TBP Balochi

روکپتی بلوچستان ءِ تیابدپی شھر چھبار ءَ سیادی داروکیں بلوچ جنک ایرانی آمیدگس ءَ زھرشانیانی پژدر ءَ دزگیر کنگ ءَ پد یک سالے ءِ سزا داتگ –

گیشیں ھالانی دد ءَ یک اکتوبر دوھزار ءُ بیست ءُ دو ءَ روکپتی بلوچستان ءِ تیابدپی شھر چھبار ءَ ایرانی چیرین ادارھانی کارندھاں سمینہ ء عبدلغفور جھنند چھبار دزگیر کرتگ ءُ ھشت روچ ءَ چیرین زنداناں کنگ ءَ پد زاھدان ءَ برتگ-

اھوالانی رد ءَ سمینہ بلوچ بیست ءُ پنچ روچ ءَ زنداناں کنگ ءَ پد بزانکہ بیست ءُ پنچ اکتوبر ءَ یل کنگ بیت اِنت ءُ پد ءَ دوبر آ گرگ ءُ بیت اِنت ءُ آئی ءِ سر ءَ ایرانی امیدگس بھتام جنان ءَ آئی ءَ ڈیھ ءِ ھلاپ ءَ زھرشانی کنوکانی پرکینگی ءُ ڈیھ ءِ ھلاپ ءَ چاگردی ءُ دگہ جاھاں گپ کنگ ءِ ھلاپ ءُ دو سال ءِ زندان دیگ بیت اِنت-

بیست ءُ چار سالی ئیں سمینہ بلوچ چھبار یونیورسٹی ءِ کمپیوٹع سائنس ءِ گریجویٹ نودبرے ءُ آ یک فوٹو گرافرے ءِ دروشم ءَ ھم گندگ بیت اِنت-

یک لس ھالے ءِ رد ءَ سمینہ بلوچ ھما وھد ءَ دزگیر کنگ ءُ برگ بیتگ کہ آئی ءَ یک ناشناسیں نمبرے ءَ زالبولے ءَ رھوت کرتگ ءُ گوشتگ کہ بیا ما تو مئے فوٹوگراپی ءَ بہ کن اود ءِ سر بوگ ءَ آ دزگیر کنگ ءُ برگ بیتگ-

زانگ بہ بیت چد ءُ پیش ھم چھبار ءَ ھوار زاھدان ءَ بلوچ جنگ ءُ گرگ ءُ برگ بیتگ اَنت کہ آیانی تہ ءَ فوزیہ براھوئی نامیں جنکے ھم ھوار اَت –

فوزیہ براھوئی لھتے روچانی بندیگی ءَ پد آئی ءِ سر ءَ بھتام جنگ ءُ پد ءَ سزا بندگ بیتگ ات ءُ پد مھلوک ءِ شوراں پد آ یل کنگ بیتگ ات-

روکپتی بلوچستان ءِ بنجاھی شھر زاھدان “دزاپ ” ءَ ایرانی چیریں ادارھاں دو ورناہ آوار جنگ ءَ پد بیگواہ کرتگ اَنت-

گیشیں ھالانی رد ءَ آدینگ ءِ روچ ءَ بیست جنوری دوھزار ءُ بیست ءُ سَے ءَ ایرانی لشکر ءَ زاھدان ءَ مکی مسیت ءَ واتر لوگ ءَ روکیں دو کس آوار جنگ ءَ پد بیگواہ کرتگ اَنت-

آوار جنگ بیتگیں مردمانی پجار منصور باجیزئی مینگل ءُ علی میر بلوچزئی جھمنند زاھدان ءِ ناماں زانگ بیتگ اَنت-

ھردوک آوار جنگ ءَ پد بیگواہ کنگ بیتگ اَنت چریشی ءَ پد آیانی درگت ءَ دگہ ھچ ھال دیم ءَ نیتکگ اَنت-

ھالانی تہ ءَ گوشگ بیتگ کہ زاھدان ءِ کش ءُ گوراں داں انگت ءَ چیریں ادارھ نگھداری ءَ ترگ ءُ مردمانی پجار کاڈاں چک ءُ تان کنگ ءَ اَنت-

زانگ بہ بیت روکپتی بلوچستان ءَ بندات بیتگیں زھرشانیانی پژدر ءَ بازیں مردمے گرگ ءُ بیگواہ کنگ بیتگ اَنت ءُ اے درچ داں انگت ءَ وھد وھد ءِ سر ءَ برجاہ اِنت-

یورپی ڈیھانی نیمگ ءَ ایران ءِ واکدارانی سر ءَ نوکیں بندشانی جنگ ءِ واستا ٹپاسکاری بوگ ءَ اِنت ءُ ھمے وڑ ءَ ایرانی کرنسی ریال امریکہ ءِ ڈالر ءِ دیم ءَ یکدم جھل کپتگ –

عرب نیوز ءِ رد ءَ ایران ءَ زھرشانی کنوکانی سر ءَ سرکار ءِ زوراکیانی پژدر ءَ یورپی ڈیھاں تھران ءِ سی ءُ ھپت واکدار ءُ گلانی سر ءَ بندش جنگ ءِ ٹپاسکاری ءَ کنگ ءَ اَنت-

میان اُستمانی برادری ءَ ایران ءِ سر ءَ گیش کپتگیں ایوکی ءِ سبب ءَ رودراتکی ڈیھاں بدامنی ءِ تالان کنگ ءِ کردار ءِ پیلو کنگ ءُ یوکرین ءَ بازیں کچے ءَ بیرانیانی ءُ تباھیانی سبب ایرانی ڈرونز کہ اود ءَ سر کنگ بیتگ اَنت-

یورپی یونین ءُ تھران ءِ میان ءَ سیادیانی توک ءَ ناوشی ودی بیتگ اَنت پرچاکہ جوھری گپ ءُ تران ءِ سرجمی ءَ اوشت ءِ آماچ اِنت-

ایران ءَ بازین یورپی شھری دزگیر کنگ بیتگ اَنت ءُ زھرشانی کنوکانی سر ءَ لٹ ءُ کُٹ ءُ پاھو دیگ ءِ سزا ءِ سبب ءَ تھران ءِ سر ءَ ایراد گرگ ءَ اَنت-

یورپی یونین بلاک ءِ وزرا ھارجہ ءَ دوشمبے ءَ برسلز ءَ پیسر ءَ برجم دارگ بیتگیں نیاد ءَ تھران ءِ سر ءَ بندش جنگ ءِ پیکج وتی نزیک ءَ سر بیتگ اَنت-

یورپی پارلیمنٹ ءَ چار شمبے ءَ یونین ءَ چہ لوٹ کتگ آ ایران ءِ پاسداران انکلاب ءَ ناشرکارانی ٹولی ءَ ھوار بہ کنت-

ڈیھ ءَ میری ٹائم اتھارٹی ءَ ھمے ھپتگ ءَ گوشتگ پاناما جھاز ءِ رجسٹری گوستگیں چار سالاں برجاہ اِنت ایران ءِ سرکار ءِ تیل کمپنی ءَ چہ ھواریں یک سد ءُ سی ءُ شش آپی جھازاں وتی بیرک دور کتگ-

زانگ بہ بیت ایران ءِ اخلاقی پولیس ءِ دست ءَ کرد جنک مھسا امینی ءِ بیرانی ءَ پد سرجمیں ڈیھ ءَ زھرشانی بندات بیتگ اَنت ءُ چرے زھرشانیان چاردہ ھزار مردم دزگیر کنگ بیتگ ات اَنت-

واکداراں بد امنی ءِ تالان کنگ ءِ پژدر ءَ چار مردم پاھو داتگ اَنت ءُ چریشی ءِ سر ءَ میان اُستمانی دراں ایران ءِ سر ءَ زھر ء درشان کتگ-

یورپی یونین ءَ پیسر ءَ زھرشانی کنوکانی سر ءَ کریک ڈاؤن ءِ سر ءَ ایران ءِ شست واکداراں ءُ ادارھانی کار کنوکانی سر ءَ ویزا ءِ سر ءَ بندش جنگ بیتگ اَنت-

فارن ایکسچینج سائٹ بون باسٹ ڈاٹ کام ءِ رد ءَ شمبے ءِ روچ ءَ ایران ءِ گیر سرکاری نھاد جاھاں یک ڈالرء چار لک ءُ چل ءُ ھپت ھزار ریال ءَ بھا بیتگ کہ ایشی ءَ پیش چار لک ءُ سِی ھزار بیتگ-

سرجمیں ڈیھ ءَ زھرشانیانی سبب ءَ ریال ءِ نھاد ءِ توک ءَ بیست ءُ نُھ درسد کمی اتکگ بیتگ-

بلوچستان ء دمگ ڈیرہ بگٹی، اورماڑہ ءُ شال ءَ جتاجتائیں وئیلانی آسر ءَ پنچ مردم ٹپی ءُ یک لاشے دزکپتگ-

سربوتگیں ھالانی رِد ءَ ڈیرہ بگٹی ءِ شھر پڑی ءَ کوھنیں وت ماں وتی دُژمنی ءِ سوب ءَ یک مردمے ءَ تیرگواری کتگ ءُ چریشی ءِ آسر ءَ سے مردم ٹپی بیتگ اَنت ءُ تیرگواری ءَ پد پولیس وئیل جاہ ءَ سر بیتگ اُرشکار دزگیر کتگ-

پولیس گْوشگ رِد ءَ ٹپیانی تہ ءَ فتح محمد نامیں مردمے ءِ جاور نگیگ بیتگ اَنت پہ الاج ءِ ھاتر ءَ پنجاب ءَ برگ بیتگ-

ھمے وڑ اورماڑہ زیرو پوائنٹ ءِ نزیک ءَ بُنجاھی دگ ءَ پرپٹ وئیل آماچ بیتگ چریشی ءِ آسر ءَ پرپٹ ءَ سوار دو ورناہ دانش ء لوجی ءُ صبر اللہ ء مجید سک ٹپی بیتگ اَنت-

بلوچستان ءِ بُنجاھی شھر شال ءَ یک جنکے ءِ لاش دزکپتگ کہ آ گوستگیں روچ ءَ چہ کلات ءَ شال ءَ اَتکگ بیتگ-

سربوتگیں ھالانی رِد ءَ چہ کلات ءَ یک ھپتگے ءَ ساری شال ءَ آؤکیں جنکے ءِ لاش لوگ ءَ دزکپتگ، وئیل درگت ءَ پولیس گْوشگ اِنت کہ سریاب پولیس ءَ ھال سر بیتگ سریاب دگ منیر مینگل پھاٹک ءِ نزیک ءَ لوگے ءَ جنکے ءِ لاش ایر بیتگ ءُ چریشی ءَ پد پولیس ءَ لاش وتی دستیگ کتگ نادُراھجاہ ءَ برتگ چار ٹپاس ءَ پد کھول ءَ داتگ-

پولیس گوشگ رِد ءَ جنک کلات جھمنند بیتگ کہ آ یک ھپتگے ءَ ساری وتی سنگت ءِ ھمراھی ءَ اَتکگ ءُ سنگت ءِ لوگ ءَ نندوک بیتگ-

لاش نزیک ءَ چہ زھرناکیں دوا بوتل دزکپتگ ءُ کھول ءَ ایف آئی آر نکش کتگ ءُ نامگپتیں کُتکار دزگیری ءِ ھاتر ءَ بیڑ برگ بیتگ-

پولیس گوشگ اِنت چار ٹپاسی رپورٹ آھگ ءَ پد راستی دیم ءَ کئیت-

سر بیتگیں اھوالانی رد ءَ قاسمی مسیت راسک ءِ پھریزوک ایرانی چیریِں ادارھانی کارندھان آوار جنگ ءَ پد بیگواہ کرتگ-

آوار جنگ بیتگیں مردم ءِ پجار داد رھیم رخش ءِ نام ءَ زانگ بیتگ کہ آ مروچی ساھت یازدہ ءَ ایرانی چیریں ادارھاں راسک ءَ یک دکانے ءَ آوار جتگ ءُ برتگ-

ھالانی تہ ءَ گوشگ بیتگ کہ داد رھیم قاسمی مسیت ءِ پھریزوکے بیتگ کہ آئی ءِ نزیکی گیشتر مولانا عبدالغفار نقشبندی ءَ گون بیتگ-

ھالانی تہ ءَ گوشگ بیتگ کہ گوستگیں روچ ءَ قاسمی مسیت ءَ مولانا عبدالغفار ءُ مولانا محمد حسین گورگیج ءِ پلامرزی ءَ زھرشانی کنگ بیتگ چرے سبب ءَ اود ءَ ابید ارزی گرزی ءَ داد رھیم گرگ ءُ برگ بیتگ-

زھرشانیانی پژدر ءَ عبدالغفار نقشبندی ءِ کھول ءُ سیاد بازیں کچے ءَ ایرانی لشکر ءَ گپتگ ءُ بندیگ کتگ اَنت کہ ایشانی توک ءَ ادھم آسکانی، عارف دھقانی، مرتضی رائیسی کہ گوستگیں یک ماھے ءَ گیش بیگواہ کنگ بیتگ اَنت داں انگت بیگواہ اَنت-

دومی نیمگ ءَ روکپتی بلوچستان ءَ انسانی ھکانی واستا کار کنوکیں گل بلوچ کمپعن فعالین ءِ رد ءَ گوستگیں سال ءَ بندات بیتگیں زھرشانی کساس سَے سد ءُ پنچ مردم گرگ بیگواہ کنگ بیتگ اَنت اے مردم گیشتر چھبار ءَ پانزدہ سالی ئیں جنکو ماھو بلوچ ءِ سر ءَ زوراکی ءِ ھلاپ ءَ زھرشانیانی پژدر ءَ گرگ بیتگ اَنت-

بلوچستان ءِ بنجاھی شھر شال ءَ دگہ سَے ورنائیں نودربر آوار جنگ ءَ پد بیگواہ کنگ بیتگ اَنت ءُ ھمے وڑ ءَ سبی ءُ کلات ءَ ھم دو مردم آوار جنگ ءَ پد بیگواہ کنگ بیتگ اَنت-

پشمبے ءِ شپ ءِ ساھت نُھ ءِ نزیک ءَ سَے بلوچ نودربر شال ءَ اے ون سٹی ءَ بیگواہ کنگ بیتگ اَنت- بیگواہ کنگ بیتگینانی تہ ءَ کیّا ء محمد اشرف، عاطف ء محمد فضل ءِ سیادی مشکے ءُ شیر خان ء سومار ءِ سیادی ناگ راگے ءَ اِنت –

دمگی مردمانی رد ءَ پوج ءَ نودربر گپتگ ءُ ناشناسیں جاھاں برتگ اَنت-

ھمے وڑ ءَ چہ سبی ءَ سر بیتگیں اھوالاں یک مردمے پوج ءَ دزگیر کنگ ءَ پد بیگواہ کرتگ –

کھول ءِ رد ءَ سبی بختیار آباد ءِ نزیک ءَ دو روچ پیش شاندار ء دلاور پاکستانی چیریں ادارہ ءُ پوج ءَ دزگیر کنگ ءَ پد بیگواہ کرتگ داں انگت بیگواہ اِنت-

ھمے وڑ ءَ گوستگیں روچ آدینگ ءَ کلات منگچر ءَ سلاہ بندیں مردماں نصر اللہ ء حاجی حضور بخش مینگل آوار جتگ ءُ برتگ-

دمگی مردمانی رد ءَ ساہ کانچیں گاڑی والائیں سلاہ بندین مردماں اے مرد دو زھگانی دیم ءَ آوار جتگ ءُ برتگ – دمگی مردمانی رد ءَ سلاہ بندانی سیادی سرکاری پلامرزی ءَ ھستیں گل ڈیتھ اسکواڈ ءَ اِنت-

بلوچستان ءَ زورانسری آوار جنیانی ھلاپ ءَ پرکاریں گل وائس فار بلوچ مسنگ پرسنز ءَ نودربرانی آوار جنی ءِ سر ءَ زھر درشان اتگ ءُ کیّا، عاطف ءُ شیر خان ءِ یل کنگ ءِ لوٹ کتگ-

یک درشانے ءَ آئی ءَ گوشتگ کہ گل ءَ ھال سر بیتگ پشمبے ءِ شپ ءَ ساھت نُھ ءَ نودربر کیّا ء محمد اشرف، عاطف ء محمد فضل جھمنند مشکے ءُ شیر خان جھمنند ناگ راگے چہ شال ءَ زورانسری آوار جنی ءِ آماچ کنگ بیتگ اَنت-

امریکہ ءِ وزیر ھارجہ انٹونی بلنکن ءَ بیجنگ ءَ ناگتی تر ءُ تاب ءَ کنگ ءَ اِنت آئی ءَ گوشتگ کہ چین ءِ گون ءَ دلرنجی کمتر بیتگ اَنت-

ھال سر کنوکیں دارہ اے ایف پی ءِ رد ءَ شکاگو یونیورسٹی ءَ وھدیکہ امریکہ ءِ وزیر ھارجہ انٹونی بلنکن ءَ جست گرگ بیتگ کہ چین ءِ گون ءَ شمئے زھری کمتر بیتگ اَنت آئی ءِ گوشگ ات کہ من ءَ ھمے وڑ سما بیت اِنت تو وھدیکہ گپ ءُ تران ءُ رھوت کن ئے گڑا ایشی ءِ آسر بیت اِنت –

انٹونی بلنکن ءَ گوشتگ ات کہ آ دگہ دنیا ءَ اے اوست داریں کہ آیانی گون ءَ زمہ واری ءِ گون ءَ سیادی ءَ برجاہ داریں – آ زانت اِنت کہ ما آئی ءِ گون ءَ کجام رنگ ءَ سیادی ءَ داشت کن ایں گڑا آئی ءِ سان کپ ایت –

امریکہ ءِ یک کارندھے ءِ رد ءَ انٹونی بلنک پنچ یا شش فروری ءَ بیجنگ ءِ تر ءُ تاب ءَ کنت-

اے تر ءُ تاب ءِ پیسلہ ھما وھد ءَ کنگ بیتگ کہ وھدیکہ سروک جوبائیڈن ءُ آئی ءِ چینی ھم درور شی جن پنگ ءَ نومبر ءَ بالی ءَ دنیا ءِ دو مزنیں زرکاریں تاکتانی میان ءَ دلرنجی ءِ گپ ءُ تران برجاہ بیتگ اَنت-

بلے بلنکن ءَ اے گپ گشتگ کہ تائیوان ءِ جیڑہ ءِ سر ءَ یک رندے پد ءَ گوش ایں ترس ءِ گمان مانشانیتگ اَنت گوستگیں لھتے سالانی توک ءَ ما ھرچی دیستگ منی ھیال اِنت کہ چین ءَ اے پیسلہ کتگ آ نی اسٹیٹس ءَ نہ لوٹ ایت بازیں دھکاں چہ برجاہ اِنت ءُ مئے ڈیھ ءِ میان ءَ سیادی ءِ جوانیں شرپدارگ ءَ سوبمند بیتگ اَنت-

آئی ءَ گوشتگ کہ ما چین ءَ اے گوش ایں گڑا آ گوش ایت اے مئے وت واجھیں جیڑھے مئے پژدر ایش اِنت امریکہ ءُ سرجمیں دنیا ڈیھ ءِ پلامرزی ءَ بہ بنت-

امریکہ ءِ وزیر ھارجہ انٹومی بلنکن شکاگو ءِ تر ءُ تاب ءَ بیتگ گڑا چریشی ءَ روس ءِ اُرشانی پژدر ءَ ھم وتی ھیال ءُ لیکھانی واستا روکپتی شھرانی راجدپتری یوکرینی کمیونٹی ھم ھوار بیتگ-

گوادر ءِ مھلوک ءَ جنرل آصف غفور ءِ بیھار

ٹی بی پی شونگال

گوادر ءَ ماھیگیرانی لس زھرشانی ءِ چیر ترینگ ءِ ھاتر ءَ پاکستانی پوج ءُ پولیس ءَ تاکت ءِ پدراھیں کارمرزی کُتگ ءُ حق دو تحریک ءِ سروک واجہ حسین واڈیلہ ءَ ھوار زرمبشت ءِ بازیں باسک دزگیر کُتگ اِت اَنت۔ چریشی ءَ پد گوادر ءِ دمگ ءِ ھنکین جیونی ، پشکان، اورماڑہ، سربندر ءُ پسنی ءِ جاور داں بازیں روچاں ھراب بیتگ اِت اَنت ءُ حق دو تحریک ءِ رھشون دزگیر کنگ بیتگ اِت اَنت کہ آ بلوچستان ءِ جتاجتائیں زندانانی تہ ءَ بندیگ اَنت ءُ آ لَٹ ءُ کُٹ ءِ نشانگ جوڑ کنگ بئیگ ءَ اَنت۔

گوادر ءِ نگیگیں جاورانی تہ ءَ گھتری آرگ ءِ ھاتر ءَ جماعت اسلامی ءِ کارگشاد لیاقت بلوچ ءِ مستری ءَ پاکستانی پوج ءِ اپسرانی ءُ حق دو تحریک ءِ کونسلرانی نیام ءَ ترانکاری بیتگ ۔ ترانکاریانی تہ ءَ پاکستانی پوج ءِ کور کمانڈر شال جنرل آصف غفور ءَ اَے بیھار دات کہ اگاں دیمتر ءَ گودار ءَ ھڑتال کنگ بیت اگاں نندانک دیگ بیت، گُڑا شمارا زندان ءَ مان کن آں۔چد ءُ پیسر ھم جنرل آصف غفور ءَ پشتوناں بیھار دیان ءَ گُشتگ اَت جنگ ءُ مھر ءِ تہ ءَ درست روا اِنت ءُ آئی ءَ شال ءِ کور کمانڈر ءِ اگدہ ءِ آیگ ءَ پد بلوچستان ءِ تہ ءَ ورنایانی زورانسری بیگواھی ءِ تہ ءَ گیشی اَتکگ۔

کور کمانڈر شال ءِ درشان بلوچستان ءُ سرجمیں پاکستان ءِ سیاسی پاٹی ءُ کارستانی نیمگ ءَ ترندی ءَ گوں ایر جنگ بئیگ ءَ اِنت۔ حق دو تحریک ءِ کونسلر کاکا سلیمان ءَ گُشتگ کہ ترانکاری ءِ نیام ءَ زرمبشت ءِ رھشوناں جنرل آصف غفور ءَ تچکی ءَ پسہ داتگ کہ بیھاراں گوں مارا چہ مئے لوٹاں دزکش کنگ بیت نہ کنت ءُ زلم ءُ زوراکیاں گوں مئے زرمبشت ھلاس کنگ نہ بیت اِنت۔ بلوچ نیشنل موومنٹ ءِ کارگشاد دل مراد بلوچ ءَ وتی درشان ءِ تہ ءَ گُشتگ کہ آصف غفور ءِ بیھار مئے ( بلوچستان ) ءِ نوآبادیاتی بستار ءَ پدر کنت۔

پرایمنیں زھرشانیاں تاکت ءِ زوراں گوں ھلاس کنگ ءُ پرایمنیں راھانی بند کنگ نہ تھنا آصف غفور بلکیں سرجمیں ڈیھہ ءُ ڈیھی پوج ءِ مائنڈ سیٹ اِنت۔ پاکستان پوج ءِ بلوچستان ءِ تہ ءَ پوج کشی ءُ نواب اکبر خان ءِ نمیرانی تھنا گوں جنرل مشرف ءَ بندوک کنگ ءِ جھد کنگ بیت بلے بلوچستان ءِ تہ ءَ برجاھیں راجی آجوئی ءِ جد ءُ جھد ءَ ھلاس کنگ ءِ ھاتر ءَ انگت ھم تاکت کارمرز کنگ بئیگ ءَ اِنت۔

راجی آجوئی ءِ جد ءُ جھد ءَ گوں بندوکیں پاٹی ءُ ادارگانی سر ءَ پیسر ءَ چہ بندش جنگ بیتگ ءُ پرایمنیں زھرشانی کنوکانی راہ بند کنگ بئیگ ءَ اَنت کہ ایش آجوئی ءِ جھد ءَ گوں بندوکیں ادارگانی لیکہ ءَ راست کنت کہ پاکستان ءِ تہ ءَ پرایمنیں جد ءُ جھد ءِ ھچ گنجائشت نیست اِنت ءُ تھنا سلاہ بندیں جد ءُ جھد ءَ گوں بلوچ راجی اگبال (آجوئی) دزگرگ بیت کن اَنت۔

روکپتی بلوچستان ءَ انسانی ھکانی واستا کار کنوکیں گل بلوچ کمپعن فعالین ءِ رد ءَ سال دوھزار ءُ بیست ءُ دو ءَ ایران ءَ پاھو دیگ بیتگین مردمانی تہ ءَ سَے ھکے مردمانی بھر سیستان و بلوچستان ءَ اِنت-

رپورٹ ءَ گوشگ بیتگ کہ اے اود ءَ انسانی ھکانی لگتمالی یکشل ءَ بوگ ءَ اَنت ءُ چرے گوستگیں سال ءَ یک سد ءُ ھپتاد ءُ نُھ بلوچ پاھو ءِ دار ءَ درنجگ بیتگ اَنت-

رپورٹ ءِ رد ءَ پاھو دیگ بیتگیں مردمانی تہ ءَ یک سد ءُ ھبدہ مردم نشہ ءِ باپاری ءِ پژدر ءَ پاھو دیگ بیتگ اَنت ءُ چل ءُ ھشت کوشانی بھتام جنگ ءُ پاھو دیگ بیتگ اَنت-

رپورٹ ءَ گوشگ بیتگ کہ سیستان و بلوچستان ءَ پاھو دیگ بیتگیں مردمانی کساس گیشتر اَنت بلے اے ھما ھال اَنت بلوچ کمپعن ءَ سر بیتگ ءُ آئی ءَ دمگی ءُ سرکاری پھناتاں راست کتگ اَنت-

بلوچ کمپعن فعالین ءِ گوشگ اِنت کہ سیستان ءُ بلوچستان ءَ پاھو دیگ بیتگیں بازیں مردمانی ھال ھمے سبب ءَ چیر تر اَنت کہ اود ءَ آیانی کھولاں ھال نہ بیت یا کہ ترس ءُ بیم ءَ آیانی کھول گپ ءَ کش ات نہ کن اَنت-

زانگ بہ بیت چریشی ءَ پیش ایمنسٹی انٹرنیشنل ءَ ایران ءَ جتا جتا راجانی رنگ ءُ نسل ءُ دینانی پژدر ءَ پاھو دیگ ءَ بند کنگ ءِ بیھار داتگ اَت-

سرجمیں ایران ءِ پاھو دیگ بیتگیں مردمانی کساس شنگ نہ بیتگ اَنت بلے ایرانی انسانی ھکانی گل ءِ رد ءَ گوستگیں سال ءِ یازدہ ماھانی توک ءَ پاھو دیگ بیتگیں مردمانی کساس پنچ سد ءَ گیش اِنت –

ایرانی انسانی ھکانی گل ءِ رد ءَ ایران ءَ زھرشانیانی وھد ءَ گوستگیں چار ماھانی توک ءَ یک سد ءُ نُھ مردم پاھو ءِ دیگ ءِ ترس ھست اِنت ءُ ایشانی توک ءَ چار کس پاھو دیگ بیتگ اَنت-