TBP Balochi

بلوچستان ءِ دو دمگاں تیرگواری ءِ دو جتائیں وئیلاں دو مردم کُشگ بیتگ اَنت-

گیشیں ھالانی رِد ءَ گوستگیں روچ ءَ کیچ ءِ دمگ تمپ ءَ ناشناسیں سلاہ بندیں پرپٹ سواراں یک مردمے آوار جتگ ءُ پد ءَ آ تیرجتگ ءُ کُشتگ آئی جون چگل داتگ-

کُشگ بیتگیں ورنائے پجّار کپا ء اسلام نام ءَ چہ بیتگ-

دومی نیمگ ءَ پنجگور ءِ دمگ کیلکور ءَ یک مردمے ءِ لاش دزکپتگ کہ آ تیرجتگ ءُ کُشتگ،  لاش ٹیچنگ نادُراھجاہ پنجگور ءَ برگ بیتگ کہ اود ءَ آئی ءِ پجّار شوکت ء مولا بکش جھمنند گچک نام ءَ چہ بیتگ-

البت وئیلانی سوب داں انگت زانگ نہ بیتگ اَنت-

نمدی یے پہ آبد جان ءُ سنگت کمبرو ءُ گلزمین ءِ بچانی نام ءَ

نبشتہ کار: سنگت ساگر

دی بلوچستان پوسٹ

سلام ءُ دروت نمیرانیں آبُل جان ، من نزاناں تو چتور بہ ئے ترا باریں پمّن زھیر کنت یا نہ کنت بلَے من دمانے ھم بے تئیگ ءَ بوگ ءَ نہ آں انچو سماء بیت منی چیزے گار اِنت یار مرچی من ٹیلی گرام پچ کُت تئی روان داتگیں توار بند پچ کُت آں ، ھمے ساھت ءَ انچو سماء بُوت من ءُ تو کش ما کش نشتگیں ہوشاب ءِ کوھانی میان ءَ ھما تلمب ءِ چیر ءَ داں انگت ءَ ھم دیوان اِنت-

آبُل من ءَ ماھُو ءَ تئی کلوہ داتگ اِت اَنت ءُ گُشتگ اِت ئِے کہ تو زوت پمن پیداکے بلَے من اے نزانت تو نیم راہ ءَ چو پاکستان ءِ بجلیانی رنگ ءَ مارا دروھے ، تئی اناگتی روگ من ءَ را بے تاھیر کنگ ءَ اِنت، ناکہ من ونت کنگ ءَ آں ءُ نئیکہ من وپت کنگ ءَ آں انچو سماء بیت من پتّو ھچ نہ کُت ، دنیگا ترا باز کار کنگی ءَ ات ، ھر ھما کار کہ تو من ءَ پہ مُجتی گُشتگ ات اَنت تو من ءَ مُدام ھمے گُشت کہ ھما کارا بکن کہ ترا تاھیر بدنت من ترا گُشگ لوٹاں من ءَ پہ گُلزمین ءَ کار کنگ تاھیر رس ایت گڑا نی من چتور پہ راج ءَ کارکُت کناں ،نی اے سوج ءَ کئے من ءَ بدنت نوں کئے کیت منی وڑین گنوکاں اے راہ ءِ تہ ءَ کار کنگ ءَ سکین دنت۔

آبُل من ءَ ھما زمستان ءِ شپ یاتیں تو ءُ کمبرو منی دیم ءَ اتکے منی اولاک ءَ من ءَ دروھیتگ ات من پریشان ءَ ات اَنت کہ چتور وتی سئیکل ءَ گوں گِس ءَ بہ رواں بلے ھمے روچ ءَ من تمردیں سنگتے دیست کہ نام یحیحی ءَ ات بزانکہ کمبرو ءَ منی گپ دپ ءِ چامپ اِت ءُ گُشت کہ اڑے سنگت تو بلوچستان ءَ ئے دل ءَ مزن کن تو پہ سلامتی وتی گِس ءَ رسے من استاں ، من ءَ یات ات انت کمبرو ءَ منی سئیکل زُرت ءُ وتی “ کلیت” بزانکہ چابی من ءَ دات انت ءُ گُشت ئِے اے سئیکل ءَ بزور تیل ھم مانے برو ہچ ٹینشن مزور سھب ءَ تئی سئیکل ترا رس ایت ، من ھیران اِت انت کہ اے سنگت من ءَ پجّا نیاریت بلے انگت ءَ چتور من ءَ وتی نوکیں 125 ءِ دات ءُ پہ کندان من ءَ رکُست ئِے کُت ۔ کمبرو من اولی رندا دیستگ ات من ءَ گوں بلے اے نمیرانیں ورناہ انچو سلام ءُ درائی کنگ ءَ اَت گُش ئے من ءَ را درکسانی ءَ چے زانگ ءَ اَت۔

یار کمبرو من نزانت کہ اے مئے گڈّی دیدار بیت چوناھا پد ءَ باز رندا من تربت ءَ کہ شُتگ آں گڑا آبد ءَ گوں مدام ڈیک وارتگ پد ءَ من مُدام تئی جُست کُتگ ءُ من ءَ مُدامی یے وڑ ءَ آبُل جان ءَ گُشتگ کہ کمبرو وتی اوتاک ءَ شُتگ ،باز رندا ھمے ارادہ کُتگ ئِے کہ گوں تو ھما وڑیں دیوانے کناں بلے چون کناں وھد بے وپایے ، ما نزانت کہ شما چُش جلدی سپر کن ئے ، آبُل ترا یاتیں تو من ءَ گُشتگ ات من تئی ھما کارا کناں بلے کمو سبر بکن انّوں سنگت گشت ئِے کنگ ءَ اَنت پد ءَ تو اھوال نہ کُت منی ھیالاں تئی گڈی میسج ءَ بیست روچ گوستگ ات پد ءَ یک روچے سنگتے منی کِرّا اتک من ءَ گُشت ئِے مئے لھتے سنگت دوشی ھوشاپ ءَ ڈرون ءِ میڑ ءَ شھید بوتگ انت گڑا من زُوت زُوت ءَ انٹرنیٹ پچ کُت ءُ چاراِت کہ ہئو لھتے سنگت جنگ بوتگ ءَ آہانی لڑ ءَ تو ءُ کمبرو ھم ھوار اِت ئے پد ءَ من دیست کہ کمبرو ھرکس ءَ وتی اسٹیٹس کُتگ ات ، درستاں ھمے نبشتہ کُتگ ات کہ “ کمبرو پہ زمین سالونک بُوت “ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ گوستگیں روچ ءَ زھرشانی ءِ وھد ءَ چار کس دزگیر کنگ ءَ پد ناشناسیں جاھاں برگ بیتگ اَنت-

آوار جنگ بیتگیں مردمانی پجار زکریا کھرزئی، مھمد کوھسارء، الیاس براھوئی ءُ نمعت براھوئی ءِ ناماں زانگ بیتگ اَنت-

اے مردم گوستگیں روچ ءَ ماں زاھدان ءَ زھرشانی ءِ وھد ءَ دزگیر کنگ ءَ پد بیگواہ کنگ بیتگ اَنت-

ھمے وڑ ءَ گوستگیں آدینگ ءَ گرگ بیتگیں مرتضی گوستگیں روچ ءَ یل بیتگ-

مرتضیٰ آذرش گوستگیں آدینگ ءَ ما زاھدان ءَ مکی مسیت ءِ نزیک ءَ ایرانی چیریں ادارھاں آوار جنگ ءَ پد بیگواہ کتگ ات –

مرتضی ءِ گرگ ءِ وھد ءَ آئی ءِ دزگیر کنگ ءِ تامر ھم شنگ بیتگ ات کہ اود ءَ گندگ بیت اِنت ایرانی پورس آئی ءَ آوار جنگ ءُ برگ ءَ اَنت-

بلوچ ندکار ڈاکٹر جلال بلوچ ءِ نوکتریں کتاب “بھرام درویش ” زوت چہ سنگر پبلیکیشن ءِ نیمگ ءَ چاپ شنگ بیت –

ڈاکٹر ءِ چد ءُ پیسر” پولیٹیکل منیجمنٹ، عورت اور سماج، ریھان دی لیجنڈ، نورا دی میجر ، بلوچ نودربر گل ءِ انفارمیشن سیکرٹری شبیر بلوچ” ءِ سر ءَ کتاب چاپ ءُ شنگ بوتگ انت ءُ آئی ءِ نوکتریں کتاب “بھرام درویش” کہ ھمے زوتاں چہ سنگر پبلکیشن ءِ نیمگ ءَ چاپ بوگ ءَ انت-

سنگر پبلیکیشن ءِ نیمگ ءَ گوشگ بوتگ کہ ڈاکٹر جلال بلوچ ءِ نوکتریں کتاب بھرام درویش ھمے زوتاں چہ سنگر پبلیکیشن ءِ نیمگ ءَ چاپ ءُ شنگ کنگ بوگ ءَ انت کہ اے کتاب ءِ تہ ءَ نمیرانیں میجر محمد کریم پنام ءِ ملا بھرام ءِ کرد ءِ سر ءَ چمشانک دیگ بوتگ –

اے درگت ءَ ڈاکٹر جلال بلوچ ءَ گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ منی اولی کتاب پولیٹیکل منیجمنٹ کہ مارچ دوھزار بیست ءَ شنگ بوتگ کہ آ ھیلکاری کتاب یے کہ پولیٹیکل سائنس (پولیٹیکس) ءِ درگت ءَ انت،دومی کتاب عورت اور سماج ریسرچ بیس کتاب یے ءُ آئی ءِ تہ ءَ گوستءِ ھستیں وھدے کمبینیشن ءِ جون دوھزار بیست ءُ یک ءَ شنگ بوتگ ، گوستگیں ماہ ءَ فروری اسٹے بلوچستان ءِ سر ءَ ریسرچ پیپر ءِ کہ کتابی دروشم انت آ ھم شنگ بوتگ ءُ آئی ءَ گوشتگ کہ اے چارمی کتاب انت کہ شھید محمد کریم پنام ءِ بھرام جان ءِ زند ءِ سر ءَ انت کہ ھرچی ما وت مار اِتگ ھما چیزانی من نبشتہ کنگ ءِ جھد کتگ انت ءُ ملائے زند ءُ کرد کہ ھرچی مئے دیم ءَ گوستگ انت ھما اے کتاب ءِ تہ ءَ مان انت – اے کتاب ھشت دہ روچانی میان ءَ سرجم کنگ ءُ چاپ شنگ بیت –

آئی ءَ گوشتگ کہ اشاں چہ ابید دوھزار ھژدہ ءَ ریھان دی لیجنڈ من جتگ ءُ یکجاہ کتگ ات کہ بازیں اردو ءُ بلوچی نبشتکارانی نبشتانک بوتگ انت – آئی ءَ چہ پد بیگواھیں شبیر جان ءِ سر ءَ ھم نبشتگیں ھر نبشتانک ءِ بوتگ انت یکجاہ کتگ ءُ کتابی دروشم ءَ آورتگ انت ءُ دوھزار نوزدہ ءَ شنگ بوتگ – سیمی کتاب کہ منی کتاب کہ من ترتیب داتگ آ نورا دی میجر بوتگ کہ شھید پیرک جان ءِ سر ءَ بوتگ آئی ءِ تہ ءَ ھم بازیں نبشتکارانی نبشتانک زرتگ ءُ کتابی دروشم ءَ آؤرتگ انت –

سنگر ءِ نیمگ ءَ گوشگ بوتگ کہ ملا بھرام بلوچ آجوئی جھد ءِ یک سر ءِ بوتگ کہ آ پانزدہ سالاں تاں بلوچ سرڈگار ءِ پھازگ ءُ آئی ءِ آجوئی ءِ ھاتر ءَ جھد کنگ ءَ بوتگ کہ گڈی ءَ ماں مزنبند ءِ کوہ ءَ زورگیرانی ڈرون اُرشے ءَ گوں ھمراھے دگہ ھپت تمردیں سرانی ھمراھی ءَ شھید بوتگ –

آئی ءِ شھیدی پہ زرمبشت ءَ بلاھیں تاوان ءِ بلے آئی ءِ آدرش ھمک وھد ءَ آجوئی زرمبشت ءِ جھدکارانی رھشونی ءَ کن انت ءُ آئی ءِ کار ءُ کرد ، نزریہ ءُ پگر ءِ بدولت ءَ کاروان ءَ گیشتر مھکم بیت انت –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ھمک آدینگانی وڑ ءَ اے آدینگ ءَ ھم مردماں یک کساسے ءَ بیگواھیں مردمانی یل کنگ ءِ ھاتر ءَ زھرشانی کتگ-

زھرشانی کنوکاں ایرانی سرکار ءِ ھلاپ ءَ اوگام “مرگ بر خامنہ ای ” ءِ اوگام جنان ءَ بیگواھیں مردمانی یل کنگ ءِ لوٹ کتگ-

دومی نیمگ ءَ شھر ءَ زھرشانیانی دارگ ءِ ھاتر ءَ بازیں کچے ءَ پولیس ءَ زاھدان مکی مسیت انگیر کتگ ءُ زھرشانی دیم ءَ اوشتوک بیتگ اَنت-

اود ءَ زھرشانی کنوکانی ءُ پولیس ءِ میان ءَ دپ چاکی ھم بیتگ اَنت ءُ ایشانی ھواری ءَ زھرشانی کنوکاں وتی زھرشانی برجاہ داشتگ-

دومی نیمگ ءَ روکپتی بلوچستان ءِ نیکراھی رھشون مولانا عبدالحمید بلوچ ءَ گوشتگ کہ بدترین سرکار ھما اِنت کہ آ وتی راج ءَ گوں دروگ بہ بند ایت-

آئی ءَ گوشتگ کہ زھرشانی سر ءَ لٹ ءُ کٹ ءُ وانگ ءُ دگہ آسراتیانی سر ءَ کار نہ بوگ ءِ وڑیں دروگانی دارگ سرکاری پھنات مھلوک ءَ گوں دروگ مہ بند اَنت-

آئی ءَ سرکار ءِ سر ءَ ایراد گپتگ ءُ گوشتگ کہ اگاں چوشین مھم برجاہ بیت اَنت گڑا گیش جاور ھراب بوت کن اَنت-

آئی ءَ ایران ءِ وزیر ھارجہ حسین امیر عبداللھیان ءِ تر ءُ تاب ما میان اُستمان ءِ پژدر ءَ گوشتگ کہ اے گپ اجکہ کنوکیں گپے کہ امیر عبداللہ یان مروچی کجا نہ کجا کوش ءُ یا دزگیری نہ بیتگ اَنت مروچی ھم سرجمیں ایران ءَ بیوکیں زھرشانیاں مھلوک بند ءُ زندانی اَنت-

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل مروچی چہ کراچی ءَ چست کنگ ءُ شال ءَ برگ بوتگ –

گل ءِ کمک سرکماش ماما قدیر بلوچ ءَ مروچی کراچی پریس کلب ءِ سرکماش سعید سربازی، گوستگیں سرکماش فاضل جمیلی، عارف بلوچ، سعید جان بلوچ ، رفیق بلوچ، ایچ آر سی پی کراچی ءِ کو آرڈینیٹر سرکماش اسد اقبال بٹ، کمک سرکماش قاضی خضر، سندھ ءِ کونسل ممبیر سعیدبلوچ، کوآرڈینیٹر عبدالحئی ، بلوچ یکجہتی کمیٹی کراچی ءِ آرگنائزر بانک آمنہ بلوچ، ڈپٹی آرگنائزر عبدالوہاب بلوچ، میر بالاچ، زاہد بگٹی، نور شاہ، سہیل بلوچ، عدیل بلوچ، ظہیر نور، یاسر بلوچ ءُ دگہ مردماں گوں گڈی ءَ دچار کپتگ ءُ اجازت کتگ انت –

آئی ءَ کراچی بنجل ءِ درگت ءَ درسیں مردمانی منت گپتگ ءُ گوشتگ کہ اے مردمانی کمک کنگ ءَ ابید پہ مئے دست بنجل چلائینگ نہ بوتگ ات کہ اے مردماں مدامی گوں ما ھمراہ داری کتگ، آئی ءَ درسیں راجداریں پاٹی، سول سوسائٹی ، وکیل، ڈاکٹر، سیاسی ءُ چاگردی باسکانی ھم منت گپتگ کہ آ بنجل ءَ اتکگ انت –

ماما قدیر بلوچ ءَ گوشتگ کہ ھاکمانی زلم زوراکیاں ابید ھم مئے جھد تاں گڈی مردم ءِ یل بوگ ءَ تاں برجاہ مانیت، دیمتر ءَ گل بیگواھیں مردمانی زوت یل کنائینگ ءِ ھاتر ءَ وتی جھد ءِ تہ ءَ تیزی کاریت –

زانگ بہ بیت بلوچستان ءِ زورانسری آوار جنگ بوتگیں مردمانی بگیری ءَ کار کنوکیں بیگواھیں مردمانی پانکجیں گل وائس فار بلوچ مسنگ پرسنز ءِ بنجل گوستگیں سینزدہ سالاں برجاہ انت، شال ءَ گیشیں سارتی ءِ سوب ءَ بنجل کراچی ءَ آرگ بیت اِنت ءُ سارتی وھدیکہ کم بیت گڈا دوبر شال ءَ برجاہ دارگ بیت اِنت کہ اودا سرجمیں بلوچستان ءِ بیگواھیں مردمانی کھول کائنت ءُ وتی زھرشانی ءَ نبشتہ کنائین انت –

روکپتی بلوچستان ءَ شانزدہ روچ ءَ پیش ایرانی چیریں ادارھانی دست ءَ آوار جنگ بیتگیں نیکراھی رھشون داں انگت ءَ یل نہ بیتگ اَنت-

گیشیں ھالانی روکپتی بلوچستان ءِ دمگ زاھدان ءَ شانزدہ روچ ءَ پیش ایرانی چیریں ادارھانی دست ءَ گرگ بیتگیں نیکراھی دو رھشون داں انگت ءَ یل نہ بیتگ اَنت –

آوار جنگ بیتگیں مردمانی پجار زاھدان ءِ نیکراھی وانگجاہ دارالعلوم ءِ استاد مفتی رضا رخشانی ءُ مولوی عبدالرؤف رخشانی ءِ ناماں زانگ بیتگ اَنت –

ھردوک زاھدان ءَ دارلعلوم ءِ اُستاد اَنت کہ شانزدہ روچ ءَ پیش ماں زاھدان ءَ ایرانی چیریں ادارھاں دزگیر کتگ ءُ برتگ اَنت-

ھالانی تہ ءَ گوشگ بیتگ کہ چریشی ءَ پد آیانی بارو ءَ ھچ اھوال دیم ءَ نیتکگ اَنت-