TBP Balochi

برطانوی روتاک سنڈے ٹائمز ءُ گیر سرکاری گل بیورو آف انویسٹی گیٹو جرنلزم ءِ پٹ ءُ پولی رپورٹ ءِ رد ءَ ھندوستانی ھیکرزانی یک ٹولی ءَ پاکستانی سیاستدان، لشکری اگدودار ءُ سپارتکارانی زاتی ای میلز ءُ گپ ءُ ترانی گوشدارگی کتگ-

رپورٹ ءِ رد ءَ ھیکرز ءَ ھندوستان ءِ چیریں ادارھانی گوشگ ءِ پد ءَ درجنانء ھائی پروپائل پاکستانی اگدودارانی ای میلز نشانگ جوڑ کرتگ اَنت-

پٹ ءُ پولی رپورٹ ءِ رد ءَ زرکاری پرکاریانی بنجل، دی سٹی آف لندن ءَ ھواریں پٹ ءُ پولکاراں ھندوستان ءَ سیادی داروکیں کمپیوٹر ھیکرز ءِ یک ٹولی ءَ برطانوی ءِ کار ءُ باری مردن، سرکاری اگدودار ءُ اھوالکارانی واستا چاریگری ءَ کارمرد کرتگ-

روتاک سنڈے ٹائمز ءُ گیر سرکاری گل بیورو آف انویسٹی گیٹو جرنلزم ءَ ھندوستانی ھیکرزانی اے ٹولی ءِ ڈیٹا بیس ءَ داں روگ ءَ سوبمندی بیتگ ءُ چریشی ءَ پدر بیتگ آ یک کسانیں سائبر اُرشے –

ڈیٹا بیس ءَ سرپدی بیتگ کہ ھیکرز ءَ پوجی سرکار، برطانوی وکیل ءُ آئی ءِ زرداریں مھلوک ءِ سر ءُ مانسری یک سد ءَ گیش ای میلز نشانگ کتگ اَنت-

رپورٹ ءِ رد ءَ ھیکرز ءَ ھندوستان ءِ چیریں ادارھانی گوشگ ءِ پد ءَ پاکستانی سیاستدان، جرنیل، سپارتکارانی کمپیوٹرز ھیک کتگ انت ءُ آیانی زاتی گپ ءُ تران گوشداشتگ انت –

روکپتی بلوچستان ءِ دمگ بیرجند ءُ ھاش ءَ ایرانی لشکر ءِ دست ءَ چار کس آوار جنگ ءَ پد بیگواہ –

گیشیں ھالانی رد ءَ روکپتی بلوچستان ءِ دمگ بیرجند ءَ ایرانی چیریں ادارھاں فزیکل ایجوکیشن ءِ نودربر مھمد منیب احمدی مقدم دزگیر کنگ ءَ پد بیگواہ کرتگ –

ھالانی تہ ءَ گوشگ بیتگ کہ مھمد منیب آئی آر جی سی ءِ پٹ ءُ پولی آفیسر ” صیاد ” ءِ پرمان ءَ گرگ بیتگ –

ھمے وڑ ءَ ھاش ءَ آدینگ ءِ روچ ءَ سَے کس دزگیر کنگ ءَ پد بیگواہ کنگ بیتگ اَنت-

ھاش ءَ آوار جنگ بیتگیں مردمانی پجار علی خاشی جمالزئی ء الھداد، اسماعیل شھنوازی ء چاکر ءُ معین ریگی ء نادر ءِ ناماں زانگ بیتگ اَنت –

اے ھرسئیں مردم گوستگیں آدینگ ءِ روچ ءَ ھما وھد ءَ گرگ بیتگ اَنت کہ زھرشانی ءَ ھوار بیتگ اَنت-

زانگ بہ بیت روکپتی بلوچستان ءَ ورنایانی ھلاپ ءَ ایرانی لشکر پرکاری اَنت ءُ چریشی ءَ چہ بازیں ورنایے گرگ ءُ بیگواہ کنگ بیتگ اَنت-

ھمے وڑ ءَ مروچی ھاش ءَ ھم گیشی پوجی کارمند سر بیتگ اَنت ءُ دمگ ءَ بازیں سلاہ ءُ گاڑیاں سر بیتگ اَنت-

سلاہ بندیں مردماں سَے ورنا توپک ءِ زور ءَ آوار جتگ ءُ گوں وت برتگ انت-

ھالانی رِد ءَ بلوچستان دمگ کیچ شھرک ءَ دو گاڑیاں سواریں سلاہ بندیں مردماں توپک ءِ زور ءَ سَے ورنا مغل ء محمد جھمنند شھرک، امید ء چار شمبے ءُ رستم ء نظر جھمنند بالگتر آوار جتگ ءُ گوں وت برتگ انت –

چم دیستیں گواھانی رِد ءَ آوار جنوک سلاہ بند بوتگ انت وھدیکہ آوار جنوکاں سرکاری نمبر پلیٹ ءِ گاڑی گون بوتگ انت، بلے تنی وھدی سرجمیں ھال نہ اتکگ انت ءُ اے درگت ءَ گیشیں پٹ پول برجاہ انت –

زانگ بہ بیت بلوچستان ءَ زورانسری آوار جنیانی درچ یکشل ءَ برجاہ انت، اے آوار جنیانی درگت ءَ بلوچستان ءِ راجداریں گل ءُ انسانی ھکانی گل ھمے گوشگ انت کہ اے وڈیں وئیلاں پاکستان ءِ آرمی، ایف سی، سی ٹی ڈی ءُ چیریں ادارھانی دست مان انت –

بازیں وھدے بیت کہ بلوچستان ءَ زورانسری آوار جنیانی بگیری ءَ زھرشانی برجاہ انت – بلوچستان ءِ راجداریں گل ءُ ھمے لوٹ ءَ کنگ ءَ انت کہ بلوچستان ءَ زورانسری آوار جنی ءِ درچ ھلاس کنگ بہ بیت ءُ آوار جنگ بوتگیں مردم زاھر کنگ بہ بنت –

سربوتگیں ھالانی رِد ءَ دوشی آدینگ ءِ شپ ءَ بلوچستان ءِ دمگ پسنی ءَ جنکانی وانگجاہ ماندارگ بوتگ –

گیشیں ھالانی رِد ءَ پسنی ءِ دمگ ریک پشت وڈسر ءِ جنکانی وانگجاہ ناشناسیں مردماں مانداشتگ ءُ پُر کتگ – وئیل ءِ درگت ءَ گیشی سرپدی نہ رستگ بلے دمگی مردماں چہ واکداراں لوٹ کتگ کہ وئیل ءِ درگت ءَ گامگیج زورگ بہ بیت ءُ جنکانی وانگ جاہ دوبر شر کنگ بہ بیت –

پسنی ریک پشت ءِ مردمانی گوشگ انت کہ اے اولی رند نہ انت وانگجاہ ماندارگ بوگ انت بازین سال ءِ بیت کہ بلوچستان ءَ اے درچ برجاہ انت –

زانگ بہ بیت لھتے روچ ساری ھم ناشناسیں مردماں بلوچستان ءِ دمگ بلیدہ الندور ءَ یکیں پرائیوٹ وانگجاہ کلکشان مانداشتگ ات – ھمے سال ءَ بلوچستان ءَ بازیں وانگجاھے ماندارگ بوتگ –

ھمے سال ءَ الندور ءِ سرکاری وانگجاھے ءِ لھتے کوٹی ماندارگ بوتگ اتنت ءُ گلی بلیدہ ءَ ساچ وانگجاہ ھم ماندارگ بوتگ ات وھدیکہ گوست ءَ پنجگور ءُ کیچ ءَ پرائیوٹ وانگجاھانی سر ءَ اُرش ءُ ماندارگے وئیل بوتگ انت –

گوست ءَ پنجگور ءِ پرائیوٹ وانگجاھاں “الفرقان اسلامی ” نامیں گلے ءِ نام ءَ بیھار دیگ بوتگ کہ مات پت وتی زھگاں سرکاری وانگجاھاں بہ وانین انت –

دمگی مردمانی وئیل ایرجتگ ءُ گوشتگ کہ واکدارانی بے سوبی ءِ سوب ءَ سلاہ بندیں ٹولی مھکم بوگ ءَ انت ءُ ایف سی کتکاریں مردماں کارمرز کنگ ءَ انت تانکہ ترس برجاہ بہ بیت –

آھاں چہ دمگی واکداراں اے لوٹ ھم کتگ کہ وئیل ءَ ھواریں کتکار دزگیرطکنگ بہ بنت –

روکپتی بلوچستان ءِ دمگ ھاش ءَ گوستگیں روچ ءَ زھرشانی روانک ءِ سر ءَ تیرگواری ءِ ھلاپ ءَ ھرتال کنگ بیتگ-

گیشیں ھالانی رد ءَ روکپتی بلوچستان ءِ دمگ ھاش ءَ گوستگیں روچ ءَ زھرشانی روانک ءَ ایرانی لشکر ءِ تیرگواری ءِ ھلاپ ءَ مروچی ھاش ءِ شھر ءَ دربندیں ھرتال کنگ بیتگ-

ھرتال ءِ سبب ءَ شھر ءِ دکان بند بیتگ ءُ دگانی سر ءَ روانی نابروری ءِ ھساب ءَ بیتگ –

زانگ بہ بیت گوستگیں روچ ءَ آدینگ ءِ نماز ءَ پد زاھدان ءِ وئیل ءَ کشگ بیتگیں روانک ءَ سر ءَ ایرانی لشکر ءَ تیرگواری کرتگ ات –

چرے تیرگواری ءَ بازیں کچے ءَ مردم بیران ءُ زدگ بیتگ ات اَنت ءُ تامر بنداں گندگ بیت اِنت کہ اود ءَ مھلوک ءِ سر ءَ ایرانی لشکر تیرگواری کنگ ءَ اِنت-

ترامجاھاں شنگ بیتگیں تامراں اے ھم گندگ بیت اِنت کہ زدگ بیتگیں مردماں زھرشانی روانک ءَ ھواریں مردم نادراہ جاہ ءَ سر کنگ ءَ اَنت-

چریشی ءَ پد زھرشانی گیش بیتگ ءُ سرکاری بینکے ءَ ھوار دگہ کارجاہ سوچگ بیتگ اَنت ءُ مروچی ھم شھر ءَ ھرتال ءُ روانی نابروری ءِ ھساب ءَ گندگ ءَ اتکگ –

سر بیتگیں ھالانی رد ءَ ھاش ءَ ناشناسیں مردماں انکلاب پاسدارنِ سپاہ ءِ یک کارمندے کشتگ –

گیشیں ھالانی رد ءَ روکپتی بلوچستان ءِ دمگ ھاش ءَ ناشناسیں مردماں سپاہ ءِ یک کارمندے کشتگ-

کشگ بیتگیں کارمند ءِ پجار مصطفیٰ غلامیان ءِ نام ءَ زانگ بیتگ کہ آ ناشناسیں مردماں نشانگ کتگ ءُ کشتگ-

زانگ بہ بیت روکپتی بلوچستان ءَ گوستگیں دو یک ماھے ءَ گیش اِنت بنا بیتگیں شورش ءَ ایرانی سکیورٹی پورسز ءِ سر ءَ اُرش بوگ ءَ اَنت بلے اے اُرشانی زمہ واریاں کس پہ وت ءَ منگ ءَ نہ اِنت –

دومی نیمگ ءَ اے گپ گوشگ بوگ ءَ اِنت کہ خامنہ ای سرکار ءِ ھلاپ ءَ چست برانز ءَ پد اود ءَ لس مردم اے کاروائیاں سرجم کنگ ءَ اَنت-

گوستگیں سر وزیر پاکستان عمران خان ءِ سر ءَ تیرگواری ءِ ھلاپ ءَ زھرشانی کنوکیں پی ٹی آئی ءِ باسکانی ھلاپ ءَ اسلام آباد پولیس ءَ ارزی نبشتہ کرتگ-

اردو نیوز ءِ رد ءُ آدینگ ءِ روچ ءَ پاکستان تھریک انساپ ءِ گوشگ ءِ پد ءَ سرجمیں ڈیھ ءَ زھرشانی کنگ بیتگ اے میاں پولیس ءُ زھرشانی کنوکانی میان ءَ جنگ ءُ چوپ ھم بیتگ اَنت-

راولپنڈی ءُ اسلام آباد ءَ سنگم فیض آباد ءَ پولیس ءُ زھرشانی کنوکانی میان ءَ جنگ ءُ چوپ بیتگ اَنت-

اسلام آباد پولیس ءِ چیردستی ءَ بیست ءُ چار جرمکارانی سر ءَ تھانہ آئی نائن ءَ ارزی نامہ نبشتگ کنگ بیتگ اشانی توک ءَ علی احمد اعوان ءُ عامر محمود کیانی ءُ واصف قیوم ءَ ھوار چوھدری شعیب ءِ نام ھوار اَنت-

اردو نیوز ءِ رد ءَ نبشتگیں ارزی ءَ جرمکارانی سر ءَ پولیس ءِ ارش سرکاری جاھانی تاوان دیگ، جرمکاراں پولیس ءُ ایف سی ءِ کارمند لٹ ءُ کٹ کتگ ءُ سنگ جنگی ءُ کارمند زدگ کتگ اَنت-

پاکستان تھریک انساپ ءَ اشانی ھلاپ ءَ مروچی بیگاہ ءَ زھرشانی کنگ ءِ جار ھم جتگ –

نبشتانک :نمدی ءِ تئی نام ءَ تئی گلگ سر ءُ چماں

نبشتہ کار: ناکو جنجال بلوچ

دی بلوچستان پوسٹ

دروت ءُ درھبات ئے دیدگیں نواز پنام ءِ گلاب جان، اے دمان ءَ من جیڑگ ءَ آں کہ نمدی ءَ چہ کجا بندات بہ کن آں ! باریں ترا باور بیت یا نہ بیت؟ پرچاکہ اے دمان ءَ تو مئے درنیام ءَ ساڑی نہ ئے بلے اِنچو من سدک آں کہ پشت کپتگیں سنگتاں منی نمدی سر بیت اِنت ۔ چوناھا من ءَ کردے جند نیست اے بابت ءَ تو یا سنگت گیشتر سرپد اِت ، پمیشکا وتی بابت ءَ من ھچ نہ گُش آں دیدگیں گلاب جان، پیسر ءَ تو منی واب ءَ آتکگ ئے من ھمے سرپد بیتگ آں بلکیں اے منی وھم ءُ گمان اِنت یا ھمے سبب اِنت کہ ھر وھد ءَ من ترا یات کن آں پمیشکا تو منی واب ءَ کائے یا بکول ء ملاھانی ءَ شیتان اِنت، بلے دوشی کہ تو منی واب ءَ آتک ئے گڑا من سدک بیت آں چوناھا تئی گلگ سر ءُ چماں ءُ تئی گلگ برھک اِنت بلے راستی ءَ تو سرپد نہ ئے کہ اَچ تو رند پرچا من تئی تپنگ چِست نہ کت ؟ ھما شپ ءَ کہ تو گوں دشمن ءَ جنگ دیان ءَ شھید بوت ئے! چہ شھیدی ءَ پیسر تو دراھیں راج ءَ را کلوہ دات ءُ ھمے کلوہ ءِ تھا تو منی نام گپتگ اَت ءُ چیزے ھمانت ءُ چیزے سوگات پمن سنگت ءِ کر ءَ ھمانت کتگ اَت وتی پیسبک آئی ڈی ھما سنگت ءَ را داتگ اَت ءُ منی پیسبک آئی ڈی گوشتگ اَت ۔ آئی لکھ منت کہ تئی گران بھائیں سلامے من ءَ سر کُت اَنت ءُ اے ھالے ھم من ءَ دات کہ توئے گلاب جان من ءَ سلام کُتگ ءُ کپتگیں تپنگ ءِ چِست کنگ ئے سلاہ جتگ، تئی سوگات ءُ ھمانتانی ھال ھم دات ءُ ملاکات ئے گوشت ئِے بلے چیزے لاچاری ءِ سبب ءَ من شُت نہ کت ءُ آئی ءَ منی نیمگ ءَ آتک نہ کت! کہ اے وھد ءَ ھالات چہ اَد ءَ گیش ناساز اِت انت ۔

دومی تئی ھمے کلوہ کہ تو تواربند ءِ شکل ءَ دیم داتگ اَت، آ سنگت ءَ ھم منی سر ءَ دیم نہ دات کہ مرکز ءِ سنگت توار بند ءَ کاٹ ءُ کوٹ کنگ ءَ اَنت ھمے کلوہ کہ تئی نام ءَ اِنت ایشی ءَ جتا کن اَنت گڑا من پرتو دیمے دیاں بلے مرچی ءُ باندا کنگ ءَ رند من ءَ سر نہ بوت ۔ رند ءَ اے سنگت ھم چہ پیسبک ءِ دنیا ءَ گار بوت ءُ آ دگہ سنگت کہ گوں من ھال کنگ ءَ اِت انت آیاں ھم وتی ھال ءُ ایوال کَٹ کت راستے من لگور ءُ بزدلے آں پرچاکہ من تئی کپتگیں تپنگ یا آجوئی جھد ءِ تپنگ چِست نہ کت ۔ بلے ھدا شائد ءُ گواہ اِنت کہ من سر جھل نہ کتگ ءُ زمیر بھا نہ کتگ ءُ انگت ھم نہ کن آں ۔ گُڈی ءَ بس ھمے گوشگ لوٹ آں کہ تئی گلگ سر ءُ چماں ۔راستی ھمیش اِنت نوں اگاں منی واب ءَ کا ئے گوں تو دزبندی کن آں ، اے گلگ ءَ گوں من مکن اگاں ترا گلگے ھست گڑا وتی گلگ ءَ گمایاں بکن کہ میاری اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔