TBP Balochi

سر بیتگیں ھالانی رد ءَ روکپتی بلوچستان ءِ دمگ سراوان ءَ سَے بندیگیں مردم پاھو دیگ بیتگ اَنت-

پاھو دیگ بیتگیں مردمانی پجار احسان بختیاری ء علی جھمنند دزک مھرستان، مصطفیٰ قوی پنجہ ء جنگی خان جھمنند پرکنت کوھک ءُ مسلم پنام ءِ ساھوک سراوان ءِ ناماں زانگ بیتگ اَنت-

اھوالانی تہ ءَ گوشگ بیتگ کہ ھرسئیں مردم گوستگیں بامسار ءَ ماں سراوان ءِ زندان ءَ ایرانی آمیدگس ءِ ھکم ءَ پاھو داتگ اَنت-

اھوالانی تہ ءَ گوشگ بیتگ کہ ھرسئیں مردم کوش ءِ بھتام ءَ بازین سالاں پیسر گرگ بیتگ اَنت ءُ گوستگیں روچ ءَ آیانی پاھو دیگ ءِ سر ءَ گامگیج زیرگ بیتگ-

ھمے وڑ ءَ روکپتی بلوچستان ءِ بنجاھی شھر زاھدان ءَ ھم یک مردمء پاھو دیگ بیتگ-

پاھو دیگ بیتگیں مردم ءِ پجار عبدالواسع براھوئی ءِ نام ءَ زانگ بیتگ کہ آ ایرانی سال نود ءُ ھپت ءَ کوش ءِ بھتام ءَ گرگ بیتگ-

زانگ بہ بیت روکپتی بلوچستان ءَ سال دوھزار ءُ بیست ءُ یک ءِ گڈسر ءَ بگر داں انیگ ءَ ھپتا ءُ نُھ مردم پاھو دیگ بیتگ اَنت کہ اشانی توک ءَ گیشتر نشہ باپاری ءَ ھوار ھوار کوش ءُ سرکار ءِ بگیرداری ءُ جتا جتائیں بھتام ھوار اَنت-

یوکرین ءِ شھر اوڈیسا ءَ روس ءِ ڈرون اُرشاں بجلی ءِ نزام تباہ بیتگ ءُ پانزدہ لک مھلوک تھاریں شپ ءِ آماچ بیتگ اَنت-

ھال سرکنوکیں ادارہ اے ایف پی ءِ رد ءَ اے اُرشاں پد یوکرین ءِ سروک ولاددیمیر زیلنسکی ءَ گوشتگ کہ شپ ءَ ایرابی ڈرونانی سر ءَ کنگ بیتگیں اُرشاں اوڈیسا ءِ دمگ ءَ ھوار دگہ شھر ءُ میتگ تھاری ءَ گپتگ اَنت-

آئی ءِ گوشگ ات کپ اے وھد ءَ اوڈیسا ءِ دمگاں پانزدہ لک شھری ابید ءِ بجلی ءَ زند گوازینگ ءَ اَنت- دمگ ءَ بجلی ءِ سر کنگ ءَ زمہ دار ھال دیگ بیتگ اَنت بیت کنت سَے ماہ ءَ یا گیش ءُ کم لگ ایت –

سروک ءِ کارگس ءِ جارکش کریلو تموشنکو ءَ گوشتگ بس ھسپتالاں بجلی ءِ پجارینگ ءِ کار برجاہ اِنت جاور ناگیگ اَنت بلے جاورھال وتی دست ءَ اَنت-

زانگ بہ بیت ھمے سال ءِ بیست ءُ چار فروری ءَ روس ءِ پوج ءَ وتی ھمساھگیں ڈیھ ءِ سر ءَ اُرش ءَ پیسر اوڈیسا ءِ بحیرہ اسود ءِ تیابدپی دمگ روس ءُ یوکرین ءِ سواد کنوکیں مردمانی تر ءُ گرد ءِ جاہ بیتگ –

دمگ ءِ گورنر میکسم مارشنکو ءَ گوشتگ کہ روس ءَ شپ ءَ شھر ءِ ’کامیکازی ڈرونز ‘ ءَ گون نشانگ کتگ آئی ءَ گوشتگ کہ اُرش ءَ پد دمگ ءَ مئے کمیونٹی ءِ بجلی شتگ اَنت-

گورنر ءِ رد ءَ یوکرین ءِ پھزداری لشکر ءَ دو ڈرون جتگ ءُ دور داتگ اَنت-

آدینگ ءِ روچ ءَ یوکرین ءِ کارگس ءَ چہ گوشگ بیتگ کہ جنگ ءَ ڈیھ ءِ تباہ کُنیں جاوراں روس یکشل ءَ گچینی جاھاں نشانگ کنگ اِنت-

گوستگیں دو شمبے ءَ ھم روس ےَ یوکرین ءِ باز گچینیں جاھاں اُرش کرتگ اَت-

دوحہ گتر ءَ برجاھیں فیفا ورلڈ کپ ءِ کوارٹر فائنل ءَ موراکو ءُ فرانس ءَ گوازی کٹ اِتگ اَنت ءُ سیمی فائنل ءَ کوالفائی کُتگ وھدیکہ پرتگال ءُ انگلینڈ چہ ورلڈ کپ ءَ در اتکگ انت –

دوشی شپ کوارٹر فائنل ءِ سیمی گوازی موراکو ءُ پرتگال ءِ میان ءَ کنگ بوتگ کہ موراکو ءَ یک گولے ءَ گوازی کٹ اِتگ ءُ وت ءَ سیمی فائنل ءَ سرکتگ – وھدیکہ پرتگال ءِ نیمگ ءَ ھچ گول اسکور کنگ نہ بوتگ – موراکو ءِ نیمگ ءَ گول لیبی یوسف ءَچِل ءُ دومی ملٹ ءَ داتگ ءُ گوازی وتی ٹیم ءِ نام ءَ کتگ –

البیت فٹبال پٹ ءَ بوتگیں کوارٹر فائنل ءِ چارمی گوازی فرانس ءُ انگلینڈ ءِ میان ءَ بوتگ کہ فرانس ءَ دو پہ یک گولے ءَ گوازی کٹ اِتگ ءُ وت ءَ سیمی فائنل ءَ سر کتگ –

فرانس ءُ انگلینڈ ءِ میان ءَ بوتگیں گوازی ءَ اوریلئین ءَ ھبدھمی ملٹ ءَ اولی گول اسکور کتگ کہ پنجاہ ءُ چارمی ملٹ ءَ انگلینڈ ءِ لیبی ہیری کینے ءَ گول موک اِتگ ءُ ھردو ٹیم دیمیگ بوتگ انت ءُ پدا گوازی ھپتاد ءُ ھشتمی ملٹ ءَ فرانس ءِ لیبی اولیویر ءَ دومی گول داتگ ءُ گوازی وتی ٹیم ءِ نام ءَ کتگ –

فیفا ورلڈ کپ ءِ سیمی فائنل ءِ اولی گوازی سینزدہ دسمبر ءَ کروشیا ءُ ارجنٹینا ءُ دومی گوازی چاردہ دسمبر ءَ موراکو ءُ فرانس ءِ میان ءَ کنگ بنت –

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بلوچستان ءِ تیاب دپی دمگ گوادر ءَ پاکستانی پوج ءِ کاروان ءِ سر ءَ ٹوھیں اُرش ءِ کُتگ –

اُرش گوادر ءِ دمگ کنڈ سول ءَ پاکستانی پوج ءِ ھاتر ءَ راشن بروکیں کاروان ءِ سر ءَ اُرش کُتگ اُرش ءَ پاکستانی پوج ءَ جانی ءُ مالی تاوان رستگ –

ھمے وڈ گوادر ءِ دمگ سائجی کنڈا سول کومب ءَ ھم پاکستانی پوج ءِ سر ءَ اُرش کنگ بوتگ ءُ اُرش ءَ پوج ءَ جانی ءُ مالی تاوان بوتگ – ھردو اُرشانی زمّہ واری بلوچ آجوئی لوٹوکیں گل بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ ءُ گوشتگ کہ اے اُرشاں پاکستانی پوج ءِ ھپت کارمند کُشتگ ءُ سلاہ دستیگ کتگ انت –

جارکش ءَ گوشتگ کہ مئے سرمچاراں گوادر ءِ دمگ کنڈا سول ءَ پاکستانی پوج ءِ ھاتر ءَ راشن بروکیں کاروان ءِ سر ءَ مزنیں سلاھاں گوں اُرش کُتگ کہ آھانی تہ ءَ یک ٹرکے ءَ سواریں سَے کارمند مُرتگ انت – آھانی سلاھانی دستیگ کنگ ءَ پد سرمچاراں دژمن پوج ءِ ٹرک مانداشتگ ءُ اے کاروان ءَ ھواریں یک دگہ گاڑی یے ھم نشانگ کُتگ کہ آئی ءَ سواریں سَے کارمند مُرتگ انت ءُ ڈرائیور زدگیں جاوراں تچگ ءُ رؤگ ءَ سوبمند بوتگ – آئی ءَ گوشتگ کہ مئے سرمچاراں اے اُرش ءِ تامر ھم جوڈ کتگ کہ ھمے زوتاں شنگ کنگ بیت –

جارکش میجر گوھرام بلوچ ءَ دیمتر ءَ گوشتگ کہ بیست ءُ پنچ رمس ءَ مئے سرمچاراں سائجی کنڈا سول کومب ءَ پوج ءِ راہ ءِ سر ءَ ھما وھد ءَ تراک ناکیں شورو کل کتگ ءُ تراکین اِتگ انت وھدیکہ دژمن ھمے دمگ ءَ لشکر کشی ءَ بوتگ – جارکش ءَ گوشتگ کہ گوستگیں روچ ءَ سرمچار ھمے جاہ ءِ چارگ ءَ شتگ انت اودا دژمن پوج ءِ پد بوتگ انت ءُ ھون ھم ریتکگ بوتگ کہ چریشی ءَ زانگ بیت یک پوجی ءِ تراکناکیں شوروانی زد ءَ اتکگ ءُ مُرتگ –

جارکش ءَ درشان ءِ گڈسر ءَ گوشتگ کہ پاکستانی پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

بلوچ یکجھتی کمیٹی گوادر ءِ نیمگ ءَ 10دسمبر ءَ انسانی ھکانی میان استمانی روچ ءِ درگت ءَ گوادر پریس کلب ءَ مراگشے برجم دارگ بیتگ اے درگت ءَ ایر کنگ بیتگیں مراگش ءَ بی وائی سی ءُ آل پارٹیز ءِ سروک ءُ گار ءُ بیگواھیں براتانی فیملی ءَ بھر زرتگ-

مرگش بیگاہ ءِ چار ءَ بندات بیتگ ءُ مراگش ءِ اولی سر ءَ گوادر ءِ چاگردی باسک مدامی بی وائی سی ءَ گوں ھمگام واجہ ماجد سھرابی تران کرتگ ءُ گار ءُ بیگواھیں مردمانی بابت ءَ گشتگ کہ ریاست باید مئے اے گاریں براتاں دیم ءَ بیار ایت ما مدام انسانی ھکانی بابت ءَ توار چست کرتگ ءُ انگت ھم کن ایں اے مئے بنیادی ھک انت ءُ ریاست ءِ ھم ھک انت کہ وتی شھریاں پھریزی بہ کنت ءُ آئی ءَ انساپ بہ دنت –

دیمترا گوادر آل پارٹیز ءِ سروک واجہ کھدہ علی ءَ وتی ھیالانی درنگازی کرتگ ءُ گشتگ کہ جنرل ایوب خان ءُ جنرل ضیا الحق سرجمی ءَ ریاست ءِ کانون پادمال کرتگ بلے اے اد ءَ مدام زور ءَ ور زور انت ءُ بے وسیں بلوچ 73 سال انت کہ زلم ءُ جبر ءِ دیمپان انت ما مدام ھر کجام پولٹیکل پارٹی ءِ فورم ءِ سر ءَ بوتگیں بلے انسانی ھکانی بابت ءَ وتی توار چست کرتگ ءُ آؤکیں وھد ءَ ھم کانون ءُ آئینی جد ءُ جُھد ءَ برجم داریں-

دیمتر ءَ گوادر ءِ کماشیں سیاسی سروک واجہ اشرف حسین ءَ تران کنان ءَ گشتگ کہ اے کانون بس ریاست ءِ ھما قوتانی واستا انت کہ آ زور ءَ ور انت من ھمے سرپد باں کہ اے ملک ءَ کانون نامیں ءُ انساپ نامیں ھچ چیزے نیست بلوچ اے وھدی بے در ءُ بے وس انت باید بلوچستان کُل پولٹیکل پارٹی اے انسانی ھلاسی ءِ زورانسری آوارجنی ءِ سر ءَ یک مُشت ءُ یک دست بہ بنت وتی توار ءَ چست بہ کن اَنت ءُ آپرین انت کہ بلوچستان کجام جیڑگ ءِ سر ءَ بی وائی سی چست بوتگ ءُ وتی توار بُرز ءُ بلند ءِ کرتگ آ توری سیلاب ءِ شکل ءَ بہ یا بلوچ نودربرانی وانگی جیڑگ بہ بنت یا گار ءُ بیگواھیں مردمانی بابت ءَ بہ بنت بی وائی سی ءِ اے جد ءُ جھد کانونی ءُ آئینی پُرایمنیں جھد ءِ کہ ھر شھری ءُ ھر کجام پارٹی ءِ ھک انت-

مراگش ءِ گُڈ سر ءَ گار ءُ بیگواھیں عظیم دوست ءِ گوھار ءَ وتی ھیال درشان کرتگ کہ عظیم دوست 2015 ءَ ٹی ٹی سی کالونی ءَ چہ آوار جنگ بوتگ ءُ تا روچ ءِ مرچی ھم بیگواہ انت من ریاست ءِ کُلیں چیر ءُ زاھریں ادارھاں چہ دزبندی کناں کہ منی برات منی لوگ ءِ چراگ ما ھپت سال انت کہ پہ وتی گار ءُ بیگواھیں برات ءِ ھاتر ھر کجام ھند ءُ دمگ پریس کلب کوئٹہ ءُ کراچی ءِ بلے بژن کہ مارا انساپ ھچ کجا نہ رس اتگ ءُ من عظیم دوست ءِ گوھار عاجزانہ دزبندی کناں کہ منی برات ءَ واپس بیار اِت اگاں ریاست ءِ مجرم انت گڑا ریاست آئین ءُ قانون ءِ پاسداری ءَ بہ کنت ءُ مئے برات ءَ وتی آمیدگساں پیش بہ کنت مراگش ءِ گڈسر ءَ اسٹیج سیکٹری بی وائی سی گوادر ءِ سروک تران کنان ءَ گشتگ کہ عظیم دوست، امیر بخش کلانچی، نسیم بلوچ، ڈاکٹر حمید محمد بخش، مراد بخش بولان کریم، رمضان بلوچ ءُ ڈاکٹر دین محمد، ھیڈماسٹر رفیق ءُ کسان سالیں سعود ناز ءُ اے دگہ کُل گار ءُ بیگواھیں برات کہ آوار جنگ بوتگ انت اے درست ریاست ءِ ادارھانی واستا اجکہ کنوکیں جستے کہ آؤکیں پدریچ اے کارستاں جست کنت ءُ یاد کنت انچوشکہ اسد بلوچ یاد کنگ بیت ھمے وڑا اے ھم انچوش یاد کنگ بنت کسان سالیں سعود ناز گوستگیں دو ماہ انت کہ گار ءُ بیگواہ انت سعود ناز یک نودربرے گوستگیں ماھاں سیلاب ءِ وھد سعود ناز وتی راجی پیلو وتی نزوریں کوپگاں زرتگ ءُ پہ بے وسیں سیلاب زدگانی ھاتر ءَ چندہ کرتگ اے وڑیں نودبرانی برگ زلم انت اے دنیا ءِ زمین ءِ سر ءَ ھر جیڑگ ءِ توجیل مھر ءُ رھمدلی انت بلے ریاستی بالادستی ءِ واگدار دروگ ءِ مقابلہ گوں دروگ ءَ کن اَنت-

آیاں گوشت چنچوک رند ءَ جوڈیشل کمیشن جوڑ بوتگ ءُ پروشتگ اے پارلیمنٹ ءِ تہ ءَ نندوکیں سیاسی مردمانی دیم سیاھی ءِ مستریں دلیل دگہ چے بوت کنت بار بار ءَ تو گار ءُ بیگواھیں مردمان ءَ رپینگ ئے ءِ البت ما دردمندانگی دزبندی کن ایں ریاست آمیدگساں کہ مئے گار ءُ بیگواھیں براتاں بیار ات بی وائی سی گوادر شمئے آؤکیں مھلوک ءِ مھربانی ءَ گر ایت ءُ گش ایت کہ گوادر پریس کلب ءِ نام گپتیں اھوالکار ءُ بلیک میلر سوشلسٹ وتی پوڑی وری ءُچاپلوسی ءَ چشیں ھچ وڑیں ھبر نشر نہ کن اَنت چشکہ گوادر ءِ تہ ءَ اھوالکارانی اھوالکاری وتی لاپ کرتگ ءُ پولٹیکل پارٹی ءُ ادارھانی تہ ءَ سرجمی ءَ بلیک میلری ءِ کوٹہ ھست انت اے نام گپتیں اھوالکار ءُ سوشلسٹاں آؤکیں وھد وت پدر کنت مرچی ءِ اے مراگش ءِ آؤکیں مھلوک ءِ ما شگرگزاریں ءُ مارا امیت انت کہ چشیں جیڑگانی سر ءَ شما مئے ھمراھداری ءَ کن ات-

ھمے وڑ ءَ بلوچستان ءِ بنجاھی شھر شال ءُ اسلام آباد ءَ ھم بیگواھیں مردمانی میان اُستمانی روچ ءِ درگت ءَ مراگش ءُ روانک کشگ بیتگ اَنت-

شال ءَ وائس فار بلوچ مسنگ پرسنز ءِ نیمگ ءَ یک مراگشے شال پریس کلب ءَ برجم دارگ بیتگ کہ اود ءَ جتا جتائیں سیاسی پاٹی، انسانی ھکانی باسک، اھوالکار ءُ جتا جتائیں مردماں ھوار ھوار بیگواھیں مردمانی کھولان بھر زرتگ-

ھمے وڑ ءَ اسلام آباد ءَ ھم نودربرانی نیمگ ءَ انسانی ھکانی میان اُستمان ءِ روچ ءِ درگت ءَ یک روانکے کشگ بیتگ کہ روانک ءَ نودربراں ھوار ھوار دگہ مردماں بھر زرتگ ءُ بلوچستان ءَ بیگواھیں نودربرانی یل کنگ ءِ لوٹ کتگ-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ بلیدہ ءُ نوشکی ءَ سرکاری کارمندانی سر ءَ بوتگیں اُرشانی زمّہ واری منّ اِتگ انت –

جارکش جیئند بلوچ ءَ وتی درشان ءِ تہ ءَ گوشتگ کہ بی ایل اے ءِ سرمچاراں بلوچستان ءِ دمگ نوشکی ءُ بلیدہ ءَ دو جتائیں اُرشاں زورگیریں پوج ءُ چیریں ادارھانی کارمند نشانگ کُتگ ءُ یک کارمندے کُشتگ ءُ سَے زدگ کتگ انت –

جارکش ءَ گوشتگ کہ اولی اُرش نوشکی بازار ءَ دشمن پوج ءِ دمگی چاریگ آغا ولی تیرباران کُتگ کُشتگ، اے مرد ءَ بازیں وھدے بیت کہ آئی ایس آئی ءِ ھاتر ءَ چاریگری کنگ ءَ بوتگ ءُ وتی دکان ٹکانہ بوتگ –

آئی ءَ گوشتگ کہ اے مرد ءَ ورنائیں جنک ءُ بچک بلیک میل کُتگ چیریں ادارھانی ھاتر ءَ کار گپتگ انت ءُ اشی ءَ ھوار ورنایانی زورانسری آوارجنی ءَ ھم زورگیریں پوج ءِ کمک کار بوتگ وھدیکہ زورگیریں پوج ءِ گوشگ ءِ پد ءَ بلوچ شھیدانی کھول ھم بازیں وڈ ڈولاں دلسیاہ کتگ انت –

” گداری کنگ ءِ سوب ءَ آغا ولی بی ایل اے ءِ نشانگ ءَ بوتگ کہ مروچی سرمچاراں سزا داتگ ءُ اے نیٹورک ءِ ایندگہ کارمند زوت نشانگ کنگ بنت –

جیئند بلوچ ءَ دیمتر ءَ گوشتگ کہ بلوچ لبریشن آرمی ءِ سرمچاراں بلیدہ دمگ میناز ءَ پاکستانی پوج ءِ کارمندانی ٹکانہ ءِ سر ءَ دزبمب اُرش ءِ کتگ کہ اودا کم.چہ کم چار کارمند ساڑی بوتگ انت تراک ءَ آصف ء نور حسین جھمنند فیصل آباد ءَ ھوار سَے زدگ بوتگ انت –

جارکش ءَ وتی درشان ءِ گڈسر ءَ گوشتگ کہ بلوچ لبریشن آرمی ھردو ارشانی زمّہ ءَ.منیت ءُ ما اے گپ ءَ تچک کنیں کہ زورگیریں پاکستانی پوج ءُ کارمندانی سر ءَ مئے اُرش برجاہ مان انت –

روکپتی بلوچستان ءِ دمگ ھاش ءَ گوستگیں روچ ءَ یک لاشے دزکپتگ، لاش دمگی مردماں دزکپگ ءَ پد ھاش ءَ سر کرتگ-

گیشیں ھالانی رد ءَ ھاش ءَ گوستگیں روچاں بیگواہ بیتگیں عالم دین مولوی عبدالواحد ریگی ءِ لاش دگ ءِ کش ءَ دزکپتگ کہ آ گوستگیں روچاں ناشناسیں مردماں آوار جتگ ءُ گون وت برتگ ات-

تنی وھدی آوار جنوکانی درگت ءَ دگہ گپ دیم ءَ نیتکگ اَنت کہ چونیں مردماں آوار جتگ ءُ برتگ، بلے گوستگیں روچاں شنگ بیتگیں تامربنداں چہ گندگ بیت اِنت عبدالواحد ریگی ءِ لوگ ءِ نزیک ءَ یک ناشناسیں گاڑی ءِ گندگ بیت اِنت-

شنگ بیتگیں تامربنداں گندگ بیت اِنت ھمے دمک ءَ یک ناشناسیں گاڑی ءِ روت ءُ اود ءَ گاڑی ءَ سواریں مردمانی پجار ھم الکاپ ءَ زانگ نہ بنت ءُ دیم ءَ تامر بند بیت اِنت –

دمگی مردمانی رد ءَ اے یک ترسے ءِ پژدر ءَ کنگ بیتگ کہ مھلوک چہ زھرشانی ءُ روانکاں وت ءَ دور بہ دار اَنت – زانگ بہ بیت روکپتی بلوچستان ءَ بیوکیں زھرشانیاں عالم دینانی بنگپ آیانی پلامرزی ءِ واھگ اِنت-

بلوچستان ءِ دمگ نوشکی ءُ آواران ءَ تیرگواری ءُ بمب تراک ءِ آسر ءَ دو مردم بیران ھپت ٹپی بیتگ اَنت-

بلوچستان ءِ دمگ نوشکی ءَ مروچی سھب ءَ ناشناسیں سلاہ بندیں مردماں تیرگواری کتگ ءُ آغا ولی نامیں مردمے آئی ءِ دکان ءَ جتگ ءُ کُشتگ- اُرش ءَ پد مردم تتک اَنت-

پولیس ءِ گْوشگ اِنت کہ اُرش ءَ پد پولیس ءُ دگہ کانودی اَڑ دیوکیں ادارھانی کارندہ وئیلجاہ سر ءَ بیتگ اَنت دمگ انگر ءَ کتگ وھدے کہ اے مرد لاش چار ءُ ٹپاس ھاتر ءَ نادُراھجاہ ءَ برتگ-

پولیس واکدار رِد ءَ اُرش ءَ پد شھر ءِ جتائیں تھی راہ ءُ در بند کتگ اَنت اُرشکارانی پٹ ءُ پول بندات کتگ-

اِھوالکارانی رِد ءَ اے مرد سیادی گوں پاکستانی پوج ءِ جوڑ کتگیں کُشندہ ٹولی ءَ اِنت-

زانگ بہ بیت اشی ءَ ساری کُشندہ ٹولی کارندھانی سر ءَ بیتگیں اُرش زمہ واری آجوئی لوٹوکیں سلاہ بندیں گلاں منّ اِتگ اَنت ،بلے اُرش زمہ واری انگت ھچ گل ءَ نہ زرتگ

دومی نیمگ ءَ بلوچستان ءِ دمگ آواران ءِ ھند کولواہ ءَ یک بمب تراکے بیتگ ءُ چریشی ءِ آسر ءَ یک مردمے بیران ءُ ھپت ٹپی بیتگ اَنت-

گیشیں ھالانی رِد ءَ مروچی ساھت یازدہ ءَ آواران ءِ دمگ کولواہ ءَ ناصر نامیں مردمے ءِ دکان ءَ بیتگیں بمب تراک ءِ آسر ءَ ناصر علی ء محمد ھاشم بیران وھدے کہ ھپت ٹپی بیتگ اَنت-

تراک ءِ آسر ءَ ٹپی بیتگیں آصف ء محمد ھاشم جھمنند بزداد، مھراللہ ء عثمان جھمنند کھن زیلگ آواران ، فوزیہ بی بی لوگ بانُک نزیر احمد جھمنند کلرو آواران ، مصدق ء عبدالغفار جھمنند کلرو آواران ، عبدالمطلب ء عبدالغفار جھمنند کلرو آواران ، صدیق ء نزیر جھمنند کلرو آواران ءُ شبانہ ء لوگ بانُک عبدلغفار جھمنند کلرو آواران ھوار اَنت-

تنی وھدے تراک تُرندی زانگ نہ بیت پولیس گْوشگ اِنت اے درگت ءَ گیشیں پٹ ءُ پول برجاہ ءَ اِنت-

نبشتانک: گدانے ءَ ودی بوتگیں چُک

نبشتہ کار: شیردل بلوچ

دی بلوچستان پوسٹ

دیریگیں واھگے بوتگ وتی ھما ھمبل ءِ بابت ءَ ند ءَ بہ زوراں ھیال ءُ لیکھاں درشان بہ کناں، اے ھیال دیر اِنت دل ءَ چَرّگ ءَ بوتگ، کدی انچیں نوبت اتکگ اَنت، آئی ءِ بابت ءَ جیڑ اِتگ ءُ لھتیں گالرد نبیس اِتگ، بَلے سرجم کنگ نہ بوتگ اَنت، امروز ءِ دست گٹی ءَ ھیال پُرشت ءُ پروش بوتگ اَنت، پد ءَ کور کرتگ اَنت ، بلے مرچی گوں دل ءِ سِتک ءَ وتی نبشتہ بندات کرتگ، آسر کنگ ءِ نیت کرتگ، پہ سرڈگار ءَ کولیگ بوتگیں بچے ءِ کارست ءِ نبیسگ، الم ءَ جیڑگ ءَ پرما اِیت، آئی ءِ بابت سرپد بوگ لوٹ ایت، پرچا کہ انچُش پہ دیم نبیسگ کسے ءِ بابت ءَ بہ بیت نبیسوک ءِ جند ءَ ھم دوست نہ بیت، چونیں کارے کنگ ءِ واست ءَ اولیگ چیز جزبگ ءُ دومیگ سرپدی المی اَنت، گڑا آسر کنگ بیت۔

وتی ھور تر ءُ تاب کنوکیں کسے ءِ بابت ءَ بہ گند ئے ھیال ءِ پدر کنگ آئی ءِ سر ءَ ھبر کنگ یا نبیسگ گرانیں کارے مہ بیت، بلے ! گال ءِ دَرچینگ کسے ءِ ساڑایگ دلگوش دیگ لوٹ ایت، لھتیں انچیں کارستانی ھدابُند اَنت جھان اِش پجاہ کار اِیت، ھمک کسے ءِ چَمّانی دیم ءِ آدینک اَنت، نام اِش ھرچ جاہ ءَ ھمک دیواناں گرگ بوگ ءَ اَنت، ھرچ دل پہ آیاں وازمَنْدگ ءُ راج ءِ زندگ بوگ ءِ اُمیت زندگ اِش کرتگ اَنت، وت مُدامی ءَ گیر کاینت، راج سر ءَ اِش پھربند ایت، آ یک ءُ دو نہ اَنت،بلکیں ھزارانی ھساب ءَ اَنت، بلوچ سرڈگار ءِ ءُ راجی شھیدانی لڑ اِنت پہ وتن کولیگ بوتگ اَنت، وتی مرچیگ پہ وتی راج ءِ وشیں باندات ءَ بکشاتگ اَنت، چہ ھمے ندر بوتگیں بچاں یکے شھید” دادو ھمل اِنت واجھیں” ھمل ھان ءِ لوگ ءَ ودی بوتگ جاہ آھو (جھاؤ) کوھڑو ءِ جاھمنندے، شپانک ءُ مالدارے ءِ لوگ ءَ رُستگ ورنا بوتگ، ڈگارانی کار ءُ دِھکان ئِے کرتگ وتی زندمان ءِ روچ ئِے گوازینتگ اَنت۔

گدانے ءَ ودی بوتگیں چُک چہ وتی کوم ءُ کومیت ءَ شموشکار نہ بیت، آئی ءَ ایردستی ءِ مارشت چہ گوانزگ ءَ دَرکسانی ءَ گون بیت، وتی پدمنتگی ءُ راج ءِ بزگی ءِ رازاں شَرّ سرپد بیت، ایردستیں راجے ءِ ھمک گام ءِ دیم ءَ اَڑندگ ،مشکل ءُ ازیت ایردستی ئیگ اَنت، زندگ بوگ ءِ واست ءَ دست ءُ پاد جَنگ ھمک بنی آدم ءَ لوٹ ایت، وشھالی دیمروی ءِ زامان ایوک ءَ راجی وتواجھی بوت کنت، وتواجھی ءِ واست ءَ راج ءِ پُسگاں بے شمار ھون ریچگ لوٹ ایت ۔

دادو ھمل گندگ ءَ سک باز بے تواریں جھدکارے اَت، بلے۔۔! کومی جزبگ ءُ کومی دوستی آئی ءِ توک ءَ باز ھست اَت، مُدام جُنز ءِ کاراں دست گلائیش اَت، گوں جھدکاراں ھمگام جُنزگ ءَ اَت، ھمینچُک مھر آئی ءَ گوں جھد ءَ وتی راج ءَ ھست اَت، تھاریں شپاں آئی ءَ روچ زانتگ، پہ پُرھندگیں دپّ ھمراھداری کرتگ، اگاں وانندگیں سنگتے وانگی (کتاب) یا روتاکے وانگ ءَ بوتگ گڑا وڑ ءُ پیم ءَ آئی ءِ کر ءَ اَتکگ ءُ نرم نرم ءَ ئِے گوشتگ ” مَدّ ءَ مَدّ ( سلو ) ءَ مہ وان ئِے من ءَ ھم سرپد کن، چے بوتگ ءُ بوگ ءَ اِنت ھمے ساھت ءَ کند اِتگ ئِے، بزانکہ وانوک وتی نیمگ ءَ پہ دلگوش دیگ ءَ لاچار کرتگ ئِے، انچیں مھروانیں ءُ سنگینے سنگتے اَت، گوں کسے ءَ چِنکس یکجاہ بوت مردم چہ آئی دلرنج نہ بوتگ اَت ۔

دادو ھمل ءِ بابت ءَ من چینچُک نبشتہ بہ کن آں کم اِنت، پہ راج ءَ سر بکشاتگیں بچے ءِ کارستانی پدر کنگ ءُ ساڑایگ پہ گپتار ءُ نبیسگ بوت نہ کنت، وتی زندگی ءِ ھزاراں واھشت ءِ یلہ دیگ ءُ کوم ءِ زندگ بوگ ءَ ندر بوگ، جھان ءِ گرانتریں کارے زانگ بیت، ھمک کسے ءَ گوں اے ھون ریچگ ءِ ٹوھیں گام چست بوت نہ بیت ھاٹیگ جواب دنت ۔

دادو ھمل پنام پیروز ، سیلم سوزو پنام چراگ، ھکیم ابراھیم پنام کندیل ءُ نسیم جان پنام ملا دیدگ سورگر ءِ بنجل ءَ گوں زورگِریں ڈیھ اِستان ءِ زمینی پوج ءُ بالگراباں بیست سوچکان دو ھزار ھبدہ (20/05/2017) ءَ یکروچے ءَ تیوگیں گوں کمانڈواں دیم پہ دیمی میڑ داتگ ءُ وتی ایدگہ ھمراہ اِش رکینتگ اَنت ءُ وت پہ وتن دائمی نمیران بوتگ اَنت، شھید دادو ھمل ءَ گوں ھمراھان ءُ سوچکان ءِ ءُ سرڈگار ءِ شھیداں سھرچکیں دروت ندر کناں ۔

آجوئی زندگ بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔