TBP Balochi

گوستگیں شپ ءَ ناشناسیں مردماں ضلع کیچ ءَ خان کلگ ھائی وانگجاہ دازن مانداشتگ ءُ پُر کتگ-

ھالانی رِد ءَ کارگس ءَ ایر کتگیں نُھمی ءُ دھمی کلاس ءِ چکسانی فارم گوں پیساں، سروس دپتر، حاضری رجسٹر ، کرسی ، ٹیبل، پنکہ، کالین، کباٹ، ساھن بورڈ ءَ ھوار بازیں کتابی سستگ ءُ پُر بیتگ اَنت-

دمگی ھالانی رِد ءَ اے وانگجاہ ھوار کش ءُ گوراں جوانیں وانگجاھاں چہ یکے بیتگ- تنی وھدے وئیل سوب زانگ نہ بیتگ-

وئیل ھال پولیس ءَ داتگ، داں گُڈی ھالاں ھچ وڑیں دزگیری نہ بیتگ-

زانگ بہ بیت کہ ضلع کیچ ءِ وانگجاھانی ماندارگ ءِ وئیل تہ ءَ گیشی گندگ بوگ ءَ اِنت – گوستگیں ماہ ناشناسیں مردماں تھسیل بلیدہ ءِ یونین کونسل الندور ءَ برجاھیں یکیں پرائیوٹ وانگجاہ کلکشان مانداشتگ ءُ پُر کتگ-

گوستگیں سال الندور ءَ سرکاری وانگجاہ ءِ لھتے کمرہ ماندارگ بیتگ ءُ گلی بلیدہ ءَ یک وانگجاھے ساچ ھم مانداشتگ-

وھدے کہ اشی ءَ اَبید ضلع پنجگور ءُ کیچ ءَ پرائیوٹ وانگجاھانی سر ءَ اُرش ءُ ماندارگ وئیل دیم ءَ اَتکگ اَنت-

بلوچستان ءَ ھوار ھوار دری ڈیھاں ’بلوچ شھیدانی روچ ‘ دارگ بیتگ، چریشی ءَ مراگش، روانک ءُ نیاد برجم دارگ بیتگ اَنت سرجمیں دنیا ءَ نندوکیں بلوچاں بلوچ شھیداناں سھریں دروت ندر کرتگ-

ھمک سال ءِ پیم ءَ سیزدہ نومبر ءَ بلوچ شھیدانی روچ ءِ درگت ءَ یات کنگ بیت اِنت- اے سال ءَ جتا جتائیں جاھاں اے روچ دارگ بیتگ ءُ چاگردی ترامجاھاں مھم کارمرد کنگ بیتگ –

بلوچستان ءِ بنجاھی شھر شال ءِ پریس کلب ءِ دیم ءَ شھیدانی روچ ءِ درگت ءَ مراگشے برجم دارگ بیتگ کہ اود ءَ زالبول ءُ زھگاں ھوار دگہ مردماں بھر زرتگ ءُ شھیدانی یات ءَ ڈیوا بالینگ بیتگ اَنت-

بلوچ شھیدانی کمیٹی ءِ نیمگ ءَ بلوچستان ءِ دگہ جاھاں ھم مراگش برجم دارگ بیتگ اَنت چریشی ءَ بازیں کچے ءَ مردماں بھر زرتگ ءُ ھمے وڑ استاد میر احمد بلوچ ءَ اے روچ ءِ درگت ءَ “آشوبی دیوان ” ءَ وتی ازمکاری کتگ –

دومی نیمگ ءَ بلوچ نیشنل مومنٹ ءِ نیمگ ءَ زرباری کوریا، جرمنی ءُ لندن ءَ مراگش برجم دارگ بیتگ اَنت ءُ اشی ءَ ھوار ھوار بلوچستان ءَ ھم نیاد برجم دارگ بیتگ انت –

ھمے وھداں بلوچ لبریشن آرمی ءِ سروک بشیر زیب بلوچ ءَ ھم آڈیو کلوہ بی ایل اے آفیشنل چینل ھکل ءَ شنگ کتگ آ جتا جتائیں زباناں اشکنگ بیتگ-

تران کنوکاں گوشتگ کہ خان محراب خان ءِ راجدپتری گھگیری ءَ بہ گر داں روچ ءِ مروچی ءَ بلوچاں زورگرانی ھلاپ ءَ وتی سر جھل نہ کتگ مروچی ھزارانی بلوچ وتی سراں قربان کنگ ءَ اَنت دانکہ وتی ڈیھ ءِ آجوئی ءَ سرجم کت بہ کن ایں –

تران کنوکاں گوشتگ کی مارا شھیدانی رندپدیں کشک دیم ءَ برگی اِنت ءُ آئی ءِ مول ءُ مراد دیمونی اِنت ءُ آیانی زانت ءَ زیرگ ءُ اے راہ سرجم کنگی اِنت-

روکپتی بلوچستان ءَ یکشلیں پاھواں دگہ سَے کس پاھو دیگ بیتگ اَنت-

روکپتی بلوچستان ءِ بنجاھی شھر زاھدان ءِ جیل ءَ بندیگیں سَے کس ایرانی آمیدگس ءِ ھکم ءَ پاھو دیگ بیتگ اَنت-

پاھو دیگ بیتگیں مردمانی پجار امام بخش ناروی ء رھمان جھمنند زاھدان، مھسن انشینی جھمنند زاھدان ءُ ولی رودینی ءِ ناماں زانگ بیتگ اَنت-

ھالانی تہ ءَ گوشگ بیتگ کہ ھرسئیں مردم ایرانی سال نود ءُ نُھ ءَ نشہ باپاری ءِ پژدر ءَ گرگ بیتگ اَنت-

ھرسئیں مردمانی کھول یک ھپتگے ءَ پیش ماں زاھدان ءِ زندان ءَ وتی مردمانی گڈی دیدار ءَ شتگ بیتگ اَنت-

گوستگیں روچ ءَ ترکی ءِ بنجاھی شھر استنبول ءِ گچینی جاھے ءَ بیتگیں تراک ءَ شش مردم مرتگ ات اَنت ءُ ھشتاد ءُ یک زدگ بیتگ ات اَنت-

ترکی ءِ وزیر داخلہ ءَ اے بمب تراک ءِ بھتام کردستان ورکرز پاٹی (پے کے کے) ءِ سر ءَ لڈ اتگ ءُ گوشتگ کہ جرمکار دزگیر کتگ-

فرانسیسی ھبر رساں ادارہ اے ایف پی ءِ رد ءَ ترکی ءِ شھر استنبول ءَ یک نامی ئیں جاھے ءَ یک شمبے ءِ روچ ءَ بیتگیں بمب تراک ءَ شش مردم مرتگ اَنت ءُ ھشتاد ءُ یک زدگ بیتگ اَنت-

ترکی ءِ وزیر داخلہ سلیمان سویلو ءَ سرکاری نیوز انادولو ءَ شنگ کرتگیں درشان ءَ گوشتگ ’ بمب ءِ چیروکنوکیں مردم دزگیر کنگ بیتگ ‘-

آئی ءَ گوشتگ ’مئے پٹ ءُ پولانی رد ءَ اے کار ناشریں گل پی کے کے ءِ کتگیں کار اَنت ءُ آ ایشی ءِ زمہ وار اِنت ‘-

پی کے کے جسے انقرہ ءُ آئی ءِ روکپتی ھمسنتاں ناشری ءِ ٹولی ءِ دروشم ءَ بلیک لسٹ ءَ کتگ نوزدہ سد ءُ ھشتاد ءِ زمانگ ءَ زربار رودراتکی ترکی ءَ کردانی وتواجھی ءِ واستا زھرشانیں بیڑے برجاہ اَنے ٹ

چاگردی رسانکجاھاں شنگ کنگ بیتگیں تامراں ساھت چار ءُ بیست منٹ ءَ بیتگیں بمب تراک شھر ءِ دزبند تریں جاہ ءَ لاش زمین ءِ سر ءَ کپگ ءَ گندگ کاینت اَنت-

چاگردی ترامجاھاں شنگ کنگ بیتگیِں تامراں دمگی وھد ءُ پاسانی رد ءَ ساھت چار ءُ بیست منٹ ءَ بیوکیں تراک ءَ شھر ءِ دزبندتریں جاہ استقلال گلی ءَ لاش کپگ ءَ گندگ آیگ ءَ اَنت-

سرکاری نیوز ایجنسی انادولو ءَ ٹوئٹر اکاؤنٹ ءَ گوشتگ کہ دوشمبے ءِ روچ ءِ لھتے ادارانی گوزگ ءَ پد ترکی ءِ وزیر داکلہ سلیمان سویلو ءَ لھتے اُرشکارانی دزگیر کنگ ءِ ٹاہ داتگ –

ترکی ءِ سروک رجب طیب اردوگان ءَ بیرانیانی گپ راست کرتگ ءُ گوشتگ کہ تراک یک بزدل ءُ ناشری کارے-

بالی ءَ بیست سربراھی نیاد ءَ روگ ء پیسر آئی ءَ گوشتگ کہ مئے راج ءَ ستکی بہ بیت استقلال ءَ بیتگیں تراک ءَ تراک کنوک سزا دیگ بنت-

روکپتی بلوچستان ءِ دو جتا جتائیں جاھاں ایرانی چیریں ادارھاں سے کس آوار جنگ ءَ پد بیگواہ کنگ بیتگ اَنت-

روکپتی بلوچستان ءَ گوستگیں یک ماھے ءِ توک ءَ بازیں مردمے آوار جنگ ءُ بیگواہ کنگ بیتگ اَنت کہ اے بیگواھیانی درچ پہ روکپتی بلوچستان ءِ نیشتگیں بلوچاں نوکیں درچے زانگ بیت اِنت-

ایرانشھر ءَ ایرانی لشکر ءَ بیڑ بران ءَ یک مردمے آوار جنگ ءَ پد بیگواہ کرتگ کہ آئی ءِ پجار بیست ءُ چار سالی ئیں فرامرز جمشیدزئی ء کریچ جھمنند ایرندگان ایرانشھر ءِ نام ءَ زانگ بیتگ –

ھمے وڑ ءَ روکپتی بلوچستان ءِ تیابدپی شھر چھبار ءَ ھم دو کس آوار جنگ ءَ پد بیگواہ کنگ بیتگ اَنت-

آوار جنگ بیتگیں مردمانی پجار نوزدہ سالی ئیں عبدالمالک ھملی ء ملک جھمنند چھبار ءُ سجاج دھکانی جھمنند سرباز ءِ ناماں زانگ بیتگ اَنت-

اشانی توک ءَ عبدالمالک آدینگ ءِ روچ ءَ گرگ بیتگ ءُ آئی ءِ بیگواھی ءِ راستیں ھال گوستگیں روچ ءَ شنگ بیتگ-

گوستگیں آدینگ ءَ شنگ بیتگیں تامراں ھم باز جاہ ءَ گندگ بیت اِنت کہ ایرانی چیریں ادارہ مردماں آوار جنگ ءُ برگ ءَ اِنت بلے چریشی ءَ چہ پد آیانی پجارانی بارو ءَ دگہ ھچ ھال دیم ءَ نیتکگ اَنت-

نبشتانک: نمیرانانی رتکگیں ھون بَر کار اَنت

نبشتہ کار: البرزبلوچ

دی بلوچستان پوسٹ

‏‎“زالم کہ مِر ایت آئی ءِ دور چہ ھمود ءَ ھلاس بیت، بلئے یک نمیرانیں (Martyr)ءِ زند چہ مرگ ءَ پد بندات بیت۔” سورین کئیرکیگارڈ

‏‎اے سیاہ شپ ءِ نیم ءَ کہ وھدے تئی ھمبلے ءِ ھوناں گوں مِچّلیں جون تئی دیم ءَ ایر بہ بیت ،اے سھت ءَ گْوش ئے وھد وتی بانزلاں داریت ءُ آزمان ءَ ترپوکیں استالانی ترپگ گیمُر اَنت۔ اے سھت ءَ ترا گُمان بیت کہ اے جون کہ تئی دیم ءَ ایر اِنت، اے نا تھنا یک مردمے ءِ جون اِنت بگندئے یک پگرے، ھما پگر کہ مردم ءَ زالم ءُ زوراک ءُ لُٹ ءُ پلیں تاکتانی دیم ءَ جنگ کنگ ءُ گھگیری ءِ سکین ءَ دنت۔ اے نمیرانیں بالاد ھما پِگرے یک مساپرے کہ چہ وتی ھمبلاں جسمانی بستار ءَ سِستگ۔ یک راجی جھدکارے جسمانی بستار ءَ بگندئے چہ وتی سنگتاں جتا بیت بلئے آئی ءِ پَشت کپتگیں جھد کہ نوں تئی کوپگاں اتکگ آترا واب ءَ نئیل ایت ءُ ترا اے سکین ءَ دنت کہ زند ءِ ھمے پشت کپتگیں بھر ءِ روچاں چون وتی ھمبل ءِ پشت کپتگیں جھد ءَ سرجم کنگ ءَ بہ دیاں، اگاں تو اے جیڑئے گڑا بزانکہ تو ھکّی ئیں جھدکارے ئے۔

‏‎دنیا ءِ تہ ءَ بازیں مردمے اتکگ ءُ شتگ،کئیت ءُ روت، اے دْرچ نہ اوشت ایت بلئے ھمک زاتے ءَ کہ یک زندے رس اتگ ءُ اے زند ءَ کجام مردم چون گوْازینیت ایشی ءِ مزنیں ارزشتے ھست ۔ زند گْوازینگ بگندئے پہ مردم ءَ ارزان بہ بیت بلئے ھکّی ئیں دروشم ءَ زند ءَ گوں یک مکسدے ءَ بندوک کنگ ءِ جتائیں بستارے۔ مردم ءِ ابرمی مرگ چوناھا ھست اِنت کہ آ روچے نا روچے اناگتءَ مرگ ءِ آماچ بیت یا کہ پیر بیت ءُ مرگ ءِ آماچ بیت، بلئے وتی مرگ ءِ وھد ءُ پاسانی وت پیسلہ کنگ یک مزنیں کارے کہ ھما مردم وتی مرگ ءَ گوں وتی دست ءَ نبشتہ بہ کنت ۔ مرگ چوناھا کئیت اِنت بلئے زندگیں مردم ھما اِنت کہ گوں بچکنداں وتی ساہ ءَ بہ دنت بازیں نزوریں مردمے ودی بیت کہ چماں بند کنت ءُ چو چات ءِ پُگُل ءِ ڈول ءَ زندگی کنت بلے آئی ءِ آسر پد ءَ ھم مرگ اِنت بلے دومی نیمگ ءَ مرچی دنیا کہ اے جاہ ءَ سر اِنت آئی ءِ پُشت ءَ شکلیں جنگانی لڑے ھست کہ ایشی ءِ تہ ءَ مھلوک ءِ ساھانی کربانی بیتگ اَنت۔ ھما کہ زُلمءِ دیمءَ اوشتوک بیتگ ءُ آجوئی ءِ گپ کتگ ھما ھاں مرچی دنیا مٹ کتگ ءُ اے زمین پہ مردماں زندگ گوازینگ ءِ لائک کتگ۔ بگندئے اے گپ ءَ کسے تپاک مہ داریت کہ نمیرانی ءِ توسیپ ھمنچو کنگ بیت کہ مردم وتی زند گوازینگ ءَ یلہ بہ دنت ءُ لازم نمیران بہ بیت ،بلے اے یک ابرمی راستی یے کہ دنیا ءِ تہ ءَ گِھتری ءُ مردمی آجوئی ھُشک ءَ نہ رس ایت بلکیں کُچلیں راستی یے کہ ھونانی ریچگ ءَ پد رس ات کنت۔ ھما راج کہ آئی ءِ مہلوک ءَ پہ وتی باندات ءِ رُژنائی ءِ جاہ ءَ وتی باندات رُژنا کنگ ءِ کوشست کتگ گڑا آئی ءِ جِند ھم لگتمال بیتگ ءُ آئی ءِ راج ھم دپتر ءِ مُجاں گار اِنت۔

‏‎دنیا ءِ تہ ءَ مرچی ھما راج زندگ اَنت ءُ آبات اَنت کہ آھانی راج ءَ جانانی کربانی داتگ، جونانی جُمپگاں گوں مرچی آھاں وتا دنیا ءِ نکشہ ءِ تہ ءَ زندگ کتگ۔ آھانی زبان،زمین، دود ءُ ربیدگ ءُ راج ءَ گوں سیادی داروکیں ھر شئے آنی ءِ زندگ بیگ ءِ پُشت ءَ آ راج ءِ پُسگانی شلوکیں ھون اَنت۔ اولی جھانی جنگ ءَ 2 M ملین مردم مِر ایت کہ ایشانی تہ ءَ نیم لس مھلوک بیت ءُ نیم جنگول بنت۔ دومی جھانی جنگ ءَ کساس 4 داں 5 کُڈُل(کروڑ) مردم مِر ایت۔ ءُ پولینڈ ءِ آباتی ءِ 20%مردم ماں اے جنگ ءَ مِر ایت۔ مرچی دنیا ءِ تہ ءَ کہ دومی جھانی جنگ ءَ پد راجی استان جوڑ بنت ءُ مرچی آ راجے ءِ بستار ءَ دنیا ءِ تہ ءَ زاھر اَنت آھانی پشت ءَ آ راج ءِ پسگانی ھون اَنت۔ انچوش دنیا ءِ اگاں آدگہ راجی جنزاں بچارئے داں لکّانی ھساب ءَ مردم نمیران بیتگ اَنت۔ اے درستیں گپ اے چیز ءَ پدر کن اَنت کہ وھدے تو وتی زمین ءُ وتواجھی ءَ رکینگ لوٹ ئے گڑا آ جنگ ءَ چہ بیت کنت اِنت ءُ جنگ ءِ تہ ءَ مال ءُ مڈیانی تاواناں ھوار مردمی جانانی کربانی دیگ کپ ایت گڑا آ راجی جنز سوبین بیت کنت ءُ دومی نیمگ ءَ اے گپ ءِ تہ ءَ ھچ شک نیست کہ بہ گُپت بالاچ مری” راج پہ مِرگ گار نہ بنت بلکیں پہ سر ءِ جھل کنگ ءَ گار بنت۔” دپتر ءِ تہ ءَ اے چیز پدر اِنت کہ راج ءَ گیشتر جونانی کربانی داتگ آ مرچی دنیاءِ آبات تریں راجے۔

‏‎ھمے ڈول ءَ بلوچ راجی آجوئی جنز ءَ مرچی ہزارانی کچ ءَ بلوچاں وتی جان پہ مکھیں ڈیھ ءِ آجوئی ءَ ندر کتگ اَنت۔ مرچی بلوچ راج وتی آجوئی ءِ جھد ءَ کنگ ءَ اِنت ھما جھد کہ آئی ءِ مکسد بلوچ راج ءِ سرجم ءَ آجو کنگ ءَ نوکیں بلوچ راجے جوڑ کنگ اِنت، اے بلاھیں مکسد دنیا ءِ تہ ءَ درستاں چہ وشتریں ءُ راست تریں لزت اِنت کہ یک راجے ءَ وتی آجوئی رس ایت بزاں آ دوبر زندگ بیت۔ یک راجے ءِ زندگ کنگ ءِ واستا آئی ءِ پسگاں مِرگ لوٹ ایت۔ ھمے فلسفہ ءِ منوکی ءَ گوں بلوچ راج ءِ پسگ مرچی وتی سراں دیگ ءَ اَنت۔ اے ھما فلسفہ اِنت کہ یک ماتے وتی چُکاں یلا دنت ءُ گلزمین ءِ واستا زورگیرانی دیم ءَ تمردی ءَ اوشتیت ءُ وتی نگرھیں جان ءَ ندر کنت۔ گوْش انت کہ مات ءِ مھر پہ وتی چُکاں درستاں چہ برزتریں مھر اِنت ھئو راست گوْش انت بلے مئے گوْر ءَ یک ماتے ءِ چُک تھنا آئی ءِ جند ءِ چُک نہ اَنت بلکیں تیوگیں راج ءِ چُک آئی ءِ چُک اَنت ھما چُک کہ آئی ءِ گلزمین ءِ دلبند ءَ چہ درتکگ اَنت ءُ مھلبیں زمین ءِ سر ءَ زندگی کنگ ءَ اَنت۔ اے بلوچ ءِ نمیرانی ءِ فلسفہ اِنت کہ ورنا وتی مکھیں ماتاں یلا دینت ءُ وتی راج ءِ ماتانی شلوکیں ارسانی پُشت ءَ رواَنت ءُ نمیران بنت پد ءَ مستریں گپ ایش اِنت کہ آ مات وتی دست ءَ چُک ءِ بڈا جنت ءُ گوْش ایت کہ برو پہ وتی سرڈگار ءِ آجوئی ءِ واستا وتی زمہ واری ءَ پیلو کن کہ تو تھنا منی چُک نہ ئے بلکیں بلوچ راج ءِ چُک ئے۔

‏‎بلوچ راجدپتر ءِ تہ ءَ چوشیں درورانی امبارے ھست کہ بلوچ پُسگ وتی سرڈگار ءِ رکینگ ءِ ھاتر ءَ وتی ھون ءِ گڈی ترنپ ءَ گوں جھد ءِ سنگراں اوشتوک بیتگ اَنت۔ 1839ءَ بگِر داں روچ مرچیگ ءَ بلوچ ھمے فلسفہ ءِ سر ءَ اوشتاتگ کہ وتی زمین ءِ رکینگ ءِ واستا کترہے ھم پشت ءَ نہ شتگ۔ مرچی بلوچستان ءِ کوُچگ ءُ میتگانی تہ ءَ ھرچ گِس ءُ دمکے ءَ ترا شھیدے دست کپ ایت کہ آھاں بلوچ سرڈگار ءِ واستا وتی گراں بھائیں زِند داتگ پرچاکہ آ ھانی چم پچ بیتگ اَنت ءُ چہ ایندگہ مھلوکاں گیش دانا بیتگ اَنت۔ اے نمیرانیں زند ءِ ھر ابرمی شئے چہ آدگراں گیشتر دوست بیتگ چیاکہ تو وھدے زند ءَ دوست دارئے ءُ زند ءَ گوں اوار ھرچ ابرمی شئے آں گوں مھر کن ئے ءُ تو گندئے کہ اے کُل لگتمال اَنت گڑا تو پاد کائے ءُ اشانی مٹ کنگ ءِ جھد ءَ کن ئے۔ گڑا تو مرگ ءَ نہ چارئے بلکیں زند ءَ گچین کن ئے ھما زِند کہ تئی مرگ ءَ چہ پد تئی راج ءَ پہ بِندات بیت۔ ھم ے ھوناں گوں زمین ءَ آپ رس ایت ءُ زمین آجو بیتءُ آبات بیت، چوشکہ یک ڈگارے ءَ سبز ءُ آبات بیگ ءَ آپ ءُ دان لوٹ ایت ھمے ڈول ءَ زمین ءَ زندگ بیگ ءُ رکّگ ءِ واستا ھون لوٹ ایت ءُ ھمے ھون ءِ وشبو ءَ گوں بلوچ راج ءِ مہلوک آجوئی ءَ گوں ساہ کش ایت۔

‏‎سینزدہ نومبر بلوچ شھمیریں سرانی روچ اِنت کہ آھاں بلوچ سرڈگار ءِ آجوئی ءُ بلوچ راج ءِ جوڑشت ءِ واستا وتی نُگرھیں جان کربان کتگ اَنت۔ اے روچ ءِ دارگ ءَ گوں بلوچ راج وتی نمیرانیں راجی جھدکاراں یات کنت. ھما نمیران کہ آھانی رتکگیں ھونانی سوْب ءَ مرچی بلوچ ءِ پجار ءُ زمین رک اِتگ۔ مرچی ھما نمیرانانی رتکگیں ھون ءُ سرانی کربانیءِ سوْب اِنت کہ بلوچ راج ءَ دنیا ءِ تہ ءَ کسانیں پجارے ایر کتگ، ءُ دژمن مرچی بلوچستان ءَ آسانی ءَ پاد ایرکُت نہ کنت۔ ھمے نمیرانانی برورد ءَ مرچی بازیں وتگڑیں میانی سیاستدان کہ وتا بلوچ راج دوست گوْش انت اتکگ انت ءُ بلوچ راجی نمیرانانی رتکگیں ھونانی سر ءَ سودا کنگ ءَ اَنت، بلے بلوچ راج اے چیز ءَ دلجم اِنت کہ اے رتکگیں ھونانی آسر تھنا بلوچ سرڈگار ءِ آجوئی اِنت۔ نامی ئیں نمیراناں ھوار ھزارانی کچ ءَ مرچی گُمنامیں نمیران ھست اَنت کہ آھانی ناماں کس نہزانت ءُ نئیکہ آھاں پہ نام ءِ واستا نمیرانی ءِ راہ چُک اِتگ بلکیں پہ بلوچ راج ءِ زند ءُ پجار ءُ آجوئی ءِ واستا گمنامی ءَ گوں نمیران بیتگ اَنت اے کُلیں نمیران یک اَنت کہ آ بلوچ راجی آجوئی ءِ راہ ءَ کوھاں گوں دژمن ءَ دو پہ دوئی جنگ ءَ، شھراں ماں دگانی سر ءَ ،دژمن ءِ ٹارچر سیلانی تہ ءَ یا گیاباناں زانگولیں لاشانی دروشم ءَ نمیران کنگ بیتگ اَنت۔ اے کُلیں نمیران بلوچ راجدپترءَ نمیران اَنت ءُ اے کسہ انگت سرجم نہ اِنت۔ ‏‎اے نمیراناں پہ بلوچ ءِ آجوئی ءِ واستا ھون ریتکگ ءُ بلوچ ماں دنیا ءَ منارینتگ۔ بلوچ راجی نمیرانانی سوْب ءَ مرچی ھرکس پہ پھر وتا بلوچ گوْش ایت بلے اے گپ ءَ بہ زان اِت کہ بلوچ بوگ اِنچو ارزان نہ اِنت، اگاں کسے بلوچے گڑا آئی ءَ سرجم ءَ بلوچ بوگی اِنت، ھما بلوچ کہ آ وتی ساہ ءَ دنت بلے سرڈگار ءَ نہ دنت۔ نمیرانی چوشیں ارزانیں شئے یے نہ اِنت کہ ھرکس ءَ بہ رسیت بلکیں نمیرانی کز ءَ یک بھتاورے ءَ بہ رس ایت،ھما کہ پہ وتن زرَ ایت ءُ گوں زمین ءَ گُڈی مھر ءَ رؤت ءُ ھمائی ءَ نمیرانی ءِ ازیمیں ٹیکی رس ایت۔ چوشیں بلوچ جھدکارانی یک ھلاس نہ بووکیں رمے ھست کہ آ پہ بلوچ سرڈگار ءِ آجوئی ءِ واستا وتی سرانی ندر کنگ ءَ جاڑی اَنت۔ نمیرانانی اے سپر داں بلوچ سرڈگار ءِ سرجم ءَ آجوئی ءَ روان کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: سیزدہ گْوبشان (نومبر)

نبشتہ کار: جلال اھمد

دی بلوچستان پوسٹ

دنیا ءِ تَہ ءَ جتا جتائیں راج ھست اَنت کہ آ زند گْوازینگ ءَ اَنت، بلے آیانی دُود ءُ ربیدگ ، نندگ ءُ پاد آیگ ، پُچ ءُ پُوشاک ءُ زُبان ءُ مذھب دْوراہ جتاہ اَنت، ھر راج وتی زندگی ءَ پہ یک ڈولے گْوازینگ ءَ اِنت۔

ما بِہ چاریں دنیا ءِ تَہ ءَ مروچی اَنچیں ھزاراں مردمانی نام ھست بلے آیانی جند بلکیں مُرتگ اَنت بلے آیانی کتگیں کاراں چے آ اَبدمان اَنت مروچی دنیا ءِ ھر راجانی درور ءَ مئے دیم ءَ پدّر کنت ھمے وڑ ءَ بِہ چارے دنیا یک جنگجاھے ءُ جنگ راجان ءَ بربادی ءُ نابُودی یے نیمگ ءَ بارت ءُ تاواناں گوں دُچار ءَ کنت۔

بلے بلوچ گْوش اَنت “سکّی یے پُشت ءَ الّم وشّی یے کیت” پہ یک مکسدے ءَ جنگ کنگ ھر انسان ءِ واست ءَ ھژدری اِنت چیاکہ آ مکسد بس پہ تو ناں بلکیں سرجمیں راجے ئے باندات ءَ روژناہ ءُ شاھگان کنت۔

ھمے وڑ ءَ مئے دیم ءَ انچیں کارست کاینت کہ آیان وتی زندگی ءَ وڑ وڑیں دیمونی داتگ ءُ وتی زندگی ءِ روچ پہ آؤکیں پدریچی یے ھاتر ءَ ندر کُرتگ اَنت، جی ھما نرمزاراں بات کہ پہ وت نہ جیڑ اَنت بلکیں پہ وتی راج ءَ گمواری یے ھاتر ءَ وتی سراں ندر کن اَنت ءُ پہ دائمی ابدمان بنت۔

مروچی دنیا ءِ ھر راج دپترے تاکاں بِہ چار آ ھما بامردانی ناماں گوں آشنا اَنت کہ آیاں وتی زندگی دوست نہ داشتگ بلکیں پہ ڈیھ ءِ رکّینگ ءَ وتی ھون اِش ریتکگ اَنت ءُ راج دپتر ءَ تاکانی تَہ ءَ ھوار بُوتگ اَنت۔

ھمے وڑ ءَ پہ سیزدہ گْوبشان (نومبر) ءَ پہ بلوچ سرڈگار ءَ آجوئی ءِ ھاتر ءَ شھید بُوتگیں سرانی یات کنگ ءِ درگت ءَ درچِنگ بُوتگ ءُ اے روچ ھما بامردانی یات ءَ برجم دارگ بیت کہ آیاں شُد، تُن، گرم،سارت دْراہ برداشت کتگ اَنت پہ بلوچ سرڈگار ءِ آجوئی ءِ مُوکگ ءِ واست ءَ وتی ساہ ءُ سر اِش بکشاتگ اَنت-

بلوچ سرڈگار ءَ کُلّیں شھیداں سُھرچکیں دْرؤت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

انگلینڈ ءَ پاکستان پنج وکٹانی تاوان ءَ 19 می اور ءَ ٹارگٹ سرجم کُتگ ءُ پروش داتگ

آئی سی سی ٹی ٹوئنٹی ورلڈ کپ آسٹریلیا ءَ مروچی آسر بیتگ، پاکستان ءُ انگلینڈ فائنل ءَ دیم پہ دیم بیتگ اَنت۔ انگلینڈ ءَ ٹاس کُٹ اِتگ ءُ پیسرءَ باؤلنگ ءِ پیسلہ کُتگ۔

پاکستان ءَ اولی بیٹنگ کنان ءَ ھشت وکٹانی تاوان ءَ بیست اورانی تہءَ 137 رنز اڈ کُتگ ءُ انگلینڈ ءَ باج بر بیگ ءِ ھاترءَ 138 رنز ءِ ٹارگٹ داتگ۔

پاکستان ءِ نیمگ ءَ بیٹنگ کنان ءَ پاکستانی کپتان بابر اعظم ءَ 32 ءُ شان مسھود ءَ 38 رنز اڈ کُتگ۔ انگلینڈ ءَ جوانیں باؤلنگ کنان ءَ سیم کیرن ءَ 3 ءُ عادل رشید ءُ کرس جورڈن ءَ دو دو وکٹ زرتگ اَنت۔

انگلینڈ ءَ پاکستانی ٹارگٹ ءِ بگیر ءَ بیٹنگ کنان ءَ نوزدہ اورانی تہءَ پنچ وکٹانی تاوان ٹارگٹ سرجم کُتگ ءُ گوازی وتی نام ءَ کُتگ۔ انگلینڈ ءِ نیمگ ءَ بین اسٹوکس ءَ جوانیں گوازی کنان ءَ 52 رنز اڈ کُتگ ءُ گوازی انگلینڈ ءِ نام ءَ کُتگ۔ پاکستان ءِ نیمگ ءَ حارث رؤف ءَ چار اورانی تہءَ دو وکٹ گپتگ۔

نبشتانک: قربانی ءِ فلسفہ بلوچستان ءَ چہ ازل ءَ یکشل ءَ برجم انت

نبشتہ کار: فیروز بلوچ

دی بلوچستان پوسٹ

روچ ءِ زژنائی وھدے کازماس ءَ مانشان ءِ گڑا تھارے ءِ بانزل چہ پُلگدیں زمین ءَ چِست بنت ءُ بال کن اَنت، ھما پُلگدیں زمین کہ آیاں راجی بامرد ودی کُتگ، ءُ آ بامرداں گوست ءِ راجدپترانی تاکدیم گوں گھگیری ءُ کُنگری یے گون ءَ نبیستگ ءُ نمیران بیتگ اَنت، ابدمان بیتگ اَنت، شھید بیتگ اَنت۔ ھمے درگت ءَ دگنیا ءِ تھا شھیدانی استمانی ءُ میان استمانی روچ دارگ بیت اِنت، راج وتی راجی بامرداں ھمے شھیدانی روچ ءَ یات کن اَنت ءُ ستا ءُ شرپ بکش اَنت شھید رزا جھانگیر وتی گالردانی توک ءَ شھیدئے یے بزانت چوش دنت اِت“ شھادت یا شھید گوائی ءَ را گُش انت“ اِے گوائی یے مانزمان دگنیا ءِ نکشہ ءِ توک ءَ استیں راجانی انت، ھما راج چہ اِے گوائی ءَ چک ءُ پد بیتگ اَنت آراج دگنیا ءِ راجدپترانی تھارین مجان گار ءُ بیگواہ بوتگ اَنت۔

دگنیاءِ راجدپتر ءَ هَبدَهُمی ءُ ھَژدَھُمی کرن ءَ بلائیں بدلی کئیت، اِے ھما وھد بیت کہ یورپ ءِ توک ءَ قوم ءُ راج بادشاھی ءُ جاگیرداری نزام ءِ ھلاپ ءَ آشوب کار اَنت ءُ کسانیں وھدے ئے توک ءَ یورپی چاگرد مٹ بنت ءُ قومی ریاست (Nation States) جوڑ بنت اِنت، لس مھلونک ءِ توک ءَ قومی شناسائی ءُ نظریہ یے چیدگ ودی بیت اِنت، امریکہ، فرانس ءُ روس ءَ آشوب کئیت اِنت، قوم سرچِست کن اَنت ، راجی راھشون جوڑ بیت اِنت۔

ھمے دروشم میزان میزان ءَ ودان کنت، ہندوستان، چین، افریقہ ءُ دگنیا ءِ ایندگہ بازیں ھند ءُ دمگاں اقتصادی، جاگیرداری، زوراکی ءُ قبضہ گیرانی ھلاپ ءَ آجوئی یے جنگ بندات بیت اِنت، ھمے جنگانی راجدپتر ءَ آزمودگ ءَ بچارے گڑا ملکانی توک ءَ ھما کردار ءُ کارست پدمنتگ اَنت کہ آیاں وتی راج ءِ ھاتر ءَ کربانی داتگ، زوراکیں نظامانی ھِلاپ ءَ گھگیری ءُ دلیری ءِ گون ءَ جنگ کُتگ، کربانی دیوکیں بامردانی سرپ ءَ کیوبا چے گویرا بہ بیت یا ھندوستان ءِ بھگت سنگھ ءُ گاھندی ءِ ڈولیں راھشون مروچی ھم جتا جتائیں وھد ءُ پاس، رمس ءُ تاریخ ءَ شھیدانی درگت ءَ یات کنگ بنت ایں، ھمے ڈول ءَ بلوچستان ءِ مھلونک چہ میر مھراب خان پراموش بیت نہ کنت ئے۔

میر مھراب خان بلوچستان ءِ ھما بامرد بیت اِنت کہ 13 گوبشان 1839 ءَ برطانیہ(برٹش امپائر) یے گون ءَ جنگ ءَ شھید بیت، بلّے اے گپ ارزشت داریت کہ کجام سبب بنت کہ برٹش ءِ ڈولیں تاکت بلوچستان ءَ کئیت ءُ قبضہ دلمانگ بیت؟ اے جُست باز مزنیں ارزشت دار اَنت کہ ایشانی ھاتر ءَ مارا گوست ءِ تاکدیم، وھد ءُ سائیگ ٹپاسگ لوٹ ایت۔

نوزدھُمی کرن ءَ استماری تاکت یا جاگیرداری نزام بزان برطانیہ ھندوستان ءُ جنوبی ایشیاء ءَ ایسٹ انڈیا نام ءِ سر ءَ لوٹ ءُ پول کنت اِنت، ھندوستان ایسٹ انڈیا چیر دست ءَ بیت ءُ ایشی یے چہ برطانیہ بازاری (معیشت) ءُ فوجی توانائی (عسکری قوت) شرین دروشمے ءَ مھکم بنت اِت، بلے دومی نیمگ ءَ روس ءُ فرانس ءِ ڈولیں ریاست اِیش چیز ءَ وش نہ بنت ایں، فرانس نپولین (Napoleon) ءِ چیر دست بیت، برطانیہ نوآبادیاتی نظام فرانسیسی ءَ باز نیزور کنت اِت، فرانس مھدود کنگ بیت ءُ آبرطانیہ رنگ ءِ تاکت ءِ برابری کُت نہ کنت ئِے ایشی ءِ درور ما واٹرلو(Waterloo) جنگ ءَ گندے بلے! اگاں ایمانداری ءَ چارئے اے جنگانی پُشدر ءُ فلسفہ ءُ نظریہ ملک گیری مستریں سبب بوتگ اَنت۔

دومی نیمگ ءَ روس پشت کپیت اے سیاسی گیروچیل ءِ تھ ءَ روس لوٹ ایت کہ من دگنیائے سر ءَ راج بکن آں ھمے ھاتر ءَ روس افغانستان ءَ قبضہ کنت (افغانستان ءِ بادشاہ شاشجاہ کئیت ایسٹ انڈیا باھوٹ بیت) ءُ لوٹ ایت واتر تیاب دپ ءَ سر بکن آں، روس ءِ واھشت پیٹر دی گریٹ (Peter the great) زمانگ بیتگ کہ آگرمیں آپ داں تیاب دپ ءَ بہ گپت ایں، ھمے وھد ءَ برطانیہ ترس گیش بیت کہ اگاں روس افغانستان ءِ راہ ءَ بلوچستان بیت گڑا آوتی فوج ءَ منی ھلاپ ءَ شرین رنگے کارمز کت کنت ئے، اد ءَ دمگ ءِ توک ءَ بلوچستان برطانیہ ریاست ھاتر ءَ باز ارزشت دار ایت، اے وھد ءَ بلوچستان ءِ خان آف قلات میر مھراب خان بیت، برطانیہ ءِ فوج خان گون ءَ مسام کنت ءُ وتی یک فوجی ٹولی یے انڈس آرمی (Indus Army) نام ھڈ دنت دانکہ بلوچستان علاقہ چہ ھمے فوجی ٹولی افغانستان ءِ سر ءَ ارش بہ کنت بلے! بلوچستان ءِ وتی توک ءِ لھتے نواب ءُ سردارانی مسئلہ خان گون ءَ شر نہ بنت ھمے ھاتر ءَ برطانیہ ءِ فوجی ٹولی ءِ سر ءَ بولان پاس ءَ ارش کنگ بیت، خان ءِ گون ءَ برطانیہ مسام ھلاس بیت گورنر جنرل لارڈ اوکلینٹ (Governor General Lord Oklent) نام ءِ اپسرے خان ءَ را نمدی یے نبشتہ کنت کہ خان سلاہ دور بہ دنت ءُ برطانیہ چیردست بہ بیت بلے! خان اے چیز ءَ نہ منّ ات اِنت گڑا انڈس آرمی یک بھرے میجر ولشائر ءِ کمانداری13 گوبشان 1839 ءَ بلوچستان ءَ کئیت ءُ ریاست ءِ بلوچستان ءِ سر ءَ ارش کنت، میر مھراب خان وتی سے سد سپائیگ ءَ جنگ دنت ءُ شھید کنگ بیت بلے! انگریز دیم ءَ گلامی نہ منّ ایت اِنت ءُ تنا وھدے وتی سلاہ ءَ دور نہ دنت دانکہ شھید نہ بیت۔اے فلسفہ ءُ رندگیری بلوچستان چہ ازل زمانگ ءَ یکشل برجم انت میر مھراب خان بہ بیت یا ھمل جئیند، پرنس کریم خان بہ بیت یا واجہ شیرومری دژمن ءِ دیم ءَ چہ تُرس ءَ یا وتی سِیتانی ھاتر ءَ نہ جُک اِتگ اَنت بلکیں راجی ھکانی ھاتر ءَ قومی جزبگ گوں دژمن ءِ سر کھر بوتگ انت، شمالی کوریا یے چی گویرا بہ بیت یا مھراب خان مروچی ھم شھیدانی درگت ءَ یات کنگ بنت چونائی ءَ بازیں نام ودی بنت ءُ پد ءَ مر اَنت ءُ بیگواہ بنت بلے! باز انچیں نام است اَنت کہ آمرگ ءَ رند راجی راھشون بنت چہ راجدپتری راستیاں اے گپ پدرانت کہ میر مھراب خان ءِ سیاسی لیکہ ءُ نظریہ داں بلوچ راج اَست اَبدمان اِنت۔

بلوچستان ءِ راجدپتر توک ءَ 13 گوبشان مزنیں بستار ءُ ارزشتے دار ایت بی ایس او آزاد 2010 ءَ وتی مرکزی کمیٹی مراگشے ءَ جار جنت کہ اے روچ شُھدائے بلوچستان ءِ نام ءَ دارگ ءُ زانگ بہ بیت، مروچی ھمے روچ اِنت چونائی ءَ شھید بستار ھما استالانی ڈول ءَ انت کہ تھارین آزمان ءَ گوں مچی یے گون ءَ روژنا کن انت اگاں شھیداں ما زمینی استال بگُش ایں گڑا ما رد نہ بہ ایں، 13 گوبشان ءِ روچ ءَ ما شھیداں یکیں نگاہ ءَ چاریں، توسیپ ءُ ستا بکش ایں ءُ سُھرین دروتانی گون ءَ نازین اش، اِے پْگر ءُ سسّا مردمانی جزبگ ءَ بُرز کنت اَن، سنچ ءَ ایمن کنت اَنت ءُ استیں راھشونانی یے روہ ءَ تاجگ کنت اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔