TBP Balochi

ھمے گوزوکیں سال ءَ سرجمیں جھان ءَ اھوالکارانی کوش ءِ وئیل گوستگیں ساپ ءَ چہ سِی درسد گیش گندگ ءَ اتکگ اَنت-

ھال سرکنوکیں ادارہ ایسوسی ایٹڈ پریس ءِ رد ءَ آدینگ ءِ روچ ءَ شنگ بیتگیں یک درشانے ءَ گوشگ بیتگ ہ سال دوھزار ءَ بیست ءُ دو ءَ شست ءُ ھپت اھوالکار کار ءِ وھد ءَ کُشگ بیتگ اَنت-

انٹرنیشنل فیڈریشن آف جرنلسٹس (آئی ایف جے) ءِ رد ءَ گوستگیں سال ءَ کچ چل ءُ ھپت بیتگ اَنت-

برسلز ءَ ھستیں انٹرنیشنل فیڈریشن ءِ رپورٹ ءِ رد ءَ روس ءُ یوکرین جنگ ءَ ہیٹی ءَ شورش ءُ میکسیکو ءَ ناشریں ٹولیانی اھوالکارانی سر ءَ لٹ ءُ کُٹی وئیل گیش بیتگ اَنت-

رپورٹ ءِ رد ےَ اے وھد ءَ سرجمین دنیا ءَ سَے سد ءُ ھپتاد ءُ پنچ اھوالکار بندیگ جاھاں بند اَنت اشانی توک ءَ درستاں گیش کچ چین ءَ اَنت-

میانمار ءُ ترکی ءَ ھم اھوالکارانی بازیں کچے ھوار اِنت گوستگیں سال ءَ سَے سد ءُ شست ءَ پنچ وتی ھمک روچیگیں کارانی پژدر ءَ گرگ بیتگ اَنت میڈیا ءَ گوں بندوکیں مردمانی سر ءَ زوراکی گیش گندگ ءَ اتکگ اَنت-

انٹرنیشنل فیڈریشن آف جرنلسٹس ءَ سرکاراں چہ لوٹ کتگ کہ آ اھوالکارانی پھریزگ ءُ آجوئی اھوالکاری ءَ گامگیج بہ زیر ایت-

آئی ایف جے ءِ جنرل سیکریٹری انتھانی بیلنگر ءَ یک درشانے ءَ گشتگ کہ اھوالکارانی پھریزگ ءِ بے سوبی ھم مردمانی شاتمانی ءَ کنگ ءَ اِنت کہ آ آجوئی ءِ اھوالکاری ءَ دارگ ءِ کوشش ءَ اَنت ءُ شھریاں چہ وتی لیڈرانی دزیانی پاشک کنگ ءِ نیزوی کنگ لوٹ اَنت-

درشان ءَ گشگ بیتگ کہ سرکار ءَ اے گپ منینگی اِنت آ زوراک ءُ زورمندین تاکتاں چاگردی کاراں دزمان جن مہ کن اَنت-

آئی ایف جے ءِ رپورٹ ءِ رد ءَ ھمے سال ءَ درستاں گیش اھوالکار یوکرین ءَ کُشگ بیتگ اَنت-

اشانی توک ءَ گیشترینانی سیادی یوکرین ءَ چہ بیتگ ءُ بلے جتا جتا راجاں گوں بندوکیں ھم ھوار بیتگ اَنت ھنچش امریکہ ءِ ڈاکومینٹری تاکر کاف برینٹ رینارڈ جنگ ءِ وھد ءَ کشگ بیتگ ات-

یوکرین ءَ اھوالکارانی کوش درستاں گیش جنگ ءِ بندات ءَ پیش اتکگ بیتگ اَنت-

آئی ایف جے ءِ رد ءَ پاکستان ءَ ھمے سال ءَ پنچ اھوالکار کُشگ بیتگ انت ٹولی ءَ کولمبیا ءَ اھوالکارانی گیشیں ترس ودی کنگ ءِ بیھار داتگ اَنت-

دوحہ گتر ءَ برجاھیں فیفا ورلڈ کپ ءِ کوارٹر فائنل ءَ برازیل ءُ نیدر لینڈ سیمی فائنل ءِ سربوگ ءَ بے سوب بوتگ ءُ ورلڈ کپ ءَ در اتکگ انت ءُ وھدیکہ کروشیا ءُ ارجنٹینا ءَ پلانٹی شوٹ ءَ گوازی کٹ اِتگ انت ءُ سیمی فائنل ءَ سربوگ ءَ سوبمند بوتگ انت –

دوشی شپ ءَ ایجوکیشن سٹی فٹبال پٹ ءَ بوتگیں کورٹر فائنل ءِ اولی گوازی کروشیا ءُ برازیل ءِ میان ءَ کنگ بوتگ کہ کروشیا ءَ پیلانٹی شوٹ ءَ گوازی کٹ اِتگ –

برازیل ءُ کروشیا ءِ میان ءَ بوتگیں گوازی ءَ ھردو ٹیماں جوانیں لیب پیش داشتگ تاں دومی ھاپ ءَ ھچ نیمگ ءَ گول دیگ نہ بوتگ بلے دومی ھاپ ءِ گیشی ملٹانی تہ ءَ برازیل ءِ نیمگ ءَ لیبی نیمار ءَ یک گولے داتگ بلے کروشیا ءِ نیمگ ءَ لیبی برونو ءَ گول موک اِتگ ءُ ھردو ٹیم دیمیگ بوتگ انت کہ پیلانٹی شوٹ ءَ کروشیا ءَ گوازی کٹ اِتگ ءُ برازیل چہ ورلڈکپ ءَ درکتگ –

دوشی شپ کوارٹر فائنل ءِ دومی گوازی ارجنٹینا ءُ نیدرلینڈ ءِ میان ءَ لوسیل فٹبال پٹ ءَ کنگ بوتگ کہ ارجنٹینا ءَ پیلانٹی شوٹ ءَ گوازی کٹ اِتگ –

ارجنٹینا ءُ نیدرلینڈ ءِ میان ءَ بوتگیں گوازی ءَ ھردو نیمگاں دو دو گول دیگ بوتگ ءُ ھردو ٹیم دیمیگ بوتگ انت- ارجنٹیا ءِ نیمگ ءَ اولی گول لیبی مولینا ءَ سِی ءُ پنچمی ملٹ ءَ داتگ ءُ پد ءَ دومی ھاپ ءَ لیونل میسی ءَ پیلانٹی شوٹ ءَ دومی گول داتگ وھدیکہ دومی ھاپ ءَ نیدرلینڈ ءِ لیبی واؤٹ ءَ ھردو گول موک اِتگ انت تاں گوازی ءِ گڈسر ءَ ھچ نیمگ ءَ گول دیگ نہ بوتگ ءُ ھر دو ٹیم دیمیگ بوتگ انت گڑا پیلانٹی کنگ بوتگ کہ پیلانٹی شوٹ ءَ ارجنٹینا ءَ گوازی کٹ اِتگ ءُ نیدرلینڈ چہ ورلڈ کپ ءَ در کُتگ ءُ وت سیمی فائینل ءَ.سر بوتگ –

کتاب: تاریخ قلات بلوچ قوم و بلوچستان کے پس منظر ( زمانہ قبل از تاریخ تا حال)

نبشتہ کار: محمد حنیف قلاتی، محمد یونس مینگل

چمشانک: سمیع بلوچ

دومی بھر ءُ گڈی بھر

دی بلوچستان پوسٹ

اولی رند ءَ راجی لشکر ءَ نوری تیار کنت ءُ یک یک انچیں انتزامی سسٹم ءِ برجم کنت کہ قلات ءِ توک ءَ اولی بر یک مزن وزیرے( پرائم منسٹر ) دارگ بیت کہ تمامیں داکلی ءُ ھارجی امورانی چار ءُ بچار ءَ کنت نوری ءِ وھداں قلات ءِ تاکتوریں ھمساھگاں چہ یکے احمد شاہ ابدالی بیت کہ وتی زھانت و بھادری ءَ سک نامدار بیت ءُ نوری ءِ سیاسی بسیرت ءِ مزنیں مداہ ءُ لوٹوکیں بیت ءُ اولی رند ءَ نوری ءِ دور ءِ حکومت ءَ شاہ افغان ابدالی منّیت ءُ نوری ءَ یک سرجمیں رھبرے تسلیم کنت ءُ نوری ءِ ھکمرانی چِل سالاں گیش وتی تمامیں جھل ءُ بُرزیاں رواں دواں بیت ءُ نوری احمد شاہ ابدالی ءِ ہمراھی ءَ ھندوستان ءِ توک ءَ بوھوکیں تمامیں جنگانی تہ ءَ پیش پیش بیت 1750ء تا 1758 ء نوری مکران ءِ زکریانی سر ءَ 9 اُرش کنت کہ ایشی ءِ تہ ءَ لکھانی ھساب ءَ بلوچ زکریانی نسل کُشی کنگ بیت 1957ء ءَ مشھد ءِ سر ءَ ھوں ابدالی ءِ ھمراھی اُرشے کتگ ءُ 1763ء ءَ دنیا ءِ نامداریں سیمی جنگ ” پانی پت” ءِ تہ ءَ ھوں بھر زور ایت کہ ایشی ءِ تہ ءَ 25 ھزار بلوچ لشکر جنگول بھر زور انت ءُ اے جنگ ءِ تہ ءَ باج برگ ءِ تہ ءَ بلوچانی یک باز مزنیں کردارے بیت ءُ نوری ءِ مستریں کارنامہ ھماھاں چہ یکے ھمے ھوں بیت کہ اولی نبشتگیں قلات ءِ ” آئین ” ءَ دیما کار ایت کہ بلوچ دود ءُ دودمان روایاتانی سر ءَ بیت کہ تا مروچی ساروان ءُ جھلاوان ءِ تہ ءَ برجم اِنت قلاتی ءَ نصیر خان نوری ءِ دور گوں سرجمیں رنگ ءَ نبشتگ ءُ ایش ھوں نبشتگ کتگ کہ ابدالی ءُ نوری ءِ لشکرانی دیم پہ دیمی جنگ ءَ ھوں مستونگ ءِ تہ ءَ بیت بلے ابدالی ءَ وھدے نوری ءِ تمامیں نیکی ءَ شری کہ دیم ءَ کاینت گڑا جنگ کنگ ءَ چہ گیشتر سِلاہ کنگ ءَ شرتر سرپد بیت ( ابدالی شر زانت کہ نوری بھادریں لشکر ءِ ستک اِنت تاں دممرت جنگ کن آں ) ءُ نوری ءِ گون ءَ یک نبشتگیں ایگریمنٹے کنت ءُ وتی اے پیسلہ ءَ واپس زور ایت کہ ھمے سوْب ءَ کہ ابدالی قلات ءِ سر ءَ لشکر کشی کنت “خان اعظم نوری شاہ افغان ءَ ھچ وڑیں سان ءُ سانکشی نہ دنت ” بزانکہ زر ءُ لشکری( ابدالی وھدے گند ایت ریاست قلات یک سیر ءُ آبادیں ریاستے، یک مزنیں لشکرے ھست اِنت گڑا مال ءُ زر ءِ لوٹ ءَ کنت کہ ارچ تاکتوریں ھاکم وت ءَ چہ کمتر ءُ کستریں ریاستاں چہ لوٹ کنت بلے خان نوری نصیر ساپ جواب کنت) ایش ھوں ایگریمنٹ ءِ تہ ءَ نبشتہ بیت کہ اگاں شاہ افغان گوں دگہ دشمنے ءَ جنگ کنت خان وتی لشکر ءَ گوں کُمک کنت ءُ ایشی ءِ بدل ءَ خان ءَ بادشاہ افغانستان یک لکھ کلدار نگد ءُ جنگی ساز ءُ سامان تیر ءُ توپنگ ءُ گولہ بارود ءِ ھرچ ءُ درچاں دنت نوری 45 سال قلات ءِحاکم ءُ خان بیت ءُ 1794ء ءَ گنداوہ ءَ بیران بیت ءُ بیرانی ءِ وھد ءَ ساروان ، جھالاوان ، گنداوہ ، ڈیرہ جات ءُ کیچ مکران ءِ یک کسانیں بھرے سلطنت قلات ءِ بھر بیت اِنت نوری ءَ چہ رند قلات ءِ میری مدام سردارانی سرکشی ءُ سازشانی سوْب ءَ نامدار بیت ءُ دگہ کس ھوں نوری ءِ وڑیں ھاکمیت ءِ کُت نکنت نوری ءِ بیرانی ءَ رند خان محمود خان ھپت سال ءِ عمر ءَ ( ریاست کلات ءِ کم عمر تریں خان )1794ء تا 1821ء ءَ خان قلات بیت بلے بھرام خان کہ خان محمود ءِ ناکو زھگ بیت ءُ محمود ءَ خان قلات تسلیم نہ کنت ءُ جنگ کنت ساروان ءُ جھالاوان ءَ ابید مکران ءُ دوُر ءُ دراجیں ھند کہ بنت وتی وتی آزاتی ءِ جار ءَ جن اَنت ءُ سردار بھرام ءِ نیمگ ءَ بنت بلے نوری ءِ دو دگہ بچک کہ محمود خان ءِ براتو (ھکیگیں برات نہ بنت ) مصطفٰی ءُ رحیم خان بنت کہ نوری ءِ وڑیں بھادر ءُ نہ ترس بلوچ بنت وتی برات ءِ دست ءِ راست جوڑ بنت ءُ مصطفی نوری ءِ بیرانی ءِ وھد ءَ گنداوہ ءُ ڈیرہ جات ءِ گورنر بیت کہ سکیں ترند تبیں انسانے بیت ھمے سوْب ءَ اے دراھیں دمگانی انچیں امن ءُ امان ءِ بیت کہ ھچ خان کلات ءِ زمانگ ءَ چُشیں امن گندگ ءَ نئیت بلے وتی برات رحیم خان ءِ دست ءَ “بھاگ” ءِ نزیک ءَ کُشگ بیت ءُ رحیم خان ءُ پسھی اُرش ءَ سک ٹپی بیت ءُ لھتے وھداں رند رحیم خان ھوں مصطفٰی خان ءِ ھون ءِ بدل ءَ “کچھی” ءِ نزیک ءَ گوں وتی بازیں ھمراھاں کُشگ بیت محمود خان 1821ء قلات ءَ بیران بیت اِنت ءُ 1821ء ءَ خان مھراب خان نوکیں ھاکم ءِ کلات جوڑ بیت ءُ ھشتمی خان میر محمود خان ءِ زھگ بیت اِنت مھراب خان ءُ وتی دور ءِ ٹکی سردار ءُ ھکومتی اگدودارانی تھی پندلانی سک باز دیمپانی کنگ کپ ایت ءُ ھمے پندلانی سوْب ءَ شاہ افغانستان ءُ انگریز سرکار ءَ را مدام ھمے دروگیں ھال دیگ بیت کے خان مھراب خان یک اُرشے ءِ تیاری کنگ ءَ اِنت ءُ لشکر ءَ مزن کنگ ءَ اِنت گڑا شجاح الملک کہ شاہ افغان بیت ءُ وتی مُلک ءِ تہ ءَ سکیں نگیگیں جاورانی دیمپان بیت وتی مُلک ءَ یل کنت ءُ خان مھراب خان ءِ باھوٹی ءَ کیت ریاست قلات ءَ پناہ زور ایت گڑا خان مھراب خان وتی باھوٹ ءَ باز ازت ءُ شرپ دنت ءُ سکھ ءُ برتانیہ ءِ ایجنٹانی زور ءَ چہ بلوچستان ءَ تاں پنجاپ ءَ پہ پھریزی ءَ سر کنت بلے الملک شجاح گوں خان کلات ءَ درو ھیت ءُ دھوکہ کنت ءُ انگریز سرکار ءَ سکین دنت کہ خان مھراب ءِ سر ءَ اُرش بکنت انگریز شجاح الملک ( مفرور) ءُ سکھ بلوچ ءُ ایندگہ گماشتگانی کُمک ءَ چہ یک انچیں وھدے ءَ اُرش کنت کہ ریاست کلات ءِ گیشتر جنگول ءُ مھلوک زمستان ءَ سندھ ءِ نیمگ ءَ سپر کناں ءُ کلات ءِ سر ءَ 1839ء ءَ یک تُرندین اُرشے کنان ءَ بلے مھراب خان سلاہ چَگل دیگ ءِ بدل ءَ گوں وتی 300 جنگولاں انگریز ءِ دیم ءَ دار ایت ءُ جنگ کناناں گوں وتی ھمراھاں نمیران بیت ءُ “نمیرانیں خان” ءِ نام ءَ انگت زانگ بیت خان مھراب خان ءَ رند بد بھتی ءَ ھچ رھبند ریاست کلات ءِ وت واجھی خان نہ بنت ءُ انگریز ءُ انگریز ءِ گماشتیانی درنگازی ءُ گداریں سردار ءُ میر ءُ ھاکمانی دلاری ءَ ریاست کلات ءِ تھنا گلام نہ بلکیں بازیں ٹُکّرانی تہ ءَ بھر کنگ ءُ ذمہ وار بنت خان مھراب خان ءُ ھمراھیں بامردیں سردارانی نمیرانی ءَ کدی ھوں انگریز سرکار دنیا ءِ دیم ءَ نیار ایت ءُ مدامیگیں دروگیں دپترے ءَ بلوچ ءِ جُھد ءَ چیر دنت ءُ وتی ایجنٹانی ھمراھی ءَ کلات ءِ سر ءَ داں دومی جھانی جنگ ءَ ھکمرانی کنت دیمتر ءَ خان شاھنواز خان بیت کہ مھراب خان ءِ ناکو زتک بیت ءُ نمیرانیں خان ءِ زمانگ ءَ ایشی ءِ پت میر احمد یار خان واک ءِ جنگ ءِ تہ ءَ کُشگ بیت انگریز سرکار زانت شاھنواز مئے اشارھانی سر ءَ بیت ءُ ھمے واستا خان کلات جوڑ کنگ بیت رند ءَ خان نصیر خان سانی شاھنواز ءِ زند ءَ خان بیت چیا کہ نصیر خان سانی نمیرانیں مھراب خان ءِ چُک بیت ءُ نوری ءِ پیمیں بھادریں سرمچارے بیت پد ءَ وتی پت ءِ کوش ءِ بدل ءِ گِرگ ءَ مدام دل ءَ ئِے بیت ءُ گوں انگریزاں جنگ کنت ءُ لوٹ ایت کہ انگریزاں چہ وتی مُلک بلوچستان ءَ بہ گَلین ایت ءُ شپ ءُ روچ راجی لشکر ءِ تیاری ءَ گوں دزبند بہ بیت بلے انگریز سرکار وت ءَ ھاکم ءُ زورگیر سرپد بنت ءَ خان ثانی ءَ سرکش ءُ گدار سرپد بنت بلے خان ثانی وتی کاسداں شاہ افغانستان شجاح الملک ءِ کر ءَ پہ کمک ءَ دیم دنت ءُ اکرار کنت کہ کابل ءِ زیر دستین بلوچ دمگانی ( قندہار ، نمروز ) لوٹ ءَ نکنت بس کُمک لوٹ ایت انگریز ءِ ھلاپ خان ثانی انگریزانی دو ایجنٹ ” لیفٹنٹ لوڑے ءُ چارلس میسن ” کہ بازیں بلوچانی کوش ءُ زلم ءُ زوراکیاں ھوار بنت دزگیر کنگ بنت ءُ بندیگ بنت ءُ ایشاں خان لشکر ءِ مدام ھمراہ کنت ۔ (میسن ھمے مرد اِنت کہ مھراب خان ، شاھنواز خان ءُ مھراب سانی ءِ وھد ءِ دراھیں ھالتانی سر ءَ وتی چم دیداں نبشتگیں رنگ ءَ شِنگ کنت کہ بازیں راستی ھاں چیر دنت ) میسن ءَ چہ کید ءَ در کنگ ءُ گوں انگریزاں گپ کنگ ءِ واستا شال ءَ دیم دیگ بیت بلے لوڈے ءَ بلوچی لشکر ءِ ھمراہ بیت وھدے خان ءِ لشکر بہ ھمرائی ءِ لوڈے مستونگ ءَ چہ دیم پہ ڈھاڈر روگ ءَ بنت کہ گوں انگریز لشکر ءَ دیم پہ دیمی جنگے بیت ءُ خان ءِ لشکر ءَ شکست بیت ءُ یک لشکری ءِ ” قاسم لھڑی” لوڈے ءِ سر ءَ بُر ایت ءُ چگل دنت اے وئیل ھنیپ قلاتی ءِ ھساب ءَ 1840ء بیت قلاتی ءَ وتی کتاب تاریخ قلات ءِ تہ ءَ بلوچ ءُ انگریزانی جنگانی شکست ءُ فتع یابی ءِ یک مزنیں داستانے چہ دیمترے خوانین قلات ( 1893 تا 1948ء) ءَ نی دورے ھکمرانی ءِ تہ ءَ نبشتہ کُتگ اَنت ءُ ساراوان ، جھالاوان ءُ لسبیلہ ءِ تہ ءَ بوھوکیں مزن مزنیں جنگولی زکر ھوں گوں درستین گپان ءَ نبشتہ کُت اَنت خان خدائیداد خان ، خان میر محمود خان دوئم ، خان اعظم جان ءُ سینزدھمی ءُ گُڈی خان قلات، خان اعظم میر احمد یار خان ءِ دور بیان کُتگ اَنت-

اے کساس سد سالاں گیش انگریزی سرکار ءِ قلات ریاست ءِ تہ ءَ انوگیں بلوچستان ءِ بھر ءُ بانگ کنگ بیت بلوچستان ءِ آجوئی لوٹوکین سردار ءُ میر ءُ ھاکم سزا دیگ بنت گدار ءُ دلاراناں مزن مزنیں اگدو زمین ءُ جائیداد دیگ بنت کراچی کہ یک خان قلاتے ءِ ھون ءِ بھا ءَ ریاست کلات ءِ ھوالہ کنگ بیت انگریز واپس سندھ ءَ دنت ءُ ڈیرو جات ( ڈیرہ غازی خان ،ڈیرہ اسماعیل خان ) پنجاب ءَ دیگ بنت ءُ خان میر محمود خان ءِ دور ءِ تہ ءَ انگریز بلوچ ءَ کمزور کنگ ءِ ھچ کسر پشت نگیج ایت برٹش بلوچستان ءِ جوڑ کنگ بیت انگریز سرکار کپٹن رابرٹ سنڈیمن سرجیمس براون ءُ کپٹن بین ءِ وڑیں چالاک ءُ مکاریں افیسر بلوچستان ءَ دار ایت کہ اے بلوچ ءِ نپسیات ءَ شر سرپد بنت ءُ بلوچستان ءِ گلامی ءَ گیشتر ءُ شرتر مھکم کنگ ءَ کارمرز کنت انگریز ءِ چمّاں کہ یک چیزے کُنٹگ بیت ءُ آ بیت نوری نصیر خان ءِ زمانگ ءَ ریاست قلات ءِ نام ءَ یک مھکمیں ءُ پراہ ءُ شاگانیں مُلکے دنیا ءِ نکشہ ءِ سر ءَ جلواگر بوگ اِنت –

نوٹ: من لوٹاں گیشتر نبشتہ بکناں بلے من ءُ چو سنڈیمن ، سرجیمس ءُ بین ءِ وڑ ءَ بلوچ وانوکانی تب ءُ جاوراں شر سرپداں ھمیشکا ھمیدا چہ وتی چمشانک ءَ گونڈ گراں اُمیت کناں اے کتاب ءِ وانگ ءَ رند شُما ( کتاب مھرم ءِ سنگت ) بلوچستان ءِ جاوراں (کہ ریاست قلات اِنت) ءُ جنگی ھالاتانی شریں وڑے ءَ اندازہ جت کن ئے ءُ بلوچ ءِ راج دپتر ءِ پھمگ ءَ باز مشکلاتانی دیمپان نہ بہ ئے من شُمئے منتواروں گوں نیکیں واھگ ءُ ھمے اُمیت ءُ اجازت لوٹاں کہ وانگ ءَ شُما یک الّمیں کارے سرپد بہ ئے ءُ مدام اے کار ءَ دیم ءَ براں بہ ئے پہ وت ءُ پہ وتی راج ءِ رھبری ءِ واستا۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ جتا جتائیں ھند ءُ دمگانی عالم دیناں زھرشانی درگت ءُ مولانا عبدالحمید بلوچ ءِ پلامرزی ءَ وتی درشان داتگ اَنت-

سر بیتگیں ھالانی رد ءَ ھپت دسمبر ءَ پھرہ، بنپور، دلگان، لاشار، پنوج، بزنان ءُ جگاہ ءِ شھر ءَ عالم دینانی یک نیادے برجم دارگ بیتگ ءُ یک ھمگرنچیں لیکھی یے درشانے داتگ ءُ سرجمیں ڈیھ ءَ زھرشانی ءُ وئیلانی پژدر ءَ وتی لیکہ درشان داتگ اَنت-

اے نیاد پھرہ ءَ الحسنین میست ءَ برجم دارگ بیتگ ءُ ڈیھ ءَ گوستگیں زھرشانی ءُ دزاپ مسیت ءِ امام بلوچ عالم دین مولوی عبدالحمید اسماعیل زئی ءِ پلامرزی ءَ جار جتگ ءُ ھمگرنچیں درشان ونتگ اَنت –

اے درشان ءَ “انصاپ ءُ کانونی آجوئی ءِ گپ ءِ گوشدارگ “ایران ءُ نسل ءُ رنگانی چارگ ” راج ءِ گوستگیں زھرشانیانی درگت ءَ جتا جتائیں بنگپانی سر ءَ لیکھانی درشان بیتگ اَنت-

اے نیاد ءَ ھستیں مولوی عبدالحمید “سنی برادری ءِ سھریں لکیر ” آئی ءَ را میان اُستمان ءُ نیکراھی ءِ دھشتے لیکھے ” آئی ءِ لیکھ درشان اتگ اَنت آئی ءِ درستین لیکھ ءُ زانشتانی سر ءَ لوٹ ءُ بیھار ءُ کمشرپیانی ھلاپ ءَ زھر ءِ درشان کتگ –

اے ھمگرنچی درشان ءَ سی ستمبر ےِ ھونی زاھدان، چار نومبر ءَ ھاش ایرانی زوراکی ءُ کردستان ءُ ایران ءِ دگہ شھراں زیردستیں مھلوک ءِ کُشت ءُ کوشانی ایرجنی ءُ کوشکارانی پجار ءُ ھلاس کنگ ءِ کڈنی کتگ اَنت-

اے درشان ءَ گوستگیں کوشی نشانگ کنگ، پاھو دیگ، زھرشانی کنوکانی ھلاپ ءَ جنگی سزا، زھرشانی کنوکاں ڈیھ ءِ پروشگ ءِ بھتام ءِ ھلاس کنگ ءُ دگہ دگہ ھوار بیتگ اَنت-

وتی کینگی ھلاس کنگ ءُ آجوئی ءِ گپ کنگ ءُ ند ءُ نیکراھی آجوئی ءِ راست کنگ،سیاسی بندیگ ءُ گوستگیں زھرشانی ءُ دزگیر کنگ بیتگیں مردمانی یل کنگ، مردمانی باپاری جیڑوانی ھل کنگ، اسکالرز، یونیورسٹیانی پروفیسر، نودربر ءُ وانندگیں مردمانی پھریزگ ءُ زھرشانی کنوکاں لس چیز ءُ راجی جائیدادانی سر ءَ اُرشانی دارگ ءِ کڈنی کتگ اَنت-

سربوتگیں ھالانی رِد ءَ دوشی شپ پاکستانی پوج ءَ تمپ ءِ دمگ کوھاڈ ءُ دازن ءَ بیڑ برتگ ءُ دو ورنا زورانسری آوار جتگ ءُ بیگواہ کتگ انت –

گیشیں ھالانی رِد ءَ پاکستانی پوج ءَ دوشی شپ ادار یک ءَ تمپ دمگ دازن ءَ عبداللہ ءِ گِس ءَ بیڑ بُرتگ ءُ زوراکی کنان ءَ آئی ءِ ورنائیں زھگ سھیل ء عبداللہ آوار جتگ ءُ گوں وت برتگ –

ھمے وڈ دوشیگیں شپ ءِ ادار سَے ءَ پاکستانی پوج ءَ تمپ ءِ دمگ کوہاڈ ءَ ھم بیڑ برتگ ءُ زوراکی کنانءَ چاکر ء رسول بخش زورانسری آوار جتگ ءُ گوں وت برتگ

زانگ بہ بیت زورانسری آوار جنگ بوتگیں چاکر ءِ مستریں برات ءَ پیسر ءَ ھم پاکستانی پوج ءَ آوار جتگ ءُ دو سالاں زنداناں بندیگی ءَ پد یل کنگ بوتگ ءُ پدا دوشی شپ چاکر برگ بوتگ –

دومی نیمگ ءَ گوستگیں روچاں مند ءِ دمگ گوبرد ءَ بیگواھیں شکاری پیر محمد ءُ پنجگور ءَ ھمے ماہ ءَ بیگواہ بوتگیں عبداللہ ءُ آئی ءِناکو محبوب یل بوتگ انت –

روکپتی بلوچستان ءَ اے سَے ماہ ءِ گوزگ ءَ پد ھم آدینگانی روچ ءَ زھرشانیانی درچ ھلاس نہ بیتگ اَنت-

ھمک آدینگ ءِ نماز ءَ پد اود ءَ مردم پہ انساپ ءُ آیانی یاتگیری ءَ زھرشانی ءُ روانک کشگ ءَ اَنت، زھرشانی شھر ءِ جتا جتائیں ھلکاں پند جنان ءُ واتر بنت-

مروچی زھرشانی زاھدان ءَ نمازیاں ھوار ھوار زالبول زھرشانی ءِ بھر بیتگ اَنت اود ءَ گندگ بیت اِنت زھرشانی ءَ آ ’ مرگ بر خامنہ ای ‘ مرگ بر سپاہ ‘ مرگ بر دیکتاتور بزانکہ پوجی زور ‘ مردگ بات اَنت-

مروچی پد ءَ زاھدان ءَ ھوار ھوار روکپتی بلوچستان ءِ دمگ ھاش، پشین ءَ ھم زھرشانی روانک کشگ بیتگ اَنت اود ءَ زھرشانیانی دارگ ءِ ھاتر ءَ ایرانی لشکر ءَ تیرگواری ھم کرتگ ات بلے دگہ جانی تاوانانی ھال نہ بیتگ اَنت-

زانگ بہ بیت اے زھرشانی سِی ستمبر ءَ پد ترندیں رنگے ءَ گندگ بیتگ ات اَنت اود ءَ ایرانی لشکر ءَ تیرگواری کرتگ ات کساس سد ءِ کچ ءَ مردم کُشگ ءُ زدگ کنگ بیتگ ات اَنت-

اے زھرشانی پانزدہ ستمبر ءَ روکپتی بلوچستان ءِ تیابدپی دمگ چھبار ءَ یک کسان سالیں جنکوے ئے گون ءَ پولیس ءِ آپیسر ابراھیم کوچکزئی ءِ زوراکی ءِ ھلاپ ءَ پد بندات بیتگ اَنت-

روکپتی بلوچستان ءِ تیابدپی شھر چھبار ءَ ھپتاد ءُ دو روچ ءَ پیسر ایرانی چیریں ادارھانی دست ءَ آوار جنگ بیتگیں علی اکبر خوش کنار داں انگت ءَ یل نہ بیتگ-

گیشیں ھالانی رد ءَ علی اکبر خوش کنار ء فقیر مھمد جھمنند کسرکند ءِ کہ آئی ءِ کھول ءَ گوشتگ ھپتاد ءُ دو روچ ءَ پیسر علی اکبر گرگ ءُ بیگواہ کنگ بیتگ-

آئی ءِ کھول ءِ رد ءَ چھبار ءَ ھما وھد ءَ گرگ بیتگ پانزدہ سالی ئیں جنکو ماھو ءِ گون ءَ بیتگیں زوراکی ءِ ھلاپ ءَ زھرشانی کنگ بیتگ ءُ چریشی ءَ علی اکبر گرگ بیتگ ءُ پد ءَ آئی ءِ باتو ءَ ھچ ھال نیست اِنت-

آئی ءِ کھول ءِ رد ءَ علی اکبر ایرانی چیریں ادارھاں آوار جتگ ءُ برتگ بلے تنی وھدی آئی ءِ درگت ءَ ھچ ھال دیم ءَ نیاؤرتگ اَنت-

علی اکبر خوش کنار کسرکند ءِ جھمنند اِنت ءُ آئی ءِ بیگواھی ءَ ھپتاد ءُ دو روچ سرجم اِنت آئی ءِ کھول ءِ رد ءَ علی اکبر ءِ بیگواھی ءِ درگت ءَ چیریں ادارھانی واک جست ءُ پرس کتگ اَنت بلے اے درگت ءَ آیاں بے تواری درشان کتگ –

آئی ءِ کھول ءَ لوٹ کتگ ءُ گوشتگ کہ ما علی اکبر ءِ بیگواھی ءَ زھنی جیڑگانی آماچ اِنت مارا سرپدی ءُ علی اکبر یل کنگ ءِ دزبندی ءَ کن ایں-

قطر ءَ برجاھیں فیفا ورلڈ فٹبال ورلڈ ءِ اولی کوارٹر فائنل مروچی پنچ رند ءَ میان اُستمانی چیمپئن بیوکیں برازیل ءُ گوستگیں ورلڈکپ ءِ رنر اپ کروشیا ءِ دیم پہ دیمیگ بنت ءُ اے میچ قطر ءِ ایجوکیشن سٹی اسٹیڈیم ءَ کنگ بیت اِنت-

برازیل ءَ پشمبے ءِ روچ ءَ زرباری کوریا ءَ پروش داتگ ات ءُ کوارٹرفائنل ءَ پہ وت ءَ جاہ جوڑ کرتگ ات-

نائن سیون اسٹیڈیم ءَ کنگ بیتگیں اے گوازی ءَ برازیل ءَ چار گول کتگ ات ھمے وڑ ءَ زرباری کوریا ءِ ٹیم ءَ بس یک گولے ءِ کنگ ءَ سوبمند بیتگ ات ھمے وڑ ءَ پنچ دسمبر ءَ کروشیا ءَ جاپان پروش داتگ ات ءُ کوارٹر فائنل ءَ وت ءَ رسینتگ ات-

کروشیا ءَ جاپان ءِ دیم ءَ سَے گول کتگ ات ءُ پروش داتگ ات ءُ میچ ءِ پیسلہ ءَ پینلٹی شوٹ آؤٹ بیتگ ات-

زانگ بہ بیت فیفا ورلڈ کپ ءِ فائنلز مروچی بندات بیت اِنت ءُ داں یازدہ دسمبر ءَ برجاہ بیت اِنت- فیفا ورلڈ کپ ءِ دومی کوارٹر فائنل باندا بزاں شمبے ءِ روچ ءَ ارجنٹائن ءُ نیدرلینڈ ءِ میان ءَ لوسیل اسٹیڈیم ءَ دیم پہ دیمیگ بنت-

سیمی کوارٹر فائنل باندا ھم مراکش ءُ پرتگال ءِ میان ءَ التھمامہ اسٹیڈیم ءَ کنگ بیت اِنت-

یکشمبے ءِ روچ ءَ چارومی کوارٹرفائنل انگلینڈ ءُ فرانس ءِ میان ءَ البیت اسٹیڈیم ءَ دیم پہ دیمیگ بنت-

فیفا ورلڈکپ دوھزار ءُ بیست ءِ سیمی فائنلز چاردہ ءُ پانزدہ دسمبر ءَ کنگ بیت اِنت ءُ ھمے وڑ ایونٹ فائنل ھژدہ دسمبر ءَ بیت اِنت-

روسی لشکر ءَ پشمبے ءِ روچ ءَ یوکرین ءِ رودراتکی دمگ ڈونیسک ءِ فرنٹ لائن ءِ سر ءَ ترندیں گولہ باری کتگ چریشی ءَ بازیں جاہ جنگ آماچ بیتگ اَنت-

برطانیہ ءِ ھال سرکنوکیں ادارہ روئٹرز ءِ رد ءَ یوکرین ءِ پوج ءِ واکدار ءَ روس ءِ سر ءَ بھتام جتگ کہ آئی ءِ نیمگ ءَ لس شھری نشانگ کنگ بیتگ اَنت ءُ اود ءَ بازیں لوگ ءُ جاگھاں تاوان رس اتگ-

واکدارانی رد ءَ گولہ باری ءِ سبب ءَ ٹوریسک نامیں میتگے ءَ یک زھگے بیران ءُ دوازدہ ماڑیاں تاوان رس اتگ-

آئی ءَ دیمتر ءَ گوشتگ کہ ڈونیسک ءِ سرجمیں فرنٹ لائن نشانگ کنگ بیتگ ءُ لائمن ءِ دمگ ءَ جاڑیگیں روسی پوجیاں پیشگامی کنگ ءِ جھد ءَ اَنت – اے ھما دمگ اِنت کہ نومبر ءِ ماہ ءَ یوکرین ءِ پوج ءَ چہ روس ءَ واتر پچگپتگ اَت-

زانگ بہ بیت روس ءِ نیمگ ءَ وتی ھمساھگ ءِ سر ءَ اُرش ءَ پد روس ءَ بازیں جاھاں پشتکنزی کنگ کپتگ-

روئٹرز ءَ وتی ھال کنوکانی چم دیتگیں مردمانی گپ جنان ءَ گوشتگ کہ باکموت ءُ اُستان لوھانسک ءِ نزیک ءَ ھوارین ھند ڈونیسک ءَ یوکرین ءِ لشکر ءَ روسی لشکر ءِ پسو راکٹ لانچرزانی گون ءَ داتگ-

گورنر اولے سینیبوف ءَ ٹیلی گرام ءَ شنگ کرتگیں یک درشانے ءَ گُشتگ یوکرینی لشکر ءَ روس ءِ نیمگ ءَ جتگیں میزائلز راہ ءَ دمتوس کتگ اَنت-

زانگ بہ بیت یک روچے ءَ پیش روسی سروک ولاددیمیر پوتن ءَ گوشتگ ات کہ یوکرین ءَ زھرناکیں سلاھانی جنگ ءِ ترس گیش بوگ ءَ اِنت دومی نیمگ ءَ امریکہ ءَ اے درشان ایر جتگ ءُ اشرا” لوزٹاک ” گوشتگ بزانکہ وت دل ءَ وت میر-

بیست ءُ چار فروری ءَ روس ءَ وتی ھمساھگیں ڈیھ یوکرین ءِ سر ءَ اُرش ءَ پد یکشل ءَ جنگ برجاہ اِنت ءُ اے وھداں روس ءَ بازیں گچینی شھر گپتگ اَنت ءُ بازیں جاھاں ریفرنڈم ھم کتگ ءُ چریشی ءَ روکپتی ڈیھاں ایراد گپتگ ات-

بلوچ اسٹوڈنٹس ایکشن کمیٹی کراچی ھنکین ءِ چیردستی ءَ ماں کراچی ءِ مزن شاہ دربرجاہ ءَ کتاب اسٹالے بلوچستان کتاب کاروان ءِ نام ءَ برجم دارگ بیتگ۔

اے کتاب اسٹال ءَ بلوچ راجدپتر، بلوچ سیاست، ءُ ادبی کتاباں ھوار بساک ءِ تاک ھم ھوار بیتگ اَنت، کتاب اسٹال ءَ مزنیں کچے ءَ کتاب دوستیں استاد ءُ نودربراں بھر زرتگ۔

بلوچ اسٹوڈنٹس ایکشن کمیٹی ءِ چیردستی ءَ بلوچستان کتاب کاروان ءِ مول ءُ مراد بلوچ نودربرانی میان ءَ کتابی باوست ءُ سیاسی چاگردے ءِ جوڑ کنگ اِنت۔

بلوچستان کتاب کاروان ءِ نام ءَ چدوپیش ھم بلوچستان ءِ جتا جتائیں جاھاں کتاب اسٹال ایر کنگ بیتگ –

بلوچ نودربرانی گوشگ اِنت اے وھد ءَ بساک پہ بلوچ نودربر ءُ بلوچی زبان ءَ مزنیں کردے پیلو کنگ ءَ اِنت کہ چریشی ءَ بازیں کچے ءَ نودربر بلوچ نودربرگل ءَ ھوار اَنت کہ آ وانگیانی سر ءَ جتا جتائیں پھناتاں کارایاں –