TBP Balochi

سربوتگیں ھالانی رِد ءَ ناشناسیں مردماں بلوچستان ءِ دمگ پیدارک ءُ تمپ ءُ گوکدان ءَ پاکستانی پوج ءِ سر ءَ اُرش کُتگ – اُرشاں پاکستانی پوج ءَ جانی تاوان ءِ دیمپانی کنگ کپتگ –

گیشیں ھالانی رِد ءَ گوستگیں بیگاہ ءَ ناشناسیں مردماں کیچ ءِ دمگ تمپ ءَ گریڈ ءِ سر ءَ برجاھیں پاکستانی پوج ءِ پانگسے ءِ سر ءَ دزبمب اُرش ءِ کُتگ – دومی اُرش گوستگیں شپ ءَ کیچ ءِ دمگ گوکدان ءَ پاکستانی پوج ءِ کاروان ءِ سر ءَ کنگ بوتگ کہ پاکستانی پوج ءِ گاڑی ءِ تراکناکیں شوروانی نشانگ کنگ بوتگ –

ھمے وڈ شش دسمبر ءَ کیچ ءِ دمگ پیدارک ءَ ھم پاکستانی پوج ءِ پانگسے ءِ سر ءَ ناشناسیں سلاہ بندیں مردماں اُرش کُتگ – ھر سَئیں اُرشاں پاکستانی پوج ءَ جانی ءُ مالی تاوان ءِ دیمپانی کنگ کپتگ ءُ ارشانی زمّہ واری بلوچ آجوئی لوٹوکین سلاہ بندیں گل بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اُرشانی زمّہ واری منّ اِتگ ءُ گوشتگ کہ مئے سرمچاراں ھپت دسمبر ءِ شپ ءِ ادار شش ءُ پنجاہ ءَ کیچ ءِ دمگ تمپ ءِ گریڈ ءَ برجاھیں پاکستانی پوج ءِ پانگسے ءِ سر ءَ دز بمب اُرش کُتگ کہ دز بمب پانگس ءِ تہ ءَ کپتگ یک کارمندے ھما جاھ ءَ مرتگ وھدیکہ پانگس ءِ تہ ءَ ساڑی ئیں دگہ دوکارمند زدگ بیتگ انت –

جارکش ءَ وتی دگہ درشان ءِ تہ گوشتگ کہ مئے سرمچاراں شش دسمبر ءِ شپ ءِ ادار دھ ءَ کیچ ءِ دمگ پیدارک ڈوکی ءَ برجاھیں پاکستانی پوج ءِ پانگس ءِ سر ءَ ایم 16 ءُ دگہ سلاھاں گوں اُرش کُتگ – اُرش ءِ آسر ءَ پاکستانی پوج ءَ جانی ءُ مالی تاوان بوتگ ءُ ترس آماچین پوج ءَ پدا ھر چاریں نیمگاں مارٹر گولی آس داتگ –

جارکش ءَ دیمتر ءَ گوشتگ کہ گوستگیں شپ ءِ ادار نُھ ءَ ھم مئے سرمچاراں کیچ ءِ دمگ گوکدان ءُ ڈنک ءِ میان ءَ پاکستانی پوج ءِ کاروان ءِ تراکناکیں شوروانی نشانگ کُتگ کہ کاروان ءِ یک گاڑی ءِ تراکناکیں شوروانی زد ءَ اتکگ ءُ آئی ءَ سواریں پوجی کارمند مرتگ ءُ زدگ بوتگ انت –

جارکش ءَ وتی درشان ءِ گڈسر ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت – ما چہ لس مھلوک ءَ دزبندی کن ایں کہ آ چہ دُژمنیں پوج ءَ دور بہ بنت پرچاکہ سرمچار کجام وھد ءُ کجام جاہ ءَ آئی ءَ نشانگ کت کن انت –

بلوچستان ءِ بنجاھی شھر شال ءَ بلوچ اسٹوڈنٹس ایکشن کمیٹی ءِ نیمگ ءَ بلوچستان ءِ وانگجاھانی ماندارگے بگیری ءَ زھرشانی ءُ روانک کشگ بوتگ – زھرشانی ءَ جنک ءُ بچکیں نودربراں مزنیں کچے ءَ بھر زرتگ –

ھمے سال ءَ ناشناسیں مردماں بلوچستان ءِ بازیں وانگجاھے مانداشتگ انت کہ اشی ءِ بگیری ءَ نودربر زھرشانی کنگ ءَ انت –

مانداشتگیں وانگجاھانی تہ ءَ کیچ خان کلگ مزن وانگجاہ دازن، بلیدہ الندور ءِ زری وانگجاہ کلکشان ءُ یک دگہ سرکاری وانگجاہ ءِ ماندارگ بوتگ انت کہ آ سرجمی ءَ ستکگ ءُ پُر بوتگ انت – نومبر ءِ ماہ ءَ پسنی ریک پُشت وڈ سر ءِ جنکانی وانگجاہ ءُ وندر ءِ دمگ سونمیائی ءِ زری وانگجاہ ٹی سی ایف ھم ماندارگ بوتگ انت –

اے وئیلانی بگیری ءَ گوستگیں روچ ءَ لسبیلہ ءِ دمگ اُتھل ءُ مروچی بلوچستان ءِ بنجاھی شھر شال ءَ نودربر گل بساک ءِ نیمگ ءَ زھرشانی کنگ بوتگ –

درنگاز کنوکاں ھمے ھپتگ ءَ وندر ءِ دمگ سونمیانی ءِ پرائیویٹ زانشتی ادارہ ٹی سی ایف ءِ سر ءَ ناشریں مردمانی اُرش وانگجاھانی ماندارگ ترندی ءَ گوں ایرجتگ ءُ گوشتگ کہ بلوچستان ھنچیں دمگے کہ اودا وانگ ءُ زانگ پُشت ءَ روان انت ءُ ورنا در چاگردی کارانی تہ ءَ دزگلائیش کنگ بوگ ءَ انت اے وڈیں کار ورنایاں گیشتر ترس ءِ آماچ کنت ءَ نودربرانی راہ ءِ دیم ءَ اڈاند ءِ جوڈ بیت کہ سک باز پدردی گپ یے –

وانگجاھانی سر ءَ اُرش ءُ آھانی مانداروکانی بگیری ءَ سوبائی واکدارانی نیمگ ءَ ھچ وڈیں گامگیج زورگ نہ بوتگ ءُ گوست ءَ پنجگور ءِ زَری وانگجاھے ءَ الفرقان نامی گل ءِ نیمگ ءَ بیھار دیگ بوتگ –

دمگی مردماں وئیل ایرجتگ ءُ گوشتگ کہ واکدارانی بے سوبی ءَ سلاہ بندیں ٹولی مھکم بوگ ءَ انت ءُ ایف سی ادا کتکاریں مردماں کارمرز کنگ ءَ انت تانکہ ترس ءِ جاور ءِ برجاہ دارگ بہ بیت –

چین ءِ سروک شی جن پنگ ءِ گؤشگ اِنت کہ شش سال ءَ پد دوبر سعودی عرب ءَ سرکاری تر ءُ تاب ءَ اں ءُ خادمین خرمین شریفین شاہ سلمان بن عبدالعزیز السعود ءِ داوت ءَ اولی رند ءَ عرب سروکانی نیاد ءُ چین ءُ ھلیج ءِ کمکی کونسل ءِ اولی سروکی نیاد ءَ بھر زورگ ءَ وشی بوگ ءَ اِنت-

عرب نیوز ءِ رد ءَ سَے روچی تر ءُ تاب ءَ سعودی عرب ءِ بنجاھی شھر ریاض ءَ رسگ ءَ پد چینی سروک ءَ گوشتگ کہ من ءَ چینی سرکار ءُ مھلوک ءِ نیمگ ءَ سعودی عرب ءِ دوستیں سرکار ءُ مھلوک ءِ نیکیں واھشتانی لیکھانی درشانی ءِ وشی اِنت-

سروک شی جن پنگ ءَ گوشتگ کہ چین ءُ سعودی عرب ءِ میان ءَ ھستیں دوستی، زرکاری ءُ وت براتی ءِ سیادی کوھنینے ءُ سپارتکاری ءِ بنچک ءَ سی ءُ دو سال ءِ گوزگ ءَ پد ھردوکینانی میان ءَ کمک ءُ پلامرزی یکشل ءَ برجاہ داشتگ اَنت-

آئی ءَ اسٹریٹیجک ءِ نزیکی ءِ درگت ءَ گپ کنان ءَ گوشتگ کک ھردوکانی املی کمک نہ بیتگ بلے نی ھردوکیں ڈیھانی میان ءَ میان اُستمانی پھناتاں سیادی وش اھتی یے –

چین ءِ سروک ءَ سعودی عرب ءُ چین ءِ میان ءَ سال دوھزار ءُ شانزدہ ءخ اسٹریٹیجک ءِ بھرداری ءِ درگت ءَ گپ کنان ءَ گوشتگ کہ ھردوکیں ڈیھانی مھلوک ءَ پائدگ بیتگ ءُ دمگ ءَ امن ءُ ایمنی، وشھالی ءُ دیمروئی ءِ واستا مزنیں کرد پیلو کتگ اَنت-

آئی ءَ گوشتگ من وتی تر ءُ تاب ءِ وھد ءَ شاہ سلمان ءُ ولی عھد شھزداہ مھمد بن سلمان ءِ گون ءَ ھردوکیں نیمگاں سیادی ءُ میان اُستمانی ےُ دمگی جاورھالانی گچینی گپاں کن آں ءُ ما چین ءُ سعودی عرب ءِ سیادی ءُ دیمرویانی واستا شوربندی ءِ رنگ ءَ ھوار بہ این کار کن ایں-

بلوچستان ءِ بُنجاھی شھر شال ءَ پاکستانی پوج ءُ چیریں ادارھاں یک بلوچ نودربرے آوار جتگ ءُ گوں وت برتگ-

سربوتگیں ھالانی رِد ءَ پرندوشی شال ءِ دمگ عیسیٰ نگری ءَ پاکستانی پوج ءُ چیریں ادارھاں بیڑبرتگ ءُ کمپیوٹر سائنس ءِ نودربرے آوار جتگ ءُ گوں وت برتگ-

آوار جنگ بیتگیں نودربرے پجّار نور خان جھمنند ھوشاپ کیچ نام ءَ چہ زانگ بیتگ-

ھمے وڑ ءَ چاگردی ترامجاہ ٹوئٹر ءَ بازیں ٹوئٹر کارمرد کنوکاں اے گپ راست کرتگ ءُ گوشتگ کہ شال ءِ دمگ عیسیٰ نگری ءَ پاکستانی پوج ءُ چیریں ادارھاں یک نودربرے آوار جتگ ءُ برتگ-

زانگ بہ بیت بلوچستان ءَ اَبید پاکستان ءِ آ دگہ شھراں ھم بلوچ نودربراں زورانسری آوار جنگ اَنت اے نہ کُٹّوکیں دْرچ یکشلہ برجاہ ءَ اِنت-

دومی نیمگ ءَ بیگواھیں مردمانی توار چست کنوکیں گل وائس فار بلوچ مسنگ پرسنز ءِ پہ بیگواھیں مردمانی یل کنگ ءِ ھاتر ءَ یک دْراجیں مدتے بیت شُدکُشیں بُنجل برجاہ ءَ اِنت-

روس ءِ سروک ولادیمیر پوتن ءَ گوشتگ کہ یوکرین ءِ جنگ باز دراج کش بیت اِنت اے جنگ ءَ زھرناکیں سلاھانی کارمرد کنگ ءِ ترس ھم ھست اِنت-

برطانیہ ءِ ھال سر کنوکیں ادارہ روئٹرز ءِ رد ءَ جنگ ءَ نُھ ماہ ءِ گوزگ ءَ ابید سروک پوتن چریشی ءَ ناگتی ءِ وھداں باز کم وھد ءَ گپ کنگ ءَ گندگ بیتگ –

چار شمبے ءَ سرکاری ٹیلی وژن ءَ شنگ بیتگیں اکسانی توک ءَ گندگ بیت اِنت آ وتی سرکاری ھمراھانی ھمراھی ءَ جاڑیگ اِنت ءُ گوشگ اِنت جنگ باز دراج کش بیت اِنت-

بیست ءُ چار فروری ءَ روس ءِ ھمساھگیں ڈیھ یوکرین ءِ سر ءَ اُرش ءَ پد یکشل ءَ جنگ برجاہ اِنت اے وھساں روس ءَ باز گچینی لھتے شھر دستیگ کتگ اَنت ءُ لھتے جاھاں ریفرنڈم ءِ زور ءَ گون وت ھوار کرتگ اَنت کہ چریشی ءَ روکپتی بازیں ڈیھاں ائی ءِ سر ءَ ایراد گپتگ-

امریکہ ءَ ھوار روکپتی بازیں ڈیھ یوکرین ءَ کمک کنگ ءَ اَنت بازیں کچے ءَ آئی ءَ سلاہ دیگ ءَ اَنت-

زانتکارانی گوشگ اِنت آئی ءَ سلاھانی رسگ ءَ پد جولائی ءَ روسی پوج ےَ رودراتک ءُ زرباری دمگاں ترندیں جنگانی دیمپانی کنگ کپتگ ءُ باز جاھاں آ پشت کنزی بیتگ-

جنگ یک ھنچین وھدے ءَ سر بیتگ ات کہ روسی سروک پوتن ءَ زھرناکیں سلاھانی جنگ ءِ بیھار داتگ اَت-

نی یک رندے پد ءَ زھرناکیں سلاھانی بیھاراں زانتکارانی گوشگ اِنت آئی ءِ مول ءُ مراد یوکرین ءِ گون ءَ روکپتی ڈیھانی کمک ءِ زور ءِ پروشگ اِنت-

رپورٹ ءِ رد ءَ پوتن ءِ گوشگ اِنت ما پاگل نہ بیتگ اِنت مارا سما ھست اِنت کہ زھرناکیں سلاھاں چہ بیت اِنت مئے گور ءَ لھتے ھنچین نوکیں سلاہ ھست اَنت کہ ھچ ڈیھ ءِ گور ءَ نیست اَنت ءُ ما آیاں دنیا ءِ رنگ ءَ چو کارمرد کنگ نہ لوٹ آں –

آئی ءَ یوکرین ءَ جاڑیگیں پوجیانی درگت ءَ گپ کنان ءَ گوشتگ کہ سَے لکھ ءِ توک ءَ یک لک ءُ نیم واتر ستمبر ءُ اکتوبر ءَ یوکرین ءَ راہ داتگ اَنت اشانی توک ءَ ھپتاد ءُ ھپت ھزار تچک ءَ جنگ کنوکین پوجی اَنت-

آئی ءِ رد ءَ یک لک ءُ نیم پوجی ٹریننگ سینٹر ءَ جاڑیگ اَنت – روسی سروک ءِ گوشگ اَت اے کساس ءَ پوج ءِ جاڑیگ بیگ ءَ دگہ پوجیانی راہ دیگ جوان نہ اِنت-

گوستگیں روچاں خیرسن ءَ ھوار بازین جاھاں پشت کنزی ءَ ابید پوتن مھکمی ءَ گندگ بیتگ ءُ آئی ءَ جنگ ءِ بندات جوان گشتگ آئی ءِ رد ءَ من ءَ ھچ پشومانی نیست اِنت-

بلوچستان ءِ دمگ مند ءَ گوبرد ءِ ھند ءَ جنگل ءَ چہ شکاری پیر محمد نامی مردمے ءِ بیگواھی ءِ ھال اِنت-

سر بیتگیں ھالانی ردءَ شکاری پیر محمد نامی مردمے مندءِ گوبرد ھنکین ءَ چہ جنگل ءَ بیگواہ اِنت، زورانسری آوارجنگ بئیگ ءِ گمان اِنت۔

اھوالکار ءِ رِد ءَ شکاری پیر محمد زُھر ءِ نماز ءَ پد در اتکگ ءُ شُتگ وتی ڈگارانی سرءَ پدا ھما انت کہ بیگواہ اِنت، وھدیکہ گِس ءِ مردم پہ پٹ پول ءَ ڈگارءِ سرءَ شُتگ انت گُڑءَ اودا آئی ءِ کاہ ءُ لچ ایربوتگ انت بلے جند اودا نہ بوتگ-

اھوالکار ءِ رِد ءَ ڈگارءَ چہ دیر دگہ یک مردمے ءَ زمبادیں گاڑی ءِ شکاری پیر محمد ءِ نزیک ءَ آیگ ءَ دیستگ، کھول ءِ مردماں آئی پد چار اِتگ اَنت گڈا شکاری داں ھمے گاڑی ءِ کرا اتکگ ءُ واتر وتی لچ ءِ نیمگ ءَ نہ شُتگ-

اھولاکار ءِ ردءَ ھمے گمان کنگ بئیگ ءَ اِنت ناشناسیں گاڑی والھاں شکاری پیر محمد آوار جتگ ءُ گوں وت برتگ- اھوالکار ءِ دیمترءَ گُشتگ کہ اگں آ آوار جنگ مہ بوتیں الم آئی ءَ وتی کھول ءِ مردم سرپد کُتگ ات اَنت کہ آ کجءَ اِنت ءُ پرچہ آئی ءَ وتی کار نیم بندگ یل داتگ ءُ کاہ گِس ءَ سر نہ کُتگ اَنت-

مروچی چار شمبے ءِ روچ ءَ بلوچستان ءِ دمگ لسبیلہ اُتھل ءَ بلوچ اسٹوڈنٹس ایکشن کمیٹی ءِ نیمگ ءَ بلوچستان ءِ وانگجاھانی ماندارگے بگیری ءَ زھرشانی کنگ بوتگ –

ھمے وھد ءَ بلوچ نودربراں بینر ءُ پلے کارڈ دست ءَ بوتگ انت دگانی سر ءَ اوگام جتگ ءُ زانت دژمنی ءِ بگیری ءَ نارہ جتگ –

آھانی گوشگ ات کہ بلوچستان ءِ وانگ جاہ پندل ءِ رِد ءَ یکشل ءَ ماندارگ بوگ ءَ انت اے کار ءَ زانت دشمنیں مردم کنگ انت ءُ بلوچ ورنایاں چہ زانت ءَ دور دارگ انت – اے پندلانی بگیری ءَ گل ہر ھمک جاہ ءَ توار چست کنت –

آھانی گوشگ ات کہ گوستگیں لھتے ماھانی میان ءَ بلوچستان ءِ بازیں وانگجاھے ماندارگ بوتگ انت –

درنگاز کنوکانی گوشگ ات کہ کیچ ءِ دمگ بلیدہ ءَ کلکشان وانگجاہ ماندارگ ءُ پُر کنگ بوتگ ءُ پسنی ءِ دمگ وڈ سر ، ریک پُشت ءِ جنکانی وانگجاہ ءِ آسراتی ماندارگ بوتگ انت ءُ کیچ ءِ دمگ دازن ءَ خان کلگ مزن وانگجاہ پندل کنوکاں مانداشتگ ءُ وانگجاہ ءِ زانشتی کار داشتگ انت –

درنگاز کنوکاں گوشتگ کہ ھمے ھپتگ ءَ وندر ءِ دمگ سونمیانی ءِ پرائیویٹ زانشتی ادارہ ٹی سی ایف ءِ سر ءَ ھم ھمیشاں اُرش کُتگ مانداشتگ – آھانی گوشگ ات کہ بلوچستان ھنچیں دمگے کہ اودا وانگ ءُ زانگ پُشت ءَ روان انت ءُ ورنا در چاگردی کارانی تہ ءَ دزگلائیش کنگ بوگ ءَ انت اے وڈیں کار ورنایاں گیشتر ترس ءِ آماچ کنت ءَ نودربرانی راہ ءِ دیم ءَ اڈاند ءِ جوڈ بیت کہ سک باز پدردی گپ یے –

آھانی گوشگ ات کہ بھیسیت ءِ بلوچ نودربر گل ما ناں تھنا اے کار ءَ ایر جن ایں بلکنہ اے پندلانی بگیری ءَ املی جھد کن ایں –

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردمانی تیرگواری ءَ دو باجو بوتگیں سرمچار بھرام ء پکیر ءُ دین مھمد ء نائپ مُرتگ انت –

اھوالکار رِد ءَ ھردو مردم مند ءِ دمگ گیاب ءَ فٹبال پٹ ءَ تیرآماچ کنگ ءُ کُشگ بوتگ انت، کہ سلاہ بندیں پرپٹ سوار اتکگ انت ءُ آھانی سرا تیرگواری ءِ کُتگ چریشی ءَ یکے ھما جاہ ءَ مُرتگ وھدیکہ دومی ءَ پسٹل ءِ سر ءَ پسّوی تیر جتگ بلے تچگ رؤگ ءَ سوبمند نہ بوتگ –
دمگی اھوالکار ءِ رِد ءَ ھردو ریاستی کارمند بوتگ انت ءُ دمگ تہ ءَ چاگردی سلکاری ءُ پوجی لشکر کشیاں ھم دست ءِ مان بوتگ – ھردوکانی کوش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں شش دسمبر ءَ شمبے ءِ روچ ءَ کیچ ءِ دمگ مند گیاب ءَ پُٹبال پٹ ءَ کُشندہ ٹولی ءِ دو کارمند بھرام ء پکیر جھمنند مند ھوزئی ءُ دین محمد ء نائپ جھمنند مند گیاب تیرجتگ ءُ کُشتگ اَنت –

جارکش ءَ گوشتگ کہ ھردو مردم لگوریں سرمچار بوتگ اَنت ءُ دو ھزار بیست ءَ آیاں پاکستانی پوج ءِ دیم ءَ تُپنگ دور داتگ اَنت ءُ پد ءَ آ پاکستانی پوج ءِ چیردستی ءَ جوڑکتگیں کُشندہ ٹولی ءِ بھر جوڑ بوتگ اَنت – جارکش ءَ گوشتگ کہ اے مردم کیچ ءِ جتا جتائیں ھند ءُ دمگاں پاکستانی پوج ءِ ھمراھی ءَ باز رند ءَ لشکر کشی ءَ ھم ھوار بوتگ اَنت اشی ءَ اَبید مردمانی دلسیاہ کنگ ءُ زر گرگ ، دُزی ءُ ڈُنگی منشیات باپاری ءَ ھم ھوار بوتگ اَنت-

جارکش میجر گوھرام ءَ گوشتگ کہ پاکستانی پوج ءِ ھمکارانی سرپدی مئے گور ءَ ھست اَنت، ھرچ ھما مردم بلوچ جُھد ءِ دیم اڈاند بوگ ءِ جُھد ءَ کنت آیانی سزا ھمش بیت انت –

جارکش ءَ گڈسر ءَ وتی درشان ءِ تہ ءَ گوشتگ کہ زورگپتگیں بلوچستان ءِ وتواجھی ءَ تاں پاکستانی پوج ءُ آئی ءِ کمکارانی سر ءَ اُرش برجاہ مان انت-

کتاب: تاریخ قلات بلوچ قوم و بلوچستان کے پس منظر ( زمانہ قبل از تاریخ تاحال)

نبشتہ کار: محمد حنیف قلاتی، محمد یونس مینگل

چمشانک: سمیع بلوچ

اولی بھر

دی بلوچستان پوسٹ

تاریخ ءِ قلات واجہ محمد حنیف قلاتی ءُ واجہ یونس مینگل ءِ یک قابل ستاکرزیں جُھدے کپ ھچ وڑ ءَ پراموش کنگ نہ بیت اِنت۔

720 تاکدیمی کتاب بلوچ راج دپترے وانکویں نودربرانی واستا یک بے مَٹیں ٹیکی یے کہ اے کتابے ھرچ تاک ءِ سر ءَ بلوچ ءِ زندمان ءُ زمین ءِ داستان بیان اِنت بلوچستان چُشکہ دنیا ءِ کوھنیں دودماناں چہ یکے شُمار کنگ بیت ءُ ھمے سرڈگار اِنت کہ ایشی ءِ واستا بلوچاں وتی ھون ریتکگ اَنت ءُ وتی دشمن ھوں باھوٹی داتگ ءُ پہ دژمن ءَ یک قبرستانے ھوں بوتگ ۔

واجہ قلاتی ءَ وتی کتاب ءِ تہ ءَ مارا بلوچستان ءِ تہ ءَ بوھوکیں ھونریزی ءُ بلوچانی گوں دنیا ءِ دگہ بازیں تاکتوریں راجانی نیاما سیادی ءُ بازیں جنگانی داستان گوں جوانیں رنگاں درشان کُتگ اَنت ۔

اے کتاب ءِ تہ ءَ” قبل از اسلام و بعد از اسلام” ( بلوچ ءَ گوں بابُلی ، زرتشتی ، کیانی ،آرین ،ساسانی، یمنی ،حبشی، یونانی ،منگول ،کلدانی، سومیری، عکادی ، یکیں وھدے پیشدار ایت ) بعد از اسلام ءِ دورانی تہ ءَ ( عمر ، علی ،عثمان، محمد بن قاسم، سکندر مقدونی، حجاج بن یوسف، چندر گُپت موریہ، اشوک اعظم موریہ، ساکا خاندان، ذولقرنین ھمخامنشی، داریوش اول، ءُ بازیں مردم و خاندانانی بلوچ ءُ بلوچستان ءَ گوں سیادی نبشتہ کُتگ) و قبل از تاریخ بلوچانی وجودیت ءُ وتی زمین ءِ سر ءَ جاڑیگ بوگ ءِ بازیں نشان ءُ آسار چہ دگہ بازیں کتابانی ریفرنساں چہ منیتگ ءُ داتگ اَنت ۔

بلوچ راج دپتر ءِ سر ءَ نبشتگیں سک باز کتاب بگندے قلات ءِ خوانین ( خان آف قلات احمدزئی ) ءَ چہ بندات بنت کہ پنچ سد سالے دراجیں دپترے بلے واجہ ھنیف قلاتی ءَ مھر گڑھ ءِ تہذیب ( یازدہ ھزار سالی دپتر) گوں دنیا ءِ دگہ کوھنیں دود یک جاہ کُتگ ءُ دیم ءَ آرتگ اَنت بزانکہ بابُلی تاریخ ، ہمخانشی تاریخ ، موئنجودڈو ءِ تاریخ ، میسوپوٹیمیا ( عراق) ءِ تاریخ، اسلامی تاریخ کہ ایشی ءِ تہ ءَ ھزرت عمر، ھزرت علی ، ھزرت عثمان غنی ءَ ابید دگہ بازیں اسلامی لشکرانی سپہ سالارانی( امیر معاویہ، علوی، راشد بن عمرو ، سنان بن سلمہ، عمر بن عبدللہ، حارث بن مرہ ، ھزرت عبدالرھمان ءُ دگہ بازیں نام کے ایشانی موت بلوچاں گوں جنگانی تہ ءَ بلوچستان ءَ بوتگ اَنت) بلوچانی سر ءَ لشکر کشی ءُ بلوچانی زیر کنگ ءِ تاریخ ھوار اَنت بلوچستان ءِ تہ ءَ اسلامی لشکراں چے باز پیسر منگول ءُ مغل ، ساسانی ءُ تُرک لشکراں ھوں شکست فاش وارتگ بلے 1500ء ءِ زمانگ ءَ چاکر خان رند و گوھرام لاشار ءِ خانہ جنگی ءَ بلوچے تاکت انچو کمزور کُت ءُ بلوچستان ءِ ساک ھمینچو تاوان دات کہ ایشی ءِ ازالہ ھزاراں سالانی گوزگ ءَ رَند ءُ نبیت ھمے چاکر کہ مغل بادشاہ بابر ءُ بابر ءِ مِرگ ءَ رند ھمایون ءِ لشکر ءَ شھداد خان ءِ ھواری ءَ شیرشاہ سوری ءَ شکست فاش بوت 30 سالہ وت ماں وتی کُشت ءُ خون ءَ رَند گُوھرام لاشار ءُ چاکر رند گوں وتی دو بچّاں (میرالھداد ءُ میر شھداد ءَ جلاوطن بوت اَنت پد ءَ طوفان نوح ءُ تاریخ اولادے نوح ( سام ،حام ءُ یافث) کہ بازیں تاریخ نویس سرپد بنت کوھنیں گیشتر دود ھمیشانی اولاد ءُ نسل اَنت بلوچ ھوں سام ءِ نماسگ گُشگ بوتگ اَنت ( مکران بن فارک بن سام بن نوح علیہ السلام بلوچانی جد امجد اِنت: تاکدیم 135 ) قلاتی اے گپ ءَ رد کنت کہ بلوچ نمرود البلوص ءِ نسل اِنت پرچہ کہ نمرود ءِ ھاکمیت بابُل دود ءَ چہ چار یا چار ءُ نیم ھزار سال پیش اِنت ءُ بلوچانی دود ءُ تمدن دہ یا یازدہ ھزار سال پیسر تر اِنت – بلوچ زبان ءُ زبان ءِ تاریخ ءِ سر ءَ قلاتی گُش ایت کہ بابُل ءِ تہ ءَ مُلکانی یا دمگانی بھر ءُ بانگ ءِ وھدیکہ بیت گڑا دو برات بنت یکے ءِ نام کرمان ءُ یکے ءِ نام مکران ،کرمان کُردی ءَ دیم ءَ کار ایت ءُ مکران بلوچی ءَ گوں وت کار ایت ھمے زبان ءَ لڈ ات کت کنت( باز راجدپتر نویس بلوچی ءَ آریائی زبان ءِ تھرگاں چہ یکے سرپد بنت چیاکہ پھلوی، پشیدادی ءُ ھمخامنشی دور ءِ کتاب ءُ تھت جمشید ءِ کتاب گوں بلوچی ءَ نزیک اَنت) ءُ اے قبل از تاریخ بلوچستان ءِ تہ ءَ بلوچی گپ کنگ ءُ بلوچ قبائلانی موجودگی اشارہ اِنت کہ اے زمین بلوچے بوتگ ءُ انگت اے زمین ءِ وارث بلوچ اَنت قلاتی ءَ بلوچ ءُ بلوچستان ءِ مرکز مدام قلات پیشداشتگ ءُ بلوچانی تمامیں امیر ءُ مستر قلات ءِ تہ ءَ موجود بوتگ اَنت ءُ ھمد ءَ چہ قلات ( بلوچستان) ءِ نزیک ءُ دوریں تاکتوریں ھاکم ءُ ھکومتاں گوں یک نزیکی ءِ بوتگ ءُ مدام زورگریں تاکتاں لوٹ اتگ کہ قلات ءِ زیر کنگ ءُ زورگر کنگ متلب بلوچستان ءِ سر ءَ زورگر انت مسال ءِ ھبر ءَ محمود غزنوی ، چنگیز خان ، خوارزم شاہ، بابر بادشاہ ،ھمایوں بادشاہ ، اکبر بادشاہ ءُ شھنشاہ شاہ جھان ءِ وڑیں نامی ءُ گرامی ھاکمانی سیادی گوں قلات ءَ نندوکیں امیر ءِ قلات ءَ بوتگ اَنت۔

نوں ما گپ کناں قلات ءِ خوانین ءَ نی بابت بزانکہ قلات ءِ سر ءَ 500 سال ھاکم بوتگیں احمدزئی خوانین ءَ نی تاریخ ءِ سر ءَ ریاست قلات (بلوچستان) ءِ اولی خان ” خان احمد خان احمدزئی اول 1695 تا 1666ء ” بوتگ بلے احمد خان ءُ چہ پیسر بلوچستان ءِ ھاکم میرواڈی بوتگ اَنت (میر میرو میرواڈی ، میر عمر میرواڈی ءُ میر بجار میرواڈی) انچو کہ مسلمانانی دپتر ءِ سیمی دور ءِ تہ ءَ ۳ خاندانانی ( عثمانی ،صفوی ءُ مغلانی) ارچ کجام ھیسیت ءُ ازت بوتگ اَنت احمدزئی ءُ میرواڈیانی ءُ ھما ھیسیت بوتگ۔

اولی خان میر احمد خان ءَ چہ احمدزئی ءَ قبائل جوڑ بیت بزانکہ احمد ءِ چُک ءُ ھمے تا 1948ء ءَ قلات ءِ خان بنت خان احمد خان ءَ تا 30 سال قلات ءِ سر ءَ ھکمرانی کُتگ ءُ مغل بادشاہ اورنگزیب عالمگیرے ءِ اتھادی ءِ بوتگ مدام ارچ وڑیں جنگانی تہ ءَ ھوار بوتگ اَنت کہ ایشانی تہ ءَ بازیں ھونریزی جنگانی تہ ءَ پیش پیش بوتگ اَنت چو وَ سجئیں قلات ءِ خان تاکتور ، بہادر ،ذہین ، دانشمند ءُ جنگول بوتگ اَنت ابیدے 2 یا 3 ءَ بلے 1749ء تا 1794ء ءَ خان نصیر خان نوری قلات ءِ یک انچیں زہین، سمجھدار ءُ سیاست ءَ سوھو ءُ دوُراندیشیں ءُ تاکتوریں خانے بوتگ کہ نوری ءَ چہ رند یک ءُ چُشئیں خان ءِ نہ بوتگ کہ نوری ءِ پیمیں سیاسی سنچ، دانشمند ءُ جنگی ھنراں چہ فھم ءُ زانتکار تر بہ بیت نوری ءَ خلیفتہ عثمانی المسلمین ءِ سلطنت ءِ زمانگ ءَ ” بیگلر بیگی ” ءِ لکب دیگ بوتگ کہ اے یک ترک زبانیں لبزے کہ بیگ ھما مردم بوتگ کہ ایشی ءِ دست ءَ ایندگہ تاکتاں ابید انتزامیہ تاکت ھوں بوتگ اَنت نوری ءِ دور ءَ اولی رندا بلوچی راجی سوت جوڑ کنگ بیت اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءَ ایرانی چیریں ادارھانی دست ءَ یک ورنایے آوار جنگ ءَ پد بیگواہ کنگ بیتگ-

سر بیتگیں ھالانی رد ءَ زاھدان ءَ گوستگیں شپ ءَ ایرانی چیریں ادارھانی کارمنداں یک لوگے ءِ سر ءَ بیڑ برتگ ءُ اود ءَ یک ورنایے آوار جنگ ءَ پد بیگواہ کرتگ-

آوار جنگ بیتگیں ورنا ءِ پجار زکریا جمالزئی کہ آئی ءِ اُمر بیست ءُ پنچ سال گوشگ بوگ ءَ اِنت ءُ زاھدان ءِ جھمنند اِنت

ھالانی تہ ءَ گوشگ بیتگ کہ ایرانی چیریں ادارہ لس پوشاکی گداں آیاں ابید ءِ ارزی ءَ لوگ ءِ سر ءَ بیڑ برتگ ءُ زکریا آوار جتگ ءُ برتگ-

ھالانی تہ ءَ گوشگ بیتگ کہ آئی ءِ کھول ءِ مردم بیھار دیگ بیتگ اَنت اگاں شما کسے ءَ اے گپ ڈن ءَ در کت گڑا شمئے آسر ھم ھمے بیت اِنت-

زانگ بہ بیت روکپتی بلوچستان ءَ اے چیزے وھدانی تہ ءَ مردمانی آوار جنگ ءُ گار کنگ یکشل ءَ برجاہ اَنت-