TBP Balochi

اوگانستان ءِ بنجاھی شھر کابل ءَ پارلیمنٹ ءِ گوستگیں زالبولیں باسک آئی ءِ لوگ ءَ تیرگواری کنگ ءُ کشگ بیتگ-

اوگان نیوز چینل طلوع ءِ رد ءَ کابل ءِ مھکمہ پولیس ءِ جارکش خالد زدران ءَ گوشتگ کہ اے کوش ءِ وئیل ڈسٹرکٹ 12 پیش اتکگ-

جارکش ءَ گوشتگ کہ مُرسل نبی زادہ شمبے ءِ شپ ءَ آئی ءِ لوگ ءِ توک ءَ ناشناسیں مردماں دور کرتگ ءُ نشانگ کتگ –

سر بیتگیں اھوالانی رد ءَ اُرش ءَ آئی ءِ گارڈ ھم کُشگ بیتگ، خالد زدران ءِ گوشگ ات کہ اُرش ءَ پارلیمان ءِ گوستگیں باسک ءِ برات ھم زدگ بیتگ ءُ آ دارو درمان کنگ بوگ ءَ اِنت-

پولیس جارکش ءِ رد ءَ اے وئیل ءَ ھواریں جرمکارانی پٹ ءُ پول برجاہ اِنت ءُ آ گرگ ءُ کانون ءِ دست ءَ دیگ بنت-

زانگ بہ بیت اگست دوھزار ءُ بیست ءُ یک ءَ اوگانستان ءَ طالبان ءِ سرکار ءَ پد گوستگیں سرکار ءِ بازیں رھشوناں ڈیھ یل داتگ ءُ شتگ اَنت-

شال ءَ گیس ءِ ترکگ ءِ سبب ءَ بیتگیں ترال ءَ پنچ زھگاں ھوار شش مردم بیران بیتگ اَنت-

ریسکیو ءِ رد ءَ گیس ءِ لیک بوگ ءِ وئیل سیٹیلائٹ ٹاؤن ءَ پیش اتکگ کہ اود ءَ مسلم اتھاد کالونی ءِ جھمنندین چل سالی ئیں شرف الدین ءِ لوگ ءَ گیس لیک بیتگ ءُ چریشی ءَ پد آس چست بیتگ-

ریسکیو ءِ رد ءَ ھال ءِ سر بوگ ءَ فائر بریگیڈ ءُ ریسکیو ءِ باسک وئیل جاہ ءَ سر بیتگ اَنت ءُ آس اش توسینتگ-

تراک ءَ شرف الدین ءُ آئی ءِ پنچ زھگ بیران بیتگ اَنت کہ آیانی اُمر پنچ سال ءَ بگر داں دوازدہ سال ءِ کساس گوشگ بوگ ءَ اِنت-

اِلم

نبشتہ کار: نسار بلوچ

دی بلوچستان پوسٹ

الم ھما روشنائی انت،کہ آئی ءَ ھچ تھاری یے گار نہ کنت، الم ءِ روشنائی انت کہ مرچی تیوگیں جھان چہ ایشی ءِ روشنائی ءَ درپشگ ءَ انت آ چوش کہ اِلم ءِ زانگ ءُ مارگ انت، بنی آدم ءَ کہ مرچی ماه ءِ سر ءَ گام ایر کتگ ءَ انت ھمے اِلم ءِ برورد اِنت انسان نوک نوکیں ٹیکنالوجی ایجاد کنگ ءَ انت-

یک مردمے کہ اِلم دربارت ءُ شرّین ءُ سَرپدیں مردمے جوڑ بیت اِنت کہ ھر چیز ءِ نیک ءُ بد ءَ زانت ءُ آئی ءَ مار ایت، بلے ھما مردم کہ آئی ءَ اِلم در نہ برتگ ءُ هچ نہ زانت داں آئی ءُ ھیوان ءَ ھچ تپاوت نیست ،ھرچ مردمے کہ اِلم زانت وتی مکسد ءَ زانت،تاں آ هچ پیم ءَ ناکامی ءُ نامرادی نہ گند ایت، بلے ھما مَردم کہ اِلم ءَ چہ دور بوتگ ،نہ ونتگے آئی ءِ نزیک ءَ تیوگیں جھاں تھار انت آ ھر وھد ءَ ناکام ءُ نامراد بیت،وتی چاگرد ءُ زند ءِ بارو ءَ ھچ پگر نہ کنت-

ایشی ءِ مکابلہ ءَ ھما انسان کہ اِلم ءُ زانت ءِ منزل ءَ روگ ءَ انت آ وتی زند ءُ چاگرد ءِ بارو ءَ سر پد بیت اِلمے یک شرّی یے همیشں انت کہ آ چہ ردیں مردماں شری جوڑ کنت پرچا کہ یک مردمے تنا وھدی جوانیں انسانے جوڑ نہ بیت کہ شھوری ھساب ءَ وتی جند ءِ بارو ءَ مہ زانت‌‌، وتی چاگرد ءُ کوم ءِ بارو ءَ سرپد مہ بیت-

اے اِلم انت کہ انسان ءَ پگر کنگ پرما ایت ءُ آئی ءَ کوھن ءُ نوک ءِ نیمگ ءَ بارت آ چوش کہ مایک وانندهیں مردمے ءِ سوچ ءَ بچاریں آئی ءِ سوچ ءَ ءُ ناوانندهیں مردم ءِ سوچ ءَ زمین ءُ آسمان ءِ پرک بیت پرچا کہ وانندهیں مردم وھدے الم دربارت تاں آ چہ مردمے ءَ انسانے جوڑ بیت ،وتی چاگرد ءِ بارو ءَ ھرچ ھساب ءَ زانت ءُ تھزیب یاپتہ جوڑ بیت اِنت، الم ءِ دربرگ ءِ واستا زلوری انت کہ وتی تہ ءَ مھکمی ودی کنگ بہ بیت گڑا هما وھد ءَ ما اِلم دربرت کنیں ،الم ءِ راه ءَ بازیں اڑ ءُ جنجال بنت ،مارا اے تیوگیں اڑ ءُ جنجال نہ مارگی انت، اگاں ما وتی بلوچ کوم ءِ درور ءَ بزور ایں پرچا کہ جھالت تچاوکی ءِ تہ ءَ انت ایشی مستریں سبب مئے شمئے کم اِلم ءُ کم زانتی انت مارا لوٹ ایت کہ ما وتی کوم ءِ تہ ءَ زانت ءُ سما ودی بہ کن ایں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دمشق ءُ انقرہ ءِ میان ءَ ماسکو ءِ سر ءَ اوست دارگ ءَ ابید ھم سروک رجب طیب اردوغان ءِ یک مزنیں وکدارے ءَ شمبے ءِ روچ ءَ گوشتگ ترکی کجام ھم وھد ءَ زمینی بیڑانی برگ ءِ گمان ءَ دارگ اِنت-

عرب نیوز ءِ رد ءَ رجب طیب اردوغان ءِ ھارجہ پالیسی ءِ مشیر ابراھیم قالن ءَ گوشتگ امن ءِ واستا روس ءِ جھدانی متلب اے نہ اِنت کہ ترکی یک نوکیں مھمے ءِ راہ اِنت ایشی ءِ درگت ءَ بازیں ماھاں پیسر سرپدی دیگ بیت ھما وڑ ترک کنگ اِنت-

آئی ءَ اھوالکاراں گوں تران کنان ءَ گوشتگ کہ یک ترسے گندگ ءَ آں زمینی کاروائی کجام ھم وھد ءَ بیت کن اَنت ترکی ھچبر شام یا شامی شھریاں نشانگ نہ کنت-

روس ھردوکیں ھمساھگیں ڈیھانی میان ءَ دلرنجیاں ھلاس کنگ ءِ جھد ءَ اِنت اے جنگ ءُ جدال ھما وھد ءَ بنداگ بیتگ ات کہ شام ءَ وت ماں وتی جنگولاں ترکی ءِ پلامرزی ءِ گون اَنت ءُ ھمے جنگولاں سروک بشارالاسد ءِ تھت ءِ پروشگ جھد کتگ ات-

ھمے وھد ءَ ترکی ءَ گوریچانی شام ءِ سر ءَ اُرش ھم بندات کتگ ات ایشانی توک ءَ کرد لشکر کہ آیاں ترکی ناشرکار گوش ایت-

ابراھیم قالن ءِ درشان شامی سروک ءِ اے درشان ءَ دو روچ پد دیم ءَ اتکگ کہ آئی ءَ گوشتگ ات انقرہ ءِ گون ءَ دیم ءَ گپ ءُ تران ءِ مول ءُ مراد ھمیش اِنت شام ءِ لھتے بھراں ترکی وتی زورگری ءَ ھلاس بہ کنت-

گوریچانی شام ءَ ترکی ءِ لشکر ءِ بنجل اِنت ءُ آ سرکار ءَ دمگی جنگولانی پلامرزی ءَ ھم کنگ ءَ اِنت-

ترکی ءِ سروک ءَ سال دوھزار ءُ ھبدہ ءَ بشارالاسد ءَ را ناشرکار گوشتگ ات ترکی ءِ لس گچینکاری ءَ پیسر شامی رھشونانی گون ءَ گند ءُ نند ءِ واھگداری بیتگ بلے مئی ءِ ماہ ءَ داں بوگی اِنت –

اے درگت ءَ ابراھیم قالن ھردوکیں مردمانی میان ءَ ناگمانی سروکی ءِ نیاد ءِ چن ءُ لانچ ءَ کنگ ءَ اِنت –

روس ءَ یوکرین ءِ سر ءَ نوکترین میزائل اُرشاں شھری ءُ آبادی نشانگ کتگ اَنت چریشی ءَ چاردہ مردم بیران بیتگ اَنت ءُ شست ءُ چار زدگ بیتگ اَنت-

ھال سرکنوکیں ادارہ اے ایف پی ءِ رد ءَ اولسر ءَ روکپتی ڈیھ برطانیہ ءِ نیمگ ءَ یوکرین ءِ کمک ءَ جنگی ٹینکانی سر کنگ ءِ پیسلہ ءَ روس ءَ نوکتریں اُرش کرتگ اَنت-

زانگ بہ بیت روس ءَ اے بیھار پیسر ءَ داتگ ات کہ روکپتی ڈیھ یوکرین ءَ ٹینک مہ دے اَنت اگاں ناں جنگ ءِ جاور گیش ترند کنگ بنت-

روس ءَ شمبے ءِ شپ ءَ یوکرین ءِ بنجاھی شھر دنیپرو ءِ جھمنندی اپارٹمنٹس ءِ ماڑی ءِ سر ءَ میزائل اُرش کتگ چریشی ءَ پانزدہ سالی ئیں زھگے ءَ ھوار چاردہ مردم بیران بیتگ اَنت-

دنیپرو ءِ گورنر ءِ گوشگ اِنت اُرش ءَ شست ءُ چار مردم زدگ بیتگ اَنت چریشانی توک ءَ ھپت زھگ ھوار اَنت بیست ءُ شش مردم داں انگت ءَ بیگواہ اَنت-

یوکرین ءِ سروک ولادیمیر زیلنسکی ءَ گوشتگ کہ ماڑی ءِ دیوال ءِ چیر ءَ ھم مردم ھست بلے اشانی کچ گوشگ نہ بیت اِنت آئی ءَ گوشتگ بدبھتی ءَ بیران بیتگیں مردمانی کچ ھمک ادار گیش بوان اِنت-

سروک ءِ مشیر میخائیلو پودولیاک ءَ روس چہ میان اُستمان ءِ سلامتی کونسل ءَ درکنگ ءِ لوٹ ئِے کرتگ-

میزائل اُرشاں پیسر شمبے ءِ بیگاہ ءَ برطانیہ ءِ سروزیر رشی سوناک ءِ نیمگ ءَ درشان ءَ گوشگ بیتگ کہ آئی ءَ رھوتی ءِ وھد ءَ یوکرین ءِ سروک ءَ دو مزنیں جنگی ٹینک “چیلینجرٹو ” دیگ ءِ سدکی داتگ ءُ اے درشان ءَ پد روس ءِ بیڑ دیم ءَ اتکگ اَنت-

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُنُھ سد ءُ بیست ءُ یک روچ سرجم بوتگ انت – مروچی چہ کراچی لیاری ءَ عبدالوہاب بلوچ، دانشور اھوالکار عزیز سنگھور ءَ بنجل ءَ اتکگ ءُ دلپدردی درشان اِتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ گلامی ءِ درد مار اِتگ ءُ بلوچ سرڈگار ءِ سر ءَ تاکت ءِ زور ءَ ایردست کنوکیں پاکستان ءُ بلوچ راج ءَ گلام داروکیں تاکتانی بگیری ءَ ھنچین جھدے بندات کُتگ کہ مرگ وشھالی کاریت – بلوچ پرزندانی یل کنائینگ ءِ جھد ءَ سرجمیں جھان بلوچستان ءُ بلوچ ءِ سر ءَ باوست کنگ ءَ انت ءُ بازیں ملکاں اخلاقی پلامرزی ھم کُتگ –

آئی ءَ گوشتگ کہ بلوچ راج ءَ وشھالی ءِ ھاتر ءَ وتی زند، عیش نوشانی دیھونی داتگ – اے جھد تہ ءَ ریاست پاکستان ءَپنجاہ ءُ پنچ ھزار بلوچ زورانسری آوار جتگ ءُ بیگواہ کتگ کہ ریاستی بندیگ جاھانی تہ ءَ وتی زند ءِ ھاتر ءَ ناں بلکنہ بلوچانی وش وشھالی ھاتر ءَ وتی زند ءَ گوازینگ ءَ انت – وھدیکہ ھزارانی کچ ءَ بلوچ پرزنداں دیمھونی دیان ءَ ھمے کلوہ داتگ کہ مئے ھون ھمے واست ءَ مکدس انت کہ سرڈگار ءِ پرزندانی ھاتر ءَ رتکگ انت ناکہ کرسی ءُ نوکری ءِ ھاتر –

ماما قدیر بلوچ ءَ گوشتگ مروچی ھزاراں بلوچ ماتانی زھگ، گھارانی برات، زھگانی پت پچ گرگ بوتگ انت ھر گںس پرسیگ انت ریاستی ادارھاں کسان سالیں بختی ءَ بگر کماشیں نواب اکبر خان بگٹی ءَ.ھچ کس نہ بکش اِتگ – ریاستی زوراکیاں سرجمیں بلوچستان سُچگ انت ھچ کس پھریز نہ انت، لکانی کچ ءَ مردم در پہ دری زند گوازینگ ءَ لاچار بوتگ انت گڈا ھنگت اے وڈیں ساھتاں پدا وتی سر ءَ وت تپر جنگ ءِ بھر جوڈ بہ بئین – ھماھاں کہ مارا انچو درد داتگ دردانی الاج بیگواھیں مردمانی یل کنائینگ ءَ ابید دگہ ھچ نہ انت –

بلوچستان ءِ بنجاھی شھر شال ءَ ھوار دگہ ھند ءُ دمگاں آپ بادینوکیں سارتی برجاہ، وھدیکہ مکران ءَ گوریچ بے کساس کشگ انت ءُ سارتی ءَ چہ دھکانکارانی کشار سانمند بوگ ءَ انت – شال ءَ سارتی ءِ گیشی8— زیارت ءَ 15— وھدیکہ کلات ءَ 11— سربوتگ – سارتی ءِ برجاہ بوگ ءَ مردمانی گِس ءُ کشار، دگ ءُ نلانی تہ ءَ آپ بد اِتگ – گیس ءِ پریشر کم ءُ لین ءِ لوڈ شیڈنگ ءَ مھلوک دلسیاہ انت –

گیشیں ھالانی رِد ءَ بلوچستان ءِ دمگ شال، زیارت، کلات پنجگور، نوشکی نوکنڈی، دالبندین ءَ ھوار کیچ ءِ ھند ءُ دمگاں سارتی برجاہ انت بازیں دمگاں گوریچ ءِ کشگ ءَ سارتی چدوگیشتر بوتگ – بلوچستان ءِ گرمتریں ھند ءُ دمگاں ھم موسم سک سارت انت -دومی نیمگ ءَ سارتی ءِ گیش بوگ ءَ سوئی گیس بندی ءُ لین ءِ لوڈ شیڈنگ ءُ ھشکیں دار ءِ نھاد گران کنگ بوگ ءَ مھلوک دلسیاہ انت – دلبندین، نوکنڈی، تفتان ءُ چاگی ءَ ھوار سیمسری ھند ءُ دمگاں سارتی ءِ گیش بوگ ءَ مردم گِسانی تہ ءَ نشتگ ءُ گیشتریں دکان بند انت –

ھمے وڈ وڈ کیچ ءِ دمگ تربت ءُ کش ءُ کری ھند ءُ دمگاں گوریچ بے ھساب کشگ انت موسم سک سارت انت، مردم وتی گسانی تہ ءَ بند انت – سارتی ءِ سوب ءَ ھوشاپ بلیدہ ءُ دشت ءُ مند ءَ ھوار بازیں ھند ءُ دمگاں اے ھم ھال آیگ انت کہ گیشیں سارتی ءَ آپ بد اِتگ انت – چریشی ءَ دھکانکارانی کشار سانمند بوتگ انت –

زانگ بہ بیت کیچ بلوچستان ءِ گرم تریں دمگاں چہ یکے کہ اودا جون جولائی ماہ ءَ گرمی پنجاہ ءُ چار ڈگری ءَ سربیت اِنت –

روکپتی بلوچستان ءِ نیکراھی رھشون مولانا عبدالحمید بلوچ اسماعیل زئی ءَ گوستگیں روچ ءَ زاھدان ءَ مکی مسیت ءَ آدینگ ءِ نماز ءِ وھد ءَ سرکار ءِ پالیسیانی سر ءَ ایراد گپتگ-

آئی ءَ گوشتگ کہ مھلوک ءِ تہ ءَ شُد، گرانھادی ءُ بے اوستی ءِ نیمگ ءَ شُبینگ کنان ءَ گوشتگ کہ ھاکم تھنا یک ٹولی ءِ نیمگ ءَ مہ چار ایت آئی ءَ جیڑہ ءُ جنجالانی گیش ءُ گیواری ءِ ھیال دارگی اِنت ھرکس چارگی اِنت آ دشمن اِنت یا دوست –

مولانا عبدالحمید ءَ گوشتگ کہ زیردستیں مردمانی ھیال دارگی اِنت ھاکمانی سر ءَ پرز اِنت آ مھلوک ءِ سر ءَ انساپ بہ کنت اگاں ھاکم انساپ نہ کنت گڑا آئی ءِ سر ءَ مزنیں گناہ ایر بنت-

مولانا ءَ گوشتگ مھلوک زھرشانی کنگ اِنت اگاں مھلوک برانزی ءَ سر بیت گڑا ایشانی سر ءَ آئی ءَ اوپار دارگی اِنت – اھوالکار، زالبول، ورنا ءُ دراھیں پھناتانی مردم چہ سرکار ءَ ناوش اَنت الم زھرشانی کن اَنت-

آئی ءَ گوشتگ کہ جیڑہ تھنا دگ ءِ جوڑ کنگ ءُ گشینگ نہ اِنت بلکیں جیڑہ ءُ جنجال سک باز اَنت ءُ ایشانی تہ ءَ ھُرت چاری ءَ گون نگاہ دارگی اِنت-

آئی ءَ گوشتگ کہ اے جیڑھانی گیش ءُ گیوار پاھو یا زندان نہ اِنت – آئی ءَ گوشتگ ما تھنا اھل سنت ءِ بارو ءَ نہ جیڑیں ما دراھیں مردمانی بارو ءَ جیڑگ ءَ ایں ءُ انسانیت ءِ بارو ءَ جیڑگ ءَ اِنت-

بلوچستان ءِ تیابدپی شھر گوادر ءَ حق دو تحریک ءِ زھرشانی ءِ سر ءَ کریک ڈاؤن ءُ دزگیریاں پد کور کمانڈر بلوچستان آصف غفور ءِ تر ءُ تاب گوادر، جاورھالانی بارو ءَ ٹپاسکاری یے کتگ-

آصف غفور ءَ وتی تر ءُ تاب ءِ وھد ءَ دمگ ءِ سروک ءُ دمگی انتزامیہ ءَ گوں گند ءُ نند کتگ-

گوادر ءِ کماشیں رھشون واجہ سلیمان بلوچ ءَ گوشتگ کہ کورکمانڈر ءَ وتی گور ءَ لوٹائینتگ ءُ گوشتگ اگاں دوبر پورٹ ءُ ائیرپورٹ دگ بند کنگ بیت اَنت گڑا درستاں جیل ءَ بند کن آں-

آئی ءَ گوشتگ کہ ما اے گپ گشینتگ ءُ گوشتگ کہ دانکہ مئے لوٹ سرجم نہ بنت ما مولانا ءِ گون ءَ ھوار نندیں زھرشانی کن ایں-

سلیمان بلوچ ءَ گوشتگ کورکمانڈر ءَ وتی تر ءُ تاب ءَ من ءَ ھوار بازیں کونسلران کوسٹ گارڈ ءِ بنجل ءَ لوٹائینتگ اَنت ما ھمے سرپد بوتگ اِنت مئے جیڑھاں گیشنین ایت بلے مارا آئی ءَ بیھار داتگ ءُ زھرشانی نہ کنگ ءِ گوشتگ-

سلیمان بلوچ ءَ گوشتگ زھرشانی مئے ھک اِنت ءُ وتی ھکانی واستا زھرشانی کنان بہ این-

روکپتی بلوچستان ءَ بندیگیں یک بلوچے ایرانی آمیدگس ءِ ھکم ءَ پاھو دیگ بیتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ مزنیں زندان ءَ بندیگیں مردمے پاھو دیگ بیتگ-

پاھو دیگ بیتگیں مردم ءِ پجار اکبر شاہ بخش ء بایان جھمنند سورکورین زاھدان ءِ نام ءَ زانگ بیتگ-

ھالانی تہ ءَ گوشگ بیتگ کہ اکبر نشہ باپاری ءِ بھتام ءَ پاھو دیگ بیتگ بلے اے سرپدی نہ بیتگ کہ اکبر کدی ءُ کجام جاہ ءَ گرگ بیتگ-

روکپتی بلوچستان ءَ یکشل ءَ پاھو دیگانی درچ بندات اَنت ءُ ایشانی توک ءَ گیشتر مردم نشہ باپاری ءِ بھتام ءَ پاھو دیگ بیگ ءَ اَنت-