TBP Balochi

سربوتگیں ھالانی رِد ءَ بلوچستان ءِ دمگ تمپ گومازی ءَ پاکستانی پوج ءَ گِسے ءِ سر ءَ بیڑ بُرتگ ءُ زوراکی کنان ءَ چُک جنین لٹ شاپ کُتگ ءُ کماشیں مردے زورانسری آوار جتگ ءُ گوں وت برتگ –

زورانسری آوار جنگ بوتگیں مردمے پجار گلام ء نزر محمد جھمنند گومازی نام ءَ بوتگ کہ مروچی مگرب پد پاکستانی پوج ءَ جندے گِس ءَ بیڑ بُرتگ ءُ زورانسری آوار جتگ –

اھوالکار ءِ رِد ءَ تنی وھدی پوج بازار ءَ ساڑی انت بلے دگہ مردمانی زورانسری آوار جنی ءِ ھال نیست –

زانگ بہ بیت مروچیگیں روچ ءَ پاکستانی پوج ءِ کساس بیست گاڑیانی کاروان ءِ گومازی ءِ بنجاھی بنجل ءَ اتکگ ءُ سر بوتگ انت مزنیں لشکر کشی ءِ گمان کنگ بیت –

سربوتگیں ھالانی رِد ءَ پنجگور ءِ دمگ چتکان ءَ ناشناسیں سلاہ بندیں مردمانی تیرگواری ءَ یک مردمے مرتگ –

آئی ءِ پجار محمد اسمائیل ءِ جھمنند پنجاپ ءِ نام ءَ چہ بوتگ – اے مرد ءِ کوش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجرگواھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں چاردہ دسمبر ءَ چارشمبے ءِ روچ ءَ ادار دھ ءُ نیم ءَ پنجگور ءِ دمگ چتکان ءَ محمد اسماعیل ء اللہ ڈتہ جھمنند چاہ پپلی والا لودھراں پنجاپ تیرباران کتگ ءُ کُشتگ –

جارکش ءَ دیمتر ءَ گوشتگ کہ اے مرد پاکستانی پوج ءِ چاریگے بوتگ ءُ ھجام ءِ دکانءِ پچ کتگ نشتگ کہ مناں کس مہ زانت – پنجگور ءَ پیسر آئی ءَ گوادر ءُ تربت ءَ ھم کار کتگ سرمچار مدامی آئی ءِ سرا بوتگ انت کہ آ دکان ءَ در بہ ایت ءُ آئی ءِ سر ءَ اُرش بہ کن ایں تانکہ دگہ لس مردمے ءَ تاوان مہ رسیت بلے ریاستی چاریگ ءَ ھنچو کہ مئے سرمچار دیستگاں تچگ ءَ لگ اِتگ گڈا سرمچاراں تیرگواری کتگ ءُ کشتگ –

میجر گوھرام بلوچ ءَ وتی درشان ءِ گڈی ءَ گوشتگ کہ ایردستیں بلوچستان ءِ آجوئی ءَ تاں مئے اُرش پاکستانی پوج ءُ آئی ءِ چاریگانی سر ءَ برجاہ مان انت –

چارشمبے ءِ روچ ءَ بلوچستان ءِ تیابدپی شھد گوادر ءِ ھند جیونی ءِ ھند کنٹانی ھور ءَ ڈیزل ءُ پٹرول ءِ بازیں ڈپواں آس کپتگ-

دمگی مردمانی رد ءَ آس بازیں جاہ گپتگ اَنت ءُ آس ءِ سبب ءَ بازیں ڈپو سوتکگ ءُ پر بیتگ اَنت ءُ اشانی ھواری ءَ زر ءِ لمب ءَ اوشتوکیں یکدار ستکگ ءُ پر بیتگ اَنت-

آس کُشین گاڑیانی نہ بوگ ءَ آس بازیں کچے ءَ شنگ ءُ شانگ بیتگ ءُ تیل ءَ پریں ڈرم ءُ دگہ ازباب ستکگ اَنت-

آس ءِ کپگ ءَ دگہ جانی تاوانانی ھال نہ بیتگ ءُ ڈپٹی کمشنر گوادر عزت نزیر بلوچ وئیل ءَ شتگ –

کنٹانی ھور ایران ءِ سیمسرانی ھواریں تیل باپاری ءِ مزنیں بنجلے اود ءَ ھمک روچ لکانی ھساب ءَ تیل باپاری بیتگ ءُ بلوچستان ءَ ھوار پاکستان ءِ دگہ جاھاں تیل پجارین ایت –

روکپتی بلوچستان ءِ دمگ دشتیاری ءَ دگ ءِ وئیل ءَ تیل کشیں دو مردم بیران بیتگ اَنت-

گیشیں ھالانی رد ءَ دشتیاری ءَ دگ ءِ وئیل ءَ یک گاڑی ءِ چَپ بیتگ، چریشی ءَ گاڑی ءَ آس کپتگ ءُ گاڑی ءَ سواریں تیل ءِ باپار کنوکیں دو ورناہ سوتکگ ءُ بیران بیتگ اَنت-

بیران بیتگیں مردمانی پجار خلیل شیخ ء لال بکش ءُ مھرزاد تاجازائی ء شفیع مھمد جھمنند رگیتی دشتیاری ءِ نام ءَ زانگ بیتگ اَنت-

ھالانی تہ ءَ گوشگ بیتگ کہ وئیل ھما وھد ءَ پیش اتکگ گاڑی ترند روگ ءَ بیتگ ءُ چریشی ءَ وئیل ءِ آماچ بیتگ ءُ گاڑی ءَ پد ءَ آس کپتگ ءُ سواریں ھردوکیں مردم بیران بیتگ اَنت-

گوستگیں سال ءَ تیل کشیں مردمانی بیرانیانی کچ ھشتاد ءُ نُھ بیتگ اَنت کہ آ جتا جتائیں وئیلانی آماچ بیتگ ءُ بیران بیتگ اَنت اشانی توک ءَ ھژدہ کس کسان سالیں زھگ ھوار اَنت ءُ اے مردم گیشتر ایرانی لشکر ءِ تیرگواریاں وئیل ءِ آماچ بیتگ ءُ بیران بیتگ اَنت-

ایران ءِ آمیدگس ءَ سرکار ءِ ھلاپ ءَ زھرشانیانی وھد ءَ گرگ بیتگیں چار مردم جیلاں راہ داتگ اَنت ءُ اشاناں دَہ دَہ سال ءِ سزا داتگ اَنت-

عرب نیوز ءِ رد ءَ ایران ءَ سَے ماھاں چہ یکچل ءَ زھرشانیانی دیمپانی اِنت ءُ اشی ءِ نام ایرانی سرکار ءَ “فساد ” گشتگ ءُ اشی ءِ ھلاپ ءَ ترندیں گامگیج زورگ بیتگ ءُ اشانی ھواری ءَ دو کساناں پاھو اش ھم داتگ –

زانگ بہ بیت ایران ءَ مھلوک ءِ نیمگ ءَ ترندیں زھرشانیانی درچ ستمبر ءَ ھما وھد ءَ بندات بیتگ اَنت کہ بیست ءُ دو سالی ئیں مھسا امینی نامیں زالبولے اخلاقی پولیس ءِ دزگیری ءَ بیراب بیتگ ات- مھسا امینی دو وتی مرگ ءَ دو روچ پیش دزگیر کنگ بیتگ اَت-

تھران ءِ آمیدگس ءِ سروک علی الغاسی مھر ءَ کیس گوشداران ءَ زھرشانی کنوکاں ھواریں یک ءُ سد ءُ شست مردم پنچ داں دَہ سال ءَ زندانی سزا داتگ اَنت-

آئی ءِ رد ءَ ھمے وڑ ءَ ھشتاد مردماں دو داں پنچ سال ءِ سزا ءُ ھمے وڑ یک سد ءُ شست ءَ داں دو سال ءِ سزا دیگ بیت اِنت-

زھرشانی کنوکاں ھواریں دو مردماں پاھو دیگ بیتگ اَنت ءُ چریشی ءَ چہ میان اُستمانی برادری ترندی ءَ ایران ءِ سر ءَ ایراد گرگ ءَ اَنت-

زانگ بہ بیت گوستگیں ھپتگ ءَ ایران ءِ گوریچانی روکپت ءَ ھواریں اُستان مشھد ءَ مجید رضا ءُ محسن شکاری کہ آیانی اُمر بیست ءُ سے سال سال بیتگ ات دو شمبے ءُ سَے شمبے ءَ پاھو دیگ بیتگ ات اَنت کہ آیانی سر ءَ ھدا ءِ دشمنی بھتام جنگ بیتگ اَت-

ھردوکین مردمانی پاھو دیگ ءَ پیسر ایرانی آمیدگس ءَ زھرشانیاں ھواریں یازدہ مردمانی پاھو دیگ ءِ سزا ءِ ھکم داتگ ات ءُ پد ءَ انسانی ھکانی گلانی گوشگ ات کہ اشاں ابید بازیں کچے ءَ اے وڑیں بھتام دیم ءَ اتکگ بیتگ اَنت کہ آیانی سر ءَ مرگ ءِ سزا ایر کنگ بیتگ اَنت-

ھمے وڑ ءَ ورلڈ یونین آف فٹبالبر “فیفرو ” ءِ گوشگ اَت من ءَ ھال رس اتگ ءُ منی جان ءَ لرزشے کپتگ ایرانی فٹبالر عامر نصر ھم زھرشانی ءَ ھواری ءِ پژدر ءَ پاھو دیگ ءِ ھکم ءِ گمان بیتگ –

عامر نصر ازادانی اسپھان ءِ شھر ءَ دو روچ ءَ پیسر “سلاہ بندیں فساد ” ءِ بھتام ءَ ھوار بیگ ءَ دزگیر کنگ بیتگ اَت-

اسپھان ءِ آمیدگس ءِ سروک عبداللہ جعفری ءَ نصر ءِ دزگیر کنگ ءَ پد گوشتگ ات کہ شانزدہ ستمبر ءَ بیوکیں وئیل ءَ سَے سیکورٹی کارندہ کشگ بیتگ اَنت-

فیفرو ءِ پیج ءَ بیوکیں ٹویٹ ءَ گوشگ بیتگ کہ مارا اے ھال سر بیتگ باز پدر بیتگ ایں کہ پروفیشنل فٹبال ءِ کلاڑی عامر نصر ءَ زالبولانی ھکانی واستا بیوکیں زھرشانی ءِ پژدر ءَ آئی ءَ مرگ ءِ سزا ءِ دیمپانی کنگ کپگ اِنت-

سر بیتگیں ھالانی رد ءَ زاھدان ءَ سی ستمبر ءَ ایرانی لشکر ءِ آنسوگیس ءَ یک بیران بیتگیں زالبولے ءِ نام دیم ءَ اتکگ-

گیشیں ھالانی رد ءَ بیران بیتگیں زالبول ءِ پجار ھشتاد ءُ ھشت سالی ئیں زلہخا ترزی ءِ نام ءَ زانگ بیتگ ءُ گل مھمد ءِ چک گوشگ بیگ اِنت-

ھالانی تہ ءَ گوشگ بیتگ کہ اے زالبول ھما وھد ءَ بیران بیتگ ایرانی لشکر ءَ زھرشانی کنوکانی شنگ ءُ شانگ کنگ ءَ شھر ءَ آنسو گیس جتگ ءُ چریشی ءَ آئی ءِ دم گٹ اتگ ءُ بیران بیتگ-

ھالانی رد ءَ گوشگ بیتگ کہ زلیخاہ اوگانستان ءِ جھمنندیں بلوچے بیتگ کہ بازیں سالاں چہ پیسر زاھدان ءَ اتکگ ءُ نندوک بیتگ-

ھالانی رد ءَ گوشگ بیتگ کہ زلیخاہ ءِ کھول ءَ بیھار دیگ ءُ گوشگ بیتگ کہ اگاں شما اے ھال کش ات گڑا شمئے کھول ءَ جھمنندی کارڈ چہ پچگرگ بنت-

ھمے وڑ ءَ زاھدان ءَ سی ستمبر ءَ زدگ بیتگیں یک مردمے بیران بیتگ-

بیران بیتگیں مردم ءِ پجار حبیب اللہ یعقوبی ءِ نام ءَ زانگ بیتگ کہ زھگ ءِ جھمنند اِنت –

ھالانی رد ءَ گوشگ بیتگ کہ آئی ءَ گوستگیں روچ ءَ وتی درد نہ سگ اتگ ءُ بیران بیتگ-

زانگ بہ بیت زاھدان ءَ سی ستمبر ءَ بازیں مردمے ایرانی لشکر ءِ تیرانی نشانگ ءُ کشگ بیتگ ات اَنت-

دوحہ گتر ءَ برجاھیں فیفا ورلڈ کپ ءِ اولی سیمی فائنل ءَ ارجنٹائن ءُ کروشیا دیم پہ دیم بیتگ اَنت، ارجنٹائن ءَ سئے گول ءَ چہ گوازی وتی نام ءَ کُتگ ءُ ورلڈ کپ فائنل ءَ سر بیتگ۔

اولی سیمی فائنل لوسیل پَٹ ءَ لئیب کنگ بیتگ کہ اِشی تہءَ ارجنٹائن ءِ نامداریں لئیبی لیونل میسی ءَ 34 می دمان ءَ اولی گول پینلٹی سرءَ آورتگ، وھدیکہ ایندگہ دوھیں گول جولین الوریز ءَ 39 می ءُ 69 می دمان ءَ داتگ اَنت۔

لوسیل فٹبال پٹ ءَ بوتگیں سیمی فائنل ءَ پروش وارتگیں ٹیم کروشیا ءِ نیمگ ءَ ھچ گول دیگ نہ بیتگ، ءُ ارجنٹائن ءَ سئے ءُ سِپر ءَ چہ گوازی وتی نام ءَ کُتگ ءُ وتءَ یک شمبے ھشدہ دسمبر ءَ بیوکیں ورلڈ کپ فائنل ءَ سرکُتگ۔

وھدیکہ دومی سیمی فائنل باندہ موراکو ءُ فرانس ءِ نیام ءَ لئیب کنگ بیت اِنت ءُ باندات باج بر بیوکیں ٹیم ھشدہ دسمبر ءَ ارجنٹائن ءِ دیما ورلڈ کپ فائنل ءَ گوازی کنت۔

ھاران ءَ ناشناسیں مردماں لوگ یے تہءَ دزبمب ءِ دور داتگ ءُ تتکگ اَنت۔

اھوالانی ردءَ ھاران ءِ ھند چیف چوک ءِ نزیک ءَ شہریار نوشیروانی نامی مردمے ءِ لوگ ناشناسیں مردماں دزبمب اُرش نشانگ کُتگ۔ تراکے توار داں دیراں گُوشدارگ بیتگ، پولیس ءُ ھندی واکداراں اُرش جاہ انگیراں کُتگ۔

دومی نیمگ بلوچ آجوئی لوٹوکیں گل بلوچ لبریشن آرمی ءَ ھاران اُرش ءِ زمہ واری زرتگ ءُ وتی شنگ کُتگیں درشانے تہءَ بی ایل اے ءِ جارکش جیئند بلوچ ءَ گُشتگ کہ بلوچ لبریشن آرمی ءِ سرمچاراں ھاران شھر ءَ چیف چوک ءِ نزیک ءَ قوضہ گیریں پاکستانی پوج ءِ داشتگیں کارندہ شہریار نوشیروانی ءِ ٹھکانہ دزبمب اُرش یے تہءَ نشانگ کُتگ۔ نشانگ کُتگیں مردم قوضہ گیریں پوج ءِ گُشگ ءِ پدءَ بلوچ ورناھانی بلیک میل کنگ آیاں پہ دژمن پوج ءَ چریکی کنگ ءِ ھاترءَ کارمرز کنگ ءَ بیتگ۔ ھمے کارندہ بزگیں بلوچانی سرءَ قوضہ ءِ جرمکاریانی تہءَ ھم ھوار اَنت۔

جیئند بلوچ ءَ دیمترءَ گُشتگ کہ شہریار نوشیروانی ءَ ھوار ھاران ءُ کش ءُ کری دمگانی تہءَ قوضہ گیریں دژمن ءِ چاریگ ءُ کارندہ آیانی آسر ءَ سرکنگ بنت۔ ما اے اھد ءَ کنیں کہ وتی منزل ءِ گرگ ءَ داں قوضہ گیریں پوج ءُ آئی ھم کارانی سرءَ مئے اُرش برجاہ مان اَنت۔

بلوچستان ءِ دمگ کیچ ءُ گوادر ءِ نیامی ھند سیائیجی ءُ دڑامب ءَ پوجی بیڑ یکلشلی ءَ گوں سیمی روچ ءَ ھم برجاہ اِنت، برجاھیں پوجی بیڑ ءِ تہ ءَ زمینی پوجی ٹولیاں ھوار گن شپ بالگرد ءُ ڈرون ھم بھر زیرگ ءَ اَنت۔

اِشی ءَ ابید دشت ءِ بازیں ھندانی تہ ءَ پوجی کارمندانی ترندیں پَٹ ءُ پول برجاہ اِنت، کہ اِشانی تہ ءَ زرین بُگ، مُلایانی نگْور، چاتی بند، دروار،گورپاگ بشولی، گومازی، تگاد گور، ءُ مَک سر ھوار اَنت۔

برجاھیں بیڑ ءِ تہءَ داں انگت ھچ پئیمیں جانی تاوان یا دزگیری ءِ اھوال سر نہ بیتگ اَنت۔

زانگ بہ بیت پوجی بیڑ ءِ بندات ھما وھد ءَ کنگ بیتگ اَت وھدیکہ گوادر ءَ بلوچستان لبریشن فرنٹ ءَ یک اُرشے ءِ تہ ءَ پوجی کارندہ کُشتگ اِت اَنت ءُ آیانی سلاہ گوں وت بُرتگ اِت اَنت۔

بلوچستان لبریشن فرنٹ ءِ رد ءَ سرمچاراں گوادر ءِ ھند کنڈا سول ءِ تہ ءَ پاکستانی پوج ءِ ھاتر ءَ راشن بروکیں ٹرکانی کاروان ءِ سر ءَ ترندیں سلاھانی گوما اُرش کُتگ اَت کہ اِشی ءِ سوب ءَ یک ٹرکے ءَ سواریں سئے پوجی کارندہ مرتگ اَنت۔ آیانی سلاہ دزگپتگ اَنت ءُ پد ءَ دژمنیں پوجے ٹرک مانداشتگ۔ اے کاروان ءِ تہ ءَ ھواریں دگہ یک گاڑی یے ھم نشانگ کنگ بیتگ کہ اِشی ءَ سواریں سئے کارندہ مُرتگ اَنت ءُ ڈرائیور ٹپی ایں جاوارانی تہ ءَ تچگ ءَ سوبمند بیتگ۔

اے اُرش ءِ درگت ءَ پاکستانی پوج ءَ داں انگت ھچ پئیمیں درشان ءِ دیم ءَ نئیتکگ، بلے زانگ بہ بیت گوستگیں لھتیں وھد ءَ چہ بلوچستان ءَ لشکریانی سر ءَ بیوکیں اُرشانی تہ ءَ جنگ بیتگیں پوجیانی کھول ءُ ھندی مردم آیانی کُشگ بئیگ ءِ ھال ءَ راست کن اَنت وھدیکہ پاکستانی پوج ءِ جارکش اَے رد ءَ ھچ نہ گُش اِیت۔

گوستگیں روچاں کیچ ءِ دمگ ءَ ھم ھمے پئیمیں وئیلے دیم ءَ اتکگ اَت کہ اِشانی تہ ءَ کُشگ بیتگیں کارمندانی کھول ءُ ھندی مردماں آیانی کُشگ بئیگ ءِ ھال راست کتگ اِت اَنت بلے لشکریانی نیمگ ءَ ھچ پئیمیں درشان دیم ءَ نئیتکگ اَت۔