TBP Balochi

میان اُستمان ءِ جنرل سیکریٹری انتونیو گوتریس ءَ بیھار داتگ ءُ گوشتگ کہ وتی باپاری پھناتانی ست ءُ نپانی ھاتر ءَ دنز ءُ مُجیں مولمانی ودی تباھی یے –

ھال سر کنوکیں ادارہ اے ایف پی ءِ رد ءَ مونٹریال ءِ جنگلاں سبزواگیں دارو درمانانی درگت ءَ بیوکیں گپ ءُ تران ءِ یک مراگشے ءَ تران کنان ءَ انتونیوگوتریس ءَ یک مزنیں باپاری ادارھے ءِ سر ءَ ایراد گپتگ ءُ گوشتگ کہ وتی ست ءُ نپانی ھاتر ءَ درست کنگ اِنت چریشی ءَ چہ ابرم ءِ نیمگ ءَ سبزاوگیں درچک ایرمران اَنت-

آئی ءَ گوشتگ کہ مئے بے گر ءُ داری ءِ سبب ءَ زرکاری کنوکانی دیمروئی ءَ انسانیت شد ءِ کش ءَ آورتگ ءُ اوشتارینتگ –

پرتگال ءِ گوستگیں سروزیر انتونیوگوتریس سال دو ءُ ھبدہ ءَ میان اُستمان ءِ اگدو ءِ واک ءَ گرگ ءَ داں انگت ءَ مولمانی مٹ ءُ بدلی ءَ درچکانی پھریزگ ءَ یکشل ءَ کڈنی کنگ اِنت-

میان اُستمانی کانفرنس کوپ ءِ پانزدہ ءِ وھد ءَ آئی ءَ لھتے ھنچیں لیکہ درشان کتگ اَنت کہ آئی ءَ رستگیں پُل ءُ رسترانی درد دیم ءَ آورتگ اَنت-

اے نیاد ءِ بندات ءَ لھتے دمگی مردماں کینیڈین سروزیر جسٹن ٹروڈو ءِ تران ءِ توک ءَ اڑانک پیداگ کتگ-

جسٹن ٹروڈو ءَ دوبر تران بندات کنان ءَ گوشتگ کہ ھنچش شما گندگ ءَ ات کینڈا آجوئیں گپ ءِ لیکہ ءِ بنگپ ءَ گوں بندوک اِنت ما زھرشانی کنوکانی منت ءَ گریں وتی لیکھاں دیم ءَ بیار اَنت-

زانگ بہ بیت اے کانفرنس مولمی مٹیانی درگت ءَ بیوکیں بیست ءُ ھپت کوپ ءَ چہ جتا اِنت ھپت ءُ چہ نوزدہ دسمبر ءَ داں بیوکیں کانفرنس ءِ بھر زورگ ءَ کساس دو سد ڈیھانی نمائندگ یکجاہ بیتگ اَنت مولمانی گھتری ءِ واستا جد ءَ جھد کنگ ءَ اَنت –

اے وھد ءَ رستراجی دَہ لک کِسم ناگیگی ءِ آماچ اَنت ءُ یک کساسے زمین ءِ جاور ناگیگ بیتگ اَنت ترندی ءَ زمین ءِ سر ءَ سبزگین مرگ ءَ اَنت-

کیمیکلز،پلاسٹک ءُ برزی دنز ءُ مُجاں انسانیت ءِ زند یکدم ناوشین جاورانی دیمپان کتگ انتونیوگورتریس ءَ گوشتگ کہ ابرم ءِ داتگیں چیزاں یک گسڑے ءِ رنگ ءَ کارمرد کنگ ءَ ایں ءُ ما تچک ءَ وتکشی ءِ نیمگ ءَ روگ ءَ ایں-

نبشتانک :”ڈپریشن ڈائری” ءِ سر ءَ دوگپ

نبشتہ کار: اے آر داد

دی بلوچستان پوسٹ

من ءَ اے گپ کنگی نہ انت کہ چہ بلوچاں کے کے ءَ اردو ءَ نبشتگ۔ ایشی ءَ ھر کس زانت ءُ سرپد انت کہ بلوچ ءِ چُک بہ لوٹ ایت اردو جوْان نبشتہ کت کنت پیریناں ھر کس زانت نوکیں مردماں چہ کے بی فراقءُ زلپی ءِ ردانک نویسی مسالی انت۔

کے بی ءِ جْوانی ایش انت کہ آ وتی ردانک ءِ ترازگ ءُ نوک کنگ ءِ نیمون ءَ یل نہ کنت ہندی ھواریں آئی ءِ ردانک ءُ لچہ ءِ زبان، من ھمے سرپد باں پہ اردوزانتاں ھم جیڑھے بیت جیڑہ پمیشکا کہ آجھد کنت کہ اندر ءِ زبان ءَ رواج گپتگیں لبزانی میار مہ کنت۔

جاوید حیات ءِ ردانک نویسی ءِ تہ ءَ وش زیمری ءُ رنگین بیانی ءِ بھر گیشتر انت۔ زلپی ھم کوھنیں نویسوکے فیس بک ءِ زمانگ ءَ ساری من”توار” روتاک ءَ آئی ءِ چندیں چیز ونتگ ات۔ مفرس ءُ معربیں ردانک نویسے۔ھیر اگاں زندگی بوت اشانی ردانک نویسی ءِ سر ءَ ھم گپ جناں۔

منءَ مرچی عابد میرءِ”ڈپریش ڈائری”(منی دل ءَ ایشی ءِ نام “ڈپریشن کی ڈائری “بوتیں) ءِ سر ءَ گپ جنگی انت۔اے کتاب من دہ روچ ساری ونتگ ات ،دل ءَ لوٹ ات کہ ایشی ءِ سر ءَ کمیں نبشتگ بکناں بلے وار نہ رس اتگ ات۔

عیسی خان ءِ بک پوائنٹ ءَ چوشیں روچے نہ گوز ایت کہ من نہ رواں نوکیں کتابانی جست ءَ نہ کناں ھاں زاھد ھال کن نوکیں کجام کتاب اتکگ۔ اعظم نوکیں کتاب نہ اتکگ؟ اے ھم یک بیگاھے ات کہ من کتابانی دیم ءَ اوشتاتگ ات ءُ چارگ ءَ اتاں بلکیں جاوید حیات ءِ نوکیں کتاب ءُ زلپی ءِ باسکوپ ،ایر بہ بنت دوئیں گندگ نہ بوت انت عابد میر منی دیم ءَ ٹِلّ ات ءُ من ءَ گوشگ ءَ ات ،انی کہ تو صمد ھوٹل روئے ءُ نندے من ءَ بر گوں۔ گوشے نطشہ ءُ شوپن ھار ءِ کسہ بہ بیت۔

من ڈپریش ڈائری زرت من ھمے سرپد بیتگ اتاں کہ اے کرونا ءِ موسم ءِ کتابے بیت ھیر ڈپریشن ءُ کرونا دوریں چیز نہ انت صمد ھوٹل ءُ عابد میر دوئیں سریاب انت عابد میر بلوچانی تہ ءَ نامدار انت وانگ ھم باز بیت من وَ ھما بیگاہ ءَ داں اے دگہ سنگت بیاانت نیم ءَ داں ونت ءُ اے دگہ بھر پہ شپ ءَ ایر کت اے کتاب انچیں کتابے کہ مردم یک نیمگے ٹی وی چارگ ءَ بہ بیت ءُ دومی نیمگ ءَ کتاب ءَ وانان بکنت پرکے نہ کپ ایت۔بزاں اے انچیں کتابے کہ ھیال پیسر ءَ، ءُ لبز رند ءَ کاینت۔چوناھا ایشی ءَ نان فکشن ءِ تہ ءَ زند جاورھال ءِ ناسرجمیں کتابے گوشگ بیت اردو ھم انچوش انت کہ نوکیں وانوکے ءَ ھم بزانت بلد چارگ نہ کپ ایت اے کسہ ءِ تکنیک ءَ نویسگ بیتگ کسے اگاں عابد میر ءَ ھیال مہ کنت اشی ءَ گدارکے ءِ ھساب ءَ ھم ونت کنت منی جند ءَ ایشی ءَ گدارکے ءِ ھساب ءَ ونتگ۔

عابد میر ءَ تکنیک چو نیّرمسعود ءُ خالد جاوید ءِ پیم ءِ بندات ءَ کسے ءِ گپ ءُ گوشتنے آورتگ ءُ وتی گپ جتگ۔چہ کسہ ءَ پیش کسے ءِ شئیر ءُ گوشتنے ءِ دیگ ایوک رواجی رنگ ءَ نہ بیت بلکیں کسہ ءَ گوں سیالی یے بوگ ھژدری بیت خالد جاوید ءِ “نعمت خانہ”ءِ ھر درے ءِ بندات ءَ زرتگیں کسے ءِ شئیر ءُ گوشتن کسہ ءِ مانا ءُ پیشانی ءِ کار ءَ کنت ہمیشی ءِ سرپد بیگ ءَ گوں دیم ءِ بھر ءِ وانگ ءَ ارزانی بیت۔

چوناھا مادراہ نادراھیں بلے اے نادراھی اگاں ساچشت ءِ تہ ءَ نوکیں درشانی ءِ نیمونے بہ بیت گڑا جْوان انت۔ “نعمت خانہ”ءِ کسہءِ بندات کنگ ءَ چہ پیش ٹرلنگ ءِ اے گپ دیگ بوتگ (اگر فرائیڈ کا کہنا تھا کہ ہم سب بیمار ہیں تو میرا کہنا ہے کہ ہم سب غیر معیاری ہیں۔ ہماری کیا مجال کہ ہم کسی اچھی کتاب کو رَد کریں،دراصل وہ تو اچھی کتاب ہی ہوتی ہے جو ہمیں رد کرتی ہے)۔

عابد میر بلکیں گنوک بوتیں یا وت کشی بہ کتین ئے بلے چو کہ آ نویسگ زانت ساچشت ءَ چہ وشتریں گولی ءُ درمان دگہ چے بوت کنت اے دگہ مردم پمیشکا گولیانی سر ءَ بنت کہ گوں آیاں کلم نہ بیت کلم بلکیں ہر کسی گور ءَ بہ بیت بلے نویسگ ءِ درد گوں ھر کس ءَ نہ بیت دنیا ءِ مزنیں ندکار ءُ شاعر چہ گنوکی ءَ پمیشکا رّک اتگ انت کہ آیاں نویسگ زانتگ عابد میر ءِ اے کتاب کلاکے ءِ تہ ءَ وانگ بیت نہ دگہ جیڑھے پشت کپ ایت نہ دگہ وسواس ءُ گمے گدار اوں زند جاورالی درشانے ،ایوک ھمے تپاوت ءُ دگری ھست کہ اود ءَ کارستانی نام ءُ جاگہ ھک ءُ دلی نہ بنت کہ زند جاورھال ءِ تہ ءَ بنت نان فکشن ءِ تہ ءَ ھم گپ ءَ باز پِرکنگ ءُ کارست ءَ چو کسھانی بامرد ءَ پیش دارگ بیت۔ دروگ دوئیں جاگہ بیت ھو اے گپ ھست کہ فکشن ءِ تہ ءَ دروگ کسہ ءِ سپت ءُ ساڑا گوشگ بیت نان فکشن ءِ تہ ءَ ایوک سیائیں دروگ ءُ وت گلائی۔عابد میر ءَ بہ لوٹ اتیں کمیں رنگ ءُ روگن کنگ ءَ پد ایشی ءَ گدارکے ءِ دروشم دات کتگ ات۔چریشی آئی ءِ ڈپریشن کازماس ءُ گیدی ءِ بیتگ ات۔

مرچی اردو ءَ ردانک ءِ زبان ءُ بیان ءِ ھما کتہ کاری کہ خالد جاوید ءِ گور ءَ گندگ بیت ،چد ءُ پیسر اے رنگیں درور من کسی گور ءَ نہ دیستگ۔عابدمیر ءِ ردانک ءِ زبان پیسر ءَ چہ ھستیں درشانی یے گم ھما انت کہ گمیگ کنت،ارس ھما انت چہ چماں شلیت گمے کہ نوک بیت یا گم ءِ ماں ذھن ءُ دل ءِ سر ءَ بیڑ بندگ نوک بیت گڑا زبان ھم ھمے رنگ ءَ نوکیں ڈپریشن ءِ پیم ءَ نوک بہ بیت۔

“(مجھے محسوس ہوتا تھا جیسے مجھ سے کوئی بڑا گناہ سرزد ہوگیا ہے۔میں اس وقت تو شایدگھر سے باہر چلا گیا تھا،مگر یہ احساس مسلسل دامن گیر رہا۔ کسی طور چین نہ آتاتھا۔جیسے میری انگلیاں سلگ رہی ہوں،میرا ہاتھ مسلسل جل رہا ہو(ڈپریش ڈائری ۔تاکدیم 39) عابدءِ گورءَ ھمے کہ ڈپریش ءِ جاورھال انت آئی ءِ ردانک اے رنگ ءَ ڈپریش زدگ نہ انت۔

خالد جاوید ءِ گور ءَ ندارگے ءِ بیان ءَ زبان ءِ درشانی ءِ نوکی چارگ لوٹ ایت۔(چلنے سے معزور،درخت کی سوکھی لاش کے نیچے دبی ہوئی ہوانے اس غیر،اجنبی اور زور زور سے چلتی ہوئی،آنے والی ہوا کو سونگھا اور اسکی بے رحمی کو پہچان لیا۔اسے اس پرائی ہوا سے کوئی حسد نہیں ہوا۔وہ جانتی تھی کہ ہر ہوا کو ایک دن پتھر بن کر سناٹے میں جزب ہوجانا ہے)”(نعمت جانہ تاکدیم 50) من اشاں دیم پہ دیم کنگ ءَ نیاں من ھمے گوشگ ءَ یاں کہ ہر کسی وتی کہ گمجتی ءُ پریشانی یے بیت باید ھمے رنگ ءَ آئی ءِ درشانی یے ھم بہ بیت۔

خالد جاوید ءِ گور ءَ ھمے رنگیں کہ تب ءُ ساچے بیت زبان ءَ ھم ھمے رنگ ءَ سازگ ءِ جھد ءَ کنت بلکیں سوب مندیں رنگے ءَ سوب مند ھم بیت۔عابد ءِ کہ ڈپریشن ءِ رودپتر انت زبان آرنگ ءَ نہ انت۔بلکیں گم ءُ وشی ءِ بیان بہ کول ءِ اردو ءِ ندکارانی ئیگ ءَ کلیشہ سازی ءُ دم پہ سھت گوشتگیں موسمے کہ اود ءَ گم ھم نی گمیگ نہ کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اوگانستان ءَ طالبان سرکار ءَ دوازدھمی تبک ءِ جنکیں نودربر چکاس دیگ ءِ اجازت داتگ اَنت- بلے گوستگیں شش ماھاں وانگجاھاں چہ دور بیگ نودربراں اے پیسلہ ءِ سر ءَ ناوشی درشان اتگ-

زانگ بہ بیت گوستگین سال ءِ اگست ءَ طالبان ءِ واک ءَ پد ھپت ءَ بہ گر داں دوازدھمی تبک ءِ جنکیں نودرانی سر ءَ وانگاھاں روگ ءِ بندش جتگ-

ھال سرکنوکیں ادارہ ایسوس ایٹڈ پریس ءِ رد ءَ طالبان ءِ وزارت تعلیم ءِ نیمگ ءَ سر بیتگیں اھوالانی رد ءَ اوگانستان ءِ سی ءُ چار دمگاں اے پیسلہ منگ بیتگ کہ اود ءَ گوستگیں ماہ ءَ چہ سارتیانی سبب ءَ موکل بیتگ اَنت-

کابل ءَ مھکمہ ءِ تعلیم ءِ سروک احسان اللہ ءَ ایسوسی ایٹڈ پریس ءَ گوشتگ کہ اے چکاس چار شمبے ءَ بنت بلے اے نہ گشتگ کہ چکاس ءَ چنکس نودربر یکجاہ نشت کنت –

طالبان سرکار ءِ وزیر تعلیم حبیب اللہ آغا ءَ دزنشان کتگیں اھوالانی توک ءَ کندھار، ھلمند ءُ نمروز ءَ ابید دگہ سی ءُ یک جاھاں چکاس بنت اے ھرسئیں اُستاناں چکاس سال ءِ وھد ءُ پاسانی لڑاں دگری ءَ بنت-

کابل ءِ جھمنندیں دوازدھمی تبک ءِ نودربر ناجلہ ءَ ایسوسی ایٹڈ پریس ءَ گوشتگ باز مشکلین ءُ دردناکیں وھدے ما گوستگیں شش ماھاں ترس ءُ بیم ءِ ساھگ ءَ ساہ کشگ ءَ ایں من وتی درسی کتاباں چہ یک لبزے ونت ھم نہ کناں –

بہ کول ءِ آئی ئیگ ءَ طالبان ءَ گوستگیں شش ماھانی توک ءَ سیکنڈری اسکول بند کتگ اَنت مئے واستا چون سرجمی اِنت ما چکاس ءَ دات کت بہ کن ایں-

طالبان ءِ سرکار وھدیکہ گوستگیں سال ءِ اگست ءَ دیم ءَ اتکگ گڑا اود ءَ جنکیں نودربرانی مڈل ءُ ھائی اسکول بند کنگ بیتگ انت سرکاری جاھان بازیں زالبول کشگ بیتگ انت-

دوحہ گتر ءَ برجاھیں فیفا ورلڈ کپ ءِ مروچی شانزدھمی راؤنڈ ءِ گڈی چاریں ٹیمانی میان ءَ گوازی کنگ بوتگ کہ آھانی تہ ءَ اسپین ءُ سویزرلینڈ ورلڈ کپ ءَ چہ در اتکگ انت ءُ موراکو ءَ پیلانٹی ءُ پرتگال ءَ شش پہ یک گولے ءَ گوازی کٹ اِتگ ءُ وت ءَ کوارٹر فائینل ءَ سر کُتگ –

دوشی شپ البیت فٹبال پٹ ءَ بوتگیں شانزدھمی راؤنڈ ءِ ھپتمی گوازی موراکو ءُ اسپین ءِ میان ءَ بوتگ کہ ھردو ٹیم زیرو گول ءَ دیمیگ بوتگ انت – پیلانٹی شوٹ ءَ موراکو ءَ سَے گولاں گوازی کٹ اِتگ ءُ وت ءَ کوارٹر فائنل ءَ سر کُتگ

لوسیل فٹبال پٹ ءَ بوتگیں ھشتمی گوازی پرتگال ءُ سویزرلینڈ ءِ میان ءَ بوتگ کہ پرتگال ءَ شش پہ یک گولے ءَ گوازی ءَ کٹ اِتگ –

سویزر لینڈ ءِ نیمگ ءَ گوازی ءِ دومی ھاپ ءَ پنجاہ ءُ ھشتمی ملٹ ءَ یک گولے دیگ بوتگ وھدیکہ پرتگال ءِ نیمگ ءَ جے- رومس ءَ جوانی ءَ گوازی کنان ءَ سَے گول داتگ ءُ پیپے ،رپہیل، رپئیل لیئو ءَ یک یک گولے داتگ ءُ گوازی وتی ٹیم ءِ نام ءَ کُتگ –

کوارٹر فائینل ءَ پرتگال ءُ موراکو دیم پہ دیم انت ءُ آھانی گوازی دھ دسمبر ءَ التمیمہ فٹبال پٹ ءَ کنگ بیت ءُ کوارٹر فائنل ءِ اولی گوازی پونشی نُھ دسمبر ءَ برازیل ءُ کورتیا ءِ میان ءَ بیت اِنت –

سربوتگیں ھالانی رِد ءَ مروچی سھب ءِ ادار نُھ ءَ کیچ ءِ دمگ سامی ءَ ایف ڈبلیو او ءِ پھازوکیں پوجی کارمندانی سر ءَ اُرش کنگ بوتگ –

اُرش سامی ءِ ھند گشکور ءَ کنگ بوتگ ءُ اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گْوھرام بلوچ ءَ رسانکدر ءَ وتی شنگ کتگیں درشان ءِ تہ ءَ گْوشتگ کہ مئے سرمچاراں شش دسمبر ءَ سے شمبے ءِ سُھب ءِ ادار نُھ ءَ کیچ ءِ دمگ سامی ءِ روکپتی نیمگ ءَ گشکور ءِ ھند ءَ پاکستانی پوج ءِ بندساچی کمپنی فرنٹئیر ورکس آرگنائزیشن ءِ پھازوکی ءَ پوجی کارمند تراکناکیں شوروانی نشانگ کتگ انت –

آئی ءَ گوشتگ کہ ایف ڈبلیو او اد ءَ سی پیک شوربندی ءَ چہ دگ ءُ اے ھند سر ءَ پُھل جوڑ کنگ ءَ اِنت- مئے سرمچاراں اے اُرش ھما وھد ءَ کتگ وھدے پاکستانی پوج ءِ سَے کارمند تر ءُ گرد کنگ ءَ بیتگ انت کہ ھر سئیں کارمند تراکناکیں شوروانی زد ءَ اتکگ انت ءُ ھما جاہ ءَ مُرتگ انت –

جارکش ءَ گڈسر ءَ گوشتگ کہ مئے اُرش بلوچستان ءِ آجوئی تاں ھمے وڑ برجاہ مان انت –

اوگانستان ءِ دو جتا جتائیں جاھاں بیتگیں بمب تراکاں کم چہ کم ھپت مردم بیران ءُ شش زدگ بیتگ اَنت-

گیشیں ھالانی رد ءَ اوگانستان ءِ شھر مزار شریف ءَ دگ ءِ کش ءَ بیتگیں بمب تراکے ءَ پٹرولیم کمپنی ءِ ھپت ملازم بیران بیتگ اَنت-

ھالرسانین ادارہ اے ایف پی ءِ رد ءَ بلخ پولیس ءِ جارکش ءَ گوشتگ تراک سَے شمبے ءَ بیتگ –

مزار شریف ءِ پولیس ءِ جارکش آصف وزیری ءَ گوشتگ کہ اے بمب دگ ءِ کش ءَ یک ریڑھی ءُ بندوک بیتگ وھدیکہ پٹرولیم کمپنی ءِ بس اود ءَ سر بیتگ ءُ ھمے وھد ءَ تراک بیتگ-

ھمے وڑ ءَ اوگانستان ءِ رودراتکی شھر جلال آباد ءَ صرافی بازار ءَ بیتگیں بمب تراکے ءَ کم چہ کم شش مردم زدگ بیتگ اَنت-

تنی وھدی بیرانی بیگ ءِ تچکیں ھال نیتکگ اَنت بلے جلال آباد ءَ صرافی بازار درستاں مستریں نھاد جاہ اِنت اود ءَ مدام مھلوک ءِ بیڑیانی بیت اِنت بوت کنت بیرانی ءُ زدگ بوتگیں مردمانی کچ گیش بوت کن اَنت-

زانگ بہ بیت ھمے ماہ ءِ بندات ءَ یک ھم مزار شریف ءَ یک مدرسے ءَ تراکے بیتگ ات ءُ چریشی ءَ نوزدہ مردم بیران ءُ بیست ءُ چار زدگ بیتگ ات اَنت –

بلوچستان ءِ دمگ چہ ھُزدار ءَ دگہ یک ورنایے آوار جنگ ءَ پد بیگواہ کنگ بیتگ چریشی ءَ پد اشی ءِ درگت ءَ ھچ وڑیں ھال دز نہ کپتگ-

ٹی بی پی ءِ پتر ءَ سربیتگیں ھالانی رِد ءَ ھُزدار ءِ دمگ زھری ءِ نندوکیں ورناہ غلام فاروق ء محمد وارث 27 اکتوبر 2022 ءَ چہ مستونگ ءَ ھما وھد ءَ زورانسری آوار جنگ بیتگ وھدے آ پوریاگری ھاتر ءَ جھمنند بیتگ-

اِھوالکارانی رِد ءَ ورناہ پوریاگری کتگ ءُ وتی لوگ ءَ تیلکان دیگ ءَ بیتگ وھدے کہ اے درگت ءَ آ گیشتر مستونگ ءُ آئی ءِ ھمگرنچیں دمگ ءَ شتگ پوریاگری کتگ- گوستگیں ماہ ءَ ھمے درگت ءَ آ مستونگ ءَ جھمنند بیتگ کہ پاکستانی پوج ءُ سادگیں پُچانی تہ ءِ کارندہ آ مستونگ بُنجاھی شھدگ ءَ چہ آوار جتگ ءُ بیگواہ کتگ-

ورنائے درگت ءَ ھچ وڑیں ھال نیست- دمگی انتزامیہ ءَ ھم اے درگت ءَ ھچ وڑیں درشان دیم ءَ نیتکگ-

گوستگیں ماہ ءَ چہ ھُزدار ءَ شش ورناہ زورانسری آوار جنگ بیتگ کہ آیانی تہ ءَ چہ ھُزدار گریشہ دو وھدے کہ چہ اسد آباد سے ورناہ ءِ زورانسری آوار جنی ءَ ھوار اَنت وھدے کہ سی ٹی ڈی ءَ 30 اکتوبر 2022 زورانسری آوار جنگ بیتگیں تہ ءَ دگہ دو ورناھانی دزگیری پدر کتگ-

ایرانی مِرساد ءَ یک گاڑی ءِ سر ءَ تیرگواری کرتگ ءُ چریشی ءَ کساس ھبدہ مردم زدگ ءُ بیران بیتگ اَنت-

روکپتی بلوچستان ءِ دمگ ھاش سراوان ءَ درانڈیھاں روکیں مردمانی سر ءَ تیرگواری کرتگ کہ چریشی ءَ کم چہ کم ھبدہ مردم زدگ ءُ بیران بیتگ اَنت-

ھالانی تہ ءَ گوشگ بیتگ کہ گاڑی ءِ سر ءَ ھما وھد ءَ تیرگواری کنگ بیتگ کہ آئی ءَ درانڈیھاں روکیں مردم سوار بیتگ ءُ روگ ءَ بیتگ ات-

گاڑی ءِ سر ءَ تیرگواری ءَ پد گاڑی چپ بیتگ ءُ چریشی ءَ چہ اے مردم زدگ ءُ بیران بیتگ اَنت-

اے سرپدی نہ بیتگ کہ بیران بیتگیں مردم چنکس ءُ زدگ بیتگیں مردم چنت بیتگ اَنت بلے گاڑی ءَ کساس ھبدہ مردم سوار بیتگ اَنت-

قطر ءَ برجاھیں فیفا ورلڈ کپ ءَ یک ھنچیں رنگے دیم ءَ آیگ اِنت آیوکیں مردمانی دلگوش ءَ گیش کنت –

انڈین روتاک ھندوستان ٹائمز ءَ اے گپ پدر کرتگ نامی ئین تامرکار دیپکاپاڈوکون زوت قطر ءَ روت اِنت اود ءَ فائنل ءِ بندات بیگ ءَ پیسر نا ایوک ءَ گچینی مراگشاں ھوار بیت بلکیں تچک ءَ فیفا ورلڈکپ ءِ پیشدراھی ءَ ھم کنت-

زانگ بہ بیت دیپکا پاڈوکون ءَ لھتے ماہ ءَ ہیش کیننز تامر فیسٹیول ءَ ھم انڈیا ءِ نمائندگی کتگ ات اود ءَ آئی ءَ جیوری ھوار کتگ ات اَنت-

دیپکا پاڈوکون ءِ بالی وڈ ءِ ھما ازمکارانی لڑاں ھوار اِنت کہ آیاں کمے وھد ءِ توک ءَ مزنیں نام کش اتگ –

تامر چاروک ءُ دوست داروک (شائقین) تامراں دیپکار ءِ آیوکیں جلگش “پٹھان ” ءَ ھم گندگ بیت اِنت کہ آئی ءِ مزنیں کرد شاہ رخ خان ئیگ اِنت ات تامر بیست ءُ پنچ فروری دوھزار ءُ بیست ءُ سَے ءَ شنگ ءُ تالان بیت اِنت-

سدھارتھ ءَ آنند ءَ ھم سوجکاری ءَ بیوکیں ایکشن تامر “پٹھان ءَ ” ھشت جتا جتائیں ڈیھاں اکسبندی کتگ-

تامر کارانی گوشگ اِنت اے اولی سوت ءَ تامر شنگ بیگ ءَ لھتے روچ پیش شنگ کنگ بیت اِنت- گوشگ بوگ ءَ اِنت اے سوت ءِ ٹائٹل ایش اِنت ” بے شرم رنگ ” اشی ءِ توک ءَ شاہ رخ خان ءُ دیپکا شائقین یکجاہ ءَ گندگ بنت –

دیپکا پاڈون کوم انڈیا ءِ ھما ازمکارانی لڑ ءَ ھوار اِنت کہ آیاں بالی وڈ ءِ توک ءَ کار کرتگ آیاں ایکس ایکس ایکس ریٹرن آف زینڈر کیج ءَ ون ڈیزل ءِ گون ءَ کار کرتگ – دیپکاپاڈوکون ءَ سال دوھزار ءُ ھژدہ ءَ رنویر سنگھ ءِ گون ءَ آروس کرتگ-

روس ءِ سروک ولاددیمیر پوتن ءَ وت گاڑی ھلائینتگ ءُ ڈیھ ءِ کریملن جزیرہ ءَ ھوار گیجوکیں پُھل ءَ وت ءَ سر کتگ اود ءَ جاڑیگیں پھزداداراں آئی ءَ گپ ءُ تران کتگ –

برطانوی ھال سرکنوکیں روئٹرز ءِ رد ءَ اے ھما پھل اِنت کہ اد ءُ دو ماہ ءَ پیش ترسناکیں تراکے کنگ بیتگ ات ءُ پد ءَ آل ٹینکراں آس لگ اتگ-

نوزدہ کلومیٹر ءُ داں اے پُھل ءِ سر ءَ ٹریفک ءُ ٹرینز گوز اَنت اے پھل ءِ بنپد سال دو ھزار ءُ ھژدہ ءَ پوتن ءَ وت کتگ-

ھشت اکتوبر ءَ اے پھل تراکے ءِ نشانگ کنگ بیتگ ات آئی ءِ بھتام روس ءَ یوکرین ءِ سر ءَ لڈ اتگ ات –

رپورٹ ءِ رد ءَ روس ءِ سرکاری ٹیلی وژن ءِ نیمگ ءَ شنگ کنگ بیتگیں اکساں گندگ بیت اِنت سروک پوتن ءِ ھواری ءَ ڈپٹی وزیر اعظم مراف خوسنولن ھم جاڑیگ اِنت-

ھردوک اود ےَ مرسیڈیز گاڑی ءَ گوں سر بیتگ اَنت ھمے وھد ءَ پوتن اے جست ءَ ھم کنت کہ تراک کجا بیتگ ءُ چون بیتگ-

پوتن گوش ایت کہ ما راستیں دست ءَ اتکگیں کہ منی گمان ءَ چپیں نیمگ ءَ کار بوگ ءَ اَنت اشی ءِ زوت سرجم کنگ اژدری اِنت سروک پوتن پھل ءِ جتا جتائین پھناتان پند ءَ ترگ ءَ گندگ بیت اِنت-

یورپ ءِ درستاں مستریں پُھل اِنت کہ اشی ءِ لھتے بھر سوچگ ءَ گندگ ءَ کاینت بلے دومی نیمگ ءَ داں انگت ءَ یوکرین ءَ اے پھل ءِ سر ءَ بوتگیں تراک ءِ زمہ واری نہ زرتگ-

تراک سروک پوتن ءِ ھپتادومی ودی بوگ ءِ سالروچ ءِ دومی روچ ءَ بیتگ ات- تراک ءَ پد روسی فیڈرل سیکورٹی سروسز ءَ گوشتگ ات کہ ات یوکرین ءِ ملٹری انٹیلی جنس ءَ کنائینتگ – ءُ تراک ءَ پد پھل ءِ یک بھرے ءَ جوڑ بیتگیں سڑک تباہ بیتگ ات ءُ اشی ءَ روانی ھم مھتل بیتگ ات-

تراک ءِ وھد ءَ پھل ءِ سر ءَ گوزوکیں آئل ٹینکراں آس لگ اتگ ات ءُ چریشی ءَ بازیں ٹینکر ستکگ ات اَنت-

سال دو ھزار ءُ چاردہ ءَ روس ءَ کریمیا ءَ گوں ھوار کرتگ ءُ نوزدہ سد ءُ پنجاہ ءُ چار ءَ خروشیف ءَ سویت روس گستا کتگ ءُ سوویت یوکرین ءِ بھر کرتگ سال نوزدہ سد ءُ نود ءُ چار ءَ پد سویت یونین ءِ پروشگ ءَ پد روس ءَ اے من اتگ ات-

یوکرین ءَ واتر روس ءَ چہ کریمیا ءِ پچگرگ ءِ اھد پدر کرتگ ءُ چریشی ءَ چہ اے پھل ءِ سر ءَ دراھیں جنگی ساز ءُ سامان گوز اَنت-