TBP Balochi

روکپتی بلوچستان ءَ ھلاس نہ بوگیں پاھواں بازیں کچے ءَ بندیگیں مردمانی ساہ گپتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ مزنیں جیل ءَ دو بندیگیں بلوچ پاھو دیگ بیتگ اَنت-

پاھو دیگ بیتگیں مردمانی پجار امان اللہ عالی زئی ء مھمد ھسین جھمنند زاھدان ءُ نعمت اللہ براھوئی ءِ ناماں زانگ بیتگ اَنت-

ھالانی تہ ءَ گوشگ بیتگ کہ امان اللہ ایرانی سال نود ءُ نُھ ءَ نشہ ءِ باپاری ءِ بھتام ءَ گرگ بیتگ ءُ آ زاھدان ءِ زندان ءَ پاھو دیگ بیتگ-

ھالانی تہ ءَ گوشگ بیتگ کہ زندانی واکداراں امان اللہ ءِ کھول آئی ءِ پاھو ءِ بارو ءَ سرپدی داتگ اَنت-

ھالانی تہ ءَ گوشگ بیتگ کہ امان اللہ ءِ پاھو ءَ پد آئی ءِ کھول سرپد کنگ بیتگ کہ شمئے مردم ءِ لاش ما زاندان ءِ سرت ھانہ ءَ اِیر انت ءُ آ شتگ انت گڑا آئی ءِ گٹ ءَ پاھو ءِ ساد بوتگ –

دگہ یک ھالے ءِ رد ءَ ایرانی آمیدگس ءِ پرمان ءَ پانزدہ بندیگیں بلوچ ھم پاھو دیگ بیتگ اَنت-

ھالانی تہ ءَ گوشگ بیتگ کہ اے پانزدھیں مردمانی ھال ایرانی پاھو دیوکیں واکداراں چیر داتگ ءُ کس سرپد نہ کرتگ –

اے پانزدھیں پاھو دیگ بیتگیں مردمانی بارو ءَ وکیلاں زھرشانی کتگ ءُ گوشتگ کہ مارا پرچا ھال دیگ نہ بیتگ بلے جیل ءِ واکدارانی رد ءَ اے مردمانی پاھو نامہ چہ تھران ءَ بیتگ ءُ چریشی ءَ چہ آ پاھو دیگ بیتگ اَنت-

سال دوھزار ءُ بیست ءُ یک ءَ داں انیگیگ ءَ پنجاہ مردم پاھو دیگ بیتگ کہ جتا جتائیں جرمانی پژدر ءَ آیانی سر ءَ بھتام بیتگ اَنت-

دبئی ءَ دنیا ءَ مستریں ماڑی برج خلیفہ ءِ نزیک ءَ سی ءُ پنچ منزلہ ماڑی ءَ ناگتی دوشمبے ءِ سھب ءَ آس چست بیتگ-

ھبر رساں ایجنسی ایسوسی اینڈ پریس ءِ رد ءَ داں انگت ءَ اے سرپدی نہ بیتگ کہ اپارٹمنٹ ءَ کپتگیں آس ءَ چہ کسے زدگ بیتگ یا ناں، بلے برانز گپتگیں آس توسگ بیتگ-

چست بیتگیں سیاھیں دوت ماڑی ءَ برز چست بیتگ ءُ گندگ بیتگ اَنت کہ امارات ءِ ریاستی پلامرزی ڈویلپر ’ایمار‘ ءِ ھشت بلیوارڈ واک نامی ٹاورزے ءِ یک بھرے ءَ آس لگ اتگ-

دبئی ءِ پولیس ءُ سول ڈیفنس ءَ سرجمی ءَ آس توسینتگ ءُ سرجمی ءُ ھلاس کرتگ بلے ایمار ءَ سرجمی ءَ گپ نہ جتگ اَنت ءُ سرجمیں ھال ھم نہ گشتگ اَنت-

گوستگیں سالاں دبئی ءَ برزیں ماڑیاں کپتگیں آساں ڈیھ ءَ کارمرد بیتگیں کلیڈنگ ءُ دگہ موادانی پھریزگ ءَ ایراد گرگ بیگ ءَ اِنت –

زانگ بہ بیت سال دوھزار ءُ پانزدہ ءِ بندات ءَ برج خلیفہ ءِ نزیک ءَ دبئی ءِ مستر ءُ نامی ئیں ھوٹل ءُ منندی جاھاں یک ایڈریس ڈاون ٹاونے ءَ آس کپتگ اَت-

روکپتی بلوچستان ءَ دو ماھانی تہ ءَ ورنایانی آوار جنیانی تہ ءَ گیشی یے گندگ بیتگ –

سر بیتگیں ھالانی رد ءَ روکپتی بلوچستان ءِ دمگ میرجاوہ ءَ ایرانی لشکر ءَ مسکونی میتگ ءَ بیڑ برتگ ءُ اود ءَ دو برات آوار جتگ ءُ برتگ اَنت-

ھالانی تہ ءَ گوشگ بیتگ میروجاہ ءَ راشد ریگی ءُ آئی ءِ برات آوار جتگ ءُ برتگ اَنت-

ھمے وڑ ءَ سراوان آسپیچ ءَ ھم ایرانی لشکر ءَ چار مردم آوار جتگ ءُ برتگ اَنت-

ھالانی تہ ءَ گوشگ بیتگ کہ آسپیچ ءَ پت ءُ زھگ ءَ ھوار چار مردم آوار جنگ ءُ بیگواہ کنگ بیتگ اَنت-

آوار جنگ بیتگیں مردمانی پجار مھدی ء صادق، صادق ء حاجی محمد، مھمد ء حمید ءُ متین ء موسیٰ جھنند آسپیچ سراوان ءِ ناماں زانگ بیتگ اَنت-

ھالانی تہ ءَ گوشگ بیتگ کہ متین دو ھپتگ ءَ پیسر ھم آوار جنگ بیتگ ءُ پد ءَ یل کنگ بیتگ ءُ مروچی دوبر آوار جنگ ءُ بیگواہ بیتگ-

ھمے وڑ ءَ مروچی سراوان بھمن بلوچ ءِ لوگ ءِ سر ءَ ایرانی بیڑ برتگ ءُ لوگ ءِ مردم ترسینتگ اَنت-

ھالانی تہ ءَ گوشگ بیتگ بھمن بلوچ یک سیاسی باسکے ءُ چریشی ءِ سر ءَ آئی ءِ لوگ ءَ بیڑ برگ بیتگ ءُ لوگ مردم ترسینگ بیتگ اَنت –

روکپتی بلوچستان مردمانی آوار تہ ءَ گیشی گندگ اتکگ ءُ چریشی ءِ سر ءَ بازیں کچے ءَ مردم بیگواہ کنگ بیتگ اَنت-

سربوتگیں ھالانی رِد ءَ گوستگیں شپ ءَ بلوچستان ءِ دمگ کیچ ءَ ناشناسیں سلاہ بندیں مردماں پاکستانی پوج ءِ سر ءَ اُرش کتگ –

اُرش کیچ ءِ دمگ ھوشاپ ءَ پاکستانی پوج ءِ پانگسے ءِ سر ءَ کنگ بوتگ چریشی ءَ پاکستانی پوج ءَ جانی ءُ مالی تاوان گمان انت، اُرشکار در آھگ ءُ روگ ءَ سوبمند بوتگ انت –

دومی نیمگ ءَ بلوچ سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ –

جارکش ءَ وتی درشان ءِ تہ ءَ گوشتگ کہ بی ایل اے ءِ سرمچاراں گوستگیں شپ ءَ کیچ ءِ دمگ ھوشاپ ءَ زورگیریں پاکستانی پوج ءِ بنجاھی بنجل ءِ پھازگی پانگسے ءِ سر ءَ گرنیڈ لانچر ءِ سَے گولہ آس داتگ، اُرش ءَ زورگیریں پاکستانی پوج ءَ جانی ءُ مالی تاوان ءِ دیمپانی بوتگ –

آئی ءَ گوشتگ کہ اُرش ءِ زمہ واری ءَ بلوچ لبریشن آرمی منّیت –

بلوچستان لبریشن فرنٹ ءِ سروک ءَ آجوئی لوٹوکیں رھشون ڈاکٹر اللہ نذر بلوچ ءَ گوشتگ کہ پاکستانی پوج لس مھلوک ءَ نشانگ کنگ ءُ جنگی کانودانی بگیری ءَ کنگ ءَ انت –

اے گپ آئی ءَ چاگردی ترامجاہ ٹوئٹر ءَ تہ ءَ گوستگیں روچ ءَ وتی ٹویٹ ءِ تہ ءَ گوشتگ انت –

ڈاکٹر اللہ نذر بلوچ ءِ گوشگ ات آجوئی ھر ھمک مردم یا راجے ءِ بنکی ھک انت ءُ بلوچ وتی آجوئی ءِ ھاتر ءَ جھد کنگ ءَ انت بلے پاکستانی پوج نچارگ انت کہ جنین ءِ یا مردین یا اُمر چنکس انت، بلوچ کنگ ءُ بیگواہ کنگ انت جنگی کانوداں لگتمال کنگ ءَ انت –

بلوچ رھشون ءِ گوشگ ات کہ دست گوشیں لس مردماں کہ آھانی تہ ءَ زھگ ءُ زالبول ھم ھوار اَنت، درساں پاکستانی پوج ءُ ریاست ناھک ءَ نشانگ کنگ ءُ جنگی رھبندانی لگتمالی ءَ کنگ ءَ انت – ریاستی پوج ءِ نیمگ ءَ چہ بلوچستان ءِ تْیاب دپی دمگاں بگر تاں بولان ءَ بازیں بازار ءُ کوچگ لڈین اتگ انت –

بلوچ رھشون ءَ اقوام متحدہ ءِ کارگشاد ءَ لوٹ کُتگ ءُ گوشتگ کہ بلوچستان ءِ راستی ءِ زانگ ءَ اقوام متحدہ مردماں دیم بہ دنت بلوچستان ءِ ھنیگیں جاور ھال چہ بالکن ریاست ءُ روانڈا جتا نہ اِنت، مرچی بلوچستان انسان نیستی ءِ دیمپانی ءَ کنگ ءَ اِنت-

ڈاکٹر اللہ نذر بلوچ ءَ گوشتگ کہ اقوام متحدہ بایدیں پاکستانی پوج ءِ بگیری ءَ گامگیج بہ زوریت ءُ آئی ءَ جنگی کانودانی لگتمالی ءُ در انسانی کتکاریانی کنگے پسو ءَ بہ لوٹیت –

ھمے وڈ بلوچ راجدوستیں رھشون قادر مری ءَ وتی درشان ءِ تہ ءَ گوشتگ کہ بلوچ زالبول ءُ تپلیں زھگانی آوار جنگ میان استمانی انسانی ھکانی بگیری دارگ انت کہ اشی ءَ ما ترندی ءَ گوں ایر جن ایں –

آئی ءَ گوشتگ کہ زالبولانی پھازوکیں میان استمانی گلاں گوں لوٹ کن ایں کہ آ بلوچستان ءَ لشکر کشی ءِ میان ءَ آوار جنگ بوتگیں بلوچ زالبولانی یل کنائینگ ءَ وتی کرد ءَ پیلو بہ کن انت –

قادر مری ءَ گوشتگ کہ ھما درسیں ڈیھ کہ پاکستانی پوج ءَ مالی کمک کنگ انت آ وتی اے کمک کنگ ءَ چمشانک ءِ بدئینت پرچا کہ پاکستانی پوج ھمے کمکاں تچکی ءَ بلوچستان ءَ بلوچ ءِ چکچینی ءِ ھاتر ءَ کارمرز کنگ ءَ انت –

دومی نیمگ ءَ بولان ءَ برجاھیں لشکر کشی ءُ بلوچ زالبولانی آوار جنی ءِ بگیری ءَ وائس فار بلوچ مسنگ پرسنز ءُ بلوچ یکجھتی کمیٹی کراچی ءِ نیمگ ءَ کراچی ءُ شال ءَ زھرشانی کنگے جار پرینگ بوتگ –

وی بی ایم پی ءُ بی وائی سی کراچی ءَ رسانکدراں وتی شنگ کرتگیں درشانانی تہ ءَ گوشتگ کہ بولان ءَ برجاھیں لشکر کشی ءُ زوراکی، بازیں زھگ ءُ زالبولانی آوار جنی ءُ وھدیکہ کراچی ءَ بلوچ نودربر دلشاد بلوچ ءِ سر ءَ دروگیں ارزی، بلوچستان ءَ پوجی زوراکیاں چہ وتکشی کنگے وئیلانی بگیری ءَ ھشت نومبر ءِ بیگاھے سَے ءَ کراچی پریس کلب ءِ دیم ءَ یکجاھیں زھرشانی کنگ بیت اِنت –

آھاں کراچی ءَ نندوکیں ھرتک ءُ پھناتاں سیادی داروکیں مردم، راجدار، چاگردی ءُ انسانی ھکانی باسکاں چہ لوٹ کتگ کہ زھرشانی ءَ بھر بہ زور انت –

کیچ ءِ بنجاھی شھر تربت ءَ مروچی یکشمبے ءِ روچ ءَ سھب ءِ ادار یانزدہ ءَ ما‍ں بلوچستان اکیڈمی آف لٹیریچر اینڈ رسرچ تربت ءَ ماھی لبزانکی دیوان برجم دارگ بوت۔ دیوان ءِ جارچین بلوچستان اکیڈمی ءِ جنرل سکریٹری شگراللہ یوسف بوتگ ءُ دیوان ءِ گچینی مھمان واجہ غنی پرواز ات – مروچیگیں دیوان دو بھر ءَ بزاں شائری ءُ نبشتانک ءِ بوتگ کہ اود ءَ نوکباھندیں شائر ءُ نبشتانکاراں ھم وتی ھیال درشان اِتگ –

مروچیگیں دیوان ءَ یوسف گچکی، عبید شاد، جمال منظور ءُ گلاب مرزا، صغیر ، بیبرگ ءُ جمال پیر محمد ساڈی بوتگ انت –

دیوان ءِ نبشتانکی بھر ءَ مقبول ناصر ءَ ارنسٹ ہمنگوے ءِ ساچشتکاری ءِ سرا نبشتانکے ونت ءُ آئی ءِ سر ءَ وتی ھیال دراْنگاز کت انت کہ نبشتہ کار چوں ساچشت ءِ ازم ءَ دربارت واجہ غنی پرواز ءَ لبزانک ءُ علم ءِ سرا تْران کت ءُ اشی ءَ پد شیرجان مرزا ءَ وتی آزمانک “دیم ءِ رد ھونیں انت” ونت –

دیوان ءِ دومی بھرشائری ءِ تہ ءَ منور علی رٹہ، محسن بالاچ، پیرداد فراز ،بلال آجز، نورخاں نور،فراز مومن، عبداللہ دشتی، عمراں حاصل، نبی بخش لال،قمبر غفور،پیرداد فراز، منصور راز وتی شائری ءِ ونت انت ءُ سلام کریاب ءَ ھُدامرزی گلام حسین شوہاز ءِ شعرے ماں انگریزی ءَ ونت –

گڈسر ءَ دیوان ءِ ھلاسی ءِ جار جنگ بوتگ ءُ دیوان ءَ اتکگیں مردمانی منت گرگ بوت –

بلوچستان ءِ بُنجاھی شھر شال پریس کلب ءِ دیم ءَ وائس فار بلوچ مسنگ پرسنز ءِ زورانسری آوار جنی ءِ بگیری ءَ زھرشانی ئیں بُنجل ءَ مروچی 4812 روچ سرجم بیتگ-

مروچی بلوچ وومن فورم ءِ بُنجاھی راھشون سلطانہ بلوچ، شاہ بی بی بلوچ ءُ دگہ بُنجل ءَ اَتکگ ءُ درشان کتگ-

گل ءِ وائس چیئرمین ماما قدیر بلوچ ءَ گْوشتگ کہ پوج بے میاریں بلوچاں زورانسری آوار جنگ ءَ پد آزارجاھاں ازیت دے اَنت شھید کن اَنت ءُ دور اِش دے اَنت، زورگریں تاکت بے ھد ھونوار جوڑ بوگ ءَ اَنت آ بلوچ راج ءَ ھلاس کنگ ءِ ھاتر ءَ زمین ءِ زورگری ءِ ھاتر ءَ کُشتکشار کنگ ءَ اِنت-

آئی ءَ گْوشتگ کہ گوستگیں ھپتاد دو سالاں بگر تاں مروچی پاکستانی پوج بلوچ ورناہ، مات ، گْوھار ءُ کماشاں بے دردی ءَ جنگ ءَ اِنت-

ماما قدیر بلوچ ءَ گْوشتگ کہ گوستگیں یک ھپتگے ءَ چہ بولان ءَ بدتریں ھونریچی لشکر کشی بوگ ءَ اَنت – بازیں مردمانی شھیدی ءِ ھال اِنت ءُ ھمے وڑ زالبول ءُ شیرواریں چُک انگت پاکستانی پوج ءِ بندیگ ءَ اَنت-

پاکستان ءِ اُستان سندھ ءُ پنجاب ءِ سیمسری دمگ گھوٹکی ءَ پولیس ءُ سلاہ بندین مردمانی میان ءَ جنگ ءُ چوپ ءَ 3 آفیسر ءَ ھوار 5 کارندہ کشگ بیتگ اَنت-

پولیس ءِ رد ءَ گھوٹکی ءَ پولیس ءَ دزانی ھلاپ ءَ بیڑ برتگ ءُ چریشی ءَ دو نیمگی تیرگواری ءَ ڈی ایس پی اوباڑو ےُ دو ایس ایچ او ءُ ھوار پنچ کارندہ کشگ بیتگ اَنت-

یکشمبے ءِ روچ ءَ ڈی آئی جی پولیس جاوید جسکانی ءَ گوشتگ کہ ھپت روچ ءَ پیسر اوباڑو ءَ رونتی دگ ءَ آوار جنگ بیتگیں سَے مردمانی یل کنائینگ ءَ شپ ءَ پولیس ءَ رونتی دمگ کچے ءَ بیڑ برتگ –

آئی ءَ گوشتگ کہ دزانی مزنیں کچے ءُ پولیس ءِ آفیسر ءُ کارندھانی سر ءَ اُرش کرتگ-

چریشی ءَ چہ ڈی ایس پی اوباڑو عبدالمالک بھٹو، ایس ایچ او کھینجو دین مھمد لگاری، ایس ایچ او میر پور ماتھیلو عبدالمالک کمنگر ءِ چیردستی ءَ دزانی دمگ ءَ جاڑیگ بیتگ اَنت گڑا دزاں یک مزنیں کچے ءَ آیانی سر ءَ اُرش کرتگ-

آئی ءَ گوشتگ کہ اے اُرش ءَ ایس ایچ او رونتی ءَ ھوار بازیں پولیس ءِ کارمند زدگ بیتگ اَنت ءُ زدگ بیتگیں پولیس کارندہ اوباڑو نادراہ جاہ ءَ برگ ءَ پد سکھر ءَ برتگ اَنت-

ڈی آئی جی پولیس جاوید جسکانی ءِ رد ءَ کچے ءَ پولیس ءِ گیشیں سپاھی ءِ لوٹ کرتگ ءُ پولیس ءِ سر ءَ اُرش کنوک ھچ وڑ ءَ یل کنگ نہ بنت-

روکپتی بلوچستان ءِ دمگ سرباز ءَ سلاہ بندیں مردماں تیرگواری کرتگ ءُ یک ورنایے کشتگ –

سر بیتگیں ھالانی رد ءَ روکپتی بلوچستان ءِ دمگ سرباز ءَ سلاہ بندین مردمانی تیرگواری ءَ یک ورنایے بیران بیتگ-

بیران بیتگیں مردم ءِ ورنا ءِ پجار اویس شکرزئی جھمنند کوھمیتگ ءِ نام ءَ زانگ بیتگ-

ھالانی تہ ءَ گوشگ بیتگ کہ اویس یک مساپر برین گاڑی ءَ سوار بیتگ ءُ روگ ءَ بیتگ ءُ اویس یک نودربرے بیتگ-

ھالانی تہ ءَ گوشگ بیتگ کہ سلاہ بندیں مردماں اویس ءں رندگیری کرتگ ءُ چریشی ءِ سر ءَ آئی ءَ را ھما وھد ءَ نشانگ اش کرتگ کہ آئی ءَ شیشگ ءَ سر کش اتگ ءُ رندگیر کرتگیں گاڑی چار اتگ –

ھمے وڑ ءَ بمپور ءَ پولیس چوکی ءَ یک پولیس کارمندے ءَ دومی کارندھانی سر ءَ تیرگواری کرتگ ءُ چار کارندہ کشتگ اَنت-

اے وئیل ءِ ھال پولیس ءِ سروک علی رضا صیاد ءَ راست کرتگ ءُ گوشتگ کہ یک کارندھے ءِ ناگتی تیرگواری ءَ چار کارندہ جنگ بیتگ اَنت بلے اے درگت ءَ آئی ءَ دگہ گیشیں گپ دیم ءَ نیاورتگ اَنت-