TBP Balochi

روکپتی بلوچستان ءِ تیابدپی شھر میناب ءَ ایرانی لشکر ءَ تیرگواری کنان ءَ یک تیل کشیں مردمے کُشتگ-

گیشیں ھالانی رد ءَ میناب ءِ زر ءَ ایرانی زر ءِ لشکر ءَ یک یکدارے ءِ سر ءَ تیرگواری، چریشی ءَ تیل کشے بیران بیتگ-

بیران بیتگیں مردم ءِ پجار صالح ملاھی ء اسحاق جھمنند کوھستک میناب ءِ نام ءَ زانگ بیتگ-

ھالانی تہ ءَ گوشگ بیتگ کہ صالح ءِ سر ءَ ھما وھد ءَ ایرانی لشکر ءَ تیرگواری کرتگ کہ آ وتی کاھک ءَ گوں روگ ءَ بیتگ کہ ناگتی ایرانی لشکر ءَ آئی ءِ سر ءَ تیرگواری بندات کتگ ءُ چریشی ءَ آ بیران بیتگ-

روکپتی بلوچستان ءُ رودراتکی بلوچستان ءِ سیمسر ءِ مردمانی گیشتریں باپار تیل اِنت چرے تیل ءِ باپار ءَ اود ءَ مردم وتی زند ءِ روچاں تیلانک دیگ ءَ اَنت ءُ ھمے میان ءَ بازیں مردمے تیرانی آماچ بیت اِنت ءُ وتی زند ءَ زبھر بنت-

اسرائیل ءِ چیریں ادارھانی سروک ءَ اے گپ شیواری ڈاھینتگ کہ ایران خلیجی ڈیھانی سر ءَ اُرش ءِ چن ءُ لانچ ءَ کنگ ءَ اِنت-

عرب نیوز ءِ رد ءَ روس چیریں ادارھا ں موساد ءِ سروک ڈیوڈ بارنیا ءَ آدینگ ءِ شپ ءَ گوشتگ کہ ایران روس ءَ نوکیں سلاھانی گیش کنگ ءِ چن ءُ لانچ ءَ کنگ ءَ اِنت-

موساد ءِ سروک ڈیوڈ بارنیا ءَ گوشتگ کہ ایرانی سرکار وتی جوھری سلاھاں چیرکائی گیش کنگ اِنت-

آئی ءَ گوشتگ کہ ما ایران ءِ دیم ءِ اے شوربندیانی ھلاپ ءَ بیھار دے آیاں چیرکائی کنگ ءَ اِنت اشانی توک ءَ روس ءَ چیرکائی نوکیں سلاہ دیگ، یورینیم ءِ گیش کنگ ءُ دمگ ءَ مسلمانیں ڈیھانی سر ءَ اُرشانی چن ءُ لانچانی ترند کنگ ھوار اَنت-

ڈیوڈ بارنیا ءَ ایرانی سرکار ءَ ڈھیٹ گوشتگ ایران ءک نیمگے وتی سپارتکاراں گپ ءُ رپ ءِ واستا ویانا دیم دیگ اِنت دومی نیمگ ءَ ایران ناشرکاراں دنیا ءَ دیم دیگ ءُ بے گناھیں مردماں کشگ اِنت-

زانگ بہ بیت سعودی عرب ءَ سال دوھزار ءُ نوزدہ ءَ روکپتی ڈیھاں تیل پجارینوکیں یک بنجلے ءِ سر ءَ اُرش ءِ بھتام ایران ءِ سر ءَ لڈ اتگ ات – اے اُرش ءَ ھما ڈرون کارمرد بیتگ اَنت مروچی روس یوکرین ءِ سر ءَ کارمرد اش کنگ اِنت-

یمن ءَ ایران ءِ پلامرزی ءَ ھستیں حوثی ملیشیا ءِ نیمگ ءَ گوستگیں سالاں سعودی عرب ءِ سر ءَ ڈرونز میزائلانی سر ءَ باز رند ءَ نشانگ کنگ بیتگ-

حوثیاں ھمے سال ءِ جنوری ءِ ماہ ءَ ابوظبی ءِ سر ءَ ھم ڈرون اُرش کرتگ ات-

دومی نیمگ ءَ امریکہ ءَ تھران ءُ ماسکو ءِ میان ءَ جھلانکین دفاعی شریداری ءِ سر ءَ بژنی درشان کتگ – ایران ءَ اے گپ من اتگ کہ آئی ءَ روس ءَ ڈرون داتگ بلے اے ڈرون یوکرین ءِ سر ءَ اُرش ءَ پیسر دیگ بیتگ اَنت-

ھمے درگت ءَ برطانیہ ءِ دفتر ھارجہ ءَ گوشتگ کہ روس ءُ را ایرانی ڈروناں یوکرین ءِ شھرانی سر ءَ نشانگ کنگ ءَ مزنیں کرد پیلو کتگ –

دومی نیمگ ءَ ایران ءِ وزارت ھارجہ ءَ گوشتگ کہ آ روس ءِ گون ءَ سیادی دارگ ءَ کجام ھم مردم ءَ اجازت نہ گپت اِنت-

ایران ءِ وزارت ھارجہ ءِ جارکش ناصر کنانی ءَ گوشتگ ایران ءُ روس ءِ میان ءَ دفاعی ءَ ھوار جتا جتائیں پھناتاں ھمسنتی ءِ کمک دیم ءَ روگ ءَ اَنت بلے کجام سیمی ڈیھ ءِ ھلاپ نہ اَنت-

بلوچستان ءِ دمگ کیچ ءَ گاڑی ءِ چپ بوگ ءَ ٹیچر زالبولے بیران، دو کس زدگ بیتگ اَنت-

گوستگیں شپ ءَ پسنی ءَ دیم پہ تربت ءَ ایوکیں گاڑی چپ بیتگ، چریشی ءِ سبب ءَ گاڑی ءَ زالبول ھما دمان ءَ بیران ءُ دگہ دو کس زدگ بیتگ اَنت-

بیران بیتگیں زالبول یک وانگجاھے ءِ ٹیچر اِنت ءُ اشی ءِ ھواری ءَ دگہ دو کس زدگ بیتگ اَنت، بیران بیتگیں زالبول کلاتک سورگ بازار ءِ نندوک گوشگ بوگ ءَ اِنت-

انتزامیہ ءِ رد ءَ وئیل گاڑی ءِ ٹائر ءِ ترکگ ءِ سبب ءَ پیش اتکگ کہ اود ءَ ڈرائیور ءِ دست ءَ گاڑی لگوشتگ ءُ گاڑی کپتگ-

بلوچستان ءَ دگ ءِ وئیل ھمک روچی کارے جوڑ بیتگ کپ چریشی ءَ بازیں کچے ءَ مردم بیران ءُ زدگ بوگ ءَ اَنت-

بلوچستان ءَ دگ ءِ وئیلانی گیشتریں سبب دگانی سر ءَ ھاسیں انتزامیہ ءِ نہ بوگ ءُ دگانی پروشت ءُ پروش ءِ سبب گوشگ بوگ ءَ اَنت-

گوادر ءِ زھرشانی

ٹی بی پی شونگال

گوستگیں دو ماھاں چہ گوادر ءِ ھندی دریاورد گوادر پورٹ ءِ دیم ء زھرشانی نندانک ءَ نشتگ اَنت ءُ آیانی لوٹ چہ زِر ءَ ٹرالنگ ءِ ھلاسی اِنت پرچہ کہ یَکپارگی ئیں ٹرالنگ ءِ سوب ءَ زِر ءِ تہ ءَ ماھیگانی زَنک ءُ بر ءِ جاھاں ڈلینگ ءَ گوں ماھیگانی زریات ھلاس کنگ بیگ ءَ اَنت، چریشی ءِ سوب ءَ ھندی دریاورد نگن ءِ چُنڈے ءَ پہ چمدار بیگ ءَ اَنت ءُ ٹرالنگ ءَ گوں آیانی روزیگ ءِ کوش برجاہ اِنت۔

گوستگیں سال ءَ نومبر – دسمبر ماھانی نیام ءَ گوادر ءَ ھزارانی کچ ھندی دریاورداں داں یک ماھے ءَ نندانک داتگ اَت ءُ سرجمیں بلوچستان ءَ ٹرالنگ ءِ بگیریءَ مزنیں کچے ءَ زھرشانی بندات بیتگ اِت اَنت، کہ اِشی ءِ سروکی ءَ جماعت اسلامی بلوچستان ءِ سیکریٹری جنرل مولانا ھدایت الرحمن ءُ حسین واڈیلہ حق دو بلوچستان ءِ پلیٹ فارم ءَ چہ کنگ ءَ اَنت۔

لس مھلوک ءِ تاکت ءِ زور ءَ سر وزیر بلوچستان ءَ نندانک ءَ نشتگیں مھلوکاں گوں ترانکاری کُتگ ءُ ٹرالنگ مافیا ءِ بگیر ءَ گام زیرگ ءِ ءُ بلوچستان اسمبلی ءَ ٹرالنگ ءِ ھلاپ ءَ قانود ٹھینگ ءِ جار جتگ اَت، کہ چریشی ءَ پر گوادر ءِ تیاب دپی ھنداں ٹرالنگ کمتر بیتگ اَت بلے بلوچستان ءَ ٹرالنگ مافیا ھمینکس زوراک اِنت کہ سروزیر بلوچستان ءِ باوری ءَ پد ھم ٹرالنگ برجاہ اِنت۔ لھتے ماھانی کمی ءَ پد نی پد ءَ ٹرالنگ مافیا بامردی ءَ گوں روچ ء رھمانی درستانی دیم ءَ گوادر ءِ زر ءِ ھدانی تہ ءَ ٹرالنگ کنگ ءَ اَنت بلے بلوچستان ءِ سرکار ءُ فشریز ءِ کارگَل ٹرالنگ ءِ دارگ ءَ بے سوب اَنت۔

ماھیگیر رھشون خداداد واجو ءِ گُشگ اِنت کہ آیانی ٹرالنگ مافیا ءِ بگیر ءَ جھد بازیں دھکاں چہ برجاہ “اِنت، بلے ٹرالنگ مافیا ءِ مزنیں کساس ءَ بندش جتگیں داماں گوں ماھیگانی شکار ءِ سوب ءَ ماھیگ چہ زِر ءَ ھلاس بیگ ءَ اَنت۔ بلوچستان ءَ سرکاری کنوکیں تاکت ءُ اپوزیشن ءَ نشتگیں گل ماھیگیرانی اگبالانی ھاتر ءَ توار چِست کن اَنت بلے گامگیج زیرگ ءَ گندگ نہ بنت۔

گوادر ءِ ماھیگیرانی جیڑہ مرچیگیں نہ اِنت بلکیں دھکاں چہ ھندی ماھیگیر اے جنجالانی دیمپانی کنگ ءَ اَنت، گوادر ءِ دِکو ءِ اڈ بیگ ءَ گوں آیانی جیڑھانی گیشی اَتکگ۔ گوادر ءِ ماھیگیرانی جیڑہ اگاں گیش ءُ گیوار کنگ مہ بنت اِنت گُڑا آ زھرشانی ءِ ترند تریں راھانی گچین ءَ کن اَنت کہ آ انیگیں رَبُود ءِ جیڑھانی تہ ءَ گیشی کار اِیت ءُ لس مردم آجوئی ءِ لیکہ ءِ نیمگ ءَ گیشتر مَیل دار اَنت۔

امریکہ زمستانیں موسم ءَ ترندیں توپاناں وتی لپیٹ ءَ زرتگ چریشی ءَ پد کساس پانزدہ لک امریکی شھر بجلی ءَ چہ زبھر بیتگ اَنت-

فرانسیسی ھال سرکنوکیں ادارہ اے ایف پی ءِ رد ءَ اے توپان ءِ سبب ءَ کرسمس ءَ لھتے روچ پیش ڈیھ ءِ مزن مزنیں دگ بند اَنت ءُ ھزارانی بالیگ دارگ بیتگ اَنت-

اے وھد ءَ ناگیگیں موسماں ڈیھ ءِ زرباری دمگاں ھوار ھوار ڈیھ ءِ بازیں جاھاں ترندین برپگواری ءُ ترند ءُ سارتیں گواتانی موج اِنت –

مولم شناس ءِ رد ءَ کساس بیست ءُ چار کروڑ ءِ ھپتاد درسد آبادی ءِ مھلوک ءَ مولمانی دیمپانی اِنت ءُ ھمے سبب ءَ سارتیں گوات ءُ گرم ءِ نشان نہ بوگ ءِ برابری اِنت-

ٹریکر پاور آوٹیچ یو ایس ءِ رد ءَ ترندین سارتی ءِ سبب ءَ کساس پانزدہ لک مردم بجلہ ءَ چہ زبھر اَنت ءُ اشانی توک ءَ گیش امریکہ ءِ زربار ءُ رودراتکی دمگ اسرمند اَنت-

اے ایف پی ءِ رد ءَ گوریچان ءُ زرباری ڈکوٹا، اوکلاھاما، آئیووا ءُ دگہ جاھاں ٹرانسپورٹیشنانی سپر کنگ ءِ راہ باز ناگیگ اَنت ءُ برپگواری ءَ دگانی بندی ءُ مھلوک لوگانی توک ءَ نندگ ءِ کڈن کنگ بیتگ اَنت-

پشمبے ءِ روچ ءَ اوکلاھاما ءَ ٹریفک ءِ سبب ءَ کساس دو مردم بیران بیتگ اَنت ءُ ھمے وڑ کینٹکی ءِ گورنر اینڈ بیشیری ءَ وتی ریاست ءَ سَے مردمانج مرگ ءِ ھال راست کتگ-

نیوریارک ءِ گورنر کیتھی ھوچل ءَ یک پریسے ءَ تران کنان ءَ گوشتگ کہ ڈیھ ءَ اے وھد ءَ مزنیں توپانانی دیمپانی اِنت دگانی سر ءَ برپ پتار اَنت ءُ چریشی ءَ گاڑی شت بیت کنگ ءَ نہ اَنت-

اسکول ءِ یک ٹیچر ءُ کمکارے ءَ اے ایف پی ءَ گوں گوشتگ ایل پاسو، ٹیکساس ءُ جاڑیگیں مساپر تاپگ ءِ واستا گرجا لوگ، اسکول ءُ سول سینٹر ءَ مچ بیتگ اَنت-

بلوچستان ءِ کیچ دمگ ءَ ناشناسیں سلاہ بندیں مردماں پاکستانی لشکریانی کاروان ءِ سرءَ اُرش کُتگ۔

لشکریانی سرءَ کیچ ءِ ھند گوکدان ءَ اُرش کنگ بیتگ، ھندی اھوالانی ردءَ اُرش ءِ وھدءَ ھند تیرگواری ءُ بمب تراکانی تواراں چہ لرزگ ءَ بیتگ۔

اھوالانی رد ءَ اُرش ءِ تہءَ لشکریاں تاوانانی دیمپانی کنگ کپتگ البت واکدارانی لیکہ اے درگت ءَ داں انگت دیما نہ یتکگ۔

زانگ بہ بیت کہ ھمے ھندانی تہءَ لشکریانی سرءَ مدامی اُرش بنت اِت کہ اِشانی زمہ واریاں آجوئی لوٹوکیں گل زیر اَنت البت مروچی بیتگیں اُرش یِ زمہ واری داں انگت ھچ گل ءَ نہ زُرتگ۔

ھستیں لھتیں وھداں چہ ھمے ھند ءُ دمگانی تہءَ لشکریانی سرءَ بیوکیں اُرشانی تہءَ گیشی گندگ ءَ اَتکگ کہ اِشانی تہءَ لشکری کارندھانی مُرتگ اَنت ءُ ٹپی بیتگ اَنت البت پاکستانی پوج ءِ لیکہ رسانکدر ءِ دیما نئیتکگ۔

ھمے ماہ ءَ گوادر ءَ سلاہ بندیں مردماں پاکستانی لشکر نشانگ کُتگ اَت ءُ سئے کارندہ کُشتگ اِت اَنت ءُ سلاہ ءُ دگہ آسراتی گوں وت بُرتگ اِت اَنت ءُ ھمے اُرش ءِ تامر ھم بلوچستان بلوچستان لبریشن فرنٹ ءَ رسانکدر ءَ شنگ کُتگ اَت البت سرکار ءِ نیمگ ءَ اے درگت ءَ ھچ بنشون دیما نئیتکگ۔

سربوتگیں ھالانی رِد ءَ گوستگیں روچ ءَ بیست ءُ دو دسمبر ءَ ناشناسیں مردماں بلوچستان ءِ دمگ آواران ءَ پاکستانی پوج ءِ کارمند تراکناکیں شوروانی نشانگ کُتگ –

اھوالکار ءِ رِد پوجی کارمند آواران ءِ دمگ مالار کرکے ڈل ءَ نشانگ کنگ بوتگ انت کہ پاکستانی پوج ءَ جانی تاوان ءِ دیمپانی کنگ کپتگ –

دومی نیمگ ءَ تمپ ءَ دمگ ملانٹ ءَ ناشناسیں مردماں وارد کمپنی ءِ موبائیل ٹاور مانداشتگ –

موبائیل ٹاور ماندارگ ءُ پوج ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ بیست ءُ دو دسمبر ءَ پنچ شمبے ءِ روچ ءِ ادار سَے پنجاہ ءَ آواران ءَ پاکستانی پوج مئے سرمچارانی چیر کتگیں تراکناکیں شورانی زد ءَ اتکگ انت چریشی ءَ یک پوجی کارمندے مُرتگ ءُ یک ءِ زدگ بوتگ –

آئی ءَ دیمتر ءَ گوشتگ کہ مئے سرمچاراں آواران ءِ دمگ مالار کرکے ڈل ءَ دژمن پوج ءِ پیکٹ سیکورٹی ءِ ھاتر ءَ جوڈ کنگ بوتگیں سنگر ءِ تہ ءَ تراکناکیں شورو کل کتگ – ھنچوش کہ پیکٹ دیوکیں سَے پوجی کارمندانی تہ دو پوجی سنگر ءِ تہ ءَ پُترتگ انت گڈا تراکناکیں شورو ترک اِتگ انت چریشی ءَ یک کارمند ءِ مرتگ ءُ یکے زدگ بوتگ –

جارکش میجر گوھرام ءَ وتی دگہ درشان ءِ تہ ءَ گوشتگ کہ بیست دسمبر ءَ مئے سرمچاراں تمپ ءِ دمگ ملانٹ ءَ برجاھیں وارد ٹاور مانداشتگ – زورگیریں اِستان بازیں دمگاں موبائیل ٹاور مک کنگ ءَ انت تانکہ وتی پوجی کاروانانی پھازگ ءَ کرت بہ کنت –

جارکش ءَ گوشتگ کہ پاکستانی پوج ءُ زورگیریں استان ءِ لٹ ءُ پلی شوربندیانی سر ءَ اُرش برجاہ مان انت –

میان استمانی لبزانتانی گلگدارانی تاک “نیادانک” ماں بلوچی ءِ تہ ءَ زوت چہ ساچ در لبزانکی گل مکران ءِ نیمگ ءَ چاپ ءُ شنگ کنگ بیت –

ساچ در لبزانکی گل مکران ءَ نیمگ ءَ گوشگ بوتگ کہ نیادانک پہ بلوچی لبزانک وانوکیں دوستاں نوکیں ٹیکی یے – میان استمانی لبزانتانی ھواریں گُلگدار گوں بلوچی رجانکاں تاکبند “نْیادانک” ءِ نامءَ چہ عباس حسن ءِ شونکاری ءَ ھمے زیتّاں ساچ در لبزانکی گَل مکران ءِ نیمگءَ چاپ ءُ شنگ کنگ بیت۔

دیمتر ءَ گوشگ بوتگ کہ نْیادانک یک گُلگداری تاکے کہ ایشی ءِ تہ ءَ میان استمانی لبزانتاں ھوار بلوچ لبزانتانی تاک ھم دیم ءَ کاینت، نْیادانک تھنا گُلگداری تاکے کہ تاکبند گوناپ ءِ کتابی دْرچے۔ نْیادانک گوں نامداریں لبزانتانی گلگداراں چو اے دگہ تاکبنداں دیمءَ روان کنت-

ساچ در شنگ کار ءِ نیمگ ءَ گوشگ بوتگ کہ اے نْیادانک ءِ اولی تاک اِنت کہ ایشی ءِ تھا دوازدہ نامداریں لبزانتانی گُلگدار گوں بلوچی رجانکاں ھوار اَنت-

بلوچستان ءِ بازیں دمگاں موسم وش بوتگ، زیارت ءُ شال ءَ سارتی گیش بوتگ ءُ گرم چُٹ اتگ ءُ مائنس ءَ سر بیتگ –

موسم زانتانی رِد ءَ شال ءَ بیست ءُ چار ادارانی میان ءَ گرم ءِ زور کم چہ کم سَے ڈگری سنٹی گریڈ بوتگ وھدیکہ زیارت ءَ گیشتر سارتی بوتگ کہ اود ءَ گرم ھپت ڈگری ءَ سر بوتگ –

ھمے وڑ کلات ءَ سارتی گرم پنچ ءُ گوادر ءُ جیونی ءَ یانزدہ، پسنی ءَ سیزدہ، دالبندین ءَ یک، نوکنڈی ءَ پنچ، ھُزدار ءُ لسبیلہ ءَ ھپت دہ سنٹی گریڈ ءَ سربوتگ –

موسم زانتانی رِد ءَ بلوچستان ءِ گوریچی دمگاں لھتے روچاں سھب ءُ بیگاہ سارتی ءِ زور کمتر بوت کنت وھدیکہ گیشتریں دمگاں موسم سارت ءُ ھشک بیت –

دومی نیمگ ءَ شال ءِ مردم سارتی ءَ بچگ ءِ ھاتر ءَ تیاری کنگ ءَ انت دومی نیمگ ءَ گیس ءِ لوڈ ءُ شیڈنگ ءُ کمی ءِ سوب ءَ مردمانی جیڑہ ءُ دلسیاھی گیش بوتگ انت –

شال ءَ درھینوکیں سارتی ءِ آھگ ءَ پیسر مھلوک ءَ سوئی گیس کمی ءِ سوب ءَ توار چست کتگ – دومی نیمگ ءَ سوئی گیس ءِ واکدارانی گوشگ انت کہ ملک ءِ تہ ءَ سوئی گیس کمی ءِ سوب ءَ اے زمستان ءَ سوئی گیس ءِ سرجمی ءَ اتک نہ کنت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھشت سد ءُ نود ءُ نُھ روچ سرجم بوتگ انت –

مروچی این ڈی پی ءِ کنوینئر شاہ زیب بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ ھر روچ بلوچستان ءِ جاور نگیگ تر بوان، ریاست چہ وتی تاکت ءِ زور ءَ ترس ءِ برجاہ دارگ ءَ ورنایاں آوار جنگ ءُ بیگواہ کنگ ءَ انت –

آئی ءَ گوشتگ کہ اے زھرشانی بنجل گوستانکی راجکاری زھرشانی یے ءُ اے پُرایمنیں راجکاری زھرشانی ءَ بلوچ راجی انکلاب رژناہ کتگ ءُ لٹ ءُ پل کنوکیں تاکت ءُ ریاست مان اڈینتگ، اے بیمناکیں جاوراں کہ ھر نیمگ ءَ ترس ءِ ودینتگ کہ بلوچ ءِ جان ءُ مال، آبرو پھریز نہ انت، چیریں ادرھانی گنڈہ گردی انت، ریاستی کشندہ ٹولی گردگ انت ھروڈیں بیھار ءُ زوراکی ، بلوچ ورنایانی ژانگولیں جونانی دست کپگ زورانسری آوار جنی ءَ ابید وتی زند پہ ھمیشی وقف کتگ –

ھمے وھد ءَ آئی ءَ گوشتگ کہ بلوچ ایکٹوسٹ راشد حسین بلوچ ءِ ماں متحدہ عرب امارات ءَ زورانسری آوار جنی ءَ چار سال سرجم بوگی انت، آ درکانودی پاکستان ءِ دست ءَ دیگ بوتگ بلے تنی وھدی آ زاھر کنگ نہ بوتگ –

آئی ءَ گوشتگ کہ بیست ءُ شش دسمبر ءَ دو شمبے ءِ روچ ءِ ادار دو بج ءَ ھب چوکی ءِ پریس کلب ءِ دیم ءَ زھرشانی ءِ کنگ بوگ ءَ انت –

ماما قدیر بلوچ ءَ گوشتگ کہ بلوچ راج زورانسری آوار جنگ بوتگیں مردمانی کھولانی ھمراہ داری ءَ بہ کن انت –