TBP Balochi

نیٹو ءِ باسکیں ملک البانیہ ءَ جولائی ءَ بیتگیں سائبر اُرش ءِ درگت ءَ تھران ءِ سرءَ بھتام جنانءَ چارشمبے ءِ روچ ءَ درستیں ایرانی سفارت کاراں سفارتی کارمنداں 24 ساھتانی تہءَ ملک یل کنگ ءِ پرمان داتگ۔

البانیہ ءِ سر وزیر ایدی راما ءَ یک تامری درشان ئے تہءَ گُشتگ، “سرکار ءَ اسلامی جمہوریہ ایران ءَ گوں سفارتی سیادی ھلاس کنگ پیسلہ کُتگ۔”

راما ءَ گُشتگ کہ، “اے ترندیں گامگیج سائبر اُرش ءِ سنگینی ءُ ھترناکی ءِ درگت ءَ جوانیں پیسلہ اِنت۔ ایرانی اے اُرش ءَ چہ سرکاری کاراں اوشت آماچ کنگ، ڈیجیٹل نظام ءَ ھلاس کنگ، ریاستی ریکارڈزاں ھیک کنگ، سرکاری انٹرانیٹ الیکٹرانک رھوتانی دُزی کنگ ءُ ملک ءِ تہءَ نگیگیں ءُ بے باوری ءِ جاور ودی بئیگ ءِ تُرس ودی بیتگ اَت۔”

چدو پیسر البانوی سر وزیر ایدی راما ءَ 15جولائی ءَ بیتگیں سائبر اُرش ءِ پَٹ ءُ پول ءَ پد ایرانی سفارت کاراں سفارت جاہ ءِ کارمنداں 24 ساھتانی تہءَ ملک ءَ یل کنگ ءِ پرمان داتگ اَت۔

ایران ءَ البانیہ ءَ بیتگیں سائبر اُرشانی پُشت ءَ آئی ھواری ءِ بھتام “بے بن ھشت” گُشتگ اَنت۔

ایرانی وزارت خارجہ ءِ نیمگ ءَ شنگ بیتگیں درشان ئے تہءَ گُشگ بیتگ کہ “سفارتی سیادیانی ھلاس کنگ ءِ البانیہ ءِ پیسلہ اپسوزی ءُ تنگ نظری ءِ سرءَ بندوک اِنت۔”

دومی نیمگ ءَ امریکہ ءَ سائبر اُرشانی پُشدرءَ البانیہ ءِ نیمگ ءَ ایران ءِ بگیر ءَ جتگیں بھتامانی سرءَ البانیہ ءِ پیسلہ ساڑءَ اِتگ ءُ گُشتگ کہ آ وتی نیٹو ھم سنتیں ملک ءِ سرءَ بیتگیں سائبر اُرش ءِ پسہ ءَ ایران ءِ بگیر ءَ گیشتر گامگیج زرت کنت۔

برتانیہ ءِ نیشنل سائبرسکیورٹی سینٹر ءَ ھم البانیہ ءِ سرکارءِ بگیر ءَ بیتگیں سائبر اُرشانی پُشدر ءَ ایران سرءَ بھتام جتگ ءُ گُشتگ کہ ایرانی ریاست ءَ بندوکیں کارمند “باوری دروشم ءَ” اے اُرش ءِ زمہ وار اَنت۔

زانگ بہ بیت کہ ایران ءُ البانیہ ءِ نیام ءَ جاور چہ سال 2014 ءَ نگیگ اَنت وھدیکہ تیرانا ءَ ایرانی پناگیریں اپوزیشن ٹولی مجاہدین خلق ءِ کساس 3000 باسکاں باھوٹی داتگ اَت۔

پشمبے ءِ روچ ءَ کلات ءَ پولیس ءِ تھانہ ءِ سر ءَ یک جکسوکیں تراکے بیتگ چریشی ءَ پولیس تھانہ ءِ ماڑی ءَ تاوان بیتگ، تراک ءِ سبب ءَ دمگ ءِ مردم ترس آماچ بیتگ اَنت-

پولیس ءِ بنداتی ھالانی رد ءَ تراک ڈیٹونیٹر ءَ چہ بیتگ – دمگی مردمانی رد ءَ ڈیٹونیٹر توپانی ھاراں پد پولیس تھانہ دیوال ءِ کپگ ءَ پد دزکپتگ چریشی ءِ سر ءَ پولیس کارندہ چیک کنگ ءَ بیتگ اَنت ئِے ناگتی تراک بیتگ-

تراک ھنچش ترند بیتگ دور دور ءَ اشکنگ بیتگ چریشی ءِ سر ءَ دمگی مردم ترس آماچ بیتگ اَنت-

پولیس ءِ رد ءَ تراک ءَ زدگ بیتگیں مردم نادراہ جاہ ءَ سرکنگ بیتگ اَنت-

تراک ءِ ھال ءِ سر بوگ ءَ پولیس ءُ ایف سی ءِ کارندہ تراک جاہ ءَ سر بیتگ اَنت ءُ گیشیں پٹ ءُ پول اش بندات کتگ داں انگت ءَ کسے ءَ زمہ واری نہ زرتگ ءُ ناکہ دگہ دزگیری اتکگ اَنت –

کلات بلوچستان ءِ ھما جاھاں ھوار بیت اِنت کہ اود ءَ جنگ آماچی اَنت چریشی ءِ سر ءَ پوج ءَ ھوار سرکاری جاہ ھم نشانگ بیگ ءَ اَنت کہ اشانی تہ ءَ گیشتریں زمہ واریاں بلوچ آجوئی لوٹوکیں سلاہ بندیں گل منّگ ء اَنت –

کینیڈا ءَ کارچ اُرش ءَ ھواریں دومی گمانی جرمکار دزگیری ءَ پد بیران بیتگ۔

3 روچ پیسر قبل کینیڈا ءِ پرگینگ سسکیچوین ءَ کارچ ءِ اُرش یے تہءَ 10 مردم کُشگ بیتگ ءُ 18 ٹپی بیتگ اِت اَنت۔

پولیس ءَ اُرشکارانی پجار 2 برات ڈیمیئن سینڈرسن ءُ مائیلز سینڈرسن ءِ ناماں چہ کنان ءَ آیانی عکس شنگ کُتگ اِت اَنت۔

چریشی ءَ پد کینیڈین پولیس ءَ اُرشکاریں دوھیں براتانی پَٹ ءُ پول بندات کُتگ اَت۔

یک اُرش کاریں براتے ڈیمیئن سینڈرسن 2 روچ پیسر ءَ مرتگیں جاورانی تہءَ دزکپتگ کہ اِشی درگت ءَ کینڈین پولیس واکدارانی گُشگ اِنت کہ ڈیمیئن گمان اِنت کہ آئی برات ءُ وئیل ءِ مستری کنوک مائلز سینڈرسن ءَ تیر جتگ ءُ وت تتکگ۔

پولیس کے ردءَ کارچ جنی ءِ اُرش ءَ ھواریں دومی جرمکار سے مائلز سینڈرسن چہ کری کمیونٹی ءَ دزگیر کنگ بیتگ اَت، بلے آ چہ دزگیری ءَ پد بیران بیتگ۔

بلوچستان ءِ دمگ ڈیرہ بُگٹی ءِ جھمنِندیں چار ورنا چہ کراچی ءَ بیگواہ کنگ بوتگ اَنت۔ بُنشوُنی ھالکار ءِ رِد ءَ دو شمبے ءِ روچ ءَ دو بّرات مھمد سابر ء میردھا بُگٹی ءُ شاہ مور ء میردھا بُگٹی ءَ ھوار نسیر اھمد ء دودا بُگٹی ءُ مھد پاروک ء شاہ بکش بُگٹی پہ الاج ءُ درمانی کراچی ءَ شُتگ اَنت کہ چہ ھوٹل ءَ لشکری کارمنداں لٹ شاپی کنان ءَ چِست ءُ بیگوہ کُتگ اَنت ءُ انگت بے گواہ اَنت۔

ھالانی رِد ءَ شاہ مور ء میردھا بُگٹی دل ءِ نادْراھی ءِ آماچ اِنت، گوں وتی نزیکیں سْیاداں پہ الاج ءُ درمانی ءَ کراچی ءَ شُتگ اَنت کہ اود ءَ چیریں ادارھاں چِست کُتگ اَنت ءُ انگت بے گواہ اِنت۔

کھول ءِ گوشگ ءِ اِنت آیانی آوار جنگ ءَ پد آیانی ھچ ھال نیست کہ کجا برگ بیتگ اَنت-

زانگ بہ بیت بلوچستان ءَ مردمانی آوار جنگ یکشل ءَ برجاہ اَنت ءُ دومی نیمگ ءَ شال ءَ بیگواھیں مردمانی کھولانی زھرشانی چل ءُ نُھمی روچ ءَ ھم برجاہ اِنت-

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ دو مردم شراب ءِ ورگ ءَ بیران بیتگ اَنت –

ھالانی تہ ءَ گوشگ بیتگ کہ ھرودکیں مردماں گوستگیں شپ ءَ شراب وارتگ ءُ چریشی ءَ ھردوک مرتگ اَنت-

بیران بیتگیں مردمانی سیادی جدگال ءُ دھقانی ٹک ءَ اِنت –

اھوال ءِ رد ءَ چھبار ءَ لس مردم شراب جوڑ کنت ءُ چریشی ءَ سبب ءَ اے شراب زھر آماچ بنت ءُ مردمانی جان ءُ ساھاں تاوان دے اَنت-