ھندوستان ءِ نامداریں وشکند مراگش دی کپیل شرما شو یک رندے پد ءَ پیداک اِنت سونی ٹی وی ءَ۔ دی کپیل شرما شو لھتیں ماہ ساری بند بیتگ اَت۔
ھندوستان ءِ نامداریں کامیڈین کپیل شرما یک رندے پد ءَ گوں وتی مراگش ءَ دی کپیل شرما شو ءَ ھمک ھپتگ شمبے ءُ یک شمبے ءَ شپاں ادار نُھ ءُ نیم ءَ گوں وتی مراگش ءِ نوکتریں سیزن ءَ پیداک اِنت۔
دی کپیل شرما شو لھتیں ماہ ساری بند کنگ بیتگ اَت، ھمے نیام ءَ کپیل شرما ءُ آئی ءِ ٹیم امریکہ، کینیڈا ءُ آسٹریلیا ءَ شو کنگ ءَ دزگٹ بیتگ اَنت۔ بلے نی سونی ٹی وی ءَ یک رندے پد ءَ کپیل شرما، چندن پربھارکر، کیکو شاردہ، سمونا چکرورتی ءُ ارچنا پورن سنگھ گوں بازیں نوکیں ازمکاراں اے مراگش ءِ تہ ءَ گندگ بنت۔
زانگ بہ بیت دی کپیل شرما شو اے وھد ءَ ھندوستان ءَ مستریں کامیڈی شو زانگ بیت کہ اِشی ءِ تہ ءَ ھندوستان ءِ گیشتریں ازمکار وتی تامرانی پروموٹ کنگ ءَ کائنت۔ اِشی ءَ ھوار ھندوستان ءِ کرکٹراں ھوار دگہ لئیباں گوں سیادی داروکیں لئیبی ھم مدام اے شو ءَ گندگ بنت۔
کپیل شرما شو ءِ گوستگیں سیزن ءِ یکے چہ درستاں گھتریں کارست ءِ کرشنا ابیشک بیتگ، کہ آئی ءَ مدام جتا جتائیں ازمکارانی دروشم ءَ اتکگ آیانی گیگانی کُتگ ءُ مھلوک کندینتگ اَنت۔ اے سیزن ءِ تہ ءَ داں انگت کرشنا گندگ بئیگ ءَ نہ اِنت۔ بلے گوستگیں روچاں کرشنا ءُ کپیل شرما یکجاہ آسٹریلیا ءَ مراگش ءَ گون بیتگ اَنت۔