TBP Balochi

یوکرین ءَ وتی شنگ کرتگیں یک ھالے ءِ توک ءَ گُشتگ کہ آئی ءِ لشکر ءَ سال ءِ بندات ءَ ڈیھ ءِ روکپتی شھر ماکیوکا یک ماڑی ءِ توک ءَ اُرش ءَ کساس چار سد روسی پوجی کشتگ اَنت بلے روس ءَ اے کچ بس شست ءُ سَے گشتگ-

فرانسیسی ھال سرکنوکیں ادارہ اے ایف پی ءِ رد ءَ جنگ ءِ کچ ءَ کجام ھم کچ ءَ درستاں مستریں جانی تاواناں پدر کنت –

روس ءُ دو شمبے ءِ روچ ءَ گوشتگ کہ سال ءِ بندات ےَ یوکرین ءِ دمگ ڈونیٹسک ءَ روس ءِ دستیگیں جاہ مکیوکا ءَ آئی ءِ بنجل ءِ سر ءَ یوکرین ءِ میزائل اُرشاں شست ءُ سَے پوجی بیران بیتگ اَنت-

روسی وزارت ءِ دفاع ءِ نیمگ ءَ بیرانی اے جار ھنچین وھدے ءَ دیم ءَ اتکگ کہ روس ءَ یوکرین ءِ بنجاھی شھر کیئف ءَ برزی اُرش برجاہ داشتگ اَنت بلے مئیر وٹالی کلٹشکوک ءَ گوشتگ کہ شھر ءُ کشی گوری دمگاں نشانگ کنوکیں چِل ڈرونز جتگ ءُ دور داتگ اَنت-

روسی وزارت دفاع ءَ گوشتگ کہ یوکریج ءَ امریکہ ءِ نیمگ ءَ یوکرین لشکر ءَ داتگیں موبلیٹی آرٹلری راکٹ سسٹم شش ءِ توک ءَ چار راکٹ ماکیوکا ءَ کپتگ اَنت ءُ روس ءَ گشتگ کہ ات میزائلانی توک ءَ دو میزائل دور داتگ اَنت-

یوکرین ءِ سلاہ بندیں پوج اسٹریٹجک کمیونی کیشن ڈاٹریکٹوریٹ ءَ یکشمبے ءِ روچ ءَ گوشتگ ات کہ مکیوکا ءَ یک ووکیشنل اسکولے ءِ ماڑی ءِ توک ءَ کساس چار سد روسی پوجی کشتگ اَنت ءُ سَے سد زدگ کتگ اَنت-

روس ءِ درشان ءَ گوشگ بیتگ کہ اُرش مکیوکا ءَ بیتگ اشی ءِ توک ےَ ووکیشنل اسکول ءِ گپ نہ بیتگ-

ڈونیٹسک ءَ ماسکو ءِ کنٹرول ءِ بھراں روس ءِ داشتگیں یک کلانیں اگدودارے ڈینئل بیزسونوف ءَ گوشتگ اے ماڑی ءَ روس ءِ لشکر جھمنند بیتگ بلے آیاں بازیں تاوان رس اتگ-

روکپتی بلوچستان ءِ دمگ نیکشھر ءَ ھپتاد میل دوری ءِ روکپتی ھند فنوج ءِ شھدربرجاہ ءَ آسراتی ءُ بزانکہ گیشیں ماڑی ءِ نہ بوگ ءِ سبب ءَ نودربر ھائی اسکول ءَ نندگ ءُ وانگ ءَ لاچار اَنت-

ھپت سد نودربراں ھواریں شھدربرجاہ ءِ نودربر شھید رجایی وانگجاہ ءَ نندگ ءَ لاچار اَنت کہ اود ءَ نودربر بازیں جیڑہ ءُ جنجالانی دیمپان اَنت –

فنوج ءِ سرجمیں آبادی بیست ھزار ءِ کساس بیت اِنت کہ اود ءَ روکپتی بلوچستان ءِ یک مزنیں جاھاں ھواریں جاھے ءِ ناماں زانگ بیتگ اِنت-

روکپتی بلوچستان ءِ وانگجاھے ءِ استاد زیردان بلوچ ءَ ماں دی بلوچستان پوسٹ ءِ اھوالکار ءَ تران کنان ءَ گوشت کہ اود ءَ اے ھساب فنوج ایوک ءَ ناں دگہ جاھاں ھم ھنچیں چیزانی دیمپانی ھست اَنت-

آئی ءَ گوشت کہ اود ءَ زھگ پشمبے ءُ آدینگ ءَ وانگ ءَ نہ رو اَنت بلے آدگہ روچاں ھم آیانی واستا بازیں دلسیاھی ھست اَنت-

زیردان بلوچ ءَ گوشت کہ اود ءَ نودربراں ڈیسک ءُ دگہ کوٹی ءِ آسراتی ھم نیست اَنت کہ چریشی ءَ آیانی وانگ یکدم پش کپان اَنت-

آئی ءَ گوشت کہ وانگ جاھاں ھاسیں کُرسی ھم نیست اَنت کہ اود ءَ جھل ءَ نیشتگ اَنت نانکہ چوشیں آسراتی ھست کہ اود ءَ نودربر کوٹیاں ابید ڈن ءَ نندگ ءَ وانگ ءُ یا دگہ وانگجاھانی چمداری ءَ نیشتگ اَنت-

فنوج ءِ شھر کساس بیست ھزار ءِ آبادی اِنت کہ بلے اود ءَ وانگ ءِ ھاتر ءَ آسراتی نہ بوگ پہ فنوج ءِ واکداران مزنیں شرمی نگاھے پیش گندگ ءَ کیت اِنت-

فنوج ءِ نودربر اے وھد ءَ تھنا دو روچ ءَ وتی وانگی کلاساھاں گرگ ءُ روگ ءَ اَنت بزانکہ ھپتگ ءِ توک ءَ اود ءَ پنچ روچ آیانی پہ زوالی گوزگ ءَ اِنت-

فنوج ءِ نودربراں لوٹ کتگ کہ سرکار ءُ آئی ءِ واکدار مئے جیڑھاں بہ گیشین اَنت اگاں مئے زند ءُ وھد ھمے پیم ءَ زوالی ءِ دیمپان بیت ءُ ما چہ زانت ءَ زبھر بہ ایں-

بلوچستان ءِ جتاجتائیں دمگ چاگی ءُ کیچ ءَ دگ ءُ دگہ وئیلانی آسر ءَ پنچ مردم بیران ءُ دو ٹپی بیتگ اَنت-

سربوتگیں ھالانی رِد ءَ بلوچستان ءِ دمگ چاگی ءِ ھند دالبندین تالو لانڈھی ءِ نزیک ءَ بارتگزی ءِ ھند ءَ آر سی ڈی شھدگ ءَ دو زمیباد گاڑیانی میان ءَ ڈک ورگ ءِ آسر ءَ سے مردم بیران بیتگ اَنت ءُ یکے ٹپی بیتگ-

دمگی مردمانی رِد ءَ دوئیں گاڑیانی ڈک ورگ ءَ پد گاڑیاں آس کپتگ ماں چریشی ءِ آسر ءَ سئیں مردم بیران بیتگ اَنت، بیران بیتگیں مردمانی لاش ءُ ٹپی ئیں مردم پرنس فھد نادُراھجاہ دالبندین ءَ برتگ اَنت-

بیران بیتگیں مردمانی تہ ءَ یکے ءِ سیادی ھُزدار ءِ تھسیل وڈھ ءَ اِنت یکے ءِ سیادی تھسیل چاگی ءُ یکے ءِ اوگانستان ءَ اِنت-

ھمے وڑ چاگی ءَ اوگان بھاوٹی بُنجل گردی جنگل ءَ دو مردمانی میان ءَ دپ جاکی بیتگ ءُ چریشی ءِ آسر ءَ وت ماں وت مڑتگ اَنت قدراللہ نامیں مردمے بیران ءُ وھدے کہ محمد عیسیٰ ٹپی بیتگ-

بلوچستان ءِ دمگ کیچ ءِ تھسیل تمپ ءِ سرنکن ءَ یک زالبولے ءَ وتکشی کتگ، وتکشی کنوکیں زالبول ءِ پجّار (ز) نام ءَ چہ بیتگ-

تنی وھدے وتکشی ءِ سبب ءَ انگت زانگ نہ بیتگ نانکہ دمگی انتزامیہ ءَ اے درگت ءَ چیزے گْوشتگ-

زانگ بہ بیت گوستگیں سال ءَ بلوچستان ءِ جتاجتائیں دمگاں وتکشی ءِ بازیں وئیلے نکش کنگ بیت ءُ آیانی تہ ءَ زالبول ءُ مردین ھوار اَنت گشیتریں وتکشی ءِ سبب لوگی جیڑہ ءِ سر ءَ کنگ بنت –

سر بیتگیں ھالانی رد ءُ روکپتی بلوچستان ءِ دمگ دلگان ءَ دگ ءِ وئیل ءَ یکیں کھول ءِ شش مردم بیران بیتگ اَنت-

بیران بیتگیں مردمانی پجار زانگ نہ بیتگ اَنت بلے ھمے گوشگ بوگ ءَ اِنت ھرچ ششیں مردم یکیں کھول ءِ مردم اَنت-

وئیل ایرانشھر ءِ ھند جبرآباد دلگان ءَ پیش اتکگ کہ اود ءَ یکین کھول ءِ شش مردماں چہ زندگی ءَ زبھر بیتگ ءُ مرگ ءَ وتی ارجان جتگ اَنت-

سیستان ءُ بلوچستان ءَ گیشترچوشیں وئیل پیش بوگ ءَ اَنت کہ آیانی سر ءَ اے گوشگ بیگ ءَ اِنت اود ءَ سرکار ءِ نیمگ ءَ دگانی سر ءَ گر ءُ داری ءَ ھاسیں دلگوشی یے نیست اِنت-

ھمے وڑ ءَ دشتیاری ءَ مروچی یک تیل کشیں ورنایے ھم دگ ءِ ارجان بیتگ ءُ بیران بیتگ-

بیران بیتگیں مردم ءِ پجار صمد تیرخون جھمنند کرگی دشتیار ءِ نام ءَ زانگ بیتگ-

بلوچستان ءِ دمگ کیچ ءَ پاکستانی پوج ءِ دست ءَ دگہ دو ورناہ زورانسری آوار جنی ءِ نشانگ کنگ بیتگ اَنت

زانگ بہ بیت ھمے ھپتگ ءَ چہ تربت ءِ جتاجتائیں دمگاں بیست ءَ گیش مردم زورانسری آوار جنی ءِ نشانگ کنگ بیتگ اَنت کہ آیانی تہ ءَ شش ءِ سیادی چہ ھُزدار ءَ اِنت-

زورانسری آوار جنی ءِ وئیل گوستگیں روچ ءَ پوج ءَ چہ نوشکی ءَ یکے ءُ چہ ھُزدار ءَ دو مردم زورانسری آوار جنی ءَ پد بیگواہ کنگ بیتگ اَنت وھدے کہ 23 دسمبر ءَ آواران ءِ دمگ چہ کولواہ ءَ پاکستانی پوج ءِ دست ءَ بیگواہ کنگ بیتگیں عمران بابو نامیں ورنایے ءِ تیرسُپتگیں لاش دزکپتگ اَت-

ھُزدار گریشہ ءِ جھمنند دو نودربر سراج نور ءُ محمد عارف زورانسری آوار جنی ءِ بگیری ءَ مروچی کھول ءُ دمگ مردمانی نیمگ ءَ کنگ بیتگیں زھرشانی بُنجاھی شھدگ بند کنگ بیتگ اَنت دمگ مردم نودربرانی زوت یل کنگ ءِ لوٹ کنگ ءَ اَنت-

شھدگ بند بوگ ءِ سبب ءَ گاڑیانی دْراجیں لین لگ اِتگ وھدے کہ مساپر ھم پس اِتگ اَنت-

دستونک

شائر: امجد بیکس

دی بلوچستان پوسٹ

دل ءِ آس ءَ سُچگ لوٹاں
زُبان ءَ گُنگ بوھگ لوٹاں

جھاں لُکّ اِنت ءُ چَمّ کوراں
وتی ڈیھ ءَ پَچگرگ لوٹاں

نہ سھڑیت دل ماں کبر ءَ
گُلام آجو بوھگ لوٹاں

کن ئے گپ ءَ تو راستی ءِ
آ شیواراں گِرگ لوٹاں

چونیں دُژمناں تئی امجدؔ !
بیکسؔ ءَ بیگواہ کنگ لوٹاں

پیپلز ھسٹری آف بلوچستان ( تاکبند ۳)

نبشتہ کار: سمیع بلوچ

دی بلوچستان پوسٹ

دومی بھر

منی واستا کم چہ کم ھینکس قبائلانی بابت ءُ ایشانی سردار ءُ مزنی کسانی ءِ زانگ یک نوکیں سرپدی ءِ بلوچ قبائلانی اتھاد ءِ سر ءُ ءُ بلوچانی بُن ءُ بُنکی بوگ ءِ سر ءَ ھوں شاہ ساھب گپ کنت دکتور ءِ ھیال ءَ اتھادے پروسس مدام جوڑ بوگ ءُ پروشگ ءِ گون ءَ دپتر ءِ بھرے ءُ ھمے وڑ ءَ علاقائی اتھاد یک گُڈی شکلے ءِ دروشم ءَ دیم ءَ آتکگ یک جاگھے اے گپ دیم ءَ کیت کہ ھچ بلوچ قبائل اسل نکل نہ اَنت ءُ “ساپیں ھون ” ساپیں نسل، ساپیں راج” ءِ نام ءِ سر ءَ سک باز مناپکت بوتگ ءُ بے بنیادیں تھیوری ءِ دیم ءَ آرگ بوتگ کہ چریشی ءَ راج ءِ بامردیں ورنایاں چہ راجی آجوئی ءِ جھد ءَ چہ دور دارگ ءُ نسلی مناپرت ءُ پرکہ واریت ءِ پندلے ءِ ابید دگہ ھچے نہ اِنت-

بلوچانی بازیں قبائل بنیات ءَ چہ بلوچستان ءَ سیادی ندار اَنت مری ءِ شاہ ءَ ” لانگھانی” ھندی نژاد اَنت ءُ چہ ملتان ءَ اتکگ اَنت تالپور انگریزاں چہ پیسر پنجاہ سال سندھ ءِ سر ءَ ھاکمیت کنوکیں ٹکے ھمے پیم ڈومبکی ، جھکرانی ءُ کھوسہ ءُ باسیں دگہ قبائلانی شاہ ءَ سک باز وھداں رند بلوچستان ءَ کاینت ءُ آباد بنت ( تپسیلی کتابے چارومی در قبائل ءُ علاقائی اتھاد ءِ تہ ءَ نبشتہ اَنت ) شاہ محمد ءِ ھساب ءَ بلوچ یک پت ءُ پیروکی نسلے نہ اِنت بلکیں ما ایندگہ زنگیں راج ءَ نی پیم ءَ  مائیگریشن ءِ بھرے بوتگ اَنت ءُ بازیں دری راج مئے تہ ءَ ھوار بوتگ اَنت ءُ مئے نسل ءِ دیم ءَ روان اِنت اگاں یکے گوش ایت بلوچ ” پھک ءَ پلگار اَنت” بزاں ساپ ءُ پلگاریں راج ءِ گڑا گلت گُش ایت-

بلوچ ءِ جنگی سنچ” ءِ سر ءَ ھوں باز نبشتہ اِنت بلے چونکہ بلوچ نسل در نسل یک جنگجوئیں راجے بوتگ ءُ انگت ھست اِنت بلے اسل ءَ بلوچ ءَ را جاور ءُ مجبوریاں جنگولے جوڑ کُرتگ ” راجہ ڈائر ” گُش ایت ( بلوچ قبائل ھقیقت ءَ رھزنی ءِ سر ءَ گزران کن اَنت) بلوچانی لوٹ ءُ پُل ءِ ھوں لھتے کانود بوتگ اَنت انچو کہ اگاں کاروان لوٹگ بوتگ اَنت گڑا لوٹ ءِ مالانی بھر کنگ بوتگ اَنت ھما مردمانی نیام ءَ اگاں یکے لوٹ ءَ ھوار نہ بوتگ گّڑا ھچ پیمیں بھرے نہ رس اتگ بلے یک برے ءِ کسہ ءِ ھست اِنت کہ ایشی ذکر نکنگ ءَ اے بھر سرجم نہ بیت تاکدیم ۹۰ ءَ اے کسہ اے رنگ ءَ اِنت کہ ” یک رندے مری ٹک ءِ مردم آوار ءِ لوٹ ءَ در کپگ ءَ بنت بلے ھمے کاروان ءِ تہ ءَ مری ءَ نی یک مزنیں نامدرایں جنگی کماندارے دلیل مری گون نبیت ( کماندار دلیل تھنا وتی بھادری ءُ ھمت ءِ سوْب مدام پنچک ءَ زور ایت) گڑا وھدے ایندگہ مردم جنگ ءَ رو اَنت کماندار دلیل وتی ھمراھاں گوں گشت کنگ ءَ بیت گند ایت یک پیر زالے قبرے ءِ سر ءَ نشتگ زار ءُ پریات کنگ ءَ اِنت گڑا کماندار دلیل ءَ شک روت کہ اے کبرے نہ اِنت ءُ وتی مردماں گُش ایت پیر زالے سر ءَ بُر اِت گڑا ھکم ءِ منگ بیت ءُ ھمے کبر ءِ پَٹگ ءِ ھکم ءَ دنت تا چاراں کبر ءِ تہ ءَ مزنیں ھزانگے کَل اِنت گڑا ھزانگ ءَ دلیل وتی زورگری ءَ کنت ءُ دومی نیمگ ءَ “آوار ءِ جنگ” ءَ چہ ایندگہ مردم وار سوبمند بنت ءُ کاینت ءُ رواج ءِ ھساب ءَ کماندار دلیل ءَ بھر نہ دے اَنت گوں گڑا دلیل گُش ایت “شریں شُمئے بھر شُمئے ءُ منی بھر منی” گڑا ایندگہ مری جنگولاں شک بیت کہ الّم دلیل ءَ مزنیں ھزانگے ءَ دست کپتگ کہ چُش گشگ ءَ اِنت پمیشکا ایندگہ جنگول منگ ءَ تیار بنت کہ لوٹ ءُ پُل ءِ آوار ءَ چہ ما ترا بھر دے آں ءُ تو مارا بھرے بہ دے گڑا کماندار دلیل وتی ھزانگ ءَ چہ بھرے ایشاں ھوں دنت جنگی کانودانی تہ ءَ اولی کانود ھمیش اِنت کہ ھموک بلوچ جنگول بایدیں تمامیں جنگی کانوداں پھلو بہ کنت اگاں بزدل کرار دیگ بیت ءُ یک تکے ءَ مردمے شُمار کنگ بیت جنگانی تہ ءَ تانکہ گُڈسر ءَ راستی ءَ گوں کار کنگ المّی اِنت زھر داتگیں تیر ءُ چیریں سلاہ ءِ کارمرز کنگ نہ بیت وپتگیں مردم، مھمان، کیدی ءُ بندی ،کسان سالیں مردم ءُ باھوٹ بوتگیں مردمے کُشگ سک ایب منّگ بیت بیدے چہ سیاہ کار بوتگیں جنین دگہ ھرچ جنینے کُشگ وت جرم ءِ منّگ بیت اِنت ھند ءُ یا دگہ اکلیتی مزھب ءِ مردم ءِ کُشگ یک مزنین گناھے چارگ بیت اِنت پیر ءِ دربار یا مسیت ءِ تہ ءَ پترتگیں مردم ءَ باھوٹی رس ایت ھرچ یکے ءَ اگاں کوش یا چوّٹ ءُ چمپل گوّر ءَ کُرتگ اَنت یا دپ ءَ وتی دنتانانی سر ءَ داشتگ اَنت آ مردمے ھوں کُشگ ءِ اجازت نیست اِنت ھمیش اَنت بلوچی کوڈ کہ ایشی ءِ پاسداری المی اِنت-

بگٹی ٹک ءِ تہ ءَ ” چیف” ءُ مری ءَ نی ” راہ زن”  انگریزانی “نائٹ” ءِ پیمیں یک ٹائٹلے کہ ھاسیں اھمیتے داشتگے بلے انگریز ءِ آیگ ءَ رند ایشی ءِ اھمیت چٹ ھلاس بیت تیر ءُ تُپنگی جنگ ءُ توپ خانہ ءِ کارمرز کنگ ءَ انسانی بھادری ءُ بامردی ءِ سر ءَ مزنیں اسرے دور دات راہ زن ءُ چیف مدام وتی قبائلی سردار ءِ نزیکین ءُ دوستیں مردم بوتگ اَنت ءُ جنگانی تہ ءَ لشکریانی رھمنائی ءِ اش کُرتگ ءُ مدام پُشت ءَ اوشتوک بوتگ ءُ زھم اش دست ءَ بوتگ اَنت اگاں کسے چہ جنگ ءَ تتکگ ءَ شُتگ گُڑا گوں وتی زھم ءَ سرے دور کُرتگ اگاں یک راہ زنے یا سردارے ءِ چُک پت ءِ مرگ ءِ وھد ءَ کسان بوتگ تو ایشی ءِ کُمک ءِ واستا ٹک ءِ یک سر کماشیں یا زانتکار داروکیں مردمے دارگ بوتگ ھمے مرد وتی مشیرانی کُمک ءَ چہ اسل سردار یا وڈیرہ ءِ مزن بوگ ءَ تک وتی زمہ داری پیلو کتگ اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شامی لشکر ءِ گوشگ اِنت اسرائیل ءِ لشکر ءَ دو شمبے ءِ سھب ءَ میان اُستمانی بالی پٹ ءِ سر ءَ میزائل اُرش کرتگ چریشی ءَ دو پوجی بیران ءُ دو زدگ بیتگ اَنت-

ھال سرکنوکیں ایجنسی ایسوسی ایٹڈ پریس ءِ رد ءَ شامی لشکر ءَ اے درگت ءُ ابید ءِ سرجمی ءَ گوشتگ کہ دمشق ءَ میانی اُستمانی بالی پٹ ءَ ھپت ماھانی توک ءَ اے دومی اُرش اِنت کہ چریشی ءَ نزیکیں دمگاں تاوانباری بوگ ءَ اِنت-

اسرائیل ءَ سر زاھر ءَ لبنان ءِ ھزب اللہ ءَ ھوار تھران ءِ پلامرزی کنوکیں ناشریں ٹولی ایران ءِ نیمگ ءَ سلاہ رسگ ءِ دارگ ءِ جھد ءَ شامی سرکار ءِ دستیگیں جاہ بالی پٹ ءُ بندرگاھاں نشانگ کنگ ءَ اِنت-

شام ءِ جنگی جاورھالانی سر ءَ نگاہ ایر کنوکیں گلے ءَ گشتگ کہ اسرائیل ءِ اُرشاں بالی پٹ ءَ ھوار دمشق ءِ زربار ءَ سلاھانی بنجل ھم نشانگ کنگ بیتگ-

برچانیہ ءَ ھستین سیریئن آبزوریٹر فار ھیومن رائٹس ءَ گوشتگ کہ چار مردم بیران بیتگ اَنت دَہ جون ءَ دمشق ءَ میان اُستمانی بالی پٹ ءَ اسرائیل ءِ برزی اُرشاں انفراسٹراکچر ءُ رن ویز ءَ باز تاوان رس اتگ ءُ آ شر کنگ ءَ پد دو ھپتگاں رند پچ کنگ بیتگ-

ستمبر ءِ ماہ ءَ اسرائیل ءِ برزی اُرشاں شام ءِ مستریں شھر گوریچانی حلب ءَ میان اُستمانی بالی پٹ نشانف کنگ بیتگ ات چریشی ءَ بازیں روچاں بند بیتگ اَت سال دوھزار ءُ بیست ءُ یک ءِ گڈسر ءَ اسرائیل ءِ جنگی بالیگاں میزائل لاطاکیہ ءِ بندرگاہ ءَ کنٹینرز نشانگ کتگ ات اَنت چریشی ءَ اود ءَ آس چست بیتگ ات-

اسرائیل ءَ اے گپ پدر کرتگ ات کہ آ ایران ءِ ھمسنتیں ناشریں گلاں نشانگ کنگ ءَ اِنت چریشانی توک ءَ لبنان ےَ ھزب اللہ نامیں گلے ھوار اِنت ایشی ءَ چہ شام ءَ سروک بشار الاسد ءِ پوج ءِ پلامرزی ءَ ھزاراں جنگول راہ داتگ اَنت-

لس پوشاکی کارندھاں سَے ورناہ زاھدان ءَ آوار جتگ ءُ بیگواہ کرتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھانی کارندھاں سَے ورناہ آوار جتگ ءُ ناشناسیں زنداناں برتگ اَنت-

آوار جنگ بیتگیں مردم آدینگ ءِ روچ ءَ زاھدان ءِ ھند شیر آباد ءَ ھما ودھ ءَ گرگ ءُ برگ بیتگ اَنت کہ آ آدینگ ءِ نماز ءَ واتر وتی لوگ ءَ روگاں بیتگ اَنت-

آوار جنگ بیتگیں ورنایانی پجار ھبدہ سالی ئیں بسم اللہ براھوئی، شانزدہ سالی ئیں اسماعیل سرگلزائی ءُ شانزدہ سالی ئیں ابراھیم سرگلزئی ناماں زانگ بیتگ اَنت ءُ اشانی توک ء ابراھیم ءُ سماعیل ھردوک جاڑیں برات اَنت-

اے ورنایانی آوار جنگ ءُ برگ ءَ پد آیانی درگت ءَ تنی وھدی دگہ ھال دیم ءَ نیتکگ اَنت-