بلوچستان ءَ ھوار سرجمیں دُگنیا ءِ نندوکیں بلوچاں 13 نومبر بلوچ شھیدانیءِ روچ ءِ درگت ءَ داشتگ۔ اے روچ ءَ بلوچ راج وتی ھر ھما پرزند ءُ اوبادگاب کہ راجی آجوئی، پجار، ءُ ھکانی پھریزءِ جھد ءَ وتی ھیشی سر ندر کتگ اَنت، آھانءَ سُھرچکیں دْروت پیش کنت۔
زانگ بہ بیت کہ بلوچ شھیدانی روچ ءِ دارگ سال 2010 ءَ بلوچ اسٹوڈنٹس آرگنائزیشن (آزاد) ءَ بنگیج کتگ ات، ایشی ءِ چیر دستی ءَ ہر سال 13 نومبر ءَ سرجمیں بلوچ وتی کلیں شھیداں یکجاھی ءَ یات کنگ ءِ درگتءَ اے روچءِ جار جنت۔
اے درگتءَ بلوچستان ءُ درملک ءِ جتا جتاھیں دمگاں مراگش، روانک، ءُ مچی برجم دارگ بنت کہ اودا بلوچ جہدکار ءُ لس مھلوک شھیداں یات کن اَنت۔ ءُ ھمے دابءَ اے روچءَ سرجمیں رسانکدر ءَ بلوچ شھید ءُ آھانی کُربانی یات کنگ بوھگ ءَ انت۔
شھیدانی یات ءَ بلوچ شُھدا کمیٹی ءِ نیمگ ءَ برجم داشتگیں مراگش ءَ گوں تران کنان ءَ ترانکاراں گشتگ کہ بلوچ راج ءِ ھاتر ءَ اے المی انت کہ آ وتی نوکیں پدریچ ءَ را وتی راجدپتر، جہد، ءُ شھیدانی کرد ءِ بابت ءَ سرپد بہ کنت، پرچا کہ آ پدریچ کہ وتی راجدپتر ءَ چہ بے سما بنت آ وتی پجار ءُباندات ءِ گچین کنگ ءُ پیسلہ زورگءَ جنجالانی آماچ بیت۔
آیاں دیمترءَ تران کنان ءَ گُشتگ کہ شھیدانءَ یات کنگ ایوک ءَ پہ یکیں روچءَ آھانی یات کنگ ءُ ستک ءُ شانی نہ اِنت بلکیں یک اھدے گوں وتءَ ءُ راجدپتر ءِ رکینگ، آھانی ھیال ءُ لیکھانی سر ءَ گپ ءُ تران کنگ ءُ آھانی جہد ءِ مول ءُ مرادءِ سرپد بوھگ ءِ یک ھاسیں روچے۔
گشتانک دیوکاں گشتگ کہ 13 نومبر بلوچ راج ءِ کربانی ءُ برجاھیں گھگیری ءِ چیدگ جوڑ بوتگ کہ پہ آؤکیں پدریچ ءَ یک کلوھے دیم ءَ کاریت کہ آ وتی پجار، ھک ءُ آجوئی ءِ جہد ءَ برجاہ بہ دار انت۔
گشتانک دیوکانی گشگ ات کہ بلوچ شھیدانی گرانبھاھیں دیمونی ءِ برورد ءَ بلوچ راجی زرمبش مروچی وتی منزل ءِ نیمگ ءَ گام جنان انت۔ بلوچ ورنا ءُ زالبول انگت ءَ وتی وتن ءُ بلوچ راجی مال ءُ مڈیانی رکّینگ ءَ وتی سراں ندر کنگ ءَ اَنت۔ شھیدانی پاکیں ھون بلوچستان ءِ سرڈگار ءِ زورگیریں مُلگرانءَ یک پدریں کلوھے دیگ ءَ اَنت کہ اے سرڈگار ءِ سر ءَ ھچ پیسلہ بید چہ بلوچ راج ءِ رزا ءَ منگ نہ بیت۔
آیاں گْشتگ کہ پاکستان یک زورگیریں تاگتے ءِ دروشم ءَ بلوچستان ءِ سر ءَ زورآور اِنت ءُ آئی ءِ وتگڑیں نمائندہ مرچی بلوچستان ءَ وتی پیسلھانی برجاہ دارگ ءِ ھاترا پوجی تاگت ءَ کارمرز کنگ ءَ اَنت ءُ اے گپ ءِ جارءَ جنگ ءَ اَنت کہ ھرچی کنٹرول اِنت بلے دگنیا ءَ اے گپ سرپد بوتگ کہ ریاست وتی تیوگیں تاگت ءِ کارمرز کنگ ءَ ابید انگت بے سوب بوتگ۔
گشتانک دیوکاں گشت کہ بلوچ شھیدانی پاک ءُ پلگاریں ھون ءِمُز یک آزات ءُوشھالیں بلوچستان اِنت ءُ شھیدانی دیستگیں وابانی پیلو کنگ ءِ واستہ جنز ءِ تہ ءَ وتی بھر ءِ ھوار کنگ بلوچ راج ءِ پرز اِنت۔
اشاب ابید شھیدانی یات ءَ یک بلوچی دیوانے ھم برجم دارگ بوتگ کہ ایشی ءِ تہ ءَ بلوچی ءُ براہوئی زبان ءِ گشندہ استاد میر احمد بلوچ، ساول کندیل، ءُ سرپراز واھد ءَ گوں وتی توتی الھانیں آواز ءَ بلوچی ءُ براہوئی سوت گشتگ انتءُ شھیدانءَ ستک شانی ندر کتگ۔