TBP Balochi

میان اُستمان ءِ ادارہ یونیسیف ءَ یمن ءَ برجاھیں جنگ ءِ وھد ءَ مارچ دوھزار ءُ پانزدہ ءَ داں ستمبر دوھزار ءُ بیست ءُ دو ءِ میان ءَ کم چہ کم سَے ھزار ءَ ھپت سد ءُ ھپتاد ءُ چار زھگ بیران بیتگ اَنت-

ھال سرکنوکیں ادارہ ایسوسی ایٹڈ پریس ءِ رد ءَ یونیسیف ءِ نیمگ ءَ شنگ کنگ بیتگیں درشان ءَ گوستگیں کچ ءُ کساس گوشگ بیتگ اَنت چریشاں ھپت ھزار ءَ دو سد ءَ چل ءُ پنچ زھگ لنگڑ بیتگ اَنت-

یونیسیف ءَ کڈنی ءَ جنگ بندی ءِ چن ءُ لانچ ءِ دزبندی کتگ بلے اپریل داں اکتوبر ءَ نیزوری ءِ آماچ بیتگ-

یونیسیف ءِ ایگزیکٹو ڈائریکٹر کیتھرین رسل ءِ گوشگ اِنت مسام ءِ پھنات انسانی کمکانی سرکنگ اِنت ءُ اشی ءِ سر ءَ جوانیں گامگیجے-

یونیسیف ءِ رپورٹ ءِ رد ءَ گوشگ بیتگ مارچ دوھزار ءُ پانزدہ ءَ داں ستمبر دوھزار ءُ بیست ءُ دو ءِ میان ءَ سَے ھزار ءَ نُھ سد ءُ چار ورناہ جنگ ءِ واستا زیرگ بیتگ اَنت-

کیتھرین رسل ءِ گوشگ اِنت اگاں یمن ءَ زھگانی دیمروئی ءِ واستا کسے جیڑ ایت گڑا ھردوکیں نیمگ میان اُستمانی برادری ءُ مزن واک زھگانج پھریزگ ءِ ڈبہ ءَ زیرگ ءُ آیانی کمک کنگ ءَ سدکی بہ کن اَنت-

میان اُستمان ءِ رد ءَ حوثیاں بازیں کچے ءَ بارودی سرنگانی کارمردی کرتگ ءُ چریشی ءَ جولائی داں ستمبر ءَ کم چہ کم ھپتاد ءُ چار زھگ بیران بیتگ اَنت-

گوستگیں ھپتگ ءَ یونیسیف ءَ سرجمیں دنیا ءَ بیوکیں جیڑہ ءُ کھراں چہ آسرمندیں کمکیانی واستا 10.3 ارب ڈالر ءِ کمک ءِ دزبندی کتگ ءُ چریشانی توک ءَ 484.5 ملین ڈالر ایوک ءَ یمن ءِ واستا نامینتگ اَنت-

روکپتی بلوچستان ءِ بنجاھی شھر زاھدان ءَ سلاہ بندیں مردماں تیرگواری کنان ءَ یک زھگے کُشتگ-

گیشیں ھالانی رد ءَ زاھدان “دزاپ ” ءَ سلاہ بندیں مردمانی تیرگواری سیزدہ سالی ئیں عرشیا گنگوزئی ء شھرام جھمنند زاھدان بیران بیتگ-

ھالانی تہ ءَ گوشگ بیتگ کہ عرشیا گوستگیں شپ ءَ زاھدان ءَ لوگ ءِ دیم ءَ تیرباران کرتگ ءُ کشتگ-

سلاہ بنداں تیرگواری کنگ ءَ پد وتی راہ گپتگ ءُ شتگ اَنت، کوش ءِ سبب زانگ نہ بیتگ ءُ نانکہ آئی ءِ درگت ءَ دگہ گیشیں ھال دیم ءَ اتکگ اَنت-

ایران ءِ دمگ شیراز ءَ عادل آباد زندان ءَ یک بندیگیں بلوچے پاھو دیگ بیتگ-

گیشیں ھالانی رد ءَ عادل آباد ءِ زندان ءَ بندیگیں سی ءُ یک سالی ئیں وحید ناروئی ء سرور خان جھمنند زاھدان پاھو دیگ بیتگ-

ھالانی تہ ءَ گوشگ بیتگ کہ وحید ایرانی سال نود ءُ ھشت ءَ نشہ باپاری ءِ بھتام ءَ گرگ بیتگ ءُ ایرانی آشوبی پاسداران ءِ ھکم ءَ مروچی آ پاھو دیگ بیتگ-

ھالانی تہ ءَ گوشگ بیتگ کہ وحید ءِ کھول آئی ءِ پاھو ءِ ھکم ءُ پاھو دیگ ءِ وھداں ھال دیگ نہ بیتگ اَنت-

ایران ءَ پاھو دیگانی یکشلیں درچاں انسانی ھکانی گل یکشل ءَ ایراد گرگ ءَ اَنت ءُ ھمے وڑ ءَ دگہ بندیگیں مردمانی کھولاں ھم ترس ءِ درشانی کتگ کہ مئے مردم ھمے وڑ ءَ پاھو دیگ بنت-

انسانی ھکانی گلانی گوشگ اِنت ’ ایران مردماں وتی سپائی کنگ ءِ موکل ءَ دیگ ءَ نہ اِنت چریشی ءَ آ یک نیمگی پیسلھاں مردماں پاھو دیگ اِنت‘-

کتاب: بلوچ ریاست کی تشکیل

چمشانک: سمیع بلوچ

اولی بھر

دی بلوچستان پوسٹ

دکتور شاہ محمد مری ءِ پیپلز ھسٹری آف بلوچستان ءِ دومی تاکبند ءِ سر ءَ چمشانک دیگ بزاں بلوچ دپتر ءِ سر ءَ چمشانک دیگ اِنت بلوچانی ریاست تشکیل کدی بوتگ ءُ اے دپتر ءِ سر ءَ دکتور ءِ کتاب ءَ وانگ ءَ رند من ءَ اندازہ بوت کہ اے دراجیں پندے ءُ ایشی ءِ بُرگ ءَ بلوچ ءَ یک نیمگے سوبمندی ءُ دومی نیمگ ءَ سک باز تاوان وارتگ-

بلوچستان ءِ سر ءَ جنگانی راجدپتر ءَ چہ ھچ کس ءَ چیر ءُ پَدّر نہ اَنت بلے گوں راجدپتری رِد ءُ ترتیب ءَ بلکیں باز کم جاگہ گندگ بنت اے کتاب ءِ تہ ءَ لھتے مزنیں راجدپتری کردارانی بلوچستان ءَ گوں سیادی ءُ ھُنڈال شاہ محمد مری ءَ دیم ءَ آورتگ انچو کہ سکندر اعظم ، اشوکا ، چندرگپت موریا، محمد بن قاسم ، چچ چاچ ، سائرس ءُ دیگا بازینے اول سر ءَ ما مروچی وتی چمشانک ءِ اولی بھرے تہ ءَ سکندر یونانی کہ آعظم ءِ لقب ءَ چے زانگ بیت ھمیشی دور ءَ بگر تا محمد بن قاسم ءِ دور ءِ بابت گپ کن اَنت سکندر چہ در کسانی ءَ یک سک مزنیں لشکرے ءِ بادشاہ جوڑ بیت اِنت وھدیکہ سکندر ءِ پِت مریت ءُ سکندر آعظم ۲۲ سالے عمر ءَ دنیا ءِ گرگ ءَ در کپ ایت سکندر میسوڈونیا نامیں جاگھے ءَ ودی بیت ءُ اولسر ءَ یونان ءِ سر ءَ لشکر کشی کنت ءُ یک مزنیں لشکرے زور ایت دیم پہ ایران ، بلوچستان، افغانستان ءُ ھندوستان ءَ دیم ءَ کنت ءُ ۱۰ سالانی کم وھدانی تہ ءَ سک باز مُلک ءُ جاگہ زورگر ایت ءُ ھمے وڑ ءَ بلوچستان ءِ تہ ءَ گوں وتی مزنیں لشکر ءَ یک وھدے موجود بوتگ بلے چُشکہ بلوچ جنگول بوتگ اَنت ھمیشاں سکندر یونانی ءَ بلوچانی زمین ءِ سر ءَ جاگہ کنگ ءَ باز مشکلات ءُ مسلھانی دیمپانی کنگ کپتگ ءُ سجئیناں چہ گیشتر مکران ءَ سکندر وھدیکہ دریا ءِ سندھ ءِ کش ءُ کِرّاں قبضہ کنت ءُ دیم پہ پنجاب ءَ گوں وتی لشکر ءَ روت گڑا سکندر ءِ بازیں کماندار ءُ لشکری جھد کناں دیمترا سپر جنگ مہ بیت ءُ باھدیں سکندر ھمد ءَ چہ پُتریت گڑا دریا ءِ جھلم ءُ راوی ءُ چناب ءِ کش ءُ کراں سکندر گوں وتی لشکر ءَ داریت ءُ ھمد ءَ چہ واترگ ءِ جار جنگ بیت بلے سکندر وتی یک لکھ ءِ مزنیں لشکر ءَ ۳ جاگہ بھر کنت ءُ ھمد ءَ یک جرنیلے گوں ۸ ہزار سپاھی ءَ دیم پہ مکران ءِ نیمگ ءَ دیم دنت کہ شُما مکران ءِ سروے ءَ بکن ءُ من ءَ ھال بدے کہ چہ پیمیں مُلک ءُ ڈگارے وھدے سکندر کہ ایشیا ءِ سر ءَ زورگری کنگ ءُ ھکومت کنگ ءِ ارادہ ءَ چہ یونان ءَ در کپ ایت وتی گون ءَ دپتر نویس کار ایت گوں کہ ھموک چیز ءُ سفر ءِ مشکلات ءُ دمگانی بابت شریں وڑے ءَ نبشتہ کن اَنت اگاں مروچی سکندر ءِ زمانگ ءِ مکران مئے ءُ شُمئے دیم ءَ پہ وانگ ءَ جریدگ اِنت ایشی مھربانی ھوں سکندر ءِ ھمے دپتر نویسانی مھربانی اِنت-

سکندر چہ پنجاب ءَ واترگ ءِ وھدا ۲۵ ھزار لشکری گوں وت زوریت ءُ ۲۵ ھزار لشکری بلوچستان ءِ گنداوہ ءِ نیمگ ءَ روان دنت سکندر زانت اے مزنیں لشکر بید ءِ ورگ ءُ وردنی سامان ءَ زوت پروش وارت گڑا ھمے واستا وتی لشکر ءِ ورگ ءِ بست ءُ بند ءِ ڈُبہ ءُ وتی سر ءَ زور ایت ءُ دیم پہ ایران ءَ روت ھمے جرنیل ( نیرکوس ) کہ مکران ءِ سیل ءُ سروے ءَ بیت ھمے مکران ءِ جاورھالانی ءُ مھلوکانی زند گوازینگ ءِ سرجمیں ھال موسم ءُ راہ رھبندانی بابت ءَ نبشتہ کنت مکران ءِ مردماں ماھیگیری ءِ نام ھمے زمانگ ءَ دیگ بیت مکرانی مزنیں دراجیں پُٹ ءُ داروک بنت جسم چہ مزنیں پُٹاں چیر بیت ماھیگ ءُ جناوری پوست ایشانی گُد ءُ پوشاک بنت ماھیگ ءَ ھشک کنگ ءُ پہ وت آرت ءُ پہ مالاں کدیم جوڑ کن آں گلہ ءِ کِشت ءَ کشاری تکریبن اے زمانگ ءَ چہ مھر گڑھ ءَ انگت مکران ءَ سر نہ بوتگ بگندے بلے آس ءُ آسن مکرانی ءَ نی کر ءَ بوتگ ھمے پیم سکندر ءَ پہ ایران روگ ءِ واستا گدروشیا ءِ تہ ءَ باز مشکلات بیت کہ موسم سک گرم بیت ءُ لشکر ءِ آپ ءُ ورگ ھلاس بنت ھمے سوب ءَ گیشتر لشکری مرگ ءِ آماچ بنت ءُ بازینے بلوچانی اُرشانی سوْب ءَ مِر اَنت لسبیلہ ءُ ھنگول ءِ تہ ءَ سکیں گرمی ءِ سوب ایشاں وتی واستا ھچ ساھگ نہ رس ایت ءُ شُد ءُ گُژن ءَ چہ وتی خچرانی کُشگ ءُ ورگ ءَ ابید دگہ ھچ راہ نہ بیت یک ماھے راہ کشگ ءَ رند سکندرے سر پسنی ءَ کپ ایت کہ وتی راہ ءَ رد کن انت سکندر ءَ پہ وتی لشکریاں ورگ ءِ بست ءُ بند کنگی بیت ءُ زوت ایران ءِ سلطنت ءَ سر بوھگی بیت پمیشکا ارچ لشکری ءِ مر ایت یا دیم ءَ شُت نہ کنت یل کنگ ءُ دیم ءَ جنزگی بیت انچو گُشاں ایران ءَ رند بابُل ءَ وھدے سکندر سر بیت سک بیمار بیت بلوچستان ءِ تہ ءَ مگسک ءُ مچھرانی ورگ ءِ سوب ءُ بازیں شراب نوشگ ءِ سوْب ءَ ۳۳ سال ءِ عمر ءَ سکندر یونانی مریت ۱۰ سال بلوچستان ءُ کش ءُ کرانی سر ءَ سکندرے ھکومت بیت بلے سکندر ءَ ھچ میتگ ءُ بازار نہ نوسیتگ اَنت مال ءُ مردم نہ کُشتگ اَنت بلکیں مردمانی گون ءَ مھروان بوتگ ءُ لُٹ ءُ پُل ءِ بدل ءَ مال گنیمت مُچ کُتگ ءُ وتی پُسند ءِ الاکائی مردم مستر ءُ کستر کنگ ءَ رند شھر ءُ بازار یل داتگ اَنت سکندر ءِ مرگ ءَ رند سکندر ءِ لشکر ءِ جرنیل مستری ءِ کش ءُ چیلانی تہ ءَ سکندر ءِ سلطنت ءَ بھر ءُ بانگ کن اَنت ءُ بلوچستان ، ایران ،سندھ ، کابُلستان ،ازبلستان ءُ ھندوستان ھوں جرنیل سیلیوکس نیکاٹر ءِ بھر ءَ کپ ایت ۔

شاہ محمد ءِ گُشگ ءِ رِد ءَ سکندر آعظم ءَ رَند بلوچستان ءِ تہ ءَ اشوک ءُ موریہ خاندان ءِ راج تا باز وھد ءَ بیت سکندر ءِ جرنیل سیلیوکس ءَ چندر گُپت موریہ ھما وھد ءَ پروش دنت وھدے ھندوستان ءِ سر ءَ اُرش کنت وتی ساہ ءُ جان ءِ رکینگ ءِ ھاتر ءَ تاوان ءِ ھاترا بلوچستان ءُ افغانستان ءَ ابید جرنیل سیلیوکس وتی جنکیں چُک ءَ گوں چندر گُپت ءَ آروس دنت ھندوستان وت سک مزنیں سلطنت ءِ بیت موریہ 20 سال ھکومت کنگ ءَ رَند مر ایت گڑا چندر گُپت موریہ ءِ چُک ” بندوسار” تخت نشین بیت ءُ دوُریں ھندوستان ءَ چہ بلوچستان ءِ تہ ءَ ھچ ھاسیں تبدیلی ءِ نیار ایت ءُ بلوچستان ءِ سر ءَ ھچ توجہ نہ دنت ءُ بلوچ وتی زندگی ءَ ھما وڑ گوازیناں کہ مدام گوازینتگ بندوسار ءِ مِرگ ءَ رَند بندوسارے چُک “اشوک” تا 38 سال تھت ءُ تاج ءِ واجہ بیت ءُ یک زالم ءُ راجدپتر ءِ تہ ءَ یک سکیں تاکتوریں حکمران ءِ زانگ بیت بلے اشوک وھدے وتی لشکر ءِ دستاں تباھی ءُ بربادیاں کہ گندیت گڑا گُش ایت ” سوبمندی اگاں دیگرے چورہ کنگ ءُ بے مرد ءُ بے جن کنگ اِنت گڑا بے سوبی چی اِنت ؟” ھمد ءَ چے اشوک ءِ نزریات مٹ ءُ بدل بنت ءُ نیک راھی ءِ راہ ءَ “بدھ” مذھب ءِ منوگرے بیت ءُ مھاتماہ بدھ ءَ رند اشوک ءِ بدمت مذھب ءِ تہ ءَ مستریں درجہ ءُ مکام اِنت اشوک ءَ وتی دور ھکومت ءَ وتی سلطنت ءِ تہ ءَ باز بدلی سدلی آرت ءُ ریاستے مذھب بدمت بوت ءُ مروچی ھوں بلوچستان ءُ افغانستان ءِ تہ ءَ بازیں ھند ءُ دمگاں بدمت ءِ آساد ھست اَنت گنداوہ بدمت ءِ منوکانی مرکز بیت تمبو ءِ تہ ءَ بدمت ءِ یک مھرے ھوں ھست ءُ بولان ءُ کچھی ءِ دمگّاں بدمت ءِ پیروکار جانمند بوتگ اَنت بدمت انچیں مذھبے کہ انسانی نسل ءِ نیم ءِ کساس مردم ایشی ءِ منوّک اَنت بدمت ءِ تعلیماتانی دیم ءَ آروکیں مرد “سدھارتہ” نیپال ءِ تہ ءَ “دستو” نامی ئیں سلطنت ءِ حاکم سدھودانہ ءِ چُک بیت اِنت-

اشوکا ءِ مزنیں مدتے ءَ ھکمرانی ءَ رند بلوچستان ءِ تہ ءَ دور بندات بیت “بیکٹریائی ،ساکا ( چار سد سال ساکا ھکومت کناں ) ،ءُ بھرام گور ساسانی ءِ” سندھ ءُ مکران ءَ ہند ءِ ” ملک شرماہ” وتی جنک ءَ را لب ءِ تہ ءَ ساسانی حاکم بھرام گور ءَ 404 تا 427ء اے زمانگ ءَ داتگ مزدکی ساسانی زمانگ ءں مردم بنت بلے بدمت ءِ منوک بنت مزدک یک سوشلسٹے بیت ءُ اولی تھریک سوشلزم ءِ مزدکی ءَ نی دور ءَ بندات بیت مزدک ءَ مذھبی رسم ءُ دودانی سر ءَ سک کم زور دات بلے نفس کُشی ءِ سر ءَ باز زور دات یک بادشاھے ءَ چہ گیش ءِ سر ءَ سک نگدے کُرتگ زرتُشتی مُلّاھانی مزبوت پوزیشنانی سر ءَ سک نگدے کُرتگ کہ مُلّا ھاں مھلوک بزگ ءُ مھتاج کُرتگ ءُ گریبی گیش کُرتگ لھتے گپانی تہ ءَ ایش کہ مزدک ءِ کمیونزم ءِ تھریک روچ پہ روچ سوبمند بواں بیت ءُ زرتشتی ملّا تاکتور بنت ءُ ریاست ہمیشانی دستاں بیت گڑا مزدکی ءَ نی کُشگ بیت اِنت ءُ گُڈی مزدکی کمیونسٹ تک جنگ ءُ کُشگ ءِ داد ساسانی دورے شھزادگ خسرو اول ءِ نام ءَ بیت کہ رند ءَ نوشیروان ءِ لکب ئِے رس ایت مزدک دزگیر کنگ بیت ءُ یک بُرز ءُ بُلندیں جاگھے ءَ زندگ ءَ کنڈ کنگ بیت ءُ تیرانی ھور کنگ بیت مزدک ءِ سر ءَ ھو چو کمیونزم ءِ تھریک ءِ ھلاسی 528 ءِ گڈی وھداں یا 529ء ءِ بنداتی وھداں گوں مزدک ءِ نمیرانی ءَ بیت ۔۔ بلے 1917 ءَ ھمے انکلاب اسلی دروشم ءَ کامیاب بیت ۔ (بزانکے اے تھریک مارکس لینین ءُ اینگلز ءَ چے پنچ سد سال پیسرا مزدک ءَ بلوچستان ءِ سرزمین ءَ بندات کُتگ-

روان اِنت —

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گوھرام بلوچ ءَ شنگ کرتگیں درشان ءَ گشتگ کہ مشکے ءِ ھند گجر ءَ پاکستانی پوج ءِ بنجل ءِ سر ءَ اُرش کرتگ ءُ بازیں کارندہ کشتگ اَنت-

آئی ءَ دوازدہ دسمبر ءَ سرمچاراں آواران ءِ دمگ مشکے ءِ بنجاھی بازار گجر ءَ ھستین پاکستانی پوج ءِ بنجل راکٹ ءُ مزنیں سلاھانی نشانگ کتگ – اُرش ءَ پھزداری سنگر ءَ بازیں گولہ لگ اتگ اَنت چریشی ءَ چہ آ ڈورتگ ءُ کپتگ ءُ چریشی ءَ چہ بازیں کارندہ مرتگ ءُ زدگ بیتگ اَنت ءُ پوج ءَ جانی ءُ مالی تاوانانی دیمپانی کنگ کپتگ-

جارکش ءَ گشتگ کہ اے پوجی بنجل مشکے گجر کالج ءِ سر ءَ اِنت سال دوھزار ءُ ھبدہ ءَ پاکستانی پوج ءَ گپتگ – ھمے وڑ ءَ بلوچستان ءِ دگہ جاھاں ھم پاکستانی پوج ءَ وانگجاھانی سر ءَ وتی بنجل جوڑ کرتگ اَنت ءُ وتی مول ءُ مراداں سرجم کنگ اِنت-

آئی ءَ گوشتگ مئے اُرش داں آجوئی ءَ برجاہ مان ایت-

روکپتی بلوچستان ءَ یکشلیں پاھو دیگانی درچ یکشل ءَ برجاہ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی آمیدگس ءِ ھکم ءَ زابل ءِ جھممنندیں مردمے پاھو داتگ-

پاھو دیگ بیتگیں مردم ءِ پجار عیسی شیرزائی ء سلیم جھمنند زابل ءِ نام ءَ زانگ بیتگ-

ھالانی تہ ءَ گوشگ بیتگ کہ عیسی پنچ سال ءَ ساری ماں نشہ باپاری ءِ جرم ءَ گرگ بیتگ-

آئی ءِ سر ءَ پد ءَ پاھو ءِ ھکم اتکگ ءُ چریشی ءَ چہ آ زاھدان ءِ زندان ءَ برگ بیتگ ءُ ھمود ءَ بازیں وھداں بندیگ بیگ ءَ پد گوستگیں روچ ءَ پاھو دیگ بیتگ-

ھالانی تہ ءَ گوشگ بیتگ کہ شیرزائی ءَ ھوار ھوار دگہ ھپت کسانی پاھو دیگ ءِ ھم ھال بیتگ بلے تنی وھدی آیانی درگت ءَ دگہ گیشیں ھپ دیم ءَ نیتکگ اَنت-

زانگ بہ بیت روکپتی بلوچستان ءِ وڑ ءَ ایران ءِ دگہ جاھاں ھم پاھو دیگانی کمے کساس برجاہ اَنت-

گوستگیں روچاں محسن شکاری ءِ پاھو دیگ ءَ پد ایران ءَ انسانی ھکانی نیمگ ءَ بازیں ایرادانی دیمپانی اِنت-

یوکرین ءِ سروزیر ءَ روسی اُرشانی دارگ ءِ ھاتر ےَ پیٹریاٹ میزائل ءُ گچینی ٹیکنالوجی ءُ دگہ برزی ازبابانی لوٹگ ءِ دزبندی کتگ-

ھال سرکنوکیں ادارہ ایسوسی ایٹڈ پریس ءِ رد ءَ سروزیر ڈینیز شمیھال ءَ یک گُلگدارے ےَ گوشتگ کہ بجلی ءِ بنجل ءُ دگہ انفراسٹرکچرانی روسی اُرشانی سبب ءَ یوکرین ءِ مھاجرانی واستا دگہ ناوشی یے ودی بیتگ ءُ یورپ چریشی ءَ چہ یک بھمیانگی ءِ دیمپان اِنت-

آئی ءَ گوشتگ کہ روس ءِ نیمگ ءَ گیش اُرشانی ھلاپ ءُ پھریزی اژدری اِنت ءُ یوکرین ءَ را زمین ءُ چہ برز ءَ جنگء پیٹریاٹ میزائل ءِ وڑیں ازبابانی اژدری اِنت-

یوکرین ءِ سروزیر ڈینیز شمیھال ءَ جرمنی ءُ پرانس چہ دزبندی کتگ کہ جنگی ازبابانی ھواری ءَ گولہ بارود ءُ نوکین جنگی ٹینک بہ دے اَنت-

دومی نیمگ ءَ پولینڈ ءِ سروک ءَ مھاجرینانی جیڑہ ءِ سر ءَ گپ کنان ءَ گوشتگ کہ آیانی ڈیھ ءَ پیش ءَ چہ روسی اُرش ءُ سارتی ءِ سبب ءَ یوکرین ءُ چہ لڈ ءُ بار کتگیں مردمانی کمک ءُ کنگ اِنت –

جرمنی ءِ سروک ءِ گون ءَ برلن ءَ گند ءُ نند ءَ پد پولینڈ ءِ سروک ایندرزج دودا ءَ گوشتگ کہ پولینڈ ءَ مھاجریناجی کچ سِی لک ءَ سر بیتگ اَنت-

امریکہ ءِ واکداراں روس ءِ اُرشانی ھلاپ ءَ برزی پھریزی ءَ پیٹریاٹ میزئل یوکرین ءَ پجاریگ ءِ گپ گمان کتگ ات بلے داں انگت ءَ اے ڈیھ ءَ چوشیں آسراتی گندگ ءَ نیتکگ اَنت-

بلے امریکہ ءِ پھریزی مھکمہ پینٹاگون ءِ پریس ءِ سیکریٹری بریگیڈیئر جنرل پیٹ رائیڈر ءَ اھوالکاراں گون تران کنان ءَ گوشتگ داں انگت ءَ یوکرین ءَ مزنیں سلاہ یا ٹیکنالوجی ءَ ھواریں سلاھانی دیگ ءِ نزام دیگ ءِ ھچ ارادہ نیست اِنت –

زانگ بہ بیت ھمے سال ءِ فروری ءَ روس ءِ نیمگ ءَ یوکرین ءِ سر ءَ اُرشاں لکانی کچ ءَ یوکرین دگہ ڈیھاں میاربندی شتگ اَنت ءُ ھمے وڑ ءَ ھزارانی مردم مرتگ اَنت-

دوشمبے ءِ روچ ءَ روسی لشکر ءَ یک رندے پد ءَ تیرگواری کنان ءَ زرباری ءُ رودراتکی دمگ نشانگ کتگ اَنت کہ اود ءَ روس ءَ گیرکانونی زورگری کرتگ ءُ نشتگ –

سربوتگیں ھالانی رِد ءَ گوستگیں روچ ءَ کیچ ءِ بنجاھی شھر تربت ءَ ناشناسیں مردماں پوجی پانگسے ءِ سر ءَ دز بمب ءِ چگل داتگ ءُ در شُتگ انت –

دزبمب اُرش تالیم چار راہ ءِ سر ءَ برجاھیں پوجی پانگس ءِ سر ءَ کنگ بوتگ اُرش ءِ آسر ءَ پوج ءَ جانی تاوان ءِ دیمپانی کنگ کپتگ ءُ اُرش ءِ زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گھرام ءَ رسانکدر ءَ وتی شنگ کُرتگیں درشانے ءِ تہ گوشتگ کہ مئے سرمچاراں یانزدہ دسمبر ءِ بیگاہ ءِ ادار شش ءُ چِل ءُ پنچ ءَ تربت بازار ءَ تالیمی چار راہ ءِ پوجی پانگسے سر ءَ دزبمب ءِ جتگ، چریشی ءَ یک پوجی کارمندے زدگ بوتگ –

جارکش ءَ دیمتر ءَ وتی درشان ءِ تہ ءَ گوشتگ کہ پولیس ءَ بازیں وھدے بیت کہ سرمچارانی بگیری ءَ کار ءَ اِنت،سرمچارانی رندگیری ءَ کنگ ءَ ھوار چہ مردماں دلسیاہ کنگ ءَ انت ءُ سرمچارانی ڈوارجاھانی جُست ءَ کنگ ءَ اِنت – ما پیش ءَ ھم گوشتگ کہ آ زورگریں ریاست ءِ کمکاری ءُ سرمچارانی رنگیری ءَ مہ کن اِت اگاں نہ گڑا گوں شُما ھما وڑ کنگ بیت کہ گوں دُژمنیں پوج ءَ کنگ بیگ ءَ اِنت-

جارکش میجر گوھرام بلوچ ءَ وتی درشان ءِ گڈسر ءَ گوشتگ کہ مئے اُرش دُژمنیں پوج ءُ آئی ءِ کمکارانی سر ءَ بلوچستان ءِ آجوئی ءَ تاں برجاہ مان انت –

کیچ ءِ بنجاھی شھر تربت ءَ گورنمنٹ بوائز ماڈل سکول ھمک سالی گوازی ءِ ھپتگ بندات کنگ بوتگ ءُ مراگش ءِ برجم دارگ بوتگ –

بنداتی مراگش ءِ گچینی مھمان کیچ ءِ ڈپٹی کمشنر بوتگ وھدیکہ نودربراں مکران ءِ ڈائریکٹر ایجوکیشن، کیچ ءِ ڈی ای او ءُ ماڈل وانگجاہ ءِ پرنسپل ھوار ایندگہ مھمان نوکیں دابے ءَ وش اتک کُتگ انت ءُ بلوچی سوت “کدم کدم روان بہ بئے” ءِ سر ءَ بلوچی دو چاپی پیش داشتگ –

گوازی ءِ ھپتگ ءِ بنداتی مراگش ءَ ڈپٹی کمشنر ءُ دگہ مردماں تران کُتگ ءُ نودربراں ھمے گوشتگ کہ آ شریں وڈی ءَ گوازی ءَ بھر بہ زور انت – کیچ ءِ ڈپٹی کمشنر ءَ گوازی ءِ ھپتگے ھاتر ءَ وانگجاھاں واکداراں لک کلدار دیگ ءِ جار ھم جتگ –

ماڈل اسکول ءَ ھمک سالی گوازی ھپتگ ءِ بنداتی ءَ ڈپٹی کمشنر بشیر احمد بڑیچ ءُ مکران ءِ ایجوکیشن ڈائریکٹر غفور احمد دشتی ءُ ڈی ای او منظور احمد ءَ کرکٹ ٹورنمنٹ ءِ بندات کتگ –

گوستگیں روچ ءَ گورنمنٹ بوائز ھائی سکول گوکدان ءَ ھم ھمک سالی گوازی ھپتگ بندات کنگ بوتگ –

سربوتگیں ھالانی رِد ءَ اوگانستان ءِ بنجاھی شھر کابل ءِ دمگ شھر نو ءَ ھوٹلے ءِ سر ءَ اُرش کنگ بوتگ –

چہ کابل ءَ سربوتگیں ھالانی رِد ءَ اُرش ھما ھوٹل ءَ بوتگ کہ اودا چینی زرکار بوتگ انت –

طالبان ءَ تنی وھدی اے اُرش ءِ درگت ءَ ھچ گپ نہ جتگ ءُ اشی ءَ ابید اے اُرش ءِ درگت ءَ تنی وھدی ھچ وڈیں جانی تاوان ءِ ھال نیست اِنت –

روئٹر رسانک ءِ گوشگ انت کہ اُرش شھر نو ءِ مھمان کارگس ءَ بوتگ کہ اودا چینی زرکار بوتگ انت –

زانگ بہ بیت کابل ءِ تہ ءَ چینی سفیر وانگ یو ءَ تالبان سرکار ءَ گوشتگ کہ آ چینی سفارت ھانہ ءِ پھریز ءَ سک باز دلگوش بہ دنت –

اے گپ وانگ یو ءَ گوستگیں روچ ءَ طالبان سرکار ءِ کمک وزیر ھارجہ شیر محمد عباس ساتکزئی ءِ گوم ءَ گند ءُ نند ءِ میان ءَ گوشتگ انت –

گوستگیں روچاں کابل ءَ پاکستان ءِ سفارت خانہ سر ءَ تیرگواری ءَ پاکستان ءِ ناظم الامور ءِ یک نگھپان ءِ زدگ بوتگ ات بلے سفر رک اِتگ ات –

اشی ءَ پیش کابل ءَ روسی سفارت خانہ ءِ دیم ءَ بمب تراکے ءَ روس ءِ دو زرکار بیران بوتگ ات انت –

تالبان سرکار ءِ وزیر خارجہ ءِ گوشگ انت کہ ستانکزئی ءَ چینی سفیر باور کنائینتگ کہ اوگانستان ءِ سرڈگار ھچ ڈیھے بگیری ءَ کارمرز کنگ نہ بیت اِنت –

مروچی بوتگیں اُرش ءِ زمّہ واری تنی وھدی ھچ گل ءَ نہ منّ اِتگ –