TBP Balochi

 بلوچستان لبریشن فرنٹ ءِ سروک ءُ بلوچ راجی رھشُون ڈاکٹراللہ نِزر بلوچ ءَ وتی درشان ءِ تہ ءَ گْوشتگ کہ بلوچ ءِ چُکچینی، زُورانسری بیگواھیاں ھوار اِنسانیت ءِ بگیر ءَ اے دِگہ جِرماں پاکستانی لشکر ءِ ھواری ءَ آمیدگِس ھم شریدار اِنت۔ انّوگیں آمیدگِسی سرگرمی، مزن وزیر (وزیراعظم) ءِ ماں آمیدگِس ءَ تلب کنگ ءُ چیپ جسٹس ءِ ریمارکس بلوچ راج ءَ را پرّامَگ اِنت ءُ پاکستانی آمیدگِسی نِزام ءِ سر ءَ سِتک ءُ باور ودی کنگ ءِ کُوشست ءَ ابید ھِچّے نہ اِنت۔ پاکستانی اسٹیبلشمنٹ ءَ آمیدگِس لشکری تاکت ءِ پابند اِنت۔ پابندیں ادارہ کدی ھم تاکت ءِ دیم ءَ سر ءَ چِست کُرت نہ کنت۔

آئی ءَ وتی درشان ءِ دیمتِر ءَ گْوشتگ کہ شھباز شریپ وتی شال (کوئٹہ) ءِ تر ءُ تاب ءِ دوران ءَ گوں ساپیں دانکاں گْوشتگ کہ آ زُورانسری بیگواھیانی بارو ءَ گوں واکداریں تاکتاں گپّ کنت۔ کُجا کہ مُلکے ءِ چیپ ایگزیکٹو کُلانی دیم ءَ اے جار ءَ بجنت کہ آ بیوس ءُ بے واک اِنت، گُڑا اُود ءَ یک جج ءُ نام گِپتیں آمیدگِسی نِزامے ءِ واکداری ءِ زانگ اِنچو گْران نہ اِنت۔ آمیدگِسی سرگرمی ءُ ریمارکس ءَ پد لھتیں روچاں پاکستانی لشکر ءَ چہ پنجاہ ءَ گیش بلوچ پُسّگ پہ زُورانسری گار ءُ بیگواہ کُرتگ۔ اے بابت ءَ ما ھمے سرپد بَہ اِیں کہ پاکستانی آمیدگِس ءُ چہ انّوگیں سرگرمیاں بلوچ ءِ دل ءَ پاکستانی نِزام ءِ سر ءَ یکّین ءُ اُمیتے ءِ ودی کنگ دُروگ ءُ پندلے۔  

پاکستانی آمیدگِس ءَ ھوار توام واکداریں ادارہ اے گپّ ءَ یات بِہ کن اَنت کہ بلوچ چہ پاکستان ءِ پندل سازیں نِزام ءَ سرگْوستگ۔ آئی دل ءَ پہ پاکستان ءِ واستا اُمیتے ءِ ودی کنگ نہ بُوَگ ءِ درور اِنت۔ دومی نیمگ ءَ آمیدگِس ءِ جِند ءِ اے ھال اِنت کہ انّوگیں یک پٹّ ءُ پولے (سروے ) ءَ پاکستانی آمیدگِس ءِ کارکردگی اِنساپ دَیَگ ءِ درگت ءَ یکسد ءُ سِیئمی (130) نمبر ءَ بوتگ۔

بلوچ رھشُون ڈاکٹر اللہ نِزر بلوچ ءَ وتی درشان ءِ دیمتِر ءَ گْوشتگ کہ بلوچ ءُ پاکستان ءِ مْیان ءَ سْیادی واجہ ءُ گُلام ئیگ اِنت۔ یک نوآبادی یے ءِ بِستار ءَ پاکستان مارا کُشت کنت، مئے بے شرپی ءَ کُرت کنت، بلے نُوں بلوچ ءِ دل ءَ پاکستان ءِ مھر ءُ بھیسہ ءَ ھِچّ رنگ ءَ پیداک کُرت نہ کنت، اے نُوں یک ابد نبشتگیں تاکدیمے۔

بلوچ رھشُون ڈاکٹر اللہ نِزر بلوچ ءَ وتی درشان ءِ گُڈّسر ءَ گْوشتگ کہ بلوچستان ءَ پاکستانی زُلم ءُ زُوراکیانی سَوَب ءَ اِنسانی زوالے ودی بوتگ۔ اے اِنسانی دردناکیں جاور چہ مْیان اُستمانی تاکتاں ھمے لوٹ ءَ کنت کہ آ بلوچستان ءَ زُوت دزمانگیجی بِہ کن اَنت ءُ بلوچ راج ءَ چہ اے وھد ءِ پِرھون ءِ زُلم ءُ زُوراکیاں بِہ رکّین انت۔

بلوچستان ءِ دمگ ھرنائی ءَ پاکستانی پوج ءِ لشکر کشی برجاہ ءُ اود ءَ پشتون ٹک ءَ سیادی کنوکیں مردمانی لوگ ماندارگ بیتگ اَنت-

ٹی بی پی ءَ دمگی مردماں گپ کنان ءَ گوشتگ کہ مروچی سھب ءَ پاکستانی پوج ءِ پندی کارندھاں کھوسٹ ءِ کچگی دمگ زردآلو ءُ تور ڈبر ءِ دمگاں پیش گامی کتگ – پوج ءَ دمگ ءَ روکیِ راہ بستگ اَنت –

دمگی مردمانی رد ءَ پوج ءَ پشتون ٹک ءَ سیادی کنوکیں مردمانی لوگ مانداشتگ اَنت کہ اشانی تہ ءَ متو دمڑ ءُ فتح دمڑ ءِ لوگ ھوار اَنت زانگ بہ بیت متودمڑ ءِ یک زھگے سَے سال پیسر پوجی بیڑے ءِ وھد ءَ کشگ بیتگ-

لشکر کشی ءَ دگی دزگیری ءُ جانی تاوانانی ھال دیم ءَ نیتکگ اَنت-

زانگ بہ بیت گوستگیں روچ ءَ شال ءِ کُچگی دمگ زرغون ءَ لشکر کشی کنگ بیتگ ءُ گن شپ ھیلی کاپٹراں بازیں جاھاں بمبگواری ءُ تیرگواری کرتگ – زرغون ءَ ھمے سال ءِ اپریل ءَ ھم پوجی لشکر کشی کنگ بیتگ ات ءُ پشتون ٹک ءَ سیادی داروکیں نُھ مردم دزگیر کنگ ءُ بیگواہ کنگ بیتگ ات اَنت-

دومی نیمگ ءَ ھرنائی کھوسٹ ءِ وئیل ءِ ھلاپ ءَ بیست ءُ ھشتمی روچ ءَ زھرشانی برجاہ اِنت مروچی بلوچستان عوامی پاٹی ءِ استانی جنرل سیکرٹری ےُ استانی وزیر نور مھمد دمڑ ءَ زھرشانی نندانک ءُ نندوکیں مردماں گوں دچار کپتگ-

نور مھمد دمڑ ءَ ٹاہ داتگ کہ سرکار بلوچستان ءِ دراھیں جاورھالاں ٹپاسگ ءَ اِنت وئیل ءَ ھواریں پوجی کارندہ کانون ءِ رد ءَ سزا دیگ بیت اِنت – آئی ءَ گوشتگ کہ سرکار بلوچستان ءِ وئیل ءَ دلجمی ءَ گامگیج زورگ اِنت نندانک ءِ کمیٹی ءَ چہ وزیرعلیٰ ءِ نیمگ ءَ جوڑ کرتگیں استانی وزیر ءُ دگہ واکدار کمیٹی ءَ گند ءُ نند کرتگ اَنت نندانہ ایکشن کمیٹی ءِ نیمگ ءَ پیش کنگ بیتگیں لوٹانی گشینگ ءِ جھد ءَ اِنت –

زانگ بہ بیت چاردہ اگست ءِ شپ ءَ پاکستانی پوج ءِ نیمگ ءَ کھوسٹ ءِ آبادی ءِ سر ءَ تیرگواری ءَ دو مردم زدگ بیتگ اِت اَنت چریشی ءِ ھلاپ ءَ سھب ءَ مردماں زھرشانی کتگ ءُ پد ءَ پوج ءَ زھرشانی کنوکانی سر ءَ تیرگواری کرتگ ات ءُ یک مردمے بیران ءُ دگہ سَے زدگ بیتگ ات اَنت-

زھرشانی کنوکانی لوٹانی تہ ءَ پوج دمگ ءَ درکنگ ءِ ھوار اِنت ءُ اے وئیل ءَ پد ھنی اوڑک ءِ مھلوک ھم پوج ءِ درایگ ءِ لوٹ ءَ کنگ ءَ اَنت-

روکپتی بلوچستان ءَ ایرانی لشکر ءُ سلاہ بندیں مردمانی میان ءَ میڑ ءَ سَے مردم جنگ بیتگ ءُ یکے دزگیر کنگ بیتگ ءُ ھمے میان ءَ ایرانی لشکر ءِ دو کارندہ زدگ بیتگ اَنت-

سر بیتگیں اھوالانی رد ءَ روکپتی بلوچستان ءِ دمگ کھنوج ءَ ایران ءَ لشکر ءَ یک لوگے ءِ سر ءَ بیڑ برتگ ءُ اود ءَ سَے کس کشتگ ءُ یکے دزگیر کرتگ-

وئیل کھنوج ءِ دمگ مسکونی ءَ پیش اتکگ کہ اود ءَ ایرانی لشکر ءُ سلاہ بندانی میان ءَ جنگ ءُ چوپ بیتگ –

بیران بیتگیں مردمانی پجار کاظم بامری ء مراد دگہ دو کسانی سیادی ھم بامری ٹک ءَ اِنت کہ دلگان ءِ جھمنند گوشگ بیتگ اَنت-

دزگیر کنگ بیتگیں مردم ءِ پجار نہ بیتگ ءُ آ لشکر ءَ گوں وت برتگ –

اھوالانی رد ءَ گوشگ بیتگ کہ اے مردم کھنوج ءَ جاڑیگ بیتگ اَنت چریشی ءَ ایرانی چیریں ادارہ ءُ لشکر ءَ انگیر کرتگ ءُ اود ءَ دو نیمگی تیرگواری بنا بیتگ –

اھوالانی رد ءَ اے مردم پیسر ءَ ایرانی لشکر ءِ گور ءَ چہ باگی بیتگ اَنت بلے اے سبب زاھر کنگ نہ بیتگ چے سبب ءَ آ باگی بیتگ اَنت ءُ اے درگت ءَ ایرانی لشکری بنشوناں ھم دگہ گپ دیم ءَ نیاؤرتگ اَنت-

بلوچ راجی زْرمبشت( بی این ایم) ءِ بنجاھی اگدہ داری پتر ءِ بنداتی نیاد سرکماش ڈاکٹر نسیم بلوچ ءِ پاگواجھی ءَ بیتگ۔ نیاد ءَ درسیں اگدہ داراں بھر زرتگ۔نیاد ءَ گوں زوربیگواھیں مردمانی کھولاں ھمدلی ءِ درشان ءَ مراگشانی دْرچ ءِ برجم دارگ ، گل ءِ باسک ءُ دوزواھاں ھار آماچیں مردمانی کمک کنگ ءِ سکین دیگ ءِ پجیگ ءَ پہ گل ءِ کارانی دیمروئی ءَ دگہ شور ھم کنگ بیتگ اَنت۔

نیاد ءَ بلوچستان ءِ انیگیں جاور ءُ گل ءِ دیمروئی ءِ بنگپانی سر ءَ تْران کنگ بیتگ ءُ گْوستگیں سیشن ءَ بیتگیں کار راھبند ءِ مٹیانی پد ءَ کارراھندی پتر ءِ رد ءُ بند داتگیں کارراھبند پیش کنگ بیتگ۔ اگدہ داری پتر ءَ کارراھبند چار اتگ ءُ آئی ءِ شنگ کنگ ءِ موکل داتگ۔نیاد ءَ پہ بنجاھی پتر ءَ اے واک چیئرمین ءَ داتگ کہ آ چار ناڈکیں (استثنائی) باسکانی گچین ءَ بہ کنت۔

اگدہ داری پتر ءِ نیاد ءَ کارراھبند ءِ رد ءَ جوڑ بیتگیں جتائیں تکانی بنجاھی باسکانی نام پیش کنگ بیتگ اَنت کہ آیانی سر ءَ درساں ھم پتی درشانتگ۔چہ اگدہ داری پتر ءِ منگ ءَ ازگر ءُ کیا رسانکدری ءُ آئی ٹی تک ءِ پتر ءِ باسک نامینگ بیتگ اَنت۔شاہ میر ءُ پھد مالیاتی تک ءِ باسک، ڈاکٹر نوکاپ ءُ امداد گھبودی تک ءِ باسک، ھاتم ءُ ریاز مردمی اگبالانی تک ءِ باسک ءُ ھمے پیم نیاز ءُ پھیم دری کارانی تک ءِ پتر ءِ باسک نامینگ بیتگ اَنت۔بنجاھی کارگشادانی کمکاری پتر ءِ باسکانی نام ھما ادارھانی سروکاں سوج کرتگ اَنت ءُ اگدہ داری پتر ءَ من اتگ اَنت۔

دری کارانی تک ءُ دگہ ادارھانی کارکرد ءِ سر ءَ چمشانک دیگ ءَ پد اگدہ داری پتر ءَ درسیں ادارہ پرمان داتگ اَنت کہ آ گوں یک دومی ءِ ھمگرنچی ءَ کار بہ کن اَنت ءُ شور کنگ بیتگ کہ دری کارانی کارگشاد چہ پانک ءِ نیمگ ءَ شنگ کنگ بیتگیں گزارش ءُ بلوچستان ءَ مردی اگبالانی جاورانی سر ءَ مردمی اگبالانی ادارھاں نمدی نبیس ایت۔

بلوچستان ءُ سند ءَ گل ءِ پرکار کنگ ءَ جتائیں دمگاں زمہ وار نامینگ بیتگ کہ آ جتائیں دمگاں پارٹی سیلاں پرکارین اَنت۔

گوں نیاد ءَ تْران کنان بی این ایم ءِ سرکماش ڈاکٹر نسیم ءَ گْوشتگ سیشن ءَ پد کسانیں وھدے ءَ بلوچستان ءِ جاورانی تہ ءَ ڈالیں مٹی اتکگ ءُ مزنیں جیڑہ ودی بیتگ اَنت۔زیارت ءَ زوربیگواھیں مردمانی دزگیریں کوش، ھاران ءُ مستونگ ءَ لوگانی سر ءَ پاکستانی لشکر ءِ ارش ءَ شھرمنندانی کوش ءُ آیانی زور بیگواہ کنگ ، ھمے پیم لکاں مردم ھار ءِ آماچ بیتگ۔

آئی ءَ گْوشتگ اے جاوراں بی این ایم ءَ درانڈیھ ءَ زھرشانی کنگ ءِ پجیگ ءَ میان استمانی ادارہ نمدی نبشتگ اَنت کہ آ بلوچستان ءِ نیمگ ءَ دلگوش بہ کن اَنت۔بی این ایم ءِ مردمی اگبالانی ادارہ پانک ءَ بلوچستان ءَ مردمی اگبالانی جاور ءِ پدر کنگ ءَ شریں کردے پیش داتگ ھمے پیم چہ ڈیھ ءَ ڈن باسکاں ھم بلوچستان ءِ آجوئی ءِ زْرمبشت ءِ سھرا کنگ ء وتی مراگشانی دْرچ برجاہ داشتگ۔

سرکماش ءَ گْوشتگ مارا وتی کارکرد ءِ مدام برجاہ کنگ ءُ گھتری ءَ کوشست کنگ لوٹ ایت داں ما وتی مول ءَ سوبمند بہ بہ ایں۔

بلوچستان ءِ دمگ بالگتر ءَ گوستگیں شپ ءَ ناشناسیں مردم لوگے تہ ءَ پُترتگ ءُ دو مردم کُشتگ اَنت-

سربوتگیں ھالانی رِد ءَ گوستگیں شپ ءَ بالگتر ءِ دمگ کنڈ مین ءَ شپ ءِ ساھت دہ ءِ نزیک ءَ ناشناسیں سلاہ بندیں پرپٹ سواریں مردماں یک لوگے ءِ سر ءَ اُرش کتگ یک زالبولے ءَ ھوار دو مردم کُشتگ اَنت-

کُشگ بوتگیں مردمانی تہ ءَ تارک نامیں مردم ءُ آئی ءِ لوگ بانُک ھوار اَنت-

اِھوالکارانی رِد ءَ اے مرد ءِ سیادی سرکاری پلامرزی کنوکیں سلاہ بندیں ٹولی ءَ اِنت تنی وھدے وئیل سبب زانگ نہ بوتگ-

زانگ بہ بیت کہ بلوچستان ءَ راجدوستیں پارٹی ءَ بھتام جتگ کہ لشکر ءَ سرجمیں بلوچستان ءَ سلاہ بندیں ٹولی جوڑ کتگ کہ آ مردمانی چست کنگ ءُ کُشگ ءَ ھوار چاگردی سلّکاریاں تچکی ءَ ھوار اَنت کہ آیاں کُشندہ ٹولی ءَ ھوار اَنت-

بلوچستان ءِ جتا جتائیں جاھاں پاکستانی پوج لشکر کشی کنگ ءَ اِنت – اود ءَ گن شپ ھیلی کاپٹراں ھوار کمانڈوز بھر زورگ ءَ اَنت-

بلوچستان ءِ بنجاھی شھر شال ءَ ھواریِں دمگ زرغون ءُ کش ءُ گوری دمگاں مروچی سھب ءَ چہ پاکستانی پوج ءَ لشکر کشی بندات کتگ – دمگی مردمانی رد ءَ پنچ ءِ نزیک ءَ گن شپ ھیلی کاپٹراں جتا جتائیں جاھاں تیرگواری کرتگ-

دمگی مردماں گیش گوشان ءَ گوشتگ کہ بازیں اداراں برجاھیں تیرگواری ءُ بمب گواری برجای اَنت بازیں جاھاں کمانڈوز ھم ایر گیجگ بیتگ اَنت-

لشکر کشی ءِ درگت ءَ تنی وھدی دگہ جانی ءُ مالی تاوانانی درگت ءَ دگہ ھچ وڑیں گپ دیم ءَ نیتکگ اَنت نانکہ واکدارانی نیمگ ءَ دگہ گپ دیم ءَ اتکگ اَنت-

اے دمگاں دو روچ ءَ پیش سلاہ بندیں مردماں زرغون گیس فیلڈ ءَ پھازوکیں چوکی سر ءَ ھستیں لشکری کارندہ نشانگ کتگ ات اَنت اے اُرش ءِ زمہ واری بلوچ لبریشن آرمی ءَ زرتگ اَت، جارکش جیئند بلوچ ءَ گُشتگ ات بلوچ مڈیانی پُلپھانچ کنوکینن پروجیکٹس ءُ زورگریں پوج ءِ سر ءَ ترندی ءَ گوں اُرش برجاہ بنت-

ھمے وڑ ءَ کیچ ءَ تمپ ءُ دشت ءِ میان ءَ کوھی دمگ مزن بند ءَ ھم گوستگیں شپ ءَ چہ پاکستانی پوج ءِ پیشگامی برجاہ اَنت ءُ مروچی گیشیں لشکری سر بیتگ اَنت ءُ آیاں ھیلی کاپٹرانی کمک ھم گون اِنت-

ھمے وڑ آواران ءُ مشکے ءَ روکیں راہ ھم پاکستانی پوج ءَ بستگ اَنت ءُ ھمے وڑ مشکے ءِ بازیں جاھاں ھم پوجی پیشگامی گندگ ءَ اتکگ اَنت بلے تنی وھدی دزگیری ءُ نانکہ دگہ جاوانانی ھال دیم ءَ سر بیتگ اَنت-

نبشتانک : سراوان ءِ سپر

نبشتہ کار : عابد ھیدر

دی بلوچستان پوسٹ

مرچی مدتے ءَ رَند پد ءَ روکپتی بلوچستان سراوان ءَ پاد ایر کُت اَنت، چد ءُ پیش من سراوان ءَ باریں چینچُک رند داتگ اَت ءُ چینچو وھد ءَ اد ءَ نشتگ آں، ھچ یات نہ بیت چیاکہ سراوان ریدگ ءُ کوھاڈ ءَ چہ پد منی دومی میتگ بوتگ۔ منی گوست ءِ بازیں یات ءُ ترانگ گوں سراوان ءَ بندوک اَنت، چونائی ءَ ھردیں مردم چہ وتی بُنّکی ھنکین ءَ چہ در بہ کپ ایت ءُ دگہ نیمگے ءَ بروت،توری آ سَپر پہ سَیل ءُ سوات ءَ بہ بیت یانکہ پہ روزگار ءِ نیمون ءَ بہ بیت بلے پد ءَ ھم مردم ءِ بنکی ھنکین آئی ءِ یات تُرانگ آئی ءِ ھمراہ بنت۔

ھمے وڑ ءَ،ھردیں منی گام سراوان ءِ دلبند ءَ کپتگ اَنت، گڑا من چہ وتی میتگ ءَ پراموش بوتگ آں ءُ سراوان وتی بُنّکی ھنکین پھم اِتگ۔ آ وھد ءَ من اے چیز ھچ بر نہ مار اِتگ کہ سراوان ءِ آ کجام چیز اِنت کہ منی میتگ ءِ ڈول ءَ انت، میتگ ءِ چَھرگ ءَ جنگ ءَ انتءُ من ءَ سراوان ءِ نِندگ ءِ سِکین ءَ دنت۔

بلے مرچی پد ءَ مُدتّے ءَ باد سر کہ سراوان ءَ کپت گڑا یک اجبیں گِرانی ءُ وس واسے ءَ من ءَ انگر کُت، انچْوش گمان بوگ ءَ اَت کہ من اد ءَ درامدے آں۔ وت ءَ اد ءَ ایوک مارگ ءَ اِت آں، اد ءِ ھر چیز بدل بوتگ اَت، ھمے مارِشت ءَ من ءَ جیڑگے ءَ دور دات۔

ھمے جیڑگانی تہ ءَ من سراوان ءِ بازار ءَ در کپت آن ءُ شوھاز ءَ لگ اِتاں کہ باریں آ کجام چیز اِنت کہ اد ءَ نہ اِنت، آ کجام چیز اِنت کہ من ءَ چو بے تاھیر ئِے کُتگ، ھمے واستا ھر ھما مردم کہ گوں آئی ءَ منی پجاروکی، ھمراھی ءُ دیوان بوتگ اَت، من درستانی کر ءَ شُت آں گوں آیاں نیند ءُ نیاد، دیوان ءُ مجلس کُت، ھر ھما گِس ءُ دُکّاناں شُت آں کہ آیانی توک ءَ نِشتگیں مردمانی چھرگ ءَ چہ آشنا اِت آں، سرجیمں بازار گول اِت، بلے تاھیر انگت رسگ ءَ نہ اَت، گڑا گڈسر ءَ پد ءَ وتی گِس ءَ اتکان ءُ چم وتی گس ءِ بَیٹک ءَ کپت اَنت کہ آئی ءِ در چہ پُشت ءَ بند اَت، آئی ءِ تہ ءَ ناں مردمی برمشے ءُ ناں کہ کندگ ءُ ٹھکے آیگ ءَ اَت، گڑا نو من پھم اِت کہ واکی سراوان ءِ زیبائی وَ منی لالا جان ءِ بچکند ، خالد پُل ءِ وش گپی بوتگ اَنت، آ کہ اد ءَ نہ انت گڑا سراوان نو چو منی بالاد ءَ تاھیر بکش اِت کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چار زندانی مروچی زاھدان ءِ مزنیں زندان ءَ پاھو دیگ بیتگ اَنت-

روکپتی بلوچستان ءِ بنجاھی شھر زاھدان ءَ چار بندیگیں بلوچ مروچی ایرانی آمیدگس ءَ پاھو داتگ اَنت –

چاریں زندانیانی پجار خالد رئیسی ء نور مھمد جھمنند ساربوگ کسرکند، امر اللہ بسیج جھمنند شیر آباد زاھدان، عبدالناصر شاہ بخش ء چراگ علی جھمنند دومگ زاھدان ءُ ھوشنگ شھنوازی جھمنند ھاش ءِ ناماں زانگ بیتگ اَنت-

اے مردمانی پاھو ءِ ھکم گوستگیں چار شمبے ءَ بیتگ ات کہ آ زاھدان ءَ یک جتائیں زندانی ءَ برگ بیتگ ات اَنت-

ھر چاریں زندانی کھول گوستگیں روچ ءَ گوانکو ءِ سر ءَ گڈی گپ ءُ رپ ءَ پرمایگ بیتگ اَنت-

اھوالانی رد ءَ ھرچاریں مردم کوش ءِ بھتام ءَ پاھو دیگ بیتگ اَنت-

اشانی تہ ءَ خالد ایرانی سال نود ءُ ھشت ءَ چھبار ءَ گرگ بیتگ ءُ عبدالناصر ھم نود ءُ ھشت ءَ گرگ بیتگ ءُ ھوشنگ ءُ امر اللہ نود ءُ پنچ ءَ گرگ بیتگ اَنت-

اے ھرچاریں مردم مروچی سھب ءَ زاھدان ءَ پاھو دیگ بیتگ اَنت-

روکپتی بلوچستان ءَ اگست ءِ ماہ ءَ داں انیگ ءَ بیست ءُ بندیگیں مردم جتا جتائیں بھتامانی پژدر ءَ پاھو دیگ بیتگ اَنت-

روکپتی بلوچستان ءَ مردمانی پاھو دیگ یکشل ءَ برجاہ اَنت ءُ گوستگیں روچاں تھران ءَ ھواریں دمگ کرج ءَ پاھو دیگانی ھلاپ ءَ زھرشانی ھم بیتگ اَت –

اود ءَ مردماں پاھو دیگانی پژدر ءَ مھلوک ءَ لوٹ کرتگ ءُ گوشتگ کہ ایرانی آمیدگس ءَ اے وھد ءَ یک سد ءُ ھشتاد بندیگیں مردمانی پاھو دیگ ءِ چن ءُ لانچ کرتگ ءُ باید اے دارگ بہ بنت-

نبشتانک: آ انگت بے سما اِنت

نبشتہ کار : گُلستان بلوچ

دی بلوچستان پوسٹ

بیست ءُ یکمی کرن اِنت آ انگت بے سما اِنت، من ءَ آئی ءِ بے سمائی ءَ سکّ ءَ جیڑگ ءِ تہ ءَ دور داتگ اَت ئے ھمئے جیڑگ ءِ تہ ءَ من وت ءَ را وت یکبرے جُست کُت کہ بوت کنت آئی ءَ وت ءَ را بلکیں وت بے سما کرتگ، تانکہ اے مئے چاگرد سرپد بہ بیت من چُشیں مردمے نہ آں بلے آ اسل ءَ وت ءَ را رد دیگ ءَ اَت پرچاکہ اے وھد ءِ تہ ءَ اگاں تو یک چیزے سرپد بہ بئے پد ءَ ھمشی ءِ چیر دیگ ءِ جُھد ءَ بکن ئے گُڑا وتی رد دیگ ءِ ھمراھی ءَ تو وتی تیوگیں کوم ءَ رد دیگ ءِ جُھد ءَ ئے، بُوت کنت آؤکیں وھِد ءِ تہ ءَ آ وت ءَ را وت دروگے بند ایت-

بلے آ وتی آؤکیں پدریچ ءَ ھچ وڑ ءَ رد دات نہ کن ئے پرچاکہ تئی آؤکیں پَدریچ سکّ زانتکار ءُ سرپد انت آ تئی ھرچ ھنر ءُ ٹگَی ءَ شریں وڑے ءَ زانت-

اے بیست ءُ یکمی کرن ءَ اگاں تو وھدے وت ءَ را شیری پُوستے پَر بکن ئے تو شیر گُشگ نہ بہ ئے، تو اگاں واکی شیرے گُڑا ترا شیری پُوستے نہ لوٹ ایت، شیر کدی ھم پَسی کاہ نہ وارت اِنت،بلے مئے چاگرد ءِ شیر پَسی کاہ ورگ ءَ اِنت یاں اد ءَ یک گپ المی ءَ تچک اِنت کہ ھما مردم وت ءَ را شیر ئے سر پد بوگ ءَ ایں بلے آ ھریں شیرے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔