TBP Balochi

روکپتی بلوچستان ءَ ایرانی لشکر ءَ ھشت سالی ئیں مونا نقیب ءِ کوش ءِ بھتام ءَ آسپیچ سراوان ءَ دو کس دزگیری ءَ پد آیانی پجار دیم ءَ آورتگ اَنت –

روکپتی بلوچستان ءَ انسانی ھکانی واستا کار کنوکیں بلوچ کمپعن فعالین ءِ رد ءَ ایرانی لشکر ءَ آسپیچ سراوان ءَ ھشت سالی ئیں بلوچ جنکو مونا نقیب مراد ءِ کوش ءَ پد سَے کس دزگیر کتگ اَنت-

سَے کسانی تہ ءَ دو کسانی پجار مروچی دیم ءَ اتکگ کہ آیانی تہ ءَ عبداللہ ءُ عارف بلوچزئی ءِ ناماں زانگ بیتگ اَنت ھردوک رھمت ءِ زھگ اَنت آسپیچ ءِ نندوک اَنت ءُ سیمی کس ءِ پجار تنی وھدی کنگ نہ بیتگ-

مونا نقیب مراد بیست ءُ چار اکتوبر سال دوھزار ءُ بیست ءُ دو ءَ ماں سراوان ءَ یک تیرگواری ءِ آسر ءَ بیران بیتگ ات –

مونا نقیب ءِ بیران بیگ ءَ پد دمگی مردماں گوشتگ ات کہ مونا نقیب وانگجاہ ءِ گاڑی ءَ سوار بیتگ ءُ ھمے وھد ءَ ایرانی لشکر ءِ تیرگواری ءَ چہ آئی ءِ سر ءَ تیر لگ اتگ ءُ آ بیران بیتگ ات-

دومی نیمگ ءَ سیستان ءُ بلوچستان ءِ پولیس انتزامیہ ءَ گوشتگ کہ مونانقیب ءِ کوش ءَ ھواریں سَے مردم دزگیر کتگ اَنت-

ھمے درچ ءَ آسپیچ ءِ جھمنندین مردمانی گوشگ اِنت کہ ایرانی لشکر ءَ تچک ءَ اے گاڑی ءِ رندگیری کتگ کہ آیاں چار سد ءُ پنچ گاڑی ءِ گون بیتگ ءُ آیاں مسکونی ءَ تیرگواری کرتگ ءُ چریشی ءَ مونا نقیب بیران بیتگ-

دمگی مردمانی رد ءَ چرے تیرگواری ءَ پد اود ءَ ایرانی لشکر ءَ دو مردم دزگیر کرتگ ءُ برتگ اَنت-

ھالانی تہ ءَ گوشگ بیتگ کہ عبداللہ ءُ عارف بے کساس جنگ بیتگ اَنت ءُ چریشاں چہ آیاں اے گپ من اتگ ءُ کوش وتی سر ءَ لڈ اتگ-

ھالانی تہ ءَ گوشگ بیتگ کہ مونانقیب ءِ کھول ءَ گوشتگ کہ عارف ءُ عبداللہ ءَ اے کوش ءَ گوں ھچ دزمانجنی نیست اِنت ءُ ھچ چوشیں منانک درنیتکگ کہ اے ورنایانی سر ءَ کوش لڈگ بہ بیت-

زانگ بہ بیت روکپتی بلوچستان ءَ چریشی ءَ رند زاھدان ءَ ھم ھستی ناروی نامین ھپت سالی ئیں جنکوے ایرانی لشکر ءِ تیرگواریاں بیران بیتگ ات-

چریشی ءَ پد ایمنسٹی نیشنل ءَ ھم ھستی ناروی ءِ کوش ایر جتگ ءُ انساپ کنگ ءِ لوٹ کتگ اَت-

دنیا ءِ تہ ءَ درستاں مستریں آبادی داروکیں ڈیھ چین ءَ ششت دھکاں پد پدائشیانی تہ ءَ کمی گندگ اتکگ –

فرانسیسی ھالسرکنوکیں اداری اے ایف پی ءَ چینی سرکار ءِ کچ ءُ کساسانی درور دیان ءَ گوشتگ کہ یک اربے ءُ چل کروڑ آبادی داروکیں ڈیھ ءَ مردمانی مرگانی کساسانی دیم ءَ پیدائیشانی تہ ءَ کمی گندگ اتکگ زانتکار ایشی ءَ بژنیگی سما کنگ ءَ اَنت-

آیاں ھال دیان ءَ گوشتگ کہ اے ترندی ءَ ودی بوگانی توک ءَ کمی ءِ ایگ ءَ چاگردی دیمروئی ءَ سان کپت کنت پرچاکہ ایشی ءِ توک ءَ مردمانی تاکت ءِ توک ءَ کمی آیگ ءِ گمان اِنت-

بیجنگ ءِ نیشنل بیورو آف سٹیٹکس ءِ رد ءَ سال دوھزار ءُ بیست ءُ دو ءِ گڈسر ءَ چین ءِ آبادی کسانی لڑا یک ارب ءُ چل ءُ یک کروڑ بیتگ چوشکہ سال دوھزار ءُ بیست ءُ یک ءِ گڈسرا داں ھشت لک ءُ پنجاہ ھزار ءِ کمی ءِ ریکارڈ کنگ بیتگ-

اولی رند ءَ چین ءِ آبادی نوزدہ سد ءُ شست ءَ کمی گندگ اتکگ بیتگ آ وھد ءَ بازیں ناگیگانی دیمپانی کنگ کپتگ چریشی ءِ سبب ءَ ماؤ زیڈانگ ءِ کشت ءُ کشاری پالیسی گوشتگ چراھی ءَ چہ گریت لیپ فارورڈ ءِ رنگ ءَ گوشگ بیتگ-

پد ءَ چین ءَ ناگتی گیش بیوکیں آبادی ءَ نوزدہ سد ءُ ھشتاد ےَ ون چائلڈ پالیسی کنگ بیتگ بزانکہ یک زھگے ءَ گیش آرگ مہ بیت پد ءَ سال دوھزار ءُ شانزدہ ءُ بیست ءُ یک مرد ءُ زالاں سَے زھگ ءِ آرگ ءِ اجازت دیگ بیتگ-

بلے اے گام آبادی ءِ کم کنگ ءِ واستا بے سوبی ءَ گندگ بیتگ –

بلوچستان ءِ بُنجاھی شھر چہ شال ءَ پاکستانی پوج ءَ یک ورنایے آوار جتگ ءُ ناشناسیں جاھے ءَ برتگ-

گیشیں ھالانی رِد ءَ شال ءِ دمگ سریاب دگ ایریگیشن کالونی ءَ یہ کلی بنگلزئی ءَ عبدالخالق بلوچ ء غلام محمد قمبرانی نامیں ورنایے پاکستانی پوج دست ءَ بیگواہ کنگ بیتگ-

اِھوالکارانی رِد ءَ اے ورناہ یک درزے ءِ کہ پوج ءَ گوستگیں روچ ءَ بیگاہ ءِ وھد ءَ آئی ءِ دکان ءَ آوار جتگ ءُ بیگواہ کتگ-

کھول ءَ زورانسری آوار جنی ءِ گپ راست کتگ ءُ گْوشتگ کہ انسانی ھکانی ادارھاں گوں دزبندی کتگ کہ ورنائے یل کنائینگ ءِ ھاتر ءَ وتی کرد ءَ پیلو بکن اَنت-

اے ورناہ زورانسری آوار جنی ءِ بگیری ءَ توار چست کنوکیں ماما عبدالغفار قمبرانی ءِ برزاتک اِنت- عبدالغفار قمبرانی ءِ کھول ءَ چہ اشی ءَ ساری ھم جمیل سرپرہ زورانسری آوار جنی ءِ نشانگ کنگ بیتگ ءُ آ انگت بیگواہ ءَ اِنت-

زورانسری آوار جنگ بوتگیں عبدالحمید زھری ءِ لوگبانک ءَ کراچی پریس کلب ءِ دیم ءَ برجاھیں وائس فار بلوچ مسنگ پرسنز ءِ زھرشانی بنجل ءِ تہ ءَ وتی شنگ کتگیں تامری درشان ءِ تہ ءَ گوشتگ کہ اگاں منی لوگواجہ ءِ سر ءَ کتکاری ءِ الزام ءِ ھست گڑا زاھر کنگ ءُ آمیدگس ءَ آرگ بہ بیت –

عبدالحمید زھری ءِ لوگبانک فاطمہ بلوچ ءَ وتی تامری درشان ءِ تہ ءَ گوشتگ کہ آئی ءِ لوگواجہ عبدالحمید زھری پاکستان ءِ چیریں ادارہ ءُ سندھ پولیس ءَ چہ گِس ءَ آوار جتگ ءُ گوں وت برتگ – فاطمہ ءِ رِد ءَ پولیس ءَ ھمے گوشتگ کہ جست پُرس ءَ پد عبدالحمید ءَ واتر یل کن انت –

عبدالحمید زھری دھ اپریل سال دوھزار ءُ بیست ءُ یک ءَ چہ کراچی ءَ آوار جنگ ءُ بیگواہ کنگ بوتگ – عبدالحمید ءِ زورانسری آوار جنی ءَ پد آئی ءِ کھول ءَ دو سال انت کہ کراچی ءُ اسلام آباد ءَ ھوار بلوچستان ءَ وتی زھرشانی ءَ نبشتہ کنائینگ ءَ انت –

فاطمہ بلوچ ءِ گوشگ ات کہ لوگواجہ ءِ زورانسری آوار جنی ءِ بگیری ءَ پہ انساپ ءِ ھاتر ءَ آ بیگواھین مردمانی ھاتر ءَ جوڑ کنگ بوتگیں کمیٹی ءُ کمیشنانی دیم ءَ ھم پیش بوتگ، امیدگساں ارزی نبشتہ کنائین اِتگ بلے ھچ وڑیں شنوائی نہ بوتگ –

فاطمہ بلوچ ءَ انسانی ھکانی ادارہ ءُ سرکاری باسکاں چہ لوٹ کتگ کہ لوگواجہ ءِ یل کنائینگ ءُ آئی ءَ امساپ دئیگ ءَ وتی کرد ءَ پیلو بہ کن انت –

جنگ

نبشتہ کار: میار دَشْتی

دی بلوچستان پوسٹ

جنگ ھجبر گوں وتی سُبکّیں گاماں تئی در ءَ اَتک نہ کنت جنگ زور آرگ بیت ءُ تئی سر ءَ مُشگ بیت جنگ ءَ کس پہ بچکندیں دپے وش اَتک نہ کنت چیا کہ جنگ تباھی یے۔

جنگ تباھی یے جنگ بربادی یے جنگ در پہ دری یے جنگ جُتائی یے جنگ تھنائی یے جنگ مجبوری یے جنگ ننگ اِنت جنگ آبرو اِنت جنگ بِنداتیں جنگ آسر اِنت ءُ جنگ مَرگے ءِ نام اِنت ءُ جنگ ایمنی ءِ نام اِنت جنگ ھاموشی ءِ نام اِنت جنگ آزاتی ءِ نام اِنت، جنگ یک بلاھیں پُر بزانتیں لبزے ءُ لبز ءِ جنگ زوراک ءُ ایردست ءِ مَیان ءَ یک بلاھیں تپاوتے پیشدار اِیت۔

پد ءَ چُشکہ جنگ ایردست ءِ رھشون اِنت ءُ آئی ءِ کُمکّ اِنت ءُ اگاں کسے جنگ ءَ مہ منّ اِیت ءُ آئی ءِ پُژدر ءِ ایمنی ءَ سرگْوز بہ کنت ءُ راستی ایش اِنت کہ جنگ ءَ پیسر ایمنی ءِ لوٹوک تُرسوکے ءُ آ لگورے۔

اول ایشکہ آ راجے جنگ ءَ سِتک دل بہ منّ اِیت ءُ جنگ ءِ گَرز ءُ لوٹاں سرجم بہ کنت اَلّم آ راج سوبمَنْدی ءِ سیمسراں زیت سربیت چیا کہ وشھالی ، آزاتی ءُ وتواھی گوں جنگ ءَ بندوک اَنت آ راج ءَ کہ گوں جنگ ءَ مھر اِنت بزانکہ آئی ءَ گوں آجوئی ءَ مھر اِنت ، آجوئی لوٹوک گوں جنگ ءَ بندوک بنت ءُ جنگ ءَ پیسر ایمنی ءِ لوٹوک لگور گْوشگ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی وی ءُ تامرکاری جاھاں آروس ءِ بنگپ یک جوانیں بنگپے ءِ دروشم ءَ کیت اِنت –

ھمے سال ءَ بازیں ھندوستانی شوبز اسٹارزانی آروس بوگ ءِ گمان اِنت-

ھندوستان ٹائمز ءِ رد ءَ 21 داں 23 جنوری ءِ میان ءَ انڈین کرکٹر ءِ ایل راھُل ءُ سنیل شیٹی ءِ جنک عطیہ شیٹی آروس کنگی اَنت

بیا باریں نی چاریں اے دویناں ابید کَے کَے اے سال انڈین شرنگاں گوں وتی زندگی ءِ ھمسپر جوڑ کنت-

سدھارتھ ملھوترا ءُ کیارا ایڈوانی 2021 ءَ چہ یکے دومی ءَ دوست دارگ ءَ اِنت –

ھالرسان ءِ رد ءَ اے دویں تامرکار فروری ءِ اولی ھپتگ ءَ راجستھان ءَ آروس کنگی اَنت، سدھارتھ ءُ کیارا ءِ آروس ءِ یک دیوانے نئی دھلی ءَ ءُ دگہ یکے ممبئی ءَ بیگی اِنت-

ملائکہ اروڑا ءُ ارجن کپور

ملائکہ اروڑا ءُ ارجن کپور بالی وڈ ءِ نامی ئیں ازمکار اَنت ھردوک یکے دومی ءَ بازیں سالاں چہ دوستدارگ ءَ اِنت –

ھردوکیں نامی ئیں اسٹار ءِ آروس ءِ بارو ءَ دوھزار ءُ بیست ءُ دو ءَ امیت دارگ ءَ اَنت ءُ ھمے سال ءَ چاروک ءُ دوست داروک ھردوکاں آروس کنگ ءَ گند اَنت-

جیکی بھگنانی ءُ راکل پریت سنگھ

جیکی بھگنانی ءُ راکل پریت سنگھ دوھزار ءُ بیست ءُ دو ءَ یکے دومی ءَ دوستدارگ ءَ گندگ بیتگ اَنت چریشی ءَ پد ھردوک یکجاہ ءَ گندگ بیتگ اَنت-

گوستگیں سال ءَ وھدیکہ ھردوکاناں آروس ءِ بارو ءَ جست کنگ بیتگ گڑا اے پسو ءَ راکل پریت سنگھ ءَ مسکراھی ءَ گوشتگ ” اے درست بکواس اَنت ” بلے اے سال ءَ ھردوکانی آروس ءِ شیرنیاں دوست دارگ شاتمانی ءَ گند اَنت-

تیجران ءِ نام ءَ نامانیں تیجسوی پرکاش ءُ کرن کندرا انڈین ٹی وی انڈسٹری ءِ نامی ئیں جوڑی ءَ اَنت – اے دوینانی بارو ءَ گوشگ بوگ ءَ اِنت سال دوھزار ءُ بیست ءُ سَے ءَ گچینی پیسلہ کنوک اَنت-

تیجسوی ءُ کرن بگ باس ءِ سیزن پانزدہ ءَ یکے دومی ءَ دوست دارگ ءَ گندگ بنت-

ازمکار ودیوت جاموال ءُ فیشن ڈیزائنر نندیتا ماھتانی ءَ سال دوھزار ءُ بیست ءُ یک ءَ منگنی کتگ چریشی ءَ پد سال دوھزار ءُ بیست ءُ سَے ءَ ھردوکانی آروس ءِ گمان ءَ کنگ ءَ اَنت بلے ھردوکانی نیمگ ءَ دگہ راستی دیم ءَ نیتکگ اَنت-

بلوچستان ءِ جتاجتائیں دمگ ھب، نوکنڈی ، شال ءُ مستونگ ءَ دگ ءُ تیرگواری ءِ وئیل ءَ چار مردم بیران ءُ دو لاش دزکپتگ-

بلوچستان ءِ دمگ نوکنڈی ءَ بوتگیں دگ وئیل ءَ سے مردم بیران بیتگ اَنت-

وئیل نوکنڈی ءِ دمگ عیسی طاھر لانڈی ءِ نزیک ءَ زمیاد ءُ کسانیں گاڑی ءِ میان ءَ ڈک وارتگ اِت-

وئیل ءَ بیران بیتگیں مردمانی پجّار محمد حیات، نعمت اللہ ءُ ایاز ناماں چہ بیتگ اَنت-

وئیل ءَ بیران بیتگیں مردمانی سیادی چہ نوشکی اھمد وال ءُ ھاران ءَ گْوشگ بیگ ءَ اِنت- ھرسئیں مردمانی لاش نوکنڈی نادُراھجاہ ءَ برگ بیتگ اَنت-

بلوچستان ءِ باپاری شھر ھب ءِ ھند گلشن امیر آباد نزیک ءَ ناشناسیں مردمانی تیرگواری ءَ چہ یک مردمے ٹپی بیتگ ءُ پد ءَ آئی ءَ ٹپانی درد نہ سگ اِتگ ءُ بیران بیتگ-

بیران بیتگیں مردم ءِ پجّار سیف اللہ مینگل پنّام ءِ سونا ء عبدالرحمن مینگل نام ءَ چہ بیتگ ءُ کوش سوب زانگ نہ بیتگ-

ھمے مستونگ کھڈکوچہ ءِ نندوک ظھور احمد ء مولوی ابدالغنی کہ آئی ءِ سر ءَ نا وشیں مردمے بیتگ کہ گْوستگیں چیزے روچ ءَ چہ بیگواہ بیتگ ، لاش مروچی چہ آماچ ڈیم ءَ دزکپتگ-

مستونگ انتزامیہ ءِ رِد ءَ اے مردم ءِ مرگ سارتی ءِ سبب ءَ بیتگ-

ھمے وڑ شال ءِ دمگ مری آباد کبرستان نزیک ءَ چہ یک مردمے ءِ لاش دزکپتگ کہ آ نادُراھجاہ ءَ برگ بیتگ انتزامیہ رِد ءَ اے مردم نشہ آماچیں مردمے بیتگ-

لاش گیشیں چار ءُ ٹپاس کنگ ءَ پد مردگ جاہ ءَ ایر کتگ-

گوستگیں شپ ءَ تربت پولیس ءَ بلوچی زبان ءِ شائر ارشاد پرواز دزگیر کُتگ – چاگردی ترامجاھاں ھر تک ءُ پھناتاں سیادی داروکیں مردمانی نیمگ ءَ آئی ءِ دزگیری ءُ کم شرپی ءِ ترندی ءَ گوں ایر جنگ بوگ ءَ انت –

وتی دزگیری ءِ درگت ءَ ارشاد پرواز ءَ وتی فیس بُک تاک ءَ نبشتہ کُتگ’ تُربَت پولیس ءِ منی سر ءَ کامیابیں آپریشن، دوشی شپ ءَ ادار نُھ ءَ من چہ دوستانی دیوان ءَ پاد اتکاں وھدے لوگ ءِ نزیک ءَ سر بوتاں گڑا ھوشو ءِ فون ات ابا پمن مئیگی گیپتگ من گشت اناں من بے ھیالاں ھوشنگ ءَ گشت اناں ابا پد ءَ برو بازار ءَ بگر بیا گڑا من اشتاپ اشتاپ واتر بوتگ ءُ مارکیٹ ءَ دوکان ءِ دپ ءَ دگ ھالی ات سرد ات سک ءَ پمیشکا اشتاپی ءَ منی گاڑی ءِ یک ٹائرے دوھمی دگ ءِ سرا کمو بوت اے وھد ءَ بازار ءَ ھچ رش نہ ات من چاراں رمبے پولیس دور کنگ ءُ کائی بوت گاڑی اش چپ ءُ چاگرد کت کوکار لگ ات انت – برز کدیں آپسری سپاھیگے پرس اِت کہ اے گاڑی کئی انت من گشت منی انت گش ایت براں تھانہ ءَ من گشت براں دومی آپسر گاڑی تہ ءَ منی کش ءَ نشت گوں ھما برز کدیں سپاھیگ ءَ پد ءَکوکار ءَ لگ ات موبائیل ءَ بند کن زبردستی منی موبائیل پچ گپت من ءَ تھانہ ءَ بُرت اِش – تھانہ دگہ پولیس کارمندے ءِ گور ءَ من موبائیل پچ گپت وتی سنگت ءِ پون کُت آ اتک گڑا گیٹ اش بند کت گشیت صاحب ءِ ھکم انت تہ ءَ کس مئیت انت‘ –

آئی ءَ دیمتر ءَ نبشتگ کہ تھانہ ءِ تہ ءَ ھمے برز کدیں اپسر ءُ دو سپاھیاں کہ دیم اش بند بوتگ آھاں من ءَ سک جتگ ءُ گوں من فٹبالی گوازی ءِ کُتگ – دراھیں دنیا زانت کہ ارشاد شاعرے
بس ھمے یکین من ءَ تُربَت نزانت-

آئی ءَ گوشتگ مئے واجھیں سْیاست داناں وتی ھلک ءِ مردم دوست نہ بنت باریں چہ کجا ڈنی مردم کار انت من دوشیگیں مردماں ھمے سپاھیانی کم شرپی سوب ءَ وت نزاناں چی بہ کناں کجا چی وتی ازت ءِ جست ءَ بہ کناں-

اے درگت ءَ آئی ءَ بلوچی شَیرے ءِ یک بندے ءَ وتی چو اے پیم ءَ درشان کتگ اَنت “اے شر ءَ کور سروکاں ءُ کور راھدربر”
“گلگ کنے نہ کنے شر چراگ تھنا انت”

چاگردی ترامجاھاں ارشاد پرواز ءِ دزگیری ءُ آئی ءِ کمشرپ کنگ ترندی ءَ گوں ایرجنگ بوگ ءَ انت – اے درگت ءَ بلوچستان اکیڈمی آف لیٹریچر ءُ ریسرچ (تربت) ءَ پولیس نَپرانی نیمگ ءَ بلوچی ءِ مزن نامیں شاعر ءُ بلوچستان اکیڈمی ءِ پیسریگیں سرکماش ارشاد پرواز ءِ دزگیری ترندی ءَ گوں ایرجتگ ءُ ڈی پی او کیچ کڈّن کتگ ءُ گُوشتگ کہ ارشاد پرواز ءِ دزگیر کنوکیں نپرانی ھلاپ ءَ تُرندیں گامگیج چست بکن انت –

آئی ءَ گوشتگ کہ دوشی بزاں 14جنوری 2023 ءَ شپ ءَ تربت پولیس ءِ نپراں بلوچی ءِ نامداریں شاعر ءُ بلوچستان اکیڈمی ءِ پیسریگیں چیئرمین ارشاد پرواز وھدے کِشک ءِ لَمب ءِ دکان ءَ پہ سودا ءِ بھا زورگ ءَ چہ وتی گاڑی ءَ ایر آیگ ءَ بوتگ کہ تربت پولیس ءِ نپراں گوں ارشاد پرواز ءَ ترپلی کتگ ءُ تُرندیں ھبر گشتگ، وھدیکہ ارشاد پرواز ءَ آھانی ھبرانی اَوَز کتگ گڑاں پولیس نپراں آئی ءَ را دزگیر کتگ ءُ تربت سٹی تھانہ ءَ برتگ بند کتگ، پد ءَ ادارے ءَ پَد یلہ داتگ –

بلوچستان اکیڈمی ءَ گشتگ کہ ارشاد پرواز یک وانندہ، ذمہ دار ءُ سنگین ئیں مردمے ءُ چہ بلوچیءِ نامداریں تریں شاعراں یکے، اَبید چہ گناہ ءُ جرمے ءَ، مُپت ناہُودگ ءَ یک ھانوادہ ءُ پُرایمنیں ءُ ذمہ داریں مردم ءُ نامداریں شائرے ءِ گون ءَ سُبکی ءُ بدتمیزی کنگ ءُ پد ءَ مُپت ناھودگ ءَ دزگیری پہ لبزانت نبشتہ کار ءُ زبان ءُ ادب دوستاناں دل پدرد ءُ نابکارے ھالے، ءُ پولیس ءِ چہ کانودی رھبنداں چے سرگوزیں اے کرد ءَ لس مھلوک ءَ را ھم پُربرانز ءُ چہ پولیس ءَ گیشتر بد دل کتگ، ءُ پولیس ءِ اے وڑیں کرد ءُ کارپد اے پہ کیچ ءِ چاگرد ءُ دمگی واکداراں جوانیں پالے نہ اِنت –

آئی ءَ گوشتگ کہ بلوچستان اکیڈمی ارشاد پرواز ءِ دزگیری ءَ را سَک ایر جنت ءُ ڈی پی او کیچ ءَ را کڈّن کنت ءُ گُشیت کہ ارشاد پرواز ءِ دزگیری کنوکیں نپرانی ھلاپ ءَ تُرندیں گامگیج چست کنگ بہ بیت، اے ھم پکّا کنگ بہ بیت کہ دیمتر ءَ پولیس چہ قانود ءَ سرگوزیں اے پیمیں بیشکاریں ءُ سبکیں کاراں چے وتارا رکّینیت ءُ دُور دار ایت-

سندھ ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، اے دراج کشیں زھرشانی بنجل ءَ مروچی چار ھزار ءُ نُھ سد ءُ بیست ءُ دو روچ سرجم بوتگ انت –

مروچی چہ ملیر کراچی ءَ سیاسی ءُ چاگردی باسک داد محمد بلوچ ءُ سراج بلوچ ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءِ گوشگ ات کہ ریاستی مشینری ءِ بھر بؤوکیں بلوچ بلوچ راج ءِ گلامی ءَ گیش کنگ ءُ ریاست ءَ مھکم کنگ ءِ سر ءَ کار انت – آھاں بلوچ ءِ درد ءُ رنجانی ھچ مارشت نیست ، آھاں گوں ھما مات ءُ گھاراں ھچ وڈیں واستہ نیست کہ آھانی دوستیگیں مردم ریاست ءَ ژانگول کُتگ نمیران کتگ انت آ بس وتی ھاکمانی ھکم ءَ ھو ھو کن انت ءُ وتی پگار ءَ ھلال کنگ ءَ انت بلے بلوچ راج آھانی درسیں رپک ءُ ھنراں سرپد ءُ زانت ءُ ھپتاد پنچ سالی زمزیلاں شری ءَ سرپد انت –

ماما قدیر بلوچ ءِ گوشگ ات کہ تنی وھدی ریاست ءَ بید رزوائی ءَ دگہ ھچ نہ رستگ – ریاستی کارمند گسانی تہ ءَ دور کنگ ءَ انت بلوچ ءِ چادر ءُ چاردیوالی ءَ لگتمال کنگ انت ءُ بلوچ ورنایاں آوار جنگ ءُ بیگواہ کنگ ءَ انت ءُ سی ٹی ڈی دروگیں میڑے نام ءَ بلوچاں شھید کنگ انت بلے بلوچ راجی زرمبشت وتی منزل ءِ نیمگ ءَ روان انت ما ھمے زان ایں کہ ھمیشی ءِ تہ ءَ بلوچ رک اِت کنت –

آئی ءَ دیمتر ءَ گوشتگ کہ مارا ھچ وڈیں لب ءُ ملام نلوٹیت ما ھما شھیدانی وارس انت کہ آھاں وتی دوستیگیں مردمانی یل کنائینگ ءُ سرڈگار ءِ رکینگ ءَ وتی جانانی دیمھونی داتگ وھدیکہ ھما مردم کُشندہ ٹولی نام ءَ دلاری کنگ ءَ انت ءُ ریاستی ایجنڈہ ءِ سر ءَ بلوچاں آوار جنگ ءُ آھاں شھید کنگ ءَ انت آ راج ءِ گوم ءَ دلاری کنگ ءَ انت کہ ھچ وڈیں زانشت داریں انسان آھاں اوپار کُت نہ کن انت –

ماما قدیر بلوچ ءَ گڈسر ءَ گوشتگ کہ کشندہ ٹولی ءَ بھر بؤوک ھما شھیداں الم یات بہ کن انت کہ آھاں بس ءُ بس وتی سرڈگار ءُ پرزندانی یل کنائینگ ءَ جھد کتگ –

اسپورٹس کمپلیکس ڈیرہ مراد جمالی ءَ نصیر آباد ءِ راجدپتر ءِ تہ ءَ اولی رند ءَ اَپس سواری ءِ مُچی یے برجم دارگ بوتگ کہ اودا نصیرآباد ءَ ھوار چہ سندھ ءَ مزنیں کچے ءَ اَپس سواراں بھر زرتگ –

اے مُچی ءَ سید احمد شاہ، سید اکبر علی شاہ، ءُ سید یعقوب علی شاہ، وڈیرہ احمد نواز جتک ءَ ھوار سندھ ءُ بلوچستان ءِ کماش ءُ دمگی مردماں مزنیں کچے ءَ بھر زرتگ ءُ شاتکامی کتگ –

اپس سواری ءِ راجدپتری مُچی ءَ اپس ءِ دوست داروکاں وتی اپس تاچین اِتگ انت ءُ سوبمندی گپتگ – سوبمند بوتگیں اپس سوار داد ھم دیگ بوتگ انت –

اپس سواری ءِ مُچی ءَ دمگی مردمانی گوشگ ات ھمے دابیں مچی ھر سال برجم دارگ بہ بنت – بلوچستان ءِ سرکار ءُ نصیرآباد ءِ واکداراں ھم لوٹیت کہ اے وڈیں مراگشاں دیمروئی بہ دئینت ءُ آھانی کمک ءَ بہ کن انت ءُ اپس سوار دلبڈی دیگ بہ بنت تاکہ دیمتر ءَ وتی شوک دلجم بہ بنت –