TBP Balochi

ھندوستان ءِ شھر ھیدر آباد ءَ یک نوکیں دروشمیں اے ٹی ایمے ءِ بنھشت ایر کنگ بیتگ گندگ ءَ زر دیوکین یک لس اے ٹی ایمے ءِ وڑ ءَ اِنت بلے آئی ءِ سر ءَ نبشتگ اِنت کہ ائی ءِ بٹنانی جنگ ءَ آئی ءُ زَر ءِ جاہ ءُ سُھر ءِ سکہ در کیت اِنت-

ھندوستان ءِ چاگرد ءَ سُھر ءِ نھاد مزنیں گچینی ءِ دار ایت گیشتر آروسی دیواناں ابید سُھر ءَ ھمے سرپد کہ آروس نیست اِنت-

ھندوستان ءِ کش ءُ گوری جاھاں سُھر یک مزنیں ءُ گچینی نھادے دار ایت اود ءَ مردم زر ءَ بینکانی ایر کنگ ءَ ابید آ سھر زیر اَنت ءُ ایر کن اَنت-

ھندوستان دنیا ءِ توک ءَ ھما ڈیھاں ھوار اِنت کہ اود ءَ مردمانی گور ءَ مالی مڈی گیشتت سُھر اَنت آیانی کساس 136 ٹن جنگ بیت اِنت بلے سھر دیوکیں اے ٹی ایم ءَ مردمانء دلگوش ترینتگ ءُ سھرانی نیمگ ءَ کرتگ-

ھندوستان ءِ شھر ھیدر آباد ءَ جنگ بیتگیں اے اے ٹی ایک نصف گرام ءَ داں سد گرام وزن ءِ سُھر دنت اے مشین کار ءُ بار ءِ بارو ءَ گولڈ سکہ ءَ جتگ-

اگاں مشین ءَ تو کجام کساس سھر کشگ لوٹ ئے گڑا ترا یک برے مشین ءَ زر دیگی اِنت – چُشکہ سد گرام سھر ءِ نھاد ھپت ھزار ڈالر ءِ نزیک ءَ اِنت اگاں ترا سد گرام سھر زورگی اِنت گڑا ترا یک برے مشین ءَ را زر دیگی اِنت –

گولڈ اے ٹی ایم ءَ سھر ءِ سکہ ءِ درکنگ ءِ واستا ھما رنگ ءَ ترا پِن کوڈ ءِ زلورت بیت اِنت ھنچش لس مشیناں درکار بیت اِنت ھمے واستا سھر ءِ باز گچینی چیزے ھمے واستا پن کوڈ ءِ دلگوش گیش کنگ کپ ایت-

گولڈ سکہ کمپنی ءِ کسان کمک سرکماش پرتاپ ءَ کہ وتی اولہ نام گشتگ سھر ءِ سکھانی واستا سھر ءِ دکان یا شوروم ءَ روگ ءِ اژدری نہ اِنت سھر زیروکیں مردم اد ءَ اتکگ کن اَنت ءُ سھر زرت کن اَنت-

بلے اے گپ یک نوکیں چیزے نہ اِنت پرچاکہ ابوظھبی ءَ یک لگژری ھوٹل “امارات پیلس ” ءَ چاکلیٹ، کولڈ ڈرنکس، کافی ءُ سینڈوچونانی رنگ ءَ وینڈنگ مشیناں سھر ءِ بھا کنگ سال دوھزار ءُ دَہ ءَ بندات بیتگ –

سھر ءِ وینڈنگ مشینے یکے جرمن ءِ شھر ءَ ھست کہ اود ءَ اے مشین ھر دَہ سیکنڈ ءَ پد نھادی ءَ برز ءُ جھلی ءَ سھر ءِ نھاد ءَ برز ءُ جھل کنت چریشی ءَ بھا زیروکاں راستیں نھاد ءِ سرپدی بیت اِنت-

آئی ءِ گوشگ ات کہ آئی ءَ اے نوکیں ھمسنتی مشین امارات ءَ ھمے واستا جتگ کہ اد ءِ مردم زرکاری ءِ مزنیں نھاد دات کن اَنت –

امریکہ زمستانی مولم ءَ توپانی دیمپان اِنت داں انگت ءَ کم چہ کم سِی ءُ یک مردم مرتگ اَنت-

فرانسیسی ھال سرکنوکیں ادارہ اے ایف پی ءِ رد ءَ ترندیں برپگواری ءُ ترندیں ٹھنٹ ءِ سبب ءَ کرسمس ءِ روچ ءَ لکانی ھساب ءَ امریکی پریشان اَنت-

نیویارک ءَ چہ مستریں دومی مزنیں شھر بفیلو اے وھد ءَ ناگیگیانی دیمپان اِنت کہ اود ءَ برپانی توپان ےَ شھر وتی اندر ءَ مانپوش اتگ –

بفیلو ءَ ھشت فٹ دو میٹر چار پوائنٹ برپ مُچ اَنت ءُ بجلی ءِ بندش اے جاوراں ریسکیو ءِ کارمند گیش اسرمندیں جاھاں روگ ءَ لرزگ ءَ اَنت-

بفیلو ءِ جھمنند نیویارک ءِ گورنر کیتھی ھوچول ءِ گوشگ اِنت اے ھنچش اِنت کہ کجا یک جنگجاھیں ھلکے ءَ روگ کپ ایت-

آئی ءَ یکشمبے ءِ بیگاہ ءَ اھوالکاراں گوں تران کنان ءَ گوشتگ کہ اود ءِ جھمنند داں انگت ءَ جان کُشیں جاورانی دیمپان اَنت ءُ آئی ءَ مھلوک ءَ کڈن کتگ کہ لوگانی توک ءَ بہ نند اَنت-

بازیں رودراتکی ریاستاں دو لَک ءَ گیش مردماں کرسمس ابید بجلی ءَ داشتگ ءُ بازیں مردماں موکلانی روچاں سپر کنگ ءِ ارادو رد کتگ اَنت- اے توپان ءِ سبب ءَ کرسمس ءَ لھتے روچ پیش ڈیھ ءِ مزنیں دگ بند اَنت ءُ بالیگ ھم بند کنگ بیتگ اَنت-

سارتی ءِ سبب ءَ نُھ ریاستاں سی ءُ یک مردمانی مرگ ءِ ھال راست کنگ بیتگ اَنت اشانی توک ءَ چار کولوراڈو ءُ دوازدہ نویارک ءَ بیتگ اَنت- واکدارانی رد ءَ بفیلو ءَ کمکی باسکاں گاڑی ءُ برپانی چانگالانی چیر ءَ لاش دزکپتگ اَنت-

شھر ءَ میان اُستمانی بالیگانی بال بند ءُ شھر ءَ ڈرائیونگ کنگ ءِ سر ءَ ھم بندش جنگ بیتگ-

نیویارک ءِ گورنر کیتھی ھوچول ءِ گوشگ اِنت سال دوھزار ءُ بیست ءُ دو ءِ توپان ءِ بارو ءَ نا ایوک ءَ مروچی ءِ نسلانی گپ کنگ بیت اِنت بلکیں اے توپان ءِ زور نوزدہ سد ءُ ھپتاد ءُ ھپت ءِ راجدپتری توپان ءَ گیش اِنت-

بالیگانی چاروکیں ویب سائٹ فلائیٹ اویئر ڈاٹ کام ءِ رد ءَ توپان ءِ سبب ءَ یکشمبے ءِ روچ ءَ دوھزار ءُ چار سد ءَ گیش امریکہ ءِ بالیگ دارگ بیتگ اَنت اشی ءَ ابید شمبے ءِ روچ ءَ سَے ھزار ءُ چار ءُ آدینگ ءِ روچ ءَ شش ھزار دارگ بیتگ اَنت-

اٹلانٹا، شکاگو، ڈینور، ڈیٹرائٹ ءُ نیویارک ءَ ھوار کرسمس ءِ روچاں بالی پٹاں مساپر مھتل اَنت- امریکہ ءِ بجلی ءِ جاورھالانی بارو ءَ سرپدی دیوکیں پراجیکٹ پاور آؤٹیج ڈاٹ یو ایس ءِ رد ءَ شمبے ءِ روچ ءَ کساس ھبدہ لک مردم بجلی ءَ چہ زبھر اَنت-

دژمن ءِ گوما بیتگیں دو جتائیں بیڑاں گل ءِ یانزدہ سنگت نمیران بوتگ اَنت- جیئند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہءَ بلوچستان ءِ جتا جتائیں ھند ءُ دمگ تربت، کاھان، گوادر، ھب، ھزدار، کلات ءُ شال ءِ اُرشانی زمّہ واری منّ اِتگ ءُ گوشتگ کہ اے اُرشاں دژمن پوج ءِ بیست ءُ ھشت پوجی کارمند کُشتگ اَنت-

رسانکدراں شنگ کرتگیں درشان ءِ تہءَ بی ایل اے ءِ جارکش جیئند بلوچ ءَ سرجمیں ھال داتگ ءُ گوشتگ کہ مروچی بزاں بیست ءُ پنچ دسمبر ءِ ادار یک ءَ کوھلو ءِ دمگ کاھان ءِ ھند چپی کچ ءَ بلوچ لبریشن آرمی ءِ اسپیشل ٹیکٹیکل آپریشنز اسکواڈ ءَ زورگیریں پاکستانی پوج ءِ کاروان ءَ ھواریں گاڑی تراک ناکیں شورانی نشانگ جوڑ کتگ- تراک ءِ آسرءَ دژمنیں پوج ءِ کیپٹن ئے ءَ ھوار ھشت پوجی کارمند مُرتگ اَنت ءُ سَے زدگ بوتگ اَنت –

جارکش ءِ رِد ءَ سرمچاراں دژمنیں پوج ءِ کاروان ھما وھد ءَ نشانگ کتگ کہ آ چپی کچ ءَ گوزگ ءَ بوتگ اَنت، تراک ءِ آسر ءَ دژمن پوج ءِ کپٹن فہد ءَ ھوار سپاھی اصغر، سپاھی شمعون، سپاھی مھران، لانس نائک امتیاز ءُ دگہ مرتگ انت وھدیکہ نائیک امین اللہ، شعیب ءُ شھباز زدگ بوتگ انت –

جیئند بلوچ ءَ گوشتگ کہ اسپیشل ٹیکٹیکل آپریشنز اسکواڈ ءِ سرمچاراں یک دگہ اُرش ءِ بیست ءُ چار دسمبر دوھزار بیست ءُ دو ءِ شپ ءَ تربت ءِ دمگ گوکدان ءَ کُتگ کہ سرمچاراں گوکدان ءَ پیسر ءَ زورگیریں پاکستانی پوج ءِ راہ بستگ ءُ کاروان ءِ سر ءَ اُرش کُتگ، اُرش ءِ آسر ءَ یک جونئیر کمیشنڈ اپسرے ءَ ھوار کم چہ کم ھپت کارمند مُرتگ انت وھدیکہ اُرش ءِ آسر ءَ دژمن پوج ءِ چار کارمند زدگ بوتگ اَنت-

آئی ءَ گوشتگ کہ سرمچاراں دژمن ءِ سر ءَ ھما وھد ءَ اُرش کُتگ کہ زورگیریں پوج ءِ نُھ گاڑیانی کاروان چہ گوکدان ءَ گوزگ ءَ بوتگ اَنت، دشمن پوج ءِ کم چہ کم سَے گاڑیانی سرا راکٹ گولہ ءُ مزنیں سلاھاں گوں اُرش کنگ بوتگ –

آئی ءَ گوشتگ کہ سرمچاراں اے ٹوھیں اُرش ءَ دژمن پوج ءِ جونئیر کمیشنڈ اپسر صوبیدار اظہر ءَ ھوار ھپت کارمند مُرتگ انت ءُ دگہ چار زدگ بوتگ انت وھدیکہ دژمن ءِ دو گاڑی تباہ بوتگ انت –

بلوچ لبریشن آرمی جارکش ءِ رِد ءَ گوستگیں شپ ءَ یک دگہ اُرشے ءَ بی ایل اے ءِ سرمچاراں کیچ ءِ دمگ ھوشاپ دمب ءَ پاکستانی پوج بنجلے ءِ سر ءَ راکٹاں گوں اُرش کتگ – اُرش ءِ میان ءَ سرمچاراں بازیں راکٹ گولہ ءِ آس داتگ کہ وتی جاہ ءَ شُتگ ءُ کپتگ انت کہ چریشی ءَ دژمن ءَ جانی ءُ مالی تاوان بوتگ –

جارکش ءِ رِد ءَ گوستگیں شپ ءَ بی ایل اے ءِ سرمچاراں دشت ساجی ءِ ھند دورو کنڈگ ءَ برجاھیں پوجی پانگسے ءِ سر ءَ گرنیڈ لانچر ءُ وتکاریں سلاھاں گوں یک دگہ اُرش ءِ کتگ چریشی ءَ دژمن پوج ءَ جانی ءُ مالی تاوان ءِ دیمپانی کنگ کپتگ –

آئی ءَ گوشتگ بلیدہ ءِ دمگ گلی ءَ دشمن ءِ یک دگہ پانگسے ءِ سرا ھم سرمچاراں گرنیڈ لانچر ءُ دگہ سلاھاں گوں اُرش کتگ، اُرش ءِ آسر ءَ کم چہ کم سَے کارمند زدگ بوتگ انت –

جیئند بلوچ ءِ رد ءَ سرمچاراں تربت ءِ دمگ جوسک ءَ دژمن کارمندانی پانگسے ءِ سر ءَ دزبمب اُرش ءِ کُتگ – وھدیکہ تربت ءِ دمگ کہکن ءَ ھم بی ایل اے ءِ سرمچاراں زورگیریں پوج ءِ بنجاھی بنجل ءِ سر ءَ بی ایم 12 گولہ آس داتگ کہ بنجل ءِ تہ ءَ شتگ ءُ کپتگ انت –

جارکش ءِ رِد ءَ مروچی روچ ءَ بزاں بیست ءُ پنچ دسمبر ءَ مئے سرمچاراں شال سبزل دگ ءَپولیس تانہ ءَ ڈن اُشتاتگیں کارمند دزبمب ءِ اُرش ءب نشانگ کتگ انت دزبمب اُرش ءَ دو کارمند زدگ بوتگ انت –

ھمے وڈ شال ءِ دمگ سیٹلائٹ ٹاؤن ءَ چالو بوڑی ءِ ھند ءَ دگ ءِ سر ءَ اوشتاتگیں دژمن کارمندانی سر ءَ دزبمب اُرش ءِ کُتگ چریشی ءَ سَے کارمند زدگ بوتگ انت –

جیئند بلوچ ءَ گوشتگ کہ شال ءِ دمگ سریاب دگ ءِ سر برجاھیں دژمن پوج ءِ پانگسے ءِ سر ءَ ھم سرمچاراں دزمب اُرش ءِ کتگ کہ دزمب پانگس ءِ تہ ءَ کپتگ ءُ چریشی ءَ سَے کارمند زدگ بوتگ انت –

جارکش ءَ وتی درشان ءِ تہ ءَ گوشتگ کہ ھب ءَ مئے سرمچاراں سی آئی اے پولیس اسٹیشن ءِ بنجاھی دروازگ ءِ دپ ءَ دزبمب اُرش ءِ کُتگ وھدیکہ ھب ءَ آر سی ڈی شھدگ ءَ گیٹرون ھند ءَ برجاھیں دشمن پوج ءِ پانگسے ءِ سر ءَ ھم گرنیڈ لانچر آس داتگ چریشی ءَ دژمن پوج ءَ جانی تاوان ءِ دیمپانی کنگ کپتگ –

جارکش ءَ گوشتگ کہ سرمچاراں ھزدار جیلانی چار راہ ءَ گاڑی ءَ سواریں پولیس کارمندانی سر ءَ دزبمب اُرش ءِ کُتگ – دزبمب اُرش ءَ بازیں پولیس کارمندے زدگ بوتگ انت وھدیکہ آھانی گاڑی ءَ سک باز تاوان رستگ – آئی ءَ گوشتگ کہ اے کارمنداں مروچی بزاں بیست ءُ پنچ دسمبر ءَ پٹ پول ءِ نام ءَ بلوچ راج دلسیاہ کتگ بوتگ بازیں مردمے لٹ شاپ کتگ انت – وھدیکہ ھزدار پولیس ءِ بازیں کارمندے تچکی ءَ زورگیریں پوج ءِ ھمراہ دار انت ءُ بلوچ راجی زرمبشت ءِ بگیری ءَ کار کنگ انت ما آھاں مکن کنیں کہ وتی اے کار ءَ یل بدئینت –

جارکش جیئند بلوچ ءَ گوشتگ کہ بی ایل اے ءِ سرمچاراں کلات آر سی ڈی شھدگ ءِ سر ءَ بلوچ راجی مڈیاں بروکیں ٹرک ءِ ھم تراکناکیں شوروانی نشانگ کتگ ءُ تباہ کتگ – ٹرک ءِ ڈرائیور مکن کنگ ءَ پدیل داتگ انت –

بلوچ لبریشن آرمی ءِ جارکش جیئند بلوچ ءَ وتی درشان ءِ تہ ءَ دیمتر ءَ گوشتگ کہ ھبدہ نومبر سال دوھزار بیست ءُ دو ءُ بیست ءُ نُھ نومبر سال دوھزار بیست ءُ دو ءَ کیچ ءِ دمگ کولواہ ءَ دژمن پوج ءِ دو جتائیں میڑاں بلوچ سرمچاراں تمردی ءُ دلیری ءَ گوں جنگ دیان ءَ دژمن پوج پدکنزگ ءَ لاچار کُتگ – اے ھونیگیں دیم پہ دیمی میڑاں بلوچ سرمچاراں کم چہ کم دژمن پوج ءِ سینزدہ کارمند کُشتگ انت ءُ بازینے زدگ کتگ انت – وھدیکہ دژمن ءِ گوم ءَ تمردی ءَ جنگ دیان ءَ یانزدہ بلوچ سرمچار نمیران بوتگ انت –

آئی ءَ گوشتگ کہ سرمچاراں دژمن ءِ گوم ءَ اولی رند ءَ ھبدہ نومبر ءَ کولواہ ءِ دمگ بلور ءَ جنگ داتگ کہ زورگیریں پوج ءَ مزنین کساسے ءَ سرمچارانی بنجاھی اوتاک ءِ انگر کنگ ءِ جھد کتگ بلے بی ایل اے ءِ ترءُ گرد کنوکیں یک ٹولی ءَ دژمن دیم آیگ ءَداشتگ ءُ آھانی سر ءَ اُرش کُتگ –
جارکش ءِ رِد ءَ بازیں اداراں برجاھیں میڑ ءَ دشمن پوج ءِ پنچ کارمند مُرتگ انت ءُ بازینے زدگ بوتگ انت وھدیکہ بی ایل اے ءِ دو تمردیں سرمچاریں سنگت یاسر پنام ءِ میرل ءُ زاہد پنام ءِ زبیر ءَ راجدپتر ءِ تاکاں وتی نام گوں ھوناں نبیس اِتگ ءُ وت ءَ نمیران کتگ –

جیئند بلوچ ءَ وتی درشان ءِ تہ ءَ دیمتر ءَ گوشتگ کہ بیست ءُ نھ نومبر ءَ کولواہ ءِ دمگ جت ءَ ھم زورگیریں پوج ءَ جھلی ءُ برزی کمک ءِ ھمراھی ءَ بی ایل اے ءِ سرمچارانی سر ءَ ھما وھد ءَ اُرش کتگ وھدیکہ سرمچار دمگ ءِ ترءُ گرد ءُ گل ءِ کارانی ھاتر ءَ ادارکی اوتاکے ءَ بوتگ انت – تر ءُ گرد ءِ میان ءَ بلوچ سرمچاراں دو مشکوکیں مردم ھم دزگیر کتگ بوتگ کہ آھانی جست پُرس برجاہ بوتگ، وھدیکہ ھمے میان ءَ بی ایل اے ءِ گند ءُ نندی ٹولی ءِ ھم ھمودا ساڈی بوتگ کہ بی ایل اے ءَ ھوار بؤکیں نوکیں سنگتانی ھاتر ءَ باوست ءَ بوتگ انت –

جارکش ءِ رِد ءَ دژمن ءَ سرمچارانی سر ءَ اُرش ءِ بندات گوں ڈرون اُرشے ءَ کُتگ کہ چریشی ءَ پد سرمچارانی انگر کنگ ءَ دژمن ءَ ھر نیمگ ءَ کمانڈوز ایر گپتگ انت بلے بلوچ سرمچار جوانیں جنگی رپک ءُ ھنر شوربندیانی رِد ءَ بھر بانگ بوتگ انت ھر نیمگ ءَ دژمن کمانڈوانی سر ءَ اُرش کُتگ – جیئند بلوچ ءِ رِد ءَ سرمچاراں اے میان ءَ کم چہ کم ھشت دشمن کارمند کُشتگ انت ءُ بازینے زدگ کتگ انت ءُ دژمن انگیر پروشگ ءَ سوبمند بوتگ انت –

آئی ءَ گوشتگ کہ دژمن ءَ گوں جنگ دیان ءَ بی ایل اے ءِ شش سنگتاں دلیری ءُ تمردی ءِ وتی داستان راجدپتر ءِ تہ ءَ نبیس اِتگ – دژمن ءِ تاوان بار کنگ ءَ پد وت نمیران بوتگ انت – اے میان ءَ سرمچاریں سنگت نواز پنام ءِ فضل، رحمدل پنام ءِ واحد ءُ جلیل شیر پنام ءِ واجو کمبر ءَ تیرانی ھلاس بوگ ءَ پد گڈی تیر ءِ پلسپہ ءَ گڈی تیر وت ءَ وت جتگ ءُ وت ءَ نمیران کتگ –

نمیران بوتگیں سنگتانی تہ ءَ اوتاک ءِ کماندار جاوید پنام ءِ جلال ء محمد عثمان جھمنند بالگتر، اوتاک ءِ کماندار عبدالصمد پنام ءِ کمبر ء محمد حسین جھمنند کولواہ، اوتاک ءِ کماندار داد شاہ پنام ءِ وحید ء نائب حاصل جھمنند شاپک کیچ ھوار انت – اے ھر سئیں سرمچاریں سنگت سال دوھزار سینزدہ ءَ بلوچ سرڈگار ءِ آجوئی جھد ءَ ھوار بوتگ انت ءُ تمردی ءِ گوم ءَ وتی راجی ڈبہ ءَ پیلو کنگ ءَ بوتگ انت –

وھدیکہ ایندگہ سنگتانی تہ ءَ قمبر خان پنام ءِ سگار ء محمد کریم جھمنند شھرک کیچ سال دوھزار چاردہ ءَ، نواز پنام ءِ فضل ء سبزل جھمنند گردانک بلیدہ، حارث پنام ءِ ساوڈ ء غلام علی جھمنند بالگتر سال دوھزار نوزدہ ءَ بلوچ سلاہ بندیں جھد ءَ ھوار بوتگ انت، رحمدل پنام ءِ واحد ء عبدالوہاب جھمنند ھوشاپ، شعیب پنام ءِ عمران ء میاں داد جھمنند کولواہ ءُ جلیل شیر پنام ءِ واجو کمبر ء شیر محمد جھمنند سندھ بازار ھوشاپ سال دوھزار بیست ءُ یک ءَ دژمن بگیری ءَ سلاہ بندیں جھد ءَ ھوار بوتگ انت –

جارکش ءَ گوشتگ کہ جلیل شیر ءَ سال دوھزار نُھ ءَ ھم سنتیں گل ءِ پلیٹ فارم ءَ سلاہ بندیں جھد بندات کتگ ءُ پدا سال دوھزار چاردہ ءَ بی ایل اے ءَ اتکگ ءُ اے وھدی آ اوتاک ءِ کماندار ءِ بوتگ ءُ وتی جھد ءَ کنگ ءَ بوتگ – وھدیکہ آئی ءِ یک برات ءِ عبداللہ پنام ء فراز ھم دژمن گوم ءَ جنگ دیان ءَ سال دوھزار شانزدہ ءَ نمیران بوتگ –

جیئند بلوچ ءِ رِد ءَ کولواہ بلور ءَ نمیران بوتگیں سنگت یاسر پنام ءِ میرل ء واحد جھمنند دشت گوارگ باگ سال دوھزار بیست ءَ بلوچ سرڈگار ءِ آجوئی ءِ ھاتر ءَبلوچ سلاہ بندیں جھد ءَ گوں ھوار بوتگ ءُ زاہد پنام ءِ زبیر ء رئیس جھمنند بدولک کولواہ سال دوھزار بیست ءُ یک ءَ ھوار بوتگ –

بی ایل اے ءِ جارکش جیئند بلوچ ءَ وتی درشان ءِ گڈسر ءَ گوشتگ کہ بلوچ لبریشن آرمی اے راجی نمیرانیں سراں سُھر چکیں دروت ندر کنت ءُ اے اھد کنت کہ شیریں بلوچ ورنایانی پاکیں ھونانی بدل بس بلوچ سرڈگار ءِ آجوئی انت –

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ زامران ءَ پاکستانی پوج ءِ سر ءَ اُرش کتگ –

اُرش زامران ءِ ھند نرمگی ءَ پاکستانی پوج ءِ پانگِسے ءِ سر ءَ کنگ بوتگ کہ اُرش ءَ پاکستانی پوج ءَ جانی تاوان ءِ دیمپانی بوتگ، اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ کہ مئے سرمچاراں بیست ءُ چار دسمبر ءَ شمبے ءِ روچ ءَ کیچ ءِ دمگ زامران نرمگی ءَ برجاھیں پاکستانی پوج ءِ پانگس ءَ سر ءَ مزن ءُ وتکاریں سلاھانی گوں ءَ اُرش کرتگ- اُرش ءِ آسر ءَ دُژمنیں پوج ءَ جانی ءُ مالی تاوان بوتگ –

جارکش میجر گوھرام بلوچ ءَ گوشتگ کہ مئے اُرش بلوچستان ءِ آجوئی ءَ تاں زورگیریں پوج ءِ سر ءَ برجاہ مان انت –

بلوچستان ءَ پوج ءِ سر ءَ اُرشانی درچ یکشل ءَ برجاہ اَنت ناشناسیں مردماں بلوچستان ءِ جتا جتائیں جاھاں پاکستانی پوج ءُ مڈی بروکیں گاڑیانی سر ءَ اُرش کرتگ ءُ تاوان داتگ اَنت-

بلوچستان ءَ گوستگیں بیست ءُ چار ادارانی توک ءَ ھبدہ اُرش بیتگ اَنت کہ اود ءَ پولیس، ایف سی، ء دگہ نشانگ کنگ بیتگ اَنت –

سر بیتگیں ھالانی رد ءَ بلوچستان ءِ باپاری شھر ھب ءَ یکے ءَ پد دگہ دو دزبمب اُرش بیتگ اَنت کہ اود ءَ پولیس ءُ ایف سی نشانگ کنگ بیتگ اَنت ھب چوکی ءِ اُرش ءَ سَے پولیس کارمنداں ھوار ایف سی ءِ کارندہ ھم زدگ بیتگ –

پوج ءُ پولیس ءِ سر ءَ اُرشاں پد شھر ءِ کسان ءُ مزنیں دگانی سر ءَ پولیس ءُ ایف سی ترند کنگ بیتگ اَنت-

دومی نیمگ ءَ شال ءَ وھد وھد ءِ سر ءَ دو دگہ بمب اُرش بیتگ اَنت کہ اود ءَ ناشناسیں مردماں سریاب دگ ءُ سیٹلائیٹ ٹاؤن ءَ ایف سی نشانگ کنگ بیتگ اَنت شال ءِ اُرشاں پوج ءِ زدگ بوگ ءِ ھال اِنت بلے اُرشانی بارو ءَ دگہ گیشین ھالانی آیگ ءِ وداری اِنت-

شال ءَ بیوکیں مروچی سیمی بمب تراک اِنت اشی ءَ پیش سبزل دگ ےَ پولیس ءِ تھانہ ءِ سر ءَ دزبمبے ءَ گون نشانگ کنگ بیتگ ات کہ اود ءَ چاع کارندہ زدگ بیتگ ات اَنت-

دومی نیمگ ءَ کیچ ءَ گوستگیں بیست ءُ چار ادارانی توک ءَ پوج ءِ سر ءَ دو بمب اُرش بیتگ اَنت ءُ ناشناسیں مردماں تعلیمی چوک ءَ ایف سی ءِ سر ءَ اُرش کرتگ ءُ تتکگ اَنت- چریشی ءَ پیش بلوچ لبریشن آرمی ءَ یک اُرشے ءَ پاکستانی پوج ءِ چار کارندہ کشتگ ات اَنت اشی ءَ ابید کیچ ءِ جتا جتائیں جاھاں پوج ءِ سر ءَ دَہ اُرش بیتگ اَنت-

ھمے وڑ ءَ ھزدار ءَ پولیس ءِ گاڑی ھم بمبے ءِ نشانگ کنگ بیتگ کہ اود ءَ بازیں کارندھانی زدگ بوگ ءِ ھال اِنت-

زانگ بہ بیت یکشمبے ءِ روچ ءَ کوھلو ءَ پاکستانی پوج ءِ کاروان بمبے ءِ نشانگ کنگ بیتگ ات کہ اود ءَ کپٹنے ءَ ھوار پنچ کارندہ مرتگ ات اَنت ءُ شش زدگ بیتگ ات اَنت-

کوھلو ءِ بمب ءِ زمہ واری بلوچ لبریشن آرمی ءَ زرتگ ات-

ھمے وڑ بلوچستان ءِ دمگ کلات ءَ ھم ناشناسیں مردماں سنگ مرمر بروکیں گاڑی نشانگ کتگ ءُ تاوان داتگ اَنت-

بلوچستان ءِ دمگ کیچ ءِ بنجاھی شھد تربت ءِ ھند ڈنک گوکدارن ءَ شمبے ءِ روچ ءَ داں انیگ ءَ دکان ءُ پٹرول پمب پوج ءَ زورانسری بند کتگ اَنت-

چریشی ءَ باپار کنوکیں مردماں مشکلانی دیمپانی اِنت ءُ ورگ ءُ وردنی ءِ نہ بوگ ءِ برابری اِنت-

دکاندارانی رد ءَ شمبے ءِ بیگاہ ءَ پوج ءَ زورانسری مئے دکان بند کتگ ءُ مارا چپتگ ءُ اشانی ھواری ءَ پوج ءَ پٹرول پمپ ھم بند کتگ اَنت چریشی ءَ مارا لکانی ھساب ءَ تاوان اِنت ءُ رھگوزی مریز ءُ نادراھاں ھم بازیں مشکلانی دیمپانی اِنت-

دمگی مردمانی رد ءَ گوستگیں روچ ءَ پوج ءِ سر ءَ اُرش ءَ پد پوج ءِ بازیں کارندہ اتکگ ءُ دمگ اش انگیر کرتگ ءُ مھلوک ءِ اش لٹ ءُ کٹ ءُ کتگ ءُ دکان اش بند کتگ اَنت-

دمگی مردماں دی بلوچستان پوسٹ ءَ گوں گوشتگ کار ءُ بار ءِ بنجل ءِ بند بوگ ءُ دکان ءُ روگ ءُ آیگ ءِ سر ءَ بندش ءِ سبب ءَ زھگانی زلوری چیزانی کمی ودی بیتگ-

دمگی مردماں دی بلوچستان پوسٹ ءَ گوں ستکگین دکانانی اکس ءُ روڈ ءِ پروش ءِ اکس ھم دیم داتگ کہ پوج روڈ ءَ پروشگ ءُ سپر کنگ ءِ واسا ناکارہ ءِ کنگ اِنت-

دومی نیمگ ءَ آل پاٹی کیچ ءَ دکانی ماندار ءُ زورانسری بند کنگ ءِ ھلاپ ءَ نیاد کرتگ ءُ پوج ءِ نیمگ ءَ زوراکی ایر جتگ اَنت ءُ تاوانانی پر کنگ ءِ لوٹ کتگ-

آل پاٹی ءَ گوشتگ کہ سیکورٹی پورسز ءِ نیمگ ءَ دکانی بند کنگ باپاری تکاں بندوکیں مردمانی نگن ءِ کوش اِنت-

اُرش ءَ پد تربت ءِ شھر ءَ یک سد ءُ چل ءُ چار جنگ بیتگ چریشی ءَ پولیس ءَ ڈبل سواری ءِ پژدر ءَ بازیں مردم گپتگ اَنت-

آل پاٹی کیچ ءِ رھشون پولیس تھانہ ءَ شتگ اَنت ءُ گپتگیں مردمانی یل کنگ ءِ لوٹ اش کتگ ءُ تنی وھدی بازین مردم پولیس ءِ دزگیری ءَ اَنت-

زانگ بہ بیت دو روچ ءِ وھداں پاکستانی پوج ءِ سر ءَ جتا جتائیں اُرش بیتگ اَنت تربت ءَ سلاہ بندانی اُرش ءَ پوج ءِ چار کارندہ کشگ بیتگ اَنت دگہ زدگ کنگ بیتگ ات اَنت کہ اشی ءِ زمہ واری بلوچ لبریشن آرمی ءَ زرتگ ات-

اُرشانی ترندی بلوچ لبریشن آرمی ءِ گوستگیں سروک جنرل اسلم بلوچ ءُ ائی ءِ ھمراھانی شھیدی ءِ سال روچ ءِ درگت ءَ گیشی گندگ ءَ ایگ ءَ اَنت – مروچی روچ ءَ سال دوھزار ءُ ھژدہ ءَ بلوچ رھشون جنرل اسلم بلوچ وتی ھمراھانی ھمراھی ءَ یک اُرشے ءِ نشانگ کنگ بیتگ ءُ چریشی ءَ آ نمیران بیتگ-

اسلم گسد گْواریں کھربا شنزان اَت دْردی

نبشتہ کار: نودگیر بلوچ

دی بلوچستان پوسٹ

باز بَراں تو کِسّھے کہ نبشتہ کنگ ءَ بَہ ئے ھمے ھیال ءَ مدام گْور کن ئے کہ اے کسّہ ءِ سرجم کنگ ءَ چون چونیں کارست بہ ٹَھیناں ، بلے چُش ھم کزا وھدے بیت کہ تو جیڑ ئے پہ اے کارست ءَ چونیں کسّھے بہ جیڑاں چو اوں بیت باز بَراں کسّہ کارست ءِ ھمبرائی ءَ نَئیت ءُ دمبارت، پمیشکا کارست ءِجند رو اَنت ءُ کسہ جوڑ بنت ءُ کارست ءَ را دگہ ھچ وڑیں ھاجت ءُ اُوست ھم نہ بیت۔ اے کسّھانی بیان کنگ ارزان بوت کنت بلے اے کسّھانی تہ ءَ کسّہ بوگ ءُ پشت کپگ سک گران اِنت۔ 

 اَنچش کہ استاد جنرل اسلم ءِ بابت ءَ بہ گندے نبشتہ کنگ چشیں گرانیں کارے نہ اِنت بلے استاد ءِ دیستگیں وابانی مانا کنگ بے کساس گران اِنت، آئی ءِ داتگیں پنت ءُ سوجانی سر ءَ امل کنگ ، آئی ءِ کشک ءَ سپر کنگ ءُ پَند بُرگ سک گران اِنت پرچہ کہ ایشی ءِ واستا مردم ءَ وتی ذاتی زندمان ءَ چہ درکپگی اِنت ءُ مُچّانکی ءُ راجی زندمان ءِ سیت ءُ نپاں گوں ھوار بوگی اِنت۔

پرچہ کہ اے تھنا گژن ءُ تُن ءِ سپرے نہ اِنت بلکیں اے ھزار مساپت ءُ تروالانی سپر اِنت تو اے ھاتر ءَ جنزگ ءَ  نہ ئے کہ من منزل ءَ نزیک بہ کناں بلکیں تو پرے ھاتر ءَ جنزگ ءَ ئے کہ من ءَ چہ پَد آؤکیں مساپرانی بھر ءَ سپر کم پشت بہ کپ ایت بہ گند ئے اے دنیا ءِ اولی سپر اِنت کہ مساپر ءِ جند ءِ لوٹ ءُ تلب چہ دور ءَ سَھرا ءُ درا نہ بنت ایشی ءِ  تہ ءَ  تھنا آئی ءِ دلی واھگ ھوار نہ اَنت گوں بلکیں ایشی ءِ تہ ءَ گِیمُرتگیں درچکانی واب ءُ ھشیمیں کوھانی دل ءِ پاھار ھوار اَنت گوں ، پرے ھاتر ءَ اے گرانیں وابانی مانا کنگ چو ارزان نہ اِنت۔

پمیشکا اے اھد شناسیں پریشتگ ءَ یک کسانیں وھدے ءَ جنگ ءِ باریگے تھنا بدل نہ کرتگ بلکیں ھما رَوایتی جنگ ءَ را انچش مُھکم ءُ توانا کرتگ کہ اے جنگ دنیا ءِ ھر وڑیں مزنیں تاکت ءُ زورآورانی دیم ءِ دارگ ءِ سَکت دار ایت اے سکت بہ گند ئے چُشیں مزنیں سلاہ ءُ لشکرے ءَ گوں بندوک نہ انت بلکیں اے دیمونی ءِ ھما جزبگ ءُ مارشت ءَ گوں سْیادی دار ایت کہ مات وتی گوگائیں چُکاں یلہ دینت ءُ زمین ءِ گوانک ءَ ھما کربانی ءَ دے اَنت کہ دنیا بندپتر ءِ بے وانکی ھمے شُبین ءَ دنت اے اجگیں موسم ءَ آ چی نبشتہ بہ کنت ءُ چی بہ گوش ایت؟-

مھر ءُ دوستی ءَ چہ چَکار ، جَنگی راہ ءُ رِپکاں چہ بلد ، اے اھد شناس جنگ ءِ دروشم ءَ ھمے پیم ءَ بدل کنت داں روچ ء مروچی دژمن ءِ اجکہ ءُ  ھیرانگی ءِ گوائی ھمیش انت کہ گِساں دور کنت ءُ زھگ ءُ زالبولاں  چست کنت یا کہ وانگجاھاں کسانیں زھگاں آوار جنت ءُ وتی آزار جاھاں بارت ءُ بندیگ کنت اے دژمن ءِ نپسیاتی نادرائی ءَ اَبید دگہ چے بیت کنت۔

انچوشکہ فینن ءَ گْوشتگ کہ”یک آشوبی جنگے ھمے وڑ ءَ زوراک ءِ اڑ داتگیں رھبند ءُ ربیَّتاں پروشان کنت، تاں ھمے وڑ ءَ ھما راج ءِ تہ ءُ توکی کوھن ءُ کدیمیں ربیَّت ءُ دودان ءَ پروشان ءَ رؤت، وتی نوکیں ربیَّت ءُ دوداں ٹَھین ایت۔“

ھمے وھد ءَ کہ استاد بی ایل اے مجید بریگیڈ ءِ دیستگیں واباں مانا کنت آئی ءِ تہ ءَ  ھزاراں ورنا وتی ساھانی کربانی دیگ ءَ ساجو بنت۔ زمین ءَ پہ دیمونی بَیوکیں ورنایانی یک لَڑے کہ استاد ءَ  مدیگ بیت تاں استاد وتی لاڈک ءُ ورنائیں بچ ریھان ءِ نام ءَ اَوَلسر ءَ گچین کنت تاں ھمے وھد ءَ سنگتے اْستاد ءَ گْوش ایت کہ ریھان تئی وارس اِنت باندا آ کیت ءُ تئی جاہ ءَ گیپت چو وت ءَ را بے وارس ءُ بے کس مہ کن وتی زھگ ءِ دیمونی دیگ ءِ بدل ءَ  تو وتکُشی کنوکیں باڑوئی یے دہ لَک ءَ بہ زور پاکگساں بھا رَس ایت مئے کار اوں ارزانی ءَ بیت۔

گڑا استاد پَسہ ءَ دنت مرچی اگاں ما وت ءَ ءُ وتی چُکانی دیمونی دیگ ءَ بہ تُرس ایں، دل بہ جن ایں تَاں باندا روچ ما کجام دپ ءَ گوں بلوچ ماتاں چہ آھانی زھگانی کُربانی ءِ لوٹ ءَ کنیں ۔ آزاتی تھنا ھماھانی ھک اِنت کہ وتی جنگ ءَ وت دیم ءَ بَر اَنت وتی کربانیاں وت دے اَنت۔ اگاں مرچی یک ریھانے روت تاں باندا سدانی کچ ءَ دلیریں بلوچ زھگ ودی بنت۔

مئے مول ءُ مراد تگنا وتکُشیں اُرش ءِ نہ انت بلکیں ھمے راہ ءِ پیشدارگ ءُ نشون دیگ اِنت کہ مارا وتی جنگ چون کنگی انت۔دومی گپ یکیں ریھان ءِ روگ ءَ من بے وارس نہ باں منی وارس منی بلوچ راج اِنت۔

ھمے کشک کہ زی استاد ءَ رَس اتگ ، مرچی ھمے کشک ءَ بلوچ بامرد ءُ باجَن پہ کندان ءَ وتی نگرھیں جاناں پہ مکھیں سرڈگار ءَ ندر کنان اَنت۔کربانی ءِ ھما ھَدّ ءُ اَبیلاں سر اَنت کہ آ سیمسر ءِ بابت ءَ یک کریھ داریں سپاھیگے چی بہ زانت ھو اے تچکیں گپے کہ استاد ءِ وڑیں رشنائیں استالے ءِ چو بے موسم ءَ رپتن پہ راج ءُ  راجی زرمبشت ءَ  پہ ٹوھیں تاوانی ءَ چہ کم نہ اِنت۔ استاد ءِ جوڑ بوگ ءَ  بلوچ ءَ مزنیں سگ ءُ اوپارے کَش اِتگ۔انچش کہ استاد وت گْوش ایت” کسی باجو بوگ ءُ  کسی مَرگ ءَ  اے جد ءُ جُھد نہ اوشت ایت مرچی ناں باندا ما اوں مِر ایں بلے اے جُھد برجم مان ایت یہ ھمبراہ یے شھید بیت تاں آئی ءِجاہ ءَ دگرے کَیت۔“

ھمے پیم ءَ لُمہ یاسمین گْوش ایت ورنا پَرے گپ ءَ دلتپرکہ مہ بنت ءُ  مہ جیڑ اَنت کہ ھرچی بوتگ آ کُٹ اتگ ۔ یک استادے شُتگ ھزاراں استاد تنی وھدی ھست اِنت انچش کہ یک ریھانے ءِ روگ ءَ ھزاراں ریھان دیم ءَ  اَتکگ ءُ وتی زمین ءُ سرڈگار ءِ رکینگ ءَ پہ وتی تنگوئیں جاناں ندر کنان اَنت۔اے جنگ یک نپر ءُ ٹَکے ءِ  جنگ ءُ داوا نہ انت اے جنگ یک لیکہ یے ءِ جنگ انت، زمین ءِ جنگ انت اگاں زمین جاھے استاد ءُ ریھانے وارت دگہ جاھے زبیر ءُ سربلندے ودی کنت زمین پہ وت ءَ مدام  مردم شوھاز اِیت زمین بِے مردم نہ اِنت پمیشکا اے مردم ھم بے زمین مہ بنت شما زمین ءِ بہ بہ ئے زمین شُمیگ اِنت۔

اگاں اے موسم بدل بنت بازیں چیزے وتی رنگ ءُ دروشم ءَ پھک ءَ مٹائیت بلے اے سپر ھمے وڑ ءَ روان کنت سپر رَوگ ءِ نام اِنت بلے من اے بدواھَگیں دسمبر ءِ کجام درد ءَ بیان بہ کناں کہ ھمک درد ءِ تہ ءَ یک کُنٹگے منی ارواہ ءِ دل ءَ جِک ایت ۔ دسمبر ءَ مارا چُنت ٹیکی داتگ ءُ دگہ باریں چی ءُ چونیں کھر ءُ کھرمان مئے سر ءَ گوار ایت۔اے راستے کہ استاد ءِ کمی مئے تہ ءَ تاں اَبد مان ایت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چین ءَ سھر ءِ کھن ءَ چیر تر اتگین ھژدہ کھنجنانی کشگ ءِ جھد برجاہ اِنت –

ھال سرکنوکیں ادارہ اے ایف پی ءِ رد ءَ چین ءِ اُستان سنکیانگ ءَ سھر ءِ کھن ڈورتگ چریشی ءَ کم چہ کم چل کھنجن چیر تر اتگ اَنت ءُ چریشانی تہ ءَ ریسکیو ءِ کارمنداں بیست ءُ ھشت مردم سلامتی ءَ در کتگ انت-

واکدارانی گوشگ اِنت آ چیر تراتگیں کھنجانی کشگ ءِ کار برجاہ اِنت-

گوستگیں سالاں کھنانی گر ءُ دار ءَ گھتری اتکگ بلے کھنانی لُمبگ یکشل ءَ برجاہ اَنت چریشی ءِ سبب پھریزی ءِ نادلگوشی گوشگ بوگ ءَ اَنت-

گوستگیں سال ءِ ستمبر ءَ اُستان چنگھان ءَ اشکرانی کھن ءِ لمبگ ءَ نوزدہ مزدور چیر اتگ ات اَنت ءُ بازیں ادارانی گوزگ ءَ پد مزدور مرتگ ات اَنت-

گوستگین سال ءِ دسمبر ءَ ھم اُستان شنشی ءَ بیست مردم اشکرانی کھن ءَ چیر اتگ ات اَنت ءُ چریشانی توک ءَ دو مردم مرتگ ات اَنت-

روکپتی بلوچستان ءِ بنجاھی شھر زاھدان ءُ ایرانشھر ءَ دو بندیگیں مردم پاھو دیگ بیتگ اَنت-

گیشیں ھالانی رد ءَ گوستگیں روچ ءَ ایرانشھر ءِ زندان ءَ بندیگیں یک مردمے ایرانی آمیدگس ءِ ھکم ءَ پاھو دیگ بیتگ-

پاھو دیگ بیتگیں مردم ءِ پجار ملک برھانزئی ء مھمد جھمنند بخش دامن ایرانشھر ءِ نندوک اِنت-

ھالانی تہ ءَ گوشگ بیتگ ملک برھانزئی گوستگیں سال ءَ یک کوشے ءِ بھتام ءَ دزگیر کنگ بیتگ ءُ چریشی ءَ پد آئی ءِ سر ءَ پاھو اتکگ ءُ گوستگیں روچ ءَ پاھو دیگ بیتگ-

ھمے وڑ ءَ دگہ بندیگیں مردمے ماں زاھدان ءِ زندان ءَ ھم پاھو دیگ بیتگ-

پاھو دیگ بیتگیں مردم ءِ پجار سی ءُ ھپت سالی ئیں ایوب ریگی ء داد مھمد جھمنند زاھدان ءِ نام ءَ زانگ بیتگ-

ھالانی تہ ءَ گوشگ بیتگ ایوب ایرانی سال نود ءُ ھشت ءَ ماں کرمانشھر ءَ روگ ءَ بیتگ کہ راہ ءِ نیمگور ءَ کوش ءِ بھتام ءَ ایرانی لشکر ءَ دزگیر کتگ ءُ چریشی ءَ پد آمیدگس ءَ آئی ءِ سر ءَ پاھو ءِ سزا داتگ ءُ گوستگیں روچ ءَ آ پاھو دیگ بیتگ-

ایوب لھتے روچ پیش ما زاھدان ءَ جتائیں کوٹی ءَ پاھو دیگ ءَ برگ بیتگ ءُ اود ءَ دگہ ھالے ھم ھست کہ الیاس ریئسی ءِ سر ءَ پاھو ءِ ھکم اتکگ بلے تنی وھدی اشی ءِ درگت ءَ ھاسین اھوال نیست اَنت-