TBP Balochi

ایران ءِ بنجاھی شھر تھران ءَ ھواریں دمگ کرج ءَ ایرانی آمیدگس ءِ پرمان ءَ پاھو دیگ بیتگیں مردمانی پاھو ءِ ھلاپ ءَ مروچی پنچمی روچ ءَ کھولانی زھرشانی برجاہ –

زھرشانی کنوکاں مروچی روانکے کش اتگ ءُ چرے روانک ءَ پولیس ءَ زھرشانی کنوکانی درگان درگان کنگ ءِ ھاتر ءَ زھرشانی کنوک لٹ ءُ کُٹ کتگ اَنت-

ھالانی رد ءَ گوشگ بیتگ کہ زھرشانی ءَ ھواریں دَہ مردم ھم پولیس ءَ گپتگ ءُ برتگ اَنت-

زھرشانی کنوکانی گوشگ اِنت ایرانی آمیدگس لس مردمانی پاھو ءَ بہ دار ایت ءُ آیاں وتی منانکانی دیم ءَ گوشگ ءِ ھک ءَ بہ دنت-

اے وھد ءَ روکپتی بلوچستان ءَ ھم بازیں مردمے ایرانی واکداراں پاھو داتگ اَنت ءُ بازیں بندیگانی پاھو دیگ ءِ گمان ءَ ھم لس مردم کنگ ءَ اَنت-

زھرشانی کنوکانی گوشگ اِنت کہ ایرانی آمیدگس ءَ اے وھد ءَ یک سد ءُ ھشتاد بندیگیں مردمانی پاھو دیگ ءِ سوڑگ چیرکائی کرتگ ءُ اشانی تہ ءَ بازیں کچے ءَ سیستان و بلوچستان ءِ بندیگیں مردم ھوار اَنت-

ایرانی واکدار ءُ آمیدگس گیشتر مردماں نشہ باپاری ءُ کوشانی بھتاماں پاھو دیگ ءَ اَنت-

بلوچستان ءَ ھمے سال ءَ بوتگیں بشّی ھئوراں پد زمین ءَ وتی دروشم مٹ کرتگ انت، جیولوجی ءِ زانتکار پروفیسر دین محمد کاکڑ ءِ رِد ءَ بلوچستان ءِ بازیں دمگاں زمین ءِ ترک اِت، جھل شتگ –

جیولوجی ءِ زانتکار ءِ رِد ءَ دھک ءِ میان ءَ دہ ھزار ءَ گیش ٹیوب وئیل جنگ بوتگ انت ءُ زیر زمین ءَ آپ ءِ جھل رؤگ ءِ سوب ءَزمین ءَ وتی دروشم مٹ کنگ ءَ انت –

دین محمد کاکڑ ءَ گوشتگ کہ اے دمگاں زمین چنڈ ءِ ترس ھم ھست انت آئی ءَ گوشتگ کہ جیولوجی ڈیپارٹمنٹ دھ نوکتریں زلزلہ پیما مشین کوژک ءُ قلعہ عبداللہ ءَ کل کرتگ انت –

زانگ بہ بیت ھمے سال ءَ بشی ھئورانی سوب ءَ بلوچستان ءَ توپان اتکگ چریشی ءَ بازیں ڈیم، دگاں ھوار بازیں ھاکی گِس کپتگ انت –

دومی نیمگ ءَ لکانی کچ ءَ ھار آماچیں مردم بے گس جوڈ بوتگ انت، بے ورگی ءِ سوب ءَ بازیں نادراھی ءِ اماچ بوان انت –

زانتکارانی رِد ءَ ھار آماچیں مردمانی ھاتر ءَ اتکگیں کمک ءِ کرپشن تنی وھدی ھار اماچیں مردم تمبوے ءَ زبھر انت- آھانی رِد ءَ اگاں زمستان ءَ ھمے وڈ بہ بیت گڈا بازیں گونڈو ءُ کماش ءِ وڈ وڈیں نادراھیانی دیمپان بوت کن انت-

بلوچستان ءِ تیاب دپی شھر گوادر ءَ ناشناسیں مردماں پاکستانی کوسٹ گارڈ کارندھانی سر ءَ بمب اُرشے کتگ-

پاکستانی کوسٹ گارڈ کارندھانی سر ءَ ھما وھد ءَ بمب اُرش ءَ گوں نشانگ کتگ اَنت وھدے آ گشت ءَ بیتگ اَنت-

اِھوالکارانی رِد ءَ بمب اُرش ءَ کوسٹ گارڈ کارندھاں جانی تاوان چست کنگ کپتگ بلے اشی ءِ پدری سرکاری واکداراں نہ کتگ-

زانگ بہ بیت پیسر ءَ ھم پوج نشانگ کنگ بوتگ کہ آیانی زمہ واری بلوچ آجوئی لوٹوکیں سلاہ بندیں گلاں منّ اِتگ اَنت بلے اے اُرش زمہ واری انگت ھچ گل نہ زرتگ-

متھدہ عرب امارات ءَ برجاھیں ایشیا کپ ءِ فائنل گوازی سری لنکا ءُ پاکستان ءِ نیام ءَ مروچی دبئی انٹرنیشنل اسٹیدیم برجاہ دارگ بیتگ، کہ پاکستان ءَ ٹاس کٹگ ءَ پد اوّل ءَ باؤلنگ کنگ ءِ پیسلہ کُتگ۔

ٹورنامنٹ ءِ مھمانجلیں ٹیم سری لنکا ءَ اولی بیٹنگ کنان ءَ 6 وکٹانی تاوان ءَ 170 رنز اڈ کُتگ، وھدیکہ پاکستان ءَ ٹارگٹ سرجم نہ کنگ ءَ ابید 10 وکٹانی تاوان 147 رنز اڈ کُتگ ءُ سری لنکا ءِ دیما پروش وارتگ۔

چہ سری لنکا ءِ نیمگ ءَ جوانیں بیٹنگ کنان ءَ بَنُک راجاپکسہ ءَ 71 رنز اڈ کُتگ ءُ وننڈو ھسارنگہ ءَ 36 رنز اڈ کُتگ۔ وھدیکہ پاکستانی باولرز ھارث رؤف ءَ چار اورزانی تہءَ 29 رنز داتگ ءُ 3 وکٹ گپتگ۔

پاکستانی لئیبیاں پسھی بیٹنگ کنان ءَ مھمد رضوان ءَ 55 ءُ افتخار اھمد ءَ 32 رنز اڈ کُتگ ءُ سری لنکا ءِ نیمگ ءَ جوانیں باؤلنگ کنان ءَ پرمود مدھوشن ءَ 4 ءُ وننڈو ھسارنگہ ءَ 3 وکٹ گپتگ۔

زانگ بہ بیت مروچی فائنل ءَ کٹگ ءَ گوں سری لنکا ءِ ششمی بر اِنت کہ ایشیا کپ وتی نام ءَ کُتگی۔

بلوچستان ءِ دمگ پنجگور ءَ سَے گونڈوانی گوم ءَ بدکاری کنگ بوتگ –

گیشیں ھالانی رِد ءَ ھمے سال ءِ شش ستمبر ءَ پنجگور ءِ دمگ چتکان ءَ لیویز کارمنداں سَے گونڈو چہ چتکان چار راہ ءِ سر ءَ ھمے گوشتگ ءُ کمشنر کارگس ءَ برتگ انت کہ شمارا ڈپٹی کمشنر لوٹگ ءَ اِنت –

چاگردی ترامجاھاں شنگ بوتگیں تامری درشان ءِ تہ ءَ گونڈواں ھمے گوشتگ کہ لیوز کارمنداں آ کمشنر کارگس ءَ برتگ انت –

گونڈلانی رِد ءَ کارگس ءِ تہ ءَ پیسر ءَ ساڑی ایں لیویز کارمند اول ءَ مئے اکساں گِپتگ انت پدا جوس آنی تہ ءَ نشھی گولی مان کتگ ءُ مارا وارین اتگ انت پدا رند ءَ بازیں اداراں آھانی گوم ءَ بدکاری کنگ بوتگ ءُ آھانی اکس ءُ تامر گرگ بوتگ انت –

اھوالکار ءِ رِد یک اکسے ءَ گونڈل جاندر انت ءُ کپتگ انت ءُ جاندری ءَ آ ناچ پرمائینگ بنت – کمشنر کارگس ءَ ھما کوٹی کہ مھمانانی جاہ انت گونڈو ھما کوٹی تہ ءَ ھراب کنگ بوتگ انت ءُ آھانی گوم ءَ گیر انسانی کار کنگ بوتگ –

گونڈلانی رِد ءَ اے یک مزنیں ٹولی یے کہ اشاں بازیں ماھے بیت کہ گونڈلاں گر انت گون وت بر انت پدا آھانی گوم ءَ بدکاری کن انت –

دمگی اھوالکار ءِ رِد ءَ پنجگور ءِ ھما جاہ کہ اودا ڈی سی کارگس انت، ڈی پی او ءِ کارگس انت ءُ آمیدگس ءُ دگہ سرکاری کارگس انت ھمودا گونڈل یکشل ءَ بدکاری ءِ نشانگ کنگ بوگ ءَ انت –

آئی ءِ رِد ءَ پدا گونڈل نگیگیں جاوراں گوں نادراھجاہ ءَ برگ بنت گڈا اژدری چار ٹپاس پد زانگ بیت کہ گونڈلانی گوم ءَ زیادھی کنگ بوتگ –

دمگی واکدارانی رِد ءَ یک کتکار ءِ دزگیر کنگ بوتگ ءُ ایندگرانی شوھاز برجاہ انت –

بلوچستان ءَ ھئور ءُ ھاراں پد بازیں اڈوجنجالانی سوب ءَ بازیں مردمے وتی زند ءَ چہ زبھر بوتگ انت، بیران بوتگیں مردمانی کچ گیش بوتگ ءُ تنی وھدی بازیں دمگے ھlانگت آپ ءِ تہ ءَ انت –

ھئور ءُ ھارانی سوب ءَ سرجمیں بلوچستان ءَ سِی ءُ پنچ دمگ اسرمند بوتگ انت، توپان ءَ پد ورد وراکی سامانانی نھاد ھم گیش بوتگ، سبزی ءِ نھاد گیش بوتگ ءُ وھدیکہ آرت ءِ نھاد روچ پہ روچ گیش بوان انت –

سوبائی ڈیزاسٹر مینجمنٹ اتھارٹی بزاں پی ڈی ایم اے ءِ رِد ءَ بلوچستان ءَ ھئور ءُ ھارانی سوب ءَ دو سد ءُ ھپتاد مردم بیران بوتگ انت، ھزارانی کچ ءَ مھلوک چہ سرکار ءَ کمک ءِ لوٹوک انت –

ھمے زوتاں بوتگیں ھئور ءُ ھاراں بلوچستان ءِ تہ ءَ بیران بوتگیں بید سرکاری کچ سک باز انت – بلوچستان ءِ سرکار ءِ رِد ءَ بلوچستان ءَ سینزدہ لک مردم بے گس بوتگ انت – یک لک ءُ ھشتاد ءُ پنچ ھزار ءَ گیش گس کپتگ انت یا آھاں سک باز تاوان بوتگ – بشی ھئور ھنو ھلاس بوتگ انت بلے ھئور ءُ ھارانی سوب ءَ بلوچستان ءِ جاھمنندیں مھلوک بازیں نادراھیانی آماچ بوان انت –

ھار آماچیں دمگاں سر بوتگیں کار کنوکیں پیرامیڈکس ءِ گوشگ انت کہ ھر ھما جاہ ءَ ھار ءِ آپ اوشتوک انت اودا وڈ وڈیں نادراھی پیدا بوگ ءَ انت – ھار آماچیں مردم گیسٹرو، ملیریا، لاپ درد ءُ دل ءُ لاپ نادراھی ءِ آماچ بوان انت –

زانگ بہ بیت ھمے زوتاں بوتگیں ھئوراں چی بلوچستان درساں گیشتر اثرمند بوتگ بلے پدا ھم سرکار ءُ واکدارانی کار سست روی ءِ آماچ انت ھئور ءُ ھارانی سوب ءَ بلوچستان ءَ بیران بوتگیں مردمانی کچ تنی وھدی سرجمی پکا نہ بوتگ انت وھدیکہ چہ بلوچستان ءَ دومی جاھاں رؤگے ھاتر ءَ ریل پٹی ءُ دگ تنی وھدی شر کنگ نہ بوتگ انت اے درگت ءَ واکدار سرجمی ءَ بے سوب انت –

بلوچستان ءَ ھئور ءُ ھارانی سوب ءَ تنی وھدی بازیں دمگے ءِ مردمانی چو پیشی وڈا زند گوازینگ ءَ نہ انت –

فلاحی گلاں جانسلامتی واکدار، سرکار ءُ میان استمانی گلاں چہ لوٹ کتگ کہ ھار آماچیں دمگانی کمک ءَ بہ کن انت اگاں ناں جاور ھال چدوگنتر بوت کن انت –