TBP Balochi

نامانتریں سرچ انجن گوگل ءِ کمپنی ءِ مالک الفابیٹ ءَ گوشتگ کہ 12 ھزار مردماں چہ نوکری ءَ کشگ ءَ اِنت- اشانی توک ءَ کار کنوکانی کساس شش درسد بیت اِنت-

برطانیہ ءِ ھال سرکنوکیں روئٹرز ءِ رد ءَ ٹیکنالوجی ءِ سیکٹر مردماں چہ نوکری ءَ کشگ ءَ اِنت پرچاکہ اے سیکٹر ءِ دیم ءِ آیوکیں (مصنوعی ذہانت) بزانکہ ھژاری ءَ گوں ھوار بوگ ءَ اِنت-

اے امریکی ءِ کمپنی (مصنوعی ذہانت) ءِ بزانکہ ھژاریں لیڈر مانگ بیت اِنت بلے الفابیٹ ءَ اے وھد ءَ مائیکرو سافٹ ءَ ٹیکنالوجی ءِ چیلنجیانی دیمپانی اِنت چوشکہ گمانی رنگ ءَ کجام اے وڑیں مواد جوڑ کت کنت چریشی ءِ بارو ءَ کارمرد کنوک آ جیڑ اَنت کہ ٹیکسٹ باکس ءَ ٹائپ کت کن اَنت-

گوستگیں ھپتگ ءَ مائیکرو سافٹ ءَ گوشتگ ات کہ زرکاری ءِ بازار ءَ آئی ءَ دَہ ھزار نوکر چہ نوکری ءَ ھلاس کنگ ءِ لاچار کنگ ءَ اَنت کہ اے کمپنی ءَ کار کنوکانی کچ ءُ کساس پنچ درسد اِنت-

مائیکرو سافٹ ءَ گوشتگ کپ آ وتی زھن ءَ مصنوعی ذہانت ءِ دروشم ءَ دیم ءَ بار اِت انت اے ھنچیں یک ٹکے کہ ایشی ءِ نشانی الفابیٹ ءِ سی ای او سندر پیچائی ءَ ھم کتگ-

سندر پیچائی ءَ دوھزار ءُ نوزدہ ءَ الفابیٹ ءِ سی ای او ءِ دروشم ءَ اگدو پھریز اتگ آئی ءِ گوشگ ات کپ الفابیٹ ءَ گوستگین دو سالانی توک ءَ یک جتائیں زرکاری ءِ دیمپانی اِنت اے ھما وھد ات کہ آئی ءُ مھلوک بازیں کچے ءَ داشتگ اَنت-

آئی ءَ گوشتگ ات کہ آ اے امل ءِ سرجمیں زمہ واری ءَ زور ات اِنت، سندر پیچائی ءَ گوگل ءِ کارمرد کنوک، ڈیولپرز ءُ باپار کار ءِ واستا یک نوکین پٹ ءُ پولے جوڑ کنگ ءَ اِنت آ (مصنوعی ذہانت) بزانکہ ھژاری اِنت-

سندھ ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نھ سد ءُ بیست ءُ ھپت روچ سرجم بوتگ انت، مروچی چہ حیدرآباد ءَ سیاسی ءُ چاگردی باسک داد محمد، خیربخش تالپور ءُ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ رھشون ءُ باسکانی سر ءَ زوراکی، کُشت ءُ کوش ءُ آھانی جوناں ژانگول ءُ ویرانگاں چگل دیوک کانود ءِ آمیدگس ءَ آرگ بہ بنت –

ماما قدیر ءَ گوشتگ کہ پاکستانی پوج ھما اولی روچ ءَ ھمے گوشگ انت کہ زورانسری آوار جنگ بوتگیں مردم مئے گور ءَ نہ انت ءُ اے مردم کوھ ءَ یا دبی ءَ شُتگ انت جنگ کنگ ءَ انت – کسے چہ ھمیشاں جست بکنت ھزارانی کچ ءَ بلوچ ورنایانی جون کئیا دور داتگ انت، اے چہ آزمان ءَ کپتگ انت، وش بھتی ءَ لھتے مردم یل کنگ بیت اِنت گڈا ھمایانی نپ ءَ زور انت ھمے گوش انت کہ ژانگولیں جون بلوچانی وت ماں وتی جیڑوانی سوب انت، اے گپ ءِ منگ ءَ تیار نہ انت کہ ژانگولیں جونانی چگل دیوک ھماھانی وتی چریں ادارھانی مردم انت، آیا اے زورانسری آوار جنوکاں سزا دئینت – تاں ھمود ءَ کہ پٹ پولی ءِ گپ انت گڈا پٹ پول ءَ پیش آھاں ھمے گوشتگ کہ کہ چیریں ادارھان نہ کتگ انت – آیا اے آمیدگس، کمیٹی، کمیشن ءُ ادارہ اشاں سزا دئینت، منی ھیالاں اے بس اھمکیں گپ انت ءُ دگہ ھچ –

آئی ءَ گوشتگ کہ استان یک زورگیرے ءُ وتی زورگیری ءِ برجاہ دارگ ءَ ھر چیز کت کنت، ناکہ استان وتی لشکر کشیاں بند کنت ءُ ناکہ کشندہ ٹولیاں ھلاس کنت، ناکہ جونانی چگل دیگ بند کنت ءُ ناکہ اے مارا دیمروئی دئینت – اے استان مارا بس تیر، جون، کبرستان ءَ ابید دگہ ھچ نہ دنت – استان ءِ زوراکی برجاہ انت مروچی بلوچستان ءِ تہ ءَ ھچ چشیں گِس ءِ نیست کہ پاکستانی پوج ءِ زلم زوراکیاں رک اِتگ – مئے جھد تاں گڈی بیگواھیں مردم ءِ یل بوگ ءَ تاں برجاہ مان ایت –

سربوتگیں ھالانی رِد ءَ گوستگیں روچ ءَ بزاں ھژدہ جنوری ءَ ناشناسیں مردماں پنجگور ءَ پاکستانی پوج ایف سی ءِ پانگِسے ءِ سر ءَ دزبمب اُرش ءِ کتگ –

اھوالکار ءِ رِد ءِ ایف سی پانگِسے سر ءَ دزبمب اُرش ھژدہ جنوری ءِ بیگاہ ءَ کنگ بوتگ کہ ناشناسیں مردماں اتکگ ءُ چتکان کلام چار راہ ءِ سر ءَ برجاھیں پوجی پانگسے سر ءَ دزبمب ءِ چگل داتگ ءُ در شُتگ انت – چریشی ءَ پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ سرمچاراں ھژدہ جنوری ءَ چار شمبے ءِ روچ ءِ بیگاھے ادار ھپت ءَ چتکان کلام چار راھے ءِ سر ءَ برجاھیں ایف سی پانگِس ءِ سر ءَ دزبمب اُرش ءِ کتگ کہ دزبمب پانگِس ءِ تہ ءَ کپتگ ءُ پوج ءَ جانی ءُ مالی تاوان رستگ –

میجر ءَ گوشتگ کہ زورگیریں پوج ءِ سر ءَ مئے اُرش بلوچستانءِ آجوئی ءَ تاں برجاہ مان انت –

بادل پہ وتن شیدا اَت

نبشتہ کار: ھوا بلوچ

دی بلوچستان پوسٹ

یک کولے گُش انت کہ ھما راج ءِ ورنایانی جون کماشانی کوپگ ءَ بنت ءُ مانش ءَ (کبرستان ءَ ) چہ ورنایانی ادیرہ سمبھینگ بنت آ راج ھچبر پروش نہ وارت بلوچ ورنایانی کربانی ھمے رنگ ءَ زانگ بیت پہ باندات ءَ وتی زند ندر کتگ ءُ ھچ چک ءُ پد نہ بنت چوناھا زندگ بوگ ءِ مول مُراد تھنا زندگی کنگ نہ اِنت-

بلکیں تئی امل ءُ کردار ترا زندگ بوگ ءِ پجار ءَ دنت ءُ کردار زند اِنت ،کردار پجار اِنت ءُ کردار لیکھانی مھکمیں پال اِنت انچیں مرگ کہ زندگی کنت ،مرگ ءَ پد دگہ زندے کناں ھمے کارست زندگ بنت راج دپترانی تہ ءَ بلے لھتے مرگ ھما مردم ءَ بیگواہ کنت کہ وتی زند ءَ کارستے جوڑ مہ کن اَنت بلے لھتے ورنایاں وتی زند ءَ انچیں امل ءُ کردار جوڑ کتگ انت کہ داں ابد زندگ بنت ما اگاں بلوچ راجدپتر ءَ چمشانکے بہ دے ایںگُڑا لھتے انچیں گنوک دیوانگ آشک مرید زمین زادگ دز کپ ایت کہ پہ بلوچ سر ڈگار ءِ ھاتر ءَ وتی تنگوئیں سراں دے اَنت ءُ شھادت ءِ پلسپہ ءَ ابدمان بنت ھمے کارستاں چہ یک کارستے پدائی بادل جان اِنت بادل یک بھادر ءُ جپاکشیں جھدکارے اَت گڈی وھد ءَ وتی راج ءِ بزگی،گلامی ءِ جیڑگ ءَ اَت، پہ وتی زمین ءَ شیدا ءُ گنوک اَت ،چہ گلامی ءِ سانکلانی سندگ ءُ وتی راج ءَ چہ زورگیر ءَ رکینگ ءَ جُھد ءَ اَت،پدائی بادل پہ سر ڈگار ءَ شیدائیں گنوکیں مریدے اَت ،چہ وتی زاتی زند ءَ چہ گیش راج ءِ ھیال ءَ اَت-

بلے کس ءَ نہ زانتگ اَت کہ اے ورنا وتی ھیال ءُ جیڑگانی تہ ءَ یک گیرت ءِ رمس (تاریخ ) کسھے نبیسگ ءَ اِنت پدائی بادل یک کتاب دوستیں مردمے اَت ھر وھد ءَ جیڑھانی سر ءَ پٹ ءُ پول ءُ نبشتہ کتگ ئِے یک شریں زانتکار ءُ نبشتہ کارے اَت ھوار یک ایمانداریں بلوچ جنگولے اَت بادل ھر وھد ءَ پہ وتی مات ءُ گھارانی بیگواھیں براتاں پہ جیڑگ ءَ اَت ،بادل جان مدام وتی بلوچ راج ءِ بے وسی،شُدکشی،بزگی،تکانسری ءِ درد ئِے مار اِت آئی ءَ را پہ وتی راج ءِ سر ءَ زلم ءُ زوراکیانی پسو یک انچیں دروشمے ءَ دات کہ دژمن سرین پروش بوت،اے جزبگ ءُ پلسپہ راج دپترانی تہ ءَ مدام نوک آھوگ ءَ دو دنتدان ءِ وڑ ءَ تاجگ بیت آئی ءَ اے ھم زانتگ اَت دانکہ کربانی دیگ مہ بیت ۔

ماتیں زمین آجو نہ بیت پدائی بادل ءَ مدام وتی سنگت سر ءُ سوج ءُ دلبڈی داتگ اَنت کہ اے آجوئی جنگ اِنت اد ءَ کربانی دیگ لوٹ ایت داں کربانی نہ دے اِت چو آجوئی ءَ گپت نہ کن ایں مارا پہ وتی ساہ ءُ سرانی کربان بوگ ءَ ھچ چک ءُ پد بوگی نہ اِنت-

پدائی بادل ءَ دشمن ءَ را پیش داشت کہ ما بلوچ ورنا مِرگ زانیں کربان بوگ زانیں بلے وتی زمین ءُ راج ءِ سر ءَ دگر ءِ زوراکیاں برداشت کت نہ کن ایں – بادل ءِ داتگیں پیگام ءُ بیھاراں دژمن گُڑینتگ ءُ بزدل کتُگ۔ مرچی ھمے ورنایانی کردار ءُ جنگی ھکمت املیاں دژمن ءِ سر ءَ یک نپسْیاتی ارشے کتگ نوں ھمے رنگ ءَ دژمن ءِ ھیال ءَ ھر ورنا چو بادل ءِ رنگ ءَ اِنت ھر مُچیانی تہ ءَ بس یکیں گوانک اِنت کہ مجید برگیڈ ءَ وانندگیں ورنا ھزارانی کچّ ءَ تیار کُتگ جھد ءَ را دگہ دروشمے داتگ ،راج ءِ تہ ءَ جھد کنگ ءِ کمک پیداک کتگ ۔چوناھا ھر ورنا، پیر،کماش زالبول سرجمیں ھمے بہ جیڑ اَنت کہ جھد ءِ دیمروی آئی ءِ تہ ءَ مھکمی آرگ مئے درستانی زمہ واری اِنت شھیدانی ھونانی پلسپہ ءِ زندگ دارگ ءُ مھکم کنگی اِنت آ پہ ھمے ھاتر ءَ زند ندرکتگ کہ راج بہ لیک ایت ءُ بہ مار ایت جھد نزور نہ اِنت بلکیں چو بولان ءُ ساھجی ءَ بیم دار اِنت باوہ اسلم جان ءِ کاراوان انگت دیم ءَ جنزان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں اھوالانی رد ءَ روکپتی بلوچستان ءِ بنجاھی شھر زھدان ءَ مروچی آدینگ ءِ نماز ءَ پد ایرانی لشکر ءِ زوراکی ءُ وتی انساپ ءِ ھاتر ءَ زھرشانی کتگ –

زھرشانی کنوک زاھدان ءِ مزنیں مسیت مکی ءَ نماز جمعہ ءَ پد بندات بیتگ ءُ شھر ءِ جتا جتائیں دگاں تران بیتگ اَنت-

زھرشانی کنوکانی دستاں پلے کارڈ ءُ بینرز بیتگ اَنت کہ آیانی سر ءَ ایرانی سرکار ءِ ھلاپ ءَ لبز نبشتگ بیتگ اَنت، زھرشانی کنوکاں خامنہ ای سرکار ءِ ھلاپ ءَ اوگام جتگ ءُ وتی انساپ ءِ لوٹ کتگ-

زھرشانی ءَ مردینانی ھواری ءَ زالبول ءُ زھگاں ھم بھر زرتگ ءُ دگانی سر ءَ سر کپتگ اَنت ءُ آیاں راسک ءِ نیکراھی رھشون مولانا عبدالغفار بلوچ ءِ یل کنگ ءُ دگہ بندیگانی یل کنگ ءِ لوٹ کتگ-

دومی نیمگ ءَ ایران ءِ گوریچانی استان گالیش گلستان ءَ ھم بلوچ عالم دین مولنا گورگیج کہ گوستگیں روچاں ایرانی عالمانی آمیدگس ءَ پیش بیگ ءِ ھکم ءِ ھلاپ ءَ زھرشانی بیتگ-

مولانا گورگیج گوستگیں روچاں آمیدگس ءَ پیش بیگ ءِ ھکم بیتگ بلے اود ءَ مھلوک گوستگیں پنچ روچاں آئی ءِ گس ءِ دپ ءَ زھرشانی نندانک ءَ نشتگ ءُ آئی ءِ برگ ءِ ھلاپ ءَ زھرشانی کنگ ءَ اَنت-

زانگ بہ بیت روکپتی بلوچستان ءَ ھما وھد ءَ زھرشانی بندات بیتگ اَنت کہ اود ءَ چھبار ءَ یک پانزدہ سالی ئیں جنکو ماھو بلوچ ءِ گون ءَ ایرانی پولیس آپیسر ابراھیم کوچکزئی ءِ دست ءَ آئی ءِ گیرت ءِ سر ءَ اُرش بیتگ ات-

چرے وئیل ءَ پد روکپتی بلوچستان ءَ زھرشانیانی یک درچے بندات بیتگ ات کہ اے درچ ءَ سدانی کچ ءَ مردم جنگ ءُ کُشگ بیتگ ات اَنت ءُ سدانی کچ ءَ مردم ٹپ ءُ ٹور کنگ بیتگ ات اَنت-

اے زھرشانی نی ھمک آدینگ ءَ یک یاداشتے ءِ پژدر ءَ بناہ کنگ بوگ ءَ اَنت-

مردمانی گوشگ اِنت اے زھرشانی کنوک اگاں انساپ دیگ نہ بیت اَنت گڑا اے زھرشانی پژدر گیش ھرابی ءِ نیمگ ءَ شت کن اَنت –

ایشی ءِ توک ءَ اے گندگ ءَ کیت اِنت کہ اود ءَ اے کساس ءَ مردمانی کُشگ ءُ زدگ کنگ ءَ ابید مردم بے توار نہ بیتگ اَنت گڑا ایشی ءِ توک ءَ ھمے گمان پدر کنت اے مھلوک وتی انساپ ءِ ھاتر ءَ گیشیں گام چست کت کن اَنت-

بلوچستان ءِ دمگ کیچ ءِ ھند سنگ آباد ءَ تجابان لیٹریسی سوسائٹی ءِ جارکش ءَ وتی شنگ کرتگیں درشان ءَ گوشتگ کیچ ءِ دمگ سنگ آباد ( سری کرکی) ءَ ھستیں گورنمنٹ بوائز ھائی اسکول سنگ آباد ءُ گرلز پرائمری اسکول سنگ آباد ءَ بازیں وھداں چہ استادانی کمی ءُ سائنس لبارٹعی، چکاسی ھال، کوٹی ءُ دگہ دگہ آسراتیانی نہ بوگ ءِ ھلاپ ءَ گامگیج زورگ بہ بیت ءُ تچکی ءَ اے جیڑھانی گیش ءُ گیوار کنگ بہ بنت-

آئی ءَ گوشتگ کہ ھمے زوتاں سنگ آباد قاسم بازار ءَ یک دگہ پرائمری اسکولے سرکاری کاگداں گون جوڑ کنگ بیتگ بلے راستی ایش انت کہ اے اسکول ءِ بنپد ھم نیست اَنت بلے اے اسکول ءِ کوٹی ءِ جاہ ءَ یک گدانے ھست اِنت دمگی مردماں وتی کمک ءَ وت جوڑ کرتگ-

جارکش ٹی ایل ایس ءَ گوشتگ کہ گدان دروشمیں اسکول اسکول ءِ نگاھاں کم ءُ کمتری ءِ نگاھاں گیش گندگ بوگ ءَ اِنت –

آئی ءَ گوشتگ کہ بلوچستان ءِ سرکار ءُ مھکمہ ءِ تعلیم ایشی ءِ گامگیج ءَ بہ زور ایت ءُ ایشی ءَ ھوار ھوار زمہ داراں بہ گپت ءُ آیاں جست بہ کنت-

جارکش ءَ گوشتگ کہ سنگ آباد ءِ انیگیں وانگی جاورانی سر ءَ جیڑہ ءَ بہ چار ایت ءُ الکاپی بنچکاں بہ گیشین ایت ءُ ایشی ءِ ھوار ھوار سنگ آباد ءِ استاد ءُ ھیڈماسٹراں سیاسی لیکھانی چست ءُ ایر ءُ وت مانیاں ٹپاسی بہ کنت ءُ ایشی ءِ دارگ ءِ ھاتر ءَ بیوکیں گاماں بہ دار ایت-

آئی ءَ لوٹ کتگ ءُ گوشتگ کہ وانگی ادارھاں وانگی ادارہ بہ کنت نانکہ ایشاں سیاسی کارنامھانی سر ءَ کار بہ گر اَنت-

آئی ءَ گوشتگ کہ کیچ ءِ دمگ ءَ ایجوکیشن آفسراں سرپدی داتگ کہ آ کسے ءِ گوشگ ءَ دگہ چیزاں پھریز بہ کن اَنت ءُ وانگی دشمنی بھراں وت ءَ دور بہ دار اَنت اگاں گڑا آیانی ھلاپ ءَ ترندین گامگیج زورگ بیت اِنت-

بلوچستان ءِ دمگ مَچ ءَ چہ شال ءَ دیم پہ پشاور ءَ روکیں ریل ناشناساں نشانگ کتگ-

گیشیں سر بیتگیں اھوالانی رد ءَ سبی ءَ پشاور ءَ روکیں ریل جعفر ایکسپریس ناشناسیں مردماں بمبے ءِ نشانگ کتگ –

دمگی مردمانی رد ءَ اُرش ءِ زد ءَ اتکگیں انجن ءَ ھوار دو بوگی پٹری ءَ لگوشتگ اَنت ءُ اُرش ءَ بازیں مردمے ءِ زدگ بوگ ءِ ھال اِنت-

ریسکیو ءِ ٹیم وئیل جاہ ءَ رھادگ بیتگ اَنت ءُ اُرش ءِ سبب ءَ سبی ءُ شال ءِ ٹریک ٹرینانی روگ ءُ آیگی ءِ ھاتر ءَ بند کنگ بیتگ-

ندر پہ اُستاد راشد دیدار ءِ نام ءَ

شائر: سلیم ناز

دی بلوچستان پوسٹ

کیچ ءِ دمکاں راشد ءِ دیدار بیت
چو کہ سال ءَ ائید ءِ پیم ءَ گار بیت

وهد ءِ   دست ءَ   همسپر رد کپتگیں
کے گواهی دات سرے بازار بیت

آدم ءِ اشک ءَ   بنی آدم مہ کنت
مست ءُ شیدا دیدگاں چہ هار بیت

مکتب ءِ  لاڑیں   منی  پل ءُ گلاب
چو نہ زانت امروز ءِ درداں بار بیت

روچ ءُ شپ کنتیں وتی روچاں هساب
مشکلیں مرچاں دو بر آ سار بیت

َاَشکی    انچیں   وبالے همبلاں
اندار ءَ   مردم  وتی  بیمار  بیت

وهد ءُ باریگ ءِ سلیم بس منتیں
مئے وڑیں نازانت اد ءَ آشکار بیت

من ءَ ھوار بازیں چوشین انسانی واھشت بیت اِنت آ پیری ءَ چہ بہ رک ایت اُمر ءِ مزن بوگ ءَ انسان ءِ جسم ءِ سر ءَ سان نہ کپگ ما گیشتر سائنسی فکشن تامرانی ءَ دیستگ اَنت بلے راستی ءَ اے وڑ بوت کنت؟

العربیہ ءَ نیٹ ءَ برطانیہ ءِ روتاک “ڈیل میل ” ءِ رپورٹ ءِ درور دیان ءَ گوشتگ مردمانی گمان اِنت آیوکیں پنچ سالانی توک ءَ ایٹنی ایجنگ یا پیری ءِ دارگ ءِ ھاتر ءَ دارو درمان شوھازگ بیتگ اَنت-

چہ مُشکاں پٹ ءُ پول کنگ بیتگیں یک پٹ ءُ پولے ءِ دیم ءَ اتکگ ایشانی نوکیں دروشم ودی کت کن ایں ءُ ایشانی اُمر ھم گیش بیت کت کنت نوکیں انداماں ودی بوگ ءِ جسمانی کمزوری ءِ توک ءَ کمی، دل ءُ پُپانی سلامتی گیشتر بوت کنت-

امریکہ ءِ ھارورڈ یونیورسٹی ءَ اینٹی ایجنگ ءِ سر ءَ کار کنوکیں سائنسدانانی گمان اِنت اے پٹ ءُ پول ءَ انسانی واستا چکاسگ ءِ راہ پچ بیت کت کن اَنت ءُ آ کینسر ءُ ڈیمنشیا ( زھنی بگار) ءِ وڑیں نادراھیانی رکگ ءِ کابل بنت –

زانتکارانی گوشگ اِنت سال دوھزار ءُ بیست ءُ ھشت ءَ اے وڑیں درمانے ءِ آیگ ءِ نھاد جاھاں زور ءِ گمان اِنت-

روتاک دی ٹائمز ءِ رد ءَ اے پٹ ءُ پول ءَ اسپانسر کنوکیں کمپنی رجووینیٹ بائیو ءَ بندوکیں چیف سائنٹسٹ نوح ڈیوڈسن ءَ گوشتگ کہ ’ اے ٹیکنالوجی ءِ کمک ءَ مئے واستا اے دلجمی بیتگ کہ آیوکیں پنچ سالانی توک ءَ انساناں چہ چیزے در بہ بریں ‘-

زانتکار ءِ گوشگ اِنت راجدپتری رنگ ءَ منگ بیتگ کہ درمان سلامتی ءِ رنگ ءَ زندگی ءَ انسان ءِ اُمر ءَ گیشتر کُت کنگ ءِ جوانیں کرد پیلو کت کنت بلے ایشی ءِ اے متلب ھچ نہ اِنت پیری کجام ھم رنگ ءَ سانمندی ءِ دروشم ءَ سما نہ بیت اِنت-

اگاں اُمر ءِ کسان کنگ ءَ نوکیں آئیڈیا اتکگ اَنت گڑا اے منگ بیت اِنت نوکیں دزکپتگیں دروشمی درماناں پد اُمر ءِ گیش کنگ ءِ گمان ھم ھست اِنت-

ھا اے جوڑ کرتگیں درمانانی مٹی ءَ اُمر ءِ گیشی بیت اِنت؟ اے جست ءِ پسھی ءِ واستا زانتکاراں یک سد ءُ بیست ءُ چار ھپتگان پیریں مشکانی چکاس کتگ کہ ایشانی توک ءَ یک مُشکے ءِ اُمر ھپتاد ءُ ھپت سال انسان ءِ اُمر ءَ بروبر بیتگ-

اے مشکانی یک ٹولی ءَ ھمک ھپتگ ھالیگین انجیکشن جنگ بیتگ ءُ ھمے وڑ دومی ٹولی ءَ جنیٹنگ کوڈ گیش کنوکیں مواداں ھوار امجیکشن جنگ بیتگ اَنت-

دومی ٹولی ءِ مشکاں لھتے دگہ درمان دیگ بیتگ اَنت چریشی ءَ پد گندگ بیتگ درمان دیوکیں ٹولی ھژدہ ھپتگ ءَ گیش زندگ بیتگ اَنت ءُ اے پٹ ءُ پول ءَ پد زانتکاراں گوشتگ کہ اُمر ءِ گیش کنگ ءِ سیادی انساناں چہ گیشتر کنگ بیت اِنت-

گوستگیں روچ ءَ بزاں ھژدہ جنوری چارشمبے ءِ سُهب ءَ چہ پیشکان وانگی بُنجل Pishukan Reading Club ءِ نیمگ ءَ ” ماتی زُبان ءِ ارزشت ” ءِ بُن گپ ءِ پد ءَ پہ نودربراں ماں کنرکی بازار ءِ مزن وانگجاہ ءِ ھال ءَ یک مراگشے برجم دارگ بوتگ – ماں اِے مراگش ءَ دَر ءَ آتکگیں مھمان بلوچستان مزن شاه دربرجاه ءِ شعبہ پشتو ءِ استاد ءُ گوستگیں ڈین فیکلٹی آف لینگویجز ڈاکٹر نصیب الله سیماب ، بلوچی ءِ سرکماش ءُ بلوچی زبان ءِ نامداریں ندکار ءُ شائر ڈاکٹر رحیم مهر ، بلوچی ءِ اُستاد ءُ بلوچی زبان ءِ مزن نامیں ندکار ءُ شائر ڈاکٹر اِے آر داد ، سوشولوجی ءِ استاد عبدالرحیم نصر ، پشتو زبان ءِ نامی ئیں لبزانت خلیل باور هَوار بوتگ انت –

ماں مراگش ءَ هَندی لبزانت شائر ءُ ندکار ڈی-ای-او عزیز پیشُکانی ، عیسی گُل ، عارف محمود ، کنرکی وارڈ ءِ مزن وانگجاھے ہیڈماسٹر واجہ نورالامین ، کیمل لائبریری پلیری ءِ کارمستر اسماعیل یعقوب ءُ وانگجاهانی ایندگہ اُستاد هم ساڑی بیتگ اَنت –

مراگش ءِ پاگواجہ ڈاکٹر نصیب اللہ سیماب ءُ هاسیں مہمان ڈاکٹر اِے آر داد بوتگ انت- مراگش ءِ جارچینی ءِ ڈُبّہ نور محمد نور ءَ گون بوتگ اِے مراگش ءَ گُشتانک ، لچّہ ، کسمانک ، جست و پُرس ءُ کوئیز ءِ بَھر هَوار بوتگ انت ءُ کتابی میڑه یے هم کنگ بوتگ –

مراگش ءِ بندات ءَ هَند ءِ جتائیں وانگجاه ءِ زهگ ءُ نودربراں ” ماتی زبان ءِ ارزشت ” ءِ سرهال ءَ وتی گُشتانک،وش گٹی ءَ سوت ءُ لچه ونتگ انت ،دومی بھر ءَ مراگش ءِ بُن گپ ءِ پَد ءَ ” پیشُکان وانگی بُنجل ” ءِ باسک سلال ساوَڑ ، عارف محمود ، ڈاکٹر رحیم مهر، عزیز پیشُکانی ، ڈاکٹر اِے آر داد ءُ ڈاکٹر نصیب اللہ سیماب ءَ تران کُتگ ءُ وتی گُشتانک داتگ انت اِے میان ءَ گَل ءِ نیمگ ءَ چہ ڈاکٹر ناگمان ءَ گِرگ بیتگیں گُلگدارے ءِ توار بندے اوں پیش کنگ بوتگ –

مراگش ءِ سیمی بھر مراگش ءِ سرهال ءِ رِد ءَ کسمانکے بوتگ ءُ آسری بزاں چارُمی بھر هَند ءِ دگہ دگہ وانگجاهانی زهگانی نیام ءَ کوئیز ءُ جست ءُ پرس بوتگ –

گُڈسر ءَ چہ گل ءِ نیمگ ءَ پہ بھر زُرتگیں نودربراں داد بَھر کنگ بوتگ ءُ آسر ءَ گَل ءِ باسک فوزیہ بلوچ ءَ اتکگیں کُلّیں مھمانانی منّت گپتگ ءُ مراگش ءِ آسری ءِ جار جَتگ –