TBP Balochi

روکپتی بلوچستان ءَ گرگ بیتگیں بلوچ جنک فائزہ براھوئی ءَ سَے سال ءُ شش ماھے سزا ایرانی آمیدگس ءَ داتگ-

ایرانی آمیدگس ءِ نیمگ ءَ شنگ بیتگیں یک رپورٹے ءِ رد ءَ آئی ءَ فائزہ براھوئی ءَ ڈیھ ءِ بگیری ءَ توار چست کنگ ءُ پندل سازگ ءِ بھتام ءَ سَے سال ءُ شش ماہ ءِ بندیگی سزا داتگ –

فائزہ براھوئی اے وھد ءَ روکپتی بلوچستان ءِ بنجاھی شھر زاھدان ءِ زاندان ءَ بندیگ اِنت –

ھالانی تہ ءَ گوشگ بیتگ کہ فائزہ ءِ وکیل ءُ دگہ مردم آئی ءَ چہ نزیکی ءَ گستا کنگ بیتگ اَنت ءُ ایرانی آمیدگس ءَ وتی نیمگ ءَ آئی ءِ سر ءَ بھتام جتگ ءُ سزا بستگ اَنت-

زانگ بہ بیت فائزہ براھوئی دو اکتوبر دوھزار ءُ بیست ءُ دو ءَ ھما وھد ءَ زاھدان ءَ گرگ بیتگ کہ روکپتی بلوچستان ءَ پانزدہ سالی ئیں جنک ءِ گون ءَ پولیس آپیسر ءِ زوراکی ءُ مھسا امینی ءِ کوش ءِ بگیری ءَ مھلوک برانز گپتگ اَنت-

فائزہ براھوئی کے اِنت؟

فائزہ براھوائی ایرانی سال بیست ءُ پنچ ارد یبھشت سیزدہ سد ءُ ھشتاد ءُ ھپت ءَ ماں زاھدان ءَ ودی بیتگ ءُ آئی ءِ پت دوازدہ سال پیش ماں زاھدان ءَ ایرانی آمیدگس ءَ ما ڈیھ ءِ بگیر داری ءَ پاھو داتگ –

فائزہ لوگ ءِ سروکیں زھگاں چہ یکے آ وتی سروک ءِ سرپرست اِنت ءُ آئی ءِ مات ھم فائزہ ءِ گرگ ءَ پد زھنی نادراھی ءِ آماچ بیتگ-

فائزہ ءَ ھوار ھوار دگہ بلوچ جنک ھم ایرانی لشکر ءَ آوار جتگ ءُ برتگ اَنت بلے آیانی تہ ءَ لھتے یل بیتگ ءُ لھتے انگت بندیگ اِنت-

روکپتی بلوچستان ءَ بلوچ مردینانی ھواری ءَ بلوچ جنک ھم گرگ ءُ بندیگ کنگ ءُ آیانی سر ءَ سزا لڈگ بیگ ءَ اِنت-

بلوچ چاگرد ءَ زالبولانی شرپ ءِ لگتمال کنگ یک بلاھیں دشمنی ءِ زانگ بیت اِنت گیرت ءِ نام ءَ بلوچ گیشتر دنیا ءِ توک ءَ نامان زانگ بنت-

بلے اشی ءَ ھوار ھوار بلوچ جنک گرگ ءُ بندیگ کنگ ءُ آیانی سر ءَ سزا لڈگ بوگ ءَ اِنت-

نبشتانک:زبان مان اِیت گڑا راج مان اِیت

نبشتہ کار: شاھد اھمد

دی بلوچستان پوسٹ

درستاں چہ پیش بلوچے بوگ لوٹ اِیت ءُ بلوچ بلوچی ءَ ھما وھد ءَ پَھم اِیت وھدے کہ بلوچ ءَ بلوچی ءِ مارشت چہ جبین ءِ تہ ءَ ودی بہ بیت ھما مارشت کہ ھر بلوچے ءِ تہ ءَ بوگ الّمی اِنت کہ بہ بیت منی گپّانی مستریں مول ءُ مراد بلوچی زبان ءِ دربرگ ءُ آئی ءِ پَھازگ ءَ بلوچ ءَ وت کنگ لوٹ اِیت دگہ دری راجے اد ءَ کَس نَئیت کہ شما وداریگ اِت بلکیں اے جُھد بلوچ ءَ وت کنگ لوٹ اِیت بزاں شمارا کنگ لوٹ اِیت۔

یک راجے ءِ بنجاہ چوں گار ءُ بیگْواہ بیت؟ راجے ءِ زندگ بوگ ءِ مستریں راست آئی ءِ جند ءِ زبان اِنت چیاکہ زبان راج ءِ درستیں پجار ءَ کنائین اِیت ۔زبان راج ءِ سْرین ءِ ھما ھڑ اِنت کہ آئی ءِ پورائیں زند ءَ یکشل ءَ سینگارین اِیت۔

بلوچ ءِ ھر یک چُکے ءِ ھک اِنت کہ آ پیسر ءَ وتی جند ءِ زبان ءَ بہ وان اِیت چیاکہ آ بلوچے ءُ آئی ءِ زبان آئی ءَ را بلوچ بوگ ءِ پجار ءَ شری ءِ سر ءَ کنائین اِیت۔

راج ءِ مستریں نزوری آئی ءِ زبان ءِ بے سمائی اِنت آ چہ وتی جند ءِ زبان ءِ دربرگ ءَ گیش دری زبان ءِ دربرگ ءَ وت ءَ پَھر بند اَنت کہ گْوش اَنت ما زانوگر ایں۔ او گْونڈواں! چمّاں پچ کن اِت ءُ بچار اِت دری زبان ءِ دربرگ ءَ چہ گیش وتی جند ءِ زبان ءَ ھئیل بہ کن اِت کہ شمئے زند ءِ مستریں بَھر بلوچی زبان اِنت ءُ بلوچی زبان شمئے پت ءُ پیروکی میراسے ایشی ءِ پَھازگ شمئے پَھازگ اِنت۔ وھدے کہ شمارا وت زبانے ھست گڑا دری زبان ءِ پُشت ءِ کَپّگ بلائیں ردی یے ءُ وھد ءِ لگتمالی یے۔ بلوچی زبان، بلوچ راج ءُ بلوچستان زندگ بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یوکرین ءَ روکپتی ڈیھاں دگہ پھریزی سلاھانی رسگ ءِ جار جتگ ءُ چریشانی تہ ءَ چہ زمین ءَ داں برز ءَ ناشنگ کنوکیں میزائل ءُ اٹلی ءِ ایسپائڈ میزائل ھوار اَنت-

ھبررساں ادارہ اے ایف پی ءِ رد ءَ یوکرین ءِ وزیر دفاع اولیکسی ریزنکوف ءَ گوشتگ کہ اے سلاہ یوکرین ءَ لشکر ءَ برزی پھناتاں مھکم کن اَنت-

آئی ءَ گوشتگ کہ من وتی ھمسنتیں ڈیھ ناروے، اسپین ےُ امریکہ ءِ منت گپتگ ءُ گوشتگ کہ اُرشکاریں دشمن ءَ نشانگ کن ایں-

دومی نیمگ ءَ امریکہ ءُ بیوکیں گچینکاری ءَ یوکرین ءَ برجاھیں لشکری کمک ءِ سر ءَ ھم ایراد گرگ ءَ اَنت-

کواسانی گمان اِنت گچینکاری ءِ آسر ریپبلکن پاٹی ءِ کانگریس ءُ سینیٹ ءَ گیش رسگ ءِ گمان ھست اِنت ءُ چریشی ءَ یوکرین ءَ رسوکیں کمک ءَ آسرمندی کت کنت-

ریبپلکن پاٹی ءِ باسک یکشل ءَ یوکرین ءَ رسوکیں کمک ءِ سر ءَ زھر ء درشانی کنگ ءَ اَنت بلے سروک جوبائیڈن ءَ اے زھرانی دور کنگ ءَ یوکرین ءَ را سدکی داتگ-

گوستگیں بازیں ھپتگاں روس ےِ نیمگ ءَ برجاھیں اُرشاں یوکرین ءِ بجلی ءِ نزام تباہ کتگ چریشی ءَ چہ چل درسد ءَ کوراسی اِنت ءُ بجلی ءِ بنجل الگار کنگ بیتگ اَنت –

کیئف ءِ انتزامیہ ءِ نیمگ ءَ شنگ بیتگیں یک درشانے ءَ گوشگ بیتگ کہ شھری کم بجلی کارمرد بہ کن اَنت ءُ شھر سرجم ءَ کوراسی ءِ دیمپان اِنت –

روکپتی بلوچستان ءِ بنجاھی شھر زاھدان ءَ ایرانی چیریں ادارھانی دست ءَ یک ورنایے بیگواہ کنگ بیتگ ءُ یکے دہ روچانی بندیگ بیگ ءَ پد یل کنگ بیتگ-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ گوستگیں روچ ءَ ایرانی لشکر ءَ یک کسان سالیں ورنایے آوار جنگ ءَ پد بیگواہ کرتگ-

بیگواہ کنگ بیتگیں ورنا ءِ پجار رھیم براھوئی ء نعیم جھمنند زاھدان ءِ نام ءَ زانگ بیتگ-

ھمے وڑ ءَ دَہ روچ ءَ پیش ایرانی لشکر ءِ دست ءَ گرگ بیتگیں یک مردمے یل کنگ بیتگ ءُ وتی لوگ ءَ سر بیتگ-

یل بیتگیں مردم ءِ پجار عبدالوحید کبدانی براھوئی ء حسین جھمنند زاھدان ءِ نام ءَ زانگ بیتگ-

زانگ بہ بیت روکپتی بلوچستان ءَ مردمانی آوار جنگ ءُ بیگواہ کنگ ءِ یک نوکیں درچے بندات بیتگ کہ اے نوکیں درچ ءَ تنی وھدی بازیں کچے ءَ مردم گرگ ءُ بیگواہ کنگ بیتگ اَنت-

بلوچستان ءِ ضلع ھُزدار ءَ پاکستانی پوج ءَ دو مردم آوار جنگ ءَ پد ناشناسیں ھندے ءَ برتگ اَنت-

ھالانی رِد ءَ پوج ءَ دو ورناہ عبدالمنان ء محمد موسیٰ ءُ سرفراز ء نیاز جھمنند نوغے ھُزدار ءَ زورانسری آوار جتگ-

ورناھانی زورانسری آوار جنی ءِ وئیل گوستگیں ماہ 30 اکتوبر فٹبال لیب ءَ چہ واتری ءِ وھد ءَ ھُزدار فیروز آباد ءَ بیتگ، دوئیں ورناہ میڈیکل اسٹور ءَ کار کنگ ءَ بیتگ اَنت-

چہ بلوچستان ءَ زورانسری آوار جنی دْرچ یکشلہ برجاہ ءَ اِنت ھمے ھپتگ ءَ پاکستانی پوج ءِ دست ءَ قلات ، پنجگور، بولان ءَ ھوار جتائیں دمگاں چہ زورانسری آوار جنی ءِ نُھ کیس رپورٹ بیتگ اَنت-

گوستگیں روچاں قلات خزینئی ءِ دمگ ءَ پوج ءَ لشکر کشی بندات کتگ دمگ مردم سک لٹ ءُ کُٹانی نشانگ کتگ اَنت ءُ دو مردم خالق داد ءُ عبدالحکیم آوار جتگ ءُ ناشناسیں جاھے ءَ برتگ اَنت، وھدے کہ چہ قلات شیخ حاجی ءَ کلیم اللہ ء علی گل مینگل ھم آوار جتگ ءُ بیگواہ کتگ-

ھمے وڑ دو روچ ءَ ساری پنجگور گچک ءِ دمگ لوھڑی ءَ پاکستانی پوج ءَ لوگاں بیڑ وھد ءَ زالبول ءُ چک لٹ ءُ کُٹانی نشانگ کنگ ءَ پد ایاز ء مبارک بلوچ نامیں ورناہ بیگواہ کتگ اَنت-

ھمے ھپتگ ءَ زورانسری آوار جنی ءِ دگہ یک وئیلے شمبے ءِ روچ ءَ کیچ ءِ دمگ شھرک ءَ دو گاڑیاں سوار سلاہ بندیں مردماں تُپنگ ءِ زور ءَ سے مردم مغل ء محمد جھمنند شھرک ، امید ء چار شمبے، رستم ء نظر جھمنند بالگتر آوار جتگ ءُ وتی ھمراھی ءَ برتگ اَنت کہ انگت دیم ءَ آرگ نہ بوتگ اَنت-

بلوچ نیشنل موومنٹ ءِ رپورٹ رِد ءَ گوستگیں ماہ اکتوبر ءِ ماہ ءَ پاکستانی پوج ءِ دست ءَ 38 مردم زورانسری آوار جنی ءِ نشانگ بیتگ اَنت وھدے کہ 14 بیگواھیں مردم دروگیں میڑاں کُشگ بیتگ اَنت-

دومی نیمگ ءَ زورانسری آوار جنی ءِ بگیری ءَ زھرشانیانی دْرچ گوستگیں بازیں سالاں بلوچستان ءَ برجاہ اَنت بلوچستان ءِ سیاسی گل بلوچستان ءَ زورانسری آوار جنی ءِ دْرچ ءَ گر ءُ دار ءُ بیگواھیں مردماں دیم آرگ ءِ لوٹ ءَ کنگ ءَ اَنت-

کیچ ءِ بنجاھی شھر تربت ءَ ایچ ای سی ءِ کمک ءَ پنک ربن سینہ ءِ شومک درگت ءَ سرپدی دیگ ءِ مراگشے ماں تربت شھدربرجاہ ءَ برجم دارگ بوتگ –

اے مراگش بازیں بھرانی تہ ءَ بوتگ کہ زالبولاں سینہ ءِ شومک نادراھی ءِ درگت ءَ سرپدی دیگ ءِ ھاتر ءَ گوشتانک، پریزنٹیشن ءُ ڈرامہ کنگ بوتگ – مراگش ءِ گچینی مھمان انگریزی ءِ لکچرار زاھدہ محراب بوتگ –

ھمے درگت ءَ جاندراھی ءِ زانتکاراں وتی ھیال درشان اِتگ انت گوشتگ کہ ھچ وڑیں نادراھی کسان پھمگ مہ بیت پرچاکہ اے چاگرد ءِ تہ ءَ ھمے کسانیں نادراھی گیش بوت کنت –

ھمے درگت ءَ مکران میڈکل کالج تربت ءِ ہیڈ آف اوبسٹیٹرکس ءُ گائناکالوجی ڈیپارٹمنٹ ءِ ڈاکٹر روبینہ امجد ءَ سینہ ءِ شومک ءِ سوب، نشانی ءُ الاج ءِ درگت ءَ سرپدی داتگ –

راج ءَ سرپد کنگ ءِ ھاتر ءَ ٹیچنگ نادراھجاہ تربت ءِ کنسلٹنٹ جنرل سرجن ڈاکٹر حیات بلوچ ءَ سینہ ءِ شومک ءِ درگت اولسری نشانی، وتی پٹ پول کتگیں ءُ آئی ءِ درگت ءَ گیشیں سرپدی ءِ درگت ءَ پٹ ءُ پولی پریزنٹیشن ءِ پیش کتگ –
ٹیچنگ نادراھجاہ تربت ءِ ڈاکٹر آصفہ ءَ زالبولانی زند ءِ تہ ءَ شومک سانمندی ءِ درگت ءَ وتی ھیال درشان کتگ انت –

ترانکارانی گوشگ ات کہ سینہ ءِ شومک ءِ نادراھی ءِ الاج ھما وھد ءَ بوت کنت کہ بندات ءَ آ زانگ بہ بیت ءُ ھما رِد ءَ الاج کنگ بہ بیت – آھانی گوشگ ات کہ چاگرد ءَ گیش ءَ چہ گیش سرپدی دیگ بہ بیت اڑاندانی دور کنگ ءِ گامگیج زورگ بہ بیت ھما اڑانڈ کہ سینہ ءِ شومک ءِ نادراھی ءِ درگت ءَ وتی مات ءُ پت یا کماشانی گور ءَ اے درگت گپ جت نہ کن انت –

ھمے درگت ءَ تربت شھدربر جاہ ءِ وائس چانسلر پروفیسر ڈاکٹر جان محمد، ڈائریکٹر ڈاکٹر ریاض مزار ءُ کیو ای سی ءَ وتی ھیال درشان اِتگ انت ءُ گوشتگ کہ وائس چانسلر پروفیسر ڈاکٹر جان محمد ءِ سرکماشی ءَ تربت شھدربرجاہ دمگ ءِ مھلوک ءِ شری ءِ ھاتر ءَ وتی چاگردی زمہ واریاں پیلو کن انت –

بلوچستان ءِ دمگ بولان ءَ گوستگیں روچاں بوتگیں لشکر کشی ءِ میان ءَ پاکستانی پوج ءِ دست ءَ آوار جنگ بوتگیں شیرمچیں زھگ ءُ زالبول یل کنگ بوتگ انت –

گیشیں ھالانی رِد ءَ بلوچ راجدوستیں مردمانی ءُ چہ سرجمیں جھان ءِ مردمانی ترندیں ایرجنی ءَ پد بولان ءَ لشکر کشی ءِ میان ءَ آوار جنگ بوتگیں بلوچ زالبول ءُ زھگ مروچی سانگان ءَ یل کنگ بوتگ انت –

زانگ بہ بیت پاکستانی پوج ءَ گوستگیں ھپتگ ءَ بازیں زھگ ءُ زالبول ءِ چہ اوچ کمان ءُ کش ءُ گور ءِ ھلکاں آوار جتگ ءَ بندیگ کتگ اتنت کہ آھانی تہ ءَ سینزدہ مردمانی پجار بوتگ ات –

بلے پدا ھم بازیں روچانی بندیگ کنگ ءَ پد مروچی آ یل کنگ بوتگ انت –

بولان لشکر کشی ءِ میان ءَ پاکستانی پوج ءِ دست ءَ آوار جنگ بوتگیں زھگ ءُ زالبولانی تہ ءَ زرگل مری، حنیفہ مری، در خاتون مری، ماہیسو سمالانی، گل بی بی سمالانی، سمو سمالانی، زر بخت سمالانی، بانی سمالانی، سمیدہ سمالانی، فریدہ سمالانی، راجی سمالانی ءُ چار سالاں چہ بیگواھیں رکھیہ سمالانی ءِ لوگی مہنا سمالی ءُ زھگ کلیم سمالانی ھوار بوتگ انت –

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں پاکستانی پوج ءِ سر ءَ دزبمب اُرش ءِ کتگ –

پاکستانی پوج ءِ سر ءَ اُرش شال ءَ ایریگیشن کارگس ءِ نزیک ءَ بوتگ کہ ناشناسیں مردماں دزبمب ءِ چگل داتگ ءُ در شُتگ انت –

دومی نیمگ ءَ بلوچ سلاہ بندیں گل بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ گوشتگ کہ اے اُرش مئے سرمچاراں کُتگ –

جارکش ءَ گوشتگ کہ مئے سرمچاراں مروچی شال بازار ءَ چمن پاٹک دگ ءَ ایریگیشن کارگس ءِ نزیک ءَ زورگیریں پاکستانی پوج ءِ تر ءُ تاب کنوکیں کارمندانی سر ءَ دزبمب اُرش ءِ کتگ ، اُرش ءِ آسر ءَ دو دژمن کارمند زدگ بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ وتی مول مرادانی گرگ ءَ تاں مئے اُرش ھمے داب ءَ برجاہ مان انت –

بلوچستان ءَ زورانسری آوار جنیانی بگیری ءَ توار چست کنوکیں گل وائس فار بلوچ مسنگ پرسنز ءِ زھرشانی شال پریس کلب ءِ دیم ءَ برجاہ، زھرشانی ءَ مروچی چار ھزار ءُ ھشت سد ءُ چاردہ روچ سرجم بوتگ انت –

زھرشانی بنجل ءَ بیگواھیں مردمانی کھولاں ھوار دگہ مردم ھم ساڑی بوتگ انت –

ھمے وھد ءَگل ءِ کمک سرکماش ماما قدیر بلوچ ءَ گوشتگ بلوچستان ءَ تاکت ءِ زور ءَ مردمانی ترسینگ بے سوب بوتگ –

آئی ءَ گوشتگ کہ ھاران ءَ سی ٹی ڈی ءِ دست ءَ دروگیں بھتاماں دزگیر کنگ بوتگیں ورنایانی کھول ءِ گوم ءَ ھرچی بیتگ آئی ءِ زمہ دار ریاست ءُ آئی ءِ پوج انت –

ماما قدیر بلوچ ءَ گوشتگ کہ بولان ءَ لشکر کشی ءِ بگیری ءَ بؤکیں زھرشانی ءَ مردم گیش ءَ چہ گیش بھر بہ زور انت ءُ وتی زھرشانی ءَ نبشتہ بہ کنائین انت –

ھون لوٹ ایت

نبشتہ کار : شیردل بلوچ

دی بلوچستان پوسٹ

مرچی ند زُرتگ ءُ انچیں بامردے ءِ بابت ءَ نبشتہ کنگ ءَ آں آئی ءِ گوما باز کمو یکجاہ بوتگ آں ءُ بابت ءَ ئِے بازیں سرپدی نیست، نہ زاناں وتی ھیالاں آئی ءِ بابت ءَ چون درشان بہ کناں وتی نبشتہ ءَ کُج ءَ بندات ءُ چوں آسر بہ کناں ۔

بتلے گوش اَنت ” دوست گوں دست ءُ دروت ءَ پجاہ آرگ بیت “
اے ھبر راستے، اے بتلے من منوگر آں، انچیں کسے ءَ گوں دُچار کپتگ آں، اولی رند ءِ دست ءُ دروت ءَ گندگ بوت، آ مھروان، مُھکم ءُ تچکیں آشوبی یے ، آئی ءِ زانت ءُ زانگ ءِ چِنکس کسہ بْیاراں، آ انچیں کارستے ءِ واھند بوتگ، ءُ ھمے مھروانیں ھمبل” کَذاپی جان پنام بھاربلوچ اِنت ءُ پْروم ءِ جاھمند انت گوں آئی ءَ من اگست 2018 ءَ سپرے دُچار کپت آں وش تب ءُ مھروانے اَت، تیوگیں راہ ءَ پہ مسکرائی ءُ ھندگ آسر ئِے کرت ، پد ءَ دارجیں وھدے ءَ رند گوانکو(مبایل) ءِ دامگ( نیٹ ورک) ءَ آتک گڑا ھال ءُ اھوال بوت اِیں، آئی ءِ دیستگیں دراھیں سنگت ءُ ھمراھانی ھال پہ بچکندیں دپّ ءَ نام جُست گپت اَنت، گوشت ئِے کہ باز زھیر بوگ ءَ انت شما کسے مئے نیمگ ءَ نیا اِت دیدارے بہ بیت درائینت “بھار جان ما ھم پہ شما انچو زھیرواریں، بلے وھد ءَ انچو مان پیچ اِتگ، بزان کہ ما تلکے ءِ دپ ءَ ایں دَرآیگ ءَ موہ نہ رس ایت، ما راھسرے ءَ ایں ، پہ سر کپتی ھمے دمگ ءَ اتک ئے، گڑا المی مئے کر ءَ بْیا ئے، ھو ئِے کرت ءُ دلجمی دات ئِے گوشت ئِے الم ءَ کایاں ۔

ماہ ءُ سال بدل بوت اَنت، نَگیگی گیش بوھاں بوت اَت، یک نیمگے ءَ سنگتانی سمبالگ ءُ دومی نیمگ ءَ دژمن ءِ گیشیں تر ءُ تاباں ھورت چاری کنگ ءَ اَت، گڑا آئی ءِ کوپگاں کومی کارانی ڈُبّہ گیش دیگ بوت اَنت، پہ پُرھندگیں دپے منّ اتگ ءُ زُرتگ اَنت، ھمے میانجی ءَ لھتیں ماہ گْوَست ءُ ، یکروچے سنکتے منی گور ءَ آتک ءُ گوشت ئِے “بھار جان ءَ سلام کرتگ ءُ گوشتگ ئِے، شمے نزیک ءَ اتکگ آں وتی ڈس ءُ نشان ءَ بہ دے اِت کایاں کج ءَ بْیا آں۔۔؟ من سنگت ءَ گوشت تو دیم ءَ ئِے برو دست اِش بگر رَد اش کن ءُ سرگردان مہ بنت، وھدیکہ مئے گدان ءَ رس ات اَنت، دروت ءُ دراھبات بوت ایں ، چار اِت چہ ساریگ ءَ گیشتر مھروان ءُ مُھکم بوتگ ات ، بلے سک ءَ لاگر اَت مُدامی ءَ جیڑگ ءَ اَت وتی کارانی گیگ ءُ گور کنگ ءِ دومی جاھاں شور کنگ ءَ اَت، چار شپ ءَ ھمد ءَ بوت اَنت، نیاد ءُ دیدار ءَ جْوانیں موھے رس ات، آ وتی گوں رھشوناں گوانکو ( مبایل) ءِ سر ءَ وتی اوتاک ءِ زرورتاں سرجم کنگ ءِ مڈیاں لوٹگ ءَ اَت، انچُش گوں دومی گلانی پجاہ آروکیں سنگتاں گوں ھبر ءَ اَت، چوناھا آ سکیں بےتواریں سنگتے اَت، بلے گوانکو (مبایل ) ءِ سر ءَ دل ءِ تب ءَ ئِے گپّ کرت۔

کَذاپی جان لھتیں لائکیں سنگتانی گستائی ءَ سک ءَ تکاونسر کرتگ اَت، نام اش گپت انت ءُ لُنٹ وت گٹ ئِے پاتک اَنت، گوشت ئِے کہ اے جنگولانی گِستائی اے وھد ءِ ٹوھیں تاوانے زانگ بیت، چُشکہ : جلال جان ،ایسا ، راھمین ، مراد ، میرل، نواز جان ، پیروک جان ءِ پجار ءَ زانگ بنت، راجی بامردانی ھوناں زاناں ماتیں زمین سیرآپ نہ بوتگ اَت ، انگت ءَ ھون ءِ تنیگ اَت کَذاپی جان پنام بھار بلوچ انچُش پہ گل ءِ اوتاک ءَ روگ ءَ اِشتاپی اَت وھدیکہ وتی بُنجل ءَ رس ات ماھے نہ گْوَست ، ھال رس اِت، بامردیں کَذاپی جان پنام بھار بلوچ پہ وتن سالونک بوتگ۔

من کَذاپی جان پنام بھار بلوچ ءَ سھرچکیں دروت ندر کناں ۔

آجوئی زندگ بات –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔