TBP Balochi

ھندوستان ءَ ایشین کپ ءَ پد مہ پد دو گوازیانی تہءَ پروش ورگ ءَ پد چہ ٹورنامنٹ ءَ در بیگ ءِ تُرس گیش بیتگ اَنت۔

گوستگیں روچ ءَ بیتگیں ایشین کپ ءِ سپر فور گوازی ءَ ھندوستان ءَ مھمانجل سری لنکا ءِ دیم ءَ اولی بیٹنگ کنان ءَ ھشت وکٹانی تاوان ءَ 173 رنز اڈ کُتگ۔ وھدیکہ ھندوستان ءِ رنزانی رندگیری کنان ءَ سری لنکا ءَ 19.5 اورزانی تہءَ 174 رنز اڈ کُتگ ءُ گوازی وتی نام ءَ کُتگ۔

ھندوستان ءِ کپتان روھیت شرما ءَ جوانیں لئیب کنان ءَ 72 رنز اڈ کُتگ وھدیکہ سوریاکمار یادو ءَ 34 رنز اڈ کُتگ۔ ھندوستان ءِ مزن نامیں بیٹسمین ءُ پیسرگیں کپتان ویرات کوھلی زیکیں گوازی ءَ چار بال لیب کُتگ ءُ ھچ رنز نہ کُتگ ءُ آوٹ بیتگ۔

سری لنکا ءِ نیمگ ءَ جوانیں بالنگ کنان ءَ دلشان مدھوشنکا ءَ سئے وکٹ زرتگ وھدیکہ چمیکہ کرونارتھنے ءُ سری لنکا ءِ کپتان داسُن شناکہ ءَ دو دو وکٹ گپتگ۔

سری لنکا ءِ نیمگ ءَ جوانیں لئیب کنان ءَ پتھم نسّانکہ ءُ کُسَل مینڈِس ءَ 50 50 رنز اڈ کُتگ ءُ سری لنکا ءِ کپتان 33 رنزانی سرءَ ناٹ آوٹ بیتگ ءُ گوازی وتی نام ءَ کُتگ اِش۔

ھندوستان ءِ نیمگ ءَ یوزویندرہ چاھل ءَ جوانیں بالنگ کنان ءَ سئے وکٹ گپتگ۔

ھندوستان ءِ پد مہ پد دو لئیبانی تہءَ پروش ورگ ءَ پد نی ھندوستان ءِ فائنل ءَ رسگ ءِ ھاترءَ پاکستان ءِ دوھیں گوازیانی سرءَ بندوک اِنت اگں پاکستان اوگانستان ءُ سری لنکا ءِ دیما وتی لئیباں پروش بہ وارت ءُ پدءَ ھندوستان وتی آیوکیں گوازی ءَ اوگانستان جوانیں رنگے ءَ پروش بہ دنت گُڑءَ بوت کنت پہ ھندوستان ءَ فائنل ءَ روگ ءِ راہ جوڑ بہ بیت۔

گورنر ہاؤس ءِ دیم ءَ بیگواھیں مردمانی کھولانی نیمگ ءَ زھرشانی نندانک برجاہ اِنت۔ مروچی چہ ھاران ءَ بیگواھیں شاہ فھد ءُ رحیم الدین ءِ کھولاں بھر زرتگ ءُ زھرشانی یاداشت کُتگ۔

شاہ فھد ءِ گوھار نادیہ بلوچ ءَ نندانک ءَ بھر زرتگ ءُ گُشتگ کہ آئی ءِ برات شانزدہ مارچ ءَ سی ٹی ڈی ءَ شپ ءَ لوگ ءَ بیڑ بُرتگ ءُ دزگیر کنگ ءَ پد آوار جتگ ءُ ناشناسیں جاھاں برتگ کہ آ داں انگت بیگواہ اِنت۔

آئی ءَ گُشتگ بیڑ ءِ نیام ءَ لشکریاں لوگ ءَ ھستیں زراں ھوار گران نھادیں سامان ھم بُرتگ اَنت۔ آئی ءَ گُشتگ منی مات وتی زھگ ءِ ودار ءَ دل ءِ نادراہ جوڑ بیتگ وھدیکہ ما درستیں کانودی ءُ راہ ءُ در کارمرز کُتگ اَنت اِشی ءَ ابید منی برات یل کنگ نہ بیتگ۔

ھاران ءِ دگہ یک جھمنندیں ءُ بیگواھیں رحیم الدین ءِ گوھار حاکمین بلوچ ءَ مروچی نندانک ءَ بھر زرتگ ءُ وتی زھرشانی یاساشت کنائنتگ۔ آئی ءَ گُشتگ آئی ءِ برات 26 اگست 2016 ءَ پاکستانی لشکریاں شپ ءَ بے وھد ادار دو ءَ لوگ ءِ سر ءَ بیڑ بُرتگ ءُ آوار جتگ کہ داں انگت بیگواہ اِنت۔

آئی ءَ گُشتگ برات ءِ زورانسری بیگواھی ءِ بگیر ءَ ما درستیں کانودی ءُ راہ ءُ در کارمرز کُتگ اَنت بلے چہ اے ریاست ءِ نیمگ ءَ مارءَ ابید مایوسی ءَ دگہ ھچ نہ رس اتگ۔

آئی ءَ گُشتگ مئے لوگ ءِ لاپ دیوک تھنا یکیں رحیم الدین بیتگ۔ منی مات ءُ پِت پیر ءُ آجز اَنت، اے ھپت سالانی تہ ءَ ما چہ کجام درد ءُ اندوھاں گوستگیں اے درگت ءَ تھنا ما زانیں۔ آئی ءَ لوٹ کنان ءَ گُشتگ کہ منی برات یل کنگ بہ بیت۔

امریکی رسانکدر ءَ ٹاہ داتگ کہ ایف بی آئی ءِ بیڑ ءَ امریکہ ءِ پیسرگیں سروک ڈونلڈ ٹرمپ ءِ لوگ ءَ چہ نیوکلر رازانی سر ءَ بندوکیں پرارزشتیں ءُ چیریں کاگد ھم دزکپتگ اَنت۔

امریکی رسانکدر ءِ رپورٹ ءِ رد ءَ کاگد ءِ تہ ءَ یک درملکی تاکت ءِ نیوکلر بودشتی ءُ پھازگ ءِ گپ ھوار اَنت، کاگد ھمینچو پرارزشت اِنت کہ تھنا سروک یا اگاں آئی ءِ کابینہ ءِ باسک ءِ آئی ءَ چارگ ءِ پرمان نامگ دات کنت۔

امریکی رسانکدر ءِ رپورٹ ءَ گُشگ بیتگ کہ چُشیں کاگدانی دزگرگ ءِ ھاتر ءَ ھاسیں پرمان نامگ ءِ لوٹ بیت اِنت، چُشیں پرارزشتیں موادانی ٹپاسگ ءِ ھاتر ءَ ایف بی آئی ءُ اٹارنی ءَ ھاسیں پرمان نامگ لوٹگ کپ ایت۔

در ملکی اھوالکاریں ایجنسی ءِ اے درگت ءَ گُشگ اِنت کہ انساپ ءِ ادارگ ءِ اے درگت ءَ گُشگ اِنت کہ چُشیں پرارزشتیں چیریں کاگد گمان بیت کہ چیر دیگ بیتگ اَنت، ٹرمپ ءَ لوٹ اِتگ کہ پرارزشتیں موادانی درگت ءَ ایف بی آئی ءِ پَٹ ءُ پول ءِ تہءَ نگیگی ودی کنگ بہ بیت۔

ایف بی آئی ءَ گوستگیں ماہ ءَ 8 اگست ءَ فلوریڈا ءَ پیسرگیں امریکہ ءِ سروک ڈونلڈ ٹرمپ ءِ مارالاگو ریزورٹ ءِ سر ءَ بیڑ بُرتگ اَت، اے ریزورٹ ھاسیں باسکانی کلب ءِ رد ءَ کارمرز بیت اِنت۔

چریشی ءَ پیسر ھم پرارزشتیں کاگدانی درگت ءَ ٹرمپ ءُ نیشنل آرکائیو ءِ نیام ءَ مزنیں جیڑہ ءِ ودی بیتگ اَت۔

ٹرمپ ءَ جنوری میں ھار من اِتگ اَت ءُ کاگدانی 15 بکس واکداراں داتگ اِت اَنت۔ داتگیں ھمے بکسانی تہ ءَ 184 کاگدانی سر ءَ پر ٹاپ سیکرٹ، سیکرٹ اور کانفیڈینشل ءِ نشان بیتگ اَنت۔

ھمے کاگدانی چارگ ءَ پد ایف بی آئی ءَ ٹرمپ ءِ لوگ ءِ سر ءَ بیڑ برگ ءِ پیسلہ کُتگ اَت۔ ایف بی آئی ءِ نیام ءَ کپگ ءَ پد ٹرمپ ءِ وکیلاں دگہ 38 چیریں کاگد داتگ اِت اَنت۔

اھوال ءِ رد ءَ ٹرمپ ءِ وکیلاں سرٹیفکیٹ ءِ تہ ءَ حلفیہ گُشتگ کہ اے گڈی مواد اَنت۔

در ملکی خبر ایجنسی ءِ رد ءَ ایف بی آئی ءِ گورءَ ٹرمپ ءِ لوگءَ گیشتر ھترناکیں ءُ پرارزشتیں موادانی ھستی ءِ منانک ھم بیتگ۔

پاکستان ءَ آیوکیں ماھانی تہءَ گیشتر ھئورانی گمان اِنت۔ اقوام متحدہ ءَ گمانی ھئورانی سوب ءَ ھار ءُ توپانانی سوب ءَ نگیگیں جاورانی گنتر بئیگ ءِ تُرس ءِ درشان کُتگ۔

اقوام متحدہ ءِ ادارگ پہ پناہ گیرءِ اے ردءَ گُشگ اِنت کہ پاکستان ءَ آیوکیں ماھانی تہءَ گیشتر ھئورانی گمانی اِنت۔

یو این ایچ سی آر ءِ ردءَ تُرس اِنت کہ ھاراں چہ سانمندیں مردمانی جاورھال گنتر نگیگ بنت۔ گیشتر ھئور لکھانی کچ ءَ توپان ءِ سانمندیں مردمانی جنجالاں گیشتر ودین اَنت۔

جھانی گل ءِ ردءَ گمانی ھئور ءُ توپانانی سوب ءَ بے لوگیں مردمانی کساس ود اِیت۔

دومی نیمگ ءَ نیشنل ڈیزاسٹر ایجنسی ءَ گُشتگ کہ ھارانی سوب ءَ پاکستان ءَ 3 کروڑ 30 لکھ ءَ چہ گیشتر مردم بے لوگ بیتگ اَنت۔

شال ءِ دمگ میکانگء دگ ءَ گوستگیں شپ ءَ بزانکہ شش ستمبر ءِ شپ ءَ دزبمب تراکے ءَ پولیس کارندہ، زالبول ءُ زھگے ءَ ھوار ھپت مردم زدگ بیتگ اَنت-

پولیس ءِ رد ءَ وئیل خدائیداد چوک ءِ نزیک ءَ میکانگی دگ ءَ پیش اتکگ اود ءَ ناشناسیں مردماں بیکری ءِ نزیک ءَ دزبمبے چگل داتگ ءُ پشت مانداتگ ءُ شتگ اَنت-

تراک ءَ ھپت مردم زدگ بیتگ اَنت کہ درمان کنگ ءَ سول ھسپتال ءَ برگ بیتگ اَنت-

پولیس ءِ رد ءَ زدگ بیتگیناں پولیس کارندہ، زالبول ءُ زھگے ھوار اَنت، تراک ءَ نزیکیں دکانانی شیشگ پرشتگ اَنت-

گوستگیں روچ ءَ ھم کلات ءَ یونین کونسل گزگ ءِ ھند اناری ءَ ناشناسیں مردماں تراکناکیں شورواں گوں موبائل ٹاور نشانگ کتگ-

لیویز ءِ رد ءَ یوفون ٹاور گوستگیں روچ ءَ ناشناسیں مردماں تراکناکیں شورواں گوں تاوان داتگ چریشی ءِ سبب ءَ ٹاور بند بیتگ – ناشناساں دو تراک ءَ پد موبائل ٹاور ءِ دور دیگ ءَ تیرگواری ھم کتگ-

شال سرکلر دگ سٹی نالہ ءَ پولیس ءِ نیمگ ءَ چہ نشہ باپاریانی بگیری ءَ بیڑبرگ بوتگ-

پولیس ءَ بیڑ ءِ میان ءَ تیرگواری ءِ رِد ءَ ھشت نشہ بھاکنوک کُشتگ اَنت وھدیکہ سٹی نالہ ءَ برجاھیں بازیں نشھی بنجل ڈروینتگ اَنت-

پولیس ءَ گْوشتگ کہ نشہ باپاریانی بنجلاں چہ مزنیں کچے ءَ سلاہ ءُ نشہ دزکپتگ-

اِھوالکارانی رِد ءَ میڑ ءِ میان ءَ کُشگ بوتگیں نشہ باپاریانی لاش دستیگ کتگ اَنت ءُ چار ءُ ٹپاس ءِ کنگ ءِ ھاتر ءَ نادُراھجاہ ءَ برگ بیتگ اَنت-

بلوچستان لبریشن فرنٹ ءَ آواران ءِ ھند جاؤ ڈولیجی ءَ پاکستانی لشکر ءِ سر ءَ بارودی سرنگ اُرش ءِ زِمہ واری منّ اِتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی شِنگ کُرتگیں درشان ءِ تہ ءَ گْوشتگ کہ چار تُومشان (4 ستمبر) یکشمبے ءِ ادار پنچ ءَ مئے سرمچاراں آواران ءِ ھند جاؤ ڈولیجی ءَ پاکستانی لشکر ءِ بُنجل ءِ راھسر ءَ بارودی سرنگ چیر کُرتگ۔ بارودی سرنگ ءِ زد ءَ اتکگیں لشکر ءِ پنچ کارمند مُرتگ ءُ یکّے ٹپّی بوتگ۔

میجر گْوھرام بلوچ ءَ وتی درشان ءِ دیمتِر ءَ گْوشتگ کہ  بارودی سرنگ اُرش ءِ کمیں دُوری ءَ پاکستانی لشکر ءِ بُنجل اِنت، پاکستانی لشکر ءِ کارمند ھمے راہ ءَ کارمرز کن اَنت ءُ پہ بُنجل ءِ واستا آپ کار اَنت۔ مئے سرمچاراں لشکر ءِ راہ ءِ سر ءَ بارودی سرنگ چیر کُرتگ۔ لشکر ءِ شش کارمند ءَ ھمے راہ کارمرز کُرتگ ءُ چہ نزّیکیں کَور ءَ آپ آرگ ءِ واستا رَوَگ ءَ بوتگ اَنت۔  بارودی سرنگ ءِ زد ءَ اتکگیں لشکر ءِ پنچ کارمند مُرتگ اَنت ءُ یکّے ٹپّی بوتگ۔

جارکشّ میجر گْوھرام بلوچ ءَ دیمتِر ءَ گْوشتگ کہ سربتگ ءُ دُژمِنیں پاکستانی لشکر ءَ تْراک ءَ پد کش ءُ گْور ءِ ھنداں لسّ مھلوک زُورانسری ءِ نِشانگ کُرتگ ءُ بالگرد ءِ کُمکّ ءَ وتی مُرتگیں لشکر ءِ کارمَندانی جون بُرتگ اَنت۔

بلوچستان لبریشن فرنٹ ءِ جارکشّ میجر گْوھرام بلوچ ءَ وتی درشان ءِ گُڈّسر ءَ گْوشتگ داں زُورگِپتیں بلوچستان ءِ آجوئی ءَ دُژمِنیں لشکر ءِ سر ءَ مئے اے اُرش گوں تْرندی ءَ برجاہ بَہ اَنت۔

نبشتانک: ھمبلو بیا کہ زھیرواراں

نبشتہ کار: لیاقت ارمان

دی بلوچستان پوسٹ

تھاریں شپ گندئے روچ بہ بیتیں تو زوت وت ءَ پمن ءَ سر بہ کرتیں تئی نیادانی شپ چون ڈولڈار اَت گندئے تئی بچکندانی نیاد ءَ پمن ءَ جھانے ءَ وت ءَ سمبھینتگ ات-

دگنیا ءِ تہ ءَ ایماندار ءُ بچکند دوستیں ھمبل سک کم آدمی زات ءَ دست کپ ایت بگندئے من ھما نیگبھتاں چہ یکّے آں کہ من گوں تو دوچار کپت ءُ تئی مھر بَریں درچک ءِ ساھگ ءَ لھتے یات ایربُرت۔

مرچی ند من ءَ لاچار کنگ ءَ اِنت کہ من گوں نزور ءُ پروشتگیں ھیالاں ھما مھرانی سوگات پہ تو لھتے پرشتگیں لبز پہ تو راھی بکن آں۔ اے گپ ءَ من پہ جزم گْوشاں کہ ترا اِشانی ھاجِت نیست اِنت بلے ھما گوات ءِ وشبو اِنت کہ من ءَ نندگ ءُ آرم ءَ نیلگ ءَ اِنت-

وھدیکہ تو رپت ءُ شت ئے چہ منی نِگاھاں دور ھما بیگاہ ءَ بِگر روچ ء مرچی تاں تی بچکند ءُ وشیں گپ دل ءَ چو گُش ئے البُرز ءِ کوہ ءَ مِک انت۔ ھرکس تئی مھروانی ءِ کسہ ءَ گش ایت تئی توسیپ ءُ ستاہ ءَ کنت بلے زان ئے اے یک کسانیں ساھتے ءَ چہ پد ترا بے ھیال بنت ءُ گوں دگنیا ءِ ایندگہ گم ءُ گڈتی ءَ گوں گیروشگ بنت۔

مدام من تئی کسان سالیں اکس ءَ چاراں ءُ جیڑاں کہ اے کجام مھروانے اِشک اَت کہ ترا مرید ئِے جور کُت ءُ تو مئے جتائی کمو ھم مان نیاؤرت ءُ دلجمی گوں کوش بریں زھیراں گوں رپت ءُ شت ئے-

منی کرا بس تئی لھتے یات پشت کپتگ ھمے کہ سُھب ءُ بیگاہ ءَ بولان ءِ ھوٹل ءِ ٹھک ءُ وش گپّی بہ بنت یا کہ نیم روچ ءَ شال ءِ دمکانی سھیل ءُ سوا ھما اِنت کہ تو رپتگے اے درست من شموشتگ اَنت ءُ کسّے نیست کہ تئی رنگ ءَ بہ جنت ءُ من ءَ گوں بچکنداں بے سما بکنت ءُ کس ھم نہ گُش ایت کہ سگریٹ مکش من تئی ھمراہ نباں ءُ گوں تو گپ نہ کناں بس گُڈسرا ھمے گُشاں کہ چم تُنیگ اَنت پہ تئی بچکندگاں بس کمو بْیا من ءَ گوں کندگ آں بے سما بکن ھمبلو ءُ ھمبلو-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔