TBP Balochi

نبشتانک: 13 نومبر شھیدانی روچ

نبشتہ کار: سمیر بلوچ

دی بلوچستان پوسٹ

13 نومبر ءِ رمس ءَ کُلیں بلوچ راج سرپد اِنت کہ اے بلوچ سرزمین ءِ شھیدانی نام ءَ نامینگ بیتگ ءُ ایشی ءِ پُشدر ءِ کِسہ چُش اِنت کہ 13 نومبر 1839ءَ ھان ء کلات میر مھراب ھان ءِ سر ءَ اُرش کنگ ءُ بلوچ سرزمین ءَ گُلام کنگ اِنت ھمے جنگ ءَ ھان گوں وتی ھمراھاں شھید کنگ بیت اِنت، چوشکہ ھرچ راجے ءَ شھیدانی ھاتر ءَ آیانی بِستار ءُ شرپ ءَ یک روچے نامینگی اِنت ھمے راھبند ءَ کار گِران بلوچ ھستیں جُھدے سِلاہ بندیں تنزیم ءُ سیاسی گّلاں ھم پہ وتی راجی جُھد ءَ 13 نومبر شھیدانی شرپ ءَ داشتگ ءُ دارگ ءَ اَنت۔

اگاں بلوچی کدیمی شائری ءَ بِچار ئے بلوچ راجی بامردانی شھادتی تاریک سک کْوھن اِنت چوشکہ ھمل جیند ءِ جنگ گوں پرتگالیاں،بلوچ تاریک زانتءُ مزن نامیں نبشتھکاراں ھمل جیند ءِ شھادت ءِ تاریک شوھاز کُت نہ کُتگ یا چش گُشت کن ئے کہ اے واکیات ءِ تاریکی کتاب ءُ کاگد دست نہ کپتگ اَنت-

ھمے وڑ ءَ میر کمبر ء سلیمان ءَ ھم پہ وتی راج ءِ ھاتر ءَ گوں کبزاگیر ءِ پوج ءِ دیم ءَ دار ایت ءُ جنگ کنت وتی سالونکی روچ ءَ شھید بیت اِنت بلے جُست ھما اِنت، شھادت ءِ روچ ءِ تاریک ؟
مردیں آدمیں چاگرد ءُ جُھد ءِ تہ ءَ زالبولانی دیم ءَ آیگ ءُ شھادت ءَ گُلائیش کنگ بلوچ راجدپتر ءَ یک نوکیں سّبکے دیم ءَ آرگ بیتگ ءُ ایشی ءِ بستار ھم مارگی اِنت ساڑائگی انت، اے سبّک بلوچ جُھد ءِ ءُ گُل زمین ءِ مات بانُک کریمہ بلوچ ءُ سرمچاریں شاری بلوچ ءَ دیم ءَ آورتگ، بانُک کریمہ ءِ بابت ءَ آئی ءِ جُھد ءُ سیاسی سِنچ کس ءَ چہ چیر نہ اِنت، اے رستریں ریاست ءُ بے گیرتیں فوج ءِ دیم ءَ اوشتگ ءُ وتی راجی سیاست ءَ دیم ءَ برگ اگاں زالبولاں کسے ءَ سوج داتگ ءُ رھشونی کُتگ آ مئے بانکیں شھید کریمہ بلوچ اِنت ءُ ہمائی ءِ جُھد بیتگ کہ بلوچستان ءَ سرمچارے شاری بلوچ پیداک کُتگ-

سرمچاریں شاری بلوچ ءَ ھما کار کُت کہ ھندستان ءِ سرمچار پرتیلتا وادیدا ءَ گوں انگریز کبزاگیر ءَ 1932ءَ کُت۔ پرتیلتا وادیدا ءِ کِسہ چُش اِنت کہ آ چیٹاگونگ ڈاکا ءَ پیداک بیت وانگ ءَ کولکتہ ءَ “بوتینے کالج”ءَ پلسپی ڈگری ءَ گیپت ءُ وانگجاہ ءَ ماشٹری کنت،ھمے وھد ءَ ھندستان ءِ آجوئی ءِ جُھد ءَ ھم ھوار بیت، سوریا سین ءِ سروکی ءَ پرتیلتا زالبولانی سیاسی سروک بیت ءُ 1932 ءَ 15 زالبولانی یک گروپے اڈ دنت پرتیلتا ءِ سروکی ءَ اے گروپ پھارتلی یورپین کلب ءِ سر ءَ اُرش کنگ ءِ پیسلہ کن اَنت اے ارُش ءِ تہ ءَ پھارتلی یورپین کلب ءَ گوں کبزاگیر ءِ اپسر ءُ مردماں بُن دیگ ءِ جُھد کن اَنت کلب وَ بُن گیپت بلے گیشتریں مردم رک اَنت ءُ یکے مِر ایت، ارش ءَ پد کبزا گیر پولیس پرتیلتا ءِ رند پداں بیت ءُ وھدے پرتیلتا ءِ راہ ھر نیمگ ءَ بندگ بیت ءُ آ زانت کہ نو رک اِت نہ کنت آ وتی گْور ءِ بستگیں سائینائیڈ ءِ گولی ءَ وارت ءُ وت کُشی کنت ءُ شھادت ءَ گُلائیش کنت بلے وت ءَ کبزا گیر دست ءَ نہ دنت۔ پرتیلتا وادیدا ءَ ھندستان ءِ اولی بنگالی شھید زالبولیں داد ءُ وشنامی گون اِنت کہ انگریز کبزا گیری ھلاپ ءَ شھید بیت۔ اے سالی 13 نومبر بستار شاری بلوچ ءَ گیش کُتگ گوں وتی سرمچاری شھادت ءَ، بلوچ راج باید اِنت کہ اے زالبولانی شھادت ءَ گیش ءَ چہ گیش دیم ءَ بیار ایت کہ اے یک نوکیں درے پہ بلوچ راج ءُ گل زمین ءَ ھمے درگت ءَ بلوچ سیاسی زالبولاں گیش وھد بہ دنت کہ آ وتی ھیال ءُ سیاسی زانشت ءَ بلوچ راج ءِ دیم ءَ بیار اَنت ءُ آیوکیں زالبول بزان اَنت کہ آیانی سیاسی بستار چی اِنت۔ “من اد ءَ اے گپ ءَ تچک کنگ لوٹاں کہ شھادت ءِ مکام پہ زالبولاں ءُ مردیں آدماں یک اِنت بلے چو ھم زانگ بہ بیت کہ چاگرد ءِ تہ ءَ ءُ سیاسی پِڑ ءَ بازیں کمی ءُ گیشی یے ھست کہ مارا ایشی ءِ سر ءَ کار کنگ لوٹ ایت” کُل بلوچ شھیداں سُہریں سلام کُل بلوچ جُھدکاراں سُھریں سلام، بلوچ ءُ بلوچی بلوچستان،ابدمان بات اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: گُڈّی نمدی

نبشتہ کار: مجاھد زاھد

دی بلوچستان پوسٹ

سلام ءُ دروت مھروان چوناھا باید نہ اِنت کہ ترا مھروان بہ گُش آں،بلے یک وھدے پہ وت ءَ اچ ترا باز مھر دیستگ نو پمیشکا ھر وھد ءَ تئی نام ءِ پُشت ءَ یا گپے ءِ جنگ ءَ پیسر ترا مھروان گُش آں ھالد جان،منی سبر ءِ پیالہ نو سرّیچ اِنت،بلوچاں گوشتگ قبر ءَ داں ھدے ءَ جن اَنت،ھد ءَ گیش آپ در کیت من ءَ راستی ءَ نو کتابی ءُ فلمی گپ جنگ ءَ دمبرتگ تئی شھیدی ءَ چہ پد من سے ءُ چار نمدی ھم نبشتگ بلے پد ءَ پسہ ءِ جواب نہ کنگ ءِ سوَب ءَ من اچ ترا نو آھستو آھستو یکیم بہ وان آں تو گوشت کن ئے کہ من اچ ترا نو پراموش بوگ لوٹ آں روچے پہ روزگارے ترا یاد کنگ ھم نہ لوٹ آں۔

دریگتے گند ئے انچو آسان بوتیں یار؟ من ناں بلکیں ما ھرچ کس ءَ ترا دیری شمشتگ اَت دگر ءَ نہ زاناں یار بلے منی جند ءَ وھدے کہ تئی زھیر زور اَنت وَ دل گش ایت برو تھنا یک تھاریں کوٹی ءِ تہ ءَ وت ءَ بند کن شپ ءُ روچ بہ نِند ءُ بہ گِریویے ،داں ھما وھد ءَ کہ دل ءِ دراھیں زنگ بہ رِچ اَنت ءُ من کمو وھد ءِ واستا ایمن بہ باں من نہ زاناں تئی جتائی ءَ پد من وتی جند ءَ نو کُجا بہ شوھاز آں؟ انچو سما بیت کہ تئی نمیران بوگ ءِ ھواری ءَ منی جند ھم رُنگراھاں سر سر جنان اِنت،سْیاہ ءُ تھاریں مُجانی تہ ءَ وت ءَ گار ،باریں کُجا گِسر کپتگ آں!-

دیدگ،من اگاں کسہ آران بہ کن آں تئی دیم ءَ لھتے راستی پدّر بہ کن آں یا ترا لھتے زوریں گپ ءُ دورگیں کسھانی بارہ ءَ سرپدی بہ دیاں وَ تو بہ گند ئے گیشتر تکانسر بہ ئے،بوت کنت نو تو آرام بوگ لوٹ ئے،زندمان ءِ دراھیں چست ءُ ایراں چہ پراموش،ھرچیز ءَ چہ بے کمار وتی کیپ ءُ کُمارانی تہ ءَ مُلم ءَ ئے نو پمیشکا من آ نیمگ ءَ ھچ ٹچ ھم دیگ نہ لوٹ آں بلے تھنا یک گپے تچک ءَ ھال دیاں،اے گپ من پیسر ءَ تئی گور ءَ کُتگ ھم،بلے زان ئے من انگت ایمن نہ آں،بوت کنت منی نمدی ترا سر نہ بوتگ اَنت ءُ تو آ ھبر ءُ گلگ کہ من کتگ اَنت تو آیاں چہ بے سما ئے ،پمے واستا یکبرے پد ءَ من ھالو پُل اے گپ ءَ تئی دیم ءَ ایر کنگ لوٹاں ءُ ترا ھال دیاں کہ من ناں بلکیں پہ ھمل ءَ کس ھالدے جوڑ بوت نہ بوت،یار! من ھردیکہ ھمل جان ءَ گند آں تا من ءَ ھمل جان ءِ چمانی تہ ءَ گُش ئے یک اجب رنگیں تکانسری یے گندگ ءَ کیت،آئی ءِ چم چہ بازیں تچ ءُ تاکاں،چہ شوھازگ ءُ راھچاریاں گُش ئے ژند اَنت،ھمل جان ءِ اے بے سوزی کہ مُدام چم ئِے پورہ ملار اَنت،من ءَ سک باز دردّ دنت یار۔من چوناھا برے برے اے ھم لوٹاں کہ تئی گونڈو منی دیم ءَ مہ کپ اَنت،من بِھ نہ لوٹاں من کمبر ءَ بہ گند آں،میرجان ءُ ھمل ءُ بیبگر ءَ گوں دُچار بوگ ءَ گوں پورہ جبین ءَ آسے بُن کپ ایت۔ ھمبل،بلے من وھدے کہ اے مارشتاں گوں دُچار کپ آں،وتی جند ءَ پریشانی ءَ گند آں پد ءَ من وت جیڑاں کہ من دروگ بندگ ءَ آں،ھچ کس پہ دِگر ءَ یا پہ وتی سنگتے ءِ،بْرات ءِ ناکوزتک چُکانی یا آئی ءِ پُشتپد ءِ واستا اینچو پریشان بوت نہ کنت من بس وت ءَ پیشدارگ لوٹ آں یا تو گوشت کن ئے گوں دروگیں گیر ءُ یاتانی کپگ ءَ وتی جند ءَ ھم ردّ دیگ ءَ آں۔پرچاکہ من ھیران آں!یک پِتے کہ وتی چُکاں زوت یلہ کنت،یک کسے کہ پہ وتی پُشتپداں ھچ جیڑ اِت مہ کنت،انچو پہ دیم ڈارِک بہ روت ءُ وت ءَ گار بہ کنت ءُ پد ءَ ھچ آیانی نیمگ ءَ چک مہ جنت،گُڑا دگہ چوں پہ دگر ءَ مھروان بیت یا آیانی پرواہ ءُ چار ءُ گُزار ءَ کنت؟ من ھمے جستانی تہ ءَ گاری ءَ چہ پد کہ سما کن آں گُڑا مار آں کہ واکی من گوں وتی جند ءَ دروگ بندگ ءَ آں،راستی ءَ وتی ریپینگ ءِ جھد ءَ آں کہ بزاں من چُشیں دردواریں ءُ مھروانیں مردمے آں۔ ھالو پُل،اگاں راستی ءَ لوٹ ئے گُڑا اے وھد ءَ ھمل جان ءَ تئی ساھگ ءَ رُدگی اَت،آئی ءَ تئی مھرانی سک پکار اَت بلے تو اِت ئے کہ چُشیں بے مھروانی ءُ بے وپائی کُت۔

ھیر نو من گلہ ءُ زاری نہ کن آں،من ترا گوشتگ اَت کہ فلمی ءُ کتابی گپ جنگ من ءَ اوں دمبرتگ چِد ءُ پد ترا واتر بوگ ءِ سلاہ ءَ ھم روچے پہ روزگارے نہ جن آں تئی کپپ اِنت،تو کہ شُتگ ئے اللہ اِت پّشت ءُ پناہ بات ئے،واتر نہ بہ ئے ھم آ تئی تب اِنت بلے من جُھد کن آں کہ اے منی گُڈّی نمدی بہ بیت پہ تو من نو ترا نہ لوٹ آں ایشی ءَ تو گلھے پھم ئے،زھر بوگ ءِ نام ءَ دے ئے،اے ھم تئی دل ئیگ اِنت،تئی تب اِنت،تئی کپ اِنت۔بلے من جھد کن آں کہ اے گُڈی رند بہ بیت،اگاں اوپار بوت ءُ ھمل ءَ من ءَ دوبر تئی یاتاں نہ پِرّینت تو گُڑا ھمے بہ پھم کہ اے گُڈّی رند اِنت کہ تو منی بکواساں گوشدارگ ءَ ئے،نو ترا موکل اِنت ءُ چہ من ءَ رزا اِنت ھمل ءِ ترانگاں اگاں کپت ئے بس یک رندے پد ءَ بِچکند،تئی بچکند من ءَ درستاں گیش یات کاینت!
سلامتی پہ تو! شُھدائے بلوچستان ءِ شھیداں سُھرچکیں دروت کہ آیاں وتی وشیں زِند پہ بلوچ راج ءُ سرزمین ء بلوچستان ءِ ھاتِر ءَ ندر کُتگ اَنت،ما وتی گُنگرانی مھروانی وامدار ایں!-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سیزدہ نومبر شھیدانی روچ ءِ درگت ءَ بلوچستان ءُ جھان ءِ کند کُنڈ ءَ مراگش برجم دارگ بنت وھدیکہ مروچی بلوچستان ءَ شھیدانی روچ ءِ درگت ءَ ھم مراگشے برجم دارگ بوتگ کہ اود ءَ بلوچی ءُ براھوئی زبان ءِ وش الھانیں گشندہ میر احمد بلوچ ءَ گوں وتی توار ءَ بلوچستان ءِ شھید نازینتگ انت –

مراگش ءَ راجداریں باسکاں مزنیں کچے ءَ بھر زرتگ ءُ شھیداناں دروت ندر کتگ –

وھدیکہ چاگردی ترامجاہ ٹویٹر ءَ ھپتگے ءَ گیش انت کہ شھیدانی یات ءَ #13NovBalochMartyrsday ھیش ٹیگ چلائینگ بوگ ءَ انت –

دومی نیمگ ءَ بلوچ نیشنل مومنٹ ءَ مروچی ءِ روچ ءَ سیزدہ نومبر ءَ شھیدانی روچ ءِ درگت ءَ چاگردی ترامجاہ ٹوئیٹر آنلائن مراگش ءُ وتی سرجمیں ھنکیناں شھیدانی روچ ءِ دارگ ءِ جار جتگ –

بی این ایم ءَ وتی جار ءِ تہ ءَ گوشتگ سیزدہ نومبر بلوچ راجی شھیدانی روچ انت ءُ اے درگت ءَ بی این ایم بلوچستان ءُ جھان ءَ مراگش برجم دار ایت ءُ دو آنلائن مراگش برجم دارگ بیت اِنت –

اے روچ ءِ درگت ءَ گوشگ بیت اِنت کہ اے روچ بی ایس او آزاد ءَ سال دوھزار ءُ دہ ءَ ما شھیدانی نام ءَ ھمے سبب ءَ گچین کتگ کہ اے روچ ءَ بلوچانی نامی ءُ گرامی ئیں رھشون میر مھراب خان ءِ شھیدی ءِ روچ اِنت ءُ چرے درگت ءَ اے روچ ءَ بلوچستان ءَ ھوار ھوار جھان ءَ نندوکیں بلوچ اے روچ ءَ شھیداں دروت ءُ سلامی پیش کن اَنت –

بلوچستان ءِ جتاجتائیں دمگ کیچ ءُ کلات ءَ پاکستانی پوج ءُ پولیس پانگسانی سر ءَ ناشناسیں سلاہ بندیں مردماں دستی بمب اُرش کتگ ءُ دومی نیمگ ءَ بلوچ آجوئی لوٹوکیں سلاہ بندیں گل بی ایل اے ءَ بی ایل ایف ءَ اے اُرشانی زمہ واری منّ اِتگ اَنت-

سربوتگیں ھالانی رِد ءَ گوستگیں شپ ءَ کلات شھر چمشہ پولیس پانگس سر ءَ ناشناسیں سلاہ بندیں مردمانی دستی بمب اُرشے کتگ ءُ اُرش آسر ءَ محمد یونس نامیں پولیس ڈرائیورے ٹپی بیتگ-

ھمے وڑ کیچ ءَ پشمبے ءِ شپ ءَ ائیرپورٹ چوک سر ءَ برجاھیں پاکستانی پوج پانگس سر ءَ ناشناسیں سلاہ بندیں مردماں دستی بمب اُرشے کتگ-

دومی نیمگ بلوچ آجوئی لوٹوکیں سلاہ بندیں گل بلوچ لبریشن آرمی ءُ بلوچستان لبریشن فرنٹ اے اُرشانی زمہ واری منّ اِتگ اَنت-

بلوچ لبریشن آرمی ءِ جارکش جیئند بلوچ ءَ وتی درشان ءِ تہ ءَ گْوشتگ کہ مئے سرمچاراں کلات ءِ ھند چشمہ پولیس پانگس سر ءَ دستی بمب اُرشے کتگ ءُ تراک ءِ آسر ءَ یک پولیس کارندھے ٹپی بیتگ اے اُرش زمہ واری بلوچ لبریشن آرمی منّ اِیت-

بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کتگیں درشان ءِ تہ ءَ گْوشتگ کہ دہ نومبر پشمبے ءِ شپ ءِ ھشت ءُ نیم ءَ کیچ ءِ بُنجاھی شھر تربت ءَ ائیرپورٹ چوک سر ءَ برجاھیں زورگریں پوج ءِ پانگس سر ءَ دستی بمب اُرشے کتگ- دستی بمب سنگر تہ ءَ کپتگ ءُ چریشی ءِ آسر ءَ دُژمن پوج ءِ یک کارندھے مرتگ-

جارکش ءَ دیمتر ءَ گْوشتگ کہ زورگریں پوج ءِ زورگپتگیں بلوچستان ءَ چہ دراھگ ءُ آجوئی ءَ تاں اُرش برجاہ بنت-

امریکہ ءِ گچینکاری ءِ سوبمندی ریاست ایریزونا ءَ ڈیموکریٹ ءِ امیدوار مارک کیلی یک ترندیں مقابلے ءَ پد ھریف ری پبلکن پاٹی ءِ بلیک ماسٹرز ءِ پروش دیگ ءَ سوبمند بیتگ-

ھبر رساں ایجنسی ایسوی سی ایٹڈ پریس ءِ رد ءَ داں انگت جوبائیڈن ءِ ڈیموکریٹ پاٹی امریکہ ءِ سینٹ ءِ کنٹرول ءِ دارگ ءَ داں انگت ءَ یک نشتے ءِ میان ءَ اوشتاتگ –

ڈیموکریٹس ءِ امید نی نیویڈا ریاست ءِ نشستانی سر ءَ سینٹر کیتگرین کورٹز مسٹو ءُ ری پبلکن ءِ امیدوار ایڈم لیگزالٹ ءِ میان ءَ مقابلہ ءِ سرجمیں سوبمندیانی جار ءَ بندوک اِنت-

اے نشست ءَ آدینگ ءِ روچ ءَ ٹرمپ ءِ ریپلکن پاٹی ءِ امید وارے ءَ کسانکیں امیدے بیتگ بلے اے گمان کنگ بیگ ءَ گڈی ءَ داں پروش وارت اِنت-

اگاں نیواڈا ءَ ریپبلکن ءِ امیدوار ءَ چہ کٹ ات گڑا سینیٹ ءِ کنٹرول داں شش دسمبر ءَ جارجیا ءَ بیوکیں رن آف الیکشن ءَ داں ھردوکیں پاٹیانی میان ءَ برابری بیت اِنت –

جارجیا ءَ ڈیموکریٹ ءِ سینیٹر رافیل وارنوک ءُ ری پبلکن ءِ امیدوار ھرشل والکر ءِ میان ءَ دیم کائی بیت اِنت کہ اے یک گوستگیں فٹبال اسٹارے-

ایریزونا ءَ مارک کیلی وتی پاٹی ءَ درستاں چہ کمزورتر سرپد بیت اِنت اشی ءِ یک امیدوارے ءَ نیزور گندگ ءَ اِنت آ نیشنل ڈیموکریٹس ءُ لھتے ریاستی ری پبلکنز ءِ پلامرزی کمک گون اِنت اے پلا مرزی کنوکاں امریکہ جمھوریت ءِ پھریزگ ءَ مارک کیلی ءِ سوبمندی المی کتگ –

ایریزونا ءَ ھشتاد ءُ سے درسد اوٹانی ھساب ءَ پد مارک کیلی ءِ دیم ءَ اوشتوکیں ماسٹرز ءَ پنچ ٹک ھپت درسد کٹ اتگ –

بلیک ماسٹرز ءَ یک وینچر کیپیٹلسٹ ءُ سیاسی نوواردے ءِ دروشم ءَ زانگ بیت اِنت کہ آئی ءَ گوستگیں سروک ڈونلڈ جے ٹرمپ ءِ ٹاہ من اتگ ءُ سال دوھزار ءُ بیست ءَ دزی بیتگ ءُ سیاست ءَ آیگ ءِ پیسلہ کتگ –

آ ٹیکنالوجی کار ءُ بار ءَ بندوکیں ارب پتی پیٹر تھیل ءِ پلامرزی ءَ چہ ایریزونا ءَ سیاست ءَ اتکگ لکانی کلدار گچینکاری ءِ مھم ءَ ھرچے کرتگ –

بلوچستان ءَ دگ ءُ تیرگواری ءِ وئیل آسر ءَ سے مردم بیران ءُ یکے ٹپی بیتگ

بلوچستان ءَ دو جتاجتائیں دمگاں دگ ءُ تیرگواری ءِ وئیل آسر ءَ سے مردم بیران ءُ یکے ٹپی بیتگ-

سربوتگیں ھالانی رِد ءَ شال ءِ دمگ چاندنی چوک ءَ ناشناسیں مردماں تیرگواری کتگ ءُ یک مردمے کُشتگ- کُشگ بیتگین ءِ پجّار میر عبدالباسط ء محمد رحیم مینگل نام ءَ چہ بیتگ-

تنی وھدے وئیل سوب انگت زانگ نہ بیتگ-

دومی نیمگ ءَ چہ کلات ءِ ھند شیشہ ڈغار ءَ ناشناسیں سلاہ بندیں مردماں تیرگواری ءُ عبدالواحد نامیں مردمے کُشتگ-

پولیس رِد ءَ لاش سول نادُراھجاہ برتگ – پولیس رد ءَ بنداتی پٹ ءُ پول ءَ چہ زانگ نہ بیت وئیل کوھنیں دُژمنی یے بیتگ-

بلوچستان ءِ بُنجاھی شھر شال ءَ مروچی شمبے ءِ روچ ءَ بیتگیں دگ وئیل ءَ لورالائی ءِ ڈپٹی کمشنر بیران وھدے کہ ھمراہ ٹپی بیتگ-

وئیل شال ءِ دمگ اسپینی دگ ءِ ھند ءَ بیتگ، اود ءَ ڈپٹی کمشنر لورالائی جمیل بلوچ بیران وھدے کہ آئی ءِ ناکو ٹپی بیتگ- ٹپی ءُ بیران بیتگیں ریسکیو کارندھاں نادُراھجاہ برتگ اَنت-

زانگ بہ بیت بلوچستان ءَ ھمکروچ دیم ءَ آؤکیں دگ وئیلاں بازیں مردمے بیران بنت یا کہ سرجمیں زندگی ءَ آ لنگ ءُ مُڑ بنت-

روکپتی بلوچستان ءِ بنجاھی شھر دزاپ ءُ پھرہ ءَ گوستگیں بیست ءُ چار ساھاتانی توک ءَ ھپت ایرانی لشکر ءِ دست ءَ آوار جنگ ءَ پد بیگواہ کنگ بیتگ اَنت-

آوار جنگ بیتگیں مردمانی توک ءَ پنچ کس دزاپ ءَ آوار جنگ بیتگ اَنت ءُ دو کس پھرہ ءَ آوار جنگ ءَ پد بیگواہ کنگ بیتگ اَنت-

گیشیں ھالانی رد ءَ دزاپ ءِ ھند جام جم ءَ گوستگیں بیگاہ ءَ سَے کس ایرانی چیریں ادارھاں آوار جتگ ءُ بیگواہ کرتگ اَنت-

اے ھرسئیں مردمانی نام تنی وھدی دیم ءَ نیتکگ اَنت بلے چم دیستگیں مردمانی رد ءَ ایرانی چیریں ادارھاں دگ ءِ سر ءَ گاڑی داشتگ ءُ سَے مردم زورانسری آوار جتگ ءُ گاڑی ءَ سوار کتگ اَنت-

شنگ بیتگیں یک تامر بندے ءَ گندگ بیت اِنت ایرانی چیریں ادارہ یک گاڑی ءَ مردماں آوار جنگ ءُ گاڑی ءَ زورانسری سوار کنگ اِنت-

ھمے وڑ ءَ دزاپ ءَ چریشی ءَ پد دگہ دو مردم ھم ھمے وڑی ءَ آوار جنگ ءُ برگ بیتگ اَنت-

اشانی توک ءَ یکے ءِ پجار یونس ریگی میر بلوچ زئی ءِ نام ءَ زانگ بیتگ ءُ دومی ءِ پجار ھم نہ بیتگ-

ھمے وڑ ءَ پھرہ ءَ ھم گوستگیں روچ ءِ آدینگ ءِ نماز ءَ پد زھرشانی ءَ ھواریں مردم باز آوار جنگ بیتگ اَنت بلے اشانی توک ءَ دو ورنایانی نام دیم ءَ اتکگ بیتگ اَنت-

پھرہ ءَ آوار جنگ بیتگیں ورنایانی پجار ایمان اکوان ءُ خالد براھوئی ءِ ناماں زانگ بیتگ اَنت کہ اشانی اُمر بیست ءَ چہ جھل ءُ پانزدہ سال ءَ چہ برز گوشگ بوگ ءَ اِنت-

ھردوکیں ورنا گوستگیں روچ ءَ زھرشانی ءِ وھد ءَ پولیس ءَ آوار جتگ ءُ برتگ اَنت ءُ پد ءَ آیانی درگت ءَ دگہ ھچ ھال دیم ءَ نیتکگ اَنت-

روکپتی بلوچستان ءَ چست بیتگیں زرمبشت ءَ چہ بازیں مردمے آوار جنگ ءُ بیگواہ کنگ بیتگ اَنت ءُ ھمے وڑ ھمے زرمبشت ءِ زھرشانیانی وھد ءَ ھم لشکر ءِ تیرگواریاں باز مردم کُشگ ءُ زدگ کنگ بیتگ اَنت-

نبشتانک: کولواہ جنگجاھے

نبشتہ کار : شیردل بلوچ

دی بلوچستان پوسٹ

تَمردیں” شھمیر جان پنام ءِ شے شاپکولی دلساپین ءُ مَلنگیں ھمراھے اَت، مُدام بہ دیستیں بچکندگ ءَ اَت، انچو مھروان ءُ مُھکمیں سنکتے اَت، آئی ءِ بابت ءَ چینچُک بہ نبیس آں، کرز ایت ، بے درور تچک ءُ دردواریں انسانے بیتگ، اگاں کسے ءَ را پہ آئی ءَ کارے کپتگ، وتی دسرس ءَ گڑا آئی ءِ دپّ ءَ اناں دَر نیاتکگ، ھما وھد ءَ پہ ھمراھی ءَ پاد اَتکگ ءُ ھمکوپگ اُوشتاتگ، دلساپی ءَ چہ جند ءَ باز ازیت ئِے داتگ، بزانکہ پہ آئی ءِ واستا درستیں جُھدکارانی مانا یک بیتگ، کسے ءِ میان ءَ پرک، نہ داشتگ ئِے کسے دوست کسے نادوست نہ لیک اِتگ ئِے، انیگیں دَور آئی ءِ سسا ءَ ھمِک جُھدکار ءِ تہ ءَ گندگ بیت، بلے لھتیں وھد ساری اناں ۔

وھد ءِ زرورت اوں ھمیش اِنت، بزانکہ جھدکاراں ھمدل ءُ تپاک بوگ لوٹ اِیت، ھوار جُنزگی اِنت، آجوئی ءِ کاروان ءِ مُھکم کنگ ءُ زورگِریں ڈیھ ءِ ءُ آئی ءِ باڑھی دلارانی پروش دیگ ءَ گڑا ما سوبمَنْد بوت کن اِیں۔

شھمیر جان بہ بکش تئی زند ءَ اَچتو جُست کنگ نہ بیتگ کہ تئی لوگ ءَ ھر وھد ءَ سنگتانی روگ ءُ آیگ بزان مھمان ھست اِت اَنت، تئی لوگ چہ مھماناں ھچبر ھالیگ نہ اَت، گندگ ءَ ” گوھر ءِ بَگجتیں کولواہ ڈوکال ءَ وتی ارجان کرتگ اَت، ھرچ بلوچ دِرتہ پچ ءُ پادشپاد ءُ تنگدستی ءَ لاچار کرتگ اِت اَنت، تئی وڑیں مردمے ءِ جاہ ءَ اینچو مھمان ءِ روگ ءُ آیگ ءَ جنجالے اَت بلے!! پر تئی وڑیں مھروان ءُ ازیمیں جُھدکارے ءَ گوش ئے اینچّک گران نہ اَت، شپانک ءُ پھلوالیں ھنکینے ءَ تئی مُھکمیں بالاد آشوب ءِ چیدگ ءِ بُنکی دْروشم پیش داشتگ، چُشیں ھستی ءِ واھند نہ اَت، گندگ ءَ پہ گدُ دوچی ءُ وام ءُ بدل وتی لوگ ءَ چلائینتگ اَت ءُ نگیگیں وھدے ءَ دو شَنک بھا ئِے کرتگ ءُ زندمان ءِ روچ ئِے تیلانگ داتگ اَنت، تئی شیرزالاں سد آپریں بات پہ آشوب ءِ زندگ دارگ ءَ تئی گوں ھمکوپگی اِش کُتگ۔

کولواہ ءِ تاریک چوناھا انُچش درپشناک ءُ نامدار اِنت، انچُش شاھگان ھست اِنت، ڈگارانی ندارگ ارواہ ءَ تاھیر بکشا اِیت، پراہ لمبیں کھیر، کوہ ءُ کھچر ءُ تیجگاں شائراں گال کماتگ ءُ شھزانتاں مُدامی پہ آئی ءِ ساڑیگ وتی ھیال ءُ ند کارمرز کتگ اَنت، انگت کولواہ ءِ سرجمیں کسہ دیم ءَ نیاتکگ۔

شھمیر جان کولواہ ءِ ھُمک مّردم چو تئی دْروشم ءَ مھروان ھست اَنت، پہ ھمراھی ءَ گوں بوت گڑا یکجاہ مر اِیت، بلوچی ءِ دود اِش زندگ کتگ اَنت، مھماندار ءُ ھمسایگدار ءُ میار جلّ اَنت، مزار بیمیں جنگولیں دیار زانگ بیت، کولواہ جنگجاھے”کولواہ ءِ گْوَست بہ بیت یا انیگیں دَور جنگانی کسھاں سرکیل ھست، بلوچ ھان نوشروانی ءَ اِنچو گوں زورگریں انگریز ءِ لشکر ءَ میڑِ داتگ آ کدی بے ھیال نہ بنت ءُ اے دَور ءَ یکرندے پد ءَ بلوچ ءِ ملمڑیں رھشون” ڈاکٹر اللہ نزر گوں وتی ھمراھاں زورگرِیں پنجاب ءِ لشکر ءَ گوں مِیڑ داشتگ ءُ راج ءِ آجوئی ءِ اُوست زندگ کُتگ اَنت۔

شھمیر جان” جنگ آماچیں کولواہ ءِ ھکّیں پُسگے اَت، وتی زند پہ راج ءِ زندمان ءَ ندر کُت ئِے، جنگ آماچیں کولواہ ءِ کسھاں شَرّ سرپد بیتگ، وتی ھما رھشونانی رندگیری ءَ رپتگ کہ پہ مُدامی سرڈگار ءِ پاسبانی کتگ اَنت ءُ زورگریں ڈیھانی زوراکیاں نہ منّ اتگ اَنت، وتی سراں بکشاتگ ءُ دژمن ءِ سر کپتگ ءُ سرڈگار نہ داتگیں ،راج ءِ رھشونی کُتگ ءُ کنگ ءَ اَنت، راجدپتر اِش سنگین کُتگ ءُ راج ءَ را جھان ءِ دیم ءَ نامدار ءُ زندگ کُتگ ۔

شھمیر جان ءُ ساجو جان گوں لشکریاں کولواہ ءِ زِرباری نیمگ ءِ کوھاں راھسرے ءَ دُچار کپتگ ءُ دیم پہ دیمی میڑ اِش داتگ، آ شھید بیت دومی ھمراہ ئِے زدگ بیت، انچیں روچے ءَ نمیران بیتگ ھما روچ ءَ سرڈگار ءِ دراھیں شھیدانی روچ دارگ بیت، شھمیر جان 13 نومبر 2021 ءَ نمیران بیت ءُ وتی دائمی جاگہ رپتگ گوں آئی ءَ ھوار سرڈگار شھیداں سھرچکیں دروت ندر کناں ۔آجوئی زندگ بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ایلون مسک ءَ چاگردی ترامجاہ ءِ پلیٹ فارم ءُ مائیکروبلاگنگ ویب سائٹ ٹوئٹر ءِ کنٹرول کنگ ءَ پد پٹ ءُ پول کنگ ءِ درچ مروچی بندات بیگی اِنت ءُ اشی ءِ گمان آئی ءَ بھا زورگ ءِ وھد ءَ داتگ اَت-

برطانوی ھبر رساں ادارہ روئٹرز ءِ رد ءَ ٹوئٹر ءِ نوکیں ملازماں مروچی ای میل کنگ بیت ءُ آیاں سرپدی دیگ بیت اِنت آ کشگ بیتگ اَنت یا کشگ بنت لھتے کارگس ھم لھتے وھد ءِ واستا بند کنگ بیتگ اَنت-

گوستگیں ھپتگ ءُ ایلون مسک ءَ ٹوئٹر ءِ واھند بیگ ءَ پد آئی ءَ چل ءُ چار ارب ڈالر ءِ بولی جتگ-

رپورٹ ءِ رد ءَ اسٹاف ءِ باسک مروچی سر بیوکیں ای میل ءَ گوشگ بیتگ کہ پلیٹ فارم ءِ گیش کنگ ءُ مارا بازیں مشکلانی دیمپانی اِنت ءُ کا میان اُستمانی تکاں ملازماں کم کنگ ءَ جیڑگ ءَ اِنت-

ٹوئٹر انتزامیہ ءَ گوشتگ کہ ملازم ءُ کارمرد کنوکانی ڈیٹا ءُ سرجمیں سسٹم ءِ راستی ءِ واستا مروچی کارگس بند کتگ اَنت-

پلیٹ فارم ءِ نیمگ ءَ اے ھم گوشگ بیتگ کہ ھما ملازم دارگ بنت آیاں کارگس ءِ ای میل ءَ چہ سرپدی دیگ بیت اِنت ھما ملازم کشگ بیتگ اَنت آیاں جند ءِ ای میل ءَ چہ سرپدی دیگ بیت اِنت-

نوکیں واھند ایلون مسک ءَ گوستگیں ھپتگ ءَ ملازمانی بارو ءَ گشتگ ات اشی ءِ سبب ھرچ ءِ کمکی کنگ اِنت ھمے وڑ پلیٹ فارم ءِ واستا دگہ گپ کنگ بیتگ اَنت-

آئی ءَ اژدری مزنیں اگدودار کش اتگ اَنت کہ اشانی توک ءَ چیف ایگزیکٹیو ءَ ابید فنانس، اشتھارات، مارکیٹنف ءُ کانونی اگدودار ھوار اَنت-

ٹوئٹر ءِ ملازماں ای میل ءِ رسگ ءَ پد لھتے وھداں پد سدانی کچ ءَ مردماں گڈ بائے کلوہ شنگ کتگ-

پشمبے ءِ روچ ءَ انتزامیہ ءِ نیمگ ءَ ملازماں سر بیتگیں ای میل ءَ گوشگ بیتگ کہ اگاں شما کارگس ءَ ئے یا روگ ءَ گڑا واتر بہ بہ ئے –

رپورٹ ءِ رد ءَ ایلون مسک ءَ ٹوئٹر انتزامیہ ءَ انفراسٹرکچر ءِ کمک ءَ سالگشتی ءَ یک ارب ڈالر بچگ ءِ شیواری داتگ –

بلوچستان ءِ دو جتاجتائیں دمگ کلات ءُ واشک ءَ یک مردمے ءِ لاش دزکپتگ ءُ دگہ یکے کُشگ بیتگ-

گیشیں ھالانی رِد ءَ ضلع واشک ءِ دمگ رخشانی سرلوپ ءَ زمینی جیڑھے ءِ سر ءَ دو ٹولیانی میان ءَ جنگ ءُ چوپ ءِ وھد ءَ تیرگواری ءِ آسر ءَ شیرینزہ پتک ءِ جھمنندیں حبیب احمد ء عبدالرشید ءَ تیر لگگ ءَ سک ٹپی بیتگ، ٹپی ار ایچ سی ناگ ءَ برتگ کہ اود ءَ ٹپّانی درمان کنگ ءَ پد شال ءَ برگ ءَ بیتگ اَنت کہ بسیمہ ءِ ھند ءَ آئی ءَ ٹپّانی درد نہ سگ اِتگ ءُ بیران بیتگ-

دومی نیمگ ءَ کلات ءِ تھسیل چہ منگچر ءَ یک مردمے ءِ لاش دزکپتگ –

لیویز رِد ءَ آدینگ ءِ روچ ءَ کلات ءِ تھسیل منگچر ءِ دمگ چوٹانک ءَ یک مردمے ءِ لاش دزکپتگ کُشگ بیتگیں تیرجتگ ءُ کُشتگ- لیویز ءَ لاش دستیگ کتگ ءُ نادُراھجاہ ءَ برتگ-

کلات ءَ دزکپتگیں لاش پجّار انگت نہ بیتگ پولیس ءِ گیشیں پٹ ءُ پول برجاہ ءَ اِنت