TBP Balochi

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں زامران ءِ دمگ سھر کور ءَ پاکستانی پوج ءِ کارمندانی سر ءَ اُرش کُتگ، اُرش ءَ پاکستانی پوج ءَ جانی تاوان ءِ دیمپانی کنگ کپتگ –

زیکیں روچ ءَ سلاہ بندیں مردماں یک دگہ اُرشے تمپ ءِ دمگ کلبر شاھاپ ءَ حمید نامیں مردمے ءِ ٹولی سر ءَ کتگ، چریشی ءَ حمید ٹولی ءِ سَے مردم مرتگ انت ءُ لھتے زدگ بوتگ انت –

دمگی اھوالکارانی رِد ءَ حمید ءُ آئی ءِ ٹولی سرکار ءُ چیریں ادارھانی کارمند بوتگ انت کہ بلوچ ورنایانی زورانسری آوار جنی ءَ ھوار دگہ بازیں چاگردی سلکاریانی تہ ءَ آھانی دست مان بوتگ –

دومی نیمگ ءَ بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ ءُ گوشتگ تمپ ءُ زامران ءِ اُرشاں پنچ پوجی کارمند ءُ آھانی کمک کار کُشتگ انت –

جارکش ءَ وتی درشان ءِ تہ ءَ گوشتگ کہ بی ایل اے ءِ سرمچاراں کیچ ءِ دمگ تمپ ءُ زامران ءَ دو جتائیں ارشاں زورگیریں پاکستانی پوج ءِ دو کارمند ءُ چیریں ادارھانی سَے کارمند کُشتگ ءُ بازینے زدگ کتگ انت –

جیئند بلوچ ءِ گوشگ ات کہ بی ایل اے ءِ سرمچاراں گوشتگیں روچ ءَ زامران سھر کور ءَ سیمسراں ٹٹ کنوکیں کارمندانی پھازوکانی سر ءَ ھما وھد ءَ اُرش کتگ کہ آ پیادگ ترءُگرد کنگ ءَ بوتگ انت، اُرش ءَ دو کارمند ھما دمان ءَ مرتگ انت ءُ یکے زدگ بوتگ –

جارکش ءَ دیمتر ءَ گوشتگ کہ بی ایل اے ءِ اسپیشل ٹیکٹیکل آپریشنز اسکواڈ ءَ ھال سر بوتگ کہ پاکستانی پوج ءُ چیریں ادارھانی جوڈ کتگیں کشندہ ٹولی سروک حمید ءُ آئی ءِ ٹولی کلبر شاھاپ انت گڈا سرمچاراں گامگیج زرتگ ءُ زورگیر ءِ اے کمکارانی سر ءَ ھما وھد ءَ اُرش کُتگ وھدیکہ آ دو گاڑیاں سوار بوتگ ءُ گوزگ ءَ بوتگ انت –

جیئند بلوچ ءَ گوشتگ کہ سرمچارانی اُرش ءَ سَے کمکار حنیف ولد محمد جھمنند بالیچہ تلکان، امجد ءُ بالاچ ء ٹاپی جھمنند پھل آباد مُرتگ ءُ ایندگہ زدگ بوتگ انت – اے ٹولی ءَ زورگیریں پوج ءِ چیردستی ءَ ملام گری، دزی ءُ ڈنگی ءَ ھوار لشکر کشیاں ھم پوج ءِ کمک کار بوتگ انت – بازیں وھدے بیت دمگی مردم اے ٹولی ءِ کتکاریانی درگت ءَ شکایت کنگ ءَ انت –

جارکش ءَ گوشتگ کہ بلوچ لبریشن آرمی اے گپ ءَ تچک کنت کہ بلوچ راج ءِ سر ءَ زورگیریں پوج ءُ آئی ءِ کمک کارانی زوراکی ءِ ھساب ءَ الم گپت – ما ھمے ٹولی ءَ ھوار درسیں ریاستی کارمنداں وتی ھبر ءَ سر کنگ لوٹیں کہ پہ زر ءِ ھاتر ءَ راج دژمنی کنگ ءَ بند بہ کن انت اگاں ناں گڈا وتی بیمناکیں سزا ءِ ورگ ءَ تیار بہ بنت –

روکپتی بلوچستان ءِ جتا جتائیں جاھاں زاھدان وئیل ءِ ھلاپ ءَ زھرشانی روانک، پولیس ءِ آنسو گیس ءُ تیرگواری –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ آدینگ ءِ نماز ءَ پد مھلوک ءِ زھرشانی روانک، زھرشانی روانک شھر ءِ جتا جتائیں دمکاں تر اتگ ءُ مھلوک ءَ اوگام جتگ –

زھرشانی روانک آدینگ ءِ نماز ءَ پد جتا جتائیں شھراں بندات بیتگ اَنت کہ اود ءَ بازیں کچے ءَ مردماں بھر زرتگ ءُ سرکار ءِ ھلاپ ءَ اوگام جتگ-

زھرشانی روانک ایرانشھر، راسک، خاش، چھبار ءُ پشین ءُ دگہ دگہ جاھاں زھرشانی کنگ بیتگ اَنت-

ایرانشھر ءَ پولیس ءُ زھرشانی کنوکانی میان ءَ بیڑی بیتگ ءُ چریشی ءَ پولیس ءَ زھرشانی کنوکانی دارگ ءِ ھاتر ءَ پولیس ءَ تیرگواری ءُ آنسو گیس جتگ –

روکپتی بلوچستان ءِ جتا جتائیں تامراں شنگ بیتگیں تامراں گندگ بیت کہ اود ءَ بازیں کچے ءَ مردم زھرشانی روانک ءَ ھوار اَنت ءُ آزاد بلوچستان ءِ اوگام ءَ ھوار ھوار سرکار ءِ ھلاپ ءَ اوگام جنگ ءَ اَنت-

زانگ بہ بیت ھمے سال ءِ سِی ستمبر ءَ روکپتی بلوچستان ءَ بندات زھرشانی ھمک آدینگ ءَ بیگ ءَ اَنت ءُ سی ستمبر ءَ زاھدان ءَ بیتگیں زھرشانی ءَ بازیں مردمے زدگ ءُ بیران بیتگ اِت اَنت-

لیاری ءِ جھمنندیں مردماں زمانگاں چہ فٹبال ءَ گوں ھُب ءُ واھگ ھست ءُ اود ءَ فٹبال ءِ دوستداروک بلوچ پھناتاں گیش زانگ بنت –

گوش اَنت لیاری بہ بیت ءُ اود ءَ فٹبال مہ بیت گڑا اے بیت نہ کنت بلے بدبھتی ءُ چہ لیاری ءِ ورنایاں اے فٹبال ءِ بے کساسیں مھراں ابید آ فٹبال ءِ تکاں دیم ءَ آرگ نہ بیتگ اَنت-

فٹبال اگاں لیاری ءِ مردمانی واستا ھدائی دادے گڑا بلے چرے ھدائی داد ءَ لیاری ءِ مردم چٹ زبھر اَنت چوشکہ لیاری ءِ مردم اگاں فٹبال زان اَنت بلے آیاں فٹبال کنگ ءِ آسراتی نیست اِنت-

ھمے وڑ ءَ کہ جھان ءَ اگاں فٹبالی ورلڈ کپے بندات بیت اِبف گڑا لیاری الم ءَ سمبھیت پہ فٹبال ءَ اود ءَ دیوال ءُ دمک فٹبال ءِ رنگاں سمبھینگ بنت-

ھمے وڑ ءَ کراچی ءِ دمگ لیاری ءُ ملیر ءُ دگہ جاھاں جھمنندیں بلوچانی فیفا ورلڈ کپ ءِ میگا ایونٹ ءِ تیاری بندات کتگ، فٹبال ءِ دوست داروک وتی دلدوستیں ٹیم ءُ لیبیانی اکساں دیوالانی سر ءَ کشگ انت – فٹبال دوست داروکاں وتی دمگ ورلڈ کپ ءِ پٹ جوڑ کتگ – کسانیں زھگان بگر تاں مزنینان دراہ میگاایونٹ ءِ گوازیانی چارگ ءَ پہ مزنیں اسکرین جنگ انت ءُ دومی نیمگ ءَ فٹبال دکاناں رش لگ اتگ ءُ وتی دلدوستیں ٹیمانی شرٹ ھم زورگ انت –

ھنچوش سما بیت کہ ائید پیداک انت – فٹبال گوازی ءِ دوست داروک مزن تاں کسان دراہ گل انت ءُ شاتکامی کنگ انت ـ

اوگانستان ءِ تالبان ءِ واک ءَ پد زالبولاں مَھرم ءَ ابید دگہ مردمانی گون ءَ سپر کنگ ءُ لوگ ءُ ڈن ابید برکہ ءِ کنگ ءَ ابید ڈن ءَ درایگ ءِ وڑیں چیزانی سر ءَ بندش جتگ ءُ سرجمیں ڈیھ ءَ جنکاں سیکنڈری اسکولز ءِ روگ ءَ ھم بندش جنگ بیتگ-

ھبر رسان ادارے اے ایف پی ءِ رد ءال وزارت امر پنام ءِ ونھی عن المنکر ءِ جارکش مھمد عاکف صادق مھاجر ءَ گوشتگ کہ گوستگیں پانزدہ ماھانی توک ءَ ھمے جھد بیتگ کہ ما جوانیں گامگیج بہ زوریں ءُ دانکہ زالبولانی واستا جتائیں روچ بہ داریں-

آئی ءَ ’ اے ایف پی ءَ گوں گوشتگ کہ بلے مئے جھداں ابید بازیں جاھاں رھبندانی لگمتالی بوگ ءَ اِنت –

جارکش مھمد عاکف صادق مھاجر ءَ گوشتگ کہ ما انی اے پیسلہ ھمے واستا کتگ کہ ھجاب ءِ بندش ءِ سر ءَ امل بوگ ءَ نہ اِنت ءُ مردینانی مُچانی توک ءُ زالبول ءُ مردین یکجاھی ءَ گندگ بوگ ءَ اَنت-

بلے تالبان ءِ اے پیسلہ ءِ سر ءَ زالبول ءُ پارک انتزامیہ ءِ زھر لیکھ دار اَنت-

واھدہ یک چیریں نامے کہ آئی ءِ تالبان ءِ بندشانی سر ءَ لیکھ درشان کنان ءَ گوشتگ کہ اد ءَ نا اسکول ءُ ناکہ کار کنگ ءِ جاہ ھست ما سیل ءُ سواد ءِ واستا کم چہ کم پارکاں شتگ اِنت-

بہ کول آئی ئیگ ءَ سجوئیں روچ ءَ لوگ ءِ تہ ءَ کپگ ءُ بور بوگ ءَ مازگی نادراھی ءِ آماچ بہ ایں-

گوشگ بیت اِنت تالبان ءِ بندشی پیسلہ ءَ کابل ءِ نامی ئیں زارئی پارک ءِ انتزامیہ ءِ کار ءُ بار ءِ سر ءَ اسر کپتگ-

بندش ءَ پیسر اے پارک ءَ زالبول ءُ زھگاں ھوار سدانی کچ ءَ شھری اتکگ بیتگ اَنت بلے چار شمبے ءِ روچ ءَ بس لھتے مردین ھما ھسابی اتکگ بیتگ اَنت-

پارک ءَ ھواریں ڈویلپر حبیب جان زارئی ءَ گمان کتگ کہ آئی ءَ وتی کار ءُ بار بند کنگ کپ ایت کہ آئی ءِ واستا مزنیں زرکاری یے بیتگ ءُ اشی ءَ دو سد ءُ پنجاہ مردم نوکر بیتگ اَنت-

آئی ءُ اے ایف پی ءَ گوں گوشتگ کہ پارک ءَ زھگ ءُ زالبولاں ابید نیاں –

حبیب جان زازائی ءَ اے گپ پدر کرتگ کہ تالبان ءِ اے وڑیں گامگیجاں درملکی زرکار ءُ اوگان شھریانی سر ءَ ھوسلھانی سر ءَ شکی گمان بیت اِنت-

اوگانستان ءِ شھر کندھار ءِ مدرسہ ءِ زھگانی وانینوکیں مھمد تمتم ءَ طالبان ءِ پیسلہ ناوشیں گپے گشتگ –

آئی ءِ رد ءَ ھر مردم ءَ مازگی سکون بیگ ءُ سواد جاہ لازمی اِنت جوانتر ایش اِنت بیست سال ءِ جنگ ءَ پد مارا سواد جاہ المی اِنت –

من زی آصف ءُ رشید ءِ ھاتر ءَ توار چست کتگ، انساپ لوٹ اِتگ بلے انساپ دیگ وتی جاہ منی کھول ءَ چہ دگہ دو مردم زورانسری آوار جتگ ءُ بیگواہ کتگ اَنت- سائرہ بلوچ

سائرہ بلوچ ءَ ھُزدار ءَ پریس کلب ءَ تران کنان ءَ گْوشتگ کہ بلوچستان ءَ زوانسری آوار جنی ءِ جیڑہ ھمکروچ گیش بوان اَنت، آیانی سر ءَ وتگڑیں بھتام جنگ ءَ اَنت ءُ آیاں دروگیں میڑاں سی ٹی ڈی ءِ دست ءَ کُشگ ءَ اَنت-

آئی ءَ دیمتر ءَ گْوشتگ کہ سائرہ بلوچ کہ چار سالاں چہ گیش زورانسری بیگواہ بوتگیں وتی برات آصف بلوچ ءُ ناکوزتک رشید بلوچ ءِ یل کنائینگ ءِ ھاتر ءَ یکشلیں جُھد کنگ ءَ آں- من اے چار سالاں ھرچ وڑیں جُھد کتگ، ھرچ در ٹُک اِتگ اَنت انساپ برس اِیت بلے ھچ نہ بیتگ-

منی برات آصف ءُ سیاد رشید بلوچ ءَ 31 اگست 2018 ءَ آیانی دگہ نُھ سنگتانی ھمراھی چہ نوشکی زنگی ناوڑ ءَ ایف سی کارندہ ءُ چیریں ادارھانی کارندھان زورانسری آوار جتگ اَنت ءُ پد ءَ ناشناسیں ھندے ءَ برتگ اَنت کہ انگت بیگواہ ءَ اَنت – بازیں روچانی گْوزگ ءَ پد سوشل میڈیا ءُ پرنٹ میڈیا آیانی دزگیری سی ٹی ڈی ءُ پولیس ءِ یکجاھی بیڑ ءِ نام داتگ ءُ آیانی سر ءَ دروگیں بھتام جتگ وھدے کہ آ دیم ءَ ھم نیاورتگ اَنت –

آئی ءَ گْوشتگ کہ من ھما سائرہ بلوچاں کہ زی آصف ءُ رشید ءِ ھاتر ءَ توار چست کتگ، انساپ لوٹ اِتگ بلے من آں انساپ دیگ وتی جاہ منی کھول ءَ چہ دگہ دو مردم آوار جتگ-

منی دویں سیاد منان بلوچ ء محمد موسیٰ ءُ سرفراز ء نیاز احمد ھُزدار ءِ دمگ نوغے ءِ جھمنند اَنت، دویں سیاد بے روزگاری ءِ سبب ءَ چہ شھر ءَ میڈیکل اسٹور ءَ کار کنگ ءَ بیتگ اَنت وھدے کہ فٹبال ءُ کرکٹ ءِ ھم واھگدار اَنت، آ فٹبال ٹیماں ھم گون اَنت – 30 اکتوبر 2022 روچ ءَ منان ءُ سرفراز ھُزدار ءِ دمگ نال ءَ یک میچے لیب کنگ ءَ شتگ اَنت، میچ لیب کنگ ءَ پد واتری ءَ فیروز آباد ءِ نزیک ءَ چہ چیریں ادارھانی کارندھاں آ زورانسری آوار جتگ ناشناسیں جاھے ءَ برتگ اَنت- ما اے زورانسری آوار جنی ءِ بگیری ءَ ھُزدار پولیس تھانہ ءَ ایف آئی آر ھم نکش کنائینتگ-

سائرہ بلوچ ءَ گْوشتگ کہ مروچی دہ روچ ءَ گْوزگ ءَ پد کاونٹر ٹیررازم ڈیپارٹمنٹ ( سی ٹی ڈی) نیمگ ءَ چہ یک درشانے شنگ کنگ بیتگ کہ منی سیاد منان ءُ سرفراز ءِ دزگیری ءِ پدر کتگ وھدے کہ چو مدامی وڑ ءَ آیانی سر ءَ دروگیں بھتام ھم جتگ ” چہ آیاں پنچ کچ دستی بمب، 1200 گرام C4 تراکناکیں شورو، دو کلو گرام دگہ تراکناکیں شورو، چار کچ الیکٹرک ڈیٹونیٹر، یک کچ ریموٹ کنٹرول کٹ، یک کچ الفا فائر سسٹم ” دزکپتگ اَنت- ھیرانگیں گپ اش اِنت اینچو مزنیں کچے ءَ تراکناکیں شورو کسے پرپٹ سر ءَ کلات ءَ چہ شال چون آورت کنت؟ اے بوت کنت-

شال ءَ پُترگ ءِ ھاتر ءَ ھما راہ ھست اَنت پد ءَ پُترگ ءَ پد ھرچ دہ گام ءِ سر ءَ ایف سی پانگس اَنت ءُ اے درست زان اَنت یک انسانے چی ھیال کنت پرپٹ سر ءَ بے تُرس بیت بید چیزے جیڑگ ءَ روت؟ اد ءَ مزاک ءَ کندگے گپ بوگ ءَ اِنت- اے بھتام دروگ اَنت بلے بے کانودی ءِ اے چاگرد ءَ یک دلپدردناک اِنت-

سائرہ بلوچ ءَ دیمتر ءَ گْوشتگ کہ ریاست ءِ پوج ءُ چیریں ادارھاں چار سال ءَ ساری ئیں کسّہ دوبر نوک کتگ- چار سال ءَ ساری منی برات آصف ءُ رشید آیانی سنگتانی ھمراھی ءَ چہ نوشکی زنگی ناوڑ ءَ بیگواہ کنگ بیتگ بلے پد آیانی دزگیری چہ نوشکی ءُ شال ھزار گنجی ءَ پدر کتگ، آ وھد ءَ ھم ھمے بھتام جتگ اَنت ءُ کہ آ سلاہ بندیں گلے ءَ گوں بندوک اَنت آیانی سر ءَ وڑ وڑیں سلاہ دزکپتگ- اد ءَ پد یک گپے شکی بیت کہ یازدہ مردمانی گور ءَ سلاہ ھست بہ بیت ءُ آ پد ءَ وت ءَ پوج دست ءَ چون دات کن اَنت؟ اگاں اے یک سلاہ بندیں گلے ءَ ھمگرنچ بوتیناں، آیانی گور ءَ چہ سلاہ دز بہ کپت ایں گڑا سالاں پد آیانی گوم ءَ بیگواہ کنگ بیتگیں لھتے مردم کجام ھساب ءَ یل کتگ اَنت؟ پرچاکہ ھمے بھتام جنگ بیتگ اَنت اے راست بوتیں گڑا گمان ءَ آ ھچبر یل کنگ بیتگ اِت اَنت- بلے چار سال ءَ پد مروچی پد ءَ اے کسّہ دیم ءَ آرگ ءَ اَنت تھنا پرک اش اِنت کہ زی آصف ءُ رشید بیتگ اَنت مروچی منان ءُ سرفراز اَنت- بھتام ھما اَنت، بیڑ ھما دروگ اَنت-

آئی ءَ دیمتر ءَ گْوشتگ کہ من اے پریس کانفرنس ءَ چہ لوٹ کن آں کہ شما منی توار جوڑ بہ بیت، مئے سر ءَ دارتگیں اے زُلم بگیری ءَ مئے توار ءُ ھما ادارھاں تاں سر کنگ ءَ کمک بہ کن اِت مئے انساپ دات بہ کن ئے، منی برات، منی سیاد ھمگرنچیں راستی ءِ گامگیج بزور اَنت، آیانی سر ءَ جتگیں بھتاماں پدر بکن اَنت، کانود رِد ءَ سزا بدے اَنت بلے اے وڑ مردماں بیگواہ کنگ ءُ پد ءَ ماہ سالاں بے کانودی بندیگ کنگ، آیانی سر ءَ لٹ ءُ کُٹ کنگ یا پد ءَ دروگیں میڑاں نام کٹگ ءِ ھاتر ءَ بے دردی ءَ کُشگ ھچ وڑ کبول نہ اِنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ فیض اللہ ء لال جان چاریگری میار ءَ مرگ ءِ سزا داتگ –

جارکش میجر گوھرام بلوچ ءَ گوشتگ کہ فیض اللہ ء لال جان جھمنند ھور کولواہ بی ایل ایف ءِ پلہ مرزے بیتگ بلے چیزے وھد ءَ پد چہ ھندی دوزواھانی نیمگ ءَ گل ءَ ھال سر کنگ بیتگ کہ فیض اللہ پاکستانی پوج ءِ بُنجل ءَ روگ ءُ آھگ ءَ گندگ بیگ ءَ اِنت ءُ چہ ایشی ءِ سْوب ءَ آئی ءِ گوں آجوئی زرمبشت ءَ وپاداری شک کنگ بوتگ – اے ھالانی سر بیگ ءَ پد گل ءِ انٹلی جنس ٹولی گوشگ بیتگ کہ آئی ءِ سر ءَ بہ بنت –

جارکش ءَ گوشتگ کہ گل ءِ انٹلی جنس ٹولی ءَ آئی ءِ ماں بنجل ءَ رؤگ آیگے ھبر راست کتگ انت – آئی وتی دزگیری ءُ پٹ ءُ پول کنگ وت ارزان کُتگ ءُ مدام آئی ءَ ھال کتگ ءُ سرمچارانی اوتاک ءَ آھگ ءِ پندل ساز اِتگ ءُ دْروگ بستگ کہ پاکستانی پوج من ءَ دزگیر کنت- دمگی کماندار ءَ آئی ءَ وتی اوتاک ءَ لوٹائینگ ءِ پیسلہ کُتگ – چوشکہ سرمچار آئی ءِ سر ءَ شک بیتگ اَنت پمشکا چہ گل ءِ اوتاک ءِ نزیک ءَ دگہ نوکیں جاگھے ءَ لوٹائین اِتگ ءُ آئی ءِ سر ءَ نگاہ ایر کنگ بیتگ بلے آئی ءَ اے گُمان دیگ نہ بیتگ کہ سرمچار آئی سر ءَ شک اَنت –

جارکش ءَ گوشتگ کہ دومی روچ ءَ آئی ءَ روگ ءِ موکل لوٹ اِتگ بلے کماندار ءُ آ دگہ سرمچاریں سنگتاں ھال ءِ اھوال ءُ دگہ کارے ءِ ھیلہ ءَ داشتگ – تنی وھدی اوتاک ءَ سنگتانی گور ءَ بیتگ کہ ھبدہ اکتوبر دوھزار بیست ءُ دو ءَ ھمے جاہ ءَ ڈرون میزائلے آس دیگ بیتگ کہ فیض اللہ گوں سرمچاراں ھمے جاہ ءَ ساڑی بیتگ انت- ڈرون اُرش ءَ پد پوج ءِ جنگی بالگرد اَتکگ ءُ کماندار ایر گپتگ اَنت۔ یک دراجیں میڑے ءَ پد سرمچار پہ وش ءُ سلامتی درآیگ ءَ سوبین بیتگ اَنت، پوج ءِ انگِر ءَ دراھگ ءَ پد سرمچاراں فیض اللہ ھما وھد ءَ دزگیر کُتگ –

جارکش میجر گوھرام ءَ گوشتگ کہ جست پد ءِ وھد ءَ آئی ءَ دپ ءِ وت منّ اِتگ کہ من پاکستانی پوج ءِ چاریگے آں ءُ پوج ءِ کِر ءَ روان ءُ کایاں پوجی ءِ سروکانی گوشگ ءِ رد ءَ پہ پندل سرمچارانی لوٹائینگ ءُ جنائینگ ءِ شور جوڑ کُتگ بلے من وتی جند ءِ پندل ءَ سوبمند نہ بیتگاں- گُڈّی ءَ پوج ءِ یک سروک یے ءَ من ءَ ڈرون ءِ نشان دیگ ءِ چِپ ئِے داتگ ءُ سرمچارانی کِر ءَ راہ داتگ- پٹ ءُ پول ءِ تُرس ءَ من چپ وتی جان ءِ چیریں جاھے ءَ چیر داتگ ءُ آؤرتگ ءُ چیر ءُ کائی گند ءُ نند کنگ ءِ جاگہ ءِ سر ءَ ایر کُرتگ-

میجر گوھرام بلوچ ءَ گْوشتگ کہ میاربار ءِ سر ءَ پیش ءَ مئے کِر ءَ سرجمیں ھال ءُ گپ بیتگ اَنت ءُ وھدے کہ آئی وتی میارباری وت منّ اِتگ گڑا گل ءَ ھپت نومبر دوھزار بیست ءُ دو ءَ مرگ ءِ سزا داتگ ءُ کُشتگ۔ آئی ءِدپ ءِ وت منّگ ءِ تامُر زوت ماں رسانکدر ءَ شنگ کنگ بیت انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ بولان ءِ لشکر کشی ءَ پوج ءِ سر ءَ اُرش ءُ پوج پدکنزینگ ءِ سرجمیں ھال شنگ کتگ کتگ ءُ گوشتگ کہ میڑ ءَ سرمچاراں پانزدہ پوجی کارمند کُشتگ انت ءُ سَے سرمچاراں گڈی تیر ءِ پلسپہ ءَ شھیدی نوش کتگ-

جارکش جئیند بلوچ ءَ گوشتگ کہ بلوچ لبریشن آرمی ءِ تمردیں سرمچاراں بولان ءَ ھپتگے ءَ تاں برجاھیں میڑ ءَ پد پاکستانی پوج ءِ اُرش سوبمندی ءَ بے سوب کتگ ءُ پوج پد کنزین اِتگ – اے میان ءَ دژمن پوج ءِ پانزدہ کارمند کُشتگ ءُ دوازدہ ءَ چہ گیش زدگ کتگ انت – وھدیکہ ماتیں سرڈگار ءِ پھازگ ءَ پہ بی ایل اے ءِ سَے تمردیں سرمچاراں گڈی تیر ءِ پلسپہ ءِ سر ءَ امل کنان ءَ شھیدی نوش کتگ –

جارکش ءَ گوشتگ کہ زورگیریں پوج ءَ ھمے سال دوھزار بیست ءُ دو ءِ سِی ءُ یک اکتوبر ءَ بولان ءُ ھرنائی ءِ دمگ کمان، اُچ کمان، گمبدی، درگ، پیرانی پراہ، یخو، تکڑی ءُ کش ءُ گورانی دمگاں یکیں وھد ءَ سرمچارانی سر ءَ مزنین کچے ءَ اُرش کنان ءَ درسیں زمینی راہ ءُ در بند کتگ انت – دژمن پوج ءَ اے اُرش ءَ جنگی بالگرد، جیٹ، ڈرون ءُ ایس ایس جی کمانڈر ءُ زمینی ءُ برزی کمک گون بوتگ – بلے پیش ءَ چہ ساجویں بلوچ سرمچاراں جوانیں گوریلہ رپک ءُ ھنر وتیگی کتگ ءُ دژمن پوج ءِ سر ءَ یک ھپتگے ءَ تاں جتا جتائیں ھند ءُ دمگاں سنگر بستگ ءُ بازیں اُرشے کُتگ گڈسر ءَ دژمن لاچار کتگ کہ پد بہ کنزیت ءُ واتر بہ رؤت –

جارکش جئیند بلوچ ءَ گوشتگ کہ ھمے میان ءَ بزدلیں دژمن ءَ بازیں دمگی گلہ کشت ءُ کشاری کنوک ءُ زھگ ءُ زالبول آوار جتگ انت وتہ اسپر پہ کارمرز کتگ انت –

آئی ءَ گوشتگ کہ سرمچاراں جتا جتائیں اُرشاں دژمن پوج ءِ ھشت ایس ایس جی کمانڈراں ھوار پانزدہ کارمند کُشتگ انت ءُ دوازدہ ءَ گیش زدگ کتگ انت – ھمے میان ءَ دژمن پوج ءِ بازیں ادارکی ٹکانہ ءُ راشنانی گودام ھم تباہ کتگ انت – سرمچاراں بے دروریں گھگیری ءِ سوب ءَ دژمن ھشتمی روچ ءَ لاچار بوتگ کہ پد بہ کنزیت –

جارکش جیئند بلوچ ءَ گوشتگ کہ اے میان ءَ زورگیریں پوج ءِ پدکنزینگ ءَ پہ سَے بلوچ سرمچاراں دلیری ءُ تمردی ءَ گوں وتی نام ماں بلوچ راج دپترے تاکانی تہ ءَ نبیس اِتگ ءُ وتی گڈی تیراں گوں شھیدی نوش اِتگ – شھیدیں سنگتاں دژمن ءِ مزنیں کچے ءَ گوں بازیں اداراں جنگ دیان ءَ دژمن دیم آیگ ءَ نہ اشتگ انت تانکہ سرمچاراں بنجاھی ٹولی وتی پھریزاں جاھاں سر بہ بنت ءُ دژمن ءَ چدوگیشتر تاوان بہ دئینت – دراجیں میڑیے ءَ پد تیرانی ھلاس بوگ ءَ ھر سئیں سرمچاراں یکیں وھد ءَ گڈی تیر وتی سر ءَ جتگ انت ءُ شھیدی نوش اِتگ ءُ سرمچار سوبین کنائین اِتگ انت-

شھید بوتگیں سنگتانی تہ ءَ شھید سنگت درمحمد سمالانی پنام ءِ روستو ء امیر بخش سمالانی، شھید سنگت میشدار سمالانی پنام ءِ نصیب اللہ ء کرم ھان سمالانی شھید سنگت خیربخش سمالانی پنام ءِ فرید ء نبی بخش سمالانی جھمنند سانگان سبی ھوار انت –

ھر سئیں سنگتاں چار سال انت کہ بلوچ لبریشن آرمی ءَ گوں ھمگرنچ بوتگ انت ءُ وتی راجی پرز ءَ تمردی ءُ دلیری ءَ گوں پیلو کنگ ءَ بوتگ انت –

جارکش جیئند بلوچ ءَ وتی درشان ءِ گڈسر ءَ گوشتگ کہ بلوچ لبریشن آرمی شھیدیں سنگتانی بیر ءَ، آھانی مول مراداں آجوئیں بلوچستان ءِ دروشم ءَ گپت – بی ایل اے کول کنت گڈی منزل ءَ سر بوگ ءَ تاں زورگیریں پوج ءُ آئی ءِ کمکارانی سر ءَ جنگ برجاہ مانیت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھشت سد ءُ شانزدہ روچ سرجم بوتگ انت –

ھمے وھد ءَ ھر تک ءُ پھناتاں سیادی داروکیں مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدری درشان اتگ-

گل ءِ کمک سرکماش ماما قدیر بلوچ ءَ گوشتگ کہ گوستگیں لھتے ھپتگانی تہ ءَ وتگڑیں سی ٹی ڈی ءَ بازیں زورانسری آوار جنگ بوتگیں مردم زاھر کتگ ءُ آھانی سر ءَ دروگیں ارزی نبشتہ کتگ –

آئی ءَ گوشتگ کہ سرجمیں بلوچستان سی ٹی ڈی ءِ دروگیں میڑ ءُ وتگڑیں دزگیریاں شری ءَ شرپد انت – پاکستان ءِ چیریں ادارہ سی ٹی ڈی ءَ کارمرز کنگاانت ءُ جنگی کتکاری ءُ انسان کشیں زوراکی کنگ ءَ انت –

آئی ءَ گوشتگ کہ وتی مردماں چہ اے ھونواراں رکینگے ھاتر ءَ درسیں سیاسی ءُ نودربر گلاں یکجاہ بوگ ءُ کھولانی ھمراھداری کنگی انت –

آئی ءَ گوشتگ کہ گوستگیں شپ ءَ چہ ھزدار ءَ دو مردمانی دروگیں دزگیری ءِ ٹاہ دیگ بوتگ کہ آ پیسر ءَ زورانسری آوار جتگیں مردم بوتگ انت –

ماما قدیر بلوچ ءَ گوشتگ تاکت ءِ زور ءَ سیاسی جیڑو گیشگیوار نہ بنت –

بلوچستان ءِ بنجاھی شھر شال ءَ فزیو تھراپی ایسوسی ایشن ءِ شدکشیں زھرشانی بنجل مروچی سیمی روچ ءَ ھم برجاہ بوتگ –

اشی ءَ پیش وتی لوٹانی ھک ءَ آھانی شش ماہ ءَ تاں زھرشانی بنجل برجاہ بوتگ –

شدکشیں زھرشانی بنجل ءَ رھشوناں اھوالکاراں گوں تران کنان ءَ گُشت کہ
بلوچستان فزیو تھراپی ایسوسی ایشن ءَ ھر وڈا جھد کتگ کہ وتی جیڑواں بلوچستان سرکار ءَ سر بہ کن انت بلے بلوچستان سرکار ءُ سروزیر ءِ گیر سنجیدگیں رویش پدری یے –

فزیوتھراپی وڈیں نوکتریں الاج ءِ وڈو ءُ ڈول کہ جانسلامتی ءِ کار انت کہ مردمانی جانی، ماژگی، جزباتی ءُ چاگردے تہ ءَ شری آرگ ءَ وتی کرد ءَ پیلو کنت – مروچی ھم پاکستان ءِ تہ ءَ بیست ملین کچ ءَ مردم جانی ناجوڈ انت، دھ درسد مردم ماژگی نادراہ انت کہ آھاں فزیوتھراپسٹ بازیں وڈو ءُ ڈولاں الاج کنت بلے بژن! مروچی ھم بلوچستان ءِ سرکار ءُ سروزیر اے نوکتریں الاج ءَ سرپد ءُ زان انت بلے ھنگت وت ءَ بے زانگ ءِ کتگ –

آھاں چہ بلوچستان سرکار ءَ لوٹ کتگ ءُ گوشتگ کہ زوتاں زوت مئے ھکئیں لوٹ منّگ بہ بنت پرچا کہ شدکشیں زھرشانی ءَ نشتگیں مئے سنگتانی جاور نگیگ بوان انت ھمے ھاتر ءَ اگاں مئے سنگتاں چیزے بہ بیت گڈا آئی ءِ زمّہ دار سرکار ءُ بلوچستان ءِ سر وزیر انت –

ھمے وھد ءَ نوابزادہ حاجی لشکری رئیسانی ءَ اتکگ ءُ دلپدردی درشان اتگ ءُ آھانی درسیں لوٹ ھک ءُ کانودی گوشتگ انت آئی ءَ چہ بلوچستان سرکار ءَ لوٹ کتگ ءُ گوشتگ کہ زوتاں زوت ایشانی لوٹ منّگ بہ بنت ءُ گڈسر ءَ باور کنائینتگ کہ ھر تکاں توار چست کنگ بیت اِنت –

کاؤنٹر ٹیررازم ڈیپارٹمنٹ گوستگیں روچاں چہ ھزدار ءَ زورانسری آوار جتگیں ورنایانی دزگیری شال ءَ زاھر کتگ انت –

یک ھپتگ ءِ میاں سی ٹی ڈی ءَ بلوچستان ءِ جتا جتائیں ھند ءُ دمگاں چار بیڑ بری ءِ ٹاہ داتگ ءُ وھدیکہ اے بیڑاں دزگیر کنگ بوتگیں مردمانی تہ ءَ سَے مردمانی پجار بوتگ کہ آ پیسر ءَ زورانسری آوار جنگ ءُ بیگواہ کنگ بوتگ انت –

سی ٹی ڈی ٹاہ داتگ کہ گوستگیں روچاں مارا پکائیں ھالے رستگ کہ بلوچ لبریشن آرمی ءِ باگی عبدالمنان ءُ سرفراز احمد چہ شور پارود کلات ءَ در اتکگ ءُ دیم پہ شال ءَ رؤگ انت –

درشان ءِ تہ ءَ ٹاہ دیگ بوتگ ھال سر بوگ ءَ سی ٹی ڈی شال ءَ درخشان ناکہ شال سبی دگ ءَ راہ بستگ ءُ پرپٹ سوار داشتگ انت – پٹ پول ءِ میان ءَ مارا یک پرپٹ ءِ سر ءَ شک بوتگ گڈا ما آ اوشتگے اشارہ کتگ بلے آئی ءَ تچگ ءُ رؤگے جھد کتگ بلے کارمند آئی ءِ دارگ ءَ سوبمند بوتگ انت ءُ اے کتکار دزگیر کتگ انت –

سی ٹی ڈی ءَ اے مردمانی گور ءَ پنچ دزبمب، یک ھزار ءُ دوسد گرام C4 تراکناکیں شورہ، دو کِلو دگہ مواد، چار الیکٹرک ڈیٹونیٹر، یک ریموٹ کنٹرول کٹ ءُ یک الفا فائر سسٹم ءِ دستیگ کنگے ٹاہ داتگ –

سی ٹی ڈی ءِ جارکش ءَ ٹاہ داتگ کہ بنداتی جست ءُ پُرس ءِ میان ءَ کتکاراں دپ ءِ وت منّ اِتگ کہ آھاں آغا شکیل درانی ءَ ھوار ھزدار ءِ دگہ بازیں سرکاری مرمانی جنگے شوربندی کتگ –

دی بلوچستان پوسٹ ءَ اے درگت ءَ گیشیں پٹ پول کتگ گڈا ھمے ھال سربوتگ کہ اے ھردو مردم عبدالمنان ء محمد موسی ءُ سرفراز ء نیاز جھمنند نوغے ھزدار گوستگیں ماھے سِی اکتوبر ءَ ھزدار ءِ دمگ فیروز آباد ءَ ھما وھد ءَ زورانسری آوار جنگ بوتگ انت کہ آ فٹبال گوازی ءَ پد واتر بوتگ انت – ھردو ورنا میڈیکل اسٹور یے کار ءَ ھم بوتگ انت –

اے دزگیر کتگیں ھردو ورنا زورانسری آوار جنگ بوتگیں رشید ءُ آسف بلوچ ءِ کھول سیادی دار انت –

وتی براتانی یل کنائینگے ھاتر ءَ توار چست کنوکیں گھار سائرہ بلوچ ءَ ھردو ورنایانی بیگواھی ءِ ھبر راست کتگ گوستگیں روچ ءَ چاگردی ترامجاہ ٹویٹر ءِ تہ ءَ نبشتگ کہ منی دو وارس سرفراز ءُ منان سِی اکتوبر ءَ ھزدار ءِ دمگ فیروز آباد ءَ فٹبال گوازی ءَ شتگ بوتگ انت کہ واتر بوگ ءِ وھد ءَ پھازگی لشکر ایف سی ءِ کارمنداں آ آوار جتگ ءُ بیگواہ کتگ انت –

ھمے ٹویٹ پاکستان ءِ نامداریں اھوالکار حامد میر ءَ ری ٹویٹ کتگ ءُ پہ جُست نبشتگ کہ بلوچ ورنایانی ھاتر ءَ فٹبال گوازی کنگ ھم جرمے جوڈ کنگ بوتگ؟

چار روچ ساری سی ٹی ڈی ءَ چہ کلات ءِ دمگ منگچر ءَ ھم یک ورنایے ءِ دزگیر کنگ ءِ ٹاہ داتگ بلے اے ورنایے کھول ھم آئی ءِ زورانسری آوار جنی ءِ بگیری ءَ زھرشانی ءَ بوتگ انت –

سی ٹی ڈی ءِ درشان ءِ رِد ءَ سی ٹی ڈی ءَ چہ کلات ءَ بلوچ لبریشن آرمی ءِ کمکار ولی اللہ لہڑی چہ منگوچر کلات دگ ءَ دزگیر کتگ ءُ آئی گور ءَ تراکناکیں شورہ ھم دست کپتگ –

بلے ورنایے کھول اے دزگیری ءَ پیسر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ اتکگ انت ءُ وتی زھرشانی ءِ نبشتہ کنائینتگ –

زورانسری آوار جنگ بوتگیں ولی اللہ لہڑی ءِ برات ءِ گوشگ ات کہ منی بیست ءُ سَے سالی برات ولی اللہ لہڑی جھمنند خاردان کلات کالج ءِ نودربر یے ءُ پدا کلات بازار ءَ کراکری دکان ءَ آئی ءَ مزوری کتگ بوتگ – بیست ءُ شش اکتوبر سال دوھزار بیست ءُ دو ءِ ادار سَے ءِ نزیک ءَ بید نمبر پلیٹ ءِ دو سرف گاڑی اتکگ انت ءُ سَے ناشناسیں سلاہ بندیں مردماں منی برات چہ دکان ءَ زورانسری آوار جتگ ءُ گوں وت برتگ –

اشی ءَ ابید یک ھپتگے ءِ میان ءَ سی ٹی ڈی ءَ چہ مستونگ ءَ نوروز ءُ ظہیر، چہ شال ءَ عبدالواجد ءُ جان محمد، چہ ھب چوکی ساکران دگ ءَ دوست محمد ءُ محمد اسمائیل دزگیر کتگ ءُ بیگواہ کتگ انت ءُ ٹاہ داتگ کہ اشانی گور ءَ سلاہ ءُ تراکناکیں شورہ دست کپتگ –

سی ٹی ڈی ءَ بلوچستان ءِ تہ ءَ چدوپیش ھم بازیں مردمانی دورگیں بیڑاں مردمانی دزگیری ءِ ٹاہ داتگ بلے پدا آ زانگ بوتگ انت کہ چہ پیسر ءَ زورانسری آوار جتگیں مردم بوتگ انت وھدیکہ ریڈ بُک ءِ تہ ءَ ھم بازیں مردمانی نام ھوار انت کہ آ پیسر ءَ آوار جنگ بوتگ انت کہ آھانی درگت ءَ وائس فار بلوچ مسنگ پرسنز ءَ ھم درشان داتگ –

اشی ابید سی ٹی ڈی نیمگ ءَ بازیں مردمے دروگیں میڑ ءَ کُشگ بوتگ انت کہ آ پیسر ءَ زورانسری آوار جنگ بوتگیں مردم بوتگ انت –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ انت کہ چیریں ادارہ سی ٹی ڈی ءَ کار بندگ انت ءُ دست گوشیں پرزنداں آوار جنگ ءُ شھید کنگ ءَ انت –

ماما قدیر بلوچ ءَ گوشتگ کہ ایجنسی والھاں نوکیں شوربندی ءِ ٹھینتگ بلے سی ٹی ڈی ءِ دروگ نوں پدر انت زورانسری آوار جنی ءُ زالبولانی آوار جنی درگت ءَ ریاست ءَ مدامی دروگیں درشان داتگ –

آئی ءِ گوشتگ کہ سرکار پوج ءِ دیم ءَ بے وس انت ضیاء لانگو دروگ بندیت ءُ وتی ھاکمانی چانیگ ءِ ھک ءَ ادا کنگ ءَ انت –