TBP Balochi

گوستگیں روچ ءَ کیچ ءِ دمگ ھوشاپ ءَ پاکستانی پوج ءِ گون ءَ بیران بیتگیں مردمانی پجار بیتگ-

بیران بیتگینانی تہ ءَ امام ء مسکان جھمنند تجابان، رضائی ء واھد بکش جھمنند سری کرکی، یحییٰ ء آسمی جھمنند پسنی ءُ ممتاز ء گزی جھمنند پرکوٹگ ھوشاپ ءِ ناماں زانگ بیتگ اَنت-

زانگ بہ بیت گوستگیں روچ ءَ کیچ ءِ دمگ ھوشاپ ءَ پاکستانی پوج ءُ سلاہ بندیں مردنانی میان ءَ ترندیں جنگ ءُ چوپے بیتگ ات ءُ جنگ ءُ چوپ ءَ چار کس بیران بیتگ ات اَنت ءُ آیانی لاش لیویز ءَ تربت سول ھسپتال ءَ آورتگ ات اَنت-

پاکستانی پوج ءِ جارکش ءَ اے جنگ ءِ راستی کتگ اَت ءُ چار مردمانی جنگ ءِ ھال شنگ کتگ ات –

دومی نیمگ ءَ دمگی مردمانی گوشگ اِنت بیران بیتگیں مردمانی سیادی آجوئی دوستیں گلان اِنت بلے داں انگت ءَ آیانی نیمگ ءَ ھچ گپ دیم ءَ نیتکگ اَنت-

یوکرین ءِ شھر دنپرو ءَ روسی میزائل اُرشاں کپتگیں ماڑی ءَ بیران بیتگیں مردمانی کچ چل ءُ پنچ ءَ سر بیتگ دگہ بیست مردم بیگواہ اِنت-

فرانسیسی ھال سر کنوکیں ادارہ اے ایف پی ءِ رد ءَ سَے شمبے ءُ چار شمبے ءِ میانی شپ ءَ بیتگیں اُرش ءَ پد یوکرین ءَ روکپتی ڈیھاں سلاہ دیگ ءِ دزبندی کتگ-

ھمے وڑ ءَ اولی رند ءَ یوکرین ءِ آرمی چیف ویلری زلوزنی ءَ پولینڈ ءَ امریکہ ءِ جوائنٹ چیف آف اسٹاف ءِ سروک مارک ملی ءَ گون گند ءُ نند کتگ-

یوکرین ءِ واکدارانی گوشگ اِنت ماڑی ءِ سر ءَ اُرش ءَ بیران بیتگیں مردمانی تہ ءَ شش زھگ ھوار اَنت کہ ایشانی توک ءَ یکے ءِ اُمر یازدہ سال اِنت-

شمبے ءِ روچ ءَ بیوکیں اُرش فروری ءَ جنگ ءِ بندات ءَ بگر داں انیگ ءَ درستاں مستریں اُرش لیکگ بوگ ءَ اَنت-

یوکرین ءِ واکدارانی گوشگ اِنت اُرش ءَ ھپتاد ءُ نُھ کس زدگ ھم بیتگ دومی نیمگ ءَ کرملن ءَ اے اُرش ءِ زمہ واری زورگ نہ من اتگ-

اُرش ءَ بیران بیتگیں مردمانی تہ ءَ دنپرو ءِ باکسنگ کوش میخائلو کورینوسکی ھم ھوار بیتگ کہ آئی ءِ گڈی منزل ءَ سدانی کچ ءَ مردماں بھر زرتگ-

میخائلو کورینوسکی ءَ چہ دربروکین باکسر ءِ پت ءَ ھمے وھد ءَ اے ایف پی ءَ گوں گوشتگ کہ آ یک لیجنڈے بیتگ ءُ آئی ءَ وتی زند ءَ بازیں مردم ھیل داتگ اَنت مروچی من تہ ءَ چہ پروشتگ آں –

یوکرین ءِ سروک ولادیمیر زیلنسکی ءَ یک رندے پد ءَ ترندی ءَ گوں گوشتگ کہ ھرکس ءَ اے ناشری بندات کتف آ درگیجگ بیت اِنت ءُ چراھی ءَ چہ ھساب ءُ کتاب کنگ بیت اِنت-

مھکمہ ایمرجنسی سروسز ءَ سَے شمبے ءُ چار شمبے ءِ میانی شپ ءَ دیوال ءِ شوھاز سرجم کتگ ءُ پد ءَ آئی ءِ نیمگ ءَ گوشگ بیتگ داں انگت ءَ بیست مردم بیگواہ اَنت-

دومی نیمگ ءَ ماسکو ءَ ھم دنپرو ءِ اُرش ءَ بیران بیتگیں مردمانی پرس داشتگ ءُ اود ءَ لھتے مردماں یوکرین ءِ نامی ئیں شائر لیسیا یوکرینکا ءِ یات ءَ پُلانی درشانی کتگ-

کتاب: مھر گوش ءِ سر ءَ چمشانکے

نبشتہ کار: میرو مری

دی بلوچستان پوسٹ

کتاب مھر گوش بلوچ لبریشن آرمی ءِ سروک واجہ بشیر زیب بلوچ ءِ اولی کتاب انت اے کتابے نبشتانک مارچ 2016 تا مارچ 2017 ءِ سیاسی جھل ءُ برزیانی سر ءَ آئی ءِ نبشتانک انت اے کتاب ءِ درستی 176 تاک دیم انت کہ ایشی ءِ توک ءَ نبشتہ کار ءَ ھمے سیاسی جھل ءُ برزیانی ءَ نپسیات ءِ علم ءِ رد ءَ گیش ءُ گیوار کنگ ءِ جوانیں جھدے کتگ ءُ وتی ھیال ءُ لیکہ یک کتابے ءِ دروشم ءَ وتی راج ءِ دیم ءَ آؤرتگ انت اے کتاب ءِ اولی بھر مئے دست ءَ اتکگ ءُ ایشی ءِ دومی بھر گمان بیت کہ دیمتر ءَ بلوچ راج دیم ءَ کئیت انت-

کتاب ءِ اے اولی بھر ءَ جتا جتائیں سرھالانی سر ءَ نبشتہ کنگ بوتگ کہ من نوں چندیں نبشتانکانی سر ءَ وتی ھیال ءُ لیکھاں نبشتگ کنگ ءِ جھد ءَ کن آں –

اولی نبشتانک ” سنچ ءُ مکسد ءِ ” سر ءَ نبشتہ بوتگ اے نبشتانک ءِ توک ءَ آ گش ایت کہ سنچ پہ مکسد ءَ بیت ءُ پہ مکسد ءِ واستا یک مھکمیں سِنچے ءِ بوھگ ھژدری انت پد ءَ زانت ءُ سرپدی ءِ ھمے مکسد ءِ دیمروئی ءَ کنت ءُ پہ وتی منزل ءِ سر بوھگ ءِ ھاترا ترا یک تچکیں راھے گچین کنگی انت ءُ ھر وھد ءَ امل کنگی انت یکمشت ءُ یک سنچے ءِ ٹولی ءَ وتی منزل ءِ رسگ ءَ پہ یک جوانیں ءُ دور چاریں رھشونے ءِ سروکی الّمی انت- یک توانگریں ٹولی ءِ لوٹ ایت کہ آ وتی رھشون ءِ ھمراھداری ءَ بہ کن اَنت وھدیکہ یک رھشونے گوں وتی توانگریں ٹیم ءَ یک توانائیں ڈسپلن Displine ءِ گوں بندوک بیت گڑا منزل ءِ سر بوھگ ءَ ارزانی بیت ءُ تنگی کم بنت ءُ ھمے کل یک پارٹی ءِ گشگ بنت-

امیت ءُ بھیسہ ءِ سر ءَ وتی ھیالاں درشان چو اے وڑ ءَ کنت کہ، انسان ءِ اولی پدیانک چہ امیت ءَ بنا بیت ءُ پد ءَ آ دیم ءَ جنز ایت ءُ کار کنت آ وتی راجی جھد کار ءُ بلوچ مھلوک ءَ گش ایت کہ ھچ کس ءَ اے ھک Right ءَ مہ دے کہ آ ترا نا امیت بہ کنت ءُ ترا چہ تئی لوٹ ءُ کاز Cause ءَ دلپروش بہ کنت چیا کہ امیت ءِ ھلاسی انسان ءِ زند ءَ گوں بندوک انت وھدیکہ یک انسانے ءِ امیت ھلاس بہ بیت یا چرائی ءَ چہ پچگرگ بہ بیت تا انسان تھنا یک زندگیں جونے بیت ءُ مان ایت-

بلوچ جھد کارانی سپر یک نہ اوشتوکیں کاروانے، آئی ءِ اوشت تھنا گوں بلوچ زمین ءِ آجوئی ءَ بندوک انت اے دراجیں راہ ءَ ھر وڑیں تنگی ءُ نزوری دیم ءَ کاینت اے نزوری ءُ کوتاھی ءُ تنگیاں یک جھد کارے ھما وھد ءَ وتی ھکّ ءَ کنت کہ آ سرجم ءَ زھنی دروشم ءَ آزات بہ بیت ءُ زانت ءُ سرپدی ءَ مھکم بہ بیت-

اگاں دیم ءَ جیڑھے اتک گڑا ھمک کس ھمے جیڑہ ءِ سائنسی بنیاتاں چار ءُ تپاس ءِ جھد ءَ بہ کنت ءُ جیڑہ ءِ گیش ءُ گیواری ءَ بہ کنت نا کہ دلپروش بہ بیت- راجی جنز ءِ راہ ءَ دلپروشی ءِ ھچ جاہ نیست اِنت-

تُرس ءِ باروا واجہ وتی دُرّیں دانکاں نبشتہ کنت ءُ گش ایت کہ تُرس ءِ دگنیا ءِ تھاریانی آماچ انت ترس مدام انسان ءِ بودشت ءُ آئی ءِ مھکمیں پیسلھانی دیم ءَ کئیت ءُ اوشت ایت نپسیات ءِ زانت ءِ رِد ءَ ترس ءِ دو تھر انت اولی تھر وتی رکّینگ ءِ ترس انت ءُ دومی تھرے ترس لگوری انت ءُ باز براں رکینگ ءِ ترس وھدے وتی سیمسراں چہ درکپ ایت داں آ لگوری گشگ بیت ءُ لگور نہ پہ وت چیزے کت کنت ءُ نہ کہ وتی راج ءُ زمین ءِ ھاترا-

بلوچاں گوشتگ کہ یکّیں پتّر ءَ گوات بارت تو ھور ءِ یکمشت ءُ ھمسنّتے گڑا تو بدواھاں پروش دات کن ئے اگاں شنگتگے ءُ نا تپاکے تاں بدواہ ترا اّلم پروش دنت-

مولوی عبداللہ پیشنی ءَ گوشتگ کہ:

“اے بلوچاں اتھاد”
“پہ وشیں روچاں اتھاد”

گڈسراں نبشتہ کار (واجہ بشیر زیب) ءَ وتی راجی جھد کار ءُ بلوچ راج ءَ لوٹ کرتگ کہ آ چہ شھیدانی کھولاں بے ھیال مہ بنت، آوانی تؤکل جوڑ بہ بنت ءُ آھاں دلبڈی بہ دے اَنت-

پہ بلوچ ماتاں وتی کلوہ ءَ نبشتہ کنت ءُ گش ایت کہ اے منی مکھیں ماتاں تئی کنگریں بچّانی ھون ءِ بیر ءَ راجی سرمچار ھر روچ گوں بدواھاں گرگ ءَ انت ءُ جنگ کنگ ءَ انت. ما چہ شھیدیں بچّانی ھوناں ھچبر شمشکار نہ بہ ایں-

“جور بیت جور جوابی بدیں جورانی دپ ءَ”

اے چندیں نبشتانکانی سر ءَ منی ھیال ءُ تران ات انت البتہ! سرجمیں کتاب وانگ کرز ایت ھر بلوچ وانندہ اّلم اے کتاب ءَ بوان ایت-

بلوچ ءِ جنز توانگر بات شالا
بلوچستان آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھندوستان ءِ سر وزیر نریندر مودی ءَ وتی باسکاناں ڈیھ ءَ نندوکیں جتاجتائیں پرکہ ایشانی توک ءَ گچینی پہ مسلمانانی بارو ءَ نزیک بیگ ءِ سَلاہ داتگ –

انڈین ھال سرکنوکیں ادارہ اے این آئی ءِ رد ءَ بنجاھی شھر نئی دھلی ءَ یک نیادے ءَ تران کنان ءَ سر وزیر نریندر مودی ءَ سرجمیں ڈیھ ءِ بارو ءَ گپ کتگ لوک سبھا ءِ گچینکاری ءَ پیسر بھارتیہ جنتا پاٹی ( بی جے پی) ءِ مھکم کنگ المی اِنت-

تران ءِ وھد ءَ سر وزیر نریندر مودی ءَ گوشتگ ات کہ پشکپتگیں مسلمان، بوھرہ برادری، جتائیں پھناتاں سیادی داروکیں ونندگیں مسلمانین ورنیاں گند ءُ نند بہ کن اَنت بلے ووٹاں ابید-

نریندر مودی ءَ گوشتگ کہ بی جے ہی ءِ باسکاں سال دوھزار ءُ بیست ءُ چار ءَ گچینکاری ءِ مھم ءِ درچ ءَ مسیحی برادری ءِ ابادتگاھ ءُ وانگجاھاں تر ءُ تاب کنگ ءِ سَلاہ داتگ ءُ گوشتگ کہ سرجمیں ڈیھ ءِ سرجمیں ریاستاں کار کنگ ءُ یکے دومی ءِ دودمان ءِ دیم ءَ برگ ءِ درکار اِنت-

گوستگیں بازیں ھپتگاں چہ بی جے پی ءُ انڈیا ءِ دگہ راستیں دستکاری پاٹیانی نیمگ ءَ بالی وڈ ءَ جوڑ بیوکیں بازیں تامرانی سر ءَ ایراد گرگ ءَ اَنت –

پاٹی ءِ رھشونانی نیمگ ءَ ھم ھمے زوتاں شاہ رخ خان ءُ دیپیکا پاڈوکون ءِ نوکیں تامر “پٹھان ” ءِ سر ءَ ایراد گرگ ءُ آئی ءَ چہ بائیکاٹ کنگ ءِ دزبندی ءَ کنگ ءَ اَنت-

سر وزیر نریندر مودی ءَ گوشتگ کہ تامر یا ازمکارانی نام ءِ گرگ ءَ ابید باسک سرپد کتگ اَنت تامرانی وڑیں بے کاریں جیڑھانی سر ءَ گیر زلوری درشاناں چہ پھریز بہ کن اَنت پرچاکہ ایشی ءَ چہ بی جے پی ءِ دیمروئی ءِ جھلک پشت کپ ایت-

بلوچستان ءِ دمگ مستونگ ءَ گیس ءِ پریشر ءِ کمی ءُ بندی ءِ بگیری ءَ دمگی مردماں جنگل کراس ءَ شال تاں کراچی ءَ رؤکیں شھدگ بند کُتگ ءُ زھرشانی کتگ –

زھرشانی ءِ سوب ءَ شھدگ سرجمی ءَ بند بوتگ ءُ ھردو نیمگاں گاڑیانی رش لگ اِتگ مردم جنجالی بوتگ انت –

گیشیں ھالانی رِد ءَ مستونگ ءِ دمگ کلی ھزار خان، کلی تیری ءُ کش ءُ گور ءِ دمگی مردماں سارتی ءِ گیشی ءَ گیس پریشر ءِ کمی ءُ بندی ءِ بگیری ءَ شھدگ بند کتگ ءُ زھرشانی کتگ –

درنگاز کنوکانی گوشگ ات کہ گیس ءِ کمی ءِ سوب ءَ.مردم دلسیاہ انت ءُ گیس ءِ نہ بوگ ءِ سوب ءَ دمگی مردم سارتی ءَ رکگ ءُ گِس ءِ ھاتر ےَ باگ ءُ جنگلانی درچکاں بُرگ ءُ وتی زلورتاں سرجم کنگ, ءَ انت چریشی ءِ سوب ءَ باگاں تاوان بوگ ءَ انت –

درنگاز کنوکانی گوشگ ات کہ سوئی سدرن گیس کمپنی ءِ واکدار گیس پریشر ءِ کمی ءُ بندی ءِ ھاتر ءَ گامگیج بہ زور انت گیس سر بہ کن انت تانکہ مردمانی جیڑہ کم بہ بنت – اگاں ھمے وڈ برجاہ بیت گڈا ما لاچار بہ ایں ترندیں زھرشانی بہ کن ایں ءُ جاورھالانی زمہ وار واکدار بہ انت –

واکدارانی باور کنائینگ ءَ پد درنگاز کنوکاں وتی زھرشانی ھلاس کتگ واتر بوتگ انت ـ دگ پچ کنگ بوتگ-

سربوتگیں ھالانی رِد ءَ گوستگیں روچ ءَ بزاں شانزدہ جنوری ءَ ناشناسیں سلاہ بندیں مردماں پاکستانی پوج ءِ دو پانگسانی سر ءَ اُرش کُتگ –

سلاہ بندیں مردماں اولی اُرش مشکے ءِ ھند جکی ءَ،دومی اُرش ملشبند ءَ پاکستانی پوج ءِ برجاھیں پانگسانی سر ءَ کتگ، اُرشانی آسر ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ – ھردو اُرشانی زمّہ واری بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام ءِ رِد ءَ شانزدہ جنوری ءَ روبرکت ءِ وھد ءَ مئے سرمچاراں مشکے ءِ ھند جکی ءَ برجاھیں پاکستانی پوج ءِ پانگسے ءِ سر ءَ گوں راکٹ ءُ مزنیں سلاھاں اُرش کرتگ چریشی ءَ دو پوجی کارمند مرتگ انت ءُ سَے زدگ بوتگ انت –

جارکش ءَ گوشتگ کہ اے اُرش ءَ ادارے ءَ پد سرمچاراں ملشبند ءَ ھم پاکستانی پوج ءِ پانگسے سر ءَ دور جنگیں توپک ءَ گوں یک کارمندے ءِ نشانگ کنگ ءُ کُشگ ءَ پد پانگس ءِ سر ءَ گوں مزنیں سلاھاں اُرش کرتگ چریشی ءَ پوج ءَ گیش جانی تاوان بوتگ – ھردو اُرشاں دُژمنیں پوج ءَ جانی ءُ مالی تاوان ءِ دیمپانی کنگ کپتگ –

میجر گوشتگ کہ زورگریں پوج ءِ سر ءَ مئے اُرش زورگپتیں بلوچستان ءِ آجوئی ءَ تاں برجاہ مان انت –

بلوچستان ءِ دمگ کیچ ھوشاپ ءَ پاکستانی پھازگی لشکر ءَ چار مردمانی جون لیویز واکدارانی دست ءَ داتگ انت –

پھازگی لشکر ءِ بنشون ءِ رِد ءَ ھوشاپ بل ءِ کوھی دمگاں لشکر کشی کُتگ ءُ چار مردم کُشتگ انت –

سرکاری بنشون ءِ رِد ءَ پھازگی لشکر ءَ ھوشاپ ءُ بل ءِ کوھی دمگاں پٹ پولی لشکر کشی ءِ وھد ءَ چار شکی ایں مردم کُشتگ انت –

جنگ بوتگیں مردمانی جون ایف سی بنجل ءَ آرگ ءَ پد لیویز ءِ دست ءَ دیگ بوتگ انت کہ پدا لیویز ءَ چاریں مردمانی جون پجار ءِ ھاتر ءَ ٹیچنگ ھسپتال تربت ءَ سرکتگ انت –

تنی وھدی جونانی پجار نہ بوتگ ءُ ناکہ سلاہ بندیں گلانی نیمگ ءَ اے درگت ءَ درشان دیگ بوتگ –

زانگ بہ بیت چدو پیش ھم اے دابیں وئیل بوتگ انت کہ آھانی تہ گیشتر مردمانی پجار پیسر ءَ زورانسری آوار جنگ بوتگیں مردمانی نام ءَ بوتگ انت –
بلوچستان ءِ راجداریں پاٹی، انسانی ھکانی گل اے دابیں وئیلانی سر ءَ شک دارگ انت – بلے تنی وھدی مرچیگیں جونانی درگت ءَ ھچ گوشگ نہ بوتگ –

بلوچ آجوئی دوست رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ چاگردی ترامجاہ ٹوئٹر ءَ یک ٹویٹے ءَ گوادر ءَ چین ءِ نوکین سال ءِ درگت ےَ برجم دارگ بیتگیں مراگش ءَ زھگاناں چینی راجی سوت ءِ پژدر ءَ وتی لیکھ درشان کنان ءَ گوشتگ کہ اے امل بلوچ ڈیھ ءِ سر ءَ دو زورگیرانی زوگری ءِ جاراں چہ یک جارے-

آئی ءَ گوشتگ کہ گوادر ءَ چین ءُ پاکستان ءِ راجی سوت ءَ یکجاہ جنگ ایوک ءَ بلکیں بلوچ زر ءَ بگر داں کوہ سلیمان ءَ بلوچانی ڈیھ ءِ سر ءَ دو زوگرانی زورگری ءِ جار اِنت-

زانگ بہ بیت گوستگیں روچاں بلوچستان ءِ تیابدپی شھر گوادر ءَ گوادر پورٹ ءَ چین ءِ نوکیں سال ءِ درگت ءَ یک مراگشے برجم دارگ بیتگ اَت-

نیاد ءَ چین پاکستان گورنمٹ گرلز مڈل اسکول ءِ زھگاں اردو ءُ چینی زبان ءَ راجی سوت ءُ چائنا اوقرسءز پورٹس ھولڈنگکمپنی ءِ سرجم بوھوکیں چیئرمجن چنگ باؤ چونگ ءَ گوں وتی مھر ءِ درشان ءَ ایانی دستان پورٹریٹ بزانکہ اکس پیش کتگ-

نمدی یے پہ مھروانیں مھروان ءَ

نبشتہ کار: جاوید نور

دی بلوچستان پوسٹ

منی اُردلُک من وش ءُ سلامت آں، تو چون ئے۔ منی اُردلُک من بے ترا بے تاھیر آں، من سک زھیریگ آں، من نزان آں، ” تو کجا ئے “چی کنگ ءَ ئے ءُ چی وڑ ءَ ئے۔ بلے نی ترا چُنت وھد اِنت، تو ھالے نہ کُتگ، ناں کلوھے ناں ھال ءُ اھوالے ءُ کسے ھم نئیت اِنت چہ تئی میتگ ءَ من تئی جُست ءَ بہ کن آں۔ من ھم کسے ءَ کُلوہ نہ کُتگ تئی جُست ھم نہ کُتگ، پرچا کہ من نہ لوٹ اِت منی ءُ تئی راز ءَ کسے سھیگ بہ بیت۔ بس نشتگ ءُ وت ءَ چہ وت جُست کُتگ، کہ منی اُردلُک چون اِنت، وت ءَ وت پسو داتگ ءُ وت ءَ وت سھڑینتگ۔

منی اُردلُک:
ترا یاد اِنت منی لالا ءِ سور ءِ شپ چون وش اَت، جنک ناچ ءَ اِت اَنت، تو ھم گوں دزگوھاراں ناچ ءَ اِت ئے۔ سوتے لگ اِتگ اَت۔ مبارک منی سالونک ترا را شما پسو دات وشی ءِ بات ھمے شپ سک وش اَت گند ئے، ءُ پد ءَ شپ ھم بے وھد اَت جنک دْراہ رھادگ بوت اَنت شُما چیزے جنک انگت ناچ ءَ اَت ات ءُ شپ ھمے وڑ ءَ روان اَت بانگ ءِ وھد بوت شُما ناچ ءَ بس کُرت ءُ ٹیپ بند بوت دگہ کس نیست اَت وتی لوگ ءِ مردم دراہ وپتگ اِت اَنت تو مارا گُشت کہ نی وھد بے وھد اِنت بہ وپس اِت من ھچ نہ گُشت سالونک ءَ پسو دات اناں ما نہ وپس ایں مارا واب ءَ نہ گپتگ تو گوں انارکیں لُنٹاں بچکند اِت ءُ گُشت کہ سالونک تو وَ گل ءَ چہ نہ وپس ئے آ دگراں بِل، گُڑا تو گُشت کہ شر اِنت برو اِت شِیر بہ گر اِت چاھے اڈ کن ات-

سالونک ءُ سالونک ءِ ھمراہ ءَ موٹل زُرت ءُ رھادگ بوت اَنت شِیر ءِ گرّگ ءَ گوربام ءِ وھد اَت، من ءُ تو نشت ایں ءُ تاں دیراں دیوان کُت من ترا جُست کُت کہ شُما باندا رو اِت ناں، تو بچکندگ ئِے جَت ءُ پسو دات ھو اڑے کُربان بات آں پہ تئی اڑے ءَ ءُ پد ءَ من پریشان بوت آں تو گُشت کہ پریشان مہ بو جگر دگہ وھد باز اِنت دگہ وھدے کایاں ھمے وڑ ءَ من ءُ تو نِند آن ءُ گپ ءُ تران کن ایں چوناھا من نہ شُتگ اِت آں انی من وانگجاہ ءِ چکّاس ءِ تیاری کناں پمیشکا تو دل ءَ مہ کن کُربان آں من ترا گُشت شر اِنت رو ئے بلے ھال ءُ اھوال بہ کن شر اِنت جگر من ترا گشت کہ نوں من ءَ واب ءَ گپتگ سُھب ءَ من ءَ کار کنگی اَنت۔ تو گُشت شر اِنت، تو بہ وپس ترا سُھب ءَ کار کنگی اِنت، گڑا من وپت آں۔

من پاد اتک آں سُھب اَت ھشت ءِ وھد اَت مردم آیگ ءَ اِت اَنت من وت ءَ زوت تیار کُت چاہ وارت ءُ گوں کاراں گُلائیش اے کار ءُ آ کار وھد روان اَت یکے وھد بوت مردم دُراہ آتک اَنت ورگ تیار اِت اَنت شُما دراہ مردم نادینت اَنت ءُ ورگ دیگ بندات کُت داں سَے ءُ نیم ءَ مردم ءَ ورگ دات دراہ پارگ بوت اَنت۔

وھد روان اَت شَش ءِ وھد بوتگ اَت ءُ من زوت جان شُشت ءُ اسپیتیں پوشاگ پِر کُت ءُ رھادگ بوت آں، بازار ءَ نکاہ ءِ کیکانی آرگ ءَ من کیک آؤرت اَنت ءُ ڈولانی توار اَت سالونک ءِ جان شودی اَت سالونک تیار کنگ بوت ءُ تھت ءَ نادینت ءُ سالونک ءَ ھار گوْر ءَ دیگ بوت اَنت ءُ زر شانُکائی بوت ءُ سالونک چہ کمپان ءَ ڈن ءَ بُرت نادینت مردمانی مُچی اَت مردم سک باز اَت ھَشت ءُ نیم ءِ وھد بوت مُلا آتک ءُ دْروت ءُ دراہ بات ئِے کرت مردماناں وش آتک ءَ رند مُلا ءَ سالونک ءِ راستیں دست گپت ءُ مُلا ءَ دوا بندات کُت نِکاہ وانگ بوت پد ءَ سالونک رھادگ بوت کوٹو ءَ ءُ مردماناں چاہ ءُ آپ دات کیک بار کنگ بوت اَنت۔ اناگہ ءَ منی گوانکو ءَ توار کُرت من گوانکو چہ کیسّگ ءَ کَش اِت چار اِت تئی لمبر ءَ مسکال اتکگ من ءَ گوانکو دست ءَ اَت تئی کُلوھے آتک من کُلوہ چار اِت نبشتہ اَت شر جگر گُڑا ما روگ ءَ ایں، من تئی کُلوہ ءِ پسو دات شَر کُربان آں اللّٰہ ءِ باھوٹ ئے، شُما سر بوت اِت ھال ءُ اھوالے بہ کن۔ تو پد ءَ پسو دات، شر جگر شر ءُ من تئی گُڈی پسو ءِ ودار ءَ اِت آں گُڑا تئی گڈی پسو دہ ءُ نیم ءِ وھد ءَ آتک، ما جگر لوگ ءَ سلامتی سر بوتگ ایں پد ءَ من ترا کُلوہ کُت شر اِنت جگر شُما سر بوتگ اِت، نی من وَ سک دمبُرتگ من وپس آں تو گُشت شَر جگر سُھب ءَ ھال ءُ اھوال کن ایں سُھب سُھب ئِے بوت روچ ءِ مرچی ناں تئی کلوہ کیت ءُ ناں کالے کیت اِنت-

ھر کُجا ئے سلامت بات ئے شالا سَکّی ءُ سوری مہ گندّات ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔