گوادر ءِ مھلوک ءَ جنرل آصف غفور ءِ بیھار
ٹی بی پی شونگال
گوادر ءَ ماھیگیرانی لس زھرشانی ءِ چیر ترینگ ءِ ھاتر ءَ پاکستانی پوج ءُ پولیس ءَ تاکت ءِ پدراھیں کارمرزی کُتگ ءُ حق دو تحریک ءِ سروک واجہ حسین واڈیلہ ءَ ھوار زرمبشت ءِ بازیں باسک دزگیر کُتگ اِت اَنت۔ چریشی ءَ پد گوادر ءِ دمگ ءِ ھنکین جیونی ، پشکان، اورماڑہ، سربندر ءُ پسنی ءِ جاور داں بازیں روچاں ھراب بیتگ اِت اَنت ءُ حق دو تحریک ءِ رھشون دزگیر کنگ بیتگ اِت اَنت کہ آ بلوچستان ءِ جتاجتائیں زندانانی تہ ءَ بندیگ اَنت ءُ آ لَٹ ءُ کُٹ ءِ نشانگ جوڑ کنگ بئیگ ءَ اَنت۔
گوادر ءِ نگیگیں جاورانی تہ ءَ گھتری آرگ ءِ ھاتر ءَ جماعت اسلامی ءِ کارگشاد لیاقت بلوچ ءِ مستری ءَ پاکستانی پوج ءِ اپسرانی ءُ حق دو تحریک ءِ کونسلرانی نیام ءَ ترانکاری بیتگ ۔ ترانکاریانی تہ ءَ پاکستانی پوج ءِ کور کمانڈر شال جنرل آصف غفور ءَ اَے بیھار دات کہ اگاں دیمتر ءَ گودار ءَ ھڑتال کنگ بیت اگاں نندانک دیگ بیت، گُڑا شمارا زندان ءَ مان کن آں۔چد ءُ پیسر ھم جنرل آصف غفور ءَ پشتوناں بیھار دیان ءَ گُشتگ اَت جنگ ءُ مھر ءِ تہ ءَ درست روا اِنت ءُ آئی ءَ شال ءِ کور کمانڈر ءِ اگدہ ءِ آیگ ءَ پد بلوچستان ءِ تہ ءَ ورنایانی زورانسری بیگواھی ءِ تہ ءَ گیشی اَتکگ۔
کور کمانڈر شال ءِ درشان بلوچستان ءُ سرجمیں پاکستان ءِ سیاسی پاٹی ءُ کارستانی نیمگ ءَ ترندی ءَ گوں ایر جنگ بئیگ ءَ اِنت۔ حق دو تحریک ءِ کونسلر کاکا سلیمان ءَ گُشتگ کہ ترانکاری ءِ نیام ءَ زرمبشت ءِ رھشوناں جنرل آصف غفور ءَ تچکی ءَ پسہ داتگ کہ بیھاراں گوں مارا چہ مئے لوٹاں دزکش کنگ بیت نہ کنت ءُ زلم ءُ زوراکیاں گوں مئے زرمبشت ھلاس کنگ نہ بیت اِنت۔ بلوچ نیشنل موومنٹ ءِ کارگشاد دل مراد بلوچ ءَ وتی درشان ءِ تہ ءَ گُشتگ کہ آصف غفور ءِ بیھار مئے ( بلوچستان ) ءِ نوآبادیاتی بستار ءَ پدر کنت۔
پرایمنیں زھرشانیاں تاکت ءِ زوراں گوں ھلاس کنگ ءُ پرایمنیں راھانی بند کنگ نہ تھنا آصف غفور بلکیں سرجمیں ڈیھہ ءُ ڈیھی پوج ءِ مائنڈ سیٹ اِنت۔ پاکستان پوج ءِ بلوچستان ءِ تہ ءَ پوج کشی ءُ نواب اکبر خان ءِ نمیرانی تھنا گوں جنرل مشرف ءَ بندوک کنگ ءِ جھد کنگ بیت بلے بلوچستان ءِ تہ ءَ برجاھیں راجی آجوئی ءِ جد ءُ جھد ءَ ھلاس کنگ ءِ ھاتر ءَ انگت ھم تاکت کارمرز کنگ بئیگ ءَ اِنت۔
راجی آجوئی ءِ جد ءُ جھد ءَ گوں بندوکیں پاٹی ءُ ادارگانی سر ءَ پیسر ءَ چہ بندش جنگ بیتگ ءُ پرایمنیں زھرشانی کنوکانی راہ بند کنگ بئیگ ءَ اَنت کہ ایش آجوئی ءِ جھد ءَ گوں بندوکیں ادارگانی لیکہ ءَ راست کنت کہ پاکستان ءِ تہ ءَ پرایمنیں جد ءُ جھد ءِ ھچ گنجائشت نیست اِنت ءُ تھنا سلاہ بندیں جد ءُ جھد ءَ گوں بلوچ راجی اگبال (آجوئی) دزگرگ بیت کن اَنت۔