی کرد ساڑاتگ ءُ گوشتگ کہ اے وڑیں پرکاری ءُ ھبناکی ءِ ستاشانی کرتگ ءُ دیمترا ھم اے وڑیں گوازیانی برجم کنگ ءِ اوست داشتگ-

مھماناں انتزامیہ چیئرمجن عتیق مزار، شکیل سمالی بلوچ، علی بلوچ، انیس الرحمان بلوچ، ضیاء بلوچ، مرتضیٰ بلوچ، فدا بلوچ ءُ شکور بلوچ ءَ ھوار ھوار دگہ مھمناناں سوبمندیں ٹورنامنٹ ءِ ستاشانی کرتگ ءُ مراد باتی گشتگ اَنت-

بلوچستان ءِ دمگ پنجگور ءَ پاکستانی پوج ءَ پت گوں ھمراہ ءِ دو زھگاں آوار جتگ ءُ ناشناسیں جاھاں برتگ اَنت-

بیگواہ کنگ بیتگیں مردمانی پجار حاصل خان ء گوھرام، نور مھمد ء حاصل ءُ سائیں ء حاصل ءِ ناماں زانگ بیتگ اَنت-

دمگی مردمانی رد ءَ گرگ بیتگیں مردم گچک ءِ دمگ سیاہ دمب ءَ مروچی سھب ءَ پاکستانی پوج ءَ بیڑی ءِ وھد ءَ دزگیر کتگ ءُ برتگ اَنت-

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ اَنت ءُ گوستگیں روچاں ھزدار گریشہ ءَ بازیں کچے ءَ پاکستانی پوج ءَ بیڑ برگگ ءُ پت ءُ ھمراہ ءِ چار زھگاں ھوار شش مردم آوار جتگ ءُ برتگ اَنت-

ھزدار گریشہ ءَ آوار جنگ بیتگیں مردمانی پجار حیربخش ء شئے محمد، داد کریم ء شئے مھمد، مقصود ء شئے مھمد، نعیم ء شئے مھمد، شئے مھمد ءُ ڈاکٹر کریم بخش ء بھار ءِ ناماں زانگ بیتگ اَنت-

گوستگیں روچ ءَ ھزدار ءِ دمگ گریشہ ءَ پاکستانی پوج ءِ دست ءَ آوار جنگ بیتگیں شش مردمانی آوار جنی ءِ ھلاپ ءَ دمگی مردماں زھرشانی کنان ءَ مزن شھدگ بند کتگ ءُ زھرشانی کنوکاں پوج ءِ دست ءَ آوار جنگ بیتگیں مردمانی یل کنگ ءِ لوٹ اش کرتگ –

گوریچانی وزیرستان ءَ تحریک طالبان پاکستان ءُ پاکستانی پوج ءِ کارندھانی میان ءَ جنگ ءُ چوپ ءَ کیپٹنے ءَ ھوار پنچ کارندہ مرتگ اَنت ءُ ٹی ٹی پی ءِ دو جنگول ھم جنگ بیتگ اَنت-

پاکستانی پوج ءِ جارکش ءِ رد ءَ سیکورٹی پورسز ءَ گوریچانی وزیرستان ءِ دمگ بویا ءَ چیریں ھالے ءِ رد ءَ بیڑ برتگ – ھمے وھد ءَ پوج ءُ جنگولانی میان ءَ جنگ ءُ چوپ بیتگ ءُ چار سلاہ بندیں مردم جنگ بیتگ اَنت-

جنگ بیتگیں پوجی کارندھانی پجار بیست ءُ شش سالی ئیں کیپٹن عبدالولی، نائب سوبیدار نواز، ھوالدار غلام علی، لانس نائیک الیاس ءُ سپاھی ظفر اللہ ناماں زانگ بیتگ اَنت-

ھمے وڑ ءَ تحریک طالبان پاکستان ءَ وتی درشان شنگ کنان ءَ جارکش مھمد خراسانی ءَ گوشتگ کہ “بویا ءِ ھنس دویگر شگہ ءَ پوج ءِ نیمگ ءَ مجاھدانی بنجل ءِ سر ءَ بیڑ اش برتگ چریشی ءَ مجاھداں پسو داتگ ءُ دشمنیں پوج ءِ کیپٹن ولی وزیر ءَ ھوار پنچ کارندہ کشتگ ءُ چار زدگ کتگ اَنت-

آئی ءَ گوشتگ ما وتی دو ھمراھانی جنگ ءِ ھال ءَ راست کن ایں-

زانگ بہ بیت ٹی ٹی پی ءُ پاکستان ءِ سرکار ءِ میان ءَ گپ ءُ رپ ءِ گامگیج برجاہ اِنت چریشی ءَ جنگ بندی بیتگ ءُ بلے اے ماہ ءِ بندات ےَ پولیس ءُ پاکستانی پوج ءِ سر ءَ اُرش بیتگ اَنت ءُ اے اُرش ٹی ٹی پی ءَ وتی پھازگی گشتگ اَنت-

بلوچستان ءِ شھر ڈیرہ مراد جمالی ءَ توپانی جاور برجاہ اَنت دمگ منجو شوری ءَ یکیں کھول ءِ مردماں گوستگیں بازیں روچاں یک دکانے ءَ ساہ داشتگ اَنت بلے داں انگت ءَ دمگدارانی نیمگ ءَ ھچ کمکی آسراتی نیست اِنت-

سر وزیر بلوچستان عبدالقدوس بزنجو ءَ بلوچستان ءَ بندانی بُرگ ءُ توپانی ھارانی دیم پہ سندھ ءِ نیمگ ءَ ترینگ ءِ بھتام ءَ پٹ ءُ پولی جے آئی ٹی ءِ جوڑ کنگ ءِ سوڑگ بیتگ-

دومی نیمگ ءَ چمن ءَ مساپر بریں ریل دو ھپتگ ءَ پد پچ بیتگ ریل ءَ مساپر سوار کرتگ ءُ شال ءِ اسٹیشن ءَ چہ چمن ءَ رھادگ بیتگ-

بلوچستان ءَ ھور ءُ ھارانی سبب ءَ بندیں وانگجاہ پچ بیتگ اَنت-

ھمے وڑ توپان ءِ سبب ءَ گوستگیں بیست ءُ چار اداراں بیست ءُ چار مردم بیران بیتگ اَنت – این ڈی ایم اے ءِ رد ءَ درستاں گیش بیرانی نوزدہ سندھ ءَ بیتگ اَنت ءُ سَے پھل پرشتگ اَنت-

بلوچستان ءِ بنجاھی شھر شال ءَ شھید شاھینہ شاھین اکیڈمی آف آڑٹس ءِ نیمگ ءَ شال ءِ پریس کلب ءَ یک مراگشے برجم دارگ بیتگ –

مراگش ءَ شال ءِ ڈپٹی کمیشنر شیھک بلوچ، بلوچ ادیب ءُ کواس اے آر داد بلوچ، سوشل ویلفیئر مکران ءِ ڈائریکٹع مھمد عبدو بلوچ، چاگردی باسک گوھرام اسلم، انسانی ھکانی باسک جلیلہ ھیدر، آرٹسٹ کاشف مھمد،کیچ سول سوسائٹی ءِ کنوینر التقز سخی، بی ایس او ءِ بنجاھی انفارمیشن سیکرٹری بالاچ قادر، آرٹسٹ رابیع بلوچ ءُ شاھینہ شاھین ءِ گوھار معصومہ شاھین ءَ ھوقر بازیں کچے ءَ زلبول ءُ دگہ پھناتاں بندوکیں مردماں بھر زرتگ-

مراگش ءَ بھر زیروکیں مردماں تران کرتگ ءُ گوشتگ کہ مروچی شاھینہ شاھین ءِ شھیدی ءِ ھما پنچ ستمبر اِنت ءُ مروچی آئی ءِ کوش ءَ دو سال سرجم بیتگ –

آیاں گوشتگ کہ دو سال ءِ سرجم بیگ ءَ ابید ھم شاھینہ شاھین ءِ کوشکار ڈن ءَ ترگ ءَ اَنت ءُ اشی ءَ چہ ھمے سما بیت اد ءَ انساپ دورے گپے انساپ ءِ بوہ ھم نیست اِنت-

زانگ بہ بیت شاھینہ شاھین بلوچستان ءِ بلوچ زالبولیں اھوالکار ءُ آرٹسٹے بیتگ کہ آ پنچ ستمبر دوھزار ءُ بیست ءَ ماں کیچ ءَ کُشگ بیتگ اَت –

شاھینہ شاھین ءِ کوش آئی ءِ لوگ واجہ بزانکہ مھراب گچکی ءِ نام ءَ ایف آئی آر کنگ بیتگ اَت-

نام گپتگ کنگ بیتگیں جرمکار آئی ءِ لوگ واجہ تنی وھدی شاھینہ شاھین ءِ کوش ءِ بھتام ءَ دزگیر کنگ نہ بیتگ ءُ آئی ءِ بارو ءَ ھم سرکاری پھناتاں دگہ ھاسیں گامگیج زورگ ءَ گندگ ءَ آیگ ءَ نہ اَنت-

ھمے سال ءَ بلوچستان ءِ دمگ زیارت ءَ زورانسری آوار جنگ بوتگیں مردمانی دروگیں میڑ ءِ نام ءَ کُشگ ءِ بگیری ءَ بلوچستان ءِ بنجاھی شھر شال ءَ بیگواھیں مردمانی کھولاں مروچی چِل ءُھپت روچ سرجم انت کہ گورنر کارگس ءِ دیم ءَ زھرشانی نندانک ءَ نشتگ انت –

شال ءِ ریڈ زون ءَ برجاھیں نندانک ءَ سرجمیں بلوچستان ءَ زورانسری آوار جنگ بوتگیں مردمانی کھول ھوار انت، مروچی زورانسری آوار جنگ بوتگیں داد محمد مری ءِ گوھار حیر بی بی ءَ ھم نندانک ءَ بھر زرتگ – آئی ءَ وتی برات ءِ یل کنگ ءِ لوٹ کتگ کہ نُھ سال انت بیگواہ انت –

حیر بی بی ءَ ھمے وھد ءَ گوشتگ کہ مارا بازیں سالے بیت کہ ھمے زوراکی ءِ تہ ءَ وتی زند ءَ گوازینگ ءَ انت –

آئی ءَ وتی برات ءَ ھوار ایندگہ بیگواھیں مردمانی یل کنگ ءِ لوٹ کتگ ءُ گوشتگ کہ ریاست وتی کانود ءُ آمیدگسانی بہ کنت ءُ بیگواھیں مردماں دیم ءَ بیار ایت –

زانگ بہ بیت چِل ءُ ھپت روچاں یکشل ءَ برجاھیں زھرشانی نندانک چہ بیگواھیں مردمانی کھول نادراھ بوان انت – زھرشانی بنجل ءَ آھانی جاندراھی کمک مروچی ھم برجاہ بوتگ –

مروچی ءُ گوستگیں روچاں چہ بیگواھیں مردمانی کھولانی نیمگ ءَ چاگردی ترامجاھاں شنگ بوتگیں لھتے اکسانی تہ ءَ گندگ بیت کہ سمی دین، سیما بلوچ، سعیدہ حمید، ماہ زیب بیبو کمبرانی ءُ دومی کھولانی جاور نگیگ انت ءُ آھانی جانسلامتی ءَ پہ گلوکوس جنگ بوگ ءَ انت –

اے درگت ءَ بیگواھیں مردمانی کھولانی گوشگ انت کہ بیگواھیں مردمانی کھول وتی لوٹانی ھک ءَ زھرشانی کنگ ءِ سوب ءَ نادراہ بوگ ءَ انت بلے لھتے گام ھما دیم وتی ماڑیاں نشتگیں چمکُٹیں واکداراں ھچ سُد پرنیست –

زھرشانی نندانک ءِ رھشونی کنوکیں سمی دین بلوچ ءِ گوشگ انت کہ چل ءُ ھپت روچ انت بیگواھیں مردمانی کھول زیارت وئیل ءُ وتی دوستیگیں مردمانی یل کنائینگ ءِ ھاتر ءَ اد ءَ نشتگ انت انو جاور ھال ھمے وڑ ءَ انت کہ من ءَ ھوار درسیں بیگواھیں مردمانی کھول نادراہ بوان انت ءُ بنجل ءِ تہ ءَ آھانی الاج بوگ ءَ انت –

آئی ءِ گوشگ ات کہ چشیں بے وس ءُ چم کُٹیں ھاکم مشکل اِنت دنیا ءِ گوستانک ءَ دست بہ کپ ایت – مئے لوٹ بس ھمیش انت کہ مئے گوم ءَ ھم ھما وڑ بہ بیت کہ اے ریاست ءِ دومی شھری انت – ھچ کس سالاں سال بیگواہ کنگ مہ بیت آھانی سر ءَ کیس ءِ ھست گڑا آمیدگس ءَ آرگ بہ بنت –