TBP Balochi

یک بلوچ زالبولے ماں بندر عباس ءَ پاھو دیگ بیتگ – پاھو گوستگیں دو روچاں پاھو ءِ ھکم ءِ سر ءَ ٹپاسکاری بیتگ ءُ چریشی ءَ چہ آ پاھو دیگ بیتگ-

پاھو دیگ بیتگیں زالبول ءِ نام لیلا بامری ء داد عباس ءِ نام ءَ زانگ بہ بیتگ کہ آ پِنگ بخش جازموریان زرباری اُستان کرمان ءِ نندوک اِنت-

اھوالانی رد ءَ پاھو دیگ بیتگیں زالبول لیلا بامری سَے سال ءَ پیش ماں نشہ باپاری ءِ پژدر ءَ دزگیر کنگ بیتگ، زالبول ءَ دس زھگ ھست اَنت آیانی اُمر ءُ ھپت ءُ ھشت ءِ سال ءِ میان ءَ اَنت-

اھوالانی تہ ءَ گوشگ بیتگ کہ زالبول دوشمبے ءِ روچ ءَ پاھو دیگ بیتگ ءُ سَے شمبے ءِ روچ ءَ آئی ءِ لاش کھول ءِ دست ءَ بیتگ کہ اود ءَ پنگ ءَ کھول ءَ کَل ءُ کسارات کتگ-

اھولانی تہ ءَ گوشگ بیتگ کہ پاھو دیگ بیتگیں زالبول ءِ کھول پاھو دیگ ءِ وھد ءَ آئی ءِ کھول ھال دیگ نہ بیتگ پاھو ءَ دمانے پیسر آئی ءِ کھول ماں رھوتی ءَ گپ ءُ تران ءَ اھوال بیتگ اَنت-

پنگ کجا اِنت اود ءِ نندوکین مردم کَے اَنت؟

پنگ زرباری کرمان ءُ سیستان و بلوچستان ءَ اَنت کہ اود ءَ ایرانی ھساب ءَ اے اُستان کرمان ءِ بھر اِنت کہ شاہ ءِ زمانگ ءَ چہ سیستان و بلوچستان ءَ سندگ ءُ کرمان ءِ بھر کنگ بیتگ کہ اود ءَ یک کساسے ءَ آبادیں مردم درست بلوچ اَنت-

دومی نیمگ ءَ بلوچ کمپعن فعالین ءِ گوشگ اِنت کہ سال دوھزار ءُ بیست ءُ دو ءَ یک سد ءُ سَے مردمانی پاھو ءِ ھال اتکگ اَنت ءُ یک سد ءُ ھپتاد ءُ نُھ کس پاھو دیگ بیتگ اَنت کہ ایشانی توک ءَ سَے در بلوچ اَنت ءُ سرجمیں ایران ءَ سَے بھر پاھو دیگ بیتگیں بلوچانی ئیگ اِنت-

بلوچستان ءِ کیچ دمگ ءِ تمپ ھنکین ءَ چہ سیزدہ سال پیسر بیگواہ بیتگیں وھاب بلوچ ءِ مات فہمیدہ بلوچ ءَ کراچی ءَ برجاھیں بیگواھیں بلوچانی یل کنائنگ ءِ ھاترءَ برجاھیں وائس فار بلوچ مسنگ پرسنز ءِ شُد ھڑتالی بنجل ءَ اَتکگ ءُ وتی چک ءِ یل کنائنگ ءِ ھاترءَ دزبندی کُتگ ءُ گُشتگ کہ آئی چُک سیزدہ سال پیسرءَ دگہ مردمانی پجیگ ءَ دزگیر کنگ ءَ پد بیگواہ کنگ بیتگ اَت، زھگ ءَ گوں ھوار بیگواہ بیتگیں دگہ مردم یل کنگ بیتگ اَنت بلے وھاب سیزدہ سالاں پد ھم یل کنگ نہ بیتگ۔

آئی ءَ گُشتگ کہ وھاب بلوچ ھشت مارچ دو دو ھزار دہ ءَ دزگیر کنگ بیتگ اَت چہ آئی ءِ بیگواھی ءَ پد یو این ءَ ھوار درستیں ڈیھی ءُ میان اُستمانی ادارگاں چہ دزبندی کُتگ کہ آ وھاب بلوچ ءِ یل کنائنگ ءِ ھاترءَ وتی کردءَ پیلو بہ کن اَنت، البت ھمک جاہ ءَ بے امیتی ءَ ابید مارا ھچ نہ رستگ۔

آئی ءَ گُشتگ پاکستان ءَ آمید گِس ھست اَنت اگں وھاب جرمکار اِنت گُڑءَ آئی ءَ آمید گِس پیش کنگ بہ بیت، کم چہ کم مارءَ اَے گُشگ بہ بیت کہ آئی ءَ کجام ھما مزنیں جرمکاری ءِ کُتگ آ سیزدہ سالاں داں بیگواہ کنگ بیتگ۔

آئی ءَ گُشتگ کہ وھدے عبدالوھاب دزگیر کنگ بیتگ اَت آ نھمی مکتب ءِ نودربر بیتگ آئی بیگواھی ءَ پد مئے لوگءِ درستیں وشی مُرتگ اَنت ءُ پہ مارا وشیانی روچ ھم گمانی روچ جوڑ بیتگ اَنت۔

آئی ءَ ڈیھی ءُ میان اُستمانی ادارگاں چہ دزبندی کُتگ کہ وھاب بلوچ یل کنائنگ بہ بیت دانکہ مارءَ تورناکیں ودارءَ چہ آجوئی رست بہ کنت ءُ مئے زندمان ءَ وشی پدءَ واتر بہ بنت۔

زانگ بہ بیت بلوچستان ءَ استانی ادارگانی دستءَ مردمانی بیگواہ کنگ ءِ جیڑہ ءَ یک سنگینیں جاورھالی ءِ دروشم زُرتگ۔

یک نیمگ ءِ کہ ھمودءَ گوستگیں یک دھک ءَ چہ گیشترءِ وھد اِنت کہ بیگواھیں مردمانی یل کنائنگ ءِ ھاترءَ زھرشانی بنجل ماما قدیر ءِ مستری ءَ جُنزگ ءَ اِنت ھمودءَ دومی نیمگ ءَ بلوچستان ءَ ڈن جتاھیں بلوچ سیاسی گل ءُ پاٹیانی نیمگ ءَ ھم بیگواھیں مردمانی یل کنائنگ ءِ ھاترءَ زھرشانی ءُ سرپدی کمپین جُنزینگ بنت۔

بلوچستان ءِ دمگ کیچ ءَ چہ پاکستانی لشکریاں دو مردم زورانسری بیگواہ کُتگ ءُ ناشناسیں ھنداں بُرتگ اَنت۔

بیگواہ بیتگیں ورناھانی پجار واجو ء وھاب ءُ حسیم ء شفیع محمد کے ناماں چہ بیتگ۔ بیگواہ بیتگیں ورناہ ھما وھدءَ لشکریاں دزگیر کُتگ اَنت کہ آ چہ گیاب ءَ گواک ءَ رؤگ ءَ بیتگ اَنت۔

اھوالانی ردءَ زورانسری بیگواھی ءِ آماچ بیتگیں دوھیں ورناہ نزیک ءَ سیاد اَنت ءُ دوھیں تیل ءِ باپار ءَ بندوک اَنت ءُ آ دزگیر ھم ھما وھدءَ کنگ بیتگ اَنت کہ وھدے آ زَرانی گرگ ءَ ھدابُند ءِ گورءَ روگ ءَ بیتگ اَنت۔

زانگ بہ بیت کہ یکے روچے تہءَ کیچ ءَ سئمی زورانسری بیگواھی ءِ وئیل اِنت کہ چدو پیسر گوستگیں شپ ءَ تربت آبسر ءَ چہ لشکریاں محمد جان ء حکیم نامی ایں ورناھے لوگءَ بیڑ بُرتگ ءُ بیگواہ کُتگ اَت۔

بلوچستان ءِ دو جتاھیں دمگانی تہءَ دیما اتکگیں کدرتی ءُ دگے وئیلاں سئے مردم بیران بیتگ اَنت ءُ سئے ٹپی بیتگ اَنت۔

اھوالانی ردءَ آر سی ڈی شھدگ یک مچھ ءُ نوکنڈی ءِ نیام ءَ ایرانی زمیاد گاڑی ءُ ٹرالر نیام ھترناکیں ڈِکَّر ءِ سوب ءَ دوھیں گاڑی بن گپتگ اَنت، گاڑیاں سواریں سئے مردم سُتکگ اَنت۔

وئیل آماچیں دو مردم بیران بیتگ اَنت وھدیکہ یکے نوکنڈی ناردراھجاہ ءَ برگ بیتگ۔

دومی نیمگ ءَ خضدار ءِ دمگ نال ءَ آزمانی گروگ کپگءِ سوب ءَ دو لوگ کپتگ اَنت، چریشی ءَ یک مردمے بیران بیتگ ءُ 2 ٹپی بیتگ اَنت۔

چہ کراچی ءَ پاکستانی پوج سی ٹی ڈی ءَ دو مردمانی دزگیری ءِ ٹاہ داتگ دومی نیمگ ءَ بلوچستان ءِ دمگ کیچ تربت ءَ پاکستانی پوج ءَ یک مردمے زورانسری آوار جنی ءَ پد بیگواہ کتگ –

کاؤنٹر ٹیررازم ڈیپارٹمنٹ ءَ ٹاہ داتگ ءُ گوشتگ کہ آھاں کراچی ءِ دمگ ناظم آباد پاپوش نگر ءَ بیڑ برتگ ءُ ھمے میان ءَ دو مردم گوں تراکناکیں شورو ءُ مزنیں سلاھانی ھمراھی ءَ دزگیر کتگ انت –

سی ٹی ڈی ءِ پٹ پولی سرمستر چوہدری غلام سفدر ءِ رِد ءَ ناظم آباد پاپوش نگر ءَ کاروانی کنان ءَ دو کتکار فہد بلوچ ءُ زاہد بلوچ دزگیر کتگ انت –

آئی ءِ رِد ءَ کتکارانی گور ءَ یک کلاشنکوپ ءِ، ھبدہ نائن ایم ایم پسٹول، کلاشنکوپ ءُ نائن ایم ایم پسٹول ءَ ھوار دگہ توپکانی شش ھزار ءُ پنچ سد تیر ءُ نائن ایم ایم پسٹول ءِ سِی ءُ چار میگزین دستیگ کتگ انت –

غلام سفدر ءِ رِد ءَ آھاں ھال رستگ کہ اے کتکاراں بازیں سلاھے گون ءُ کراچی ءِ تہ ءَ پہ اُرش کنگ ءِ ھاتر ءَ شور بندی کنگ ءَ انت –

غلام صفدر ءِ رِد ءَ کتکار زاہد بلوچ چدوپیسر باز براں دزگیر کنگ بوتگ، باز رند ءَ جیل ءَ شتگ- کتکار ءِ بگیری ءَ سی ٹی ڈی کارگس ءَ ارزی نبشتہ کنگ بوتگ –

دومی نیمگ ءَ بلوچستان ءِ دمگ کیچ ءِ بنجاھی شھر تربت ءَ پاکستانی پوج ءَ دوشی شپ یک ورنایے زورانسری آوار جتگ ءُ بیگواہ کتگ –

ورنایے زورانسری آوار جنی ءِ ھبر آئی ءِ کھول ءَ راست کتگ ءُ گوشتگ کہ گوستگیں شپ ءِ ادار سَے ءَ پاکستانی پوج ءَ محمد جان ء حکیم بلوچ چہ جند ءِ گِس ءَ آوار جتگ ءُ بیگواہ کتگ –

کھول ءِ رِد ءَ ورنا ھنگت بیگواہ انت آئی ءَ چہ برزی تبک ءِ واکداراں آئی ءِ وش ءُ سلامتی یل کنگ ءِ لوٹ کتگ –