TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کتگیں یک درشانے ءَ گشتگ کہ کیل کور ءَ دشمن ءِ گون ءَ جنگ ءَ شھید بیتگیں ھمراھیں سرمچار رسول بکش ءَ را سھر چکیں دروت ندر کن ایں ائی ءَ گوشتگ کہ بیست ءُ چار فروری دوھزار ءُ بیست ءُ سَے ءَ کیل کور ءَ پاکستانی پوج ءِ گون ءَ جنگ ءُ چوپ ءَ سرمچار رسول بکش پنام کلو ء دوشمبے شھید بیتگ-

جارکش ءَ گوشتگ کہ آ گل ءِ سرجمی ءَ ھوار بوگ ءَ پیسر آ جھد ءِ آجوئی ءِ سفر ءَ ھوار بیتگ ءُ سرمچارانی راہ ءُ رھبندانی واستا یک جوانیں کردکارے بیتگ- آ سال دوھزار ءُ چاردہ ءَ گل ءَ سرجم ءَ ھوار بیتگ آ یک ملنگ داب ءُ مھنتی سنگتے بیتگ آئی ءِ کھول ھم پوج ءِ زوراکیانی نشانگ بیتگ اَنت آئی ءَ یکدم بزگی ءُ گریبی گوازینتگ ءُ ایشی ءَ ابید ھم آ انگت ءَ مھکمین گاماں گون تمرد بیتگ-

آئی ءَ گوشتگ کہ آ کمانڈر بھار پنام ءِ گوھرام ءِ مستریں برات بیتگ کہ سال دوھزار ءُ بیست ءُ دو ءَ شھید بیتگ-

بی ایل ایف شھید رسول بکش ءَ آئی ءِ شھیدی ءِ پھر درشان کنت-

روکپتی بلوچستان ءِ ھاش ءَ یک مردمے دگ ءِ وئیل ءَ بیران بیتگ-

گیشیں ھالانی رد ءَ ھاش ءَ دگ ءِ وئیل ءَ نیکراھی رھشونے بیران بیتگ- بیران بیتگیں مردم ءِ پجار اھل سنت ءِ اسماعیل آباد ھاش ءِ جھمنندیں مولوی محمود جمشیدزئی ءِ نام ءَ زانگ بیتگ-

ھالانی تہ ءَ گوشگ بیتگ کہ مولوی محمود ھاش ءَ یک نیکراھی وانگجاھے ءِ اُستاد بیتگ کہ مروچی آ دگ ءِ وئیل ءَ بیران بیتگ –

روکپتی بلوچستان ءَ دگ ءِ وئیلانی تہ ءَ مردم بیران ءُ زدگ بوگ ءَ اَنت کہ چریشی ءِ گیشتریں سبب دگانی سر ءَ ترندی روگ ءِ سبب گوشگ بوگ ءَ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ سی ستمبر ءَ بیوکیں زھرشانی ءِ وھد ءَ زدگ بیتگیں ورنایے ماں کرمان ءَ بیران بیتگ-

بیران بیتگیں ورنا ءِ پجار سعید ریگی ءِ نام ءَ زانگ بیتگ کہ آئی ءَ گوستگیں شپ ءَ وتی ساہ داتگ ءُ بیران بیتگ-

ھالانی تہ ءَ گوشگ بیتگ کہ آ سی ستمبر ءَ روکپتی بلوچستان ءِ بنجاھی شھر زاھدان ءَ بیوکیں زھرشانی ءَ زدگ بیتگ ءُ پد ءَ آ پنچ رند ءَ دِر ءُ دوچ ءَ پد گوستگیں گیشیں جاندراھی ءِ واستا ایران ءِ اُستان کرمان ءَ برگ بیتگ بلے اود ءَ آ نہ رس اتگ ءُ آئی ءَ وتی ساہ ءَ داتگ اَنت-

زانگ بہ بیت روکپتی بلوچستان ءَ چھبار ءَ پولیس آپیسر ءِ دست ءَ پانزدہ سالی ئیں جنکو ماھو بلوچ ءِ گون ءَ بیوکین زوراکیاں پد چھبار ءَ بندات بیتگیں زھرشانی پراہ ءُ دراج کش بیت ءُ سی ستمبر ءَ زاھدان ءَ یک مزنیں کچے ءَ زھرشانی بندات بیت-

اے زھرشانی ءَ اود ءَ سدانی کَچ ءَ بلوچ نمازی ءُ مھلوک ایرانی لشکر ءِ تیرانی آماچ کنگ بیتگ اَنت ءُ اود ءَ سد ءِ کچ ءَ مردم کُشگ ءُ سَے سد ءِ کچ ءَ مردم زدگ کنگ بیت اَنت-

سر بیتگین ھالانی رد ءَ روکپتی بلوچستان ءِ تیابدپی شھر چھبار ءَ گوستگین دو شپ ءَ پیش ایرانی انکلاب ءِ پاسداران ءِ کارندھاں بیلڈوز ءِ گون ءَ لس مھلوک ءِ گدان ءُ جاہ لڑینتگ ءُ دور داتگ اَنت-

اھوالانی رد ءَ گدانانی دور دیگ ءِ ھواری ءَ اود ءَ سوچگ ھم بیتگ اَنت چریشی ءَ بازیں پیش ءَ جوڑ بیتگیں کاپر ءُ دگہ چیزانی سر ءَ آس جمبور بیتگ-

چاگردی ترامجاھاں شنگ بیتگیں تامرانی تہ ءَ گندگ بیت اِنت کہ اود ءَ مھلوک ءِ لوگ ءُ جاہ کروجگ بوگ ءَ اَنت-

تامر بندانی تہ ءَ گندگ بیت اِنت کہ اود ءَ وتی لوگ ءُ جاھانی رکینگ ءِ واستا دستبندی کنگ ءَ اَنت-

تامر بندانی توک ءَ توار اشکُنگ بیت اِنت کہ اود ءَ پاسدارانِ انکلاب تیرگواری ھم کنگ ءَ اِنت –

زانگ بہ بیت روکپتی بلوچستان ءِ دمگ چھبار ءَ ھوار زاھدان ءُ ھاش ءَ ھم چوشیں وئیل رپورٹ بیتگ اَنت-

یونان ءَ دو ٹرینانی ٹکر ورگ ءَ کم چہ کم بیست ءُ شش مردم بیران ءُ ھشتاد ءُ پنچ زدگ بیتگ اَنت-

ھال سرکنوکیں ادارہ ایسوسی ایٹڈ پریس ءَ یونان ءِ واکدارانی درگت ءَ گپ کنان ءَ وئیل بنجاھی شھر ایتھنز ءُ تھیسالونیکی ءِ شھرانی میان ءَ ھما وھد ءَ پیش اتکگ کہ یک مساپر برین گاڑی ءَ مال بردار گاڑی ءَ را ٹکر داتگ-

وئیل ءِ سبب ءَ بازیں بوگی پٹڑی ءَ چہ سستگ ءُ ڈن ءَ شتگ ءُ اود ءَ ایاں آس کپتگ-

لاریسا شھر ءِ ھسپتال ءِ واکدار ءِ گوشگ اِنت زدگ بیتگینانی تہ ءَ بیست ءُ پنچ مردمانی جاور ناگیگ اَنر –

وئیل ءَ پد فائربریگیڈ ڈیپارٹمنٹ ءِ جارکس ویسیلیس ورتھاکوئیس ءَ گوشتگ کہ مردمانج کشگ ءِ درچ برجاہ اِنت چریشی ءَ ترندیں جاورانی دیمپانی کنگ کپگ اِنت – اے کار ءَ بازیں کچے ءَ ایمبولینسز بھر زورگ ءَ اَنت-

یونان ءِ سرکاری ٹیلی وژن ءِ رپورٹس ءَ گوشگ بیتگ کہ ریسکیو ورکرز ھیڈ لیمپس اش جتگ ءَ ترندین دوتکانی توک ءَ کار کنگ ءَ اَنت ءُ ستکگیں بوگیانی توک ءَ سوچوکیں مردمانی کشگ ءِ جھد ءَ اَنت-

تھیسیلی ءِ گورنر کوستس ایگوریتس ءَ سرکاری ٹیلی وژن ءَ گوشتگ کہ اے ناوشیں وئیل شپ ءَ پیش اتکگ کہ ایشی ءِ بارو ءَ گوشگ باز مشکل اِنت –

ٹرین یک بھرے سرجم ءَ تباہ بیتگ ما کرین ءِ آرگ ءِ جھد ءَ اِیں دانکہ پٹڑی ءِ سر ءَ بوگی ءُ کپتگیناں چست بہ کم ایں کہ ھرچ نیمگ ءَ شنگ ءُ شانگ بیتگ اَنت ءُ ٹرین سروا بند کنگ بیتگ-

واکدارانی گوشگ اِنت ریسکیو آپریشن ءِ کمک ءَ پوج ءَ گوں رھوت کرتگ، ریل اپریٹر ھلینک ءَ وئیل ءِ درگت ءَ گوشتگ کہ گوریچان ءَ مساپر گاڑی تھیسالونیکی ءِ نیمگ ءَ رؤگ ءَ بیتگ کہ اود ءَ سَے سد ءُ پنجاپ مساپر سوار بیتگ اَنت کہ وئیل ءِ آماچ بیتگ-

بچ اتگیں مساپر ءُ یا کمے زدگ بوتگیں مساپراں بسانی گون ءَ تھیسالونیکی ءَ سر کنگ ءَ اود ءَ چہ وئیل جاہ ءَ کساس یک سد ءُ سِی کلو میٹر ءِ دوری ءَ اِنت-

روکپتی بلوچستان ءِ بنجاھی شھر زاھدان ءَ ایرانی لشکریاں دگہ یک بلوچ ورناھے دزگیر کنگ ءَ پر ناشناسیں جاھاں بُرتگ۔ 

 اھوالانی ردءَ  24 فروری ءَ لشکریانی کارمنداں  زاھدان ءَ  بلوچ ورناہ ایوب لجائی دزگیر کنگ ءَ پد ناشناسیں جاھاں بُرتگ۔

 چم دستگیں شاھدانی ردءَ ایوب جمعہ ءِ نماز ءِ وانگ ءَ پد چہ مسیت ءَ دیم پہ وتی لوگ ءَ واتر بئیگ ءَ بیتگ کہ لشکریاں آ ترندیں لٹ شاپی ءَ پد دزگیر کُتگ۔

دومی نیمگ ءَ  بلوچ ایکٹوسٹ کمپین ءِ 2022 ءِ سالیگیں رپورٹ ءِ ردءَ گل ءَ سرجمی ءَ 305 دزگیریانی ارزی رستگ اَنت، ءُ اے ارزی ماھو بلوچ جُنز ءَ چہ پیسر ءُ رند دو بھرانی تہءَ بھر کنگ بیتگ۔

چابھار ءِ پولیس چیف ءِ نیمگ ءَ ماھو نامی 15 سالیگیں بلوچ جِنِک ءَ گوں سلکاری کنگ ءِ اھوال ءِ دیما آیگ ءَ پد بلوچستان ءِ جتاھیں ھند ءُ دمگانی تہءَ زھرشانی کنگ بیتگ اِت اَنت ءُ سرجمیں ڈیھہ ءَ زھرشانیاں ھوار دزگیریانی کساس ءِ تہءَ ھم اناگتی ءَ گیشی اتکگ۔

2022 ءَ سرجمیں دروشم ءَ 307 بلوچ شھری ایرانی پوج، لشکری ءُ دگہ ادارگاں دزگیر کُتگ اَنت وھدیکہ اَے زھرشانی نیام ءَ بازیں بیران ءُ ٹپی ھم بیتگ اَنت۔

اٹلی ءِ زرءَ باھوٹیانی لانچ ءِ بُڈگ ءِ وئیل ءَ پد لیبیا ءَ ھم انچیں وئیل ءِ دیما اتکگ کہ اِشی تہءَ بازیں پاکستانی شھریانی بیرانی ءِ ھال پیداک اِنت۔

پاکستانی دری کارانی جارکش ممتاز زھرا بلوچ ءِ ردءُ اٹلی ءَ پد لیبیا ءِ شھر بن غازی ءِ نزیکءَ لانچ ءِ وئیل دیما اَتکگ۔

دفتر خارجہ ءِ جارکش ءِ ردءَ لیبیا ءَ لانچ ءِ وئیل ءَ 3 پاکستانیانی بیرانی ءِ ھال اِنت، طرابلس ءَ پاکستانی سپارت گِس جونانی پاکستان ءَ دیم دیگ ءِ تہءَ کمک کنگ ءَ اِنت۔

اھوالانی ردءَ لانچاں سواریں پاکستانی گیر قانودی ردءَ چہ لیبیا ءَ دیم پہ اٹلی ءَ رؤگ ءَ بیتگ اَنت۔

یات بہ بیت کہ یک شمبے ءِ روچ ءَ ھم اٹلی ءَ لانچ ءِ بُڈَگ ءَ وئیل ءَ 4 پاکستانی بیران بیتگ اِت اَنت۔

ترکی ءَ چہ اٹلی ءَ رؤکیں گیر قانودی باھوٹیانی لانچ زرءَ یک تلار ئے ءَ ڈک ورگ ءَ چہ بُڈ اِتگ کہ اِشی آسر ءَ پاکستانیاں ھوار 59 مردم بیران بیتگ اَنت ءُ بازیں انگت بیگواہ اَنت۔

بلوچستان ءِ دو جتائیں دمگ کیچ ءُ پنجگور ءَ ناشناسیں سلاہ بندیں مردماں پاکستانی پوج ءِ سر ءَ اُرش کتگ ءُ اپسرے ءَ ھوار چار کارندہ کُشتگ اَنت، دومی نیمگ ءَ اے اُرش زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ زرتگ-

بلوچستان لبریشن فرنٹ ءِ جارکش میجر گْوھرام بلوچ ءَ پنجگور ءُ تربت ءَ پاکستانی پوج ءِ سر ءَ اُرشانی زمہ واری منّ اِتگ ءُ گْوشتگ کہ سرمچاراں مروچی بیست ھشت فروری ءِ ادار دہ ءُ نیم ءَ پنجگور ءِ چتکان نیو کمپلکس ٹرمینل ءِ نزیک ءَ پاکستانی پوج ءِ گاڑی ءِ سر ءَ اُرش کتگ- چریشی ءِ آسر ءَ گاڑی ءَ سواریں یک اپسرے ءَ ھوار دو کارندہ مرتگ اَنت- اے پاکستانی آرمی ءِ شرکت ءِ گاڑی بیتگ کہ آ آودہ ناہ ءِ بھاکنگ ءِ کار ءَ گوں بیتگ اَنت۔ 

میجر گْوھرام بلوچ ءَ دیمتر ءَ گْوشتگ کہ مئے سرمچاراں دگہ یک اُرشے بیست ھپت فروری ءِ شپ ءِ نُھ بیست ملٹ ءَ کیچ ءِ بُنجاھی شھر تربت ءِ ھند سنگانی سر ءَ بورڈ ءِ نزیک ءَ پاکستانی پوج ءِ چوکی ءِ سر ءَ آر پی جی ءِ دو گولہ آس داتگ کہ آ چوکی ءِ تہ ءَ کپتگ اَنت چریشی ءَ دو کارندہ مرتگ ءُ یکے ٹپی بیتگ- تربت شھر ءِ تھی ءُ ڈنی راھانی سر ءَ بازیں چوکیاں چہ اَبید ھم بلوچ سرمچارانی اے وڑیں اُرشاں چہ دُژمن دماگی نادُراھی ءِ آماچ اِنت- ھمے ھاتر ءَ زورگریں پوج وتی بے سوبی ءَ چیر دیگ ءِ ھاتر ءَ میتگانی سر ءَ تیرگواری کتگ ءُ چریشی ءِ آسر ءَ لھتے مردمانی ٹپی بوگ ءِ ھال اِنت-

میجر گْوھرام بلوچ ءَ گْوشتگ کہ اے اُرش بلوچستان ءِ وتواجھی ءَ تاں برجاہ بنت-

گوستگیں روچاں پاکستانی پوج ءِ دست ءَ زورانسری آوار جنگ بوتگیں براھوئی زبان ءِ شائر خواجہ مزمل ءِ کھول ءَ بیگواھیں مردمانی پانکجنین گل وائس فار بلوچ مسنگ پرسنز ءِ رھشونانی ھمرائی مروچی شال پریس کلب ءَ اھوالکاراں گوں تران کتگ –

اھوالکاراں گوں تران کنان ءَ خواجہ مزمل ءِ کماش حاجی محمد حنیف ءَ گوشتگ کہ بیست ءُ شش فروری ءِ روچ ءَ من کمبرانی دگ ءِ سر ءَ دکان ءَ نندوک بوتگ انت کہ سی ٹی ڈی ءِ کارمند گاڑیاں سوار بوتگ ءُ اتکگ انت ءُ منی نام ءِ جست کتگ من وتی نام گوشتگ گڈا آھاں مناں گوشتگ کہ گاڑی ءَ سوار بو من گاڑی ءَ سوار بوتگاں گڈا آھاں منی موبائیل پچ گپتگ ءُ گوشتگ کہ مارا وتی گِس ءَ بہ بر، وھدیکہ ما وتی گِس ءِ دپ ءَ رستگ انت گڈا من گوشتگ کہ ایش انت منی گِس گڈا آھاں مناں گوشتگ کہ گاڑی ءَ تہ ءَ بہ نند وت ایر اتکگ انت گِس ءِ تہ ءَ پُتر اِتگ انت –

آئی ءَ گوشتگ کہ گِس ءِ پٹ ءُ پول ءَ پد وھدیکہ آھاں درکانودی ھچ چیز دست نہ کپتگ گڈا آھاں منی چُک دزگیر کتگ آؤرتگ –

آئی گوشتگ کہ چریشی ءَ پد ما دمگی تھانہ ءَ شُتگ ایں ارزی داتگ کہ سی ٹی ڈی ءِ کارمنداں منی چمانی دیم ءَ منی زھگ آوار جتگ بُرتگ شما ارزی ءَ نبشتہ ءَ بہ کن ات گڈا اے ادارھ ءَ مناں ھمے گوشتگ ءُ ارزی نبشتہ نہ کتگ کہ ما ھچ وڈیں فورس ءِ بگیری ءَ ارزی نبشتہ نہ کن ایں –

حنیف کمبرانی واکدار ءُ آمیدگساں گوں لوٹ کتگ کہ منی چُک ءِ یل کنگ ءَ وتی کرد ءَ پیلو بہ کن انت –