TBP Balochi

شال ءَ ھوار بلوچستان ءِ سارتیں جاھاں مروچی وانگجاہ ءُ شھدربرجاھانی موکل دو ماہ ءُ پانزدہ روچ ءِ واستا مروچی بندات بنت-

اے وانگجاہ نوکیں سال ءِ یکم مارچ ءَ پچ کنگ بنت ءُ استان ءِ گرمیں جاھاں بس دہ روچ ءِ موکلانی ءَ بیست ءُ دو دسمبر ءَ بند بنت ءُ سی ءُ یک دسمبر ءَ واتر پچ کنگ بنت-

مھکمہ ءِ تعلیم ءِ نیمگ ءَ شنگ کنگ بیتگیں ھال ءَ شال ءُ بلوچستان ءِ دگہ ھژدہ جاھاں سارتی ءِ سبب ءَ وانگجاہ ءُ شھدربرجاہ دو ماہ ءُ پانزدہ روچ ءِ واستا موکلی بنت کہ اشانی موکلی مروچی بزانکہ شانزدہ دسمبر ءَ بندات بنت-

سارتیں جاھاں اے وانگجاہ ءُ شھدربرانی وانگی پرکاری نوکیں سال ءِ یکم مارچ ءَ پچ بنت-

اشی ءَ ابید اُستان ءِ دگہ ھبدہ جاھاں اود ءَ گرم ءِ زور ھست اِنت آیانی موکل بیست ءُ دو دسمبر ءَ بندات بنت ءُ سی ءُ یک دسمبر ءَ واتر پچ بنت-

بلوچستان ءِ جتاجتائیں دمگ کیچ، کولواہ ءُ کلات ءَ سلاہ بندیں مردماں پاکستانی پوج ءِ کاروان ، پیادگ ٹولی ءُ پانگسانی سر ءَ دستی بمب ءُ تیرگواری کتگ دومی نیمگ ءَ اے اُرشانی زمہ واری بلوچ آجوئی لوٹوکیں سلاہ بندیں بی ایل اے ءُ بی ایل ایف ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل اے ءِ سرمچاراں کلات ءُ کیچ ءَ پوج سر ءَ اُرش کتگ-

جیئند بلوچ ءَ گْوشتگ کہ بلوچ لبریشن آرمی ءِ سرمچاراں گوستگیں روچ ءَ کیچ ءِ دمگ کولواہ ءُ کلات شھر ءَ دوجتائیں اُرشاں زورگریں پاکستانی پوج نشانگ کتگ، چریشی ءِ آسر ءَ پوج ءِ سے کارندہ مرتگ ءُ کم چہ کم پنچ کارندہ ٹپی بیتگ-

آئی ءَ گْوشتگ کہ بی ایل اے ءِ سرمچاراں اولی اُرش گوستگیں روچ ءَ ساھت سے ءِ نزیک ءَ کولواہ ءَ کڈ ھوٹل ءِ ھند ءَ کتگ ، اود سرمچاراں یک چیرکتگیں بمبے ءَ دُژمنیں پوج ءِ گاڑی نشانگ کتگ، تراک ءِ آسر ءَ سے کارندہ ھما دمان ءَ مرتگ اَنت ءُ کم چہ کم سے ٹپی بیتگ وھدے کہ گاڑی سرجم ءَ تباہ بیتگ-

آئی ءَ دیمتر ءَ گْوشتگ کہ دومی اُرش سرمچاراں گوستگیں شپ ءَ کلات شھر ءَ زورگریں پوج ءِ میس ءِ نندانکجاہ کوارٹر ءِ تھی در سر ءَ ساڑی ئیں کارندہ دستی بمب ءَ گوں نشانگ کتگ چریشی ءِ دو کارندہ ٹپی بیتگ اَنت-

جارکش ءَ گْوشتگ کہ بلوچ لبریشن آرمی اے دوئیں اُرشانی زمہ واری ءَ منّ اِیت ءُ اے اھد کنت کہ زورگریں پوج ءِ سرجمی ءَ دراھگ ءَ تاں مئے اُرش برجاہ بنت-

بلوچستان لبریشن پرنٹ ءِ جارکش میجر گْوھرام بلوچ ءَ کولواہ ءَ پاکستانی پوج ءِ گشتی ٹولی ءِ کارندھانی ءُ تربت ءَ پانگس سر ءَ دستی بمب اُرش زمہ واری منّ اِتگ اَنت-

جارکش ءَ گْوشتگ کہ چارشمبے چاردہ دسمبر ءَ ساھت دوازدہ ءَ کیچ ءِ دمگ کولواہ بلور ءَ سرمچاراں پاکستانی پوج ءِ گشتی ٹولی ءِ دو پرپٹانی سر ءَ چار کارندہ سوار بیتگ اَنت ءُ شش پیادگیں لشکر ءِ کارندھاں نوکیں سلاھاں چہ اُرش کتگ اَنت- اے اُرش ءَ دو لشکر کارندہ ھما دمان ءَ مرتگ اَنت ءُ سے ٹپی بیتگ اَنت-

جارکش ءَ دیمتر ءَ گْوشتگ کہ ھمے روچ ءَ بیگاہ ءِ شش ءُ چل ملٹ ءَ مئے سرمچاراں کیچ ءِ بُنجاھی شھر تربت ءَ سینما چار راہ ءِ سر ءَ کبرستان ءِ نزیک ءَ آرمی ءِ پانگس سر ءَ دستی بمبے چگل داتگ – دستی بمب پانگس تہ ءَ کپتگ، چریشی ءِ آسر ءَ یک کارندھے مرتگ ءُ یکے ٹپی بیتگ-

اُرش ءَ پد پروش وارتگیں پوج ءَ سر ءُ دیم تیرگواری کتگ چریشی ءِ آسر ءَ یک راھگوازے ٹپی بیتگ-

میجر گْوھرام بلوچ ءَ گْوشتگ کہ زورگریں پوج ءِ سر ءَ اُرش زورگپتگیں بلوچستان ءِ وتواجھی ءَ تاں برجاہ بنت-

سربوتگیں ھالانی رِد ءَ پاکستانی پوج ءَ بلوچستان ءِ دمگ ھزدار ءَ ھشتمی تبک ءِ نودربرے زورانسری آوار جتگ ءُ بیگواہ کتگ –

گیشیں ھالانی رِد ءَ ھزدار ءِ دمگ چاندنی چار راہ ءَ پاکستانی پوج ءَ ھشتمی تبک ءِ نودربر ریحان ء محمد جان جھمنند کھٹان زورانسری آوار جتگ ءُ بیگواہ کتگ – زورانسری آوار جنگ بوتگیں نودربر بیگواھیں رشید ءُ آسف بلوچ ءِ کھول ءَ سیادی داریت –

بیگواھیں آصف ءُ رشید بلوچ ءِ گھار سائرہ ءَ بلوچ ءَ نودربر ءِ زورانسری آوار جنی ءِ ھبر راست کُتگ ءُ گوشتگ کہ منی وارس ریحان بلوچ کہ ھشتمی تبک ءَ وانگ انت مروچی بیگاھ ءَ چاندنی چار راہ ءَ ( کہ اودا پارگیں ٹیم ءَ ھجام ءِ دکان ءَ کار کنت) پاکستانی پوج ءَ سر بازار مھلوک ءِ دیم ءَ لٹ شاپ کُتگ زورانسری وتی گاڑی ءَ سوار کتگ ءُ ناشناسیں جاھے ءَ برتگ –

زانگ بہ بیت سائرہ بلوچ ءَ گوستگیں چار سال بیت کہ وتی براتانی ھاتر ءَ زھرشانی کنگ ءَ انت گوستگیں ماہ ءَ سائرہ ءِ دگہ دو وارس زورانسری آوار جنگ بوتگ انت کہ پدا رند ءَ سی ٹی ڈی ءَ زاھر کتگ انت ءُ ھنو پدا دگہ وارس ءِ آوار جتگ ءُ بیگواہ کتگ –

روکپتی بلوچستان ءِ دمگ راسک ءَ ایرانی چیریں ادارھانی کارمنداں یک مردمے آوار جتگ ءُ برتگ-

آوار جنگ بیتگیں مردم ءِ پجار عارف دھکانی ءِ نام ءَ زانگ بیتگ کہ آ راسک ءِ جھمنند گوشگ بوگ ءَ اِنت-

ھالانی تہ ءَ گوشگ بیتگ کہ وتی لوگ ءَ چہ ڈن روگ ءَ بیتگ ءُ ایرانی چیریں ادارھاں یک کارمندے آوار جتگ ءُ برتگ-

ھالانی تہ ءَ گوشگ بیتگ کہ عارف مولانا عبدالغفار نقشبندی ءِ پھزدارے-

زانگ بہ بیت گوستگیں روچاں عبدالغفار نقشبندی ماں روکپتی بلوچستان ءَ زھرشانی پلامرزی ءِ پژدر ءَ ایران ءَ سنی ملایانی آمیدگس ءَ ماں مشھد ءَ پیش بیگ ءِ ھکم داتگ ات-

چریشی ءَ پد مولانا عبدالغفار نقشبندی ءَ ماں پسھی ءَ گوشتگ ات کہ من ءَ ناشریانی تچکیں گپ ءُ منانکاں بہ دے ات گڑا نی من شمئے دیم ءَ پیش بیگ ءَ جاڑیگاں –

روکپتی بلوچستان ءَ زھرشانیانی پژدر ءَ بازیں مردمے کُشگ ءُ گرگ ءُ زندانی کنگ بیتگ اَنت-

دومی نیمگ ءَ ایران ءِ سر ءَ جھانی انسانی ھکانی گلانی نیمگ ءَ انسانی ھکانی لگتمالی ءِ پژدر ءَ بازیں ایرادانی دیمپانی اِنت-

ایران گیشتر اے بھتاماں ماں روکپتی ڈیھانی پرگواتی گوشگ اِنت کہ روکپتی ڈیھ مھلوک ءَ چنگ ءُ پریچگ ءَ اَنت چریشی ءَ چہ مھلوک برانز گپتگ –

بلوچستان ءِ جتاجتائیں دمگ نوشکی، ھُزدار ءُ شال ءَ یک مردمے تیرگواری ءِ آسر ءَ کُشگ بیتگ ءُ دو مردم ءِ لاش دز کپتگ اَنت-

سربوتگیں ھالانی رِد ءَ نوشکی ءِ دمگ غریب آباد ءَ ناشناسیں سلاہ بندیں مردمانی تیرگواری ءِ آسر ءَ مھیم ء محمد اشرف جمالدینی کُشگ بیتگ-

پولیس ءَ وئیل پدر کتگ بلے وئیل سوب زانگ نہ بیتگ-

دومی نیمگ ءَ چہ ھُزدار ءِ تھسیل وڈھ یک ٹپ ءُ ٹوریں لاشے دزکپتگ- پولیس گْوشگ اِنت کہ گوستگیں روچ ءَ پولیس ءَ ھال سر بیتگ کہ جوئے نورا ءَ پیریں مردمے ءِ لاش دزکپتگ-

پولیس گوشگ رِد ءَ اے مرد لَٹ ءُ کُٹ کتگ ءُ کُشتگ تنی وھدے وئیل سوب زانگ نہ بیتگ وھدے کہ پولیس پٹ ءُ پول کنگ ءَ اِنت-

دزکپتگیں لاش ءِ پجّار محمد افضل ء زرک جھمنند وڈھ نام ءَ چہ بیتگ-

ھمے وڑ شال ءَ چارشمبے ءِ روچ ءَ چہ روکپتی بائی پاس اچکزئی ٹاؤن ءَ یک مردمے ءِ لاش دزکپتگ ءُ آئی ءِ پجّار نواب خان نام ءَ چہ بیتگ –

پولیس ءَ لاش دزگپتگ ءُ نادُراھجاہ ءَ برتگ پہ گیشیں چار ءُ ٹپاس ءَ پد کھول ءَ داتگ ، وئیل واب انگت زانگ نہ بیتگ-

پاکستانی پوج ءِ جارکش ءَ گوشتگ کہ چارشمبے ءِ روچ ءَ گوریچانی وزیرستان ءِ ھند میران شاہ ءَ یک وتکش تراکے بیتگ چریشی ءَ سکیورٹی کارمندے ءَ ھوار دو مردم بیران بیتگ اَنت-

پشمبے ءِ روچ ءَ آئی ایس پی آر ءِ نیمگ ءَ شنگ بیتگیں یک درشانے ءَ گوشگ بیتگ کہ تراک ءِ آسر ءَ میانوالی ءَ سیادی داروکیں ھولدار سِی سالی ئیں مھمد امیر ءَ یک شھری ءِ بیران بیران بیتگ اَنت ءُ دگہ لس شھری زدگ بیتگ اَنت-

ھمے وڑ ءَ وفاقی وزیر رانا ثنااللہ ءَ تراک ایر جتگ ءُ گوشتگ کہ باز پدردیگ آں-

وزارت داکلہ ءِ نیمگ ءَ شنگ بیتگیں درشان ءَ گوشگ بیتگ کہ رانا ثنااللہ ءَ خیبرپختوانخوا ءَ امن ءُ ایمنی ءِ ھرچ تکاں گر ءُ دار کنگ ءَ گشتگ ناشرکارانی رندگیری ءَ کن ایں آیاں گڈسری ءَ بے سوب کن ایں-

آئی ءَ گوشتگ کہ ناشرکاری ءِ ھلاس کنگ ءَ راج سکیورٹی لشکر ءِ گون ءَ ھمراہ اِنت

کتاب: بلوچ ریاست کی تشکیل

نبشتہ کار: سمیع بلوچ

دی بلوچستان پوسٹ

دومی بھر

دیمتر ءَ دور رائے خاندان ءِ بیت 635 ءَ تک ایشانی حکومت بیت ءُ رائے خاندان ءِ گُڈی بادشاہ “ساھاسی” بیت ءُ ایشی ءِ مرگ ءَ رند چچ نامیں برھمن وزیرے بادشاہ ءِ جنوزام ءَ گوں سور کنت ءُ ایشی ءَ چہ دو بچکیں چُک ءُ یک جنکیں چُکے ودی بیت ( داھر ،دھرسینہ ءُ بائی مایین ) 632 ء ءَ فارس ءِ ملکہ بانُک دُخت مکران ءِ سر ءَ اُرش کنت ءُ (دُخت خسرو پرویز ءِ جنک بیت ) زورگریں بادشاہ رائے چچ یک روچے ھمے بانُک ءِ ملکہ ءِ زمانگ ءَ دیم پہ ارمن بیل (لسبیلہ) ءُ کرمان ءُ مکران ءُ پنج پور ءِ سر ءَ اُرش کنگ ءَ دیم ءَ کنت ۔ واتر روگ ءَ پیسر رائے چچ گنداوہ ءِ سر ءَ اُرش کنت ءُ گنداوہ ءِ لشکر کلات بند بنت ءُ چچ ءِ گون ءَ اگریمنٹ کن اَنت کہ ما رائی چچ ھکومت ءَ ھموک سال ۱۰۰ کوھی خچر ءُ یک لکھ درھم دیگ ءِ پابند باں 40 سال گہ حکومت کنگ ءَ رند چچ 671 ءں مریت ءُ چچ نامہ ءِ تہ ءَ مان اِنت چچ رائے بیلہ ءَ چہ مارچ کنان ءَ جھالاوان ءُ گنداوہ ءَ چہ دیم پہ سبی ءَ تک دریائے ناڑی ءَ تک کیت انچو زانگ بیت بلوچستان ءِ تہ ءَ ھاس مکران ءِ تہ ءَ عربانی اُرش ءَ چچ ءِ حاکمیت بیت-

نوٹ : اے چمشانک گیش دراج مہ بیت ھمیشک ءَ لھتے چیزانی باز کسان کنگ الّمی اِنت-

امیر معاویہ بلوچستان ءَ جنگی سپاھی دیم دنت عبدللہ عبدی ءِ رھبری ءَ بلے شکست ور انت ءُ مِر انت دومی برا راشد بن عمرو ءِ رھبری ءَ کیت ایش ءُ مِر اَنت ءُ بے سوب بنت سیمی رند ءَ سنسان بن سلمہ کیت ءُ مر ایت بے سوب بیت بلوچستان ءِ راہ ءَ بازیں اسلامی لشکر راجہ داھر ءِ شکست دیگ ءِ نیت ءَ آتکگ اَنت ءُ ناکام بوتگ اَنت بلے محمد بن قاسم سندھ ءَ گپت ءُ مکران ءَ سندھ ءِ تہ ءَ ھور کنت ءُ مزنیں مال غنیمت ءُ ھندو جنین ءُ زھگاں مولد ءُ بندی کنان کنت تکریبن 700 ءُ ایشاں بازار ءَ بھا کن اَنت ایشی ءَ رند سارش ھی سازش(مئے دپتر نہ اِنت مارا کار نیست) ءُ مھمد بن قاسم دزگیر کنگ بیت ءُ پوستے ءِ تلا دیگ بیت ءُ عراق ءَ دیم دیگ بیت بلے محمد بن قاسم 21 سالے عمر ءَ راہ ءَ مر ایت بلوچستان سداں جنگاں رند ھوں مسلمان نہ بیت ءُ وتی مذھب ءُ اکیدت ءُ رسم ءُ دودانی منوک بنت گنداوہ ءُ قلات ءِ تہ ءَ ” مامون الرشید ءِ زمانگ ( 833 تا 834ء ءَ گھگیری یے سر چست کنت بلے باگیانی سرکشی ءِ سزا موت بیت عربانی زورگری ءَ تا 976ء تک برقرار بیت بلوچستان ءِ سر ءَ ءُ عرباں رَند یعقب بن لیس صفاری ءِ ایران ءِ چیر دستیں ھاکمیت بیت رند ءَ سلجوکیانی ءُ بس پہ نامیں اسر ھست بلوچستان ءِ تہ ءَ ھلاپت ء اسلام ءَ پد ” ھباری دور ھکومت 855ء تا 1010ء اے گُڈسرا ریاست مکران ،ریاست مشکے ءُ توران ریاست وتواجھیں ریاست بنت دھمی سنچری ءَ بلوچستان ءِ سر ءَ “نصیر الدین غزنوی ءُ آئی ءِ چُک محمود غزنوی اُرش کن اَنت ءُ بلوچ لشکری جنگانی دیمپان بنت ءُ آخر کار غزنوی سال 976ء 977ء ءَ توران ءُ مکران ریاستانی زورگر بیت ءُ ھاکمیت کنت بلے وھدے 994ء زمانگ ءَ غزنوی کہ خضدار ءِ سر ءَ اُرش کنت گڑا بلوچانی نیمگ ءَ چہ ترندیں گھگیری ءِ گندگ ءَ کیت غزنوی آکر کار دھمی سنچری ءِ گُڈسرا تک ایران ءِ یک مزنیں بھرے ءِ ھاکم بیت بلے محمود غزنوی ءِ واستا بلوچستان ءُ کرمان ءِ نیامے کوھانی سر ءَ بلوچانی چھاپہ مارجنگ سک پریشان کُن گپے بیت محمود زانت اے بلوچ ھچ اے راہ ءَ گوْزگ ءَ نیلنت گڑا یک سازشے کنت ءُ ھمے سرمچارانی ھلاپ ءَ سازش کامیاب بیت ءُ سجئیں بلوچ سرمچارانی نمیرانی ءَ رند محمود غزنوی سرجمیں بلوچستان ءِ سر ءَ زورگر بیت-

غزنوی 977ء جھالاوان سر ءَ زورگری کنگ ءَ رند ھندوستان ءِ سر ءَ اُرش کنت ھمد ءَ چہ محمود ءَ سلطان ءِ لقب رس ایت ۔۔ یازدھمی سنچری ءِ بندات ءَ غزنوی سبی ءِ سر ءَ زورگری کنت ءُ 1004ء ءَ ملتان ءِ سجئیں علاقہ گرگ بنت محمود ھندوستان ءِ سومناتھ ءِ زورگرگ ءَ رند گنداوہ ءَ وتی ھاکمیت ءَ ھوار کنت غزنوی ءَ نیگُڈی بادشاہ “خسرو ملک” بیت 1186ء ءُ 87ء زمانگ ءَ “محمود غوری” ءِ دست ءَ شکست وارت ءُ اے پیم غزنوی ءِ دور ھلاس بیت بلے بلوچانی سر ءَ دگہ زالم ءُ زورگریں غوری ءِ نام سر ءَ ودی بیت اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زالبولانی ھلاپ ءَ گامگیج زورگ ءِ پژدر ءَ ایران ءِ میان اُستمان ءِ کمیشن (برائے خواتین) ءِ باسکی ھلاس کتگ-

عرب نیوز ءِ رد ےَ امریکہ ءِ نیمگ ءَ دزبندی کنگ بیتگیں دزبندی ءَ ھاتر ءَ پیش کنگ بیتگیں میان اُستمان ءِ زالبولانی ھاتر ءَ بستار داروکیں کمیشن ءَ چہ ایران ءِ باسکی ھلاس کتگ- چِل ءُ پنچ باسکی ءَ ھواریں میان اُستمانی زرکاری ءُ چاگردی کونسل منگ بیتگ اَنت-

کونسل ءَ بیست ءُ نُھ باسکانی دزبندیانی منگ ءِ ھک ءَ ھشت آئی ءِ ھلاپ ءُ شانزہ ءَ وؤٹنگ ءِ کتگ –

منّگ نامہ ءَ پد میان اُستمان ءَ امریکہ ءِ سپیر لنڈا تھومس گرین فیلڈ ءَ عرب نیوز ءَ گوں گپ کنان ءَ گوشتگ کہ ایران ءِ باسکی کمیشن ءِ دست ءُ بڈ اتگ-

آئی ءَ دیمتر ءَ گشتگ کہ ایرانی زالبول ءُ چاگردی باسکاں مارا ءُ میان اُستمان ءَ گوں پلامرزی ءِ دزبندی کتگ- آیانی دزبندی یکدم گچین بیتگ ایران ءَ زالبولانی کمیشن ءَ چہ بہ کش ات-

ایران میان اُستمان ءِ زالبولانی کمیشن سال دوھزار ءُ بیست ءُ دو ءَ باسک اِنت اشی ءِ وھد سال دوھزاد ءُ بیست ءُ شش ءُ ھلاس بوگی بیتگ بلے منگ نامہ ءَ پد نی ایران آئی ءِ بھر نہ اِنت-

ھمے وڑ ءَ میان اُستمان ءَ ایران ءِ مندوب امیع سعید ایروانی ءَ امریکہ ءِ چیردستی ءَ بیگ بیتگیں اے گامگیج گیرکانونی ءُ امریکہ ءِ اے پالیسی ایران ءِ بگیرداری گشتگ-

ایران ءَ ھوار فلسطین ءُ دگہ ھبدہ ڈیھاں میان اُستمان ءَ را زرکاری ءُ چاگردی کونسل ءُ را نمدی نبشتگ کتگ کہ اے جیڑہ ءِ سر ءَ ووٹنگ ءَ ھنچیں مسال برجم دارگ بیت اِنت چریشی ءَ جتا جتائیں دود، رواج ءُ رسمانج دارگ ءِ باسکانی ڈیھ اے وڑیں کمیشنانی پرکاریانی دارگ ءَ وتی بھر ءَ ھوارینان اَنت-

نمدی ءَ نبشتہ بیتگ کونسل ءِ باسکاں زور دیگ بیتگ آ امریکہ ءِ اے گامگیج ءِ ھلاپ ءَ ووٹ بہ دے اَنت ءُ آوکیں وھداں کجام ھم وھد ءَ میان اُستمانی سسٹم ءَ کس کانونی رنگ ءَ دارگ بیتگین ڈیھ ءَ کش ات نہ کنت-

نمدی ءِ سر ءَ ھما ڈیھاں کہ دزنشان جتگ آیانی توک ءَ پنچ ڈیھ میان اُستمان ءِ زرکاری ءُ چاگردی کونسل ءِ باسک اَنت کہ آیاں منگ نامہ ءِ ھک ءَ ووٹ داتگ-

زانگ بہ بیت میان اُستمانی کمیونٹء ءِ نیمگ ءَ اے گامگیج ھما وھد ءَ دیم ءَ اتکگ بیتگ کہ کرد ایرانی شھری مھسا امینی ءِ بیرانی ءَ پد سرجمیں ڈیھ ءَ زھرشانیاں داں انگت ءَ سَے سد ءُ پنجاپ مردم ءَ گیش بیران بیتگ انت ءُ ھژدہ ھزار مردم دزگیر کنگ بیتگ اَنت-

زھرشانی ءِ وھد ءَ چارسد مردم گرگ بیتگ اَنت اشانی سر ءَ دَہ دَہ سال زندانی سزا اتکگ بیتگ-

اشانہ توک ءَ دو مردماں داں انگت ءَ پاھو ءِ سزا اتکگ ءُ پاھو دیگ بیتگ اَنت-

گوستگیں ماہ ءَ میان اُستمان ءِ انسانی ھکانی گل ءِ کونسل ءَ ایران ءَ برجاھیں زھرشانی چیردست کنگ ءِ ھلاپ ءَ ابید تلب داری پٹ ءُ پول کنگ ءِ ھک ءَ ووٹ داتگ ات-

ایران ءَ روکپتی ڈیھاں بھتام جتگ ءُ گوشتگ کپ انسانی ھکانی کونسل ءَ وتی اسپر کنگ ءُ ایران ءَ نشانگ کنگ ءَ اَنت-

دلگان ءَ سلاہ بندیں مردماں تیرگواری کنان ءَ یک مردمے کُشتگ ءُ ششت مانداتگ ءُ شتگ اَنت-

گیشیں ھالانی رد ءَ روکپتی بلوچستان ءِ دمگ دلگان ءَ سلاہ بندیں مردماں تیرگواری کنان ءَ پرویز بامری مراد خانی ء عزت جھمنند دلگان کشتگ –

ھالانی تہ ءَ گوشگ بیتگ گوستگیں بازیں سالاں پیسر پرویز ءِ ٹک ءَ دومی مردمانی مردمے کُشتگ ءُ پد ءَ ھردوکیں نیمگاں سلاہ بیتگ بلے گوستگیں روچ ءَ ناگتی دومی مردماں آئی ءِ سر ءَ تیرگواری کرتگ ءُ کُشتگ-

زانگ بہ بیت وت ماں وتی جیڑھانی سبب ءَ ھمک سال بازیں کچے ءَ مردماں مرگ ءِ دیمپانی کنگ کپگ اِنت-

دوحہ گتر ءَ فیفا ورلڈ کپ ءِ سیمی فائنل گوازی ءِ دومی گوازی فرانس ءُ مراکش ءِ میان ءَ البیت فٹبال پٹ ءَ کنگ بوتگ کہ فرانس ءَ دو گولاں گوازی کٹ اِتگ ءُ گڈی (فائنل) ءَ سربوگ ءَ سوبمند بوتگ –

مراکش ءُ فرانس ءِ میان ءَ بوتگیں گوازی ءَ مراکش ءِ نیمگ ءَ ھچ گول دیگ نہ بوتگ وھدیکہ فرانس ءِ نیمگ ءَ لیبی تیئو ءَ پنچمی ملٹ اولی گول داتگ ءُ دومی گول لیبی راندل کولو ءَ ھپتاد ءُ نھمی ملٹ ءَ گول داتگ ءُ گوازی وتی ٹیم ءِ نام ءَ کتگ ءُ وت ءَ فائنل ءَ سر کتگ –

زانگ بہ بیت فرانس ءِ اے چارمی رند انت کہ ورلڈ کپ ءَ فائنل گوازی ءَ سربوگ ءَ سوبمند بوتگ چدو پیش نوزدہ سد ءُ نود ھشت ءُ دوھزار ھژدہ ءَ ورلڈ کپ ءِ کٹگ ءَ سوبمند بوتگ ءُ سال دوھزار شش ءَ تاں فائنل ءَ سر بوتگ –

سیمی فائنل ءَ بے سوب بوتگیں ٹیم کروشیا ءُ مراکش ءِ گوازی ھبدہ دسمبر ءَ کنگ بیت وھدیکہ فائنل گوازی گتر ءِ راجی روچ ھژدہ دسمبر ءَ لوسیل فٹبال پٹ ءَ کنگ بیت انت –