TBP Balochi

بیگواھیں مردمانی یل کنگ ءِ کیس چیف جسٹس اطھر امن اللہ ءَ دیم ءَ آورتگ ءُ گوشتگ شھریانی بیگواہ کنگ کانون ءِ پروشگ ءِ بروبری اِنت-

مروچی اسلام آباد ھائی کورٹ ءَ بیگواھیں مردمانی یل کنگ ءِ کیس ءَ سروزیر پاکستان شھباز شریف پیش بیتگ، آئی ءِ آیگ ءَ پھزداری ترند کنگ بیتگ-

گوشدارگی ءِ بندات ءَ پیش آمیدگسی کارمنداں گوشتگ کہ چیف جسٹس آمیدگس ءَ مروچی بس بیگواھیں مردمانی کیس ءَ گواشدار ایت ءُ دگہ کیسانی لسٹ یک گور کنگ بیتگ اَنت-

کیس ءِ بندات ءِ واستا بیگواھیں مردمانی کھول آمیدگس ءَ سر بیتگ اَنت، بیگواھیں اھوالکار مدثر نارو ءِ کسان سالیں زھگ آمیدگس ءِ کوٹی ءَ ھم جاڑیگ بیتگ ءُ شھباز شریف ءَ گوں دچار کپتگ، ھمے وڑ آمنہ مسعود جنجوعہ ءَ آمیدگس ءَ سر بیتگ –

چیف جسٹس اسلام آباد ھائی کورٹ جسٹس اطھر من اللہ ءَ کیس ءِ بندات کنان ءَ سروزیر شھباز شریف، اٹارنی جنرل ءُ وزید کانون روسٹرم ءَ اتکگ بیتگ اَنت-

چیف جسٹس اطھر من اللہ ءَ سروزیر ءَ گوں گپ کنان ءَ گوشتگ ئِے کہ تو اے ڈیھ ءِ ھستیں نمائندگطءُ چیف ایگزیکٹوئے، اے آمیدگس ءَ ھمے واستا ترا زھمت کتگ اے جیڑہ باز مزن اِنت، ریاست ءَ آ رسپانس نیایگ اِنت آیگی بیتگ –

چیف جسٹس ءَ گیش گوشتگ کہ یک چیف ایگزیکٹوے ءَ اے ڈیھ ءَ نُھ سال ءَ ھاکمی کتگ – آئی ءَ وتی کتاب فخریہ ءِ توک ءَ نبشتہ کرتگ ما وتی مردم ڈنی ڈیھاں بھا کتگ اَنت اے آمیدگس پٹ ءُ پولی جاگھے نہ اِنت، باز رند ءَ آمیدگس ءَ اے جیڑہ فیڈرل کیبنٹ ءَ سر کرتگ، فیڈرل کیبنٹ ءَ اے وڑیں ھچ رسپانس نیتکگ کہ آیگی بیتگ-

آئی ءَ گوشتگ کہ تو یک کمیٹی ءِ جوڑ کرتگ، اے آمیدگسی آئینی آمیدگسے، اے جیڑہ کمیٹی ءِ نہ اِنت، بیگوابیں مردمانی واستا کمیشن جوڑ کرتگ، بءگواھیں مردمانی کھول نیشتگ اَنت آئی ءَ گوشتگ کمیشن ءِبارو ءَ باز گپ جنگ بیتگ اَنت، ریاست ءِ زمہ واری اِنت آ سرجم کنگ بہ بیت، مردم یل بیتگ اَنت بلے ھچ وڑیں ایکشن زورگ نہ بیتگ- اے آمیدگس آئین ءَ چار ایت گڑا مزنیں جیڑھے نہ بیت اِنت-

چیف جسٹس ءَ دیمتر ءَ گوشتگ اے آمیدگس ءَ بلوچ نودربرانی جیڑہ ءَ دیم ءَ اتکگ اے وڑیں جیڑہ مہ بنت کانوندار شھریاں چست کن اَنت گڑا اے اسر مئے نیشنل سیکورٹی ءِ سر ءَ کپ ایت سیاسی سنچ ءَ جیڑہ ھلاس کنگی اِنت مھلوک ءِ آوار جنگ ءُ آیانی لٹ شاپ کنگ مزنیں جیڑھے آمیدگس ءِ گور ءَ دگہ راہ نیست اِنت آ بس ایگزیکٹو ءَ جست بہ کنت، تو توپان آمآچیں کاراں گوں دزبندے ءُ اے جیڑھے سرپد بوتگ ءُ آمیدگس ءَ اتکگے-

آئی ءَ گوشتگ کہ زورانسری آوار جنی آئین ءَ سر گوز اَنت اے ملک ءِ نیشنل سیکورٹی سروزیر تئی دست ءَ اِنت، اے آمیدگس تئی سر ءَ اوست دار ایت اشی ءِ گیش ءُ گیوار ءَ بہ کنت یک کسانیں زھگے اد ءَ کیت اِنت آئی ءَ اے امیدگس چی جواب بہ دنت، اے وھد ءَ سر وزیر ءِ گون ءَ زھگ دچار کپتگ اے آمیدگس زورانسری آوار جنیانی زمہ واریاں کئی سر ءَ بہ کنت- اشی ءِ سر ءَ شھباز شریف ءَ پسو داتگ اے درست منی پھزداری اِنت-

چیف جسٹس ءَ سروزیر ءِ گون ءَ درور دیان ءَ گوشتگ گورننس ءِ بازیں جیڑہ ھست اَنت اے ھما وھدی ھلاس بنت وھدیکہ آئین گیش ایت گیشتر کانوندار وزارت داکلہ ءِ زیردست اَنت-

شھباز شریف ءَ پسو داتگ کہ من ءَ وھدیکہ تئی ھکم رس اتگ من آمیدگس ءِ دیم ءَ پیش بیتگ اَنت ءُ باز جوانیں درور داتگ اَنت من ھچ ازر پیش نہ کن آں زھگ ءَ گوشتگ سروزیر من ءَ منی پت ءَ گندگ ءَ بہ بارت من اے ڈیھ ءِ آمیدگسانی پسو دیان اَنت ءُ من ءَ روگ ءُ رب ءَ ھم پسو دیگی اِنت من اد ءَ بھتام جنی ءِ ملنڈی ءَ نیتکگ اَنت-

سر وزیر ءَ دیمتر ءَ گوشتگ کہ ما یک پترے جوڑینتگ اشی ءِ شش مینٹگ بیتگ اَنت من وتی مھلوک ءِ پسو دیوک اَنت آمیدگس ءِ دیم ءَ جوانیں چیز پیش کن آں راستی وت گوش ایت من باز سادگیں مردمے آں اللہ من ءَ ماپ کنت بیگواھیں مردمانی کمیٹی ءِ شش نیاد بیتگ اَنت، بیگواھیں مردمانی کمیٹی ءِ پتر ءِ نیاد ءَ ھروھد ءَ چار ءُ گزار ءَ کن آں ءُ آمیدگس ءَ سرجمءں ھالاں دے آں ھال ھچ وڑیں کسھے نہ بیت بلکیں راستیں چیز بنت-

آئی ءَ گوشتگ کہ چار سالاں دو رند ءَ جیل ءَ شتگ اَنت منی کھول ءَ ھم درد سگ اتگ اَنت- من بستار ءِ سر وزیر پنجاب ءَ ھم وتی ھون جوشینتگ اَنت-

چیف جسٹس ءَ گوشتگ تئی وھد باز گران بھا اِنت ما گیشتر تئی وھد ءَ زرت نہ کن ایں-

چیف جسٹس ءَ اٹارنی جنرل ءَ را سرپدی داتگ تو آئین ءِ ارٹیکل ھپت ءَ بہ وان، اٹارنی جنرل ءَ آئین ءِ ارٹیکل ھپت ونتگ، چریشی ءَ پد چیف جسٹس ءَ گوشتگ کہ تو بگش بیگواھیں مردمانی زمہ وار کے انت، اسلام آباد ءَ دو برات بیگواہ اَنت داں انگت ءَ آیانی بارو ءَ ھچ سرپدی نیست اِنت-

سروزیر شھباز شریف ءَ پسو داتگ بیگواھیں مردمانی کیس ءَ مئے کار ترا گندگ ءَ کاینت –

چیف جسٹس اسلام آباد ءَ گوشتگ کہ کمیٹی جوڑ بیگ ءَ اَنت سدکی ھم دیگ ءَ اَنت بلے ھچ وڑیں گامگیج گندگ ءَ نیتگک اَنت-

چیف جسٹس ءَ گوشتگ گوستگیں سروک ءَ من اتگ شھریانی بیگواہ کنگ ءَ ریاستی پالیسی اِنت آئین ءِ رد ءَ کجام ھم شھری ءِ بیگواہ کنگ ءَ ریاست ءِ زمہ واری اِنت-

سروزیر شھباز شریف ءَ پسو داتگ کہ چیف ایگزیکٹو ءِ وھد ءَ مارا ڈیھ ءَ ڈن ءَ روگ کپتگ ڈیھ اے مرد ءِ سبب ءَ سک اسرمند بیتگ –

چیف جسٹس ءَ درور دیان ءَ گوشتگ کہ شھریانی بیگواہ کنگ آئین ءِ پروشگ ءِ بروبری اِنت ترا ھمے واستا اد ءَ آیگ ءِ پرمان کتگ کہ ریاست بہ زانت اے چونیں مزنیں جیڑھے-

سروزیر ءَ گوشتگ کہ وھدیکہ من وزیر علیٰ پنجاب بیتگ اَنت ھمک زبان ءِ نودربر داکلہ داتگ اَنت، بلوچ، پشتون، سندھی، پنجابی درست دانش سکولزاں پری داکلہ داتگ اَنت، بلوچ، پشتون، سندھی ءُ پنجابی درست پاکستانی اَنت-

چیف جسٹس اطھر من اللہ ءَ گوشتگ کہ اے آمیدگس پارلیمنٹ ءِ باز شرپ ءَ کنت، دراھیں استانانی چیف ایگزیکٹو ءِ زمہ واری اِنت اگاں آیانی دمگاں کسے چست کنگ بیت اے آمیدگس ءِ پیسلہ ءَ پیسر ایگزیکٹو ءِ گپ ءَ سدکی بہ کنت کجام ھم مردم بیگواہ نہ بیت اِنت-

چیف جسٹس ءَ گوشتگ آمنہ مسعود جنجوعہ ءَ کمیشن ءِ بارو ءَ گپ کنان ءَ گوشتگ کمیشن بیگواھیں مردمانی کھولانی ٹپاں درمان کنگ ءَ ابید آیاں گمیگ کنت اے آئین ءِ لگتمالی اِنت آیانی ھلاپ ءَ کاروائی کنگ بہ بیت جیڑہ پارلیمنٹ ءَ برگ بہ بیت آیانی سر ءَ کانون سازی کنگ بہ بیت ھندوستان ءَ ھم ھمے کتگ، دگہ ڈیھاں ھم ھمے کتگ-

آئی ءَ گوشتگ مردمانی بیگواہ کنگ ھچ بر اوپار کنگ نہ بیت اِنت، آمیدگس ءَ چیف ایگزیکٹو ءِ زمہ واری سر ءَ کنت اے ڈیھ ءِ تہ ءَ ھچ کس آئین ءَ چہ برز تر نہ اِنت اے آمیدگس ءَ سول سپریمیسی ءِ آئین ءِ سر ءَ اوست دار ایت –

چیف جسٹس ءَ سروزیر کڈن کتگ کہ زورانسری آوار جنیانی سر ءَ سیکورٹی کونسل ءَ رکن ءِ آمیدگس ءَ زمہ وار بہ کنت؟ بیگواھیں مردمانی کوھنیں کیساں کھولاں سدک کنگ ریاست ءِ زمہ واری اِنت، آوکیں وھداں کجام مردم ءَ بیگواہ بیگی نہ اِنت شوھاز کنگ آمیدگس ءِ نہ اِنت ریاست ءِ کار اِنت ریاست ءِ گور ءَ چیریں ادارہ ھست اَنت دگہ شون ھست اَنت برو شوھاز بہ کنت-

کیس ءِ وھد ءَ وزیر کانون ءَ گوشتگ بیست ءُ یک سالی کیس دَہ روچانی تہ ءَ گیش ءُ گیوار کنگ ارزانی اِنت-

چیف جسٹس ءَ گوشتگ کہ سول بالادستی ءُ ادارھانی سر ءَ سرکار ءِ کنٹرول آئین ءِ رد ءَ بہ بہ بیت، وفاقی سرکار ءَ چہ یک اھوالکارے چست کنگ بیت اِنت کہ آئی ءِ ویڈیو ھست اِنت گڑا آمیدگس چون بہ منت ریاست ءِ اے کچ ءَ کمزور اِنت اشی ءِ پٹ ءُ پول ءَ کت مہ کنت ایس ای سی پی ءِ یک آفسرے چست کنگ بیت پد ءَ گوشگ بیتگ کہ آ گوریچانی نیمگ ءَ سواد ءَ شتگ –

ھمے وھد ءَ مدثر نارو ءِ مات ءَ گوشتگ ما فروری دوھزار ءُ نوزدہ ءَ نندانک ءَ نشتگ بیتگ، رانا ثنا اللہ ساھب ءَ گوشتگ مئے فیصل آباد ءَ اِنت آئی ءَ بازیں دزبندی کتگ اَنت، ما آرمی ءِ شرپ ءَ لوٹ ایں آئی ءِ آؤکیں نسل ءِ ازت ءَ کنت –

سروزیر شھباز شریف ءَ گوشتگ کہ تئی کلوہ راستی اِنت اے وھد ءَ وزیر کانون ءَ آمیدگس ءَ دیم ترینتگ ءُ گوشتگ کہ یو این سیکریٹری جنرل ءَ سروزیر ءِ گندگ ءَ دہ ءُ نیم ءَ آیگی اِنت-

چیف جسٹس اطھر من اللہ ءَ گوشتگ کہ وزیر اعظم ءِ منت گرگ بیتگ کہ تو اتکگے زورانسری آوار جنی ھلاس کنگ تئی زمہ واری اِنت، زورانسری آوار جنی آئین ءَ گوستگ –

گڈسر ءَ سروزیر اعظم شھباز شریف موکل داتگ ءُ روگ ءِ پرمان کتگ –

بلوچستان ءِ بنجاھی شھر شال ءِ ریڈ زون ءَ گورنر کارگس ءِ دیم ءَ زورانسری آوار جنگ بوتگیں بلوچ سیاسی باسکانی کھولانی نندانک مروچی پنجاھمی روچ ءَ پاکستان ءِ وزیر داخلہ رانا ثنا اللہ ءِ گند ءُ نند ءَ پد ھلاس کنگ بوتگ –

ھمے سال ءِ جولائی ماہ ءَ زیارت ءَ دروگیں میڑ ءِ نام ءَ زورانسری آوار جنگ بوتگیں مردمانی کوش ءِ بگیری ءَ بیگواھیں مردمانی کھولاں شال ءِ ریڈ زون ءَ نندانک جتگ ءُ وتی دوستیگیں مردمانی وش ءُ سلامتی یل کنگ ءِ لوٹ کتگ – آھاں لوٹ کتگ کہ زیارت وئیل ءِ بگیری ءَ جوڈیشل کمیٹی ءِ اد دیگ بہ بیت ءُ بیگواھیں مردمانی کھول باور کنائینگ بہ بنت کہ مروچیگ ءَ پد ھچ کس دروگیں میڑے نام ءَ جنگ نہ بیت اِنت –

بلے پدا ھم برزی تبک ءِ سرکار ءِ نادلگوشی ءُ گامگیج نہ زورگ ءِ سوب ءَ اے نندانک پنجاہ روچاں تاں برجاہ بوتگ ءُ اے میان ءَ ترندیں ھئورانی سوب ءَ بیگواھیں مردمانی کھول سک باز دلسیاہ بوتگ انت ءُ بازیں کھولے نادراہ بوتگ انت –

بلوچستان ءِ جتا جتائیں ھند ءُ دمگاں زورانسری آوار جنگ بوتگیں مردمانی مات ءُ دگہ کس ءُ وارساں نندانک ءَ بھر زرتگ ءُ چہ سرکار ءَ وتی لوٹانی منارینگ ءِ اپیل کرتگ –

مروچی پاکستان ءِ وزیر داخلہ رانا سناء اللہ ءِ چیردستی ءَ برزی تبک ءِ ٹولی ءَ بیگواھیں مردمانی کھولاں گوں گند ءُ نند کتگ ءُ آھاں نندانک ءِ ھلاس کنگے لوٹ ھم کتگ – اے سرکاری ٹولی ءَ بلوچستان نیشنل پاٹی ءُ باپ ءِ وزیر ھم ھوار بوتگ انت –

ھمے وھد ءَ بیگواھیں مردمانی کھولانی گوشگ ات کہ مئے لوٹاں شما وت سرپد ات کہ ما چی لوٹ ایں اگاں مئے مردماں کتکاری ءِ کتگ گڈا آ آمیدگس ءَ آرگ بہ بنت – اگاں شما وتی آمیدگسانی سر ءَ اوست ندارے گڈا ما کجا بہ رو ایں ؟

آھانی گوشگ ات کہ ادا بیگواھیں مردمانی مات ءُ گھار نشتگ انت اے باور کنائینگ بہ بنت کہ اشانی دوستیگیں مردمانی جون چگل دیگ نہ بنت –

بیگواھیں مردمانی کھولاں سرکاری ٹولی ءِ گوم گند ءُ نند ءُ پدا آھانی باور کنائینگ ءَ پد زھرشانی نندانک ءِ ھلاس کنگ ءِ جار جتگ ءُ گوشتگ کہ اگاں مئے لوٹانی سر ءَ گامگیج زورگ نہ بوت گڈا دیمتر ءَ ترندتریں زھرشانی کنگ ءِ راہ ءَ گچین کن ایں –

شال ءَ گورنر کارگس ءِ دیم ءَ بیگواھیں مردمانی کھولانی زھرشانی نندانک ءَ مروچی چہ منگچر ءَ آوار جنگ بوتگیں نوید بلوچ ءِ برات نجیب بلوچ ءَ بھر زرتگ ءُ وتی زھرشانی نبشتہ کنائینتگ –

نوید بلوچ ءِ برات ءَ زھرشانی نندانکءَ بھر زرتگ ءُ گوشتگ کہ منی برات پانزدہ اپریل سال دوھزار پانزدہ ءَ ایف سی ءَ چہ منگچر ءِ بازار ءِ دگہ سَے سنگتانی ھمراھی ءَ آوار جتگ ءُ بیگواہ کتگ انت، پدا ھپتگے ءَ رند نوید بلوچ ءِ دو سنگت یل کنگ بوتگ انت بلے نوید گوں ھمراھے دگہ یک سنگتے ءَ روچ مروچی گار ءُ بیگواہ انت –

آئی ءَ گوشتگ کہ مئے کھول نوید بلوچ ءِ ودار کنان ءَ ماژگی نادراھی ءَ گور جتگ وھدیکہ من وتی برات ءِ زورانسری آوار جنی ءِ بگیری ءَ کانودی درسیں در ٹک اِتگ انت بلے ھنگت منی برات یل کنگ نہ بوتگ –

آئی ءَ گوشتگ کہ اے ھپتیں سال چوں گوستگ انت اے درگت ءَ مئے جند سرپد انت-

نجیب بلوچ ءَ لوٹ کتگ گوشتگ کہ نوید بلوچ یل کنگ بہ بیت ءُ مئے کھول چہ اے ماژگی زوراکی ءَ رکینگ بہ بیت –

بلوچستان ءِ بنجاھی شھر شال ءِ کُچگی دمگ زرغون گیس فیلڈ ءِ سر ءَ سلاہ بندیں مردماں پاکستانی پوج نشانگ کتگ-

سر بیتگیں ھالانی رد ءَ گوستگیں شپ ءَ زرغون گیس فیلڈ ءَ پاکستانی پوج ءِ پوسٹ ءِ سر ءَ سلاہ بندیں مردماں اُرش کرتگ-

دمگی مردمانی رد ءَ اُرش ءِ وھد ءَ تراکانی توار اشکنگ بیتگ اَنت ءُ مروچی ھیلی کاپٹر ھم دمگ ءَ برز ءَ بال ءَ گندگ بیتگ اَنت بلے تنی وھدی واکدارانی نیمگ ءَ دگہ ھال دیم ءَ نیتکگ اَنت-

بلوچستان ءَ گوستگیں بیست ءُ چار ادارانی تہ ءَ پاکستانی پوج ءِ سر ءَ اے سیمی اُرش اِنت-

چریشی ءَ پیش کولواہ ءَ سی پیک دگ ءِ سر ءَ سلاہ بندیں مردماں پوج نشانگ کتگ ءُ ھمے وڑ کلات ءَ پولیس ءِ تھانہ ءَ ھم بمب تراکے ءِ آسر ءَ دو کارندہ زدگ بیتگ اَنت-