TBP Balochi

شام ءِ سروک بشارالاسد ءَ چہ ترکی ءَ لوٹ کتگ آ چہ شام ءَ وتی پوجیاں واتر بہ کنت ءُ اپوزیشن ٹولی ءَ ھم ھلاس بہ کنت-

عرب نیوز ءِ رد ءَ بشارالاسد ءَ انقرہ ءِ گون ءَ شام ءِ گون ءَ گیش کپتگیں سیاہ دلیانی سر ءَ وتی بے تواری پروشتگ ءُ وتی درشانی لیکہ دیم ءَ آورتگ اَنت-

شام ءُ ترکی ءِ سیادی ھما وھد ءَ ناوشی ءِ دیمپان اَنت انقرہ دوزادہ سالاں وت ما وتی جنگ ءِ وھد ءَ بشارالاسد ءِ سیاسی ءُ سلاہ بندین اپوزیشن ءِ یک مزنیں پلامرزی کنوکے جوڑ بیتگ ات ءُ آئی ءَ گوریچانی دمگاں وتی پوجی ھم روان داتگ اَنت-

روس دمشق ءُ انقرہ ءِ میان ءَ سیادی ءِ میان ءَ سیمی مردم اِنت سیادی ءِ کرد ءَ پیلو کنگ ءَ اِنت ماسکو ءَ گوستگیں ماہ ءَ وتی پھریزی ءِ وزیرانی میان ءَ گپ ءُ تران ءِ گپ کنوک بیتگ کہ ایشی ءِ مول ءُ مراد رجب طیب اردوغان ءِ میان ءَ گند ءُ ننداں ھوار گیجگ بیتگ-

بشارالاسد ءَ دمشق ءَ روس ءِ سروکی سپارت کار الیگزینٍر لاورینتیف ءَ گوں گند ءُ نند کرتگ ءُ گوشتگ کہ آ ترکی ءِ گون ءَ گپ بہ کنت ءُ شام ءِ زمین ءِ سر ءَ زورگری ءَ ھلاس بہ کنت ءُ ترکی ءِ پلامرزی ءَ کہ ناشری گوشگ اِنت آئی ءَ بہ دار ایت-

آئی ءَ گوشتگ کہ پیسر ءَ شام ءُ روس ءِ میان ءَ ستکی بہ بیت کہ دانکہ شام یک نیمگے ءَ واھگداری ءِ گپت بہ کنت-

سال دوھزار ءُ یازدہ ءَ شام ءِ جنگ ءِ بندات بیگ ءَ پد انقرہ ءُ دمشق ءِ میان ءَ گچینی گپ ءُ تران ءَ وزرائے ھارجہ مولود چاوش اوغلو ءُ فیصل مقداد ءِ گند ءُ نند فروری ءَ بیتگ-

شام ءِ دومی ھمسنت ایران ءِ نیمگ ءَ وشی گندگ ءَ آیگ ءَ اَنت، وزیر ھارجہ حسین امیر عبداللھیان ءَ آدینگ ءِ روچ ءَ گشتگ آئی ءِ ڈیھ شام ءُ ترکی بیوکیں گپ ءُ تران ءَ وش اِنت –

امریکہ ءِ شنگ بیتگیں یک تاکے ءَ وتی یک رپورٹے ءَ گشتگ کہ ایران گمانی رنگاں ڈیھ ءَ ھجاب ءِ کانون ءِ سر ءَ ستک دارگ ءُ آئی ءِ سر ءَ نگاہ ایر کنگ ءَ چھرگ ءِ پجاری ءَ ٹیکنالوجی کارمرد کت کنت-

تاک wired ءَ گوشگ بیتگ اگاں چہ مھلوک ءَ پجاری دست رس ھست اِنت بلے ایران ءَ زالبولانی چھرگ ءِ پجاری ءَ ٹیکنالوجی ءِ گمانی کارمرد کنگ ءَ بیت کنت کجام ھم سرکار ءِ نیمگ ءَ یک رنگے ءِ بنیات ءَ زالبولانی گُدانی سر ءَ کانون ءِ مُشگ ءِ درچ اے کارمردی ءِ اولی سرپدی اِنت-

ایران ءَ گوستگیں سال ءَ جار جتگ ات کہ آ زالبولانی چار ءُ گزاری ءَ ٹیکنالوجی کارمرد کنت –

تاک دیم وائرڈ ءَ گوشگ بیتگ کہ ایراب اے زھرشانیاں پد ھجاب ءَ شری ءِ سر ءَ سرا نہ کنگ ءِ پژدر ءَ دزگیر کنگ ءَ پد یک زالبولے ءِ بیرانی بیگ ءَ رند بندات بیتگ اَنت ایرانی زالبول ھال دیگ ءَ اَنت کہ آیاں زھرشانیانی بھر زورگ ءَ یک یا دو روچ ءَ پد ھجاب ءِ کانود ءِ لگتمالی ءِ سر ءَ ابید ھم آیاں گرگ ءَ اَنت اے زھرشانیانی وھداں پولیس ءَ ھچ رنگیں اھوال نہ کتگ-

تاک دیم ءِ گوشگ اِنت کہ یک چینی کمپنی چیاندی کہ امریکہ ءَ آئی ءِ سر ءَ بندش جتگ گمانی رنگ ءَ ھمے ایران ءَ چھرگ ءِ پجاری ءِ ٹیکنالوجی سر کنگ اِنت بلے کمپنی ءُ ایرانی اگدودارانی بارو ءَ گیشیں سرپدی ءِ واستا کجام ھم دزبندی ءَ ھچ پسو نہ داتگ-

کمپنی ءَ گوست ءَ ایران ءِ پاسداران انکلاب کور، ایرانی پولیس ءُ سرکاری ادارہ وتی گراکانی لڑاں ھوار کرتگ اَنت – چیاندی ءَ وتی ویب سائٹ ءَ گوشتگ کہ اے ٹیکنالوجی ءَ چین ءَ ایغور ءَ ھوار ڈیھ ءِ دگہ نسلانی کمتری گمانی ءِ پجار ءَ کمک کتگ اَنت-

ھمک آدینگانی وڑ ءَ گوستگین روچ بزانکہ آدینگ ءَ روکپتی بلوچستان ءِ دو جتاجتائیں شھراں ایرانی سرکار ءِ زوراکیانی ھلاپ ءَ زھرشانی کنگ بیتگ-

زھرشانی زاھدان ءُ ھاش ءَ کنگ بیتگ اَنت اود ءَ آدینگ ءِ نماز ءَ پد مھلوک مُچ بیتگ ءُ زھرشانی اش بندات کتگ، زھرشانی کنوکاں بینرر، پلے کارڈ ءُ جتا جتائیں اوگام جتگ اَنت-

زھرشانی ءَ تھنا ایوک ءَ مردین بلکیں زالبول ھم بازیں کچے ءَ گندگ بیتگ اَنت، زالبولاں خامنہ ای سرکار ءِ ھلاپ ءَ اوگام جتگ ءُ آیانی دستاں جتا جتائیں گپاں نبشتگیں پلے کارڈ بیتگ اَنت –

زھرشانی کنوک دگ ءِ سر ءَ مُچے ءِ ھساب ءَ گردان بیتگ ءُ اود ءَ آیانی بندیگ ورنایانی یل کنگ، زوراکیانی ھلاپ ءُ مولانا عبدالفغار نقشبندی ءِ یل کنگ ءِ لوٹ کتگ-

زھرشانی نا تھنا زاھدان ءَ گندگ بیتگ بلکیں زھرشانی ھمے درچ ءَ زاھدان ءَ ھواریں دمگ ھاش ءَ ھم گندگ بیتگ اَنت-

اود ءَ زھرشانی کنوک ھم نماز ءَ پد مُچے ءِ دروشم ءَ اوگام جنان ءَ دگ ءِ سر ءَ درکپتگ اَنت-

بلوچستان ءِ جتاجتائیں دمگاں جتائیں بوتگیں وئیلانی آسر ءَ سے مردم بیران ، زالبول ءُ چکاں ھوار ھپدہ مردم بیران بیتگ اَنت-

گیشیں ھالانی رِد ءَ شال ءَ گیس تراک ءِ آسر ءَ ٹپی بیتگیں مردم مروچی نادُراھجاہ ءَ وتی ساہ ئِے، چیزے روچ ساری شال ءِ دمگ سریاب ءَ شفیع کالونی ءَ لوگے ءَ گیس لیک بوگ ءِ سبب ءَ تراک ءِ آسر ءَ یک مردمے تنویر ستکگ ءُ ٹپی کہ نادُراھجاہ ءَ ٹپّانی درد نہ سگ اِتگ ءُ بیران بیتگ-

دومی نیمگ ءَ سیندک پروجیکٹ مائینگ ڈیپارٹمنٹ ءَ کار کنوکیں پوریاگر دلاور خان کھمبے ءِ سر ءَ کار کنگ ءِ وھد ءَ کپتگ ءُ بیران بیتگ-

زیارت کراس ءِ نزیک ءَ تُرند رؤکیں گاڑی ڈرائیور ءَ نہ مرّ اِنتگ ءُ کنڈ کپگ ءَ چہ سے مردم ٹپی بیتگ اَنت، ٹپی نادُراھجاہ ءَ برتگ اَنت- اشی ءَ اَبید ھُزدار چشمہ مراد وھیر نزیک ءَ دگ وئیل ءَ چار مردم ٹپی بیتگ اَنت، ٹپیانی تہ ءَ زالبول ءُ چُک ھوار اَنت ٹپی ئیں مردم سوراب ءِ جھمنند گْوشگ بوگ ءَ اَنت-

ھمے وڑ ھب چوکی ءِ دمگ ساکران قلندرانی کرش پلانٹ ءَ کار وھد ءَ لوڈر ءِ چیر اَتکگیں ورناہ بیران بیتگ-

نوشکی کیشنگی ءِ ھند ءَ گاڑی وئیل آماچ بیتگ چریشی ءِ آسر ءَ سے مردم ٹپی بیتگ اَنت-

لسبیلہ کینال ءِ نزیک ءَ گاڑی ءُ پرپٹ ءِ میان ءَ ڈک ورگ آسر ءَ زالبول ءَ ھوار ھپت مردم ٹپی بیتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھانی دست ءَ آوار جنگ بیتگیں ھردوکیں گوھار زمانت ءِ سر ءَ یل کنگ بیتگ اَنت-

ھردوکین گوھارانی پجار غزل پاکزاد ءُ ریھانپ پاکزاد ءِ ناماں زانگ بیتگ اَنت ھردوک چار روچ ءَ پیش ایرانی چیریں ادارھاں دزگیر کرتگ ءُ زنداناں برتگ بیتگ اَنت-

ھردوکیں گوھارانی سر ءَ ایرانی چیریں ادارھاں بھتام جتگ کہ آیاں ڈیھ ءِ ھلاپ ءَ پُرکاریاں وتی دست ھوارینتگ ءُ چریشی ءَ آیانی دزگیری کنگ کپتگ ءُ پد ءَ مروچی زمانت ءِ سر ءَ یل کنگ بیتگ اَنت-

زانگ بہ بیت ھردوک چار روچ ءَ پیش ایرانی چیریں ادارھاں دزگیر کنگ ءَ پد آیانی انسٹاگرام اکاونٹ بند کتگ ات اَنت ءُ ایرانی چیریں ادارھاں گپ پدر کرتگ کہ آیانی چاگردی ترامجاھاں ڈیھ ءِ ھلاپ ءَ کرتگیں پوسٹ ھوار بیتگ اَنت-

زانگ بہ بیت روکپتی بلوچستان ءَ اے شورش ھما وھد ءَ بنا بیتگ کہ اود ءَ مھسا امینی ءِ کوش ءُ چھبار ءَ ماھو نامیں جنکے ءِ گون ءَ پولیس ءِ آپیسر ءِ زوراکیانی پژدر ءَ مھلوک برانزی بیتگ اَنت-

برطانیہ ءِ نامی ئیں تندجاہ بی بی سی اردو ءِ رد ءَ گوستگیں سال ءِ بندات ءَ بگر تاں گڈی روچاں ءُ پد ءَ انوں پراھگی دیرگند جیمز بازیں نوکیں پٹ ءُ پولے کتگ نوں آ لڑ ءِ تہ ءَ یک دگہ چیزے گیش کُتگ –

اولی رند ءَ جھان ءِ اے مستریں دیرگند ءَ یک سیارہ ءِ شوھاز کتگ، تھنا شوھاز ناں بلکیں اے سیارہ زمین ءِ چھرگ ءَ جنت –

سائنسداناں نوں آئی ءِ سر ءَ گیشیں پٹ ءُ پولی ءِ شوربندی کُتگ تانکہ آؤکیں ماھانی تہ ءَ اے نوکتریں سیارہ ءِ درگت ءَ گیشتر سرپد بہ بنت –

اے سیارہ ءِ نام ایل ایچ ایس 475 بی انت ءُ اے چہ زمین ءَ چِل ءُ یک نوری سال دور برج اوکٹینز انت –

اے درساں پیش اولسر ءَ ناسا ءِ یک سیٹلائٹے ءَ شوھاز کتگ بوتگ ءُ پد ءَ آئی ءِ پٹ ءُ پول ءُ آئی ءِ ھست بوگ ءِ راستی جیمز ویب ءَ کُتگ –

چوش کہ اے سیارہ پہ مئے ھاتر ءَ نوکینے ءُ پمے ھاتر ءَ مارا اشی ءِ درگت ءَ باز زانگ لوٹ ایت، بلے سائنسدان تنی وھدی لھتے بنکی چیزانی سرپدی زورگ ءَ سوبمند بوتگ انت – اے کسانیں سیارہ یے کہ زمین ءِ کچ ءَ بیت – آ ایشی ءَ ھم سرپد بوتگ انت کہ اے چہ زمین ءَ ھما سد ڈگری گرم انت –

سائنسدانانی ٹولی اے سرپد بوگ ءِ جھد انت کہ اود ءَ گوات ھست یا ناں بلے آھاں باور انت کہ آئی ءِ پراھگ ءَ زھل ءِ سیارہ (سیٹرن) ءِ ماہ ءِ ٹائٹن وڑ ءَ میتھین ءِ کثیف ءِ برزی ءَ نیست –

سائنسدان اے نوکتریں شوھاز ءَ شادمان انت آھاں امیت انت اے مزنیں دیرگند دیمتر ءَ بازیں دگہ سیارھے شوھاز کنت –

ناسا ءِ ڈائریکٹر مارک کلیمپن ءِ گوشگ انت کہ زمین ءِ کچ ءِ اے وڑیں سیارہ اے دیرگند ءِ سر ءَ دیمتر ءَ ھم شوھازی ءِ گمان انت –

آئی ءَ گوشتگ کہ جیمز ویب مارا مئے شمسی نزام ڈن زمین ءِ دابیں جھان ءِ درگت ءَ نوکتریں سرپدی دیان انت ءُ اے مشن ھمیش انت ھنو بندات بوتگ –

سائنسداناں امیت انت آ نوکتریں پٹ ءُ پولاں چہ اے نوکتریں سیارہ ءِ درگت ءَ گیشتریں سرپدی یکجاہ کت کن انت –

بلوچستان ءِ بنجاھی شھر شال، زیارت ءُ دگہ دمگاں آپ بادینوکیں سارتی بے کساس گیش بوتگ، ھمے وڈ پنجگور کیچ ءَ ھوار ءَ دگہ بازیں دمگاں چہ گوریچ ءَ مردم گسانی تہ ءَ نندگ ءَ لاچار کُتگ انت –

گیشیں ھالانی رِد ءَ بلوچستان ءِ بنجاھی شھر شال ءَ بے کساس سارتی ءِ سوب ءَ دمک ءُ دگ ءُ پیپانی تہ ءِ آپ بد اِتگ انت –

موسم ءِ بنشون ءِ رِد ءَ شال ءُ کش ءُ گور ءِ دمگانی موسم ساپ انت بلے سارتی بے کساس گیش بوتگ – شال ءَ ھوار سرجمیں دمگ ءَ گیس ءِ پریشر سک باز کم انت ءُ بازیں دمگاں گیس نیستی ءِ ھساب انت – بلوچستان ءِ شال ءَ ھوار زیارت ، کلات، مستونگ، پشین، کلعہ سیف اللہ ءَ ھم سارتی گیش بوتگ – کلات ءُ زیارت ءَ ھم گیس پریشر نیستی ءِ ھساب انت –
زیارت ءَ اے رندی زمستان ءِ سارتریں روچ مرچی بوتگ کہ اودا سارتی 15—سنٹی گریڈ نبشتہ کنگ بوتگ – موسم بنشون ءِ رِد ءَ گوستگیں روچ ءَ زیارت ءَ دوازدہ ڈگری سنٹی گریڈ نبشتہ کنگ بوتگ – شال ءَ مرچی کم چہ کم 8— کلات ءَ 11— ژوب ءَ 5— پنجگور ءَ چار نبشتہ کنگ بوتگ –

وھدیکہ کیچ ءِ دمگ بلیدہ، ھوشاپ، تجابان، دگہ دمگاں ھوار پنجگور ءَ گوریچ تُرند کشگ انت ءُ آپ بادینوکیں سارتی ءَ مردم گسانی تہ ءَ نندگ ءَ لاچار کتگ انت – پنجگور ءُ مکران ءِ دگہ بازیں دمگاں لین آسراتی نیستی ءِ ھساب انت ، ھون بادینوکیں سارتی ءِ رکّگ ءِ ھاتر ءَ ٹیل ھم نیستی ءِ ھساب انت ءُ ھُشکیں دار ءِ نھاد گیش بوتگ – گیشیں سارتی ءَ آیگ ءَ گوں کیسکو ءَ ھم مردمانی دلسیاھیانی گیش کنگ ءَ ھچ وڈیں راہ یل نہ داتگ بازیں جاھاں فیڈرز والٹیج ھنچوش کم کتگ کہ موبائیل ھم چارج نہ زور انت بازیں جاھاں وا لین ءِ جند نیست- کیچ ءِ ھم گیشتریں دمگاں ھمے آسراتیانی ھمے ھال انت –

بلوچستان ءِ دمگ کیچ مند ءَ جاندراھی ءِ آسراتی ءِ نہ بوگ ءِ سوب ءَ یک دگہ زھگے چہ وتی زند ءَ زبھر بوتگ –

گیشیں ھالانی رِد ءَ یک سالیگیں زیدان ء محمد عالم جھمنند مند نوکیں کھن کُلگ ءِ سوب ءَ ایمرجنسی سول ھسپتال مند ءَ برگ بوتگ کہ اودا آکسیجن آسراتی نہ بوگ ءِ سوب ءَ پوجی بنجل ءَ برگ بوتگ کہ ھمودا ھم آسراتی ءِ نہ بوگ ءِ سوب ءَ یک سالیگیں زھگ بیران بوتگ –

زانگ بہ بیت اشی ءَ پیش ھم یک جنکوئیں زھگے آسراتی نہ بوگ ءِ سوب ءَ بیران بوتگ ات –

دمگی مردمانی گوشگ انت مند ءِ نادراھجاہ ڈاکٹر ءُ ھر وڈیں بنکی آسراتیاں زبھر انت ءُ پدا بازیں دمگی مردمے پاکستان اسمبلی ءِ وزیر انت بلے مند ءَ بنکی آسراتیانی نہ بوگ وزیر ءُ دمگی معتبر بے وسی ءِ گواہ انت –

مند ءِ مردمانی گوشگ انت کہ وفاقی وزیر زبیدہ جلال دو دھک انت کہ ھمے دمگ ءَ گچین کنگ بیت ءُ اسمبلیاں رؤت بلے ادا سول ھسپتال ءَ درد ءِ یک گولی ءِ ھم دست نہ کپیت –

دمگی مردمانی رِد ءَ ایف سی بنجل ءَ برجاھیں نادراھجاہ ءَ تاں سر بوگ ءَ نادراہ نہ رک انت –

آھاں چہ سوبائی جانسلامتی ءِ وزیر ءَ گوں لوٹ کتگ کہ سول ھسپتال پچ کنگ بہ بیت ڈاکٹر آرگ بہ بنت ءُ بنکی آسراتی دیگ بہ بنت –

دشت مزنبند ءَ پوج ءِ لشکر کشی برجاہ ءَ اِنت، دو ھنداں پوج ءُ سلاہ بندانی میان ءَ میڑ بیتگ-

بلوچستان ءِ دمگ کیچ ءِ تھسیل دشت ءِ کوھی دمگ مزنبند ءَ گوستگیں سے روچاں پاکستانی پوج نیمگ ءَ لشکر کشی برجاہ ءَ اِنت- اِھوالکارانی رِد ءَ پوج ءَ دشت ءِ دمگ نوکیں راہ چہ مزنبند ءَ پُترتگ-

اِھوالکاراں ٹی بی پی ءَ تران کنان ءَ گْوشتگ کہ نوکیں راہ، تگرد توگ، آسکانی گر، کرپاسی ءُ قادر بخش کلگ ءَ پاکستانی پوج ءِ مزنیں کچے لشکر کشی کنگ ءَ اِنت وھدے کہ قادر بکش کلگ ءَ پوج ءُ سلاہ بندانی میان ءَ میڑ ءِ ھال اِنت-

اِھوالکارانی رِد ءَ مروچی ھم نوکیں راہ ءَ پوج ءُ سلاہ بندانی میان ءَ میڑ بیتگ چریشی ءِ آسر ءَ پوج ءِ کارندھاں جانی تاوان چست کنگ کپگ ءِ ھال اِنت-

تنی وھدے پاکستانی پوج ءِ بُنشون ءَ لشکر کشی ءُ میڑانی درگت ءَ درشان شنگ نہ کتگ-