TBP Balochi

ٹی ٹوئنٹی گوازی آسٹریلیا ءَ برجاہ اَنت، پاکستان ءُ نیوزی لینڈ سیمی فائنل گوازی ءَمروچی دیم پہ دیم بیتگ اَنت، نیوزی لینڈ ءَ ٹاس کٹگ ءَ پد پیسر ءَ بیٹنگ ءِ پیسلہ کُتگ۔

نیوزی لینڈ ءَ بیٹنگ کنان ءَ بیست اورزانی آسر ءَ چار وکٹانی تاوان ءَ 152 رنز اڈ کُتگ ءُ پاکستان ءَ پہ باج بر بیگ ءَ 153 رنز ءِ ٹارگٹ داتگ۔

چہ نیوزی لینڈ ءِ نیمگ ءَ جوانیں بیٹنگ کنان ءَ ڈاریل میچل ءَ 52 رنز اڈ کُتگ وھدیکہ کین ولیمسن ءَ 46 رنز اڈ کُتگ، وھدیکہ پاکستان ءِ نیمگ ءَ جوانیں بالنگ کنان ءَ شاھین آفریدی ءَ دو وکٹ زرتگ اَنت۔

پاکستان ءَ نیوزی لینڈ ءِ داتگیں ٹارگٹ ءِ سر بیگ ءِ ھاترءَ لئیب کنان ءَ بابر اعظم ءَ 53 رنز اڈ کُتگ، وھدیکہ مھمد رضوان ءَ 57 رنز اڈ کُتگ۔ پاکستان ءَ ءِ لیب گُڈی اور ءِ اولی بال ءَ سئے وکٹانی تاوان ءَ وتی نام ءَ کُتگ ءُ نیوزی لینڈ پروش داتگ ءُ وتءَ ٹی ٹوئینٹی ورلڈ کپ ءِ فائنل ءَ سرکُتگ۔

چہ نیوزی لینڈ ءِ نیمگ ءَ جوانیں باؤلنگ کنان ءَ ٹرینٹ بولٹ ءَ دو وکٹ گپتگ۔

زانگ بہ بیت باندات ٹی ٹوئنٹی ورلڈ کپ ءِ دومی سیمی فائنل انڈیا ءُ انگلینڈ ءِ نیام ءَ لیب کنگ بیت۔

روکپتی بلوچستان ءِ بنجاھی شھر زھدان ءَ ھواریں دمگ شیر آباد ءِ جھمنندین دو بیگواھیں مردمانی بیگواھی ءَ بیست ءُ دو روچ ءَ پد ھم آیانی درگت ءَ ھچ ھال نیست اِنت-

بیگواہ کنگ بیتگیں مردمانی پجار روح اللہ مزارزئی ء سعید ءُ سعید مزارزئی ء امان اللہ جھمنند شیر آباد ءِ ناماں زانگ بیتگ اَنت-

ھالانی تہ ءَ گوشگ بیتگ کہ اے ھردوہ میر حسینی میتگ ءَ ایرانی چیریں ادارھاں آوار جتگ ءُ برتگ اَنت پد ءَ ھردوکانی بارو ءَ ھچ ھال نیست اِنت-

ھالانی تہ ءَ گوشگ بیتگ کہ اے ھردوکانی گرگ ءَ پد ایرانی چیریں ادارھانی نیمگ ءَ کھول ءِ سر ءَ رھوتی اتکگ ءُ گوشگ بیتگ کہ شمئے مردم ما گپتگ اَنت-

چریشی ءَ پد ھردوکانی بارو ءَ پد ءُ دوبر آیانی کھول سرپد کنگ نہ بیتگ اَنت نانکہ آیانی کیس ءِ بارو ءَ دگہ گپ دیم ءَ اتکگ اَنت-

روکپتی بلوچستان ءَ اے چیزے روچانی توک ءَ بیگواھیانی درچ گیشی گندگ آیگ ءَ اِنت ءُ چریشی ءَ بازیں کچے ءَ مردم گرگ ءُ بندیگ کنگ بیتگ اَنت-

بلوچستان ءِ دمگ ھوشاپ ءَ پاکستانی لشکریانی گاڑی ءِ مردماں ناشناسیں مردماں بمب تراک ءَ نشانگ کُتگ، دومی نیمگ ءَ شش نومبر ءَ گوادر ءَ لشکری شرکت ءِ پھازگی چوکی ءِ سرءَ اُرش ءِ زمہ واری من اِتگ۔

سربیتگیں ھالانی ردءَ بلوچستان ءِ دمگ کیچ ءَ پاکستانی پوج ءِ گاڑی ناشناسیں مردماں بمب تراکءَ نشانگ کُتگ۔

لشکریانی گاڑی ءِ سرءَ تراک کیچ ءِ ھنکین ھوشاپ ءِ سند بازار ءَ مروچی سھب ءِ وھدءَ بیتگ۔ ھندی اھوالانی ردءَ ناشناسیں مردماں دگ ءِ سرءَ تراکناکیں شورو کَڈ کُتگ بیتگ اَنت وھدیکہ لشکریانی گاڑی گوزگ ءَ بیتگ گُڑءَ مزنیں تراکے ءِ توار اِش کنگ بیتگ۔

اھوالانی ردءَ تراک ءَ پد لشکریاں دمگ انگیر کُتگ وھدیکہ دگہ لشکری بم تراک جاہ ءَ سربیتگ اَنت۔ واکداراں داں انگت تاوانانی درگت ءَ ھچ پئیمیں درشان شنگ نہ کُتگ۔

دومی نیمگ ءَ بلوچستان لبریشن فرنٹ ءِ جارکش میجر گھرام بلوچ ءَ رسانکدراں شنگ کُتگیں درشانے تہءَ گُشتگ کہ گوستگیں روچاں 06 نومبر ءِ شپ ءَ ادار یازدہ ءَ سرمچاراں گوادر ءِ زیروپوائنٹ ءِ ھند ءَ گھٹی ڈور بازار ءَ بستگیں پاکستانی پوج ءِ شرکت ایف ڈبلیو او ءِ پھازگ ءِ ھاترءَ بستگیں سنگر ءِ سرءَ دستی بمب ءَ گوں اُرش کُتگ۔

جارکش ءَ گُشتگ کہ اُرش ءِ آسر ءَ یک کارندہ ءِ ٹپی بیتگ ، آئی ءَ گُشتگ کہ بلوچستان ءَ چہ پاکستانی پوج ءِ سرجمی ءَ درکپگ ءَ داں مئے اُرش برجاہ مان اَنت۔

برطانوی وزیر اعظم رشی سوناک ءَ گوشتگ کہ برطانیہ نسلاں داں پہ نیٹو (نارتھ اٹلانٹک ٹریٹی آرگنائزیشن) ءَ جوانیں کرد پیلو کنت-

فرانسیسی ھبررساں ادارہ ایجنسی اے ایف پی ءِ رد ءَ نیٹو ءِ سیکریٹری جنرل جینز سٹولٹن برگ ءِ تر ءُ تاب ءَ پیسر برطانوی سروزیر ءِ کارگس ءِ نیمگ ءَ یک شنگ بیتگیں درشانے ءَ گوشگ بیتگ کہ یوکرین ءِ پلامرزی ءِ واستا برطانیہ ءِ پلامرزی ءُ ھمسنتی دیم ءَ ھمگرنچی بنت-

نیٹو ءِ سروک ءَ پیسر ءُ میان اُستمانی رھشونانی بیت اِنت رشی سوناک ءِ گوستگیں ماہ ءَ اگدو ءِ پھازگ ءَ پد ڈاؤننگ سٹریٹ ءَ آئی ءَ گند ءُ نند کنت-

رچی سوناک ءَ وتی درشان ءَ گشتگ کہ ھنچش یوکرین ءَ جنگ برجاہ اِنت گڑا مارا ھم وتی ڈیھانی سر ءَ چار ءُ گداری کنگی اِنت ءُ آئی ءَ گوشتگ کہ من ءَ اوست اِنت برطانیہ داں آیوکیں نسلاں نیٹو ءِ واستا جوانیں کرد پیلو کنت-

آئی ءَ گوشتگ کہ مارا دیم ءِ آیوکیں ھرچ شئے ءِ واستا ھمسنتی بیگی اِنت ءُ دانکہ وتی بگیر دارانی ھلاپ ءَ اوشتات بہ کن ایں-

نیٹو ءِ گوشگ اِنت سٹولٹن برگ برطانیہ ءِ وزیر ھارجہ جیمز کلیورلی ءَ ھم گند ءُ نند کنت-

سٹولٹن برگ یک پوجی بنجلے ءِ تر ءُ تاب ءَ پد رشی سوناک ءِ گند ءُ نند ءَ کنت ءُ اود ءَ برطانوی فوج یوکرین فوجیاں ھیلکاری کنگ ءَ اَنت-

برطانیہ ءَ انی کچ ءُ کساس نوزدہ ھزار یوکرینی پوجی جنگی میدان ءَ جوانیں ھیلکاری نشانہ بازی، سلاھانی برگ، شھری ءُ جنگ ءَ زدگ بیتگینانی بنداتی دارودرمان ءِ ھیلکاری ھوار اَنت-

زانگ بہ بیت گوستگیں روچ ءَ سوناک رشی ءَ جار جتگ ات کہ برطانیہ یوکرینی پوجیانی واستا سارتی ءِ رکگ ءَ گیشیں کمکی سامان روان دیگ اِنت کہ چریشانی توک ءَ گدانی بیست ءُ پنچ ھزار سیٹ، دوازدہ ھزار سلیپنگ کٹس ءُ یک سد ءُ پنجاہ تمبو ھوار اَنت-

اے گپ ھک دلگوشی یے برطانیہ ءِ سروزیر ءَ کہ وھدیکہ وتی اگدو گپتگ ات گڑا اولی سر ءَ آئی ءَ یوکرینی سروک ولادیمیر زیلنسکی ءَ گوں رھوت کتگ ات کہ چریشی ءُ گوستگیں سروزیر بورس جانسن ءِ گون ءَ یکدم نزیکی بیتگ ات-

سوناک ءَ آئی ءَ گوں سوگند کتگ کہ آ یوکرین ءِ واستا برطانیہ ھروھد ءَ پلامرزی اِنت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس پار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ ھشت سد ءُ چاردہ روچ سرجم بوتگ انت – مروچی ھر تک ءُ پھناتاں سیادی داروکیں مردماں بنجل ءِ اتکگ ءُ دلپدردی درشان اِتگ –

گل ءِ کمک سرکماش ماما قدیر بلوچ ءِ گوشگ ات کہ بولان ءُ ھاران ءَ بوتگیں لشکر کشی ءُ سی ٹی ڈی ءِ دورگیں بھتامانی پلامرزی ءَ وزیر داخلہ ضیاء لانگو دروگیں پریس کانفرنس کنائینتگ –

آئی ءِ گوشگ ات کہ ھاران ءَ سی ٹی ڈی ءَ کھول ءِ تباہ کتگ ءُ اے چہ ھاوند ءَ رکّیت نہ کن انت –

ماما ءَ گوشتگ کہ بولان ءِ ھونیگیں لشکر کشی ءُ زالبولانی زورانسری آوار جنی ءِ درگت ءَ ضیاء لانگو ءِ زمیر زانت کہ آئی دروگ بندگ ءَ گوشگ بوتگ بلے وتی کرسی ءِ ھاتر ءَ اے کنگی اانت –

آئی ءِ گوشگ ات کہ وھد ءِ لوٹ ھمیش انت کہ بلوچستان ءَ ریاستی زوراکی ءُ ورنایانی زورانسری آوار جنی ءَ بگیری ءَ یکجاہ بوگ ءُ توار چست کنگی انت –

ماما قدیر بلوچ ءَ رسانکدراں وتی شنگ کتگیں دگہ درشان ءِ تہ ءَ گوشتگ کہ مئے لھتے سادگیں ھمراہ ءُ سنگت بلوچستان ءِ تہ ءَ بؤکیں پاکستانی پوج ءِ نیمگ ءَ میان استمانی کانود ءُ انسانی ھکانی لگتمالی ءَ منّگ ءُ ھچ نگوشگ انت ءُ پدا کتکاریں پوج ءُ اے کتکاریاں ھواریں پارلمنٹ ءَ نشتگیں سیاسی پاٹی ءُ وزیراں کریڈٹ دیگ انت –

آئی ءِ گوشگ ات کہ جست ایش انت کہ بولان ءَ سینزدہ زھگ ءُ زالبول پاکستان ءِ کجام رھبندانی شق ءِ رِد ءَ آوار جنگ ءُ ماژگی ءُ جانی ازیت دیگ بوتگ انت –

ماما قدیر بلوچ ءَ گوشتگ کہ بولان لشکر کشی ءَ پاکستان ءِ کجام رھبندانی شق ءِ رِد ءَ شپانک محمد غوث ء افضل ھان مری ءَ ھوار دگہ بازیں شپانک ءِ شھید کنگ بوتگ انت – پاکتسان ءِ کانودانی کجام شق ءُ کجام میان استمانی کانودانی رِد ءَ مھلوک ءَ لوگ ءُ جاہ مانداشتگ ءُ مال ءُ مڈی لٹ ءُ پُل کتگ انت –

آئی ءِ گوشگ ات کہ من وتی سنگت ءُ اقتدار ءِ سیاسی پاٹی ءُ وزیراں لوٹ کناں کہ اگاں شما بلوچ ءِ چکچینی ءَ پاکستانی پوج ءَ داشت نہ کن یے، یا پہ تُرس ءُ کُرسی ءِ پچگرگ ءِ ترس ءَ بلوچستان ءِ تہ ءَ پوج ءِ زوراکیاں ایر جت نہ کنے گڈا کم چہ کم پوج ءِ پلامرزی ءَ مہ کن ایت –

آئی ءَ گوشتگ کہ شما زھگانی یل بوگ ءُ یا دست گوشیں پرزندانی جونانی دستگرگ ءَ ھنچوش زاھر کنگ ءَ ایت پورا شما بلاھیں ٹوھیں کارے کتگ –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ دو ورنا پاھو دیگ بیتگ اَنت-

پاھو دیگ بیتگیں مردمانی سیادی رودراتکی بلوچستان ءِ دمگ کیچ مند ءَ اِنت کہ گوشگ بوگ ءَ اِنت کہ اے ھردوکیں ورناہ شش سال ساری ماں روکپتی بلوچستان ءَ کوش ءِ بھتام ءَ گرگ بیتگ اَنت-

ورنایانی پجار شعیب ء غلام حسین ءُ اسھاک ء دلاور ءِ ناماں زانگ بیتگ اَنت کہ ھردوک مند ءِ میتگ شند ءِ جھمنند اَنت-

اھوالانی رد ءَ ھردوکیں ورنایانی لاش ماں زاھدان ءَ ایرانی لشکر ءِ دستیگ ءَ اَنت کہ آیانی لاشانی واتر کنگ ءَ بازیں زر لوٹگ ءَ اِنت-

روکپتی بلوچستان ءَ بندیگیں مردمانی پاھو بازیں وھداں چہ برجاہ اَنت گوستگیں دو روچانی توک ءَ اے چارومی مردم اَنت کہ زاھدان ءَ پاھو دیگ بیگ ءَ اَنت-

بلوچ زالبول یل کتگ اَنت بلے جُست اِش اِنت کہ زالبول کجام جرم کجام کانود ھساب ءَ چست کنگ بیتگ اَنت؟ آ بندیگ کتگ ءُ آیانی ازت نپس لگتمال کتگ اَنت-

اے ھیال لیکہ وائس فار بلوچ مسنگ پرسنز ءِ رھشون سمی دین بلوچ ءَ چاگردی رسانکدر ءَ شنگ کتگ-

سمی دین ءَ گْوشتگ کہ بولان ءَ چہ بلوچ زالبول یل کنگ گلانی ، پارٹیانی ءُ راجی تُرندیں گامگیج ءِ زورگ سبب ءَ بیتگ بلے جُست اش اِنت کہ زالبول کجام جرم ءُ کجام کانود ھساب ءَ چست کنگ بیتگ اَنت؟ آ بندیگ کتگ ءُ آیانی ازت ءُ نپس ٹپی لگتمال کتگ اَنت، اشی ءِ زمہ وار ریاستی ادارہ ءَ اَنت ءُ آیاں پسّہ دیگ لوٹ اِِیت-

آئی ءَ گْوشتگ کہ کراچی ءَ مروچی ساھت سے ءَ اے زالبولانی گیرکانودی بندیگ کنگ ءُ سی ٹی ڈی ءِ دروگیں آیف آئی آر ءُ انکاؤنٹر ءُ زورانسری آوار جنی بگیری ءَ زھرشانی بیت اُمیت کن آں جوانیں وڑے ءَ راجی پلامرزی ھمراہ بیت-

ھمے وڑ بلوچ یکجھتی کمیٹی ءِ رھشون آمنہ بلوچ ءَ گْوشتگ کہ چہ بولان ءَ زورانسری آوار جنی زالبول ءُ چکانی یل کنگ ءَ اَبید مروچی کراچی ءَ زھرشانی بیت کجام کانود ھساب ءَ بلوچستان ءِ ھرچ شھر ءُ میتگ ءَ بلوچ دودمان لگتمال کنگ بنت پرچا مئے بلوچ زالبول اینچو روچ ءَ بندیگ کنگ بیتگ اَنت؟

کتاب : ہزاروں انکشافات (سازشیں، سیاہ راتیں، قاتل و مقتول کی داستانیں)

نبشتہ کار : لطافت علی صدیقی
چمشانک دئیوک : گل ھسن بلوچ

دی بلوچستان پوسٹ

“ھزاروں انکشافات ” یک ھنچیں کتابے کہ پاکستان ءِ جوڑ بوگ ءَ بگر داں روچ ء مرچی امران ھان ءَ جنّگ ءَ تاں بیا درست چیزاں مردم سرپد بیت کہ اسل ءَ بوگ ءَ اِنت چے پاکستان ءَ؟ اِے کتاب ءِ جند کروانا ءِ وھداں نبشتہ کنگ بُوتگ بلے ایشی ءِ تہ ءَ انچیں راز درشان کنگ بُوتگ مردم زانت کنت امران ھان ءَ جنّگ ءِ پُژدر چے اِنت ۔ اِے کتاب ءِ نبشتہ کار واجہ لطافت علی صدیقی اِنت آ وت یک ھال رسانے ( صحافی) یے  بوتگ کراچی یونیورسٹی ءَ جرنلزم ءَ ماسٹر کُتگ ئے۔ ھال رسانی ءِ اولی کار “خبر ایجنسی پی پی آئی ” ءَ بندات کنت، پد ءَ انگریزی ھالتاک “ڈیلی سن ، مارننگ نیوز ءُ دی لیڈر ” ءَ ھم کار کنت ۔ دیمتر ءَ دہ سال ءَ تاں سئیودی ارب ءَ “عرب نیوز ” ءَ کار کنت ۔ 1997 ءَ کینڈا ءَ روت وتی کاراں بندات کنت مرچی تک ھمدا ءَ جاھمنند اِنت ۔

اِے کتاب ءِ تہ ءَ اسل چیزاں ءَ کہ بیان کُتگ دیم ءَ آرتگ اَنت بازیں چیز ءِ چمانی شاھدی ءَ دنت کہ وت اِے وھداں ساڑی بُوتگ لھتیں چیزانی سر ءَ پٹ ءُ پول کُتگ ئے ھما بنیادی مردم دست کپتگ اَنت کہ آ وت ھما چیزانی شاھدی داتگ اِش ۔ انچوکہ قائد اعظم ءِ مرگ ءِ جیڑہ اِنت۔ ما پاکستان ءِ دپتر ءَ وانیں یا پاکستان ءِ ھما کتاباں کہ مارا تعلیمی ادارھاں وانینگ بنت ۔ مارا گْوشگ بیت قائد اعظم ءِ ناگت ءَ سِھت ھراب بیت اِے وھداں آ ما بلوچستان ءِ دمگ زیارت ءَ ساڑی بیت پہ دارو ءُ درمان ءَ باگی گُراب (جہاز) ءِ سر ءَ کراچی ءَ برگ بیت ماری پور بالی پٹ (ایرپورٹ) ءَ اِے دنیا ءَ یل کنت ۔ بلے لطافت علی صدیقی وت وھدے 1975 ءَ گوں وتی لھتیں سنگتاں دیم پہ بلوچستان ءَ راہ دیگ بیت کہ بلوچستان ءِ جاورھالاں بچار اَنت گُڑا آ یک روچے شال ءَ کاینت گوں ھان کلات میر اھمد ھان ءَ گوں ڈِک ور اَنت ھمدا بازیں جست ءُ پسّو بیت، بلوچستان ءِ سر ءَ پاکستان ءِ زوران سری ایردستی ءِ سر ءَ تراں کن اَنت ھان اھمد یار ھان وتی وت نبشتہ کُتگیں کتاب ءَ دنت ئے کہ تو منی کرا اتکگ ئے گُڑا اِے کتاب ءَ بْوان ترا درست پسّو رس اَنت بلے منی کتاب ءِ چیزاں منی زند ءَ ڈن ءَ در مہ کن ۔ پد ءَ اِے سوج ءَ دنت اِش کہ شما اد ءَ اتکگ اِت بلوچستان ءِ دمگ زیارت ءَ قائد اعظم ءِ جاھمنندی جاہ ( ریذیڈنسی) ءَ الم چکرے بہ جن اِت ۔ گُڑا اِے وھدے زیارت ءَ رو اَنت دو روچ ھمدا ءَ قائد اعظم ءِ ریذیڈنسی ءَ دار اَنت گُڑا پیر مردے گند اَنت آئی ءَ گوں ھال بیت بازیں جست گرگ ءِ جھد کن اَنت بلے مردکار تُرس ءِ آماچ بیت ھال نہ دنت ، گُڑی روچ ءَ روگ ءِ وھداں پدا یک روندے جست ئے کنت گُڑا اِے مردکار ھمنچو گْوش اِیت من قائد اعظم ءِ ورگ دئیوک بوتگ آں بلے اِے روچاں من سُھب ءَ وھدی چاہ جوڑ کُتگ تاں بَرّگ ءَ باں من ءَ سپائی یے توار پِر جنت کہ چاھاں مہ بر ۔ گُڑا گوش اِیت من ھیراں بیاں پد ءَ ھال کیت قائد اعظم اِے جھان ءَ جہ شوتگ ۔ اد ءَ چہ زانگ بیت اسل مسئلہ چے اِنت ۔ ھمے وڑ ءَ پاتمہ جناہ( فاطمہ جناح) ءِ موت اِنت ۔ نبشتہ کار اِے چیزے وت چم دید اِنت کہ 9جولائی 1967 ءَ لطافت پی پی آئی نیوز ایجنسی ءَ کار ءَ بیت، آرا دیم دیگ بیت کہ تو بہ رو کراچی کلفٹن ءِ مھٹہ پلیس ءَ بہ رو پاتمہ ءِ مرگ ءِ ھال ءَ بہ گر ءُ بیا گُڑا اِے روت ھما جاہ ءَ سر بیت کس ءَ نہ گند اِیت باز ودار کنت دیر ءَ گند اِیت پولیس ءِ ٹرک کاینت برپ (برف) ءِ لادی مزنیں گوں بیت ۔ گُڑا اِے روت گوں پولیس ءَ ھوار سر بیت پولیس کوٹی ءِ دروازگ ءَ لگت جنت ءُ پچ کنت تاں اِے گند اِیت پاتمہ مُرتگ۔ گُڑا پولیس افسر جُست کنت تو اد ءَ چیا گُڑا اِے گْوش اِیت من اھوال کارے آں گُڑا افسر گوش اِیت ئے در ءَ چداں اگاں نہ ترا ھم چو پاتمہ ءَ کن اَنت ۔ گُڑا اِے جلدی در کپ اِیت ءُ کیت نیوز ءَ نبشتہ کنت ” مادر ملت مردہ پائی گئی ” بلے دیر نہ بیت پیگامے کیت کہ وتی ھال ءَ چو بہ کن کہ ” محترمہ فاطمہ جناح دل کا دورہ پڑنے سے انتقال کر گئی ہیں ” بلے اِے ھال اِیش ءَ واست ءَ تچکیں دروگے بیت بلے لاچار بیت ملک واجہ کارانی دست ءَ اِنت گُڑا پد ءَ وتی ھال ءَ دو بارگ نبشتہ کنت ۔

ھمے وڑ ءَ بھٹو بازیں چیزانی دیم ءَ اڑ ءُ جنجال بیت بازیں وڑ ءُ پیماں رند آرا پاھو دیگ بیت ۔گُڈی ساھتاں آرا وت ھبر نہ بیت کہ باندا من ءَ پاھو دیگ بیت اِنت ھما وھداں ایش ءَ سما کپ اِیت کہ بے نظیر بھٹو ءُ آئی ماس کاینت بھٹو ءِ ملگ ءَ ماں جیل ءَ بھٹو ھمدا بازیں چیزے نبشتہ کنت کاگدانی سر ءَ بے نظیر وان اِیت اِش پرچیا کہ ڈن ءَ بورت اِش نہ کنت پد ءَ دّرِ اِیت اِش ھمے وڑ ءَ 17 اگست 1988 ءَ جنرل ضیاءالحق ءَ بالیگُراب ءَ زھری ایں گیسے مان کن اَنت گُراب وھدے بال کنت راہ ءَ نیم ءَ درستیں مردم بے ھوش بنت بالی کپ اِیت درست مرگ ءِ آماچ بنت ۔ پرچیا کہ ضیاءالحق ءَ لھتیں وھداں پیسر ءَ پونے کیت کہ نوں اوگانستان ءِ جھاد ھلاس بُوتگ نوں بہ جیڑ ترا چے کنگی اِنت ؟ گُڑا آ وتی سنگتاں گوں تراں کنت اِے پیگام ءِ مکسد چے اِنت؟ پیگام ءِ مکسد آئی گُڈی مرگ بیت اِنت ۔

ایشانی جیڑھاں ابید کہ لیاقت علی ھان ءِ جنّگ بیت ۔ وھدے آ لاہور ءَ جلسہ کنگ ءَ بیت یکے مرد کارے تیر جنت ھما وھداں کُش اِیت ۔ پد ءَ مرد کار ءِ جند چہ اوگانستان ءَ اتکگ ۔ مردکار ءَ پد ءَ ھما وھداں جن اَنت آ زان اَنت کہ مرد کار زندگ بہ بیت مئے کُلیں راز در کنت ۔ ھمے وڑ ءَ بے نظیر بھٹو ءَ را ما راولپنڈی ءَ ھمے وڑ ءَ جن اَنت آئی ءِ کیس تنی وھدی گار بیت ۔ ھمے وڑ ءَ پاکستان ءِ پنچومی وزیراعظم ” حسین سہروردی” کہ آئی جْون ما بیروت ءِ ھوٹل ءَ دست کپ اِیت۔ پد ءَ گُوشگ بیت آئی ءِ دل ءِ دھڑکن بند بیت آ مر اِیت۔ بلے آئی ءِ کھول ءِ گُوشگ اِنت باکی مردماں پٹ ءُ پول کُتگ آ گُوش اَنت ، ورگانی تہ ءَ زھر داتگ اش کوشتگ ۔ دگہ ھمے وڑیں بازیں راز اَنت کہ اِے کتاب ءِ تہ ءَ دست کپ اَنت ۔ لطافت علی صدیقی گُوش اِیت من ھان ابدالولی ھان ءَ گوں گلگدارے (انٹرویو) یے ءَ کُت پد ءَ من اِیش ءَ شنگ کنگ ءَ تُرس اِتگ آں وھدے آئی ءَ بازیں وھداں رند من ءَ جُست کُتگ تو چیا منی گُلگدار چیا شنگ نہ کُتگ من گُوشتگ پیش ءَ ما ترا جُست کُتگ تو ھمے گُوشتگ کہ من ءَ مریگی نہ اِنت منی زھگ کسان اَنت آیاں من ءَ مرگی اِنت منی زھگ ھم کسان اَنت ۔

لطافت علی صدیقی وھدے کراچی یونیورسٹی ءَ وانگ ءَ بیت آر ءَ پُلکاری یے دیگ بیت کہ تو پاکستان ءِ جوڑ بوگ ءِ سر ءَ پٹ ءُ پول بہ کن ،گُڑا آ بازیں پٹ ءُ پولکاری یے کنت آ سرپد بیت کہ قائد اعظم ءِ اولی گُشتانک پور ءَ شنگ کنگ نہ بُوتگ آ دارگ بُوتگ ھما گپ کہ آوانی تب ءِ بُوتگ اَنت بس ھما شنگ کُت اَنت ۔ ھمے وھداں کراچی یونیورسٹی ءِ جرنلزم ءِ ڈپارٹمنٹ ءِسروک شریپ مجاھد ءَ چہ نوکری ءَ کشگ بیت اِے جست گیت وجہ چے بُوتگ پد ءَ ھال کیت کہ اِے مرد ءَ قائد اعظم ءِ ھما اولی گُشتانک ءِ درستیں تران نبشتہ کُتگ ءُ شنگ کُتگ اَنت پمیشکا مرد چہ نوکری ءَ کشگ بُوتگ ۔ اد ءَ زانگ بیت ملک ءِ تہ ءَ ھما روچاں چہ جیڑہ ودی اِنت ایش ءَ جوڑ کنگ ءِ مکسد چے بُوتگ اَنت ؟ اِے کتاب ءِ وانگ ءَ رند بازیں چیزاں در بر اِت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک:بے ھیال نہ بنت

نبشتہ کار: کامریڈ بلوچ

دی بلوچستان پوسٹ

بیگاہ ءِ ساھت چار بج ءِ وھد ات بالگتر ءِ بُرز ءُ بارگیں کوھانی سرزہ ءَ سارت ءُ اَبیریں کوْشے لھم لھم ءَ کَشگ ءَ اَت ھمے وھد ءَ شش سنگت پہ نٹ ورک ءِ ھاتر ءَ کوہ ءِ سرٹُل ءَ سر کپتگ ات اَنت ءُ لھتیں کوہ ءِ دیم ءَ ات اَنت یک ءُ دو سنگت ھال ءُ اھوال ءَ ات ءُ اے دگہ سنگت ھال کنگ ءِ جھد ءَ ات اَنت بلئے نٹ ورک ءِ مسروپ بوھگ ءِ سوب ءَ لمبر لگگ ءَ نہ ات اَنت واجو گپ ءَ ات گُشگ ءَ اَت کہ (تو کمے سبر کن سنگتے یے لمبر پیداک اِنت من گوں آئی ءَ ھال کن آں کہ آ پد ءَ نٹ ورک ءَ چہ در کپ ایت، من ترا دمانے ءَ پد ھال کن آں واجو ءَ سنگت ءِ لمبر گپت اِلاکہ ءِ ھال ءُ اھوال ءَ پد آ سنگت گُشگ ءَ اَت کہ من شھر ءَ اتکگ آں اگاں شھر ءِ نیمگ ءَ کارے ھست بُگش واجو ءَ پسؤ دات کہ من ءَ کار نیست کمو سبر کن من باریں سنگتان جُست کن آں کش ءَ نشتگیں سنگت ءَ را گُشت ئِے کہ تو سنگتان جُست کن باریں شھر ءَ کار اِش ھست اگاں نا، سنگتے چہ شھر ءَ پیداک اِنت سنگت ءَ کوہ ءِ دیم ءِ سنگتاناں توار پِر کُت ءُ ھمے جُست کت اَنت جھل ءِ سنگتاں آواز دات ءُ گُشت مارا کار نیست واجو ءَ پد ءَ گوں ھما سنگت ءَ دلگوش بوت ءُ گُشت ئِے کار نیست پہ سلامتی بیا، گوں ھمے ھبر ءَ مُراد جان چہ جھل ءَ توار پِر کُت ءُ گُشت ئِے واجو منی زھگ ءِ شیر ھلاس اَنت سنگت ءَ جُست کن اگاں آورت کنت گڑا شیرے بیار ایت گوں شرشر –

یک ءُ دو کلاک ءَ رند سنگت پد ءَ دیم پہ اوتاک ءَ اتک اَنت یک سوچکان دوھزار نوزدہ ءِ (1/5/2019) بیگاہ ءَ ھما شھر ءِ سنگت ءَ ھال کرت کہ من پیداک آں بلئے شما ھم نیم راہ ءَ بیا ات ما ءُ شما کجا کہ ڈیک دات شمارا شمئے چیزاں دے آں چار سنگت اوتاک ءَ چہ دَرکپت دیم پہ ھما سنگت ءِ نیمگ ءَ راہ ءِ نیم ءَ اَتکاں سنگت ءَ پد ءَ ھال کرت جلدی بیا اِت کہ منی سئیکل پنچر اِنت من کِشک ءِ سر ءَ نِشتگ آں دگہ راھگوزی مردمے من ءَ مہ گندیت شر ما پیداک ایں واجو ءَ گُشت سنگت کمے دیم ءَ اَتک ایں واجو ءِ سئیکل پنچر بوت ، دومی سئیکل ءَ سنگت مراد ءُ ملا میرل اتاں سنگت مراد جان واجو ءَ را گُشت کہ کماش شما سئیکل ءِ پنچر ءَ بِگر اِت ما داں رواں واجو ءَ گُشت نا شُما تھنا مہ رو اِت ما ٹیئر ءَ گوات دہ ایں اگاں گوات ءِ داشت گُڑا یکجاہ روان اِت شر سئیکل گوات دات کمے دیم ءَ اَتک اَنت پد ءَ گوات ھلاس بوتاں سنگت مراد ءُ سنگت میرل راہ گپت اَنت دیم پہ ھما سنگت ءِ چیدگ کرتگیں جاگہ ءَ کہ سک دور نہ ات دمانے ءَ پد تیرانی گرنچ بستگیں توارے (رکبارے) واجو ءِ گوشاں کپت اے وھد ءَ واجو ءِ ھمراہ ءَ سئیکل ءِ ٹیئر ھم پٹ کُرتگ ات گڑا واجو ءَ سئیکل چالو کرت ءُ سنگت ءَ را ھکل کُرت کہ سوار بو رواں مراد جان ءِ نیمگ ءَ باریں چونیں تیراں کہ توار ءَ انت سنگت ءَ گُشت واجو اے ھرکس انت تیر جنگ ءَ اَنت آیاں پیسر ءَ سنگر گپتگ ءُ نشتگ اَنت ما اگاں بُرویں ما جَنَگ بِہ ایں ءُ پد ءَ مئے سواری ھم پنچر اِنت کمو رواں پُشت ءَ نٹ ورک ءِ سر ءَ لھتیں سنگت لوٹائیں این پد ءَ گڑا ایشانی نیمگ ءَ رواں واجو ءُ سنگت ھردو شوت اَنت ڈکے یے سر ءَ نٹ ورک گپت ءُ دگہ لھتیں سنگت لوٹائینت سنگت اَتک اَنت بلئے نوں دیر بوتگ ات ناشرکاراں گوں ھما بنداتی تیران سنگت مراد جان ءُ سنگت میرل جان شھید کُرتگ ات اَنت بالگتر ءِ ڈاک ءَ انگت کنگریں شھید اسد شھیو ءِ ھونانی نمبگ ھست ات کہ دگہ دو زمین زادگ ءَ گوں وتی ھوناں اے زمین سیرآپ کت ءُ پہ ابد نمیران بوت اَنت ھمے شھری سنگت دگہ کس نہ ات!بلکیں تارک پنام سیاھو ات کہ لھتیں روچ پیش بی ایل ایپ ءِ سنگتاں بالگتر ءَ آئی ءِ لوگ ءَ آ رسوا ءُ مردار کرت ھمے وھد ءَ دو دیمی تیرگواری ءَ آئی ءِ زال ھم تیرانی زدا کیت ءُ بیران بیت ھالنکہ ءَ بی ایل ایپ ءَ پد ءَ وتی درشانے یے توک ءَ افسوس ھم کرتگ ءُ گُشتگ اَت کہ (کراس فائرنگ ءَ جَنَگ بوتگ) بلئے انگت لھتیں نادانیں دوست ءَ ھمے جیڑہ زُرت ءُ سوشل میڈیا سر ءَ زُرت ھمدا چہ بدواھاں سوب کت ءُ گَل ءِ سر ءَ وڑ وڑیں بُھتام جت ءُ کردارکشی کت شھیدانی ھوناں گوں مزاک کت اے گپ ءَ ھرکس پوہ ءُ سرپدیں کہ تارک ریاستی چریکے بوتگ ءُ بازیں بلوچ ورنایانی شھید کنگ ءُ آوارجنی ءَ آئی ءِ دست تچک ءَ مان بوتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔