TBP Balochi

کاؤنٹر ٹیررازم ڈیپارٹمنٹ گوستگیں روچاں چہ ھزدار ءَ زورانسری آوار جتگیں ورنایانی دزگیری شال ءَ زاھر کتگ انت –

یک ھپتگ ءِ میاں سی ٹی ڈی ءَ بلوچستان ءِ جتا جتائیں ھند ءُ دمگاں چار بیڑ بری ءِ ٹاہ داتگ ءُ وھدیکہ اے بیڑاں دزگیر کنگ بوتگیں مردمانی تہ ءَ سَے مردمانی پجار بوتگ کہ آ پیسر ءَ زورانسری آوار جنگ ءُ بیگواہ کنگ بوتگ انت –

سی ٹی ڈی ٹاہ داتگ کہ گوستگیں روچاں مارا پکائیں ھالے رستگ کہ بلوچ لبریشن آرمی ءِ باگی عبدالمنان ءُ سرفراز احمد چہ شور پارود کلات ءَ در اتکگ ءُ دیم پہ شال ءَ رؤگ انت –

درشان ءِ تہ ءَ ٹاہ دیگ بوتگ ھال سر بوگ ءَ سی ٹی ڈی شال ءَ درخشان ناکہ شال سبی دگ ءَ راہ بستگ ءُ پرپٹ سوار داشتگ انت – پٹ پول ءِ میان ءَ مارا یک پرپٹ ءِ سر ءَ شک بوتگ گڈا ما آ اوشتگے اشارہ کتگ بلے آئی ءَ تچگ ءُ رؤگے جھد کتگ بلے کارمند آئی ءِ دارگ ءَ سوبمند بوتگ انت ءُ اے کتکار دزگیر کتگ انت –

سی ٹی ڈی ءَ اے مردمانی گور ءَ پنچ دزبمب، یک ھزار ءُ دوسد گرام C4 تراکناکیں شورہ، دو کِلو دگہ مواد، چار الیکٹرک ڈیٹونیٹر، یک ریموٹ کنٹرول کٹ ءُ یک الفا فائر سسٹم ءِ دستیگ کنگے ٹاہ داتگ –

سی ٹی ڈی ءِ جارکش ءَ ٹاہ داتگ کہ بنداتی جست ءُ پُرس ءِ میان ءَ کتکاراں دپ ءِ وت منّ اِتگ کہ آھاں آغا شکیل درانی ءَ ھوار ھزدار ءِ دگہ بازیں سرکاری مرمانی جنگے شوربندی کتگ –

دی بلوچستان پوسٹ ءَ اے درگت ءَ گیشیں پٹ پول کتگ گڈا ھمے ھال سربوتگ کہ اے ھردو مردم عبدالمنان ء محمد موسی ءُ سرفراز ء نیاز جھمنند نوغے ھزدار گوستگیں ماھے سِی اکتوبر ءَ ھزدار ءِ دمگ فیروز آباد ءَ ھما وھد ءَ زورانسری آوار جنگ بوتگ انت کہ آ فٹبال گوازی ءَ پد واتر بوتگ انت – ھردو ورنا میڈیکل اسٹور یے کار ءَ ھم بوتگ انت –

اے دزگیر کتگیں ھردو ورنا زورانسری آوار جنگ بوتگیں رشید ءُ آسف بلوچ ءِ کھول سیادی دار انت –

وتی براتانی یل کنائینگے ھاتر ءَ توار چست کنوکیں گھار سائرہ بلوچ ءَ ھردو ورنایانی بیگواھی ءِ ھبر راست کتگ گوستگیں روچ ءَ چاگردی ترامجاہ ٹویٹر ءِ تہ ءَ نبشتگ کہ منی دو وارس سرفراز ءُ منان سِی اکتوبر ءَ ھزدار ءِ دمگ فیروز آباد ءَ فٹبال گوازی ءَ شتگ بوتگ انت کہ واتر بوگ ءِ وھد ءَ پھازگی لشکر ایف سی ءِ کارمنداں آ آوار جتگ ءُ بیگواہ کتگ انت –

ھمے ٹویٹ پاکستان ءِ نامداریں اھوالکار حامد میر ءَ ری ٹویٹ کتگ ءُ پہ جُست نبشتگ کہ بلوچ ورنایانی ھاتر ءَ فٹبال گوازی کنگ ھم جرمے جوڈ کنگ بوتگ؟

چار روچ ساری سی ٹی ڈی ءَ چہ کلات ءِ دمگ منگچر ءَ ھم یک ورنایے ءِ دزگیر کنگ ءِ ٹاہ داتگ بلے اے ورنایے کھول ھم آئی ءِ زورانسری آوار جنی ءِ بگیری ءَ زھرشانی ءَ بوتگ انت –

سی ٹی ڈی ءِ درشان ءِ رِد ءَ سی ٹی ڈی ءَ چہ کلات ءَ بلوچ لبریشن آرمی ءِ کمکار ولی اللہ لہڑی چہ منگوچر کلات دگ ءَ دزگیر کتگ ءُ آئی گور ءَ تراکناکیں شورہ ھم دست کپتگ –

بلے ورنایے کھول اے دزگیری ءَ پیسر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ اتکگ انت ءُ وتی زھرشانی ءِ نبشتہ کنائینتگ –

زورانسری آوار جنگ بوتگیں ولی اللہ لہڑی ءِ برات ءِ گوشگ ات کہ منی بیست ءُ سَے سالی برات ولی اللہ لہڑی جھمنند خاردان کلات کالج ءِ نودربر یے ءُ پدا کلات بازار ءَ کراکری دکان ءَ آئی ءَ مزوری کتگ بوتگ – بیست ءُ شش اکتوبر سال دوھزار بیست ءُ دو ءِ ادار سَے ءِ نزیک ءَ بید نمبر پلیٹ ءِ دو سرف گاڑی اتکگ انت ءُ سَے ناشناسیں سلاہ بندیں مردماں منی برات چہ دکان ءَ زورانسری آوار جتگ ءُ گوں وت برتگ –

اشی ءَ ابید یک ھپتگے ءِ میان ءَ سی ٹی ڈی ءَ چہ مستونگ ءَ نوروز ءُ ظہیر، چہ شال ءَ عبدالواجد ءُ جان محمد، چہ ھب چوکی ساکران دگ ءَ دوست محمد ءُ محمد اسمائیل دزگیر کتگ ءُ بیگواہ کتگ انت ءُ ٹاہ داتگ کہ اشانی گور ءَ سلاہ ءُ تراکناکیں شورہ دست کپتگ –

سی ٹی ڈی ءَ بلوچستان ءِ تہ ءَ چدوپیش ھم بازیں مردمانی دورگیں بیڑاں مردمانی دزگیری ءِ ٹاہ داتگ بلے پدا آ زانگ بوتگ انت کہ چہ پیسر ءَ زورانسری آوار جتگیں مردم بوتگ انت وھدیکہ ریڈ بُک ءِ تہ ءَ ھم بازیں مردمانی نام ھوار انت کہ آ پیسر ءَ آوار جنگ بوتگ انت کہ آھانی درگت ءَ وائس فار بلوچ مسنگ پرسنز ءَ ھم درشان داتگ –

اشی ابید سی ٹی ڈی نیمگ ءَ بازیں مردمے دروگیں میڑ ءَ کُشگ بوتگ انت کہ آ پیسر ءَ زورانسری آوار جنگ بوتگیں مردم بوتگ انت –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ انت کہ چیریں ادارہ سی ٹی ڈی ءَ کار بندگ انت ءُ دست گوشیں پرزنداں آوار جنگ ءُ شھید کنگ ءَ انت –

ماما قدیر بلوچ ءَ گوشتگ کہ ایجنسی والھاں نوکیں شوربندی ءِ ٹھینتگ بلے سی ٹی ڈی ءِ دروگ نوں پدر انت زورانسری آوار جنی ءُ زالبولانی آوار جنی درگت ءَ ریاست ءَ مدامی دروگیں درشان داتگ –

آئی ءِ گوشتگ کہ سرکار پوج ءِ دیم ءَ بے وس انت ضیاء لانگو دروگ بندیت ءُ وتی ھاکمانی چانیگ ءِ ھک ءَ ادا کنگ ءَ انت –

ٹی ٹوئنٹی ورلڈ کپ ءِ دومی سیمی فائنل ءَ انگلینڈ ءَ ھندوستان 10 وکٹاں پروش داتگ ءُ وت ءَ فائنل ءَ سر کتگ-

آئی سی سی ٹورنامنٹ ءِ دومی سیمی فائنل آسٹریلیا ءِ شھر ایڈیلیڈ ءَ گوازی کنگ بیتگ کہ اود ءَ انگلینڈ ءِ کپتان جوز بٹلر ءَ ٹاس کٹ اتگ ءُ ھندوستان ءِ کپتان روھت چرما بیٹنگ کنگ ءِ داوت داتگ-

ھندوستان ءَ پیسر ءَ بیٹنگ کتگ ءُ بیست آورزاں یک سد ءُ شست ءُ ھشت رن جوڑ کرتگ ءُ انگلینڈا ءَ را یک سد ءُ شست ءُ نُھ رنانی ٹارگٹ داتگ-

انگلینڈ ءِ کپتان جوز بٹلر ءُ ایلکس ھیلز ءَ یک اد ءُ ھپتاد رنانی شریداری کرتگ-

ورلڈ کپ فائنل یکشمبے ءَ سیزدہ نومبر ءَ میلبرن کرکٹ گراؤنڈ ءَ گوازی کنگ بیت اِنت-

ایران ءِ یک نامی ئیں ازمکارے ءَ چارشمبے ءِ روچ ءَ چاگردی ترامجاہ ءَ شنگ کتگیں وتی یک ھنچیں اکسے شنگ کتگ کہ آ ابید سکارف “گشان ” ءَ گندگ بیت اِنت-

عرب نیوز ءِ رد ءَ ازمکار ترانہ علیدوستی ءِ نیمگ ءَ اے گامگیج مھسا امینی کہ پولیس ءِ بندیگ جاہ ءَ بیران بیگ ءَ پد بازیں ھپتگاں رند گھگیری ءِ دروشم ءَ دیم ءَ اتکگ –

اے وئیل ءَ پد برانز گپتگیں زھرشانیاں سرجمیں ڈیھ درگان درگان کرتگ ات-

ستمبر ءِ ماہ ءَ پولیس ءِ دزگیری ءَ پد بیست ءُ دو سالی ءِ کرد زالبول مھسا امینی ءِ مرگ ءِ وئیل بیتگ اَت-

ترانہ علیدوستی ایران ءِ ھما نامی ئیں ازمکارانی لڑا ءَ ھوار ءُ نامان اِنت آئی ءَ مھلوک ءِ تکاں بندات بیتگیں زھرشانی زرمبشت ءِ پلامرزی ءِ جار جتگ –

ترانہ علیدوستی ءَ وتی انسٹاگرام اکاونٹ ءَ سکارف ءَ ابید پلے کارڈ چست کرتگ یک اکسے پوسٹ کتگ کہ آئی ءِ سر ءَ کردی زبان ءَ “زالبول،زندگی ءُ آجوئی ” نبشتگ اِنت-

https://www.instagram.com/p/CkwBqrkraMU/?utm_source=ig_web_button_share_sheet

ترانہ علیدوستی ءَ سوجکار اصغر فرھادی ءِ آسکر ایوارڈ گروکیں تامر ’دی سیلزمین‘ ءَ ازمکاری ءِ جوانیں رنگ پیش کتگ اَنت-

لھتے روچاں پیسر آئی ءَ انسٹاگرام ءَ گشتگ ات کہ ھرچ رنگ ءَ وتی ڈیھ ءَ نند ایت اِنت-

آئی ءَ گوشتگ ات کہ آئی ءَ کار یلو کرتگ ءُ ھما کھولاں کمک کنت آیانی سیاد ءُ وارس زھرشانی ءِ وھد ءَ بیران یا دزگیر کنگ بیتگ اَنت-

سی ءُ ھشت سالی ئیں ازمکار ءَ گوشتگ ات کہ من ءَ ڈیھ ءِ یل کنگ ءِ ھچ ارادو نیست اِنت ءُ آئی ءَ درملکی پاسپورٹ یا جھمنندی ھم رد کتگ انت-

ترانہ ءُ گشتگ ات’ من اد ءَ ننداں جیلانی کھول ءُ زھرشانی ءُ کشگ بیتگیں مردمانی کھولانی گون ءَ ھمکوپگ آں ءُ آیانی توار جوڑ باں‘-

آئی ءِ رد ءَ’ وتی ڈیھ ءِ واستا گھگیری کن آں من وتی ھکانی واستا کجام دیمونی ءَ چک ءُ پد بیت نہ کن آں درستاں چہ وشتریں ایش اِنت ما درست یکجاہ اِنت ‘-

ترانہ علیدوستی درکسانی ءَ ایرانی سینما ءِ بھر اِنت آئی ءَ ھمے زوتاں سوجکار سعید روستائی ءِ نامی ئیں تامر ’لیلاز برادر ‘ ءَ کار کرتگ اے سال ءِ کانز فلم فیسٹیول ءَ ھم پیشدارگ بیتگ-

آ ایران ءَ زالبولانی ھکانی ءُ انسانی ھکانی باسکے ءِ دروشم ءَ زانگ بیت اِنت-

شال ءَ ھوار بلوچستان ءِ دگہ جاھاں ھورانی درچ برجاہ چریشی ءَ سارتی ءِ زور گیش بیتگ-

مھکمہ موسمیات ءِ رد ءَ چار شمبے ءِ روچ ءَ ھزدار ءَ 06، شال ءَ04 ءُ کلات ءَ 3 ملی میٹر ھور ریکارڈ کنگ بیتگ ءُ ھمے وڑ ءَ زیارت، ژوب، ھزدار، لسبیلہ، بارکھان، گوادر، کیچ، تربت، آواران ءُ پنجگور ءَ ترندیں گواتانی ھواری ءَ ھور برجاہ بیتگ ءُ چریشی ءُ چہ سارتی ءِ زور گیش بیتگ –

مھکمہ موسمیات ءَ مروچی پشمبے ءِ روچ ءَ اُستان ءِ بازیں جاھاں موسم دُرشک ءُ گوریچانی ءُ آئی ءِ ھواریں دمگاں موسم سارت بیگ ءِ گمان پدر کرتگ-

یک شمبے ءَ وادی زیارت پراسپیکٹ پوئنٹ ءَ برپ گواری ءُ شھر ءِ کش ءُ گوراں کساسی ھور بیگ ءِ سبب ءَ سارتی ءِ زور گیش بیتگ ءُ ھمے وھداں وادی زیارت ءَ گیس پجگ بند بیتگ-

سارتی ءِ آیگ ءَ ماں مھلوک ءِ شالانی درایگ بندات بیتگ اَنت شال ءِ کش ءُ گوری جاھاں ھم سارتی ءِ رکک ءِ ھاتر ءَ چن ءُ لانچی بیتگ اَنت گوھر ءِ دارگ ءِ ھاتر ءَ بزیں چادر ءُ دگہ گوھردارانی دارگ ءِ چن ءُ لانچ بیتگ اَنت ءُ شال ءَ ھم گیس نیزور تر اتگ-

روس ءَ یوکرینی شھر خیرسن ءَ وتی لشکریان ءَ پشتکنزی ءِ ھکم داتگ-

برطانوی ھبر رساں ایجنسی روئٹرز ءِ رد ءَ وزیر دفاع سرگ-ی شوئیگو ءَ چارشمبے ءِ روچ ءَ یک جارے پرینتگ کہ روسی لشکر خیرسن ءِ نزیکیں کور دنیپرو ءِ روکپتی نیمگ ءَ پشتکنزی بیت اِنت گڑا جنگ یک جوانیں بھرے ءِ نیمگ ءَ شت کنت-

یوکرین ءَ اے جار ءِ پژدر ءَ لیکھانی درشانی ءَ گوشتگ کہ لھتے روسی لشکر داں انگت ءَ خیرسن ءَ جاڑیگ اَنت ءُ دگہ گیشیں پوجی لس مردمی دروشم ءَ دیم دیگ بوگ ءَ اَنت-

سروک ولادیمیت زیلنسکی ءِ مشیر اولیکسی آریسٹووچ ءَ چار شمبے ءِ شپ ءَ آن لائن پوسٹ ءَ کرتگیں یک تامر بندے ءَ گوشتگ کہ اے وھد ءَ مارا آئی ءِ گمانی سرپدی نیست اِنت ھا بوت کنت آ مارا جنگ ءَ دیمپانی کنت؟ ھاں آ خیرسن ءِ شھر ءَ کم کم ءَ زورگری ءِ جھد ءَ کنت؟ آ باز نیزوریں گاماں گوں آیگ اِنت-

زانگ بہ بیت خیرسن ءِ شھر ھما دمگانی توک ءَ بنجاھی ھند اِنت روس ءِ اُرش ءَ پد گپتگ ات ءُ اے یوکرین ءِ پسھی ارشانی بنجل بیتگ اَت-

اے شھر کوھی پھناتاں کریمیا ءَ روکیں دگ ءَ کنٹرول کنت کہ اشی ءِ سر ءَ روس ءَ سال دوھزار ءُ چاردہ ءَ گپتگ –

روس ءِ اے گامگیج ھما وھد ءَ دیم ءَ اتکگ کہ وھدیکہ چارشمبے ءِ روچ ءَ امریکہ ءِ یک مزنیں جنرلے ءَ وتی درشانے ءَ گشتگ کہ داں فروری ءَ یوکرین ءِ سر ءَ اُرش ءَ پد روس ءِ یک پوجی ءَ گیش مرتگ ءُ زدگ بیتگ اَنت-

بلوچستان ءِ ضلع ھُزدار ءَ ھور ءِ آپ بُکتگیں سرجمیں چاریں مردمانی لاش در کنگ بیتگ اَنت-

ھُزدار اندراجی چیلکی ءِ ھند ءَ گوستگیں روچ ءَ کور آپ ءَ بُکتگیں مردمانی تہ ءَ یک زالبول ءُ سے جنکو ھوار بیتگ اَنت، گوستگیں روچ ءَ زالبول ءُ یک جنکوے ءِ لاش در کتگ اَنت، دگہ یک جنکوے ءِ لاش شپ ءِ وھد ءَ در کتگ وھدے کہ دگہ یکے جنکوے ءِ لاش مروچی سھب ءَ در کتگ-

گوستگیں روچ ءَ ھور ءِ آپ ءَ بُکگ ءَ۔چہ بیران بیتگیں مردمانی پجّار 34 سالی ئیں فریدہ بی بی، 8 سالی ئیں سلمہ ء محمد نواز، 7 سالی شکلیہ ء محمد حنیف ءُ 14 سالی ئیں بانی ء محمد ایوب نام ءَ چہ بیتگ اَنت-

انتزامیہ رِد ءَ دمگ ءِ دیر ءُ ھرابی یے سبب ءَ چہ بازیں دلسیاھی دیمپانی بیتگ بلے بازیں جُھد ءَ پد بُکتگیں سرجمیں مردمانی لاش در کتگ اَنت-

انتزامیہ بازیں چار ءُ ٹپاس ءَ پد لاش کھول ءَ داتگ اَنت-

بلوچستان ءِ دمگ مشکے ءَ پاکستانی پوج ءِ بنجل ءِ سر ءَ اُرش ءُ ھوشاپ ءَ پوجی گاڑی ءِ سر ءَ بوتگیں بمب تراک ءِ زمہ واری بلوچ آجوئی لوٹوکیں سلاہ بندیں گل بی ایل ایف ءُ بی ایل اے ءَ منّ اِتگ انت –

بلوچ سلاہ بندیں گل بی ایل اے ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچ لبریشن آرمی ءِ سرمچاراں مروچی کیچ ءِ دمگ ھوشاپ سند بازار ءَ زورگیریں پاکستانی پوج ءِ گاڑی ءِ تراکناک ناکیں شوروانی نشانگ کت، تراک ءَ دژمن پوج ءِ یک کارمندے ھما دمان ءَ مُرتگ ءُ دو زدگ بوتگ انت وھدیکہ گاڑی ءَ سک باز تاوان رستگ –

جارکش ءَ گوشتگ کہ بلوچ لبریشن آرمی اُرش ءِ زمّہ واری ءَ منیت ءُ کول کنت کہ بلوچ سرڈگار ءِ آجوئی ءَ تاں زورگیریں پاکستانی پوج ءِ سر ءَ اُرش برجاہ مان انت –

بی ایل ایف ءِ جارکش میجر گوھرام بلوچ ءَ وتی درشان ءِ تہ ءَ گوشتگ کہ ھشت نومبر ءِ شپ ءِ ادار ھشت ءَ سرمچاراں آواران ءِ دمگ مشکے جیبری ءَ برجاھیں دژمن پوج ءِ بنجاھی بنجل ءِ سر ءَ راکٹ ءُ وتکارءُ مزنیں سلاھاں گوں اُرش کتگ چریشی ءَ بنجل ءُ آئی ءِ سنگراں تاوان بوتگ – اے اُرش ءَ زورگیریں پوج ءَ جانی ءُ مالی تاوان ءِ دیمپانی بوتگ-

جارکش ءَ گوشتگ کہ اُرش ءَ پد دژمن پوج ءَ ھر نیمگ ءَ ماٹر گولہ آس داتگ، بلے سرمچار اُرش ءَ پد سوبمندی ءَ گوں در اتکگ انت ءُ وتی اوتاک ءَ سر بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ دژمن پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچ ندکار زوالفقار علی زلفی ءِ تامر ءُ سنیما ءِ سر ءَ جوڑ کتگیں تاک ” باسکوپ ” ماں اردو ءِ تہ ءَ زوت چہ مھر در پبلیکیشنز شال ءِ نیمگ ءَ شنگ کنگ بیت اِنت –

تامُر ءُ سنیما ءِ سر ءَ جوڑ بوتگیں تاک باسکوپ اولی تامری تاک انت کہ آ بلوچ ندکار زوالفقار علی زلفی ماں اردو ءِ تہ ءَ نبشتہ کتگ، چد ءُ پیش تاک وتی جاہ ءَ تامرانی سر ءَ بلوچ ندکاراں باز کم نبشتہ کتگ ءُ سنیما ءِ سر ءَ چد ءُ پیش اردو ءِ تہ ءَ ھم تاک نبشتہ کنگ نہ بوتگ ءُ اے اولی تاک انت – باسکوپ ءِ سر ءَ مولا بخش رئیسی ھم ماں بلوچی زبان ءِ تہ ءَ وتی تاک ءِ چن ءُ لانچ ءَ کنگ ءَ انت کہ آ بلوچی ءِ تہ ءَ بیت انت –

زولفقار علی زولفی ءِ اے دومی تاک انت کہ چہ مھر در شال پبلیکیشن ءِ نیمگ ءَ دیم ءِ ماہ ءَ بزاں دسمبر ءَ شنگ کنگ بیت اِنت ءُ آئی ءِ اولی تاک “کڑے بڑے” کہ بلوچی ءُ میان استمانی لبزانک ءِ درگت ءَ انت کہ علم ءُ ادب پبلشر ءِ نیمگ ءَ شنگ کنگ بوتگ –

تاک ءِ درگت ءَ دی بلوچستان پوسٹ ءِ اھوالکار ءِ گون ءَ باوست کنان ءَ زوالفقار علی زلفی ءَ گُشت کہ باسکوپ سینما ءِ تک ءُ پھناتانی سر ءَ باوستی کتابے ـ چوش کہ کمیونسٹ باسکوپ ءِ مونتاژ زرمبشت، اٹلی ءِ نیو رئیل اسٹ زرمبشت، ایران ءِ باسکوپ ءِ سر ءَ چمشانک ءُ بلوچی تامرانی اڑ ءُ جنجال ءُ دگہ بازیں ـ

آئی ءَ گشت کہ کتاب ءِ یک درے ھندوستان ءِ ھندی باسکوپ بزاں بالی ووڈ ءِ سر ءَ باوست کنت ـ اے در ءِ تہ ءَ ھم اے چیز ءِ باوست کنگ بوتگ کہ ھندی باسکوپ ءَ وڑ وڑیں پگری ءُ چاگردی اڑ ءُ جنجال چون ءُ چے پیم پیش داشتگ اَنت ـ گڈ سرا انگلینڈ، اسرائیل، فرانس ءُ انڈیا ءِ در چتگیں تامرانی سرا گوں دگہ باسکوپ چاروکاں گپ رپ ءُ اے تامرانی ریس پریس انت – اے کتاب نہ تھنا بلوچی ءَ بلکیں اردو زبان ءَ ھم باسکوپ ءِ سرا اولی باوستی تاک یے –

کتاب ءِ بلوچی ءِ تہ ءَ نہ کنگ ءِ درگت ءَ آئی ءَ گشت کہ اے جست دگہ ھم باز مردماں من ءَ کتگ چوش کہ من ھم اول ءَ جھد کتگ کہ کتاب ءَ بلوچی ءَ بہ کناں چیزے نبشتانک ھم نبشتگ چہ اے نبشتانکاں لھتیں شنگ ھم کتگ بلے بژن! بلوچی ءَ باسکوپ وانوک تنیگا نیست انت –
باسکوپ ءِ سر ءَ استاد مولا بخش رئیسی ءِ دو تاک پہ چاپ ءَ جریدگ انت ـ دویں مئے شھدیں زبان ءَ انت ـ اگاں استاد ءِ کتاباں در پچ کُت گڑا ما ھم آئی ءِ پشت ءَ گون بہ ایں –

تاک ءِ درگت ءَ مھر در پبلیکیشن ءِ سروک عابد میر ءَ گُشت کہ باسکوپ تامرانی بنگپ ءِ سر ءَ جوڈ بوتگیں تاک یے کہ آئی ءِ تہ ءَ پاکستانی ءُ ھندوستانی سنیما ءَ ھوار میان استمانی سنیما ءِ سر ءَ ھم باوست کنگ بوتگ اشی ءَ ھوار ھوار بلوچ ءُ بلوچستان ءِ سر ءَ ھم نبشتہ کنگ بوتگ –

آئی ءَ گُشت کہ اے تاک ءِ یک شری ءِ ایش انت کہ اردو ءِ تہ ءَ سنیما ءِ درگت شرگداری باوست ءُ نبشتانکانی اولی تاک انت کہ آئی ءِ نبشتہ کار لیاری ءِ جھمنندیں بلوچ یے –

نبشتانک: یونیورسٹی ءِ پروٹیسٹ

نبشتہ کار: گل ھسن بلوچ

دی بلوچستان پوسٹ

سالے پیسر بلوچستان یونیورسٹی ءِ دوار گِس (ھاسٹل)  ءَ چہ دو ورنا گار ءُ بیگواہ کنگ بُوتگ اَت کَس ءَ نہ زانت چوں بْرگ بُوتگ اَنت چوناھا بیگواھی بلوچانی واست ءَ نوکیں گپے نہ اَت پرچیا ادا ھر روچ ورنا ،کماش، مات ءُ گوھار گار ءُ بیگواہ کنگ بنت یا ژانگولیں کُنٹ اِش دست کپ اَنت یا نیم زندہ ءِ جاوراں  پدا یل کنگ بنت چہ مردم گِری ءَ ھلاس بنت ۔

پمیشکا سُھیل ءُ پسئھی برگ پہ ما نوکیں جیڑھے نہ اَت ۔ ھاں اِے گپ ھست اَت یونیورسٹی ءِ تہ ءَ چہ برگ کمو گیش بُوتگ اَت ۔ ھمے وجہ ءَ کُلیں گلاں اِے لانک بست کہ ما ننداک جن ایں،  یونیورسٹی ءَ بند کن ایں بلکن مئے ورنا یلہ بہ بنت یا یلہ نہ بنت دگہ وھداں یونیورسٹی ءِ تہ ءَ چہ برگ ءَ کم بہ کنت ۔

یونیورسٹی ءَ ڈن چوناھا بلوچ ءَ پہ زندگی نیست کس نہ زانت من کُجام وھداں ءُ چہ کُجا گار ءُ بیگواہ کنگ باں ؟ پد ءَ ژانگولیں جّون دست کپ اِیت یا نیم زندیں جاواراں گوں گِس ءَ واتر باں بنیادمی ھساب ءَ درباں گُڑا کُلیں گلاں کہ پیسلہ کُتگ اَت ننداک بندات بُوت یونیورسٹی بند کنگ بُوت، ھما نودربر کہ آ گوں وتی زند ءَ گولائش اَت  اَنت، دیم پہ وتی میتگاں راھی بُوت اَنت کسے ودار ءَ اَت بلکن یونیورسٹی بچ بہ بیت اُستاد ھمے داب ءَ اَت اَنت دوچار ھنچیں اُستاد ھستگ اَت کہ آواں،، کدی کدی شپاں دو چار ساھت گوں ما گوازینت ، بلے گیشتریں استاد وتی ھیداں گوں گرپتار اَت،  وتی زھگ ءُ جن ، وتی زندگی ھچ سمائے نیست اَت اِے ھم یک ماتے زھگ بنت، اِے ھم یک پتے ءَ چُک بلے ھچ ۔
من گوں ھما لّڑ ءَ ھوار اَت آں کہ سُھب ءَ بیا تاں شپ ھمد ءَ بہ نند کدی گوں سنگتاں مجلس ءُ دیوان کدی لھتیں مردمانی سر ءَ اِبرت گرگ ئے ھدا تو چونیں مردم سازیتگ اِے جھان ءَ؟  ھچ سمجھا پیدا نہ اَنت ۔

من ءَ چوناھا ھمے آس ءِ کش ءَ نندگ ءُ میر اھمد ءِ گانایے چالو کنگ پد ءَ کسانیں تامُرے جوڑ کنگ ما رسانک در ءُ شنگ کنگ کہ واکی من دردواریں بلوچے آں ، من ءَ وتی ھمے بلوچی ءِ سر ءَ چو ستّک نیست من نہ لوٹاں من آس ءِ کش ءَ بہ ننداں کسے منی تاُمر ءَ جوڑ بہ کنت ءُ پد ءَ من میر اھمد ءِ آشوبی گانایے سر ءَ بہ کناں من ءَ کسے واہ واہ بہ کنت کہ واکی گل ھسن بلوچ دوستے کہ شال ءِ سرین پُرشتگیں سردی ءَ بلوچستان یونیورسٹی ءَ پہ بلوچے زندگ کنگ ءَ جُھد کنگ ءَ اِنت ھمے وجہ اَت کہ بازیں سنگتاں من ءَ ھال کُت کہ گُل یار تو نہ کہ شمئے گل ءِ سنگت کسے درا نہ بیت من کدی وتی وڑ ءَ پسّویے دات ءُ کدی بس کندگے جت ھچ نہ گْوشت گُونگ بوتاں گُڑا یک روچے من ءَ بازیں مردماں سردردی کُت من لاچار بُوتاں کہ من لھتیں اکس بہ کشاں تاں ھما مردمانی سر ءَ راہ بہ دیاں کہ من ھم ساڑی آں گُڑا یک روچے بیگاہ ءِ ساھت اَت سردی لَھم لَھم ءَ کشگ ءَ اَت انچوش گْوش ئے جبین ءَ مان تراں اَت ۔ من ءُ منی مھروانیں سنگت امجد بیکس ماں نندانک ءِ جاہ ءَ آس ءِ کش ءَ نشتگ اَت ایں وتی ھم روچی تراناں گولائش اَت ایں،  پد ءَ امجد ءِ کر ءَ بہ نند تو ھچ بے توار نہ بئے ھچیں کندگ ءَ جنت گْوش ئے آزمان جکّسیت ھرچی  شومیں گپ دپ ءَ کیت ئے ھماگوں کنت گُڑا من امجد ءَ گو یار اِے مھلونک ءَ مارا دل سیاہ کُتگ کہ شما ساڑی نہ اِت نندانک ءَ شمئے اکس ءُ تامُر رسانکدر ءَ نیست اَنت میر اھمد ءِ آشوبی گانا ءِ سر ءَ نہ اَنت گُڑا امجد ھمد ءَ دات وتی ھما ھرروچیں دژمانے گْوشت ئے کش موبائل ءَ مرچی شریں اکس لھتیں کش ایں بلئے کہ مھلونک بہ گندی پرچیا کہ مھلونک ءِ زھن ھمے وڑ اِنت من در کُت موبائل کش اِت لھتیں اکس ھما سنگتاں پہ ندر کُت اَنت کہ ھر روچ منءَ دل سیاہ کُتگ اَت اِش کہ تو ساڑی نہ ئے ۔

ھمے داب ءَ روچ ءُ شپ روان اَت اَنت ھر روچ ھکومتی مردم اتک اَنت ،مارا دو چار روچ بہ دے اِت شمئے مردم آجو بنت ، بلے ھمے دو چار روچاں ءَ نوں ماھانی ماہ پور ءَ بوگ ءَ اَت ھچ وڑیں آسر نیست اَت ۔ ما ھمدا ءَ ھر روچی ایں داب ءَ وتی شپاں روچ ءُ روچاں شپ کنگ ءَ اَت ایں تو بچارت ایں ئے ھر جاہ ءَ دور ءَ دور ءَ آس روک اِنت ھر گلے ءَ باسک نشتگ اَنت سُک سُک اِنت ۔ کس کس ءَ برداشت کُت نہ کنت ، نہ کس گوں کس ءَ نندگ ءُ تران ءَ تیار اِنت، ھنچو گْوش ئے وت ما وت دژمن اَنت نَہ گْوش ئے درست بلوچ ءِ پرزند اَنت ھمے وڑ ءَ ھکومتی مردمانی روگ ءَ آئیگ ھر سَے ءُ چار روچ ءِ سر ءَ ھست اَت ھر وھداں کہ اتک اَنت  سَے ءُ چار دگہ روچ اِش لوٹ اِیت گُوش ئے زان ءَ امریکہ ءُ چین مان ءَ انڈوپیسفک ءَ جیڑہ چلگ ءَ اِنت یا پاکستان ءُ انڈیا ءِ ماں کشمیر ءِ کہ دو روچ ءَ ھلاس بوگ ءَ نہ اِنت یک روچے پدا آ اتک اَنت سنگتانی مٹینگ بوت آ واتر بُوت اَنت سنگت واتر اتک اَنت گُڑا من ءُ بالاچ کادر ءُ چئرمین زبیر یک کشے ءَ یک آسے سر ءَ نشتگ اَت ایں گُڑا اِے رندی میر اھمد ءِ گانا تامُرانی سر ءَ نہ بلکن ڈیگ(اسپیکرز) آرگ بُوتگ اَت ۔ پدا میر اھمد ءِ ھما آشوبی گانا نہ گُوش ئے تو پہ دو مات ءِ جگرءِ ٹُکرانی آجوئی ءَ ننداک ءَ نشتگ ئے  مات ءِ درداں ھوار ئے ۔ انچو سما بوگ ءَ اَت گْوش ئے  بلوچستان آجو بُوتگ مھلونک شادکامی کنگ ءَ اَنت ۔ گُڑا بالاچ کادر من ءَ پہ کندگ گُوشت یار بہ رو اِے وتی کامریڈاں بہ گْوش ادا گانا ءِ جاہ نہ اِنت اگاں گانا ءُ سوت جنگی اِنت دگہ جاہ ھست من پد ءَ بالاچ ءَ پسّو دات ءُ کندگے جت مردم اَنت تئی من ءَ چیا گْوش ئے! منی بالاچ ءِ دپ جنگی چلگ ءَ اَت بالاچ گو تئی اَنت من گو تئی اَنت گُڑا چئرمین زبیر چک ترینت درائینت بالاچ جان گل ھسن راست گْوش اِیت در اسل ءَ کامریڈ اَنت تی گُل ءَ چی ءَ میاریگ کن ئے؟ بالاچ کندگے جت ءُ گْوشت ئے ایشاں الله بہ داری منی کارے نہ اِنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔